2. ஸோமனஸ்ஸசரியாவண்ணனா

7. து³தியே இந்த³பத்தே² புருத்தமேதி ஏவம்னாமகே நக³ரவரே. காமிதோதி மாதாபிதுஆதீ³ஹி ‘‘அஹோ வத ஏகோ புத்தோ உப்பஜ்ஜேய்யா’’தி ஏவம் சிரகாலே பத்தி²தோ. த³யிதோதி பியாயிதோ. ஸோமனஸ்ஸோதி விஸ்ஸுதோதி ‘‘ஸோமனஸ்ஸோ’’தி ஏவம் பகாஸனாமோ.

8. ஸீலவாதி த³ஸகுஸலகம்மபத²ஸீலேன சேவ ஆசாரஸீலேன ச ஸமன்னாக³தோ. கு³ணஸம்பன்னோதி ஸத்³தா⁴பா³ஹுஸச்சாதி³கு³ணேஹி உபேதோ, பரிபுண்ணோ வா. கல்யாணபடிபா⁴னவாதி தம்தம்இதிகத்தப்³ப³ஸாத⁴னேன உபாயகோஸல்லஸங்கா²தேன ச ஸுந்த³ரேன படிபா⁴னேன ஸமன்னாக³தோ. வுட்³டா⁴பசாயீதி மாதாபிதரோ குலே ஜேட்டா²தி ஏவம் யே ஜாதிவுட்³டா⁴, யே ச ஸீலாதி³கு³ணேஹி வுட்³டா⁴, தேஸம் அபசாயனஸீலோ. ஹிரீமாதி பாபஜிகு³ச்ச²னலக்க²ணாய ஹிரியா ஸமன்னாக³தோ. ஸங்க³ஹேஸு ச கோவிதோ³தி தா³னபியவசனஅத்த²சரியாஸமானத்ததாஸங்கா²தேஹி சதூஹி ஸங்க³ஹவத்தூ²ஹி யதா²ரஹம் ஸத்தானம் ஸங்க³ண்ஹனேஸு குஸலோ. ஏவரூபோ ரேணுஸ்ஸ நாம குருராஜஸ்ஸ புத்தோ ஸோமனஸ்ஸோதி விஸ்ஸுதோ யதா³ ஹோமீதி ஸம்ப³ந்தோ⁴.

9. தஸ்ஸ ரஞ்ஞோ பதிகரோதி தேன குருராஜேன பதி அபி⁴க்க²ணம் உபகத்தப்³ப³பா⁴வேன பதிகரோ வல்லபோ⁴. குஹகதாபஸோதி அஸந்தகு³ணஸம்பா⁴வனலக்க²ணேன கோஹஞ்ஞேன ஜீவிதகப்பனகோ ஏகோ தாபஸோ, தஸ்ஸ ரஞ்ஞோ ஸக்காதப்³போ³ அஹோஸி. ஆராமந்தி ப²லாராமம், யத்த² ஏளாலுகலாபு³கும்ப⁴ண்ட³திபுஸாதி³வல்லிப²லானி சேவ தண்டு³லேய்யகாதி³ஸாகஞ்ச ரோபீயதி. மாலாவச்ச²ந்தி ஜாதிஅதிமுத்தகாதி³புப்ப²க³ச்ச²ம், தேன புப்பா²ராமம் த³ஸ்ஸேதி. ஏத்த² ச ஆராமம் கத்வா தத்த² மாலாவச்ச²ஞ்ச யதா²வுத்தப²லவச்ச²ஞ்ச ரோபேத்வா ததோ லத்³த⁴த⁴னம் ஸம்ஹரித்வா ட²பேந்தோ ஜீவதீதி அத்தோ² வேதி³தப்³போ³.

தத்ராயம் அனுபுப்³பி³கதா² – ததா³ மஹாரக்கி²தோ நாம தாபஸோ பஞ்சஸததாபஸபரிவாரோ ஹிமவந்தே வஸித்வா லோணம்பி³லஸேவனத்தா²ய ஜனபத³சாரிகம் சரந்தோ இந்த³பத்த²னக³ரம் பத்வா ராஜுய்யானே வஸித்வா ஸபரிஸோ பிண்டா³ய சரந்தோ ராஜத்³வாரம் பாபுணி. ராஜா இஸிக³ணம் தி³ஸ்வா இரியாபதே² பஸன்னோ அலங்கதமஹாதலே நிஸீதா³பேத்வா பணீதேனாஹாரேன பரிவிஸித்வா ‘‘ப⁴ந்தே, இமம் வஸ்ஸாரத்தம் மம உய்யானேயேவ வஸதா²’’தி வத்வா தேஹி ஸத்³தி⁴ம் உய்யானம் க³ந்த்வா வஸனட்டா²னானி காரேத்வா பப்³ப³ஜிதபரிக்கா²ரே த³த்வா நிக்க²மி. ததோ பட்டா²ய ஸப்³பே³பி தே ராஜனிவேஸனே பு⁴ஞ்ஜந்தி.

