4. சூளபோ³தி⁴சரியாவண்ணனா

26. சதுத்தே² சூளபோ³தீ⁴தி மஹாபோ³தி⁴பரிப்³பா³ஜகத்தபா⁴வம் உபாதா³ய இத⁴ ‘‘சூளபோ³தீ⁴’’தி ஸமஞ்ஞா ஆரோபிதா, ந பன இமஸ்மிம் ஏவ ஜாதகே (ஜா. 1.10.49 ஆத³யோ) அத்தனோ ஜேட்ட²பா⁴திகாதி³னோ மஹாபோ³தி⁴ஸ்ஸ ஸம்ப⁴வதோதி த³ட்ட²ப்³ப³ம். ஸுஸீலவாதி ஸுட்டு² ஸீலவா, ஸம்பன்னஸீலோதி அத்தோ². ப⁴வம் தி³ஸ்வான ப⁴யதோதி காமாதி³ப⁴வம் பா⁴யிதப்³ப³பா⁴வேன பஸ்ஸித்வா. நேக்க²ம்மந்தி ஏத்த² ச-ஸத்³த³ஸ்ஸ லோபோ த³ட்ட²ப்³போ³, தேன ‘‘தி³ஸ்வானா’’தி பத³ம் ஆகட்³டீ⁴யதி. இத³ம் வுத்தம் ஹோதி – ஜாதிஜராப்³யாதி⁴மரணம் அபாயது³க்க²ம் அதீதே வட்டமூலகம் து³க்க²ம், அனாக³தே வட்டமூலகம் து³க்க²ம், பச்சுப்பன்னே ஆஹாரபரியேட்டி²மூலகம் து³க்க²ந்தி இமேஸம் அட்ட²ன்னம் ஸம்வேக³வத்தூ²னம் பச்சவேக்க²ணேன ஸப்³ப³ம்பி காமாதி³பே⁴த³ம் ப⁴வம் ஸம்ஸாரப⁴யதோ உபட்ட²ஹமானம் தி³ஸ்வா நிப்³பா³னம் தஸ்ஸ உபாயபூ⁴தா ஸமத²விபஸ்ஸனா தது³பாயபூ⁴தா ச பப்³ப³ஜ்ஜாதி இத³ம் திவித⁴ம்பி நேக்க²ம்மம் அனுஸ்ஸவாதி³ஸித்³தே⁴ன ஞாணசக்கு²னா தப்படிபக்க²தோ தி³ஸ்வா தாபஸபப்³ப³ஜ்ஜூபக³மனேன அனேகாதீ³னவாகுலா க³ஹட்ட²பா⁴வா அபி⁴னிக்க²மித்வா க³தோதி.

27. து³தியிகாதி போராணது³தியிகா, கி³ஹிகாலே பஜாபதிபூ⁴தா. கனகஸன்னிபா⁴தி கஞ்சனஸன்னிப⁴த்தசா. வட்டே அனபேக்கா²தி ஸம்ஸாரே நிராலயா. நேக்க²ம்மம் அபி⁴னிக்க²மீதி நேக்க²ம்மத்தா²ய கே³ஹதோ நிக்க²மி, பப்³ப³ஜீதி அத்தோ².

28. ஆலயந்தி ஸத்தா ஏதேனாதி ஆலயோ, தண்ஹா, தத³பா⁴வேன நிராலயா. ததோ ஏவ ஞாதீஸு தண்ஹாப³ந்த⁴னஸ்ஸ சி²ன்னத்தா சி²ன்னப³ந்து⁴. ஏவம் கி³ஹிப³ந்த⁴னாபா⁴வம் த³ஸ்ஸேத்வா இதா³னி பப்³ப³ஜிதானம்பி கேஸஞ்சி யம் ஹோதி ப³ந்த⁴னம், தஸ்ஸாபி அபா⁴வம் த³ஸ்ஸேதும் ‘‘அனபேக்கா² குலே க³ணே’’தி வுத்தம். தத்த² குலேதி உபட்டா²ககுலே. க³ணேதி தாபஸக³ணே, ஸேஸா ப்³ரஹ்மசாரினோதி வுச்சந்தி. உபாக³முந்தி உபோ⁴பி மயம் உபாக³மிம்ஹா.

