19. ஏகூனவீஸதிமவக்³கோ³

1. கிலேஸபஜஹனகதா²வண்ணனா

828-831. இதா³னி கிலேஸபஜஹனகதா² நாம ஹோதி. தத்த² ‘‘யஸ்மா கிலேஸபஹானம் நாம அத்தி², பஹீனகிலேஸஸ்ஸ ச அதீதாபி கிலேஸா பஹீனாவ ஹோந்தி, அனாக³தாபி, பச்சுப்பன்னாபி, தஸ்மா அதீதேபி கிலேஸே பஜஹதி, அனாக³தேபி, பச்சுப்பன்னேபீ’’தி யேஸம் லத்³தி⁴, ஸேய்யதா²பி ஏகச்சானம் உத்தராபத²கானம்; தே ஸந்தா⁴ய அதீதேதிஆதி³புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸம் யதா²பாளிமேவ நிய்யாதி. நத்தி² கிலேஸே ஜஹதீதி இமஸ்மிம் பன பரவாதி³ஸ்ஸ பஞ்ஹே யஸ்மா கசவரம் பஜஹந்தஸ்ஸ கசவரே ச²ட்³ட³னவாயாமோ விய கிலேஸே பஜஹந்தஸ்ஸ ந அதீதாதி³பே⁴தே³ஸு கிலேஸேஸு வாயாமோ அத்தி², நிப்³பா³னாரம்மணே பன அரியமக்³கே³ பவத்திதே கிலேஸா அனுப்பன்னாயேவ நுப்பஜ்ஜந்தீதி பஹீனா நாம ஹோந்தி, தஸ்மா ந ஹேவந்தி படிக்கி²பதி. தேன ஹி அதீதே கிலேஸே பஜஹதீதிஆதி³ பன யஸ்மா ‘‘நத்தி² கிலேஸபஜஹனா’’தி ந வத்தப்³ப³ம், தஸ்மா அதீதாதி³பே⁴தே³ பஜஹதீதி ச²லேன வுத்தம்.

கிலேஸபஜஹனகதா²வண்ணனா.

2. ஸுஞ்ஞதகதா²வண்ணனா

832. இதா³னி ஸுஞ்ஞதகதா² நாம ஹோதி. தத்த² ஸுஞ்ஞதாதி த்³வே ஸுஞ்ஞதா க²ந்தா⁴னஞ்ச அனத்தலக்க²ணம் நிப்³பா³னஞ்ச. தேஸு அனத்தலக்க²ணம் தாவ ஏகச்சம் ஏகேன பரியாயேன ஸியா ஸங்கா²ரக்க²ந்த⁴பரியாபன்னம், நிப்³பா³னம், அபரியாபன்னமேவ. இமம் பன விபா⁴க³ம் அக்³க³ஹேத்வா ‘‘ஸுஞ்ஞதா ஸங்கா²ரக்க²ந்த⁴பரியாபன்னா’’தி யேஸம் லத்³தி⁴, ஸேய்யதா²பி அந்த⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அனிமித்தந்தி ஸப்³ப³னிமித்தரஹிதம் நிப்³பா³னம். ‘‘அப்பணிஹிதோ’’திபி தஸ்ஸேவ நாமம். கஸ்மா பனேதம் ஆப⁴தந்தி? அவிப⁴ஜ்ஜவாதீ³வாதே³ தோ³ஸாரோபனத்த²ம். யஸ்ஸ ஹி அவிப⁴ஜித்வா ‘‘ஏகதே³ஸேனேவ ஸுஞ்ஞதா ஸங்கா²ரக்க²ந்த⁴பரியாபன்னா’’தி லத்³தி⁴, தஸ்ஸ நிப்³பா³னம்பி ஸங்கா²ரக்க²ந்த⁴பரியாபன்னந்தி ஆபஜ்ஜதி. இமஸ்ஸ தோ³ஸஸ்ஸாரோபனத்த²ம் ‘‘அனிமித்தம் அப்பணிஹித’’ந்தி ஆப⁴தம். இதரோ தஸ்ஸ பரியாபன்னபா⁴வம் அனிச்ச²ந்தோ படிக்கி²பதி. ஸங்கா²ரக்க²ந்தோ⁴ ந அனிச்சோதிஆதி³ நிப்³பா³னஸங்கா²தாய ஸுஞ்ஞதாய அனிச்சபா⁴வாபத்திதோ³ஸத³ஸ்ஸனத்த²ம் வுத்தம்.

