(20) 5. மஹாவக்³கோ³

1. ஸோதானுக³தஸுத்தவண்ணனா

191. பஞ்சமஸ்ஸ பட²மே ஸோதானுக³தானந்தி பஸாத³ஸோதம் ஓத³ஹித்வா ஞாணஸோதேன வவத்த²பிதானம். சத்தாரோ ஆனிஸம்ஸா பாடிகங்கா²தி சத்தாரோ கு³ணானிஸம்ஸா பாடிகங்கி²தப்³பா³. இத³ம் பன ப⁴க³வதா அத்து²ப்பத்திவஸேன ஆரத்³த⁴ம். கதரஅத்து²ப்பத்திவஸேனாதி? பி⁴க்கூ²னம் த⁴ம்மஸ்ஸவனாய அனுபஸங்கமனஅத்து²ப்பத்திவஸேன. பஞ்சஸதா கிர ப்³ராஹ்மணபப்³ப³ஜிதா ‘‘ஸம்மாஸம்பு³த்³தோ⁴ லிங்க³வசனவிப⁴த்திபத³ப்³யஞ்ஜனாதீ³ஹி கதே²ந்தோ அம்ஹேஹி ஞாதமேவ கதே²ஸ்ஸதி, அஞ்ஞாதம் கிம் கதே²ஸ்ஸதீ’’தி த⁴ம்மஸ்ஸவனத்த²ம் ந க³ச்ச²ந்தி. ஸத்தா² தம் பவத்திம் ஸுத்வா தே பக்கோஸாபேத்வா ‘‘கஸ்மா ஏவம் கரோத², ஸக்கச்சம் த⁴ம்மம் ஸுணாத², ஸக்கச்சம் த⁴ம்மம் ஸுணந்தானஞ்ச ஸஜ்ஜா²யந்தானஞ்ச இமே ஏத்தகா ஆனிஸம்ஸா’’தி த³ஸ்ஸேந்தோ இமம் தே³ஸனம் ஆரபி⁴.

தத்த² த⁴ம்மம் பரியாபுணாதீதி ஸுத்தம் கே³ய்யந்திஆதி³கம் நவங்க³ம் ஸத்து²ஸாஸனபூ⁴தம் தந்தித⁴ம்மம் வளஞ்ஜேதி. ஸோதானுக³தா ஹோந்தீதி ஸோதம் அனுப்பத்தா அனுபவிட்டா² ஹோந்தி. மனஸானுபேக்கி²தாதி சித்தேன ஓலோகிதா. தி³ட்டி²யா ஸுப்படிவித்³தா⁴தி அத்த²தோ ச காரணதோ ச பஞ்ஞாய ஸுட்டு² படிவித்³தா⁴ பச்சக்க²ம் கதா. முட்ட²ஸ்ஸதி காலம் குருமானோதி நயித³ம் பு³த்³த⁴வசனம் அனுஸ்ஸரணஸதியா அபா⁴வேன வுத்தம், புது²ஜ்ஜனகாலகிரியம் பன ஸந்தா⁴ய வுத்தம். புது²ஜ்ஜனோ ஹி முட்ட²ஸ்ஸதி காலம் கரோதி நாம. உபபஜ்ஜதீதி ஸுத்³த⁴ஸீலே பதிட்டி²தோ தே³வலோகே நிப்³ப³த்ததி. த⁴ம்மபதா³ ப்லவந்தீதி அந்தராப⁴வே நிப்³ப³த்தமுட்ட²ஸ்ஸதினோ, யேபி புப்³பே³ ஸஜ்ஜா²யமூலிகா வாசாபரிசிதபு³த்³த⁴வசனத⁴ம்மா, தே ஸப்³பே³ பஸன்னே ஆதா³ஸே சா²யா விய ப்லவந்தி, பாகடா ஹுத்வா பஞ்ஞாயந்தி. த³ந்தோ⁴, பி⁴க்க²வே, ஸதுப்பாதோ³தி பு³த்³த⁴வசனானுஸ்ஸரணஸதியா உப்பாதோ³ த³ந்தோ⁴ க³ரு. அத² ஸோ ஸத்தோ கி²ப்பம்யேவ விஸேஸகா³மீ ஹோதி, நிப்³பா³னகா³மீ ஹோதீதி அத்தோ².

இத்³தி⁴மா சேதோவஸிப்பத்தோதி இத்³தி⁴ஸம்பன்னோ சித்தஸ்ஸ வஸிபா⁴வபத்தோ கீ²ணாஸவோ. அயம் வா ஸோ த⁴ம்மவினயோதி ஏத்த² விபா⁴வனத்தோ² வா-ஸத்³தோ³. யத்தா²தி யஸ்மிம் த⁴ம்மவினயே. ப்³ரஹ்மசரியம் அசரிந்தி ப்³ரஹ்மசரியவாஸம் வஸிம். இத³ம்பி பு³த்³த⁴வசனம் மயா புப்³பே³ வளஞ்ஜிதந்தி பு³த்³த⁴வசனானுஸ்ஸரணவஸேனேதம் வுத்தம். தே³வபுத்தோதி பஞ்சாலசண்டோ³ விய ஹத்த²கமஹாப்³ரஹ்மா விய ஸனங்குமாரப்³ரஹ்மா விய ச ஏகோ த⁴ம்மகதி²கதே³வபுத்தோ. ஓபபாதிகோ ஓபபாதிகம் ஸாரேதீதி பட²மம் உப்பன்னோ தே³வபுத்தோ பச்சா² உப்பன்னம் ஸாரேதி. ஸஹபம்ஸுகீளிகாதி ஏதேன நேஸம் தீ³க⁴ரத்தம் கதபரிசயபா⁴வம் த³ஸ்ஸேதி. ஸமாக³ச்சே²ய்யுந்தி ஸாலாய வா ருக்க²மூலே வா ஸம்முகீ²பா⁴வம் க³ச்சே²ய்யும். ஏவம் வதே³ய்யாதி ஸாலாய வா ருக்க²மூலே வா பட²மதரம் நிஸின்னோ பச்சா² ஆக³தம் ஏவம் வதே³ய்ய. ஸேஸமேத்த² பாளினயேனேவ வேதி³தப்³ப³ம்.

2. டா²னஸுத்தவண்ணனா

192. து³தியே டா²னானீதி காரணானி. டா²னேஹீதி காரணேஹி. ஸோசேய்யந்தி ஸுசிபா⁴வோ. ஸம்வஸமானோதி ஏகதோ வஸமானோ. ந ஸந்ததகாரீதி ந ஸததகாரீ. ந ஸந்ததவுத்தி ஸீலேஸூதி ஸததம் ஸப்³ப³காலம் ஸீலஜீவிதம் ந ஜீவதீதி அத்தோ². ஸம்வோஹாரமானோதி கதே²ந்தோ. ஏகேன ஏகோ வோஹரதீதி ஏகேன ஸத்³தி⁴ம் ஏகோ ஹுத்வா கதே²தி. வோக்கமதீதி ஓக்கமதி. புரிமவோஹாரா பச்சி²மவோஹாரந்தி புரிமகதா²ய பச்சி²மகத²ம், புரிமகதா²ய ச பச்சி²மகதா², பச்சி²மகதா²ய ச புரிமகதா² ந ஸமேதீதி அத்தோ².