29. தத்தா²தி பா³ராணஸிஸாமந்தே. நிபகாதி பஞ்ஞவந்தோ. நிராகுலேதி ஜனஸஞ்சாரரஹிதத்தா ஜனேஹி அனாகுலே, அப்பஸத்³தே³தி மிக³பக்கீ²னம் உட்டா²பனதோ தேஸம் வஸ்ஸிதஸத்³தே³னாபி விரஹிதத்தா அப்பஸத்³தே³. ராஜுய்யானே வஸாமுபோ⁴தி பா³ராணஸிரஞ்ஞோ உய்யானே மயம் உபோ⁴ ஜனா ததா³ வஸாம.

தத்ராயம் அனுபுப்³பி³கதா² – அதீதே இமஸ்மிம் ஏவ ப⁴த்³த³கப்பே போ³தி⁴ஸத்தோ ப்³ரஹ்மலோகதோ சவித்வா அஞ்ஞதரஸ்மிம் காஸிகா³மே ஏகஸ்ஸ மஹாவிப⁴வஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி. தஸ்ஸ நாமக்³க³ஹணஸமயே ‘‘போ³தி⁴குமாரோ’’தி நாமம் கரிம்ஸு. வயப்பத்தகாலே பனஸ்ஸ தக்கஸிலம் க³ந்த்வா ஸப்³ப³ஸிப்பானி உக்³க³ண்ஹித்வா பச்சாக³தஸ்ஸ அனிச்ச²மானகஸ்ஸேவ மாதாபிதரோ ஸமஜாதிகம் குலகுமாரிகம் ஆனேஸும். ஸாபி ப்³ரஹ்மலோகசுதாவ உத்தமரூபத⁴ரா தே³வச்ச²ராபடிபா⁴கா³. தேஸம் அனிச்ச²மானானம் ஏவ அஞ்ஞமஞ்ஞம் ஆவாஹவிவாஹம் கரிம்ஸு. உபி⁴ன்னம்பி பன நேஸம் கிலேஸமுதா³சாரோ ந பூ⁴தபுப்³போ³, ஸாராக³வஸேன அஞ்ஞமஞ்ஞம் ஓலோகனம்பி நாஹோஸி, கா பன கதா² இதரஸம்ஸக்³கே³. ஏவம் பரிஸுத்³த⁴ஸீலா அஹேஸும்.

அபரபா⁴கே³ மஹாஸத்தோ மாதாபிதூஸு காலம்கதேஸு தேஸம் ஸரீரகிச்சம் கத்வா தம் பக்கோஸாபேத்வா ‘‘ப⁴த்³தே³, த்வம் இமம் அஸீதிகோடித⁴னம் க³ஹேத்வா ஸுகே²ன ஜீவாஹீ’’தி ஆஹ. ‘‘த்வம் பன அய்யபுத்தா’’தி? ‘‘மய்ஹம் த⁴னேன கிச்சம் நத்தி², பப்³ப³ஜிஸ்ஸாமீ’’தி. ‘‘கிம் பன பப்³ப³ஜ்ஜா இத்தீ²னம்பி ந வட்டதீ’’தி? ‘‘வட்டதி, ப⁴த்³தே³’’தி. ‘‘தேன ஹி மய்ஹம்பி த⁴னேன கிச்சம் நத்தி², அஹம்பி பப்³ப³ஜிஸ்ஸாமீ’’தி. தே உபோ⁴பி ஸப்³ப³ம் விப⁴வம் பரிச்சஜித்வா மஹாதா³னம் த³த்வா நிக்க²மித்வா அரஞ்ஞம் பவிஸித்வா பப்³ப³ஜித்வா உஞ்சா²சரியாய ப²லாப²லேஹி யாபேந்தா பப்³ப³ஜ்ஜாஸுகே²னேவ த³ஸ ஸம்வச்ச²ரானி வஸித்வா லோணம்பி³லஸேவனத்தா²ய ஜனபத³சாரிகம் சரந்தா அனுபுப்³பே³ன பா³ராணஸிம் பத்வா ராஜுய்யானே வஸிம்ஸு. தேன வுத்தம் ‘‘ராஜுய்யானே வஸாமுபோ⁴’’தி.

