3. யுத⁴ஞ்ஜயவக்³கோ³

1. யுத⁴ஞ்ஜயசரியாவண்ணனா

1. ததியவக்³க³ஸ்ஸ பட²மே அமிதயஸோதி அபரிமிதபரிவாரவிப⁴வோ. ராஜபுத்தோ யுத⁴ஞ்ஜயோதி ரம்மனக³ரே ஸப்³ப³த³த்தஸ்ஸ நாம ரஞ்ஞோ புத்தோ நாமேன யுத⁴ஞ்ஜயோ நாம.

அயஞ்ஹி பா³ராணஸீ உத³யஜாதகே (ஜா. 1.11.37 ஆத³யோ) ஸுருந்த⁴னனக³ரம் நாம ஜாதா. சூளஸுதஸோமஜாதகே (ஜா. 2.17.195 ஆத³யோ) ஸுத³ஸ்ஸனம் நாம, ஸோணனந்த³ஜாதகே (ஜா. 2.20.92 ஆத³யோ) ப்³ரஹ்மவட்³ட⁴னம் நாம, க²ண்ட³ஹாலஜாதகே(ஜா. 2.22.982 ஆத³யோ) புப்ப²வதீ நாம, இமஸ்மிம் பன யுத⁴ஞ்ஜயஜாதகே (ஜா. 1.11.73 ஆத³யோ) ரம்மனக³ரம் நாம அஹோஸி, ஏவமஸ்ஸ கதா³சி நாமம் பரிவத்ததி. தேன வுத்தம் – ‘‘ராஜபுத்தோதி ரம்மனக³ரே ஸப்³ப³த³த்தஸ்ஸ நாம ரஞ்ஞோ புத்தோ’’தி. தஸ்ஸ பன ரஞ்ஞோ புத்தஸஹஸ்ஸம் அஹோஸி. போ³தி⁴ஸத்தோ ஜேட்ட²புத்தோ, தஸ்ஸ ராஜா உபரஜ்ஜம் அதா³ஸி. ஸோ ஹேட்டா² வுத்தனயேனேவ தி³வஸே தி³வஸே மஹாதா³னம் பவத்தேஸி. ஏவம் க³ச்ச²ந்தே காலே போ³தி⁴ஸத்தோ ஏகதி³வஸம் பாதோவ ரத²வரம் அபி⁴ருஹித்வா மஹந்தேன ஸிரிவிப⁴வேன உய்யானகீளம் க³ச்ச²ந்தோ ருக்க²க்³க³திணக்³க³ஸாக²க்³க³மக்கடகஸுத்தஜாலாதீ³ஸு முத்தாஜாலாகாரேன லக்³கே³ உஸ்ஸாவபி³ந்தூ³ தி³ஸ்வா ‘‘ஸம்ம ஸாரதி², கிம் நாமேத’’ந்தி புச்சி²த்வா ‘‘ஏதே, தே³வ, ஹிமஸமயே பதனகஉஸ்ஸாவபி³ந்தூ³ நாமா’’தி ஸுத்வா தி³வஸபா⁴க³ம் உய்யானே கீளித்வா ஸாயன்ஹகாலே பச்சாக³ச்ச²ந்தோ தே அதி³ஸ்வா ‘‘ஸம்ம ஸாரதி², கஹம் தே உஸ்ஸாவபி³ந்தூ³, ந தே இதா³னி பஸ்ஸாமீ’’தி புச்சி²த்வா ‘‘தே³வ, ஸூரியே உக்³க³ச்ச²ந்தே ஸப்³பே³ பி⁴ஜ்ஜித்வா விலயம் க³ச்ச²ந்தீ’’தி ஸுத்வா ‘‘யதா² இமே உப்பஜ்ஜித்வா பி⁴ஜ்ஜந்தி, ஏவம் இமேஸம் ஸத்தானம் ஜீவிதஸங்கா²ராபி திணக்³கே³ உஸ்ஸாவபி³ந்து³ஸதி³ஸாவ, தஸ்மா மயா ப்³யாதி⁴ஜராமரணேஹி அபீளிதேனேவ மாதாபிதரோ ஆபுச்சி²த்வா பப்³ப³ஜிதும் வட்டதீ’’தி உஸ்ஸாவபி³ந்து³மேவ ஆரம்மணம் கத்வா ஆதி³த்தே விய தயோ ப⁴வே பஸ்ஸந்தோ அத்தனோ கே³ஹம் ஆக³ந்த்வா அலங்கதபடியத்தாய வினிச்ச²யஸாலாய நிஸின்னஸ்ஸ பிது ஸந்திகமேவ க³ந்த்வா பிதரம் வந்தி³த்வா ஏகமந்தம் டி²தோ பப்³ப³ஜ்ஜம் யாசி. தேன வுத்தம் –

‘‘உஸ்ஸாவபி³ந்து³ம் ஸூரியாதபே, பதிதம் தி³ஸ்வான ஸம்விஜிம்.

2. ‘‘தஞ்ஞேவாதி⁴பதிம் கத்வா, ஸம்வேக³மனுப்³ரூஹயிம்;

மாதாபிதூ ச வந்தி³த்வா, பப்³ப³ஜ்ஜமனுயாசஹ’’ந்தி.

தத்த² ஸூரியாதபேதி ஸூரியாதபஹேது, ஸூரியரஸ்மிஸம்ப²ஸ்ஸனிமித்தம். ‘‘ஸூரியாதபேனா’’திபி பாடோ². பதிதம் தி³ஸ்வானாதி வினட்ட²ம் பஸ்ஸித்வா, புப்³பே³ ருக்க²க்³கா³தீ³ஸு முத்தாஜாலாதி³ஆகாரேன லக்³க³ம் ஹுத்வா தி³ஸ்ஸமானம் ஸூரியரஸ்மிஸம்ப²ஸ்ஸேன வினட்ட²ம் பஞ்ஞாசக்கு²னா ஓலோகேத்வா. ஸம்விஜிந்தி யதா² ஏதானி, ஏவம் ஸத்தானம் ஜீவிதானிபி லஹும் லஹும் பி⁴ஜ்ஜமானஸபா⁴வானீதி அனிச்சதாமனஸிகாரவஸேன ஸம்வேக³மாபஜ்ஜிம்.

தஞ்ஞேவாதி⁴பதிம் கத்வா, ஸம்வேக³மனுப்³ரூஹயிந்தி தஞ்ஞேவ உஸ்ஸாவபி³ந்தூ³னம் அனிச்சதம் அதி⁴பதிம் முக²ம் புப்³ப³ங்க³மம் புரேசாரிகம் கத்வா ததே²வ ஸப்³ப³ஸங்கா²ரானம் இத்தரட்டி²திகதம் பரித்தகாலதம் மனஸிகரோந்தோ ஏகவாரம் உப்பன்னம் ஸம்வேக³ம் புனப்புனம் உப்பாத³னேன அனுவட்³டே⁴ஸிம். பப்³ப³ஜ்ஜமனுயாசஹந்தி ‘‘திணக்³கே³ உஸ்ஸாவபி³ந்தூ³ விய ந சிரட்டி²திகே ஸத்தானம் ஜீவிதே மயா ப்³யாதி⁴ஜராமரணேஹி அனபி⁴பூ⁴தேனேவ பப்³ப³ஜித்வா யத்த² ஏதானி ந ஸந்தி, தம் அமதம் மஹானிப்³பா³னம் க³வேஸிதப்³ப³’’ந்தி சிந்தேத்வா மாதாபிதரோ உபஸங்கமித்வா வந்தி³த்வா ‘‘பப்³ப³ஜ்ஜம் மே அனுஜானாதா²’’தி தே அஹம் பப்³ப³ஜ்ஜம் யாசிம். ஏவம் மஹாஸத்தேன பப்³ப³ஜ்ஜாய யாசிதாய ஸகலனக³ரே மஹந்தம் கோலாஹலமஹோஸி – ‘‘உபராஜா கிர யுத⁴ஞ்ஜயோ பப்³ப³ஜிதுகாமோ’’தி.

தேன ச ஸமயேன காஸிரட்ட²வாஸினோ ராஜானம் த³ட்டு²ம் ஆக³ந்த்வா ரம்மகே படிவஸந்தி. தே ஸப்³பே³பி ஸன்னிபதிம்ஸு. இதி ஸபரிஸோ ராஜா நேக³மா சேவ ஜானபதா³ ச போ³தி⁴ஸத்தஸ்ஸ மாதா தே³வீ ச ஸப்³பே³ ச ஓரோதா⁴ மஹாஸத்தம் ‘‘மா கோ² த்வம், தாத குமார, பப்³ப³ஜீ’’தி நிவாரேஸும். தத்த² ராஜா ‘‘ஸசே தே காமேஹி ஊனம், அஹம் தே பரிபூரயாமி, அஜ்ஜேவ ரஜ்ஜம் படிபஜ்ஜாஹீ’’தி ஆஹ. தஸ்ஸ மஹாஸத்தோ –

‘‘மா மம் தே³வ நிவாரேஹி, பப்³ப³ஜந்தம் ரதே²ஸப⁴;

மாஹம் காமேஹி ஸம்மத்தோ, ஜராய வஸமன்வகூ³’’தி. (ஜா. 1.11.77) –

அத்தனோ பப்³ப³ஜ்ஜாச²ந்த³மேவ வத்வா தம் ஸுத்வா ஸத்³தி⁴ம் ஓரோதே⁴ஹி மாதுயா கருணம் பரிதே³வந்தியா –

‘‘உஸ்ஸாவோவ திணக்³க³ம்ஹி, ஸூரியுக்³க³மனம் பதி;

ஏவமாயு மனுஸ்ஸானம், மா மம் அம்ம நிவாரயா’’தி. (ஜா. 1.11.79) –

அத்தனோ பப்³ப³ஜ்ஜாகாரணம் கதே²த்வா நானப்பகாரம் தேஹி யாசியமானோபி அபி⁴ஸம்வட்³ட⁴மானஸம்வேக³த்தா அனோஸக்கிதமானஸோ பியதரே மஹதி ஞாதிபரிவட்டே உளாரே ராஜிஸ்ஸரியே ச நிரபேக்க²சித்தோ பப்³ப³ஜி. தேன வுத்தம் –

3. ‘‘யாசந்தி மம் பஞ்ஜலிகா, ஸனேக³மா ஸரட்ட²கா;

அஜ்ஜேவ புத்த படிபஜ்ஜ, இத்³த⁴ம் பீ²தம் மஹாமஹிம்.

4. ‘‘ஸராஜகே ஸஹோரோதே⁴, ஸனேக³மே ஸரட்ட²கே;

கருணம் பரிதே³வந்தே, அனபேக்கோ² பரிச்சஜி’’ந்தி.

தத்த² பஞ்ஜலிகாதி பக்³க³ஹிதஅஞ்ஜலிகா. ஸனேக³மா ஸரட்ட²காதி நேக³மேஹி சேவ ரட்ட²வாஸீஹி ச ஸத்³தி⁴ம் ஸப்³பே³ ராஜபுரிஸா ‘‘மா கோ², த்வம் தே³வ, பப்³ப³ஜீ’’தி மம் யாசந்தி. மாதாபிதரோ பன அஜ்ஜேவ புத்த படிபஜ்ஜ, கா³மனிக³மராஜதா⁴னிஅபி⁴வுத்³தி⁴யா வேபுல்லப்பத்தியா ச, இத்³த⁴ம் விப⁴வஸாரஸம்பத்தியா ஸஸ்ஸாதி³னிப்ப²த்தியா ச, பீ²தம் இமம் மஹாமஹிம் அனுஸாஸ, ச²த்தம் உஸ்ஸாபேத்வா ரஜ்ஜம் காரேஹீதி யாசந்தி. ஏவம் பன ஸஹ ரஞ்ஞாதி ஸராஜகே, ததா² ஸஹோரோதே⁴ ஸனேக³மே ஸரட்ட²கே மஹாஜனே யதா² ஸுணந்தானம்பி பகே³வ பஸ்ஸந்தானம் மஹந்தம் காருஞ்ஞம் ஹோதி, ஏவம் கருணம் பரிதே³வந்தே தத்த² தத்த² அனபேக்கோ² அலக்³க³சித்தோ ‘‘அஹம் ததா³ பப்³ப³ஜி’’ந்தி த³ஸ்ஸேதி.

5-6. இதா³னி யத³த்த²ம் சக்கவத்திஸிரிஸதி³ஸம் ரஜ்ஜஸிரிம் பியதரே ஞாதிப³ந்த⁴வே பஹாய ஸினித்³த⁴ம் பரிக்³க³ஹபரிஜனம் லோகாபி⁴மதம் மஹந்தம் யஸஞ்ச நிரபேக்கோ² பரிச்சஜிந்தி த³ஸ்ஸேதும் த்³வே கா³தா² அபா⁴ஸி.