ராஜா பன அபுத்தகோ புத்தே பத்தே²தி, புத்தா நுப்பஜ்ஜந்தி. வஸ்ஸாரத்தச்சயேன மஹாரக்கி²தோ ‘‘ஹிமவந்தம் க³மிஸ்ஸாமா’’தி ராஜானம் ஆபுச்சி²த்வா ரஞ்ஞா கதஸக்காரஸம்மானோ நிக்க²மித்வா அந்தராமக்³கே³ மஜ்ஜ²ன்ஹிகஸமயே மக்³கா³ ஓக்கம்ம ஏகஸ்ஸ ஸந்த³ச்சா²யஸ்ஸ ருக்க²ஸ்ஸ ஹேட்டா² ஸபரிஸோ நிஸீதி³. தாபஸா கத²ம் ஸமுட்டா²பேஸும் – ‘‘ராஜா அபுத்தகோ, ஸாது⁴ வதஸ்ஸ ஸசே ராஜபுத்தம் லபே⁴ய்யா’’தி. மஹாரக்கி²தோ தம் கத²ம் ஸுத்வா ‘‘ப⁴விஸ்ஸதி நு கோ² ரஞ்ஞோ புத்தோ, உதா³ஹு நோ’’தி உபதா⁴ரேந்தோ ‘‘ப⁴விஸ்ஸதீ’’தி ஞத்வா ‘‘மா தும்ஹே சிந்தயித்த², அஜ்ஜ பச்சூஸகாலே ஏகோ தே³வபுத்தோ சவித்வா ரஞ்ஞோ அக்³க³மஹேஸியா குச்சி²ம்ஹி நிப்³ப³த்திஸ்ஸதீ’’தி ஆஹ.

தம் ஸுத்வா ஏகோ கூடஜடிலோ ‘‘இதா³னி ராஜகுலூபகோ ப⁴விஸ்ஸாமீ’’தி சிந்தேத்வா தாபஸானம் க³மனகாலே கி³லானாலயம் கத்வா நிபஜ்ஜித்வா ‘‘ஏஹி க³ச்சா²மா’’தி வுத்தே ‘‘ந ஸக்கோமீ’’தி ஆஹ. மஹாரக்கி²தோ தஸ்ஸ நிபன்னகாரணம் ஞத்வா ‘‘யதா³ ஸக்கோஸி, ததா³ ஆக³ச்சே²ய்யாஸீ’’தி இஸிக³ணம் ஆதா³ய ஹிமவந்தமேவ க³தோ. குஹகோ நிவத்தித்வா வேகே³ன க³ந்த்வா ராஜத்³வாரே ட²த்வா ‘‘மஹாரக்கி²தஸ்ஸ உபட்டா²கதாபஸோ ஆக³தோ’’தி ரஞ்ஞோ ஆரோசாபேத்வா ரஞ்ஞா வேகே³ன பக்கோஸாபிதோ பாஸாத³ம் அபி⁴ருய்ஹ பஞ்ஞத்தே ஆஸனே நிஸீதி³. ராஜா தம் வந்தி³த்வா ஏகமந்தம் நிஸின்னோ இஸீனம் ஆரோக்³யம் புச்சி²த்வா ‘‘ப⁴ந்தே, அதிகி²ப்பம் நிவத்தித்த², கேனத்தே²ன ஆக³தத்தா²’’தி ஆஹ.

மஹாராஜ, இஸிக³ணோ ஸுக²னிஸின்னோ ‘‘ஸாது⁴ வதஸ்ஸ ஸசே ரஞ்ஞோ வம்ஸானுரக்க²கோ புத்தோ உப்பஜ்ஜேய்யா’’தி கத²ம் ஸமுட்டா²பேஸி. அஹம் தம் கத²ம் ஸுத்வா ‘‘ப⁴விஸ்ஸதி நு கோ² ரஞ்ஞோ புத்தோ, உதா³ஹு நோ’’தி தி³ப்³ப³சக்கு²னா ஓலோகேந்தோ ‘‘மஹித்³தி⁴கோ தே³வபுத்தோ சவித்வா அக்³க³மஹேஸியா ஸுத⁴ம்மாய குச்சி²ம்ஹி நிப்³ப³த்திஸ்ஸதீ’’தி தி³ஸ்வா ‘‘அஜானந்தா க³ப்³ப⁴ம் நாஸேய்யும், ஆசிக்கி²ஸ்ஸாமி தாவ ந’’ந்தி தும்ஹாகம் கத²னத்தா²ய ஆக³தோ, கதி²தம் வோ மயா, க³ச்சா²மஹ’’ந்தி. ராஜா ‘‘ப⁴ந்தே, ந ஸக்கா க³ந்து’’ந்தி ஹட்ட²துட்டோ² பஸன்னசித்தோ குஹகதாபஸம் உய்யானம் நேத்வா வஸனட்டா²னம் ஸம்வித³ஹித்வா அதா³ஸி. ஸோ ததோ பட்டா²ய ராஜகுலே பு⁴ஞ்ஜந்தோ வஸதி, ‘‘தி³ப்³ப³சக்கு²கோ’’த்வேவஸ்ஸ நாமம் அஹோஸி.