30. அதே²கதி³வஸம் ராஜா உய்யானகீளம் க³தோ. உய்யானஸ்ஸ ஏகபஸ்ஸே பப்³ப³ஜ்ஜாஸுகே²ன வீதினாமேந்தானம் தேஸம் ஸமீபட்டா²னம் க³ந்த்வா பரமபாஸாதி³கம் உத்தமரூபத⁴ரம் பரிப்³பா³ஜிகம் ஓலோகேந்தோ கிலேஸவஸேன படிப³த்³த⁴சித்தோ ஹுத்வா போ³தி⁴ஸத்தம் ‘‘அயம் தே பரிப்³பா³ஜிகா கிம் ஹோதீ’’தி புச்சி². தேன ‘‘ந ச கிஞ்சி ஹோதி, கேவலம் ஏகபப்³ப³ஜ்ஜாய பப்³ப³ஜிதா, அபி ச கோ² பன கி³ஹிகாலே பாத³பரிசாரிகா அஹோஸீ’’தி வுத்தே ராஜா ‘‘அயம் கிரேதஸ்ஸ ந கிஞ்சி ஹோதி, அபி ச கோ² பனஸ்ஸ கி³ஹிகாலே பாத³பரிசாரிகா அஹோஸி, யம்னூனாஹம் இமம் அந்தேபுரம் பவேஸேய்யம், தேனேவஸ்ஸ இமிஸ்ஸா படிபத்திம் ஜானிஸ்ஸாமீ’’தி அந்த⁴பா³லோ தத்த² அத்தனோ படிப³த்³த⁴சித்தம் நிவாரேதும் அஸக்கோந்தோ அஞ்ஞதரம் புரிஸம் ஆணாபேஸி ‘‘இமம் பரிப்³பா³ஜிகம் ராஜனிவேஸனம் நேஹீ’’தி.

ஸோ தஸ்ஸ படிஸ்ஸுணித்வா ‘‘அத⁴ம்மோ லோகே வத்ததீ’’திஆதீ³னி வத்வா பரிதே³வமானம் ஏவ தம் ஆதா³ய பாயாஸி. போ³தி⁴ஸத்தோ தஸ்ஸா பரிதே³வனஸத்³த³ம் ஸுத்வா ஏகவாரம் ஓலோகேத்வா புன ந ஓலோகேஸி. ‘‘ஸசே பனாஹம் வாரேஸ்ஸாமி, தேஸு சித்தம் பதோ³ஸேத்வா மய்ஹம் ஸீலஸ்ஸ அந்தராயோ ப⁴விஸ்ஸதீ’’தி ஸீலபாரமிம்யேவ ஆவஜ்ஜேந்தோ நிஸீதி³. தேன வுத்தம் ‘‘உய்யானத³ஸ்ஸனம் க³ந்த்வா, ராஜா அத்³த³ஸ ப்³ராஹ்மணி’’ந்திஆதி³.

தத்த² துய்ஹேஸா கா கஸ்ஸ ப⁴ரியாதி துய்ஹம் தவ ஏஸா கா, கிம் ப⁴ரியா, உதா³ஹு ப⁴கி³னீ வா ஸமானா கஸ்ஸ அஞ்ஞஸ்ஸ ப⁴ரியா.

31. ந மய்ஹம் ப⁴ரியா ஏஸாதி காமஞ்சேஸா மய்ஹம் கி³ஹிகாலே ப⁴ரியா அஹோஸி, பப்³ப³ஜிதகாலதோ பட்டா²ய ந மய்ஹம் ப⁴ரியா ஏஸா, நாபி அஹம் ஏதிஸ்ஸா ஸாமிகோ, கேவலம் பன ஸஹத⁴ம்மா ஏகஸாஸனீ, அஹம்பி பரிப்³பா³ஜகோ அயம்பி பரிப்³பா³ஜிகாதி ஸமானத⁴ம்மா பரிப்³பா³ஜகஸாஸனேன ஏகஸாஸனீ, ஸப்³ரஹ்மசாரினீதி அத்தோ².