தத்த² கேவலந்தி அனவஸேஸம் இத்தா²கா³ரம் ஸமுத்³த³பரியந்தஞ்ச பத²விம் பப்³ப³ஜ்ஜாதி⁴ப்பாயேன சஜமானோ ஏவம் மே ஸம்மாஸம்போ³தி⁴ ஸக்கா அதி⁴க³ந்துந்தி போ³தி⁴யாயேவ காரணா ந கிஞ்சி சிந்தேஸிம், ந தத்த² ஈஸகம் லக்³க³ம் ஜனேஸிந்தி அத்தோ². தஸ்மாதி யஸ்மா மாதாபிதரோ தஞ்ச மஹாயஸம் ரஜ்ஜஞ்ச மே ந தே³ஸ்ஸம், பியமேவ, ததோ பன ஸதகு³ணேன ஸஹஸ்ஸகு³ணேன ஸதஸஹஸ்ஸகு³ணேன ஸப்³ப³ஞ்ஞுதஞ்ஞாணமேவ மய்ஹம் பியதரம், தஸ்மா மாதாதீ³ஹி ஸத்³தி⁴ம் ரஜ்ஜம் அஹம் ததா³ பரிச்சஜிந்தி.

ததே³தம் ஸப்³ப³ம் பரிச்சஜித்வா பப்³ப³ஜ்ஜாய மஹாஸத்தே நிக்க²மந்தே தஸ்ஸ கனிட்ட²பா⁴தா யுதி⁴ட்டி²லகுமாரோ நாம பிதரம் வந்தி³த்வா பப்³ப³ஜ்ஜம் அனுஜானாபேத்வா போ³தி⁴ஸத்தம் அனுப³ந்தி⁴. தே உபோ⁴பி நக³ரா நிக்க²ம்ம மஹாஜனம் நிவத்தேத்வா ஹிமவந்தம் பவிஸித்வா மனோரமே டா²னே அஸ்ஸமபத³ம் கத்வா இஸிபப்³ப³ஜ்ஜம் பப்³ப³ஜித்வா ஜா²னாபி⁴ஞ்ஞாயோ நிப்³ப³த்தேத்வா வனமூலப²லாதீ³ஹி யாவஜீவம் யாபேத்வா ப்³ரஹ்மலோகபராயனா அஹேஸும். தேனாஹ ப⁴க³வா –

‘‘உபோ⁴ குமாரா பப்³ப³ஜிதா, யுத⁴ஞ்ஜயோ யுதி⁴ட்டி²லோ;

பஹாய மாதாபிதரோ, ஸங்க³ம் சே²த்வான மச்சுனோ’’தி. (ஜா. 1.11.83);

தத்த² ஸங்க³ம் சே²த்வான மச்சுனோதி மச்சுமாரஸ்ஸ ஸஹகாரிகாரணபூ⁴தத்தா ஸந்தகம் ராக³தோ³ஸமோஹஸங்க³ம் விக்க²ம்ப⁴னவஸேன சி²ந்தி³த்வா உபோ⁴பி பப்³ப³ஜிதாதி.

ததா³ மாதாபிதரோ மஹாராஜகுலானி அஹேஸும், யுதி⁴ட்டி²லகுமாரோ ஆனந்த³த்தே²ரோ, யுத⁴ஞ்ஜயோ லோகனாதோ².

தஸ்ஸ பப்³ப³ஜ்ஜதோ புப்³பே³ பவத்திதமஹாதா³னானி சேவ ரஜ்ஜாதி³பரிச்சாகோ³ ச தா³னபாரமீ, காயவசீஸம்வரோ ஸீலபாரமீ, பப்³ப³ஜ்ஜா ச ஜா²னாதி⁴க³மோ ச நேக்க²ம்மபாரமீ, அனிச்சதோ மனஸிகாரம் ஆதி³ம் கத்வா அபி⁴ஞ்ஞாதி⁴க³மபரியோஸானா பஞ்ஞா தா³னாதீ³னம் உபகாரானுபகாரத⁴ம்மபரிக்³க³ண்ஹனபஞ்ஞா ச பஞ்ஞாபாரமீ, ஸப்³ப³த்த² தத³த்த²ஸாத⁴னம் வீரியம் வீரியபாரமீ, ஞாணக²ந்தி அதி⁴வாஸனக²ந்தி ச க²ந்திபாரமீ, படிஞ்ஞாய அவிஸம்வாத³னம் ஸச்சபாரமீ, ஸப்³ப³த்த² அசலஸமாதா³னாதி⁴ட்டா²னம் அதி⁴ட்டா²னபாரமீ, ஸப்³ப³ஸத்தேஸு ஹிதசித்ததாய மேத்தாப்³ரஹ்மவிஹாரவஸேன ச மேத்தாபாரமீ, ஸத்தஸங்கா²ரகதவிப்பகாரஉபேக்க²னவஸேன உபேக்கா²ப்³ரஹ்மவிஹாரவஸேன ச உபேக்கா²பாரமீதி த³ஸ பாரமியோ லப்³ப⁴ந்தி. விஸேஸதோ பன நேக்க²ம்மபாரமீதி வேதி³தப்³பா³. ததா² அகித்திசரியாயம் விய இதா⁴பி மஹாபுரிஸஸ்ஸ அச்ச²ரியகு³ணா யதா²ரஹம் நித்³தா⁴ரேதப்³பா³. தேன வுச்சதி ‘‘ஏவம் அச்ச²ரியா ஹேதே, அப்³பு⁴தா ச மஹேஸினோ…பே… த⁴ம்மஸ்ஸ அனுத⁴ம்மதோ’’தி.

யுத⁴ஞ்ஜயசரியாவண்ணனா நிட்டி²தா.

2. ஸோமனஸ்ஸசரியாவண்ணனா

7. து³தியே இந்த³பத்தே² புருத்தமேதி ஏவம்னாமகே நக³ரவரே. காமிதோதி மாதாபிதுஆதீ³ஹி ‘‘அஹோ வத ஏகோ புத்தோ உப்பஜ்ஜேய்யா’’தி ஏவம் சிரகாலே பத்தி²தோ. த³யிதோதி பியாயிதோ. ஸோமனஸ்ஸோதி விஸ்ஸுதோதி ‘‘ஸோமனஸ்ஸோ’’தி ஏவம் பகாஸனாமோ.

8. ஸீலவாதி த³ஸகுஸலகம்மபத²ஸீலேன சேவ ஆசாரஸீலேன ச ஸமன்னாக³தோ. கு³ணஸம்பன்னோதி ஸத்³தா⁴பா³ஹுஸச்சாதி³கு³ணேஹி உபேதோ, பரிபுண்ணோ வா. கல்யாணபடிபா⁴னவாதி தம்தம்இதிகத்தப்³ப³ஸாத⁴னேன உபாயகோஸல்லஸங்கா²தேன ச ஸுந்த³ரேன படிபா⁴னேன ஸமன்னாக³தோ. வுட்³டா⁴பசாயீதி மாதாபிதரோ குலே ஜேட்டா²தி ஏவம் யே ஜாதிவுட்³டா⁴, யே ச ஸீலாதி³கு³ணேஹி வுட்³டா⁴, தேஸம் அபசாயனஸீலோ. ஹிரீமாதி பாபஜிகு³ச்ச²னலக்க²ணாய ஹிரியா ஸமன்னாக³தோ. ஸங்க³ஹேஸு ச கோவிதோ³தி தா³னபியவசனஅத்த²சரியாஸமானத்ததாஸங்கா²தேஹி சதூஹி ஸங்க³ஹவத்தூ²ஹி யதா²ரஹம் ஸத்தானம் ஸங்க³ண்ஹனேஸு குஸலோ. ஏவரூபோ ரேணுஸ்ஸ நாம குருராஜஸ்ஸ புத்தோ ஸோமனஸ்ஸோதி விஸ்ஸுதோ யதா³ ஹோமீதி ஸம்ப³ந்தோ⁴.

9. தஸ்ஸ ரஞ்ஞோ பதிகரோதி தேன குருராஜேன பதி அபி⁴க்க²ணம் உபகத்தப்³ப³பா⁴வேன பதிகரோ வல்லபோ⁴. குஹகதாபஸோதி அஸந்தகு³ணஸம்பா⁴வனலக்க²ணேன கோஹஞ்ஞேன ஜீவிதகப்பனகோ ஏகோ தாபஸோ, தஸ்ஸ ரஞ்ஞோ ஸக்காதப்³போ³ அஹோஸி. ஆராமந்தி ப²லாராமம், யத்த² ஏளாலுகலாபு³கும்ப⁴ண்ட³திபுஸாதி³வல்லிப²லானி சேவ தண்டு³லேய்யகாதி³ஸாகஞ்ச ரோபீயதி. மாலாவச்ச²ந்தி ஜாதிஅதிமுத்தகாதி³புப்ப²க³ச்ச²ம், தேன புப்பா²ராமம் த³ஸ்ஸேதி. ஏத்த² ச ஆராமம் கத்வா தத்த² மாலாவச்ச²ஞ்ச யதா²வுத்தப²லவச்ச²ஞ்ச ரோபேத்வா ததோ லத்³த⁴த⁴னம் ஸம்ஹரித்வா ட²பேந்தோ ஜீவதீதி அத்தோ² வேதி³தப்³போ³.

தத்ராயம் அனுபுப்³பி³கதா² – ததா³ மஹாரக்கி²தோ நாம தாபஸோ பஞ்சஸததாபஸபரிவாரோ ஹிமவந்தே வஸித்வா லோணம்பி³லஸேவனத்தா²ய ஜனபத³சாரிகம் சரந்தோ இந்த³பத்த²னக³ரம் பத்வா ராஜுய்யானே வஸித்வா ஸபரிஸோ பிண்டா³ய சரந்தோ ராஜத்³வாரம் பாபுணி. ராஜா இஸிக³ணம் தி³ஸ்வா இரியாபதே² பஸன்னோ அலங்கதமஹாதலே நிஸீதா³பேத்வா பணீதேனாஹாரேன பரிவிஸித்வா ‘‘ப⁴ந்தே, இமம் வஸ்ஸாரத்தம் மம உய்யானேயேவ வஸதா²’’தி வத்வா தேஹி ஸத்³தி⁴ம் உய்யானம் க³ந்த்வா வஸனட்டா²னானி காரேத்வா பப்³ப³ஜிதபரிக்கா²ரே த³த்வா நிக்க²மி. ததோ பட்டா²ய ஸப்³பே³பி தே ராஜனிவேஸனே பு⁴ஞ்ஜந்தி.

ராஜா பன அபுத்தகோ புத்தே பத்தே²தி, புத்தா நுப்பஜ்ஜந்தி. வஸ்ஸாரத்தச்சயேன மஹாரக்கி²தோ ‘‘ஹிமவந்தம் க³மிஸ்ஸாமா’’தி ராஜானம் ஆபுச்சி²த்வா ரஞ்ஞா கதஸக்காரஸம்மானோ நிக்க²மித்வா அந்தராமக்³கே³ மஜ்ஜ²ன்ஹிகஸமயே மக்³கா³ ஓக்கம்ம ஏகஸ்ஸ ஸந்த³ச்சா²யஸ்ஸ ருக்க²ஸ்ஸ ஹேட்டா² ஸபரிஸோ நிஸீதி³. தாபஸா கத²ம் ஸமுட்டா²பேஸும் – ‘‘ராஜா அபுத்தகோ, ஸாது⁴ வதஸ்ஸ ஸசே ராஜபுத்தம் லபே⁴ய்யா’’தி. மஹாரக்கி²தோ தம் கத²ம் ஸுத்வா ‘‘ப⁴விஸ்ஸதி நு கோ² ரஞ்ஞோ புத்தோ, உதா³ஹு நோ’’தி உபதா⁴ரேந்தோ ‘‘ப⁴விஸ்ஸதீ’’தி ஞத்வா ‘‘மா தும்ஹே சிந்தயித்த², அஜ்ஜ பச்சூஸகாலே ஏகோ தே³வபுத்தோ சவித்வா ரஞ்ஞோ அக்³க³மஹேஸியா குச்சி²ம்ஹி நிப்³ப³த்திஸ்ஸதீ’’தி ஆஹ.