ததா³ போ³தி⁴ஸத்தோ தாவதிம்ஸப⁴வனதோ சவித்வா தத்த² படிஸந்தி⁴ம் க³ண்ஹி, ஜாதஸ்ஸ ச நாமக்³க³ஹணதி³வஸே ‘‘ஸோமனஸ்ஸோ’’தி நாமம் கரிம்ஸு. ஸோ குமாரபரிஹாரேன வட்³ட⁴தி. குஹகதாபஸோபி உய்யானஸ்ஸ ஏகபஸ்ஸே நானப்பகாரம் ஸூபேய்யஸாகஞ்ச ப²லவல்லிஆத³யோ ச ரோபேத்வா பண்ணிகானம் ஹத்தே² விக்கிணந்தோ த⁴னம் ஸம்ஹரதி. அத² போ³தி⁴ஸத்தஸ்ஸ ஸத்தவஸ்ஸிககாலே ரஞ்ஞோ பச்சந்தோ குபிதோ. ஸோ ‘‘தாத, தி³ப்³ப³சக்கு²தாபஸே மா பமஜ்ஜா’’தி குமாரம் படிச்சா²பேத்வா பச்சந்தம் வூபஸமேதும் க³தோ.

10-13. அதே²கதி³வஸம் குமாரோ ‘‘ஜடிலம் பஸ்ஸிஸ்ஸாமீ’’தி உய்யானம் க³ந்த்வா கூடஜடிலம் ஏகம் க³ந்தி⁴ககாஸாவம் நிவாஸேத்வா ஏகம் பாருபித்வா உபோ⁴ஹி ஹத்தே²ஹி த்³வே க⁴டே க³ஹேத்வா ஸாகவத்து²ஸ்மிம் உத³கம் ஸிஞ்சந்தம் தி³ஸ்வா ‘‘அயம் கூடஜடிலோ அத்தனோ ஸமணத⁴ம்மம் அகத்வா பண்ணிககம்மம் கரோதீ’’தி ஞத்வா ‘‘கிம் கரோஸி பண்ணிகக³ஹபதிகா’’தி தம் லஜ்ஜாபேத்வா அவந்தி³த்வா ஏவ நிக்க²மி.

கூடஜடிலோ ‘‘அயம் இதா³னேவ ஏவரூபோ, பச்சா² ‘கோ ஜானாதி கிம் கரிஸ்ஸதீ’தி இதா³னேவ நம் நாஸேதும் வட்டதீ’’தி சிந்தேத்வா ரஞ்ஞோ ஆக³மனகாலே பாஸாணப²லகம் ஏகமந்தம் கி²பித்வா பானீயக⁴டம் பி⁴ந்தி³த்வா பண்ணஸாலாய திணானி விகிரித்வா ஸரீரம் தேலேன மக்கே²த்வா பண்ணஸாலம் பவிஸித்வா ஸஸீஸம் பாருபித்வா மஹாது³க்க²ப்பத்தோ விய மஞ்சே நிபஜ்ஜி. ராஜா ஆக³ந்த்வா நக³ரம் பத³க்கி²ணம் கத்வா நிவேஸனம் அபவிஸித்வாவ ‘‘மம ஸாமிகம் தி³ப்³ப³சக்கு²கம் பஸ்ஸிஸ்ஸாமீ’’தி பண்ணஸாலத்³வாரம் க³ந்த்வா தம் விப்பகாரம் தி³ஸ்வா ‘‘கிம் நு கோ² ஏத’’ந்தி அந்தோ பவிஸித்வா தம் நிபன்னகம் தி³ஸ்வா பாதே³ பரிமஜ்ஜந்தோ புச்சி² – ‘‘கேன, த்வம் ப⁴ந்தே, ஏவம் விஹேடி²தோ, கமஜ்ஜ யமலோகம் நேமி, தம் மே ஸீக⁴ம் ஆசிக்கா²’’தி.

