3. அதி⁴பதிபச்சயனித்³தே³ஸவண்ணனா

3. அதி⁴பதிபச்சயனித்³தே³ஸே ச²ந்தா³தி⁴பதீதி ச²ந்த³ஸங்கா²தோ அதி⁴பதி. ச²ந்த³ம் து⁴ரம் கத்வா ச²ந்த³ம் ஜேட்ட²கம் கத்வா சித்துப்பத்திகாலே உப்பன்னஸ்ஸ கத்துகம்யதாச²ந்த³ஸ்ஸேதம் நாமம். ஸேஸேஸுபி ஏஸேவ நயோ. கஸ்மா பன யதா² ஹேதுபச்சயனித்³தே³ஸே ஹேதூ ஹேதுஸம்பயுத்தகான’’ந்தி வுத்தம், ஏவமித⁴ ‘‘அதி⁴பதீ அதி⁴பதிஸம்பயுத்தகானந்தி அவத்வா ‘‘ச²ந்தா³தி⁴பதி ச²ந்த³ஸம்பயுத்தகான’’ந்திஆதி³னா நயேன தே³ஸனா கதாதி? ஏகக்க²ணே அபா⁴வதோ. புரிமனயஸ்மிஞ்ஹி த்³வே தயோ ஹேதூ ஏகக்க²ணேபி ஹேதுபச்சயோ ஹோந்தி மூலட்டே²ன. உபகாரகபா⁴வஸ்ஸ அவிஜஹனதோ. அதி⁴பதி பன ஜேட்ட²கட்டே²ன உபகாரகோ, ந ச ஏகக்க²ணே ப³ஹூ ஜேட்ட²கா நாம ஹோந்தி. தஸ்மா ஏகதோ உப்பன்னானம்பி நேஸம் ஏகக்க²ணே அதி⁴பதிபச்சயபா⁴வோ நத்தி². தஸ்ஸ அதி⁴பதிபச்சயபா⁴வஸ்ஸ ஏகக்க²ணே அபா⁴வதோ இத⁴ ஏவம் தே³ஸனா கதாதி.

ஏவம் ஸஹஜாதாதி⁴பதிம் த³ஸ்ஸேத்வா இதா³னி ஆரம்மணாதி⁴பதிம் த³ஸ்ஸேதும் யம் யம் த⁴ம்மம் க³ரும் கத்வாதிஆதி³ ஆரத்³த⁴ம். தத்த² யம் யம் த⁴ம்மந்தி யம் யம் ஆரம்மணத⁴ம்மம். க³ரும் கத்வாதி க³ருகாரசித்தீகாரவஸேன வா அஸ்ஸாத³வஸேன வா க³ரும் பா⁴ரியம் லத்³த⁴ப்³ப³ம் அவிஜஹிதப்³ப³ம் அனவஞ்ஞாதம் கத்வா. தே தே த⁴ம்மாதி தே தே க³ருகாதப்³ப³த⁴ம்மா. தேஸம் தேஸந்தி தேஸம் தேஸம் க³ருகாரகத⁴ம்மானம். அதி⁴பதிபச்சயேனாதி ஆரம்மணாதி⁴பதிபச்சயேன பச்சயோ ஹோதீதி அயம் தாவேத்த² பாளிவண்ணனா.