தம் ஸுத்வா ஏகோ கூடஜடிலோ ‘‘இதா³னி ராஜகுலூபகோ ப⁴விஸ்ஸாமீ’’தி சிந்தேத்வா தாபஸானம் க³மனகாலே கி³லானாலயம் கத்வா நிபஜ்ஜித்வா ‘‘ஏஹி க³ச்சா²மா’’தி வுத்தே ‘‘ந ஸக்கோமீ’’தி ஆஹ. மஹாரக்கி²தோ தஸ்ஸ நிபன்னகாரணம் ஞத்வா ‘‘யதா³ ஸக்கோஸி, ததா³ ஆக³ச்சே²ய்யாஸீ’’தி இஸிக³ணம் ஆதா³ய ஹிமவந்தமேவ க³தோ. குஹகோ நிவத்தித்வா வேகே³ன க³ந்த்வா ராஜத்³வாரே ட²த்வா ‘‘மஹாரக்கி²தஸ்ஸ உபட்டா²கதாபஸோ ஆக³தோ’’தி ரஞ்ஞோ ஆரோசாபேத்வா ரஞ்ஞா வேகே³ன பக்கோஸாபிதோ பாஸாத³ம் அபி⁴ருய்ஹ பஞ்ஞத்தே ஆஸனே நிஸீதி³. ராஜா தம் வந்தி³த்வா ஏகமந்தம் நிஸின்னோ இஸீனம் ஆரோக்³யம் புச்சி²த்வா ‘‘ப⁴ந்தே, அதிகி²ப்பம் நிவத்தித்த², கேனத்தே²ன ஆக³தத்தா²’’தி ஆஹ.

மஹாராஜ, இஸிக³ணோ ஸுக²னிஸின்னோ ‘‘ஸாது⁴ வதஸ்ஸ ஸசே ரஞ்ஞோ வம்ஸானுரக்க²கோ புத்தோ உப்பஜ்ஜேய்யா’’தி கத²ம் ஸமுட்டா²பேஸி. அஹம் தம் கத²ம் ஸுத்வா ‘‘ப⁴விஸ்ஸதி நு கோ² ரஞ்ஞோ புத்தோ, உதா³ஹு நோ’’தி தி³ப்³ப³சக்கு²னா ஓலோகேந்தோ ‘‘மஹித்³தி⁴கோ தே³வபுத்தோ சவித்வா அக்³க³மஹேஸியா ஸுத⁴ம்மாய குச்சி²ம்ஹி நிப்³ப³த்திஸ்ஸதீ’’தி தி³ஸ்வா ‘‘அஜானந்தா க³ப்³ப⁴ம் நாஸேய்யும், ஆசிக்கி²ஸ்ஸாமி தாவ ந’’ந்தி தும்ஹாகம் கத²னத்தா²ய ஆக³தோ, கதி²தம் வோ மயா, க³ச்சா²மஹ’’ந்தி. ராஜா ‘‘ப⁴ந்தே, ந ஸக்கா க³ந்து’’ந்தி ஹட்ட²துட்டோ² பஸன்னசித்தோ குஹகதாபஸம் உய்யானம் நேத்வா வஸனட்டா²னம் ஸம்வித³ஹித்வா அதா³ஸி. ஸோ ததோ பட்டா²ய ராஜகுலே பு⁴ஞ்ஜந்தோ வஸதி, ‘‘தி³ப்³ப³சக்கு²கோ’’த்வேவஸ்ஸ நாமம் அஹோஸி.

ததா³ போ³தி⁴ஸத்தோ தாவதிம்ஸப⁴வனதோ சவித்வா தத்த² படிஸந்தி⁴ம் க³ண்ஹி, ஜாதஸ்ஸ ச நாமக்³க³ஹணதி³வஸே ‘‘ஸோமனஸ்ஸோ’’தி நாமம் கரிம்ஸு. ஸோ குமாரபரிஹாரேன வட்³ட⁴தி. குஹகதாபஸோபி உய்யானஸ்ஸ ஏகபஸ்ஸே நானப்பகாரம் ஸூபேய்யஸாகஞ்ச ப²லவல்லிஆத³யோ ச ரோபேத்வா பண்ணிகானம் ஹத்தே² விக்கிணந்தோ த⁴னம் ஸம்ஹரதி. அத² போ³தி⁴ஸத்தஸ்ஸ ஸத்தவஸ்ஸிககாலே ரஞ்ஞோ பச்சந்தோ குபிதோ. ஸோ ‘‘தாத, தி³ப்³ப³சக்கு²தாபஸே மா பமஜ்ஜா’’தி குமாரம் படிச்சா²பேத்வா பச்சந்தம் வூபஸமேதும் க³தோ.

10-13. அதே²கதி³வஸம் குமாரோ ‘‘ஜடிலம் பஸ்ஸிஸ்ஸாமீ’’தி உய்யானம் க³ந்த்வா கூடஜடிலம் ஏகம் க³ந்தி⁴ககாஸாவம் நிவாஸேத்வா ஏகம் பாருபித்வா உபோ⁴ஹி ஹத்தே²ஹி த்³வே க⁴டே க³ஹேத்வா ஸாகவத்து²ஸ்மிம் உத³கம் ஸிஞ்சந்தம் தி³ஸ்வா ‘‘அயம் கூடஜடிலோ அத்தனோ ஸமணத⁴ம்மம் அகத்வா பண்ணிககம்மம் கரோதீ’’தி ஞத்வா ‘‘கிம் கரோஸி பண்ணிகக³ஹபதிகா’’தி தம் லஜ்ஜாபேத்வா அவந்தி³த்வா ஏவ நிக்க²மி.

கூடஜடிலோ ‘‘அயம் இதா³னேவ ஏவரூபோ, பச்சா² ‘கோ ஜானாதி கிம் கரிஸ்ஸதீ’தி இதா³னேவ நம் நாஸேதும் வட்டதீ’’தி சிந்தேத்வா ரஞ்ஞோ ஆக³மனகாலே பாஸாணப²லகம் ஏகமந்தம் கி²பித்வா பானீயக⁴டம் பி⁴ந்தி³த்வா பண்ணஸாலாய திணானி விகிரித்வா ஸரீரம் தேலேன மக்கே²த்வா பண்ணஸாலம் பவிஸித்வா ஸஸீஸம் பாருபித்வா மஹாது³க்க²ப்பத்தோ விய மஞ்சே நிபஜ்ஜி. ராஜா ஆக³ந்த்வா நக³ரம் பத³க்கி²ணம் கத்வா நிவேஸனம் அபவிஸித்வாவ ‘‘மம ஸாமிகம் தி³ப்³ப³சக்கு²கம் பஸ்ஸிஸ்ஸாமீ’’தி பண்ணஸாலத்³வாரம் க³ந்த்வா தம் விப்பகாரம் தி³ஸ்வா ‘‘கிம் நு கோ² ஏத’’ந்தி அந்தோ பவிஸித்வா தம் நிபன்னகம் தி³ஸ்வா பாதே³ பரிமஜ்ஜந்தோ புச்சி² – ‘‘கேன, த்வம் ப⁴ந்தே, ஏவம் விஹேடி²தோ, கமஜ்ஜ யமலோகம் நேமி, தம் மே ஸீக⁴ம் ஆசிக்கா²’’தி.

தம் ஸுத்வா கூடஜடிலோ நித்து²னந்தோ உட்டா²ய தி³ட்டோ², மஹாராஜ, த்வம் மே, பஸ்ஸித்வா தயி விஸ்ஸாஸேன அஹம் இமம் விப்பகாரம் பத்தோ, தவ புத்தேனம்ஹி ஏவம் விஹேடி²தோதி. தம் ஸுத்வா ராஜா சோரகா⁴தகே ஆணாபேஸி – ‘‘க³ச்ச²த² குமாரஸ்ஸ ஸீஸம் சி²ந்தி³த்வா ஸரீரஞ்சஸ்ஸ க²ண்டா³க²ண்டி³கம் சி²ந்தி³த்வா ரதி²யா ரதி²யம் விகிரதா²’’தி. தே மாதரா அலங்கரித்வா அத்தனோ அங்கே நிஸீதா³பிதம் குமாரம் ஆகட்³டி⁴ம்ஸு – ‘‘ரஞ்ஞா தே வதோ⁴ ஆணத்தோ’’தி. குமாரோ மரணப⁴யதஜ்ஜிதோ மாது அங்கதோ வுட்டா²ய – ‘‘ரஞ்ஞோ மம் த³ஸ்ஸேத², ஸந்தி ராஜகிச்சானீ’’தி ஆஹ. தே குமாரஸ்ஸ வசனம் ஸுத்வா மாரேதும் அவிஸஹந்தா கோ³ணம் விய ரஜ்ஜுயா பரிகட்³ட⁴ந்தா நேத்வா ரஞ்ஞோ த³ஸ்ஸேஸும். தேன வுத்தம் ‘‘தமஹம் தி³ஸ்வான குஹக’’ந்திஆதி³.

தத்த² து²ஸராஸிம்வ அதண்டு³லந்தி தண்டு³லகணேஹி விரஹிதம் து²ஸராஸிம் விய, து³மம்வ ருக்க²ம் விய, அந்தோ மஹாஸுஸிரம். கத³லிம்வ அஸாரகம் ஸீலாதி³ஸாரரஹிதம் தாபஸம் அஹம் தி³ஸ்வா நத்தி² இமஸ்ஸ ஸதம் ஸாதூ⁴னம் ஜா²னாதி³த⁴ம்மோ. கஸ்மா? ஸாமஞ்ஞா ஸமணபா⁴வா ஸீலமத்ததோபி அபக³தோ பரிஹீனோ அயம், ததா² ஹி அயம் ஹிரீஸுக்கத⁴ம்மஜஹிதோ பஜஹிதஹிரிஸங்கா²தஸுக்கத⁴ம்மோ. ஜீவிதவுத்திகாரணாதி ‘‘கேவலம் ஜீவிதஸ்ஸேவ ஹேது அயம் தாபஸலிங்கே³ன சரதீ’’தி சிந்தேஸிந்தி த³ஸ்ஸேதி. பரந்திஹீதி பரந்தோ பச்சந்தோ நிவாஸபூ⁴தோ ஏதேஸம் அத்தீ²தி பரந்தினோ, ஸீமந்தரிகவாஸினோ. தேஹி பரந்தீஹி அடவிகேஹி பச்சந்ததே³ஸோ கோ²பி⁴தோ அஹோஸி. தம் பச்சந்தகோபம் நிஸேதே⁴தும் வூபஸமேதும் க³ச்ச²ந்தோ மம பிதா குருராஜா ‘‘தாத ஸோமனஸ்ஸகுமார, மய்ஹம் ஸாமிகம் உக்³க³தாபனம் கோ⁴ரதபம் பரமஸந்திந்த்³ரியம் ஜடிலம் மா பமஜ்ஜி. ஸோ ஹி அம்ஹாகம் ஸப்³ப³காமத³தோ³, தஸ்மா யதி³ச்ச²கம் சித்தருசியம் தஸ்ஸ சித்தானுகூலம் பவத்தேஹி அனுவத்தேஹீ’’தி ததா³ மம் அனுஸாஸீதி த³ஸ்ஸேதி.

14. தமஹம் க³ந்த்வானுபட்டா²னந்தி பிது வசனம் அனதிக்கந்தோ தம் கூடதாபஸம் உபட்டா²னத்த²ம் க³ந்த்வா தம் ஸாகவத்து²ஸ்மிம் உத³கம் ஆஸிஞ்சந்தம் தி³ஸ்வா ‘‘பண்ணிகோ அய’’ந்தி ச ஞத்வா கச்சி தே, க³ஹபதி, குஸலந்தி, க³ஹபதி, தே ஸரீரஸ்ஸ கச்சி குஸலம் குஸலமேவ, ததா² ஹி ஸாகவத்து²ஸ்மிம் உத³கம் ஆஸிஞ்சஸி. கிம் வா தவ ஹிரஞ்ஞம் வா ஸுவண்ணம் வா ஆஹரீயது, ததா² ஹி பண்ணிகவுத்திம் அனுதிட்ட²ஸீதி இத³ம் வசனம் அபா⁴ஸிம்.

15. தேன ஸோ குபிதோ ஆஸீதி தேன மயா வுத்தக³ஹபதிவாதே³ன ஸோ மானனிஸ்ஸிதோ மானம் அல்லீனோ குஹகோ மய்ஹம் குபிதோ குத்³தோ⁴ அஹோஸி. குத்³தோ⁴ ச ஸமானோ ‘‘கா⁴தாபேமி துவம் அஜ்ஜ, ரட்டா² பப்³பா³ஜயாமி வா’’தி ஆஹ.

தத்த² துவம் அஜ்ஜாதி, த்வம் அஜ்ஜ, இதா³னியேவ ரஞ்ஞோ ஆக³தகாலேதி அத்தோ².

16. நிஸேத⁴யித்வா பச்சந்தந்தி பச்சந்தம் வூபஸமேத்வா நக³ரம் அபவிட்டோ² தங்க²ணஞ்ஞேவ உய்யானம் க³ந்த்வா குஹகம் குஹகதாபஸம் கச்சி தே, ப⁴ந்தே, க²மனீயம், ஸம்மானோ தே பவத்திதோதி குமாரேன தே ஸம்மானோ பவத்திதோ அஹோஸி.