32. திஸ்ஸா ஸாரத்தக³தி⁴தோதி காமராகே³ன ஸாரத்தோ ஹுத்வா படிப³த்³தோ⁴. கா³ஹாபேத்வான சேடகேதி சேடகேஹி க³ண்ஹாபேத்வா சேடகே வா அத்தனோ ராஜபுரிஸே ஆணாபேத்வா தம் பரிப்³பா³ஜிகம் க³ண்ஹாபேத்வா. நிப்பீளயந்தோ ப³லஸாதி தம் அனிச்ச²மானம் ஏவ ஆகட்³ட⁴னபரிகட்³ட⁴னாதி³னா நிப்பீளயந்தோ பா³தே⁴ந்தோ, ததா²பி அக³ச்ச²ந்திம் ப³லஸா ப³லக்காரேன ராஜபுரிஸேஹி க³ண்ஹாபேத்வா அத்தனோ அந்தேபுரம் பவேஸேஸி.

33. ஓத³பத்தகியாதி உத³கபத்தம் ஆமஸித்வா க³ஹிதப⁴ரியா ஓத³பத்திகா நாம, இத³ம் வசனம் புராணது³தியிகாபா⁴வேன உபலக்க²ணமத்தம் த³ட்ட²ப்³ப³ம், ஸா பனஸ்ஸ ப்³ராஹ்மணவிவாஹவஸேன மாதாபிதூஹி ஸம்படிபாதி³தா, ‘‘ஓத³பத்தகியா’’தி ச பா⁴வேனபா⁴வலக்க²ணே பு⁴ம்மம். ஸஹஜாதி பப்³ப³ஜ்ஜாஜாதிவஸேன ஸஹஜாதா, தேனேவாஹ ‘‘ஏகஸாஸனீ’’தி. ‘‘ஏகஸாஸனீ’’தி ச இத³ம் பு⁴ம்மத்தே² பச்சத்தம், ஏகஸாஸனியாதி அத்தோ². நயந்தியாதி நீயந்தியா. கோபோ மே உபபஜ்ஜதா²தி அயம் தே கி³ஹிகாலே ப⁴ரியா ப்³ராஹ்மணீ ஸீலவதீ, பப்³ப³ஜிதகாலே ச ஸப்³ரஹ்மசாரினீபா⁴வதோ ஸஹஜாதா ப⁴கி³னீ, ஸா துய்ஹம் புரதோ ப³லக்காரேன ஆகட்³டி⁴த்வா நீயதி. ‘‘போ³தி⁴ப்³ராஹ்மண, கிம் தே புரிஸபா⁴வ’’ந்தி புரிஸமானேன உஸ்ஸாஹிதோ சிரகாலஸயிதோ வம்மிகபி³லதோ கேனசி புரிஸேன க⁴ட்டிதோ ‘‘ஸுஸூ’’தி ப²ணம் கரோந்தோ ஆஸிவிஸோ விய மே சித்ததோ கோபோ ஸஹஸா வுட்டா²ஸி.