833. ஸங்கா²ரக்க²ந்த⁴ஸ்ஸ ஸுஞ்ஞதாதி ‘‘யதி³ அஞ்ஞஸ்ஸ க²ந்த⁴ஸ்ஸ ஸுஞ்ஞதா அஞ்ஞக்க²ந்த⁴பரியாபன்னா, ஸங்கா²ரக்க²ந்த⁴ஸுஞ்ஞதாயபி ஸேஸக்க²ந்த⁴பரியாபன்னாய ப⁴விதப்³ப³’’ந்தி சோத³னத்த²ம் வுத்தம். ஸங்கா²ரக்க²ந்த⁴ஸ்ஸ ஸுஞ்ஞதா ந வத்தப்³பா³திஆதி³ ‘‘யதி³ ஸங்கா²ரக்க²ந்த⁴ஸுஞ்ஞதா ஸேஸக்க²ந்த⁴பரியாபன்னா ந ஹோதி, ஸேஸக்க²ந்த⁴ஸுஞ்ஞதாபி ஸங்கா²ரக்க²ந்த⁴பரியாபன்னா ந ஹோதீ’’தி படிலோமத³ஸ்ஸனத்த²ம் வுத்தம்.

834. ஸுஞ்ஞமித³ம், பி⁴க்க²வே, ஸங்கா²ராதி ஸுத்தம் பரஸமயதோ ஆப⁴தம். தத்த² ஸங்கா²ராதி ‘‘ஸப்³பே³ ஸங்கா²ரா அனிச்சா’’தி ஆக³தட்டா²னே விய பஞ்சக்க²ந்தா⁴, தே ச அத்தத்தனியஸுஞ்ஞத்தா ஸுஞ்ஞதாதி ஸாஸனாவசரம் ஹோதி, ந விருஜ்ஜ²தி, தஸ்மா அனுஞ்ஞாதம். யஸ்மா பனேதம் ந ஸுஞ்ஞதாய ஸங்கா²ரக்க²ந்த⁴பரியாபன்னபா⁴வம் தீ³பேதி, தஸ்மா அஸாத⁴கந்தி.

ஸுஞ்ஞதகதா²வண்ணனா.

3. ஸாமஞ்ஞப²லகதா²வண்ணனா

835-836. இதா³னி ஸாமஞ்ஞப²லகதா² நாம ஹோதி. தத்த² மக்³க³வீதி²யம்பி ப²லஸமாபத்திவீதி²யம்பி அரியமக்³க³ஸ்ஸ விபாகசித்தம் ஸாமஞ்ஞப²லம் நாமாதி ஸகஸமயே ஸன்னிட்டா²னம். யேஸம் பன ததா² அக்³க³ஹேத்வா ‘‘கிலேஸபஹானஞ்சேவ ப²லுப்பத்தி ச ஸாமஞ்ஞப²லம், தஸ்மா அஸங்க²த’’ந்தி லத்³தி⁴, ஸேய்யதா²பி புப்³ப³ஸேலியானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமேத்த² ஹேட்டா² வுத்தனயத்தா யதா² பாளிமேவ நிய்யாதீதி.

ஸாமஞ்ஞப²லகதா²வண்ணனா.

4. பத்திகதா²வண்ணனா

837-840. இதா³னி பத்திகதா² நாம ஹோதி. தத்த² ‘‘யம் யம் படிலப்³ப⁴தி, தஸ்ஸ தஸ்ஸ படிலாபோ⁴ பத்தி நாம. ஸா ச அஸங்க²தா’’தி யேஸம் லத்³தி⁴, ஸேய்யதா²பி புப்³ப³ஸேலியானஞ்ஞேவ; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமிதா⁴பி ஹேட்டா² வுத்தனயத்தா யதா²பாளிமேவ நிய்யாதீதி. ந வத்தப்³ப³ந்திஆதி³ யாய லத்³தி⁴யா பத்தி அஸங்க²தாதி மஞ்ஞதி, தம் பகாஸேதும் வுத்தம். தத்த² ஸகவாதீ³ ‘‘ந ஹேவம் வத்தப்³பே³’’தி படிக்கி²பந்தோ கேவலம் பத்தியா ரூபாதி³பா⁴வம் ந ஸம்படிச்ச²தி. ந ஹி பத்தி நாம கோசி த⁴ம்மோ அத்தி², ந பன அஸங்க²தபா⁴வம் அனுஜானாதி. இதரோ பன படிக்கே²பமத்தேனேவ அஸங்க²தாதி லத்³தி⁴ம் பதிட்ட²பேதி, ஸா அயோனிஸோ பதிட்டா²பிதத்தா அப்பதிட்டி²தாயேவாதி.

பத்திகதா²வண்ணனா.