தம் ஸுத்வா கூடஜடிலோ நித்து²னந்தோ உட்டா²ய தி³ட்டோ², மஹாராஜ, த்வம் மே, பஸ்ஸித்வா தயி விஸ்ஸாஸேன அஹம் இமம் விப்பகாரம் பத்தோ, தவ புத்தேனம்ஹி ஏவம் விஹேடி²தோதி. தம் ஸுத்வா ராஜா சோரகா⁴தகே ஆணாபேஸி – ‘‘க³ச்ச²த² குமாரஸ்ஸ ஸீஸம் சி²ந்தி³த்வா ஸரீரஞ்சஸ்ஸ க²ண்டா³க²ண்டி³கம் சி²ந்தி³த்வா ரதி²யா ரதி²யம் விகிரதா²’’தி. தே மாதரா அலங்கரித்வா அத்தனோ அங்கே நிஸீதா³பிதம் குமாரம் ஆகட்³டி⁴ம்ஸு – ‘‘ரஞ்ஞா தே வதோ⁴ ஆணத்தோ’’தி. குமாரோ மரணப⁴யதஜ்ஜிதோ மாது அங்கதோ வுட்டா²ய – ‘‘ரஞ்ஞோ மம் த³ஸ்ஸேத², ஸந்தி ராஜகிச்சானீ’’தி ஆஹ. தே குமாரஸ்ஸ வசனம் ஸுத்வா மாரேதும் அவிஸஹந்தா கோ³ணம் விய ரஜ்ஜுயா பரிகட்³ட⁴ந்தா நேத்வா ரஞ்ஞோ த³ஸ்ஸேஸும். தேன வுத்தம் ‘‘தமஹம் தி³ஸ்வான குஹக’’ந்திஆதி³.

தத்த² து²ஸராஸிம்வ அதண்டு³லந்தி தண்டு³லகணேஹி விரஹிதம் து²ஸராஸிம் விய, து³மம்வ ருக்க²ம் விய, அந்தோ மஹாஸுஸிரம். கத³லிம்வ அஸாரகம் ஸீலாதி³ஸாரரஹிதம் தாபஸம் அஹம் தி³ஸ்வா நத்தி² இமஸ்ஸ ஸதம் ஸாதூ⁴னம் ஜா²னாதி³த⁴ம்மோ. கஸ்மா? ஸாமஞ்ஞா ஸமணபா⁴வா ஸீலமத்ததோபி அபக³தோ பரிஹீனோ அயம், ததா² ஹி அயம் ஹிரீஸுக்கத⁴ம்மஜஹிதோ பஜஹிதஹிரிஸங்கா²தஸுக்கத⁴ம்மோ. ஜீவிதவுத்திகாரணாதி ‘‘கேவலம் ஜீவிதஸ்ஸேவ ஹேது அயம் தாபஸலிங்கே³ன சரதீ’’தி சிந்தேஸிந்தி த³ஸ்ஸேதி. பரந்திஹீதி பரந்தோ பச்சந்தோ நிவாஸபூ⁴தோ ஏதேஸம் அத்தீ²தி பரந்தினோ, ஸீமந்தரிகவாஸினோ. தேஹி பரந்தீஹி அடவிகேஹி பச்சந்ததே³ஸோ கோ²பி⁴தோ அஹோஸி. தம் பச்சந்தகோபம் நிஸேதே⁴தும் வூபஸமேதும் க³ச்ச²ந்தோ மம பிதா குருராஜா ‘‘தாத ஸோமனஸ்ஸகுமார, மய்ஹம் ஸாமிகம் உக்³க³தாபனம் கோ⁴ரதபம் பரமஸந்திந்த்³ரியம் ஜடிலம் மா பமஜ்ஜி. ஸோ ஹி அம்ஹாகம் ஸப்³ப³காமத³தோ³, தஸ்மா யதி³ச்ச²கம் சித்தருசியம் தஸ்ஸ சித்தானுகூலம் பவத்தேஹி அனுவத்தேஹீ’’தி ததா³ மம் அனுஸாஸீதி த³ஸ்ஸேதி.

14. தமஹம் க³ந்த்வானுபட்டா²னந்தி பிது வசனம் அனதிக்கந்தோ தம் கூடதாபஸம் உபட்டா²னத்த²ம் க³ந்த்வா தம் ஸாகவத்து²ஸ்மிம் உத³கம் ஆஸிஞ்சந்தம் தி³ஸ்வா ‘‘பண்ணிகோ அய’’ந்தி ச ஞத்வா கச்சி தே, க³ஹபதி, குஸலந்தி, க³ஹபதி, தே ஸரீரஸ்ஸ கச்சி குஸலம் குஸலமேவ, ததா² ஹி ஸாகவத்து²ஸ்மிம் உத³கம் ஆஸிஞ்சஸி. கிம் வா தவ ஹிரஞ்ஞம் வா ஸுவண்ணம் வா ஆஹரீயது, ததா² ஹி பண்ணிகவுத்திம் அனுதிட்ட²ஸீதி இத³ம் வசனம் அபா⁴ஸிம்.