ஞாதிப்³யஸனேனாதிஆதீ³ஸு ஞாதீனம் ப்³யஸனம் ஞாதிப்³யஸனம், ஞாதிவினாஸோதி அத்தோ². து³தியபதே³பி ஏஸேவ நயோ. ரோக³ப்³யஸனே பன ரோகோ³யேவ ஆரோக்³யவினாஸனதோ ப்³யஸனம் ரோக³ப்³யஸனம். அனுபரிவத்தந்தீதி அனுப³ந்த⁴ந்தி. லாபோ⁴ சாதிஆதீ³ஸு ஏகம் அத்தபா⁴வம் லாபோ⁴ அனுபரிவத்ததி, ஏகம் அலாபோ⁴தி ஏவம் நயோ நேதப்³போ³. ஸாகச்சா²யமானோதி பஞ்ஹபுச்ச²னவிஸ்ஸஜ்ஜனவஸேன ஸாகச்ச²ம் கரோந்தோ. யதா²தி யேனாகாரேன. உம்மக்³கோ³தி பஞ்ஹும்மக்³கோ³. அபி⁴னீஹாரோதி பஞ்ஹாபி⁴ஸங்க²ரணவஸேன சித்தஸ்ஸ அபி⁴னீஹாரோ. ஸமுதா³ஹாரோதி பஞ்ஹபுச்ச²னம். ஸந்தந்தி பச்சனீகஸந்ததாய ஸந்தம் கத்வா ந கதே²தீதி அத்தோ². பணீதந்தி அதப்பகம். அதக்காவசரந்தி யதா² தக்கேன நயக்³கா³ஹேன க³ஹேதும் ஸக்கா ஹோதி, ஏவம் ந கதே²தீதி அத்தோ². நிபுணந்தி ஸண்ஹம். பண்டி³தவேத³னீயந்தி பண்டி³தேஹி ஜானிதப்³ப³கம். ஸேஸம் ஸப்³ப³த்த² வுத்தானுஸாரேனேவ வேதி³தப்³ப³ம்.

3. ப⁴த்³தி³யஸுத்தவண்ணனா

193. ததியே உபஸங்கமீதி பு⁴த்தபாதராஸோ ஹுத்வா மாலாக³ந்த⁴விலேபனம் க³ஹேத்வா ப⁴க³வந்தம் வந்தி³ஸ்ஸாமீதி உபஸங்கமி. மா அனுஸ்ஸவேனாதிஆதீ³ஸு அனுஸ்ஸவவசனேன மம கத²ம் மா க³ண்ஹதா²தி இமினா நயேன அத்தோ² வேதி³தப்³போ³. ஸாரம்போ⁴தி கரணுத்தரியலக்க²ணோ ஸாரம்போ⁴. அலோபா⁴த³யோ லோபா⁴தி³படிபக்க²வஸேன வேதி³தப்³பா³. குஸலத⁴ம்மூபஸம்பதா³யாதி குஸலத⁴ம்மானம் ஸம்பாத³னத்தா²ய, படிலாப⁴த்தா²யாதி வுத்தம் ஹோதி. இமே சேபி, ப⁴த்³தி³ய, மஹாஸாலாதி புரதோ டி²தே ஸாலருக்கே² த³ஸ்ஸேந்தோ ஏவமாஹ. ஸேஸமேத்த² ஹேட்டா² வுத்தனயத்தா உத்தானத்த²த்தா ச ஸுவிஞ்ஞேய்யமேவ. ஸத்த²ரி பன தே³ஸனம் வினிவட்டேந்தே ப⁴த்³தி³யோ ஸோதாபன்னோ ஜாதோதி.

4. ஸாமுகி³யாஸுத்தவண்ணனா

194. சதுத்தே² ஸாமுகி³யாதி ஸாமுக³னிக³மவாஸினோ. ப்³யக்³க⁴பஜ்ஜாதி தே ஆலபந்தோ ஏவமாஹ. கோலனக³ரஸ்ஸ ஹி கோலருக்கே² ஹாரேத்வா கதத்தா கோலனக³ரந்தி ச ப்³யக்³க⁴பதே² மாபிதத்தா ப்³யக்³க⁴பஜ்ஜந்தி ச த்³வே நாமானி. ஏதேஸஞ்ச புப்³ப³புரிஸா தத்த² வஸிம்ஸூதி ப்³யக்³க⁴பஜ்ஜவாஸிதாய ப்³யக்³க⁴பஜ்ஜவாஸினோ ப்³யக்³க⁴பஜ்ஜாதி வுச்சந்தி. தே ஆலபந்தோ ஏவமாஹ. பாரிஸுத்³தி⁴பதா⁴னியங்கா³னீதி பாரிஸுத்³தி⁴அத்தா²ய பதா⁴னியங்கா³னி பத³ஹிதப்³ப³வீரியஸ்ஸ அங்கா³னி, கோட்டா²ஸாதி அத்தோ². ஸீலபாரிஸுத்³தி⁴பதா⁴னியங்க³ந்தி ஸீலபரிஸோத⁴னவீரியஸ்ஸேதம் நாமம். தஞ்ஹி ஸீலபாரிஸுத்³தி⁴பரிபூரணத்தா²ய பதா⁴னியங்க³ந்தி ஸீலபாரிஸுத்³தி⁴பதா⁴னியங்க³ம். ஸேஸேஸுபி ஏஸேவ நயோ. தத்த² தத்த² பஞ்ஞாய அனுக்³க³ஹேஸ்ஸாமீதி தஸ்மிம் தஸ்மிம் டா²னே விபஸ்ஸனாபஞ்ஞாய அனுக்³க³ஹேஸ்ஸாமி. யோ தத்த² ச²ந்தோ³திஆதீ³ஸு யோ தஸ்மிம் அனுக்³க³ண்ஹனே கத்துகாமதாச²ந்தோ³தி இமினா நயேன அத்தோ² வேதி³தப்³போ³. ஸதிஸம்பஜஞ்ஞம் பனேத்த² ஸதிம் உபட்ட²பேத்வா ஞாணேன பரிச்சி²ந்தி³த்வா வீரியபக்³க³ஹனத்த²ம் வுத்தம். ரஜனீயேஸு த⁴ம்மேஸு சித்தம் விராஜேதீதி ராக³பச்சயேஸு இட்டா²ரம்மணேஸு யதா² சித்தம் விரஜ்ஜதி, ஏவம் கரோதி. விமோசனீயேஸு த⁴ம்மேஸு சித்தம் விமோசேதீதி யேஹி ஆரம்மணேஹி சித்தம் விமோசேதப்³ப³ம், தேஸு யதா² விமுச்சதி, ஏவம் கரோதி. விராஜேத்வாதி ஏத்த² மக்³க³க்க²ணே விராஜேதி நாம, ப²லக்க²ணே விரத்தம் நாம ஹோதி. து³தியபதே³பி ஏஸேவ நயோ. ஸம்மாவிமுத்திம் பு²ஸதீதி ஹேதுனா நயேன அரஹத்தப²லவிமுத்திம் ஞாணப²ஸ்ஸேன பு²ஸதீதி.

