9. சக்கு²னாரூபம்பஸ்ஸதீதிகதா²வண்ணனா

826-827. இதா³னி சக்கு²னா ரூபம் பஸ்ஸதீதிகதா² நாம ஹோதி. தத்த² ‘‘சக்கு²னா ரூபம் தி³ஸ்வா’’தி வசனம் நிஸ்ஸாய ‘‘பஸாத³சக்கு²மேவ ரூபம் பஸ்ஸதீ’’தி யேஸம் லத்³தி⁴, ஸேய்யதா²பி மஹாஸங்கி⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ சக்கு²னா ரூபம் பஸ்ஸேய்ய, ரூபேன ரூபம் பஸ்ஸேய்யாதீ’’தி சோதே³தும் ரூபேன ரூபம் பஸ்ஸதீதி ஆஹ. இதரோ ரூபாயதனம் ஸந்தா⁴ய படிக்கி²பித்வா புன புட்டோ² சக்கு²மேவ ஸந்தா⁴ய படிஜானாதி. படிவிஜானாதீதி ஏத்த² அயமதி⁴ப்பாயோ – பஸ்ஸதீதி ஹி மயம் படிஜானனம் ஸந்தா⁴ய புச்சா²ம, ந சக்கூ²பஸம்ஹாரமத்தம். தஸ்மா வதே³ஹி தாவ ‘‘கிம் தே சக்கு²மா ரூபேன ரூபம் படிவிஜானாதீ’’தி. இதரோ புரிமனயேனேவ படிக்கி²பதி சேவ படிஜானாதி ச. அத² நம் ‘‘ஏவம் ஸந்தே ரூபம் மனோவிஞ்ஞாணம் ஆபஜ்ஜதி, தஞ்ஹி படிவிஜானாதி நாமா’’தி சோதே³தும் ரூபம் மனோவிஞ்ஞாணந்தி ஆஹ. இதரோ லேஸம் அலப⁴ந்தோ படிக்கி²பதேவ. அத்தி² சக்கு²ஸ்ஸ ஆவட்டனாதிஆதி³ ‘‘யதி³ சக்கு² படிவிஜானனட்டே²ன பஸ்ஸதி, சக்கு²விஞ்ஞாணஸ்ஸ விய தஸ்ஸாபி ஆவஜ்ஜனாய ப⁴விதப்³ப³’’ந்தி சோதே³தும் புச்ச²தி. இதரோ யஸ்மா ந ஆவஜ்ஜனபடிப³த்³த⁴ம் சக்கு², ந தம் ஆவஜ்ஜனானந்தரம் உப்பஜ்ஜதி, தஸ்மா ந ஹேவந்தி படிக்கி²பதி. ஸோதேன ஸத்³த³ந்திஆதீ³ஸுபி ஏஸேவ நயோ. இத⁴, பி⁴க்க²வே, பி⁴க்கு² சக்கு²னா ரூபம் பஸ்ஸதீதி ஸஸம்பா⁴ரகதா²னயேன வுத்தம். யதா² ஹி உஸுனா விஜ்ஜ²ந்தோபி ‘‘த⁴னுனா விஜ்ஜ²தீ’’தி வுச்சதி, ஏவம் சக்கு²விஞ்ஞாணேன பஸ்ஸந்தோபி ‘‘சக்கு²னா பஸ்ஸதீ’’தி வுத்தோ, தஸ்மா அஸாத⁴கமேதம். ஸேஸேஸுபி ஏஸேவ நயோபி.

சக்கு²னா ரூபம் பஸ்ஸதீதிகதா²வண்ணனா.

அட்டா²ரஸமோ வக்³கோ³.