அயம் பன அதி⁴பதி நாம ஸஹஜாதாரம்மணவஸேன து³விதோ⁴. தத்த² ஸஹஜாதோ ச²ந்தா³தி³வஸேன சதுப்³பி³தோ⁴. தேஸு ஏகேகோ காமாவசராதி³வஸேன பூ⁴மிதோ சதுப்³பி³தோ⁴. தத்த² காமாவசரோ குஸலாகுஸலகிரியவஸேன திவிதோ⁴. அகுஸலம் பத்வா பனேத்த² வீமம்ஸாதி⁴பதி ந லப்³ப⁴தி. ரூபாரூபாவசரோ குஸலகிரியவஸேன து³விதோ⁴, அபரியாபன்னோ குஸலவிபாகவஸேன து³விதோ⁴. ஆரம்மணாதி⁴பதி பன ஜாதிபே⁴த³தோ குஸலாகுஸலவிபாககிரியரூபனிப்³பா³னானம் வஸேன ச²ப்³பி³தோ⁴தி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² ஸஹஜாதாதி⁴பதிம்ஹி தாவ காமாவசரகுஸலகிரியஸங்கா²தோ அதி⁴பதி து³ஹேதுகதிஹேதுகேஸு சித்துப்பாதே³ஸு ச²ந்தா³தீ³னம் அஞ்ஞதரம் ஜேட்ட²கம் கத்வா உப்பத்திகாலே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச அதி⁴பதிபச்சயோ ஹோதி. ரூபாவசரகுஸலகிரியஸங்கா²தேபி ஏஸேவ நயோ. அயம் பன ஏகந்தேனேவ லப்³ப⁴தி. ந ஹி தே த⁴ம்மா ஸஹஜாதாதி⁴பதிம் வினா உப்பஜ்ஜந்தி. அரூபாவசரகுஸலகிரியஸங்கா²தோ பன பஞ்சவோகாரே ரூபாவசரஅதி⁴பதிஸதி³ஸோவ சதுவோகாரே பன ஸம்பயுத்தத⁴ம்மானஞ்ஞேவ அதி⁴பதிபச்சயோ ஹோதி. ததா² தத்து²ப்பன்னோ ஸப்³போ³பி காமாவசராதி⁴பதி. அபரியாபன்னோ குஸலதோபி விபாகதோபி பஞ்சவோகாரே ஏகந்தேனேவ ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச அதி⁴பதிபச்சயோ ஹோதி, சதுவோகாரே அரூபத⁴ம்மானஞ்ஞேவ. அகுஸலோ காமப⁴வே மிச்ச²த்தனியதசித்தேஸு ஏகந்தேனேவ ஸம்பயுத்தகானஞ்சேவ சித்தஸமுட்டா²னரூபானஞ்ச அதி⁴பதிபச்சயோ ஹோதி. அனியதோ காமப⁴வரூபப⁴வேஸு அத்தனோ அதி⁴பதிகாலே தேஸஞ்ஞேவ. அரூபப⁴வே அரூபத⁴ம்மானஞ்ஞேவ அதி⁴பதிபச்சயோ ஹோதி. அயம் தாவ ஸஹஜாதாதி⁴பதிம்ஹி நயோ.

ஆரம்மணாதி⁴பதிம்ஹி பன காமாவசரகுஸலோ ஆரம்மணாதி⁴பதி காமாவசரகுஸலஸ்ஸ லோப⁴ஸஹக³தாகுஸலஸ்ஸாதி இமேஸம் த்³வின்னம் ராஸீனம் ஆரம்மணாதி⁴பதிபச்சயோ ஹோதி. ரூபாவசராரூபாவசரேபி குஸலாரம்மணாதி⁴பதிம்ஹி ஏஸேவ நயோ. அபரியாபன்னகுஸலோ பன ஆரம்மணாதி⁴பதி காமாவசரதோ ஞாணஸம்பயுத்தகுஸலஸ்ஸ சேவ ஞாணஸம்பயுத்தகிரியஸ்ஸ ச ஆரம்மணாதி⁴பதிபச்சயோ ஹோதி. அகுஸலோ பன ஆரம்மணாதி⁴பதி நாம லோப⁴ஸஹக³தசித்துப்பாதோ³ வுச்சதி. ஸோ லோப⁴ஸஹக³தாகுஸலஸ்ஸேவ ஆரம்மணாதி⁴பதிபச்சயோ ஹோதி. காமாவசரோ பன விபாகாரம்மணாதி⁴பதி லோப⁴ஸஹக³தாகுஸலஸ்ஸேவ ஆரம்மணாதி⁴பதிபச்சயோ ஹோதி. ததா² ரூபாவசராரூபாவசரவிபாகாரம்மணாதி⁴பதி. லோகுத்தரோ பன விபாகாரம்மணாதி⁴பதி காமாவசரதோ ஞாணஸம்பயுத்தகுஸலகிரியானஞ்ஞேவ ஆரம்மணாதி⁴பதிபச்சயோ ஹோதி. காமாவசராதி³பே⁴த³தோ பன திவிதோ⁴பி கிரியாரம்மணாதி⁴பதி லோப⁴ஸஹக³தாகுஸலஸ்ஸேவ ஆரம்மணாதி⁴பதிபச்சயோ ஹோதி. சதுஸமுட்டா²னிகரூபஸங்கா²தோ ரூபக்க²ந்தோ⁴ ஆரம்மணாதி⁴பதி லோப⁴ஸஹக³தாகுஸலஸ்ஸேவ ஆரம்மணாதி⁴பதிபச்சயோ ஹோதி. நிப்³பா³னம் காமாவசரதோ ஞாணஸம்பயுத்தகுஸலஸ்ஸ ஞாணஸம்பயுத்தகிரியஸ்ஸ லோகுத்தரகுஸலஸ்ஸ லோகுத்தரவிபாகஸ்ஸ சாதி இமேஸம் சதுன்னம் ராஸீனம் ஆரம்மணாதி⁴பதிபச்சயோ ஹோதீதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

அதி⁴பதிபச்சயனித்³தே³ஸவண்ணனா.