5. வப்பஸுத்தவண்ணனா

195. பஞ்சமே வப்போதி த³ஸப³லஸ்ஸ சூளபிதா ஸக்யராஜா. நிக³ண்ட²ஸாவகோதி வேஸாலியம் ஸீஹஸேனாபதி விய நாளந்தா³யம் உபாலிக³ஹபதி விய ச நிக³ண்ட²ஸ்ஸ நாடபுத்தஸ்ஸ உபட்டா²கோ. காயேன ஸம்வுதோதி காயத்³வாரஸ்ஸ ஸம்வுதத்தா பிஹிதத்தா காயேன ஸம்வுதோ நாம. ஸேஸத்³வயேபி ஏஸேவ நயோ. அவிஜ்ஜாவிராகா³தி அவிஜ்ஜாய க²யவிராகே³ன. விஜ்ஜுப்பாதா³தி மக்³க³விஜ்ஜாய உப்பாதே³ன. தம் டா²னந்தி தம் காரணம். அவிபக்கவிபாகந்தி அலத்³த⁴விபாகவாரம். ததோனிதா³னந்தி தம்ஹேது தப்பச்சயா. து³க்க²வேத³னியா ஆஸவா அஸ்ஸவேய்யுந்தி து³க்க²வேத³னாய பச்சயபூ⁴தா கிலேஸா அஸ்ஸவேய்யும், தஸ்ஸ புரிஸஸ்ஸ உப்பஜ்ஜேய்யுந்தி அத்தோ². அபி⁴ஸம்பராயந்தி து³தியே அத்தபா⁴வே. காயஸமாரம்ப⁴பச்சயாதி காயகம்மபச்சயேன. ஆஸவாதி கிலேஸா. விகா⁴தபரிளாஹாதி ஏத்த² விகா⁴தோதி து³க்க²ம். பரிளாஹோதி காயிகசேதஸிகோ பரிளாஹோ. பு²ஸ்ஸ பு²ஸ்ஸ ப்³யந்தீகரோதீதி ஞாணவஜ்ஜ²ம் கம்மம் ஞாணப²ஸ்ஸேன பு²ஸித்வா பு²ஸித்வா க²யம் க³மேதி, விபாகவஜ்ஜ²ம் கம்மம் விபாகப²ஸ்ஸேன பு²ஸித்வா பு²ஸித்வா க²யம் க³மேதி. நிஜ்ஜராதி கிலேஸஜீரணகபடிபதா³. ஸேஸவாரேஸுபி ஏஸேவ நயோ. இத⁴ ட²த்வா அயம் பி⁴க்கு² கீ²ணாஸவோ காதப்³போ³, சத்தாரி மஹாபூ⁴தானி நீஹரித்வா சதுஸச்சவவத்தா²னம் த³ஸ்ஸேத்வா யாவ அரஹத்தப²லம் கம்மட்டா²னம் கதே²தப்³ப³ம்.

இதா³னி பன தஸ்ஸ கீ²ணாஸவஸ்ஸ ஸததவிஹாரே த³ஸ்ஸேதும் ஏவம் ஸம்மா விமுத்தசித்தஸ்ஸாதிஆதி³மாஹ. தத்த² ஸம்மா விமுத்தசித்தஸ்ஸாதி ஹேதுனா காரணேன ஸம்மா விமுத்தஸ்ஸ. ஸததவிஹாராதி நிச்சவிஹாரா நிப³த்³த⁴விஹாரா. நேவ ஸுமனோ ஹோதீதி இட்டா²ரம்மணே ராக³வஸேன ந ஸோமனஸ்ஸஜாதோ ஹோதி. ந து³ம்மனோதி அனிட்டா²ரம்மணே படிக⁴வஸேன ந தோ³மனஸ்ஸஜாதோ ஹோதி. உபேக்க²கோ விஹரதி ஸதோ ஸம்பஜானோதி ஸதிஸம்பஜஞ்ஞபரிக்³க³ஹிதாய மஜ்ஜ²த்தாகாரலக்க²ணாய உபேக்கா²ய தேஸு ஆரம்மணேஸு உபேக்க²கோ மஜ்ஜ²த்தோ ஹுத்வா விஹரதி.

காயபரியந்திகந்தி காயந்திகம் காயபரிச்சி²ன்னம், யாவ பஞ்சத்³வாரகாயோ பவத்ததி, தாவ பவத்தம் பஞ்சத்³வாரிகவேத³னந்தி அத்தோ². ஜீவிதபரியந்திகந்தி ஜீவிதந்திகம் ஜீவிதபரிச்சி²ன்னம், யாவ ஜீவிதம் பவத்ததி, தாவ பவத்தம் மனோத்³வாரிகவேத³னந்தி அத்தோ². தத்த² பஞ்சத்³வாரிகவேத³னா பச்சா² உப்பஜ்ஜித்வா பட²மம் நிருஜ்ஜ²தி, மனோத்³வாரிகவேத³னா பட²மம் உப்பஜ்ஜித்வா பச்சா² நிருஜ்ஜ²தி. ஸா ஹி படிஸந்தி⁴க்க²ணே வத்து²ரூபஸ்மிம்யேவ பதிட்டா²தி. பஞ்சத்³வாரிகா பவத்தே பஞ்சத்³வாரவஸேன பவத்தமானா பட²மவயே வீஸதிவஸ்ஸகாலே ரஜ்ஜனது³ஸ்ஸனமுய்ஹனவஸேன அதி⁴மத்தா ப³லவதீ ஹோதி, பண்ணாஸவஸ்ஸகாலே டி²தா ஹோதி, ஸட்டி²வஸ்ஸகாலதோ பட்டா²ய பரிஹாயமானா, அஸீதினவுதிவஸ்ஸகாலே மந்தா³ ஹோதி. ததா³ ஹி ஸத்தா ‘‘சிரரத்தம் ஏகதோ நிஸீதி³ம்ஹா நிபஜ்ஜிம்ஹா’’தி வத³ந்தேபி ந ஜானாமாதி வத³ந்தி. அதி⁴மத்தானிபி ரூபாதி³ஆரம்மணானி ந பஸ்ஸாம, ஸுக³ந்த⁴து³க்³க³ந்த⁴ம் வா ஸாது³அஸாது³ம் வா த²த்³த⁴முது³கம் வாதி ந ஜானாமாதிபி வத³ந்தி. இதி நேஸம் பஞ்சத்³வாரிகவேத³னா ப⁴க்³கா³ ஹோதி, மனோத்³வாரிகா பவத்ததி. ஸாபி அனுபுப்³பே³ன பரிஹாயமானா மரணஸமயே ஹத³யகோடிம்யேவ நிஸ்ஸாய பவத்ததி. யாவ பனேஸா பவத்ததி, தாவ ஸத்தோ ஜீவதீதி வுச்சதி. யதா³ நப்பவத்ததி, ததா³ ‘‘மதோ நிருத்³தோ⁴’’தி வுச்சதி.

ஸ்வாயமத்தோ² வாபியா தீ³பேதப்³போ³ – யதா² ஹி புரிஸோ பஞ்சஉத³கமக்³க³ஸம்பன்னம் வாபிம் கரேய்ய. பட²மம் தே³வே வுட்டே² பஞ்சஹி உத³கமக்³கே³ஹி உத³கம் பவிஸித்வா அந்தோவாபியம் ஆவாடே பூரேய்ய. புனப்புனம் தே³வே வஸ்ஸந்தே உத³கமக்³கே³ பூரேத்வா கா³வுதட்³ட⁴யோஜனமத்தம் ஓத்த²ரித்வா உத³கம் திட்டே²ய்ய ததோ ததோ விஸ்ஸந்த³மானம். அத² நித்³த⁴மனதும்பே³ விவரித்வா கே²த்தேஸு கம்மே கயிரமானே உத³கம் நிக்க²மந்தம், ஸஸ்ஸபாககாலே உத³கம் நிக்க²ந்தம் உத³கம் பரிஹீனம், ‘‘மச்சே² க³ண்ஹாமா’’தி வத்தப்³ப³தம் ஆபஜ்ஜேய்ய. ததோ கதிபாஹேன ஆவாடேஸுயேவ உத³கம் ஸண்ட²ஹேய. யாவ பன தம் ஆவாடேஸு ஹோதி, தாவ மஹாவாபியம் உத³கம் அத்தீ²தி ஸங்க²ம் க³ச்ச²தி. யதா³ பன தத்த² சி²ஜ்ஜதி, ததா³ ‘‘வாபியம் உத³கம் நத்தீ²’’தி வுச்சதி. ஏவம் ஸம்பத³மித³ம் வேதி³தப்³ப³ம்.