5. தத²தாகதா²வண்ணனா

841-843. இதா³னி தத²தாகதா² நாம ஹோதி. தத்த² யேஸம் ‘‘ரூபாதீ³னம் ஸப்³ப³த⁴ம்மானம் ரூபாதி³ஸபா⁴வதாஸங்கா²தா தத²தா நாம அத்தி², ஸா ச ஸங்க²தேஸு ரூபாதீ³ஸு அபரியாபன்னத்தா அஸங்க²தா’’தி லத்³தி⁴, ஸேய்யதா²பி ஏகச்சானம் உத்தராபத²கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமிதா⁴பி ஹேட்டா² வுத்தனயத்தா பாகடமேவாதி.

தத²தாகதா²வண்ணனா.

6. குஸலகதா²வண்ணனா

844-846. இதா³னி குஸலகதா² நாம ஹோதி. தத்த² அனவஜ்ஜம்பி குஸலம் இட்ட²பாகம்பி. அனவஜ்ஜம் நாம கிலேஸவிப்பயுத்தம். அயம் நயோ ட²பேத்வா அகுஸலம் ஸப்³ப³த⁴ம்மே ப⁴ஜதி. இட்ட²விபாகம் நாம ஆயதிம் உபபத்திபவத்தேஸு இட்ட²ப²லனிப்பா²த³கம் புஞ்ஞம். அயம் நயோ குஸலத்திகே ஆதி³பத³மேவ ப⁴ஜதி. யேஸம் பன இமம் விபா⁴க³ம் அக்³க³ஹேத்வா அனவஜ்ஜபா⁴வமத்தேனேவ நிப்³பா³னம் குஸலந்தி லத்³தி⁴, ஸேய்யதா²பி அந்த⁴கானம், தேஸம் இட்ட²விபாகட்டே²ன நிப்³பா³னஸ்ஸ குஸலதாபா⁴வம் தீ³பேதும் புச்சா² ஸகவாதி³ஸ்ஸ, அத்தனோ லத்³தி⁴வஸேன படிஞ்ஞா இதரஸ்ஸ. ஸேஸமிதா⁴பி ஹேட்டா² வுத்தனயத்தா உத்தானத்த²மேவாதி.

குஸலகதா²வண்ணனா.

7. அச்சந்தனியாமகதா²வண்ணனா

847. இதா³னி அச்சந்தனியாமகதா² நாம ஹோதி. தத்த² யேஸம் ‘‘ஸகிம் நிமுக்³கோ³ நிமுக்³கோ³வ ஹோதீ’’தி (அ. நி. 7.15) ஸுத்தம் நிஸ்ஸாய ‘‘அத்தி² புது²ஜ்ஜனஸ்ஸ அச்சந்தனியாமதா’’தி லத்³தி⁴, ஸேய்யதா²பி ஏகச்சானம் உத்தராபத²கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. மாதுகா⁴தகோதிஆதி³ ‘‘நியதமிச்சா²தி³ட்டி²கஸ்ஸ ச மாதுகா⁴தகாதீ³னஞ்ச ஸமானே மிச்ச²த்தனியாமே மாதுகா⁴தகாதீ³ஹிபி தே அச்சந்தனியதேஹி ப⁴விதப்³ப³’’ந்தி சோத³னத்த²ம் வுத்தம். இதரோ ‘‘நியதமிச்சா²தி³ட்டி²கோ ஸம்ஸாரகா²ணுகோ ப⁴வந்தரேபி நியதோவ இமே பன ஏகஸ்மிஞ்ஞேவ அத்தபா⁴வே’’தி லத்³தி⁴யா ந ஹேவந்தி படிக்கி²பதி.

848. விசிகிச்சா² உப்பஜ்ஜேய்யாதி ‘‘அயம் நியதோ வா நோ வா’’தி ஏவம் உப்பஜ்ஜேய்யாதி புச்ச²தி. இதரோ அனுப்பத்திகாரணம் அபஸ்ஸந்தோ படிஜானாதி. நுப்பஜ்ஜேய்யாதி புட்டோ² பன யம் தி³ட்டி²ம் ஆஸேவந்தோ நியாமம் ஓக்கந்தோ, தத்த² அனுப்பத்திம் ஸந்தா⁴ய படிஜானாதி. ததோ பஹீனாதி புட்டோ² மக்³கே³ன அப்பஹீனத்தா படிக்கி²பதி, தம் தி³ட்டி²ம் ஆரப்³ப⁴ அஸமுதா³சாரதோ படிஜானாதி. அத² நம் யஸ்மா பஹானம் நாம வினா அரியமக்³கே³ன நத்தி², தஸ்மா தஸ்ஸ வஸேன சோதே³தும் ஸோதாபத்திமக்³கே³னாதிஆதி³மாஹ. ஸோ ஏகமக்³கே³னாபி அப்பஹீனத்தா படிக்கி²பதி. புன கதமேனாதி புட்டோ² மிச்சா²மக்³க³ம் ஸந்தா⁴ய அகுஸலேனாதிஆதி³மாஹ.

