9. வட்டபோதகசரியாவண்ணனா

72. நவமே மக³தே⁴ வட்டபோதகோதிஆதீ³ஸு அயம் ஸங்கே²பத்தோ² – மக³த⁴ரட்டே² அஞ்ஞதரஸ்மிம் அரஞ்ஞப்பதே³ஸே வட்டகயோனியம் நிப்³ப³த்தித்வா அண்ட³கோஸம் பதா³லேத்வா அசிரனிக்க²ந்ததாய தருணோ மம்ஸபேஸிபூ⁴தோ, ததோ ஏவ அஜாதபக்கோ² வட்டகச்சா²பகோ யதா³ அஹம் குலாவகேயேவ ஹோமி.

73. முக²துண்ட³கேனாஹரித்வாதி மய்ஹம் மாதா அத்தனோ முக²துண்ட³கேன காலேன காலம் கோ³சரம் ஆஹரித்வா மம் போஸேதி. தஸ்ஸா ப²ஸ்ஸேன ஜீவாமீதி பரிஸேத³னத்த²ஞ்சேவ பரிபா⁴வனத்த²ஞ்ச ஸம்மதே³வ காலேன காலம் மமம் அதி⁴ஸயனவஸேன பு²ஸந்தியா தஸ்ஸா மம மாதுயா ஸரீரஸம்ப²ஸ்ஸேன ஜீவாமி விஹராமி அத்தபா⁴வம் பவத்தேமி. நத்தி² மே காயிகம் ப³லந்தி மய்ஹம் பன அதிதருணதாய காயஸன்னிஸ்ஸிதம் ப³லம் நத்தி².

74. ஸம்வச்ச²ரேதி ஸம்வச்ச²ரே ஸம்வச்ச²ரே. கி³ம்ஹஸமயேதி கி³ம்ஹகாலே. ஸுக்க²ருக்க²ஸாகா²னம் அஞ்ஞமஞ்ஞம் ஸங்க⁴ட்டனஸமுப்பன்னேன அக்³கி³னா தஸ்மிம் பதே³ஸே த³வடா³ஹோ பதி³ப்பதி பஜ்ஜலதி, ஸோ ததா² பதீ³பிதோ. உபக³ச்ச²தி அம்ஹாகந்தி மய்ஹம் மாதாபிதூனஞ்சாதி அம்ஹாகம் வஸனட்டா²னப்பதே³ஸம் அத்தனோ பதிட்டா²னஸ்ஸ அஸுத்³த⁴ஸ்ஸாபி ஸுத்³த⁴பா⁴வகரணேன பாவனதோ பாவகோதி ச க³தமக்³கே³ இந்த⁴னஸ்ஸ ப⁴ஸ்மபா⁴வாவஹனதோ கண்ஹவத்தனீதி ச லத்³த⁴னாமோ அக்³கி³ வனருக்க²க³ச்சே² த³ஹந்தோ காலேன காலம் உபக³ச்ச²தி.

75. ஏவம் உபக³மனதோ ததா³பி ஸத்³தா³யந்தோதி ‘‘த⁴மத⁴ம’’இதி ஏவம் ஸத்³த³ம் கரோந்தோ, அனுரவத³ஸ்ஸனஞ்ஹேதம் தா³வக்³கி³னோ. மஹாஸிகீ²தி பப்³ப³தகூடஸதி³ஸானம் இந்த⁴னானம் வஸேன மஹதியோ ஸிகா² ஏதஸ்ஸாதி மஹாஸிகீ². அனுபுப்³பே³ன அனுக்கமேன தம் அரஞ்ஞப்பதே³ஸம் ஜா²பேந்தோ த³ஹந்தோ அக்³கி³ மம ஸமீபட்டா²னம் உபாக³மி.

76. அக்³கி³வேக³ப⁴யாதி வேகே³ன ஆக³ச்ச²தோ அக்³கி³னோ ப⁴யேன பீ⁴தா. தஸிதாதி சித்துத்ராஸஸமுட்டி²தேன காயஸ்ஸ ச²ம்பி⁴தத்தேன ச உத்ராஸா. மாதாபிதாதி மாதாபிதரோ. அத்தானம் பரிமோசயுந்தி அக்³கி³னா அனுபத்³து³தட்டா²னக³மனேன அத்தனோ ஸோத்தி²பா⁴வமகம்ஸு. மஹாஸத்தோ ஹி ததா³ மஹாகே³ண்டு³கப்பமாணோ மஹாஸரீரோ அஹோஸி. தம் மாதாபிதரோ கேனசி உபாயேன க³ஹேத்வா க³ந்தும் அஸக்குணந்தா அத்தஸினேஹேன ச அபி⁴பு⁴ய்யமானா புத்தஸினேஹம் ச²ட்³டே³த்வா பலாயிம்ஸு.