15. தேன ஸோ குபிதோ ஆஸீதி தேன மயா வுத்தக³ஹபதிவாதே³ன ஸோ மானனிஸ்ஸிதோ மானம் அல்லீனோ குஹகோ மய்ஹம் குபிதோ குத்³தோ⁴ அஹோஸி. குத்³தோ⁴ ச ஸமானோ ‘‘கா⁴தாபேமி துவம் அஜ்ஜ, ரட்டா² பப்³பா³ஜயாமி வா’’தி ஆஹ.

தத்த² துவம் அஜ்ஜாதி, த்வம் அஜ்ஜ, இதா³னியேவ ரஞ்ஞோ ஆக³தகாலேதி அத்தோ².

16. நிஸேத⁴யித்வா பச்சந்தந்தி பச்சந்தம் வூபஸமேத்வா நக³ரம் அபவிட்டோ² தங்க²ணஞ்ஞேவ உய்யானம் க³ந்த்வா குஹகம் குஹகதாபஸம் கச்சி தே, ப⁴ந்தே, க²மனீயம், ஸம்மானோ தே பவத்திதோதி குமாரேன தே ஸம்மானோ பவத்திதோ அஹோஸி.

17. குமாரோ யதா² நாஸியோதி யதா² குமாரோ நாஸியோ நாஸேதப்³போ³ கா⁴தாபேதப்³போ³, ததா² ஸோ பாபோ தஸ்ஸ ரஞ்ஞோ ஆசிக்கி². ஆணாபேஸீதி மய்ஹம் ஸாமிகே இமஸ்மிம் தி³ப்³ப³சக்கு²தாபஸே ஸதி கிம் மம ந நிப்ப²ஜ்ஜதி, தஸ்மா புத்தேன மே அத்தோ² நத்தி², ததோபி அயமேவ ஸேய்யோதி சிந்தேத்வா ஆணாபேஸி.

18. கிந்தி? ஸீஸம் தத்தே²வ சி²ந்தி³த்வாதி யஸ்மிம் டா²னே தம் குமாரம் பஸ்ஸத², தத்தே²வ தஸ்ஸ ஸீஸம் சி²ந்தி³த்வா ஸரீரஞ்சஸ்ஸ கத்வான சதுக²ண்டி³கம் சதுரோ க²ண்டே³ கத்வா ரதி²யா ரதி²யம் நீயந்தா வீதி²தோ வீதி²ம் விக்கி²பந்தா த³ஸ்ஸேத². கஸ்மா? ஸா க³தி ஜடிலஹீளிதாதி யேஹி அயம் ஜடிலோ ஹீளிதோ, தேஸம் ஜடிலஹீளிதானம் ஸா க³தி ஸா நிப்ப²த்தி ஸோ விபாகோதி. ஜடிலஹீளிதாதி வா ஜடிலஹீளனஹேது ஸா தஸ்ஸ நிப்ப²த்தீதி ஏவஞ்சேத்த² அத்தோ² த³ட்ட²ப்³போ³.

19. தத்தா²தி தஸ்ஸ ரஞ்ஞோ ஆணாயம், தஸ்மிம் வா தாபஸஸ்ஸ பரிப⁴வே. காரணிகாதி கா⁴தகா, சோரகா⁴தகாதி அத்தோ². சண்டா³தி குரூரா. லுத்³தா³தி ஸுதா³ருணா. அகாருணாதி தஸ்ஸேவ வேவசனம் கதம். ‘‘அகருணா’’திபி பாளி, நிக்கருணாதி அத்தோ². மாது அங்கே நிஸின்னஸ்ஸாதி மம மாது ஸுத⁴ம்மாய தே³வியா உச்ச²ங்கே³ நிஸின்னஸ்ஸ. ‘‘நிஸின்னஸ்ஸா’’தி அனாத³ரே ஸாமிவசனம். ஆகட்³டி⁴த்வா நயந்தி மந்தி மாதரா அலங்கரித்வா அத்தனோ அங்கே நிஸீதா³பிதம் மம் ராஜாணாய தே சோரகா⁴தகா கோ³ணம் விய ரஜ்ஜுயா ஆகட்³டி⁴த்வா ஆகா⁴தனம் நயந்தி. குமாரே பன நீயமானே தா³ஸிக³ணபரிவுதா ஸத்³தி⁴ம் ஓரோதே⁴ஹி ஸுத⁴ம்மா தே³வீ நாக³ராபி ‘‘மயம் நிரபராத⁴ம் குமாரம் மாரேதும் ந த³ஸ்ஸாமா’’தி தேன ஸத்³தி⁴ம்யேவ அக³மம்ஸு.

20. ப³ந்த⁴தம் கா³ள்ஹப³ந்த⁴னந்தி கா³ள்ஹப³ந்த⁴னம் ப³ந்த⁴ந்தானம் தேஸம் காரணிகபுரிஸானம். ராஜகிரியானி அத்தி² மேதி மயா ரஞ்ஞோ வத்தப்³பா³னி ராஜகிச்சானி அத்தி². தஸ்மா ரஞ்ஞோ த³ஸ்ஸேத² மம் கி²ப்பந்தி தேஸம் அஹம் ஏவம் வசனம் அவசம்.