17. குமாரோ யதா² நாஸியோதி யதா² குமாரோ நாஸியோ நாஸேதப்³போ³ கா⁴தாபேதப்³போ³, ததா² ஸோ பாபோ தஸ்ஸ ரஞ்ஞோ ஆசிக்கி². ஆணாபேஸீதி மய்ஹம் ஸாமிகே இமஸ்மிம் தி³ப்³ப³சக்கு²தாபஸே ஸதி கிம் மம ந நிப்ப²ஜ்ஜதி, தஸ்மா புத்தேன மே அத்தோ² நத்தி², ததோபி அயமேவ ஸேய்யோதி சிந்தேத்வா ஆணாபேஸி.

18. கிந்தி? ஸீஸம் தத்தே²வ சி²ந்தி³த்வாதி யஸ்மிம் டா²னே தம் குமாரம் பஸ்ஸத², தத்தே²வ தஸ்ஸ ஸீஸம் சி²ந்தி³த்வா ஸரீரஞ்சஸ்ஸ கத்வான சதுக²ண்டி³கம் சதுரோ க²ண்டே³ கத்வா ரதி²யா ரதி²யம் நீயந்தா வீதி²தோ வீதி²ம் விக்கி²பந்தா த³ஸ்ஸேத². கஸ்மா? ஸா க³தி ஜடிலஹீளிதாதி யேஹி அயம் ஜடிலோ ஹீளிதோ, தேஸம் ஜடிலஹீளிதானம் ஸா க³தி ஸா நிப்ப²த்தி ஸோ விபாகோதி. ஜடிலஹீளிதாதி வா ஜடிலஹீளனஹேது ஸா தஸ்ஸ நிப்ப²த்தீதி ஏவஞ்சேத்த² அத்தோ² த³ட்ட²ப்³போ³.

19. தத்தா²தி தஸ்ஸ ரஞ்ஞோ ஆணாயம், தஸ்மிம் வா தாபஸஸ்ஸ பரிப⁴வே. காரணிகாதி கா⁴தகா, சோரகா⁴தகாதி அத்தோ². சண்டா³தி குரூரா. லுத்³தா³தி ஸுதா³ருணா. அகாருணாதி தஸ்ஸேவ வேவசனம் கதம். ‘‘அகருணா’’திபி பாளி, நிக்கருணாதி அத்தோ². மாது அங்கே நிஸின்னஸ்ஸாதி மம மாது ஸுத⁴ம்மாய தே³வியா உச்ச²ங்கே³ நிஸின்னஸ்ஸ. ‘‘நிஸின்னஸ்ஸா’’தி அனாத³ரே ஸாமிவசனம். ஆகட்³டி⁴த்வா நயந்தி மந்தி மாதரா அலங்கரித்வா அத்தனோ அங்கே நிஸீதா³பிதம் மம் ராஜாணாய தே சோரகா⁴தகா கோ³ணம் விய ரஜ்ஜுயா ஆகட்³டி⁴த்வா ஆகா⁴தனம் நயந்தி. குமாரே பன நீயமானே தா³ஸிக³ணபரிவுதா ஸத்³தி⁴ம் ஓரோதே⁴ஹி ஸுத⁴ம்மா தே³வீ நாக³ராபி ‘‘மயம் நிரபராத⁴ம் குமாரம் மாரேதும் ந த³ஸ்ஸாமா’’தி தேன ஸத்³தி⁴ம்யேவ அக³மம்ஸு.

20. ப³ந்த⁴தம் கா³ள்ஹப³ந்த⁴னந்தி கா³ள்ஹப³ந்த⁴னம் ப³ந்த⁴ந்தானம் தேஸம் காரணிகபுரிஸானம். ராஜகிரியானி அத்தி² மேதி மயா ரஞ்ஞோ வத்தப்³பா³னி ராஜகிச்சானி அத்தி². தஸ்மா ரஞ்ஞோ த³ஸ்ஸேத² மம் கி²ப்பந்தி தேஸம் அஹம் ஏவம் வசனம் அவசம்.

21. ரஞ்ஞோ த³ஸ்ஸயிம்ஸு, பாபஸ்ஸ பாபஸேவினோதி அத்தனா பாபஸீலஸ்ஸ லாமகாசாரஸ்ஸ கூடதாபஸஸ்ஸ ஸேவனதோ பாபஸேவினோ ரஞ்ஞோ மம் த³ஸ்ஸயிம்ஸு. தி³ஸ்வான தம் ஸஞ்ஞாபேஸிந்தி தம் மம பிதரம் குருராஜானம் பஸ்ஸித்வா ‘‘கஸ்மா மம், தே³வ, மாராபேஸீ’’தி வத்வா தேன ‘‘கஸ்மா ச பன த்வம் மய்ஹம் ஸாமிகம் தி³ப்³ப³சக்கு²தாபஸம் க³ஹபதிவாதே³ன ஸமுதா³சரி. இத³ஞ்சித³ஞ்ச விப்பகாரம் கரீ’’தி வுத்தே ‘‘தே³வ, க³ஹபதிஞ்ஞேவ ‘க³ஹபதீ’தி வத³ந்தஸ்ஸ கோ மய்ஹம் தோ³ஸோ’’தி வத்வா தஸ்ஸ நானாவிதா⁴னி மாலாவச்சா²னி ரோபேத்வா புப்ப²பண்ணப²லாப²லாதீ³னம் விக்கிணனம் ஹத்த²தோ சஸ்ஸ தானி தே³வஸிகம் விக்கிணந்தேஹி மாலாகாரபண்ணிகேஹி ஸத்³த³ஹாபேத்வா ‘‘மாலாவத்து²பண்ணவத்தூ²னி உபதா⁴ரேதா²’’தி வத்வா பண்ணஸாலஞ்சஸ்ஸ பவிஸித்வா புப்பா²தி³விக்கியலத்³த⁴ம் கஹாபணகப⁴ண்டி³கம் அத்தனோ புரிஸேஹி நீஹராபேத்வா ராஜானம் ஸஞ்ஞாபேஸிம் தஸ்ஸ கூடதாபஸபா⁴வம் ஜானாபேஸிம். மமஞ்ச வஸமானயிந்தி தேன ஸஞ்ஞாபனேன ‘‘ஸச்சம் கோ² பன குமாரோ வத³தி, அயம் கூடதாபஸோ புப்³பே³ அப்பிச்சோ² விய ஹுத்வா இதா³னி மஹாபரிக்³க³ஹோ ஜாதோ’’தி யதா² தஸ்மிம் நிப்³பி³ன்னோ மம வஸே வத்ததி, ஏவம் ராஜானம் மம வஸமானேஸிம்.

ததோ மஹாஸத்தோ ‘‘ஏவரூபஸ்ஸ பா³லஸ்ஸ ரஞ்ஞோ ஸந்திகே வஸனதோ ஹிமவந்தம் பவிஸித்வா பப்³ப³ஜிதும் யுத்த’’ந்தி சிந்தேத்வா ராஜானம் ஆபுச்சி² – ‘‘ந மே, மஹாராஜ, இத⁴ வாஸேன அத்தோ², அனுஜானாத² மம் பப்³ப³ஜிஸ்ஸாமீ’’தி. ராஜா ‘‘தாத, மயா அனுபதா⁴ரேத்வாவ தே வதோ⁴ ஆணத்தோ, க²ம மய்ஹம் அபராத⁴’’ந்தி மஹாஸத்தம் க²மாபேத்வா ‘‘அஜ்ஜேவ இமம் ரஜ்ஜம் படிபஜ்ஜாஹீ’’தி ஆஹ. குமாரோ ‘‘தே³வ, கிமத்தி² மானுஸகேஸு போ⁴கே³ஸு, அஹம் புப்³பே³ தீ³க⁴ரத்தம் தி³ப்³ப³போ⁴க³ஸம்பத்தியோ அனுப⁴விம், ந தத்தா²பி மே ஸங்கோ³, பப்³ப³ஜிஸ்ஸாமேவாஹம், ந தாதி³ஸஸ்ஸ பா³லஸ்ஸ பரனேய்யபு³த்³தி⁴னோ ஸந்திகே வஸாமீ’’தி வத்வா தம் ஓவத³ந்தோ –

‘‘அனிஸம்ம கதம் கம்மம், அனவத்தா²ய சிந்திதம்;

பே⁴ஸஜ்ஜஸ்ஸேவ வேப⁴ங்கோ³, விபாகோ ஹோதி பாபகோ.

‘‘நிஸம்ம ச கதம் கம்மம், ஸம்மாவத்தா²ய சிந்திதம்;

பே⁴ஸஜ்ஜஸ்ஸேவ ஸம்பத்தி, விபாகோ ஹோதி ப⁴த்³ரகோ.

‘‘அலஸோ கி³ஹீ காமபோ⁴கீ³ ந ஸாது⁴, அஸஞ்ஞதோ பப்³ப³ஜிதோ ந ஸாது⁴;

ராஜா ந ஸாது⁴ அனிஸம்மகாரீ, யோ பண்டி³தோ கோத⁴னோ தம் ந ஸாது⁴.

‘‘நிஸம்ம க²த்தியோ கயிரா, நானிஸம்ம தி³ஸம்பதி;

நிஸம்மகாரினோ ராஜ, யஸோ கித்தி ச வட்³ட⁴தி.

‘‘நிஸம்ம த³ண்ட³ம் பணயேய்ய இஸ்ஸரோ, வேகா³ கதம் தப்பதி பூ⁴மிபால;

ஸம்மாபணீதீ⁴ ச நரஸ்ஸ அத்தா², அனானுதப்பா தே ப⁴வந்தி பச்சா².

‘‘அனானுதப்பானி ஹி யே கரோந்தி, விப⁴ஜ்ஜ கம்மாயதனானி லோகே;

விஞ்ஞுப்பஸத்தா²னி ஸுகு²த்³ரயானி, ப⁴வந்தி பு³த்³தா⁴னுமதானி தானி.

‘‘ஆக³ச்சு²ம் தோ³வாரிகா க²க்³க³ப³ந்தா⁴, காஸாவியா ஹந்து மமம் ஜனிந்த³;

மாதுஞ்ச அங்கஸ்மிமஹம் நிஸின்னோ, ஆகட்³டி⁴தோ ஸஹஸா தேஹி தே³வ.

‘‘கடுகஞ்ஹி ஸம்பா³த⁴ம் ஸுகிச்ச²ம் பத்தோ, மது⁴ரம்பியம் ஜீவிதம் லத்³த⁴ ராஜ;

கிச்சே²னஹம் அஜ்ஜ வதா⁴ பமுத்தோ, பப்³ப³ஜ்ஜமேவாபி⁴மனோஹமஸ்மீ’’தி. (ஜா. 1.15.227-234) –

இமாஹி கா³தா²ஹி த⁴ம்மம் தே³ஸேஸி.

தத்த² அனிஸம்மாதி அனுபதா⁴ரேத்வா. அனவத்தா²யாதி அவவத்த²பேத்வா. வேப⁴ங்கோ³தி விபத்தி. விபாகோதி நிப்ப²த்தி. அஸஞ்ஞதோதி அஸம்வுதோ து³ஸ்ஸீலோ. பணயேய்யாதி பட்ட²பேய்ய. வேகா³தி வேகே³ன ஸஹஸா. ஸம்மாபணீதீ⁴ சாதி ஸம்மாபணிதி⁴னா, யோனிஸோ ட²பிதேன சித்தேன கதா நரஸ்ஸ அத்தா² பச்சா² அனானுதப்பா ப⁴வந்தீதி அத்தோ². விப⁴ஜ்ஜாதி இமானி காதும் யுத்தானி, இமானி அயுத்தானீதி ஏவம் பஞ்ஞாய விப⁴ஜித்வா. கம்மாயதனானீதி கம்மானி. பு³த்³தா⁴னுமதானீதி பண்டி³தேஹி அனுமதானி அனவஜ்ஜானி ஹோந்தி. கடுகந்தி து³க்க²ம் அஸாதம், ஸம்பா³த⁴ம் ஸுகிச்ச²ம் மரணப⁴யம் பத்தோம்ஹி. லத்³தா⁴தி அத்தனோ ஞாணப³லேன ஜீவிதம் லபி⁴த்வா. பப்³ப³ஜ்ஜமேவாபி⁴மனோதி பப்³ப³ஜ்ஜாபி⁴முக²சித்தோ ஏவாஹமஸ்மி.