34-5. ஸஹகோபே ஸமுப்பன்னேதி கோபுப்பத்தியா ஸஹ, தஸ்ஸ உப்பத்திஸமனந்தரமேவாதி அத்தோ². ஸீலப்³ப³தமனுஸ்ஸரிந்தி அத்தனோ ஸீலபாரமிம் ஆவஜ்ஜேஸிம். தத்தே²வ கோபம் நிக்³க³ண்ஹிந்தி தஸ்மிம் ஏவ ஆஸனே யதா²னிஸின்னோவ தம் கோபம் நிவாரேஸிம். நாதா³ஸிம் வட்³டி⁴தூபரீதி ததோ ஏகவாருப்பத்திதோ உபரி உத்³த⁴ம் வட்³டி⁴தும் ந அதா³ஸிம். இத³ம் வுத்தம் ஹோதி – கோபே உப்பன்னமத்தே ஏவ ‘‘நனு த்வம், போ³தி⁴பரிப்³பா³ஜக, ஸப்³ப³பாரமியோ பூரேத்வா ஸப்³ப³ஞ்ஞுதஞ்ஞாணம் படிவிஜ்ஜி²துகாமோ, தஸ்ஸ தே கிமித³ம் ஸீலமத்தேபி உபக்க²லனம், தயித³ம் கு³ன்னம் கு²ரமத்தோத³கே ஓஸீத³ந்தஸ்ஸ மஹாஸமுத்³த³ஸ்ஸ பரதீரம் க³ண்ஹிதுகாமதா விய ஹோதீ’’தி அத்தானம் பரிபா⁴ஸித்வா படிஸங்கா²னப³லேன தஸ்மிம் ஏவ க²ணே கோபம் நிக்³க³ஹேத்வா புன உப்பஜ்ஜனவஸேனஸ்ஸ வட்³டி⁴தும் ந அதா³ஸிந்தி. தேனேவாஹ ‘‘யதி³ நம் ப்³ராஹ்மணி’’ந்திஆதி³.

தஸ்ஸத்தோ² – தம் பரிப்³பா³ஜிகம் ப்³ராஹ்மணிம் ஸோ ராஜா வா அஞ்ஞோ வா கோசி திண்ஹாயபி நிஸிதாய ஸத்தியா கோட்டேய்ய, க²ண்டா³க²ண்டி³கம் யதி³ சி²ந்தே³ய்ய, ஏவம் ஸந்தேபி ஸீலம் அத்தனோ ஸீலபாரமிம் நேவ பி⁴ந்தே³ய்யம். கஸ்மா? போ³தி⁴யா ஏவ காரணா, ஸப்³ப³த்த² அக²ண்டி³தஸீலேனேவ ஸக்கா ஸம்மாஸம்போ³தி⁴ம் பாபுணிதும், ந இதரேனாதி.

36. ந மே ஸா ப்³ராஹ்மணீ தே³ஸ்ஸாதி ஸா ப்³ராஹ்மணீ ஜாதியா கோ³த்தேன குலப்பதே³ஸேன ஆசாரஸம்பத்தியா சிரபரிசயேன பப்³ப³ஜ்ஜாதி³கு³ணஸம்பத்தியா சாதி ஸப்³ப³ப்பகாரேன ந மே தே³ஸ்ஸா ந அப்பியா, ஏதிஸ்ஸா மம அப்பியபா⁴வோ கோசி நத்தி². நபி மே ப³லம் ந விஜ்ஜதீதி மய்ஹம்பி ப³லம் ந ந விஜ்ஜதி, அத்தி² ஏவ. அஹம் நாக³ப³லோ தா²மஸம்பன்னோ, இச்ச²மானோ ஸஹஸா வுட்ட²ஹித்வா தம் ஆகட்³ட⁴ந்தே புரிஸே நிப்போதே²த்வா தம் க³ஹேத்வா யதி²ச்சி²தட்டா²னம் க³ந்தும் ஸமத்தோ²தி த³ஸ்ஸேதி. ஸப்³ப³ஞ்ஞுதம் பியம் மய்ஹந்தி ததோ பரிப்³பா³ஜிகதோ ஸதகு³ணேன ஸஹஸ்ஸகு³ணேன ஸதஸஹஸ்ஸகு³ணேன ஸப்³ப³ஞ்ஞுதஞ்ஞாணமேவ மய்ஹம் பியம். தஸ்மா ஸீலானுரக்கி²ஸ்ஸந்தி தேன காரணேன ஸீலமேவ அனுரக்கி²ஸ்ஸம்.