21. ரஞ்ஞோ த³ஸ்ஸயிம்ஸு, பாபஸ்ஸ பாபஸேவினோதி அத்தனா பாபஸீலஸ்ஸ லாமகாசாரஸ்ஸ கூடதாபஸஸ்ஸ ஸேவனதோ பாபஸேவினோ ரஞ்ஞோ மம் த³ஸ்ஸயிம்ஸு. தி³ஸ்வான தம் ஸஞ்ஞாபேஸிந்தி தம் மம பிதரம் குருராஜானம் பஸ்ஸித்வா ‘‘கஸ்மா மம், தே³வ, மாராபேஸீ’’தி வத்வா தேன ‘‘கஸ்மா ச பன த்வம் மய்ஹம் ஸாமிகம் தி³ப்³ப³சக்கு²தாபஸம் க³ஹபதிவாதே³ன ஸமுதா³சரி. இத³ஞ்சித³ஞ்ச விப்பகாரம் கரீ’’தி வுத்தே ‘‘தே³வ, க³ஹபதிஞ்ஞேவ ‘க³ஹபதீ’தி வத³ந்தஸ்ஸ கோ மய்ஹம் தோ³ஸோ’’தி வத்வா தஸ்ஸ நானாவிதா⁴னி மாலாவச்சா²னி ரோபேத்வா புப்ப²பண்ணப²லாப²லாதீ³னம் விக்கிணனம் ஹத்த²தோ சஸ்ஸ தானி தே³வஸிகம் விக்கிணந்தேஹி மாலாகாரபண்ணிகேஹி ஸத்³த³ஹாபேத்வா ‘‘மாலாவத்து²பண்ணவத்தூ²னி உபதா⁴ரேதா²’’தி வத்வா பண்ணஸாலஞ்சஸ்ஸ பவிஸித்வா புப்பா²தி³விக்கியலத்³த⁴ம் கஹாபணகப⁴ண்டி³கம் அத்தனோ புரிஸேஹி நீஹராபேத்வா ராஜானம் ஸஞ்ஞாபேஸிம் தஸ்ஸ கூடதாபஸபா⁴வம் ஜானாபேஸிம். மமஞ்ச வஸமானயிந்தி தேன ஸஞ்ஞாபனேன ‘‘ஸச்சம் கோ² பன குமாரோ வத³தி, அயம் கூடதாபஸோ புப்³பே³ அப்பிச்சோ² விய ஹுத்வா இதா³னி மஹாபரிக்³க³ஹோ ஜாதோ’’தி யதா² தஸ்மிம் நிப்³பி³ன்னோ மம வஸே வத்ததி, ஏவம் ராஜானம் மம வஸமானேஸிம்.

ததோ மஹாஸத்தோ ‘‘ஏவரூபஸ்ஸ பா³லஸ்ஸ ரஞ்ஞோ ஸந்திகே வஸனதோ ஹிமவந்தம் பவிஸித்வா பப்³ப³ஜிதும் யுத்த’’ந்தி சிந்தேத்வா ராஜானம் ஆபுச்சி² – ‘‘ந மே, மஹாராஜ, இத⁴ வாஸேன அத்தோ², அனுஜானாத² மம் பப்³ப³ஜிஸ்ஸாமீ’’தி. ராஜா ‘‘தாத, மயா அனுபதா⁴ரேத்வாவ தே வதோ⁴ ஆணத்தோ, க²ம மய்ஹம் அபராத⁴’’ந்தி மஹாஸத்தம் க²மாபேத்வா ‘‘அஜ்ஜேவ இமம் ரஜ்ஜம் படிபஜ்ஜாஹீ’’தி ஆஹ. குமாரோ ‘‘தே³வ, கிமத்தி² மானுஸகேஸு போ⁴கே³ஸு, அஹம் புப்³பே³ தீ³க⁴ரத்தம் தி³ப்³ப³போ⁴க³ஸம்பத்தியோ அனுப⁴விம், ந தத்தா²பி மே ஸங்கோ³, பப்³ப³ஜிஸ்ஸாமேவாஹம், ந தாதி³ஸஸ்ஸ பா³லஸ்ஸ பரனேய்யபு³த்³தி⁴னோ ஸந்திகே வஸாமீ’’தி வத்வா தம் ஓவத³ந்தோ –

‘‘அனிஸம்ம கதம் கம்மம், அனவத்தா²ய சிந்திதம்;

பே⁴ஸஜ்ஜஸ்ஸேவ வேப⁴ங்கோ³, விபாகோ ஹோதி பாபகோ.

