8. ஜராமரணம் விபாகோதிகதா²வண்ணனா

495. இதா³னி ஜராமரணம் விபாகோதிகதா² நாம ஹோதி. தத்த² யேஸம் ‘‘அத்தி² து³ப்³ப³ண்ணஸம்வத்தனியம் கம்மம் அப்பாயுகஸம்வத்தனியம் கம்ம’’ந்தி ஏத்த² து³ப்³ப³ண்ணதா நாம ஜரா. அப்பாயுகதா நாம மரணம். தம்ஸம்வத்தனியஞ்ச கம்மம் அத்தி². தஸ்மா ஜராமரணம் விபாகோதி லத்³தி⁴, ஸேய்யதா²பி அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. படிலோமபஞ்ஹே அனாரம்மணந்தி ரூபத⁴ம்மானம் தாவ அனாரம்மணமேவ, அரூபானம் பன ஜராமரணம் ஸம்பயோக³லக்க²ணாபா⁴வா அனாரம்மணமேவ.

496. அகுஸலானம் த⁴ம்மானம் ஜராமரணம் அகுஸலானம் த⁴ம்மானம் விபாகோதி பஞ்ஹே ஜராமரணேன நாம அனிட்ட²விபாகேன ப⁴விதப்³ப³ந்தி லத்³தி⁴யா படிஜானாதி. தேனேவ காரணேன குஸலானம் த⁴ம்மானம் ஜராமரணஸ்ஸ குஸலவிபாகதம் படிக்கி²பதி. பரதோ சஸ்ஸ அகுஸலவிபாகதஞ்ஞேவ படிஜானாதி.

குஸலானஞ்ச அகுஸலானஞ்சாதி புச்சா²வஸேன ஏகதோ கதம், ஏகக்க²ணே பன தம் நத்தி². அப்³யாகதானம் அவிபாகானம் ஜராமரணம் விபாகோதி வத்தப்³ப³தாய பரியாயோ நத்தி², தஸ்மா அப்³யாகதவஸேன புச்சா² ந கதா.

497. து³ப்³ப³ண்ணஸம்வத்தனியந்தி ஏத்த² து³ப்³ப³ண்ணியம் நாம அபரிஸுத்³த⁴வண்ணதா. அப்பாயுகதா நாம ஆயுனோ சிரம் பவத்திதும் அஸமத்த²தா. தத்த² அகுஸலகம்மம் கம்மஸமுட்டா²னஸ்ஸ து³ப்³ப³ண்ணரூபஸ்ஸ கம்மபச்சயோ ஹோதி, அஸதி³ஸத்தா பனஸ்ஸ தம்விபாகோ ந ஹோதி. உதுஸமுட்டா²னாதி³னோ பன தம்படிலாப⁴வஸேன ஆயுனோ ச உபச்சே²த³கவஸேன பச்சயோ ஹோதி. ஏவமேதம் பரியாயேன தம்ஸம்வத்தனிகம் நாம ஹோதி, ந விபாகப²ஸ்ஸாதீ³னம் விய ஜனகவஸேன, தஸ்மா விபாகபா⁴வே அஸாத⁴கம். ஸேஸமேத்த² ஹேட்டா² வுத்தஸதி³ஸமேவாதி.

ஜராமரணம் விபாகோதிகதா²வண்ணனா.