77. பாதே³ பக்கே² பஜஹாமீதி அத்தனோ உபோ⁴ பாதே³ உபோ⁴ பக்கே² ச பூ⁴மியம் ஆகாஸே ச க³மனஸஜ்ஜே கரோந்தோ பஸாரேமி இரியாமி வாயமாமி. ‘‘படீஹாமீ’’திபி பாடோ², வேஹாஸக³மனயோக்³கே³ காதும் ஈஹாமீதி அத்தோ². ‘‘பதீஹாமீ’’திபி பட²ந்தி. தஸ்ஸத்தோ² – பாதே³ பக்கே² ச பதி விஸும் ஈஹாமி, க³மனத்த²ம் வாயமாமி, தம் பன வாயாமகரணத்த²மேவ. கஸ்மா? யஸ்மா நத்தி² மே காயிகம் ப³லம். ஸோஹம் அக³திகோ தத்தா²தி ஸோ அஹம் ஏவம்பூ⁴தோ பாத³பக்க²வேகல்லேன க³மனவிரஹிதோ மாதாபிதூனம் அபக³மனேன வா அப்படிஸரணோ, தத்த² தா³வக்³கி³உபத்³து³தே வனே, தஸ்மிம் வா குலாவகே டி²தோவ ஏவம் இதா³னி வத்தப்³பா³காரேன ததா³ சிந்தேஸிம். து³தியஞ்சேத்த² அஹந்தி நிபாதமத்தம் த³ட்ட²ப்³ப³ம்.

78. இதா³னி ததா³ அத்தனோ சிந்திதாகாரம் த³ஸ்ஸேதும் ‘‘யேஸாஹ’’ந்திஆதி³மாஹ;

தத்த² யேஸாஹம் உபதா⁴வேய்யம், பீ⁴தோ தஸிதவேதி⁴தோதி மரணப⁴யேன பீ⁴தோ ததோ ஏவ சித்துத்ராஸேன தஸிதோ ஸரீரகம்பனேன வேதி⁴தோ யேஸமஹம் பக்க²ந்தரம் ஏதரஹி தா³வக்³கி³உபத்³து³தோ ஜலது³க்³க³ம் விய மஞ்ஞமானோ பவிஸிதும் உபதா⁴வேய்யம் தே மம மாதாபிதரோ மம் ஏககம் ஏவ ஓஹாய ஜஹித்வா பக்கந்தா. கத²ம் மே அஜ்ஜ காதவேதி கத²ம் நு கோ² மயா அஜ்ஜ காதப்³ப³ம், படிபஜ்ஜிதப்³ப³ந்தி அத்தோ².

ஏவம் மஹாஸத்தோ இதிகத்தப்³ப³தாஸம்மூள்ஹோ ஹுத்வா டி²தோ புன சிந்தேஸி – ‘‘இமஸ்மிம் லோகே ஸீலகு³ணோ நாம அத்தி², ஸச்சகு³ணோ நாம அத்தி², அதீதே பாரமியோ பூரேத்வா போ³தி⁴தலே நிஸீதி³த்வா அபி⁴ஸம்பு³த்³தா⁴ ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனஸம்பன்னா ஸச்சானுத³யகாருஞ்ஞக²ந்திஸமன்னாக³தா ஸப்³ப³ஸத்தேஸு ஸமப்பவத்தமேத்தாபா⁴வனா ஸப்³ப³ஞ்ஞுபு³த்³தா⁴ நாம அத்தி², தேஹி ச படிவித்³தோ⁴ ஏகந்தனிய்யானகு³ணோ த⁴ம்மோ அத்தி², மயி சாபி ஏகம் ஸச்சம் அத்தி². ஸம்விஜ்ஜமானோ ஏகோ ஸபா⁴வத⁴ம்மோ பஞ்ஞாயதி, தஸ்மா அதீதபு³த்³தே⁴ சேவ தேஹி படிவித்³த⁴கு³ணே ச ஆவஜ்ஜேத்வா மயி விஜ்ஜமானம் ஸச்சம் ஸபா⁴வத⁴ம்மம் க³ஹேத்வா ஸச்சகிரியம் கத்வா அக்³கி³ம் படிக்கமாபேத்வா அஜ்ஜ மயா அத்தனோ சேவ இத⁴ வாஸீனம் ஸேஸபாணீனஞ்ச ஸோத்தி²பா⁴வம் காதும் வட்டதீ’’தி. ஏவம் பன சிந்தேத்வா மஹாஸத்தோ அத்தனோ ஆனுபா⁴வே ட²த்வா யதா²சிந்திதம் படிபஜ்ஜி. தேன வுத்தம் –

79. ‘‘அத்தி² லோகே ஸீலகு³ணோ, ஸச்சம் ஸோசேய்யனுத்³த³யா;

தேன ஸச்சேன காஹாமி, ஸச்சகிரியமுத்தமம்.

80. ‘‘ஆவஜ்ஜேத்வா த⁴ம்மப³லம், ஸரித்வா புப்³ப³கே ஜினே;

ஸச்சப³லமவஸ்ஸாய, ஸச்சகிரியமகாஸஹ’’ந்தி.

81. தத்த² மஹாஸத்தோ அதீதே பரினிப்³பு³தானம் பு³த்³தா⁴னம் கு³ணே ஆவஜ்ஜேத்வா அத்தனி விஜ்ஜமானம் ஸச்சஸபா⁴வம் ஆரப்³ப⁴ யம் கா³த²ம் வத்வா ததா³ ஸச்சகிரியமகாஸி, தம் த³ஸ்ஸேதும் ‘‘ஸந்தி பக்கா²’’திஆதி³ வுத்தம்.