‘‘நிஸம்ம ச கதம் கம்மம், ஸம்மாவத்தா²ய சிந்திதம்;

பே⁴ஸஜ்ஜஸ்ஸேவ ஸம்பத்தி, விபாகோ ஹோதி ப⁴த்³ரகோ.

‘‘அலஸோ கி³ஹீ காமபோ⁴கீ³ ந ஸாது⁴, அஸஞ்ஞதோ பப்³ப³ஜிதோ ந ஸாது⁴;

ராஜா ந ஸாது⁴ அனிஸம்மகாரீ, யோ பண்டி³தோ கோத⁴னோ தம் ந ஸாது⁴.

‘‘நிஸம்ம க²த்தியோ கயிரா, நானிஸம்ம தி³ஸம்பதி;

நிஸம்மகாரினோ ராஜ, யஸோ கித்தி ச வட்³ட⁴தி.

‘‘நிஸம்ம த³ண்ட³ம் பணயேய்ய இஸ்ஸரோ, வேகா³ கதம் தப்பதி பூ⁴மிபால;

ஸம்மாபணீதீ⁴ ச நரஸ்ஸ அத்தா², அனானுதப்பா தே ப⁴வந்தி பச்சா².

‘‘அனானுதப்பானி ஹி யே கரோந்தி, விப⁴ஜ்ஜ கம்மாயதனானி லோகே;

விஞ்ஞுப்பஸத்தா²னி ஸுகு²த்³ரயானி, ப⁴வந்தி பு³த்³தா⁴னுமதானி தானி.

‘‘ஆக³ச்சு²ம் தோ³வாரிகா க²க்³க³ப³ந்தா⁴, காஸாவியா ஹந்து மமம் ஜனிந்த³;

மாதுஞ்ச அங்கஸ்மிமஹம் நிஸின்னோ, ஆகட்³டி⁴தோ ஸஹஸா தேஹி தே³வ.

‘‘கடுகஞ்ஹி ஸம்பா³த⁴ம் ஸுகிச்ச²ம் பத்தோ, மது⁴ரம்பியம் ஜீவிதம் லத்³த⁴ ராஜ;

கிச்சே²னஹம் அஜ்ஜ வதா⁴ பமுத்தோ, பப்³ப³ஜ்ஜமேவாபி⁴மனோஹமஸ்மீ’’தி. (ஜா. 1.15.227-234) –

இமாஹி கா³தா²ஹி த⁴ம்மம் தே³ஸேஸி.

தத்த² அனிஸம்மாதி அனுபதா⁴ரேத்வா. அனவத்தா²யாதி அவவத்த²பேத்வா. வேப⁴ங்கோ³தி விபத்தி. விபாகோதி நிப்ப²த்தி. அஸஞ்ஞதோதி அஸம்வுதோ து³ஸ்ஸீலோ. பணயேய்யாதி பட்ட²பேய்ய. வேகா³தி வேகே³ன ஸஹஸா. ஸம்மாபணீதீ⁴ சாதி ஸம்மாபணிதி⁴னா, யோனிஸோ ட²பிதேன சித்தேன கதா நரஸ்ஸ அத்தா² பச்சா² அனானுதப்பா ப⁴வந்தீதி அத்தோ². விப⁴ஜ்ஜாதி இமானி காதும் யுத்தானி, இமானி அயுத்தானீதி ஏவம் பஞ்ஞாய விப⁴ஜித்வா. கம்மாயதனானீதி கம்மானி. பு³த்³தா⁴னுமதானீதி பண்டி³தேஹி அனுமதானி அனவஜ்ஜானி ஹோந்தி. கடுகந்தி து³க்க²ம் அஸாதம், ஸம்பா³த⁴ம் ஸுகிச்ச²ம் மரணப⁴யம் பத்தோம்ஹி. லத்³தா⁴தி அத்தனோ ஞாணப³லேன ஜீவிதம் லபி⁴த்வா. பப்³ப³ஜ்ஜமேவாபி⁴மனோதி பப்³ப³ஜ்ஜாபி⁴முக²சித்தோ ஏவாஹமஸ்மி.

