9. அரியத⁴ம்மவிபாககதா²வண்ணனா

498. இதா³னி அரியத⁴ம்மவிபாககதா² நாம ஹோதி. தத்த² யேஸம் கிலேஸப்பஹானமத்தமேவ ஸாமஞ்ஞப²லம், ந சித்தசேதஸிகா த⁴ம்மாதி லத்³தி⁴, ஸேய்யதா²பி அந்த⁴கானம்; தே ஸந்தா⁴ய நத்தி² அரியத⁴ம்மவிபாகோதி புச்சா² ஸகவாதி³ஸ்ஸ. தத்த² அரியத⁴ம்மவிபாகோதி மக்³க³ஸங்கா²தஸ்ஸ அரியத⁴ம்மஸ்ஸ விபாகோ. கிலேஸக்க²யமத்தம் அரியப²லந்தி லத்³தி⁴யா படிஞ்ஞா இதரஸ்ஸ. ஸாமஞ்ஞந்தி ஸமணபா⁴வோ, மக்³க³ஸ்ஸேதம் நாமம். ‘‘ஸாமஞ்ஞஞ்ச வோ, பி⁴க்க²வே, தே³ஸேஸ்ஸாமி ஸாமஞ்ஞப²லஞ்சா’’தி ஹி வுத்தம். ப்³ரஹ்மஞ்ஞேபி ஏஸேவ நயோ.

ஸோதாபத்திப²லம் ந விபாகோதிஆதீ³ஸு ஸோதாபத்திமக்³கா³தீ³னம் அபசயகா³மிதம் ஸந்தா⁴ய அரியப²லானம் நவிபாகபா⁴வம் படிஜானாதி, தா³னப²லாதீ³னம் படிக்கி²பதி. ஸோ ஹி ஆசயகா³மித்திகஸ்ஸ ஏவம் அத்த²ம் தா⁴ரேதி – விபாகஸங்கா²தம் ஆசயம் க³ச்ச²ந்தி, தம் வா ஆசினந்தா க³ச்ச²ந்தீதி ஆசயகா³மினோ, விபாகம் அபசினந்தா க³ச்ச²ந்தீதி அபசயகா³மினோதி. தஸ்மா ஏவம் படிஜானாதி ச படிக்கி²பதி ச.

500. காமாவசரம் குஸலம் ஸவிபாகம் ஆசயகா³மீதிஆதி³கா புச்சா² பரவாதி³ஸ்ஸ, படிஞ்ஞா ச படிக்கே²போ ச ஸகவாதி³ஸ்ஸ. லோகியஞ்ஹி குஸலம் விபாகசுதிபடிஸந்தி⁴யோ சேவ வட்டஞ்ச ஆசினந்தம் க³ச்ச²தீதி ஆசயகா³மி. லோகுத்தரகுஸலம் சுதிபடிஸந்தி⁴யோ சேவ வட்டஞ்ச அபசினந்தம் க³ச்ச²தீதி அபசயகா³மி. ஏவமேதம் ஸவிபாகமேவ ஹோதி, ந அபசயகா³மிவசனமத்தேன அவிபாகம். இமமத்த²ம் ஸந்தா⁴யேத்த² ஸகவாதி³னோ படிஞ்ஞா ச படிக்கே²போ ச வேதி³தப்³பா³தி.

அரியத⁴ம்மவிபாககதா²வண்ணனா.