பட²மம் தே³வே வஸ்ஸந்தே பஞ்சஹி மக்³கே³ஹி உத³கே பவிஸந்தே ஆவாடானம் பூரணகாலோ விய ஹி பட²மமேவ படிஸந்தி⁴க்க²ணே மனோத்³வாரிகவேத³னாய வத்து²ரூபே பதிட்டி²தகாலோ, புனப்புனம் தே³வே வஸ்ஸந்தே பஞ்சமக்³கா³னம் பூரணகாலோ விய பவத்தே பஞ்சத்³வாரிகவேத³னாய பவத்தி, கா³வுதட்³ட⁴யோஜனமத்தம் அஜ்ஜோ²த்த²ரணம் விய பட²மவயே வீஸதிவஸ்ஸகாலே ரஜ்ஜனாதி³வஸேன தஸ்ஸ அதி⁴மத்தப³லவபா⁴வோ, யாவ வாபிதோ உத³கம் ந நிக்³க³ச்ச²தி, தாவ பூராய வாபியா டி²தகாலோ விய பஞ்ஞாஸவஸ்ஸகாலே தஸ்ஸ டி²தகாலோ, நித்³த⁴மனதும்பே³ஸு விவடேஸு கம்மே கயிரமானே உத³கஸ்ஸ நிக்க²மனகாலோ விய ஸட்டி²வஸ்ஸகாலதோ பட்டா²ய தஸ்ஸ பரிஹானி, உத³கே ப⁴ட்டே² உத³கமக்³கே³ஸு பரித்தஉத³கஸ்ஸ டி²தகாலோ விய அஸீதினவுதிகாலே பஞ்சத்³வாரிகவேத³னாய மந்த³காலோ, ஆவாடேஸுயேவ உத³கஸ்ஸ பதிட்டி²தகாலோ விய ஹத³யவத்து²கோடிம் நிஸ்ஸாய மனோத்³வாரே வேத³னாய பவத்திகாலோ, ஆவாடேஸு பரித்தேபி உத³கே ஸதி ‘‘வாபியம் உத³கம் அத்தீ²’’தி வத்தப்³ப³காலோ விய யாவ ஸா பவத்ததி, தாவ ‘‘ஸத்தோ ஜீவதீ’’தி வுச்சதி. யதா² பன ஆவாடேஸு உத³கே சி²ன்னே ‘‘நத்தி² வாபியம் உத³க’’ந்தி வுச்சதி, ஏவம் மனோத்³வாரிகவேத³னாய அப்பவத்தமானாய ஸத்தோ மதோதி வுச்சதி. இமம் வேத³னம் ஸந்தா⁴ய வுத்தம் – ‘‘ஜீவிதபரியந்திகம் வேத³னம் வேதி³யமானோ’’தி.

காயஸ்ஸ பே⁴தா³தி காயஸ்ஸ பே⁴தே³ன. உத்³த⁴ம் ஜீவிதபரியாதா³னாதி ஜீவிதக்க²யதோ உத்³த⁴ம். இதே⁴வாதி படிஸந்தி⁴வஸேன பரதோ அக³ந்த்வா இதே⁴வ. ஸீதீ ப⁴விஸ்ஸந்தீதி பவத்திவிப்ப²ந்த³னத³ரத²ரஹிதானி ஸீதானி அப்பவத்தனத⁴ம்மானி ப⁴விஸ்ஸந்தி.

தூ²ணம் படிச்சாதி ருக்க²ம் படிச்ச. குத்³தா³லபிடகம் ஆதா³யாதி குத்³தா³லஞ்ச க²ணித்திஞ்ச பச்சி²ஞ்ச க³ஹேத்வாதி அத்தோ². தே³ஸனா பன குத்³தா³லவஸேனேவ கதா. மூலே சி²ந்தே³ய்யாதி மூலம்ஹி குத்³தா³லேன சி²ந்தே³ய்ய. பலிக²ணேய்யாதி க²ணித்தியா ஸமந்தா க²ணேய்ய.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – ருக்கோ² விய ஹி அத்தபா⁴வோ த³ட்ட²ப்³போ³, ருக்க²ம் படிச்ச சா²யா விய குஸலாகுஸலம் கம்மம், சா²யம் அப்பவத்தம் காதுகாமோ புரிஸோ விய யோகா³வசரோ, குத்³தா³லோ விய பஞ்ஞா, பிடகம் விய ஸமாதி⁴, க²ணித்தி விய விபஸ்ஸனா, க²ணித்தியா மூலானம் பலிக²ணனகாலோ விய அரஹத்தமக்³கே³ன அவிஜ்ஜாய சே²த³னகாலோ, க²ண்டா³க²ண்ட³ம் கரணகாலோ விய க²ந்த⁴வஸேன தி³ட்ட²காலோ, பா²லனகாலோ விய ஆயதனவஸேன தி³ட்ட²காலோ, ஸகலீகரணகாலோ விய தா⁴துவஸேன தி³ட்ட²காலோ, வாதாதபேன விஸோஸனகாலோ விய காயிகசேதஸிகஸ்ஸ வீரியஸ்ஸ கரணகாலோ, அக்³கி³னா ட³ஹனகாலோ விய ஞாணேன கிலேஸானம் ட³ஹனகாலோ, மஸிகரணகாலோ விய வத்தமானக-பஞ்சக்க²ந்த⁴காலோ, மஹாவாதே ஓபு²னனகாலோ விய நதீ³ஸோதே பவாஹனகாலோ விய ச சி²ன்னமூலகானம் பஞ்சன்னம் க²ந்தா⁴னம் அப்படிஸந்தி⁴கனிரோதோ⁴, ஓபு²னனப்பவாஹனேஹி அபஞ்ஞத்திகபா⁴வூபக³மோ விய புனப்³ப⁴வே விபாகக்க²ந்தா⁴னம் அனுப்பாதே³ன அபண்ணத்திகபா⁴வோ வேதி³தப்³போ³.

ப⁴க³வந்தம் ஏதத³வோசாதி ஸத்த²ரி தே³ஸனம் வினிவட்டேந்தே ஸோதாபத்திப²லம் பத்வா ஏதம் ‘‘ஸேய்யதா²பி, ப⁴ந்தே’’திஆதி³வசனம் அவோச. தத்த² உத³யத்தி²கோதி வட்³டி⁴அத்தி²கோ. அஸ்ஸபணியம் போஸேய்யாதி பஞ்ச அஸ்ஸபோதஸதானி கிணித்வா பச்சா² விக்கிணிஸ்ஸாமீதி போஸேய்ய. ஸஹஸ்ஸக்³க⁴னகஸ்ஸ அஸ்ஸஸ்ஸ பஞ்சஸதமத்தம் உபகரணம் க³ந்த⁴மாலாதி³வஸேன போஸாவனிகம்யேவ அக³மாஸி. அத²ஸ்ஸ தே அஸ்ஸா ஏகதி³வஸேனேவ ரோக³ம் பு²ஸித்வா ஸப்³பே³ ஜீவிதக்க²யம் பாபுணேய்யுந்தி இமினா அதி⁴ப்பாயேன ஏவமாஹ. உத³யஞ்சேவ நாதி⁴க³ச்சே²ய்யாதி வட்³டி⁴ஞ்ச கே³ஹதோ நீஹரித்வா தி³ன்னமூலஞ்ச கிஞ்சி ந லபே⁴ய்ய. பயிருபாஸிந்தி சதூஹி பச்சயேஹி உபட்ட²ஹிம். ஸ்வாஹம் உத³யஞ்சேவ நாதி⁴க³ச்சி²ந்தி ஸோ அஹம் நேவ உத³யம் ந கே³ஹதோ தி³ன்னத⁴னம் அதி⁴க³ச்சி²ம், பணியஅஸ்ஸஜக்³க³னகோ நாம ஜாதோஸ்மீதி த³ஸ்ஸேதி. ஸேஸமேத்த² உத்தானமேவாதி.