தத்த² ஸந்தி பக்கா² அபதனாதி மய்ஹம் பக்கா² நாம அத்தி² உபலப்³ப⁴ந்தி, நோ ச கோ² ஸக்கா ஏதேஹி உப்பதிதும் ஆகாஸேன க³ந்துந்தி அபதனா. ஸந்தி பாதா³ அவஞ்சனாதி பாதா³பி மே அத்தி², தேஹி பன வஞ்சிதும் பத³வாரக³மனேன க³ந்தும் ந ஸக்காதி அவஞ்சனா. மாதாபிதா ச நிக்க²ந்தாதி யே மம் அஞ்ஞத்த² நேய்யும், தேபி மரணப⁴யேன மம மாதாபிதரோ நிக்க²ந்தா. ஜாதவேதா³தி அக்³கி³ம் ஆலபதி. ஸோ ஹி ஜாதோவ வேதி³யதி, தூ⁴மஜாலுட்டா²னேன பஞ்ஞாயதி, தஸ்மா ‘‘ஜாதவேதோ³’’தி வுச்சதி. படிக்கமாதி படிக³ச்ச² நிவத்தாதி ஜாதவேத³ம் ஆணாபேதி.

இதி மஹாஸத்தோ ‘‘ஸசே மய்ஹம் பக்கா²னம் அத்தி²பா⁴வோ, தே ச பஸாரேத்வா ஆகாஸே அபதனபா⁴வோ, பாதா³னம் அத்தி²பா⁴வோ, தே ச உக்கி²பித்வா அவஞ்சனபா⁴வோ, மாதாபிதூனம் மம் குலாவகேயேவ ச²ட்³டே³த்வா பலாதபா⁴வோ ச ஸச்சஸபா⁴வபூ⁴தோ ஏவ, ஜாதவேத³, ஏதேன ஸச்சேன த்வம் இதோ படிக்கமா’’தி குலாவகே நிபன்னோவ ஸச்சகிரியம் அகாஸி. தஸ்ஸ ஸஹ ஸச்சகிரியாய ஸோளஸகரீஸமத்தே டா²னே ஜாதவேதோ³ படிக்கமி. படிக்கமந்தோ ச ந ஜா²யமானோவ அரஞ்ஞம் க³தோ, உத³கே பன ஓபிலாபிதஉக்கா விய தத்தே²வ நிப்³பா³யி. தேன வுத்தம் –

82. ‘‘ஸஹ ஸச்சே கதே மய்ஹம், மஹாபஜ்ஜலிதோ ஸிகீ²;

வஜ்ஜேஸி ஸோளஸகரீஸானி, உத³கம் பத்வா யதா² ஸிகீ²’’தி.

ஸா பனேஸா போ³தி⁴ஸத்தஸ்ஸ வட்டகயோனியம் தஸ்மிம் ஸமயே பு³த்³த⁴கு³ணானம் ஆவஜ்ஜனபுப்³பி³கா ஸச்சகிரியா அனஞ்ஞஸாதா⁴ரணாதி ஆஹ ‘‘ஸச்சேன மே ஸமோ நத்தி², ஏஸா மே ஸச்சபாரமீ’’தி. தேனேவ ஹி தஸ்ஸ டா²னஸ்ஸ ஸகலேபி இமஸ்மிம் கப்பே அக்³கி³னா அனபி⁴ப⁴வனீயத்தா தம் கப்பட்டி²யபாடிஹாரியம் நாம ஜாதம்.

ஏவம் மஹாஸத்தோ ஸச்சகிரியவஸேன அத்தனோ தத்த² வாஸீனம் ஸத்தானஞ்ச ஸோத்தி²ம் கத்வா ஜீவிதபரியோஸானே யதா²கம்மம் க³தோ.

ததா³ மாதாபிதரோ ஏதரஹி மாதாபிதரோ அஹேஸும், வட்டகராஜா பன லோகனாதோ².

தஸ்ஸ ஹேட்டா² வுத்தனயேனேவ ஸேஸபாரமியோபி யதா²ரஹம் நித்³தா⁴ரேதப்³பா³. ததா² தா³வக்³கி³ம்ஹி ததா² பே⁴ரவாகாரேன அவத்த²ரித்வா ஆக³ச்ச²ந்தே தஸ்மிம் வயே ஏககோ ஹுத்வாபி ஸாரத³ம் அனாபஜ்ஜித்வா ஸச்சாதி³த⁴ம்மகு³ணே பு³த்³த⁴கு³ணே ச அனுஸ்ஸரித்வா அத்தனோ ஏவ ஆனுபா⁴வம் நிஸ்ஸாய ஸச்சகிரியாய தத்த² வாஸீனம்பி ஸத்தானம் ஸோத்தி²பா⁴வாபாத³னாத³யோ ஆனுபா⁴வா விபா⁴வேதப்³பா³.

வட்டபோதகசரியாவண்ணனா நிட்டி²தா.