அத² ஸோ ராஜா உய்யானே பபஞ்சம் அகத்வாவ ஸீக⁴தரம் க³ந்த்வா தம் பரிப்³பா³ஜிகம் பக்கோஸாபேத்வா மஹந்தேன யஸேன நிமந்தேஸி. ஸா யஸஸ்ஸ அகு³ணம் பப்³ப³ஜ்ஜாய கு³ணம் அத்தனோ போ³தி⁴ஸத்தஸ்ஸ ச மஹந்தம் போ⁴க³க்க²ந்த⁴ம் பஹாய ஸம்வேகே³ன பப்³ப³ஜிதபா⁴வஞ்ச கதே²ஸி. ராஜா கேனசி பரியாயேன தஸ்ஸா மனம் அலப⁴ந்தோ சிந்தேஸி – ‘‘அயம் பரிப்³பா³ஜிகா ஸீலவதீ கல்யாணத⁴ம்மா, ஸோபி பரிப்³பா³ஜகோ இமாய ஆகட்³டி⁴த்வா நீயமானாய ந கிஞ்சி விப்பகாரம் த³ஸ்ஸேஸி, ஸப்³ப³த்த² நிரபேக்க²சித்தோ, ந கோ² பன மேதம் பதிரூபம், யம் ஏவரூபேஸு கு³ணவந்தேஸு விப்பகாரோ, யம்னூனாஹம் இமம் பரிப்³பா³ஜிகம் க³ஹேத்வா உய்யானம் க³ந்த்வா இமம், தஞ்ச பரிப்³பா³ஜகம் க²மாபேய்ய’’ந்தி? ஏவம் பன சிந்தேத்வா ‘‘பரிப்³பா³ஜிகம் உய்யானம் ஆனேதா²’’தி புரிஸே ஆணாபேத்வா ஸயம் பட²மதரம் க³ந்த்வா போ³தி⁴ஸத்தம் உபஸங்கமித்வா புச்சி² – ‘‘போ⁴ பப்³ப³ஜித, கிம் மயா தாய பரிப்³பா³ஜிகாய நீயமானாய கோபோ தே உப்பஜ்ஜித்தா²’’தி. மஹாஸத்தோ ஆஹ –

‘‘உப்பஜ்ஜி மே ந முச்சித்த², ந மே முச்சித்த² ஜீவதோ;

ரஜம்வ விபுலா வுட்டி², கி²ப்பமேவ நிவாரயி’’ந்தி. (ஜா. 1.10.52);

தம் ஸுத்வா ராஜா ‘‘கிம் நு கோ² ஏஸ கோபமேவ ஸந்தா⁴ய வத³தி, உதா³ஹு அஞ்ஞம் கிஞ்சி ஸிப்பாதி³க’’ந்தி சிந்தேத்வா புன புச்சி² –

‘‘கிம் தே உப்பஜ்ஜி நோ முச்சி, கிம் தே நோ முச்சி ஜீவதோ;

ரஜம்வ விபுலா வுட்டி², கதமம் தம் நிவாரயீ’’தி. (ஜா. 1.10.53);

தத்த² உப்பஜ்ஜீதி ஏகவாரம் உப்பஜ்ஜி, ந புன உப்பஜ்ஜி. ந முச்சித்தா²தி காயவசீவிகாருப்பாத³னவஸேன பன ந முச்சித்த², ந நம் ப³ஹி பவத்திதும் விஸ்ஸஜ்ஜேஸிந்தி அத்தோ². ரஜம்வ விபுலா வுட்டீ²தி யதா² நாம கி³ம்ஹானம் பச்சி²மே மாஸே உப்பன்னம் ரஜம் விபுலா அகாலவுட்டி²தா⁴ரா டா²னஸோ நிவாரேதி, ஏவம் தம் வூபஸமேந்தோ நிவாரயிம், நிவாரேஸிந்தி அத்தோ².

அத²ஸ்ஸ மஹாபுரிஸோ நானப்பகாரேன கோதே⁴ ஆதீ³னவம் பகாஸேந்தோ –

‘‘யம்ஹி ஜாதே ந பஸ்ஸதி, அஜாதே ஸாது⁴ பஸ்ஸதி;

ஸோ மே உப்பஜ்ஜி நோ முச்சி, கோதோ⁴ து³ம்மேத⁴கோ³சரோ.

‘‘யேன ஜாதேன நந்த³ந்தி, அமித்தா து³க்க²மேஸினோ;

ஸோ மே உப்பஜ்ஜி நோ முச்சி, கோதோ⁴ து³ம்மேத⁴கோ³சரோ.