6. ஸாள்ஹஸுத்தவண்ணனா

196. ச²ட்டே² த்³வயேனாதி த்³வீஹி கோட்டா²ஸேஹி. ஓக⁴ஸ்ஸ நித்த²ரணந்தி சதுரோக⁴னித்த²ரணம். தபோஜிகு³ச்சா²ஹேதூதி து³க்கரகாரிகஸங்கா²தேன தபேன பாபஜிகு³ச்ச²னஹேது. அஞ்ஞதரம் ஸாமஞ்ஞங்க³ந்தி ஏகம் ஸமணத⁴ம்மகோட்டா²ஸம். அபரிஸுத்³த⁴காயஸமாசாராதிஆதீ³ஸு புரிமேஹி தீஹி பதே³ஹி காயிகவாசஸிகசேதஸிகஸீலானம் அபரிஸுத்³த⁴தம் த³ஸ்ஸேத்வா பச்சி²மேன பதே³ன அபரிஸுத்³தா⁴ஜீவதம் த³ஸ்ஸேதி. ஞாணத³ஸ்ஸனாயாதி மக்³க³ஞாணஸங்கா²தாய த³ஸ்ஸனாய. அனுத்தராய ஸம்போ³தா⁴யாதி அரஹத்தாய, அரஹத்தஞாணப²ஸ்ஸேன பு²ஸிதும் அப⁴ப்³பா³தி வுத்தம் ஹோதி. ஸாலலட்டி²ந்தி ஸாலருக்க²ம். நவந்தி தருணம். அகுக்குச்சகஜாதந்தி ‘‘ப⁴வேய்ய நு கோ², ந ப⁴வேய்யா’’தி அஜனேதப்³ப³குக்குச்சம். லேக²ணியா லிகே²ய்யாதி அவலேக²னமத்தகேன அவலிகே²ய்ய. தோ⁴வேய்யாதி க⁴ம்ஸேய்ய. அந்தோ அவிஸுத்³தா⁴தி அப்³ப⁴ந்தரே அஸுத்³தா⁴ அபனீதஸாரா.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – ஸாலலட்டி² விய ஹி அத்தபா⁴வோ த³ட்ட²ப்³போ³, நதீ³ஸோதம் விய ஸம்ஸாரஸோதம், பாரம் க³ந்துகாமபுரிஸோ விய த்³வாஸட்டி² தி³ட்டி²யோ க³ஹேத்வா டி²தபுரிஸோ, ஸாலலட்டி²யா ப³ஹித்³தா⁴ ஸுபரிகம்மகதகாலோ விய ப³ஹித்³தா⁴ தபசரணம் கா³ள்ஹம் கத்வா க³ஹிதகாலோ, அந்தோ அஸுத்³த⁴காலோ விய அப்³ப⁴ந்தரே ஸீலானம் அபரிஸுத்³த⁴காலோ, ஸாலலட்டி²யா ஸம்ஸீதி³த்வா அதோ⁴க³மனம் விய தி³ட்டி²க³திகஸ்ஸ ஸம்ஸாரஸோதே ஸம்ஸீத³னம் வேதி³தப்³ப³ம்.

பி²யாரித்தம் ப³ந்தே⁴ய்யாதி பி²யஞ்ச அரித்தஞ்ச யோஜேய்ய. ஏவமேவாதி ஏத்தா²பி இத³ம் ஓபம்மஸம்ஸந்த³னம் – ஸாலலட்டி² விய அத்தபா⁴வோ, நதீ³ஸோதம் விய ஸம்ஸாரஸோதம், பாரம் க³ந்துகாமபுரிஸோ விய யோகா³வசரோ, ப³ஹித்³தா⁴ ஸுபரிகம்மகதகாலோ விய ச²ஸு த்³வாரேஸு ஸம்வரஸ்ஸ பச்சுபட்டி²தகாலோ, அந்தோ ஸுவிஸோதி⁴தபா⁴வோ விய அப்³ப⁴ந்தரே பரிஸுத்³த⁴ஸீலபா⁴வோ, பி²யாரித்தப³ந்த⁴னம் விய காயிகசேதஸிகவீரியகரணம், ஸோத்தி²னா பாரிமதீரக³மனம் விய அனுபுப்³பே³ன ஸீலம் பூரேத்வா ஸமாதி⁴ம் பூரேத்வா பஞ்ஞம் பூரேத்வா நிப்³பா³னக³மனம் த³ட்ட²ப்³ப³ம்.

கண்ட³சித்ரகானீதி ஸரலட்டி²ஸரரஜ்ஜுஸரபாஸாத³ஸரஸாணிஸரபோக்க²ரணிஸரபது³மானீதி அனேகானி கண்டே³ஹி கத்தப்³ப³சித்ரானி. அத² கோ² ஸோ தீஹி டா²னேஹீதி ஸோ ஏவம் ப³ஹூனி கண்ட³சித்ரகானி ஜானந்தோபி ந ராஜாரஹோ ஹோதி, தீஹியேவ பன டா²னேஹி ஹோதீதி அத்தோ². ஸம்மாஸமாதி⁴ ஹோதீதி மக்³க³ஸமாதி⁴னா ச ப²லஸமாதி⁴னா ச ஸமாஹிதோ ஹோதீதி அயமேத்த² அத்தோ². ஸம்மாதி³ட்டீ²தி மக்³க³ஸம்மாதி³ட்டி²யா ஸமன்னாக³தோ. இத³ம் து³க்க²ந்திஆதீ³ஹி சதூஹி ஸச்சேஹி சத்தாரோ மக்³கா³ தீணி ச ப²லானி கதி²தானி. அயம் பன மக்³கே³னேவ அவிராதி⁴தம் விஜ்ஜ²தி நாமாதி வேதி³தப்³போ³. ஸம்மாவிமுத்தீதி அரஹத்தப²லவிமுத்தியா ஸமன்னாக³தோ. அவிஜ்ஜாக்க²ந்த⁴ம் பதா³லேதீதி அரஹத்தமக்³கே³ன பதா³லேதி நாமாதி வுச்சதி. இமினா ஹி ஹேட்டா² அரஹத்தமக்³கே³ன அவிஜ்ஜாக்க²ந்தோ⁴ பதா³லிதோ, இத⁴ பன பதா³லிதம் உபாதா³ய பதா³லேதீதி வத்தும் வட்டதீதி.