ஏவம் மஹாஸத்தேன த⁴ம்மே தே³ஸிதே ராஜா தே³விம் ஆமந்தேஸி – ‘‘தே³வி, த்வம் புத்தம் நிவத்தேஹீ’’தி. தே³வீபி குமாரஸ்ஸ பப்³ப³ஜ்ஜமேவ ரோசேஸி. மஹாஸத்தோ மாதாபிதரோ வந்தி³த்வா ‘‘ஸசே மய்ஹம் தோ³ஸோ அத்தி², தம் க²மதா²’’தி க²மாபேத்வா மஹாஜனம் ஆபுச்சி²த்வா ஹிமவந்தாபி⁴முகோ² அக³மாஸி. க³தே ச பன மஹாஸத்தே மஹாஜனோ கூடஜடிலம் போதே²த்வா ஜீவிதக்க²யம் பாபேஸி. போ³தி⁴ஸத்தோபி ஸனாக³ரேஹி அமச்சபாரிஸஜ்ஜாதீ³ஹி ராஜபுரிஸேஹி அஸ்ஸுமுகே²ஹி அனுப³ந்தி⁴யமானோ தே நிவத்தேஸி. மனுஸ்ஸேஸு நிவத்தேஸு மனுஸ்ஸவண்ணேனாக³ந்த்வா தே³வதாஹி நீதோ ஸத்த பப்³ப³தராஜியோ அதிக்கமித்வா ஹிமவந்தே விஸ்ஸகம்முனா நிம்மிதாய பண்ணஸாலாய இஸிபப்³ப³ஜ்ஜம் பப்³ப³ஜி. தேன வுத்தம் –

22. ‘‘ஸோ மம் தத்த² க²மாபேஸி, மஹாரஜ்ஜம் அதா³ஸி மே;

ஸோஹம் தமம் தா³லயித்வா, பப்³ப³ஜிம் அனகா³ரிய’’ந்தி.

தத்த² தமம் தா³லயித்வாதி காமாதீ³னவத³ஸ்ஸனஸ்ஸ படிபக்க²பூ⁴தம் ஸம்மோஹதமம் வித⁴மித்வா. பப்³ப³ஜிந்தி உபாக³ச்சி²ம். அனகா³ரியந்தி பப்³ப³ஜ்ஜம்.

23. இதா³னி யத³த்த²ம் ததா³ தம் ராஜிஸ்ஸரியம் பரிச்சத்தம், தம் த³ஸ்ஸேதும் ‘‘ந மே தே³ஸ்ஸ’’ந்தி ஓஸானகா³த²மாஹ. தஸ்ஸத்தோ² வுத்தனயோவ.

ஏவம் பன மஹாஸத்தே பப்³ப³ஜிதே யாவ ஸோளஸவஸ்ஸகாலா ராஜகுலே பரிசாரிகவேஸேன தே³வதாயேவ நம் உபட்ட²ஹிம்ஸு. ஸோ தத்த² ஜா²னாபி⁴ஞ்ஞாயோ நிப்³ப³த்தேத்வா ப்³ரஹ்மலோகூபகோ³ அஹோஸி.

ததா³ குஹகோ தே³வத³த்தோ அஹோஸி, மாதா மஹாமாயா, மஹாரக்கி²ததாபஸோ ஸாரிபுத்தத்தே²ரோ, ஸோமனஸ்ஸகுமாரோ லோகனாதோ².

தஸ்ஸ யுத⁴ஞ்ஜயசரியாயம் (சரியா. 3.1 ஆத³யோ) வுத்தனயேனேவ த³ஸ பாரமியோ நித்³தா⁴ரேதப்³பா³. இதா⁴பி நேக்க²ம்மபாரமீ அதிஸயவதீதி ஸா ஏவ தே³ஸனம் ஆருள்ஹா. ததா² ஸத்தவஸ்ஸிககாலே ஏவ ராஜகிச்சேஸு ஸமத்த²தா, தஸ்ஸ தாபஸஸ்ஸ கூடஜடிலபா⁴வபரிக்³க³ண்ஹனம், தேன பயுத்தேன ரஞ்ஞா வதே⁴ ஆணத்தே ஸந்தாஸாபா⁴வோ, ரஞ்ஞோ ஸந்திகம் க³ந்த்வா நானானயேஹி தஸ்ஸ ஸதோ³ஸதம் அத்தனோ ச நிரபராத⁴தம் மஹாஜனஸ்ஸ மஜ்ஜே² பகாஸேத்வா ரஞ்ஞோ ச பரனேய்யபு³த்³தி⁴தம் பா³லபா⁴வஞ்ச பட்ட²பேத்வா தேன க²மாபிதேபி தஸ்ஸ ஸந்திகே வாஸதோ ரஜ்ஜிஸ்ஸரியதோ ச ஸம்வேக³மாபஜ்ஜித்வா நானப்பகாரம் யாசியமானேனபி ஹத்த²க³தம் ரஜ்ஜஸிரிம் கே²ளபிண்ட³ம் விய ச²ட்³டே³த்வா கத்த²சி அலக்³க³சித்தேன ஹுத்வா பப்³ப³ஜனம், பப்³ப³ஜித்வா பவிவேகாராமேன ஹுத்வா நசிரஸ்ஸேவ அப்பகஸிரேன ஜா²னாபி⁴ஞ்ஞானிப்³ப³த்தனந்தி ஏவமாத³யோ மஹாஸத்தஸ்ஸ கு³ணானுபா⁴வா விபா⁴வேதப்³பா³தி.

ஸோமனஸ்ஸசரியாவண்ணனா நிட்டி²தா.

3. அயோக⁴ரசரியாவண்ணனா

24. ததியே அயோக⁴ரம்ஹி ஸம்வட்³டோ⁴தி அமனுஸ்ஸஉபத்³த³வபரிவஜ்ஜனத்த²ம் சதுரஸ்ஸஸாலவஸேன கதே மஹதி ஸப்³ப³அயோமயே கே³ஹே ஸம்வட்³டோ⁴. நாமேனாஸி அயோக⁴ரோதி அயோக⁴ரே ஜாதஸம்வட்³ட⁴பா⁴வேனேவ ‘‘அயோக⁴ரகுமாரோ’’தி நாமேன பாகடோ அஹோஸி.

25-6. ததா³ ஹி காஸிரஞ்ஞோ அக்³க³மஹேஸியா புரிமத்தபா⁴வே ஸபத்தி ‘‘தவ ஜாதம் ஜாதம் பஜம் கா²தே³ய்ய’’ந்தி பத்த²னம் பட்ட²பேத்வா யக்கி²னியோனியம் நிப்³ப³த்தா ஓகாஸம் லபி⁴த்வா தஸ்ஸா விஜாதகாலே த்³வே வாரே புத்தே கா²தி³. ததியவாரே பன போ³தி⁴ஸத்தோ தஸ்ஸா குச்சி²யம் படிஸந்தி⁴ம் க³ண்ஹி. ராஜா ‘‘தே³வியா ஜாதம் ஜாதம் பஜம் ஏகா யக்கி²னீ கா²த³தி, கிம் நு கோ² காதப்³ப³’’ந்தி மனுஸ்ஸேஹி ஸம்மந்தேத்வா ‘‘அமனுஸ்ஸா நாம அயோக⁴ரஸ்ஸ பா⁴யந்தி, அயோக⁴ரம் காதும் வட்டதீ’’தி வுத்தே கம்மாரே ஆணாபேத்வா த²ம்பே⁴ ஆதி³ம் கத்வா அயோமயேஹேவ ஸப்³ப³கே³ஹஸம்பா⁴ரேஹி சதுரஸ்ஸஸாலம் மஹந்தம் அயோக⁴ரம் நிட்டா²பேத்வா பரிபக்கக³ப்³ப⁴ம் தே³விம் தத்த² வாஸேஸி. ஸா தத்த² த⁴ஞ்ஞபுஞ்ஞலக்க²ணம் புத்தம் விஜாயி. ‘‘அயோக⁴ரகுமாரோ’’த்வேவஸ்ஸ நாமம் கரிம்ஸு. தம் தா⁴தீனம் த³த்வா மஹந்தம் ஆரக்க²ம் ஸம்வித³ஹித்வா ராஜா தே³விம் அந்தேபுரம் ஆனேஸி. யக்கி²னீபி உத³கவாரம் க³ந்த்வா வேஸ்ஸவணஸ்ஸ உத³கம் வஹந்தீ ஜீவிதக்க²யம் பத்தா.

மஹாஸத்தோ அயோக⁴ரேயேவ வட்³டி⁴த்வா விஞ்ஞுதம் பத்தோ, தத்தே²வ ஸப்³ப³ஸிப்பானி உக்³க³ண்ஹி. ராஜா புத்தம் ஸோளஸவஸ்ஸுத்³தே³ஸிகம் விதி³த்வா ‘‘ரஜ்ஜமஸ்ஸ த³ஸ்ஸாமீ’’தி அமச்சே ஆணாபேஸி – ‘‘புத்தம் மே ஆனேதா²’’தி. தே ‘‘ஸாது⁴, தே³வா’’தி நக³ரம் அலங்காராபேத்வா ஸப்³பா³லங்காரவிபூ⁴ஸிதம் மங்க³லவாரணம் ஆதா³ய தத்த² க³ந்த்வா குமாரம் அலங்கரித்வா ஹத்தி²க்க²ந்தே⁴ நிஸீதா³பேத்வா நக³ரம் பத³க்கி²ணம் காரேத்வா ரஞ்ஞோ த³ஸ்ஸேஸும். மஹாஸத்தோ ராஜானம் வந்தி³த்வா அட்டா²ஸி. ராஜா தஸ்ஸ ஸரீரஸோப⁴ம் ஓலோகேத்வா ப³லவஸினேஹேன தம் ஆலிங்கி³த்வா ‘‘அஜ்ஜேவ மே புத்தம் அபி⁴ஸிஞ்சதா²’’தி அமச்சே ஆணாபேஸி. மஹாஸத்தோ பிதரம் வந்தி³த்வா ‘‘ந மய்ஹம் ரஜ்ஜேன அத்தோ², அஹம் பப்³ப³ஜிஸ்ஸாமி, பப்³ப³ஜ்ஜம் மே அனுஜானாதா²’’தி ஆஹ. தேன வுத்தம் ‘‘து³க்கே²ன ஜீவிதோ லத்³தோ⁴’’திஆதி³.

தத்த² து³க்கே²னாதி, தாத, தவ பா⁴திகா த்³வே ஏகாய யக்கி²னியா கா²தி³தா, துய்ஹம் பன ததோ அமனுஸ்ஸப⁴யதோ நிவாரணத்த²ம் கதேன து³க்கே²ன மஹதா ஆயாஸேன ஜீவிதோ லத்³தோ⁴. ஸம்பீளே பதிபோஸிதோதி நானாவிதா⁴ய அமனுஸ்ஸரக்கா²ய ஸம்பா³தே⁴ அயோக⁴ரே விஜாயனகாலதோ பட்டா²ய யாவ ஸோளஸவஸ்ஸுப்பத்தியா ஸம்பா³தே⁴ ஸம்வட்³டி⁴தோதி அத்தோ². அஜ்ஜேவ, புத்த, படிபஜ்ஜ, கேவலம் வஸுத⁴ம் இமந்தி கஞ்சனமாலாலங்கதஸ்ஸ ஸேதச்ச²த்தஸ்ஸ ஹேட்டா² ரதனராஸிம்ஹி ட²பேத்வா தீஹி ஸங்கே²ஹி அபி⁴ஸிஞ்சியமானோ இமம் குலஸந்தகம் கேவலம் ஸகலம் ஸமுத்³த³பரியந்தம் ததோயேவ ஸஹ ரட்டே²ஹீதி ஸரட்ட²கம் ஸஹ நிக³மேஹி மஹாகா³மேஹீதி ஸனிக³மம் அபரிமிதேன பரிவாரஜனேன ஸத்³தி⁴ம் ஸஜனம் இமம் வஸுத⁴ம் மஹாபத²விம் அஜ்ஜேவ, புத்த, படிபஜ்ஜ, ரஜ்ஜம் காரேஹீதி அத்தோ². வந்தி³த்வா க²த்தியம். அஞ்ஜலிம் பக்³க³ஹேத்வான, இத³ம் வசனமப்³ரவிந்தி க²த்தியம் காஸிராஜானம் மம பிதரம் வந்தி³த்வா தஸ்ஸ அஞ்ஜலிம் பணாமேத்வா இத³ம் வசனம் அபா⁴ஸிம்.

27. யே கேசி மஹியா ஸத்தாதி இமிஸ்ஸா மஹாபத²வியா யே கேசி ஸத்தா நாம. ஹீனமுக்கட்ட²மஜ்ஜி²மாதி லாமகா சேவ உத்தமா ச, உபி⁴ன்னம் வேமஜ்ஜே² ப⁴வத்தா மஜ்ஜி²மா ச. ஸகே கே³ஹேதி ஸப்³பே³ தே ஸகே கே³ஹே. ஸகஞாதிபீ⁴தி ஸகேஹி ஞாதீஹி ஸம்மோத³மானா விஸ்ஸட்டா² அனுக்கண்டி²தா யதா²விப⁴வம் வட்³ட⁴ந்தி.

28. இத³ம் லோகே உத்தரியந்தி இத³ம் பன இமஸ்மிம் லோகே அஸதி³ஸம், மய்ஹம் ஏவ ஆவேணிகம். கிம் பன தம் ஸம்பீளே மம போஸனந்தி ஸம்பா³தே⁴ மம ஸம்வட்³ட⁴னம். ததா² ஹி அயோக⁴ரம்ஹி ஸம்வட்³டோ⁴, அப்பபே⁴ சந்த³ஸூரியேதி சந்த³ஸூரியானம் பபா⁴ரஹிதே அயோக⁴ரே ஸம்வட்³டோ⁴ம்ஹீதி ஸம்வட்³டோ⁴ அம்ஹி.