‘‘யஸ்மிஞ்ச ஜாயமானம்ஹி, ஸத³த்த²ம் நாவபு³ஜ்ஜ²தி;

ஸோ மே உப்பஜ்ஜி நோ முச்சி, கோதோ⁴ து³ம்மேத⁴கோ³சரோ.

‘‘யேனாபி⁴பூ⁴தோ குஸலம் ஜஹாதி, பரக்கரே விபுலஞ்சாபி அத்த²ம்;

ஸ பீ⁴மஸேனோ ப³லவா பமத்³தீ³, கோதோ⁴ மஹாராஜா ந மே அமுச்சத².

‘‘கட்ட²ஸ்மிம் மந்த²மானஸ்மிம், பாவகோ நாம ஜாயதி;

தமேவ கட்ட²ம் ட³ஹதி, யஸ்மா ஸோ ஜாயதே கி³னி.

‘‘ஏவம் மந்த³ஸ்ஸ போஸஸ்ஸ, பா³லஸ்ஸ அவிஜானதோ;

ஸாரம்பா⁴ ஜாயதே கோதோ⁴, ஸபி தேனேவ ட³ய்ஹதி.

‘‘அக்³கீ³வ திணகட்ட²ஸ்மிம், கோதோ⁴ யஸ்ஸ பவட்³ட⁴தி;

நிஹீயதி தஸ்ஸ யஸோ, காளபக்கே²வ சந்தி³மா.

‘‘அனிந்தோ⁴ தூ⁴மகேதூவ, கோதோ⁴ யஸ்ஸூபஸம்மதி;

ஆபூரதி தஸ்ஸ யஸோ, ஸுக்கபக்கே²வ சந்தி³மா’’தி. (ஜா. 1.10.54-61) –

இமாஹி கா³தா²ஹி த⁴ம்மம் தே³ஸேஸி.

தத்த² ந பஸ்ஸதீதி அத்தத்த²ம்பி ந பஸ்ஸதி, பகே³வ பரத்த²ம். ஸாது⁴ பஸ்ஸதீதி அத்தத்த²ம் பரத்த²ம் உப⁴யத்த²ஞ்ச ஸம்மதே³வ பஸ்ஸதி. து³ம்மேத⁴கோ³சரோதி நிப்பஞ்ஞானம் விஸயபூ⁴தோ, நிப்பஞ்ஞோ வா கோ³சரோ ஆஹாரோ இந்த⁴னம் ஏதஸ்ஸாதி து³ம்மேத⁴கோ³சரோ. து³க்க²மேஸினோதி து³க்க²ம் இச்ச²ந்தா. ஸத³த்த²ந்தி அத்தனோ அத்த²ம் வுட்³டி⁴ம். பரக்கரேதி அபனேய்ய வினாஸேய்ய. ஸபீ⁴மஸேனோதி ஸோ பீ⁴மாய ப⁴யஜனனியா மஹதியா கிலேஸஸேனாய ஸமன்னாக³தோ. பமத்³தீ³தி ப³லவபா⁴வேன ஸத்தே பமத்³த³னஸீலோ. ந மே அமுச்சதா²தி மம ஸந்திகா மோக்க²ம் ந லபி⁴, அப்³ப⁴ந்தரே ஏவ த³மிதோ, நிப்³பி³ஸேவனோ கதோதி அத்தோ². கீ²ரம் விய வா முஹுத்தம் த³தி⁴பா⁴வேன சித்தேன பதிட்ட²ஹித்தா²திபி அத்தோ².