7. மல்லிகாதே³வீஸுத்தவண்ணனா

197. ஸத்தமே மல்லிகா தே³வீதி பஸேனதி³ரஞ்ஞோ தே³வீ. யேன மிதே⁴கச்சோ மாதுகா³மோதி யேன இதே⁴கச்சா இத்தீ². து³ப்³ப³ண்ணாதி பீ³ப⁴ச்ச²வண்ணா. து³ரூபாதி து³ஸ்ஸண்டி²தா. ஸுபாபிகாதி ஸுட்டு² பாபிகா ஸுட்டு² லாமிகா. த³ஸ்ஸனாயாதி பஸ்ஸிதும். த³லித்³தா³தி த⁴னத³லித்³தா³. அப்பஸ்ஸகாதி ஸகேன த⁴னேன ரஹிதா. அப்பபோ⁴கா³தி உபபோ⁴க³பரிபோ⁴க³ப⁴ண்ட³கரஹிதா. அப்பேஸக்கா²தி அப்பபரிவாரா. அட்³டா⁴தி இஸ்ஸரா. மஹத்³த⁴னாதி வளஞ்ஜனகத⁴னேன மஹத்³த⁴னா. மஹாபோ⁴கா³தி உபபோ⁴க³பரிபோ⁴க³ப⁴ண்ட³போ⁴கே³ன மஹாபோ⁴கா³. மஹேஸக்கா²தி மஹாபரிவாரா. அபி⁴ரூபாதி உத்தமரூபா. த³ஸ்ஸனீயாதி த³ஸ்ஸனயுத்தா. பாஸாதி³காதி த³ஸ்ஸனேன பாஸாதி³கா. வண்ணபோக்க²ரதாயாதி வண்ணேன சேவ ஸரீரஸண்டா²னேன ச.

அபி⁴ஸஜ்ஜதீதி லக்³க³தி. ப்³யாபஜ்ஜதீதி பகதிம் பஜஹதி. பதித்தீ²யதீதி கோத⁴வஸேன தி²னபா⁴வம் த²த்³த⁴பா⁴வம் ஆபஜ்ஜதி. ந தா³தா ஹோதீதி ந தா³யிகா ஹோதி. ஸேய்யாவஸத²பதீ³பேய்யந்தி ஏத்த² ஸேய்யாதி மஞ்சபல்லங்காதி³ஸயனம். ஆவஸதோ²தி ஆவஸதா²கா³ரம். பதீ³பேய்யம் வுச்சதி வட்டிதேலாதி³பதீ³பூபகரணம். இஸ்ஸாமனிகாதி இஸ்ஸாய ஸம்பயுத்தசித்தா. இமினா நயேன ஸப்³ப³த்த² அத்தோ² வேதி³தப்³போ³. கோத⁴னா அஹோஸிந்தி கோத⁴மனா அஹோஸிம். அனிஸ்ஸாமனிகா அஹோஸிந்தி இஸ்ஸாவிரஹிதசித்தா அஹோஸிம். ஸேஸமேத்த² உத்தானத்த²மேவாதி.

8. அத்தந்தபஸுத்தவண்ணனா

198. அட்ட²மே அத்தந்தபாதீ³ஸு அத்தானம் தபதி து³க்கா²பேதீதி அத்தந்தபோ. அத்தனோ பரிதாபனானுயோக³ம் அத்தபரிதாபனானுயோக³ம். பரம் தபதீதி பரந்தபோ. பரேஸம் பரிதாபனானுயோக³ம் பரபரிதாபனானுயோக³ம். தி³ட்டே²வ த⁴ம்மேதி இமஸ்மிம்யேவ அத்தபா⁴வே. நிச்சா²தோதி சா²தம் வுச்சதி தண்ஹா, ஸா அஸ்ஸ நத்தீ²தி நிச்சா²தோ. ஸப்³ப³கிலேஸானம் நிப்³பு³தத்தா நிப்³பு³தோ. அந்தோ தாபனகிலேஸானம் அபா⁴வா ஸீதலோ ஜாதோதி ஸீதீபூ⁴தோ. ஜா²னமக்³க³ப²லனிப்³பா³னஸுகா²னி படிஸம்வேதே³தீதி ஸுக²ப்படிஸம்வேதீ³. ப்³ரஹ்மபூ⁴தேன அத்தனாதி ஸேட்ட²பூ⁴தேன அத்தனா.

அசேலகோதிஆதீ³னி வுத்தத்தா²னேவ. ஓரப்³பி⁴காதீ³ஸு உரப்³பா⁴ வுச்சந்தி ஏளகா, உரப்³பே⁴ ஹனதீதி ஓரப்³பி⁴கோ. ஸூகரிகாதீ³ஸுபி ஏஸேவ நயோ. லுத்³தோ³தி தா³ருணோ கக்க²ளோ. மச்ச²கா⁴தகோதி மச்ச²ப³ந்தோ⁴ கேவட்டோ. ப³ந்த⁴னாகா³ரிகோதி ப³ந்த⁴னாகா³ரகோ³பகோ. குரூரகம்மந்தாதி தா³ருணகம்மந்தா.

முத்³தா⁴வஸித்தோதி க²த்தியாபி⁴ஸேகேன முத்³த⁴னி அபி⁴ஸித்தோ. புரத்தி²மேன நக³ரஸ்ஸாதி நக³ரதோ புரத்தி²மாய தி³ஸாய. ஸந்தா²கா³ரந்தி யஞ்ஞஸாலம். க²ராஜினம் நிவாஸேத்வாதி ஸகு²ரம் அஜினசம்மம் நிவாஸேத்வா. ஸப்பிதேலேனாதி ஸப்பினா சேவ தேலேன ச. ட²பேத்வா ஹி ஸப்பிம் அவஸேஸோ யோ கோசி ஸ்னேஹோ தேலந்தி வுச்சதி. கண்டு³வமானோதி நகா²னம் சி²ன்னத்தா கண்டு³விதப்³ப³காலே தேன கண்டு³வமானோ. அனந்தரஹிதாயாதி அஸந்த²தாய. ஸரூபவச்சா²யாதி ஸதி³ஸவச்சா²ய. ஸசே கா³வீ ஸேதா ஹோதி, வச்சோ²பி ஸேதகோவ. ஸசே கபிலா வா ரத்தா வா, வச்ச²கோபி தாதி³ஸோவாதி ஏவம் ஸரூபவச்சா²ய. ஸோ ஏவமாஹாதி ஸோ ராஜா ஏவம் வதே³தி. வச்ச²தராதி தருணவச்ச²கபா⁴வம் அதிக்கந்தா ப³லவவச்சா². வச்ச²தரீஸுபி ஏஸேவ நயோ. ப³ரிஹிஸத்தா²யாதி பரிக்கே²பகரணத்தா²ய சேவ யஞ்ஞபூ⁴மியம் அத்த²ரணத்தா²ய ச.