29. பூதிகுணபஸம்புண்ணாதி பூதிக³ந்த⁴னானப்பகாரகுணபஸம்புண்ணா கூ³த²னிரயஸதி³ஸா. மாது குச்சி²தோ ஜீவிதஸம்ஸயே வத்தமானே கத²ம் முச்சித்வா நிக்க²மித்வா. ததோ கோ⁴ரதரேதி ததோபி க³ப்³ப⁴வாஸதோ தா³ருணதரே, அவிஸ்ஸட்ட²வாஸேன து³க்கே². பக்கி²த்தயோக⁴ரேதி பக்கி²த்தோ அயோக⁴ரே, ப³ந்த⁴னாகா³ரே ட²பிதோ விய அஹோஸிந்தி த³ஸ்ஸேதி.

30. யதி³ஹந்தி ஏத்த² யதீ³தி நிபாதமத்தம். தாதி³ஸந்தி யாதி³ஸம் புப்³பே³ வுத்தம், தாதி³ஸம் பரமதா³ருணம் து³க்க²ம் பத்வா அஹம் ரஜ்ஜேஸு யதி³ ரஜ்ஜாமி யதி³ ரமிஸ்ஸாமி, ஏவம் ஸந்தே பாபானம் லாமகானம் நிஹீனபுரிஸானம் உத்தமோ நிஹீனதமோ ஸியம்.

31. உக்கண்டி²தோம்ஹி காயேனாதி அபரிமுத்தக³ப்³ப⁴வாஸாதி³னா பூதிகாயேன உக்கண்டி²தோ நிப்³பி³ன்னோ அம்ஹி. ரஜ்ஜேனம்ஹி அனத்தி²கோதி ரஜ்ஜேனபி அனத்தி²கோ அம்ஹி. யக்கி²னியா ஹத்த²தோ முத்தோபி ஹி நாஹம் அஜராமரோ, கிம் மே ரஜ்ஜேன, ரஜ்ஜஞ்ஹி நாம ஸப்³பே³ஸம் அனத்தா²னம் ஸன்னிபாதட்டா²னம், தத்த² டி²தகாலதோ பட்டா²ய து³ன்னிக்க²மம் ஹோதி, தஸ்மா தம் அனுபக³ந்த்வா நிப்³பு³திம் பரியேஸிஸ்ஸம், யத்த² மம் மச்சு ந மத்³தி³யேதி யத்த² டி²தம் மம் மஹாஸேனோ மச்சுராஜா ந மத்³தி³யே ந ஓத்த²ரேய்ய ந அபி⁴ப⁴வேய்ய, தம் நிப்³பு³திம் அமதமஹானிப்³பா³னம் பரியேஸிஸ்ஸாமீதி.

32. ஏவாஹம் சிந்தயித்வானாதி ஏவம் இமினா வுத்தப்பகாரேன நானப்பகாரம் ஸம்ஸாரே ஆதீ³னவம் பச்சவேக்க²ணேன நிப்³பா³னே ஆனிஸம்ஸத³ஸ்ஸனேன ச யோனிஸோ சிந்தேத்வா. விரவந்தே மஹாஜனேதி மயா விப்பயோக³து³க்கா²ஸஹனேன விரவந்தே பரிதே³வந்தே மாதாபிதுப்பமுகே² மஹந்தே ஜனே. நாகோ³வ ப³ந்த⁴னம் சே²த்வாதி யதா² நாம மஹாப³லோ ஹத்தி²னாகோ³ து³ப்³ப³லதரம் ரஜ்ஜுப³ந்த⁴னம் ஸுகே²னேவ சி²ந்த³தி, ஏவமேவ ஞாதிஸங்கா³தி³பே⁴த³ஸ்ஸ தஸ்மிம் ஜனே தண்ஹாப³ந்த⁴னஸ்ஸ சி²ந்த³னேன ப³ந்த⁴னம் சே²த்வா கானனஸங்கா²தம் மஹாவனம் பப்³ப³ஜ்ஜூபக³மனவஸேன பாவிஸிம். ஓஸானகா³தா² வுத்தத்தா² ஏவ.

தத்த² ச மஹாஸத்தோ அத்தனோ பப்³ப³ஜ்ஜாதி⁴ப்பாயம் ஜானித்வா ‘‘தாத, கிம்காரணா பப்³ப³ஜஸீ’’தி ரஞ்ஞா வுத்தோ ‘‘தே³வ, அஹம் மாதுகுச்சி²ம்ஹி த³ஸ மாஸே கூ³த²னிரயே விய வஸித்வா மாது குச்சி²தோ நிக்க²ந்தோ யக்கி²னியா ப⁴யேன ஸோளஸவஸ்ஸானி ப³ந்த⁴னாகா³ரே வஸந்தோ ப³ஹி ஓலோகேதும்பி ந லபி⁴ம், உஸ்ஸத³னிரயே பக்கி²த்தோ விய அஹோஸிம், யக்கி²னிதோ முத்தோபி அஜராமரோ ந ஹோமி, மச்சு நாமேஸ ந ஸக்கா கேனசி ஜினிதும், ப⁴வே உக்கண்டி²தோம்ஹி, யாவ மே ப்³யாதி⁴ஜராமரணானி நாக³ச்ச²ந்தி, தாவதே³வ பப்³ப³ஜித்வா த⁴ம்மம் சரிஸ்ஸாமி, அலம் மே ரஜ்ஜேன, அனுஜானாஹி மம், தே³வ, பப்³ப³ஜிது’’ந்தி வத்வா –

‘‘யமேகரத்திம் பட²மம், க³ப்³பே⁴ வஸதி மாணவோ;

அப்³பு⁴ட்டி²தோவ ஸோ யாதி, ஸ க³ச்ச²ம் ந நிவத்ததீ’’தி. (ஜா. 1.15.363) –

ஆதி³னா சதுவீஸதியா கா³தா²ஹி பிது த⁴ம்மம் தே³ஸேத்வா ‘‘மஹாராஜ, தும்ஹாகம் ரஜ்ஜம் தும்ஹாகமேவ ஹோது, ந மய்ஹம் இமினா அத்தோ², தும்ஹேஹி ஸத்³தி⁴ம் கதே²ந்தேயேவ ப்³யாதி⁴ஜராமரணானி ஆக³ச்சே²ய்யும், திட்ட²த² தும்ஹே’’தி வத்வா அயதா³மம் சி²ந்தி³த்வா மத்தஹத்தீ² விய, கஞ்சனபஞ்ஜரம் பி⁴ந்தி³த்வா ஸீஹபோதகோ விய, காமே பஹாய மாதாபிதரோ வந்தி³த்வா நிக்க²மி. அத²ஸ்ஸ பிதா ‘‘அயம் நாம குமாரோ பப்³ப³ஜிதுகாமோ, கிமங்க³ம் பனாஹம், மமாபி ரஜ்ஜேன அத்தோ² நத்தீ²’’தி ரஜ்ஜம் பஹாய தேன ஸத்³தி⁴ம் ஏவ நிக்க²மி. தஸ்மிம் நிக்க²மந்தே தே³வீபி அமச்சாபி ப்³ராஹ்மணக³ஹபதிகாத³யோபீதி ஸகலனக³ரவாஸினோ போ⁴கே³ ச²ட்³டே³த்வா நிக்க²மிம்ஸு. ஸமாக³மோ மஹா அஹோஸி, பரிஸா த்³வாத³ஸயோஜனிகா ஜாதா, தே ஆதா³ய மஹாஸத்தோ ஹிமவந்தம் பாவிஸி.

ஸக்கோ தே³வராஜா தஸ்ஸ நிக்க²ந்தபா⁴வம் ஞத்வா விஸ்ஸகம்மம் பேஸேத்வா த்³வாத³ஸயோஜனாயாமம் ஸத்தயோஜனவித்தா²ரம் அஸ்ஸமபத³ம் காரேஸி, ஸப்³பே³ ச பப்³ப³ஜிதபரிக்கா²ரே படியாதா³பேஸி. இத⁴ மஹாஸத்தஸ்ஸ பப்³ப³ஜ்ஜா ச ஓவாத³தா³னஞ்ச ப்³ரஹ்மலோகபராயனதா ச பரிஸாய ஸம்மா படிபத்தி ச ஸப்³பா³ மஹாகோ³விந்த³சரியாயம் (சரியா. 1.37 ஆத³யோ) வுத்தனயேனேவ வேதி³தப்³பா³.

ததா³ மாதாபிதரோ மஹாராஜகுலானி அஹேஸும், பரிஸா பு³த்³த⁴பரிஸா, அயோக⁴ரபண்டி³தோ லோகனாதோ².

தஸ்ஸ ஸேஸபாரமினித்³தா⁴ரணா ஆனுபா⁴வவிபா⁴வனா ச ஹேட்டா² வுத்தனயேனேவ வேதி³தப்³பா³தி.

அயோக⁴ரசரியாவண்ணனா நிட்டி²தா.

4. பி⁴ஸசரியாவண்ணனா

34. சதுத்தே² யதா³ ஹோமி, காஸீனம் புரவருத்தமேதி ‘‘காஸீ’’தி ப³ஹுவசனவஸேன லத்³த⁴வோஹாரஸ்ஸ ரட்ட²ஸ்ஸ நக³ரவரே பா³ராணஸியம் யஸ்மிம் காலே ஜாதஸம்வட்³டோ⁴ ஹுத்வா வஸாமீதி அத்தோ². ப⁴கி³னீ ச பா⁴தரோ ஸத்த, நிப்³ப³த்தா ஸோத்தியே குலேதி உபகஞ்சனாத³யோ ச² அஹஞ்சாதி பா⁴தரோ ஸத்த ஸப்³ப³கனிட்டா² கஞ்சனதே³வீ நாம ப⁴கி³னீ சாதி ஸப்³பே³ மயம் அட்ட² ஜனா மந்தஜ்ஜே²னனிரததாய ஸோத்தியே உதி³தோதி³தே மஹதி ப்³ராஹ்மணகுலே ததா³ நிப்³ப³த்தா ஜாதாதி அத்தோ².

35. போ³தி⁴ஸத்தோ ஹி ததா³ பா³ராணஸியம் அஸீதிகோடிவிப⁴வஸ்ஸ ப்³ராஹ்மணமஹாஸாலஸ்ஸ புத்தோ ஹுத்வா நிப்³ப³த்தி. தஸ்ஸ ‘‘கஞ்சனகுமாரோ’’தி நாமம் கரிம்ஸு. அத²ஸ்ஸ பத³ஸா விசரணகாலே அபரோ புத்தோ விஜாயி. ‘‘உபகஞ்சனகுமாரோ’’திஸ்ஸ நாமம் கரிம்ஸு. ததோ பட்டா²ய மஹாஸத்தம் ‘‘மஹாகஞ்சனகுமாரோ’’தி ஸமுதா³சரந்தி. ஏவம் படிபாடியா ஸத்த புத்தா அஹேஸும். ஸப்³ப³கனிட்டா² பன ஏகா தீ⁴தா. தஸ்ஸா ‘‘கஞ்சனதே³வீ’’தி நாமம் கரிம்ஸு. மஹாஸத்தோ வயப்பத்தோ தக்கஸிலம் க³ந்த்வா ஸப்³ப³ஸிப்பானி உக்³க³ஹேத்வா பச்சாக³ஞ்சி².

அத² நம் மாதாபிதரோ க⁴ராவாஸேன ப³ந்தி⁴துகாமா ‘‘அத்தனோ ஸமானஜாதிகுலதோ தே தா³ரிகம் ஆனேஸ்ஸாமா’’தி வதி³ம்ஸு. ஸோ ‘‘அம்ம, தாத, ந மய்ஹம் க⁴ராவாஸேன அத்தோ². மய்ஹஞ்ஹி ஸப்³போ³ லோகஸன்னிவாஸோ ஆதி³த்தோ விய ஸப்படிப⁴யோ, ப³ந்த⁴னாகா³ரம் விய பலிபு³த்³த⁴னம், உக்காரபூ⁴மி விய ஜிகு³ச்சோ² ஹுத்வா உபட்டா²தி, ந மே சித்தம் காமேஸு ரஜ்ஜதி, அஞ்ஞே வோ புத்தா அத்தி², தே க⁴ராவாஸேன நிமந்தேதா²’’தி வத்வா புனப்புனம் யாசிதோபி ஸஹாயேஹி யாசாபிதோபி ந இச்சி², அத² நம் ஸஹாயா ‘‘ஸம்ம, கிம் பன த்வம் பத்த²யந்தோ காமே பரிபு⁴ஞ்ஜிதும் ந இச்ச²ஸீ’’தி புச்சி²ம்ஸு. ஸோ தேஸம் அத்தனோ நேக்க²ம்மஜ்ஜா²ஸயம் ஆரோசேஸி. தேன வுத்தம் ‘‘ஏதேஸம் புப்³ப³ஜோ ஆஸி’’ந்திஆதி³.