ஏவம் மஹாஸத்தேன த⁴ம்மே தே³ஸிதே ராஜா தே³விம் ஆமந்தேஸி – ‘‘தே³வி, த்வம் புத்தம் நிவத்தேஹீ’’தி. தே³வீபி குமாரஸ்ஸ பப்³ப³ஜ்ஜமேவ ரோசேஸி. மஹாஸத்தோ மாதாபிதரோ வந்தி³த்வா ‘‘ஸசே மய்ஹம் தோ³ஸோ அத்தி², தம் க²மதா²’’தி க²மாபேத்வா மஹாஜனம் ஆபுச்சி²த்வா ஹிமவந்தாபி⁴முகோ² அக³மாஸி. க³தே ச பன மஹாஸத்தே மஹாஜனோ கூடஜடிலம் போதே²த்வா ஜீவிதக்க²யம் பாபேஸி. போ³தி⁴ஸத்தோபி ஸனாக³ரேஹி அமச்சபாரிஸஜ்ஜாதீ³ஹி ராஜபுரிஸேஹி அஸ்ஸுமுகே²ஹி அனுப³ந்தி⁴யமானோ தே நிவத்தேஸி. மனுஸ்ஸேஸு நிவத்தேஸு மனுஸ்ஸவண்ணேனாக³ந்த்வா தே³வதாஹி நீதோ ஸத்த பப்³ப³தராஜியோ அதிக்கமித்வா ஹிமவந்தே விஸ்ஸகம்முனா நிம்மிதாய பண்ணஸாலாய இஸிபப்³ப³ஜ்ஜம் பப்³ப³ஜி. தேன வுத்தம் –

22. ‘‘ஸோ மம் தத்த² க²மாபேஸி, மஹாரஜ்ஜம் அதா³ஸி மே;

ஸோஹம் தமம் தா³லயித்வா, பப்³ப³ஜிம் அனகா³ரிய’’ந்தி.

தத்த² தமம் தா³லயித்வாதி காமாதீ³னவத³ஸ்ஸனஸ்ஸ படிபக்க²பூ⁴தம் ஸம்மோஹதமம் வித⁴மித்வா. பப்³ப³ஜிந்தி உபாக³ச்சி²ம். அனகா³ரியந்தி பப்³ப³ஜ்ஜம்.

23. இதா³னி யத³த்த²ம் ததா³ தம் ராஜிஸ்ஸரியம் பரிச்சத்தம், தம் த³ஸ்ஸேதும் ‘‘ந மே தே³ஸ்ஸ’’ந்தி ஓஸானகா³த²மாஹ. தஸ்ஸத்தோ² வுத்தனயோவ.

ஏவம் பன மஹாஸத்தே பப்³ப³ஜிதே யாவ ஸோளஸவஸ்ஸகாலா ராஜகுலே பரிசாரிகவேஸேன தே³வதாயேவ நம் உபட்ட²ஹிம்ஸு. ஸோ தத்த² ஜா²னாபி⁴ஞ்ஞாயோ நிப்³ப³த்தேத்வா ப்³ரஹ்மலோகூபகோ³ அஹோஸி.

ததா³ குஹகோ தே³வத³த்தோ அஹோஸி, மாதா மஹாமாயா, மஹாரக்கி²ததாபஸோ ஸாரிபுத்தத்தே²ரோ, ஸோமனஸ்ஸகுமாரோ லோகனாதோ².

தஸ்ஸ யுத⁴ஞ்ஜயசரியாயம் (சரியா. 3.1 ஆத³யோ) வுத்தனயேனேவ த³ஸ பாரமியோ நித்³தா⁴ரேதப்³பா³. இதா⁴பி நேக்க²ம்மபாரமீ அதிஸயவதீதி ஸா ஏவ தே³ஸனம் ஆருள்ஹா. ததா² ஸத்தவஸ்ஸிககாலே ஏவ ராஜகிச்சேஸு ஸமத்த²தா, தஸ்ஸ தாபஸஸ்ஸ கூடஜடிலபா⁴வபரிக்³க³ண்ஹனம், தேன பயுத்தேன ரஞ்ஞா வதே⁴ ஆணத்தே ஸந்தாஸாபா⁴வோ, ரஞ்ஞோ ஸந்திகம் க³ந்த்வா நானானயேஹி தஸ்ஸ ஸதோ³ஸதம் அத்தனோ ச நிரபராத⁴தம் மஹாஜனஸ்ஸ மஜ்ஜே² பகாஸேத்வா ரஞ்ஞோ ச பரனேய்யபு³த்³தி⁴தம் பா³லபா⁴வஞ்ச பட்ட²பேத்வா தேன க²மாபிதேபி தஸ்ஸ ஸந்திகே வாஸதோ ரஜ்ஜிஸ்ஸரியதோ ச ஸம்வேக³மாபஜ்ஜித்வா நானப்பகாரம் யாசியமானேனபி ஹத்த²க³தம் ரஜ்ஜஸிரிம் கே²ளபிண்ட³ம் விய ச²ட்³டே³த்வா கத்த²சி அலக்³க³சித்தேன ஹுத்வா பப்³ப³ஜனம், பப்³ப³ஜித்வா பவிவேகாராமேன ஹுத்வா நசிரஸ்ஸேவ அப்பகஸிரேன ஜா²னாபி⁴ஞ்ஞானிப்³ப³த்தனந்தி ஏவமாத³யோ மஹாஸத்தஸ்ஸ கு³ணானுபா⁴வா விபா⁴வேதப்³பா³தி.

ஸோமனஸ்ஸசரியாவண்ணனா நிட்டி²தா.