சதுத்த²புக்³க³லம் பு³த்³து⁴ப்பாத³தோ பட்டா²ய த³ஸ்ஸேதும் இத⁴, பி⁴க்க²வே, ததா²க³தோதிஆதி³மாஹ. தத்த² ததா²க³தோதிஆதீ³னி வுத்தத்தா²னேவ. தம் த⁴ம்மந்தி தம் வுத்தப்பகாரஸம்பத³ம் த⁴ம்மம். ஸுணாதி, க³ஹபதி, வாதி கஸ்மா பட²மம் க³ஹபதிம் நித்³தி³ஸதி? நிஹதமானத்தா உஸ்ஸன்னத்தா ச. யேபு⁴ய்யேன ஹி க²த்தியகுலதோ பப்³ப³ஜிதா ஜாதிம் நிஸ்ஸாய மானம் கரோந்தி. ப்³ராஹ்மணகுலா பப்³ப³ஜிதா மந்தே நிஸ்ஸாய மானம் கரோந்தி, ஹீனஜச்சகுலா பப்³ப³ஜிதா அத்தனோ விஜாதிதாய பதிட்டா²தும் ந ஸக்கோந்தி. க³ஹபதிதா³ரகா பன கச்சே²ஹி ஸேத³ம் முஞ்சந்தேஹி பிட்டி²யா லோணம் புப்ப²மானாய பூ⁴மிம் கஸித்வா தாதி³ஸஸ்ஸ மானஸ்ஸ அபா⁴வதோ நிஹதமானத³ப்பா ஹோந்தி. தே பப்³ப³ஜித்வா மானம் வா த³ப்பம் வா அகத்வா யதா²ப³லம் பு³த்³த⁴வசனம் உக்³க³ஹேத்வா விபஸ்ஸனாய கம்மம் கரோந்தா ஸக்கோந்தி அரஹத்தே பதிட்டா²தும். இதரேஹி ச குலேஹி நிக்க²மித்வா பப்³ப³ஜிதா ந ப³ஹுகா, க³ஹபதிகாவ ப³ஹுகா. இதி நிஹதமானத்தா உஸ்ஸன்னத்தா ச பட²மம் க³ஹபதிம் நித்³தி³ஸதீதி.

அஞ்ஞதரஸ்மிம் வாதி இதரேஸம் வா குலானம் அஞ்ஞதரஸ்மிம். பச்சாஜாதோதி பதிஜாதோ. ததா²க³தே ஸத்³த⁴ம் படிலப⁴தீதி பரிஸுத்³த⁴ம் த⁴ம்மம் ஸுத்வா த⁴ம்மஸாமிம்ஹி ததா²க³தே ‘‘ஸம்மாஸம்பு³த்³தோ⁴ வத ப⁴க³வா’’தி ஸத்³த⁴ம் படிலப⁴தி. இதி படிஸஞ்சிக்க²தீதி ஏவம் பச்சவேக்க²தி. ஸம்பா³தோ⁴ க⁴ராவாஸோதி ஸசேபி ஸட்டி²ஹத்தே² க⁴ரே யோஜனஸதந்தரேபி வா த்³வே ஜாயம்பதிகா வஸந்தி, ததா²பி நேஸம் ஸகிஞ்சனஸபலிபோ³த⁴ட்டே²ன க⁴ராவாஸோ ஸம்பா³தோ⁴வ. ரஜாபதோ²தி ராக³ரஜாதீ³னம் உட்டா²னட்டா²னந்தி மஹாஅட்ட²கதா²யம் வுத்தம். ஆக³மனபதோ²திபி வட்டதி. அலக்³க³னட்டே²ன அப்³போ⁴காஸோ வியாதி அப்³போ⁴காஸோ. பப்³ப³ஜிதோ ஹி கூடாகா³ரரதனபாஸாத³தே³வவிமானாதீ³ஸு பிஹிதத்³வாரவாதபானேஸு படிச்ச²ன்னேஸு வஸந்தோபி நேவ லக்³க³தி ந ஸஜ்ஜதி ந ப³ஜ்ஜ²தி. தேன வுத்தம் – ‘‘அப்³போ⁴காஸோ பப்³ப³ஜ்ஜா’’தி. அபிச ஸம்பா³தோ⁴ க⁴ராவாஸோ குஸலகிரியாய யதா²ஸுக²ம் ஓகாஸாபா⁴வதோ, ரஜாபதோ² அஸம்வுதஸங்காரட்டா²னம் விய ரஜானம், கிலேஸரஜானம் ஸன்னிபாதட்டா²னதோ. அப்³போ⁴காஸோ பப்³ப³ஜ்ஜா குஸலகிரியாய யதா²ஸுக²ம் ஓகாஸஸப்³பா⁴வதோ.

நயித³ம் ஸுகரம்…பே… பப்³ப³ஜேய்யந்தி ஏத்த² அயம் ஸங்கே²பகதா² – யதே³தம் ஸிக்க²த்தயப்³ரஹ்மசரியம் ஏகம்பி தி³வஸம் அக²ண்ட³ம் கத்வா சரிமகசித்தம் பாபேதப்³ப³தாய ஏகந்தபரிபுண்ணம், ஏகதி³வஸம்பி ச கிலேஸமலேன அமலினம் கத்வா சரிமகசித்தம் பாபேதப்³ப³தாய ஏகந்தபரிஸுத்³த⁴ம், ஸங்க²லிகி²தம் லிகி²தஸங்க²ஸதி³ஸம் தோ⁴தஸங்க²ஸப்படிபா⁴க³ம் சரிதப்³ப³ம். இத³ம் ந ஸுகரம் அகா³ரம் அஜ்ஜா²வஸதா அகா³ரமஜ்ஜே² வஸந்தேன ஏகந்தபரிபுண்ணம்…பே… சரிதும். யம்னூனாஹம் கேஸே ச மஸ்ஸுஞ்ச ஓஹாரேத்வா கஸாயரஸபீததாய காஸாயானி ப்³ரஹ்மசரியம் சரந்தானம் அனுச்ச²விகானி வத்தா²னி அச்சா²தே³த்வா பரித³ஹித்வா அகா³ரஸ்மா நிக்க²மித்வா அனகா³ரியம் பப்³ப³ஜேய்யந்தி. ஏத்த² ச யஸ்மா அகா³ரஸ்ஸ ஹிதம் கஸிவணிஜ்ஜாதி³கம்மம் அகா³ரியந்தி வுச்சதி, தஞ்ச பப்³ப³ஜ்ஜாய நத்தி², தஸ்மா பப்³ப³ஜ்ஜா அனகா³ரியாதி ஞாதப்³பா³, தம் அனகா³ரியம். பப்³ப³ஜேய்யந்தி படிபஜ்ஜேய்யம்.

அப்பம் வாதி ஸஹஸ்ஸதோ ஹேட்டா² போ⁴க³க்க²ந்தோ⁴ அப்போ நாம ஹோதி, ஸஹஸ்ஸதோ பட்டா²ய மஹா. ஆப³ந்த⁴னட்டே²ன ஞாதியேவ ஞாதிபரிவட்டோ. ஸோ வீஸதியா ஹேட்டா² அப்போ நாம ஹோதி, வீஸதியா பட்டா²ய மஹா. பி⁴க்கூ²னம் ஸிக்கா²ஸாஜீவஸமாபன்னோதி யா பி⁴க்கூ²னம் அதி⁴ஸீலஸங்கா²தா ஸிக்கா², தஞ்ச, யத்த² சேதே ஸஹ ஜீவந்தி, ஏகஜீவிகா ஸபா⁴க³வுத்தினோ ஹோந்தி, தம் ப⁴க³வதா பஞ்ஞத்தஸிக்கா²பத³ஸங்கா²தம் ஸாஜீவஞ்ச தத்த² ஸிக்க²னபா⁴வேன ஸமாபன்னோதி பி⁴க்கூ²னம் ஸிக்கா²ஸாஜீவஸமாபன்னோ. ஸமாபன்னோதி ஸிக்க²ம் பரிபூரேந்தோ ஸாஜீவஞ்ச அவீதிக்கமந்தோ ஹுத்வா தது³ப⁴யம் உபக³தோதி அத்தோ².