தத்த² ஏதேஸம் புப்³ப³ஜோ ஆஸிந்தி ஏதேஸம் உபகஞ்சனகாதீ³னம் ஸத்தன்னம் ஜேட்ட²பா⁴திகோ அஹம் ததா³ அஹோஸிம். ஹிரீஸுக்கமுபாக³தோதி ஸுக்கவிபாகத்தா ஸந்தானஸ்ஸ விஸோத⁴னதோ ச ஸுக்கம் பாபஜிகு³ச்ச²னலக்க²ணம் ஹிரிம் பு⁴ஸம் ஆக³தோ, அதிவிய பாபம் ஜிகு³ச்ச²ந்தோ ஆஸிந்தி அத்தோ². ப⁴வம் தி³ஸ்வான ப⁴யதோ, நேக்க²ம்மாபி⁴ரதோ அஹந்தி காமப⁴வாதீ³னம் வஸேன ஸப்³ப³ம் ப⁴வம் பக்க²ந்தி³தும் ஆக³ச்ச²ந்தம் சண்ட³ஹத்தி²ம் விய, ஹிம்ஸிதும் ஆக³ச்ச²ந்தம் உக்கி²த்தாஸிகம் வத⁴கம் விய, ஸீஹம் விய, யக்க²ம் விய, ரக்க²ஸம் விய, கோ⁴ரவிஸம் விய, ஆஸிவிஸம் விய, ஆதி³த்தம் அங்கா³ரம் விய, ஸப்படிப⁴யம் ப⁴யானகபா⁴வதோ பஸ்ஸித்வா ததோ முச்சனத்த²ஞ்ச பப்³ப³ஜ்ஜாபி⁴ரதோ பப்³ப³ஜித்வா ‘‘கத²ம் நு கோ² த⁴ம்மசரியம் ஸம்மாபடிபத்திம் பூரேய்யம், ஜா²னஸமாபத்தியோ ச நிப்³ப³த்தேய்ய’’ந்தி பப்³ப³ஜ்ஜாகுஸலத⁴ம்மபட²மஜ்ஜா²னாதி³அபி⁴ரதோ ததா³ அஹம் ஆஸிந்தி அத்தோ².

36. பஹிதாதி மாதாபிதூஹி பேஸிதா. ஏகமானஸாதி ஸமானஜ்ஜா²ஸயா புப்³பே³ மயா ஏகச்ச²ந்தா³ மனாபசாரினோ மாதாபிதூஹி பஹிதத்தா பன மம படிக்கூலம் அமனாபம் வத³ந்தா. காமேஹி மம் நிமந்தேந்தீதி மஹாபிதூஹி வா ஏகமானஸா காமேஹி மம் நிமந்தேந்தி. குலவம்ஸம் தா⁴ரேஹீதி க⁴ராவாஸம் ஸண்ட²பேந்தோ அத்தனோ குலவம்ஸம் தா⁴ரேஹி பதிட்ட²பேஹீதி காமேஹி மம் நிமந்தேஸுந்தி அத்தோ².

37. யம் தேஸம் வசனம் வுத்தந்தி தேஸம் மம பியஸஹாயானம் யம் வசனம் வுத்தம். கி³ஹித⁴ம்மே ஸுகா²வஹந்தி கி³ஹிபா⁴வே ஸதி க³ஹட்ட²பா⁴வே டி²தஸ்ஸ புரிஸஸ்ஸ ஞாயானுக³தத்தா தி³ட்ட²த⁴ம்மிகஸ்ஸ ஸம்பராயிகஸ்ஸ ச ஸுக²ஸ்ஸ ஆவஹனதோ ஸுகா²வஹம். தம் மே அஹோஸி கடி²னந்தி தம் தேஸம் மய்ஹம் ஸஹாயானம் மாதாபிதூனஞ்ச வசனம் ஏகந்தேனேவ நேக்க²ம்மாபி⁴ரதத்தா அமனாபபா⁴வேன மே கடி²னம் ப²ருஸம் தி³வஸம் ஸந்தத்தபா²லஸதி³ஸம் உபோ⁴பி கண்ணே ஜா²பேந்தம் விய அஹோஸி.

38. தே மம் ததா³ உக்கி²பந்தந்தி தே மய்ஹம் ஸஹாயா மாதாபிதூஹி அத்தனோ ச உபனிமந்தனவஸேன அனேகவாரம் உபனீயமானே காமே உத்³த⁴முத்³த⁴ம் கி²பந்தம் ச²ட்³டே³ந்தம் படிக்கி²பந்தம் மம் புச்சி²ம்ஸு. பத்தி²தம் மமாதி இதோ விஸுத்³த⁴தரம் கிம் நு கோ² இமினா பத்தி²தந்தி மயா அபி⁴பத்தி²தம் மம தம் பத்த²னம் புச்சி²ம்ஸு – ‘‘கிம் த்வம் பத்த²யஸே, ஸம்ம, யதி³ காமே ந பு⁴ஞ்ஜஸீ’’தி.

39. அத்த²காமோதி அத்தனோ அத்த²காமோ, பாபபீ⁴ரூதி அத்தோ². ‘‘அத்தகாமோ’’திபி பாளி. ஹிதேஸினந்தி மய்ஹம் ஹிதேஸீனம் பியஸஹாயானம். கேசி ‘‘அத்த²காமஹிதேஸின’’ந்தி பட²ந்தி, தம் ந ஸுந்த³ரம்.

40. பிது மாது ச ஸாவயுந்தி தே மய்ஹம் ஸஹாயா அனிவத்தனீயம் மம பப்³ப³ஜ்ஜாச²ந்த³ம் விதி³த்வா பப்³ப³ஜிதுகாமதாதீ³பகம் மய்ஹம் வசனம் பிது மாது ச ஸாவேஸும். ‘‘யக்³கே⁴, அம்மதாதா, ஜானாத², ஏகந்தேனேவ மஹாகஞ்சனகுமாரோ பப்³ப³ஜிஸ்ஸதி, ந ஸோ ஸக்கா கேனசி உபாயேன காமேஸு உபனேது’’ந்தி அவோசும். மாதாபிதா ஏவமாஹூதி ததா³ மய்ஹம் மாதாபிதரோ மம ஸஹாயேஹி வுத்தம் மம வசனம் ஸுத்வா ஏவமாஹம்ஸு – ‘‘ஸப்³பே³வ பப்³ப³ஜாம, போ⁴’’தி, யதி³ மஹாகஞ்சனகுமாரஸ்ஸ நேக்க²ம்மம் அபி⁴ருசிதம், யம் தஸ்ஸ அபி⁴ருசிதம், தத³ம்ஹாகம்பி அபி⁴ருசிதமேவ, தஸ்மா ஸப்³பே³வ பப்³ப³ஜாம, போ⁴தி. ‘‘போ⁴’’தி தேஸம் ப்³ராஹ்மணானம் ஆலபனம். ‘‘பப்³ப³ஜாம கோ²’’திபி பாடோ², பப்³ப³ஜாம ஏவாதி அத்தோ². மஹாஸத்தஸ்ஸ ஹி பப்³ப³ஜ்ஜாச²ந்த³ம் விதி³த்வா உபகஞ்சனாத³யோ ச² பா⁴தரோ ப⁴கி³னீ ச கஞ்சனதே³வீ பப்³ப³ஜிதுகாமாவ அஹேஸும், தேன தேபி மாதாபிதூஹி க⁴ராவாஸேன நிமந்தியமானா ந இச்சி²ம்ஸுயேவ. தஸ்மா ஏவமாஹம்ஸு ‘‘ஸப்³பே³வ பப்³ப³ஜாம, போ⁴’’தி.

ஏவஞ்ச பன வத்வா மஹாஸத்தம் மாதாபிதரோ பக்கோஸித்வா அத்தனோபி அதி⁴ப்பாயம் தஸ்ஸ ஆசிக்கி²த்வா ‘‘தாத, யதி³ பப்³ப³ஜிதுகாமோஸி, அஸீதிகோடித⁴னம் தவ ஸந்தகம் யதா²ஸுக²ம் விஸ்ஸஜ்ஜேஹீ’’தி ஆஹம்ஸு. அத² நம் மஹாபுரிஸோ கபணத்³தி⁴காதீ³னம் விஸ்ஸஜ்ஜேத்வா மஹாபி⁴னிக்க²மனம் நிக்க²மித்வா ஹிமவந்தம் பாவிஸி. தேன ஸத்³தி⁴ம் மாதாபிதரோ ச² பா⁴தரோ ச ப⁴கி³னீ ச ஏகோ தா³ஸோ ஏகா தா³ஸீ ஏகோ ச ஸஹாயோ க⁴ராவாஸம் பஹாய அக³மம்ஸு. தேன வுத்தம் –

41. ‘‘உபோ⁴ மாதா பிதா மய்ஹம், ப⁴கி³னீ ச ஸத்த பா⁴தரோ;

அமிதத⁴னம் ச²ட்³ட³யித்வா, பவிஸிம்ஹா மஹாவன’’ந்தி.

ஜாதகட்ட²கதா²யம் (ஜா. அட்ட². 4.14.77 பி⁴ஸஜாதகவண்ணனா) பன ‘‘மாதாபிதூஸு காலம்கதேஸு தேஸம் கத்தப்³ப³கிச்சம் கத்வா மஹாஸத்தோ மஹாபி⁴னிக்க²மனம் நிக்க²மீ’’தி வுத்தம்.

ஏவம் ஹிமவந்தம் பவிஸித்வா ச தே போ³தி⁴ஸத்தப்பமுகா² ஏகம் பது³மஸரம் நிஸ்ஸாய ரமணீயே பூ⁴மிபா⁴கே³ அஸ்ஸமம் கத்வா பப்³ப³ஜித்வா வனமூலப²லாஹாரா யாபயிம்ஸு. தேஸு உபகஞ்சனாத³யோ அட்ட² ஜனா வாரேன ப²லாப²லம் ஆஹரித்வா ஏகஸ்மிம் பாஸாணப²லகே அத்தனோ இதரேஸஞ்ச கோட்டா²ஸே கத்வா க⁴ண்டிஸஞ்ஞம் த³த்வா அத்தனோ கோட்டா²ஸம் ஆதா³ய வஸனட்டா²னம் பவிஸந்தி. ஸேஸாபி க⁴ண்டிஸஞ்ஞாய பண்ணஸாலதோ நிக்க²மித்வா அத்தனோ அத்தனோ பாபுணனகோட்டா²ஸம் ஆதா³ய வஸனட்டா²னம் க³ந்த்வா பரிபு⁴ஞ்ஜித்வா ஸமணத⁴ம்மம் கரோந்தி.

அபரபா⁴கே³ பி⁴ஸானி ஆஹரித்வா ததே²வ கா²த³ந்தி. தத்த² தே கோ⁴ரதபா பரமதி⁴திந்த்³ரியா கஸிணபரிகம்மம் கரோந்தா விஹரிம்ஸு. அத² நேஸம் ஸீலதேஜேன ஸக்கஸ்ஸ ப⁴வனம் கம்பி. ஸக்கோ தம் காரணம் ஞத்வா ‘‘இமே இஸயோ வீமம்ஸிஸ்ஸாமீ’’தி அத்தனோ ஆனுபா⁴வேன மஹாஸத்தஸ்ஸ கோட்டா²ஸே தயோ தி³வஸே அந்தரதா⁴பேஸி. மஹாஸத்தோ பட²மதி³வஸே கோட்டா²ஸம் அதி³ஸ்வா ‘‘மம கோட்டா²ஸோ பமுட்டோ² ப⁴விஸ்ஸதீ’’தி சிந்தேஸி. து³தியதி³வஸே ‘‘மம தோ³ஸேன ப⁴விதப்³ப³ம், பணாமனவஸேன மம கோட்டா²ஸம் ந ட²பிதம் மஞ்ஞே’’தி சிந்தேஸி. ததியதி³வஸே ‘‘தம் காரணம் ஸுத்வா க²மாபேஸ்ஸாமீ’’தி ஸாயன்ஹஸமயே க⁴ண்டிஸஞ்ஞம் த³த்வா தாய ஸஞ்ஞாய ஸப்³பே³ஸு ஸன்னிபதிதேஸு தமத்த²ம் ஆரோசேத்வா தீஸுபி தி³வஸேஸு தேஹி ஜேட்ட²கோட்டா²ஸஸ்ஸ ட²பிதபா⁴வம் ஸுத்வா ‘‘தும்ஹேஹி மய்ஹம் கோட்டா²ஸோ ட²பிதோ, மயா பன ந லத்³தோ⁴, கிம் நு கோ² காரண’’ந்தி ஆஹ. தம் ஸுத்வா ஸப்³பே³வ ஸம்வேக³ப்பத்தா அஹேஸும்.

