5. ஏகமக்³க³கதா²வண்ணனா

810-811. இதா³னி ஏகமக்³க³கதா² நாம ஹோதி. தத்த² யேஸம் பு³த்³தே⁴ ப⁴க³வதி அயோனிஸோ பேமவஸேனேவ ‘‘ப⁴க³வா ஸோதாபன்னோ ஹுத்வா ஸகதா³கா³மீ, ஸகதா³கா³மீ ஹுத்வா அனாகா³மீ, அனாகா³மீ ஹுத்வா அரஹத்தம் ஸச்சா²காஸி, ஏகேனேவ பன அரியமக்³கே³ன சத்தாரி ப²லானி ஸச்சா²காஸீ’’தி லத்³தி⁴, ஸேய்யதா²பி தேஸஞ்ஞேவ; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் சதூஹி ப²லேஹி ஸத்³தி⁴ம் உப்பன்னானம் சதுன்னம் ப²ஸ்ஸாதீ³னம் ஏகதோ ஸமோதா⁴னவஸேன சோதே³தும் சதுன்னம் ப²ஸ்ஸானந்திஆதி³மாஹ. ஸோதாபத்திமக்³கே³னாதிஆதி³ ‘‘கதரமக்³கே³ன ஸச்சி²கரோதீ’’தி புச்ச²னத்த²ம் வுத்தம். அரஹத்தமக்³கே³னாதி ச வுத்தே தேன ஸக்காயதி³ட்டி²ஆதீ³னம் பஹானாபா⁴வவஸேன சோதே³தி. ப⁴க³வா ஸோதாபன்னோதி பு³த்³த⁴பூ⁴தஸ்ஸ ஸோதாபன்னபா⁴வோ நத்தீ²தி படிக்கி²பதி. பரதோ பஞ்ஹத்³வயேபி ஏஸேவ நயோ. ஸேஸமேத்த² யதா²பாளிமேவ நிய்யாதீதி.

ஏகமக்³க³கதா²வண்ணனா.