மந்த²மானஸ்மிந்தி அரணிஸஹிதே மதி²யமானே. ‘‘மத²மானஸ்மி’’ந்திபி பாடோ². யஸ்மாதி யதோ கட்டா². கி³னீதி அக்³கி³. பா³லஸ்ஸ அவிஜானதோதி பா³லஸ்ஸ அஜானந்தஸ்ஸ. ஸாரம்பா⁴ ஜாயதேதி கரணுத்தரியகரணலக்க²ணா ஸாரம்பா⁴ அரணிமந்த²னதோ விய பாவகோ கோதோ⁴ ஜாயதே. ஸபி தேனேவாதி ஸோபி பா³லோ தேனேவ கோதே⁴ன கட்ட²ம் விய அக்³கி³னா ட³ய்ஹதி. அனிந்தோ⁴ தூ⁴மகேதூவாதி அனிந்த⁴னோ அக்³கி³ விய. தஸ்ஸாதி தஸ்ஸ அதி⁴வாஸனக²ந்தியா ஸமன்னாக³தஸ்ஸ புக்³க³லஸ்ஸ ஸுக்கபக்கே² சந்தோ³ விய லத்³தோ⁴, யஸோ அபராபரம் ஆபூரதீதி.

ராஜா மஹாஸத்தஸ்ஸ த⁴ம்மகத²ம் ஸுத்வா மஹாபுரிஸம் பரிப்³பா³ஜிகம்பி ராஜகே³ஹதோ ஆக³தம் க²மாபேத்வா ‘‘தும்ஹே பப்³ப³ஜ்ஜாஸுக²ம் அனுப⁴வந்தா இதே⁴வ உய்யானே வஸத², அஹம் வோ த⁴ம்மிகம் ரக்கா²வரணகு³த்திம் கரிஸ்ஸாமீ’’தி வத்வா வந்தி³த்வா பக்காமி. தே உபோ⁴பி தத்தே²வ வஸிம்ஸு. அபரபா⁴கே³ பரிப்³பா³ஜிகா காலமகாஸி. போ³தி⁴ஸத்தோ ஹிமவந்தம் பவிஸித்வா ஜா²னாபி⁴ஞ்ஞாயோ நிப்³ப³த்தேத்வா ஆயுபரியோஸானே ப்³ரஹ்மலோகபராயனோ அஹோஸி.

ததா³ பரிப்³பா³ஜிகா ராஹுலமாதா அஹோஸி, ராஜா ஆனந்த³த்தே²ரோ, போ³தி⁴பரிப்³பா³ஜகோ லோகனாதோ².

தஸ்ஸ இதா⁴பி யதா²ரஹம் ஸேஸபாரமியோ நித்³தா⁴ரேதப்³பா³. ததா² மஹந்தம் போ⁴க³க்க²ந்த⁴ம் மஹந்தஞ்ச ஞாதிபரிவட்டம் பஹாய மஹாபி⁴னிக்க²மனஸதி³ஸம் கே³ஹதோ நிக்க²மனம், ததா² நிக்க²மித்வா பப்³ப³ஜிதஸ்ஸ ப³ஹுஜனஸம்மதஸ்ஸ ஸதோ பரமப்பிச்ச²தாய குலேஸு ச க³ணேஸு ச அலக்³க³தா, அச்சந்தமேவ லாப⁴ஸக்காரஜிகு³ச்சா²ய பவிவேகாபி⁴ரதி, அதிஸயவதீ ச அபி⁴ஸல்லேக²வுத்தி, ததா²ரூபாய ஸீலவதியா கல்யாணத⁴ம்மாய பரிப்³பா³ஜிகாய அனனுஞ்ஞாதா அத்தனோ புரதோ ப³லக்காரேன பராமஸியமானாய ஸீலபாரமிம் ஆவஜ்ஜேத்வா விகாரானாபத்தி, கதாபராதே⁴ ச தஸ்மிம் ராஜினி உபக³தே ஹிதசித்ததம் மேத்தசித்ததம் உபட்ட²பேத்வா தி³ட்ட²த⁴ம்மிகஸம்பராயிகேஹி ஸமனுஸாஸனந்தி ஏவமாத³யோ இத⁴ மஹாபுரிஸஸ்ஸ கு³ணானுபா⁴வா விபா⁴வேதப்³பா³. தேனேதம் வுச்சதி ‘‘ஏவம் அச்ச²ரியா ஹேதே…பே… த⁴ம்மஸ்ஸ அனுத⁴ம்மதோ’’தி.

சூளபோ³தி⁴சரியாவண்ணனா நிட்டி²தா.