தஸ்மிம் அஸ்ஸமே ருக்க²தே³வதாபி அத்தனோ ப⁴வனதோ ஓதரித்வா தேஸம் ஸந்திகே நிஸீதி³. மனுஸ்ஸானம் ஹத்த²தோ பலாயித்வா அரஞ்ஞம் பவிட்டோ² ஏகோ வாரணோ அஹிதுண்டி³கஹத்த²தோ பலாயித்வா முத்தோ ஸப்பகீளாபனகோ ஏகோ வானரோ ச தேஹி இஸீஹி கதபரிசயா ததா³ தேஸம் ஸந்திகம் க³ந்த்வா ஏகமந்தம் அட்ட²ம்ஸு. ஸக்கோபி ‘‘இஸிக³ணம் பரிக்³க³ண்ஹிஸ்ஸாமீ’’தி அதி³ஸ்ஸமானகாயோ தத்தே²வ அட்டா²ஸி. தஸ்மிஞ்ச க²ணே போ³தி⁴ஸத்தஸ்ஸ கனிட்டோ² உபகஞ்சனதாபஸோ உட்டா²ய போ³தி⁴ஸத்தம் வந்தி³த்வா ஸேஸானம் அபசிதிம் த³ஸ்ஸேத்வா ‘‘அஹம் ஸஞ்ஞம் பட்ட²பேத்வா அத்தானஞ்ஞேவ ஸோதே⁴தும் லபா⁴மீ’’தி புச்சி²த்வா ‘‘ஆம, லப⁴ஸீ’’தி வுத்தே இஸிக³ணமஜ்ஜே² ட²த்வா ஸபத²ம் கரோந்தோ –

‘‘அஸ்ஸம் க³வம் ரஜதம் ஜாதரூபம், ப⁴ரியஞ்ச ஸோ இத⁴ லப⁴தம் மனாபம்;

புத்தேஹி தா³ரேஹி ஸமங்கி³ ஹோது, பி⁴ஸானி தே ப்³ராஹ்மண யோ அஹாஸீ’’தி. (ஜா. 1.14.78) –

இமம் கா³த²ம் அபா⁴ஸி. இமஞ்ஹி ஸோ ‘‘யத்தகானி பியவத்தூ²னி ஹோந்தி, தேஹி விப்பயோகே³ தத்தகானி து³க்கா²னி உப்பஜ்ஜந்தீ’’தி வத்து²காமே க³ரஹந்தோ ஆஹ.

தம் ஸுத்வா இஸிக³ணோ ‘‘மாரிஸ, மா கத²ய, அதிபா⁴ரியோ தே ஸபதோ²’’தி கண்ணே பித³ஹி. போ³தி⁴ஸத்தோபி ‘‘அதிபா⁴ரியோ தே ஸபதோ², ந, த்வம் தாத, க³ண்ஹஸி, தவ பத்தாஸனே நிஸீதா³’’தி ஆஹ. ஸேஸாபி ஸபத²ம் கரோந்தா யதா²க்கமம் –

‘‘மாலஞ்ச ஸோ காஸிகசந்த³னஞ்ச, தா⁴ரேது புத்தஸ்ஸ ப³ஹூ ப⁴வந்து;

காமேஸு திப்³ப³ம் குருதம் அபேக்க²ம், பி⁴ஸானி தே ப்³ராஹ்மண யோ அஹாஸி.

‘‘பஹூதத⁴ஞ்ஞோ கஸிமா யஸஸ்ஸீ, புத்தே கி³ஹீ த⁴னிமா ஸப்³ப³காமே;

வயம் அபஸ்ஸம் க⁴ரமாவஸாது, பி⁴ஸானி தே ப்³ராஹ்மண யோ அஹாஸி.

‘‘ஸோ க²த்தியோ ஹோது பஸய்ஹகாரீ, ராஜாபி⁴ராஜா ப³லவா யஸஸ்ஸீ;

ஸசாதுரந்தம் மஹிமாவஸாது, பி⁴ஸானி தே ப்³ராஹ்மண யோ அஹாஸி.

‘‘ஸோ ப்³ராஹ்மணோ ஹோது அவீதராகோ³, முஹுத்தனக்க²த்தபதே²ஸு யுத்தோ;

பூஜேது நம் ரட்ட²பதீ யஸஸ்ஸீ, பி⁴ஸானி தே ப்³ராஹ்மண யோ அஹாஸி.

‘‘அஜ்ஜா²யகம் ஸப்³ப³ஸமந்தவேத³ம், தபஸ்ஸினம் மஞ்ஞது ஸப்³ப³லோகோ;

பூஜேந்து நம் ஜானபதா³ ஸமேச்ச, பி⁴ஸானி தே ப்³ராஹ்மண யோ அஹாஸி.

‘‘சதுஸ்ஸத³ம் கா³மவரம் ஸமித்³த⁴ம், தி³ன்னஞ்ஹி ஸோ பு⁴ஞ்ஜது வாஸவேன;

அவீதராகோ³ மரணம் உபேது, பி⁴ஸானி தே ப்³ராஹ்மண யோ அஹாஸி.

‘‘ஸோ கா³மணீ ஹோது ஸஹாயமஜ்ஜே², நச்சேஹி கீ³தேஹி பமோத³மானோ;

ஸோ ராஜதோ ப்³யஸனமாலத்த² கிஞ்சி, பி⁴ஸானி தே ப்³ராஹ்மண யோ அஹாஸி.

‘‘தம் ஏகராஜா பத²விம் விஜேத்வா, இத்தீ²ஸஹஸ்ஸஸ்ஸ ட²பேது அக்³கே³;

ஸீமந்தினீனம் பவரா ப⁴வாது, பி⁴ஸானி தே ப்³ராஹ்மண யா அஹாஸி.

‘‘இஸீனஞ்ஹி ஸா ஸப்³ப³ஸமாக³தானம், பு⁴ஞ்ஜேய்ய ஸாது³ம் அவிகம்பமானா;

சராது லாபே⁴ன விகத்த²மானா, பி⁴ஸானி தே ப்³ராஹண யா அஹாஸி.

‘‘ஆவாஸிகோ ஹோது மஹாவிஹாரே, நவகம்மிகோ ஹோது க³ஜங்க³லாயம்;

ஆலோகஸந்தி⁴ம் தி³வஸம் கரோது, பி⁴ஸானி தே ப்³ராஹ்மண யோ அஹாஸி.

‘‘ஸோ ப³ஜ்ஜ²தம் பாஸஸதேஹி ச²ம்ஹி, ரம்மா வனா நீயது ராஜதா⁴னிம்;

துத்தேஹி ஸோ ஹஞ்ஞது பாசனேஹி, பி⁴ஸானி தே ப்³ராஹ்மண யோ அஹாஸி.

‘‘அலக்கமாலீ திபுகண்ணபிட்டோ², லட்டீ²ஹதோ ஸப்பமுக²ம் உபேது;

ஸகச்ச²ப³ந்தோ⁴ விஸிக²ம் சராது, பி⁴ஸானி தே ப்³ராஹ்மண யோ அஹாஸீ’’தி. (ஜா. 1.14.79-90) –

இமா கா³தா²யோ அவோசும்.

தத்த² திப்³ப³ந்தி வத்து²காமகிலேஸகாமேஸு ப³ஹலம் அபேக்க²ம் கரோது. கஸிமாதி ஸம்பன்னகஸிகம்மோ. புத்தே கி³ஹீ த⁴னிமா ஸப்³ப³காமேதி புத்தே லப⁴து, கி³ஹீ ஹோது, ஸத்தவிதே⁴ன த⁴னேன த⁴னிமா ஹோது, ரூபாதி³பே⁴தே³ ஸப்³ப³காமே லப⁴து. வயம் அபஸ்ஸந்தி மஹல்லககாலேபி அபப்³ப³ஜித்வா அத்தனோ வயம் அபஸ்ஸந்தோ பஞ்சகாமகு³ணஸமித்³த⁴ம் க⁴ரமேவ ஆவஸது. ராஜாபி⁴ராஜாதி ராஜூனம் அந்தரே அதிராஜா. அவீதராகோ³தி புரோஹிதட்டா²னதண்ஹாய ஸதண்ஹோ. தபஸ்ஸினந்தி தபஸீலம், ஸீலஸம்பன்னோதி நம் மஞ்ஞது. சதுஸ்ஸத³ந்தி ஆகிண்ணமனுஸ்ஸதாய மனுஸ்ஸேஹி பஹூதத⁴ஞ்ஞதாய த⁴ஞ்ஞேன ஸுலப⁴தா³ருதாய தா³ரூஹி ஸம்பன்னோத³கதாய உத³கேனாதி சதூஹி உஸ்ஸன்னம். வாஸவேனாதி வாஸவேன தி³ன்னம் விய அசலம், வாஸவதோ லத்³த⁴வரானுபா⁴வேனேவ ராஜானம் ஆராதே⁴த்வா தேன தி³ன்னந்திபி அத்தோ². அவீதராகோ³தி அவிக³தராகோ³ கத்³த³மே ஸூகரோ விய காமபங்கே நிமுக்³கோ³வ ஹோது.

கா³மணீதி கா³மஜேட்ட²கோ. தந்தி தம் இத்தி²ம். ஏகராஜாதி அக்³க³ராஜா. இத்தீ²ஸஹஸ்ஸஸ்ஸாதி வசனமட்ட²தாய வுத்தம். ஸோளஸன்னம் இத்தி²ஸஹஸ்ஸானம் அக்³க³ட்டா²னே ட²பேதூதி அத்தோ². ஸீமந்தினீனந்தி ஸீமந்தத⁴ரானம், இத்தீ²னந்தி அத்தோ². ஸப்³ப³ஸமாக³தானந்தி ஸப்³பே³ஸம் ஸன்னிபதிதானம் மஜ்ஜே² நிஸீதி³த்வா. அவிகம்பமானாதி அனோஸக்கமானா ஸாது³ரஸம் பு⁴ஞ்ஜதூதி அத்தோ². சராது லாபே⁴ன விகத்த²மானாதி லாப⁴ஹேது ஸிங்கா³ரவேஸம் க³ஹேத்வா லாப⁴ம் உப்பாதே³தும் சரது. ஆவாஸிகோதி ஆவாஸஜக்³க³னகோ. க³ஜங்க³லாயந்தி ஏவம்னாமகே நக³ரே. தத்த² கிர த³ப்³ப³ஸம்பா⁴ரா ஸுலபா⁴. ஆலோகஸந்தி⁴ம் தி³வஸந்தி ஏகதி³வஸேன ஏகமேவ வாதபானம் கரோது. ஸோ கிர தே³வபுத்தோ கஸ்ஸபபு³த்³த⁴காலே க³ஜங்க³லனக³ரம் நிஸ்ஸாய யோஜனிகே மஹாவிஹாரே ஆவாஸிகோ ஸங்க⁴த்தே²ரோ ஹுத்வா ஜிண்ணே விஹாரே நவகம்மானி கரோந்தோவ மஹாது³க்க²ம் அனுப⁴வி, தம் ஸந்தா⁴யாஹ.

பாஸஸதேஹீதி ப³ஹூஹி பாஸேஹி. ச²ம்ஹீதி சதூஸு பாதே³ஸு கீ³வாய கடிபா⁴கே³ சாதி ச²ஸு டா²னேஸு. துத்தேஹீதி த்³விகண்டகாஹி தீ³க⁴லட்டீ²ஹி. பாசனேஹீதி ரஸ்ஸபாசனேஹி, அங்குஸகேஹி வா. அலக்கமாலீதி அஹிதுண்டி³கேன கண்டே² பரிக்கி²பித்வா ட²பிதாய அலக்கமாலாய ஸமன்னாக³தோ. திபுகண்ணபிட்டோ²தி திபுபிளந்த⁴னேன பிளந்தி⁴தபிட்டி²கண்ணோ கண்ணபிட்டோ². லட்டி²ஹதோதி ஸப்பகீளாபனம் ஸிக்கா²பயமானோ லட்டி²யா ஹதோ ஹுத்வா. ஸப்³ப³ம் தே காமபோ⁴க³ம் க⁴ராவாஸம் அத்தனா அத்தனா அனுபூ⁴தது³க்க²ஞ்ச ஜிகு³ச்ச²ந்தா ததா² ததா² ஸபத²ம் கரோந்தா ஏவமாஹம்ஸு.

அத² போ³தி⁴ஸத்தோ ‘‘ஸப்³பே³ஹி இமேஹி ஸபதோ² கதோ, மயாபி காதும் வட்டதீ’’தி ஸபத²ம் கரோந்தோ –

‘‘யோ வே அனட்ட²ம்வ நட்ட²ந்தி சாஹ, காமேவ ஸோ லப⁴தம் பு⁴ஞ்ஜதஞ்ச;