6. ஜா²னஸங்கந்திகதா²வண்ணனா

813-816. இதா³னி ஜா²னஸங்கந்திகதா² நாம ஹோதி. தத்த² யேஸம் ‘‘இத⁴, பி⁴க்க²வே, பி⁴க்கு² விவிச்சேவ காமேஹி பட²மம் ஜா²னம் உபஸம்பஜ்ஜ விஹரதி, விதக்கவிசாரானம் வூபஸமா து³தியம் ஜா²னம், ததியம் ஜா²னம், சதுத்த²ம் ஜா²னம் உபஸம்பஜ்ஜ விஹரதீ’’தி (ஸம். நி. 5.923-934) இமம் படிபாடிதே³ஸனம் நிஸ்ஸாய ‘‘தஸ்ஸ தஸ்ஸ ஜா²னஸ்ஸ உபசாரப்பவத்திம் வினாவ ஜா²னா ஜா²னம் ஸங்கமதீ’’தி லத்³தி⁴, ஸேய்யதா²பி மஹிஸாஸகானஞ்சேவ ஏகச்சானஞ்ச அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ தே து³தியஜ்ஜா²னூபசாரம் அப்பத்வா உப்படிபாடியா பட²மஜ்ஜா²னா து³தியஜ்ஜா²னமேவ ஸங்கமதி, பட²மதோ ததியம், து³தியதோ சதுத்த²ம்பி ஸங்கமேய்யா’’தி சோதே³தும் பட²மா ஜா²னாதிஆதி³மாஹ. யா பட²மஸ்ஸாதிஆதி³ ‘‘யதி³ பட²மதோ அனந்தரம் து³தியம், து³தியாதீ³ஹி வா ததியாதீ³னி ஸமாபஜ்ஜதி, ஏகாவஜ்ஜனேன ஸமாபஜ்ஜேய்யா’’தி சோத³னத்த²ம் வுத்தம். காமே ஆதீ³னவதோதி பட²மம் காமே ஆதீ³னவதோ மனஸி கரோதோ பச்சா² உப்பஜ்ஜதி. ஜா²னக்க²ணே பனேஸ நிமித்தமேவ மனஸி கரோதி. தஞ்ஞேவ பட²மந்தி ‘‘யதி³ புரிமஜவனதோ பச்சி²மஜவனம் விய அனந்தரம் உப்பஜ்ஜேய்ய, ட²பேத்வா புரிமபச்சி²மபா⁴வம் லக்க²ணதோ தஞ்ஞேவ தம் ப⁴வேய்யா’’தி சோதே³தும் புச்ச²தி. இமினா உபாயேன ஸப்³ப³த்த² அத்தோ² வேதி³தப்³போ³. விவிச்சேவ காமேஹீதிஆதீ³ஹி படிபாடியா ஜா²னானம் தே³ஸிதபா⁴வம் தீ³பேதி, ந அனந்தருப்பத்திம், தஸ்மா அஸாத⁴கந்தி.

ஜா²னஸங்கந்திகதா²வண்ணனா.