849. உச்சே²த³தி³ட்டி² உப்பஜ்ஜேய்யாதி து³தியனியாமுப்பத்திம் புச்ச²தி. இதரோ யஸ்மா ‘‘யேபி தே ஓக்கலா வயபி⁴ஞ்ஞா நத்தி²கவாதா³ அகிரியவாதா³ அஹேதுகவாதா³’’தி (ம. நி. 3.143) வசனதோ திஸ்ஸோபி நியதமிச்சா²தி³ட்டி²யோ ஏகஸ்ஸ உப்பஜ்ஜந்தி, தஸ்மா படிஜானாதி.

850. அத² நம் ‘‘ந ச நாம ஸோ அச்சந்தனியாமோ’’தி சோதே³தும் ஹஞ்சீதிஆதி³மாஹ. அச்சந்தனியதஸ்ஸ ஹி து³தியனியாமோ நிரத்த²கோ. நுப்பஜ்ஜேய்யாதி பஞ்ஹே யம் ஸஸ்ஸததி³ட்டி²யா ஸஸ்ஸதந்தி க³ஹிதம், ததே³வ உச்சி²ஜ்ஜிஸ்ஸதீதி க³ஹேத்வா அனுப்பத்திம் ஸந்தா⁴ய படிஜானாதி. பஹீனாதி புட்டோ² மக்³கே³ன அப்பஹீனத்தா படிக்கி²பதி, வுத்தனயேன அனுப்பஜ்ஜனதோ படிஜானாதி. ஸஸ்ஸததி³ட்டி² உப்பஜ்ஜேய்யாதிஆதீ³ஸுபி ஏஸேவ நயோ. ஸேஸம் விசிகிச்சா²வாரே வுத்தனயமேவ.

851-852. ந வத்தப்³ப³ந்தி புச்சா² பரவாதி³ஸ்ஸ, ஸுத்தஸ்ஸ அத்தி²தாய படிஞ்ஞா ஸகவாதி³ஸ்ஸ. ந பன ஸோ ப⁴வந்தரேபி நிமுக்³கோ³வ. இமஸ்மிஞ்ஞேவ ஹி ப⁴வே அப⁴ப்³போ³ ஸோ தம் தி³ட்டி²ம் பஜஹிதுந்தி அயமேத்த² அதி⁴ப்பாயோ, தஸ்மா அஸாத⁴கமேதந்தி. ஸப்³ப³காலம் உம்முஜ்ஜித்வா நிமுஜ்ஜதீதிஆதி³ வசனமத்தே அபி⁴னிவேஸம் அகத்வா அத்தோ² பரியேஸிதப்³போ³தி த³ஸ்ஸனத்த²ம் வுத்தந்தி.

அச்சந்தனியாமகதா²வண்ணனா.

8. இந்த்³ரியகதா²வண்ணனா

853-856. இதா³னி இந்த்³ரியகதா² நாம ஹோதி. தத்த² லோகியா ஸத்³தா⁴ ஸத்³தா⁴ ஏவ நாம, ந ஸத்³தி⁴ந்த்³ரியம். ததா² லோகியம் வீரியம்…பே… ஸதி… ஸமாதி⁴… பஞ்ஞா பஞ்ஞாயேவ நாம, ந பஞ்ஞிந்த்³ரியந்தி யேஸம் லத்³தி⁴, ஸேய்யதா²பி ஹேதுவாதா³னஞ்சேவ மஹிஸாஸகானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. நத்தி² லோகியா ஸத்³தா⁴திஆதி³ யஸ்மா லோகியாபி ஸத்³தா⁴த³யோவ த⁴ம்மா அதி⁴பதியட்டே²ன இந்த்³ரியம், ந ஸத்³தா⁴தீ³ஹி அஞ்ஞம் ஸத்³தி⁴ந்த்³ரியாதி³ நாம அத்தி², தஸ்மா லோகியானம்பி ஸத்³தா⁴தீ³னஞ்ஞேவ ஸத்³தி⁴ந்த்³ரியாதி³பா⁴வத³ஸ்ஸனத்த²ம் வுத்தம். அத்தி² லோகியோ மனோதிஆதி³ யதா² தே லோகியாபி மனாத³யோ த⁴ம்மா மனிந்த்³ரியாதீ³னி, ஏவம் லோகியா ஸத்³தா⁴த³யோபி ஸத்³தி⁴ந்த்³ரியானீதி உபமாய தஸ்ஸத்த²ஸ்ஸ விபா⁴வனத்த²ம் வுத்தம். ஸேஸமேத்த² யதா²பாளிமேவ நிய்யாதீதி.

இந்த்³ரியகதா²வண்ணனா.

ஏகூனவீஸதிமோ வக்³கோ³.