பாணாதிபாதம் பஹாயாதிஆதீ³னி வுத்தத்தா²னேவ. இமேஸம் பே⁴தா³யாதி யேஸம் இதோதி வுத்தானம் ஸந்திகே ஸுதம், தேஸம் பே⁴தா³ய. பி⁴ன்னானம் வா ஸந்தா⁴தாதி த்³வின்னம் மித்தானம் வா ஸமானுபஜ்ஜா²யகாதீ³னம் வா கேனசிதே³வ காரணேன பி⁴ன்னானம் ஏகமேகம் உபஸங்கமித்வா ‘‘தும்ஹாகம் ஈதி³ஸே குலே ஜாதானம் ஏவம் ப³ஹுஸ்ஸுதானம் இத³ம் ந யுத்த’’ந்திஆதீ³னி வத்வா ஸந்தா⁴னம் கத்தா. அனுப்பதா³தாதி ஸந்தா⁴னானுப்பதா³தா, த்³வே ஜனே ஸமக்³கே³ தி³ஸ்வா ‘‘தும்ஹாகம் ஏவரூபே குலே ஜாதானம் ஏவரூபேஹி கு³ணேஹி ஸமன்னாக³தானம் அனுச்ச²விகமேத’’ந்திஆதீ³னி வத்வா த³ள்ஹீகம்மம் கத்தாதி அத்தோ². ஸமக்³கோ³ ஆராமோ அஸ்ஸாதி ஸமக்³கா³ராமோ. யத்த² ஸமக்³கா³ நத்தி², தத்த² வஸிதும்பி ந இச்ச²தீதி அத்தோ². ஸமக்³க³ராமோதிபி பாளி, அயமேவ அத்தோ². ஸமக்³க³ரதோதி ஸமக்³கே³ஸு ரதோ, தே பஹாய அஞ்ஞத்த² க³ந்தும் ந இச்ச²தீதி அத்தோ². ஸமக்³கே³ தி³ஸ்வாபி ஸுத்வாபி நந்த³தீதி ஸமக்³க³னந்தீ³. ஸமக்³க³கரணிம் வாசம் பா⁴ஸிதாதி யா வாசா ஸத்தே ஸமக்³கே³யேவ கரோதி, தம் ஸாமக்³கி³கு³ணபரிதீ³பிகமேவ வாசம் பா⁴ஸதி, ந இதரந்தி.

நேலாதி ஏலம் வுச்சதி தோ³ஸோ, நாஸ்ஸா ஏலந்தி நேலா, நித்³தோ³ஸாதி அத்தோ² ‘‘நேலங்கோ³ ஸேதபச்சா²தோ³’’தி (உதா³. 65) ஏத்த² வுத்தனேலம் விய. கண்ணஸுகா²தி ப்³யஞ்ஜனமது⁴ரதாய கண்ணானம் ஸுகா², ஸூசிவிஜ்ஜ²னம் விய கண்ணஸூலம் ந ஜனேதி. அத்த²மது⁴ரதாய ஸகலஸரீரே கோபம் அஜனேத்வா பேமம் ஜனேதீதி பேமனீயா. ஹத³யம் க³ச்ச²தி அப்படிஹஞ்ஞமானா ஸுகே²ன சித்தம் பவிஸதீதி ஹத³யங்க³மா. கு³ணபரிபுண்ணதாய புரே ப⁴வாதி போரீ. புரே ஸம்வட்³ட⁴னாரீ விய ஸுகுமாராதிபி போரீ. புரஸ்ஸ ஏஸாதிபி போரீ, நக³ரவாஸீனம் கதா²தி அத்தோ². நக³ரவாஸினோ ஹி யுத்தகதா² ஹோந்தி, பிதிமத்தம் பிதாதி, பா⁴திமத்தம் பா⁴தாதி வத³ந்தி. ஏவரூபீ கதா² ப³ஹுனோ ஜனஸ்ஸ கந்தா ஹோதீதி ப³ஹுஜனகந்தா. கந்தபா⁴வேனேவ ப³ஹுஜனஸ்ஸ மனாபா சித்தவுட்³டி⁴கராதி ப³ஹுஜனமனாபா.

காலே வத³தீதி காலவாதீ³, வத்தப்³ப³யுத்தகாலம் ஸல்லக்கே²த்வா வத³தீதி அத்தோ². பூ⁴தம் தச்ச²ம் ஸபா⁴வமேவ வத³தீதி பூ⁴தவாதீ³. தி³ட்ட²த⁴ம்மிகஸம்பராயிகஅத்த²ஸன்னிஸ்ஸிதமேவ கத்வா வத³தீதி அத்த²வாதீ³. நவலோகுத்தரத⁴ம்மஸன்னிஸ்ஸிதம் கத்வா வத³தீதி த⁴ம்மவாதீ³. ஸம்வரவினயபஹானவினயஸன்னிஸ்ஸிதம் கத்வா வத³தீதி வினயவாதீ³. நிதா⁴னம் வுச்சதி ட²பனோகாஸோ, நிதா⁴னமஸ்ஸா அத்தீ²தி நிதா⁴னவதீ. ஹத³யே நிதே⁴தப்³ப³யுத்தகம் வாசம் பா⁴ஸிதாதி அத்தோ². காலேனாதி ஏவரூபிம் பா⁴ஸமானோபி ச ‘‘அஹம் நிதா⁴னவதிம் வாசம் பா⁴ஸிஸ்ஸாமீ’’தி ந அகாலேன பா⁴ஸதி, யுத்தகாலம் பன அவேக்கி²த்வாவ பா⁴ஸதீதி அத்தோ². ஸாபதே³ஸந்தி ஸஉபமம், ஸகாரணந்தி அத்தோ². பரியந்தவதிந்தி பரிச்சே²த³ம் த³ஸ்ஸேத்வா, யதா²ஸ்ஸா பரிச்சே²தோ³ பஞ்ஞாயதி, ஏவம் பா⁴ஸதீதி அத்தோ². அத்த²ஸம்ஹிதந்தி அனேகேஹிபி நயேஹி விப⁴ஜந்தேன பரியாதா³தும் அஸக்குணேய்யதாய அத்த²ஸம்பன்னம் பா⁴ஸதி. யம் வா ஸோ அத்த²வாதீ³ அத்த²ம் வத³தி, தேன அத்தே²ன ஸம்ஹிதத்தா அத்த²ஸம்ஹிதம் வாசம் பா⁴ஸதி, ந அஞ்ஞம் நிக்கி²பித்வா அஞ்ஞம் பா⁴ஸதீதி வுத்தம் ஹோதி.

பீ³ஜகா³மபூ⁴தகா³மஸமாரம்பா⁴தி மூலபீ³ஜம் க²ந்த⁴பீ³ஜம் ப²ளுபீ³ஜம் அக்³க³பீ³ஜம் பீ³ஜபீ³ஜந்தி பஞ்சவித⁴ஸ்ஸ பீ³ஜகா³மஸ்ஸ சேவ யஸ்ஸ கஸ்ஸசி நீலதிணருக்கா²தி³கஸ்ஸ பூ⁴தகா³மஸ்ஸ ச ஸமாரம்பா⁴, சே²த³னபே⁴த³னபசனாதி³பா⁴வேன விகோபனா படிவிரதோதி அத்தோ².

ஏகப⁴த்திகோதி பாதராஸப⁴த்தம் ஸாயமாஸப⁴த்தந்தி த்³வே ப⁴த்தானி. தேஸு பாதராஸப⁴த்தம் அந்தோமஜ்ஜ²ன்ஹிகேன பரிச்சி²ன்னம், இதரம் மஜ்ஜ²ன்ஹிகதோ உத்³த⁴ம் அந்தோஅருணேன. தஸ்மா அந்தோமஜ்ஜ²ன்ஹிகே த³ஸக்க²த்தும் பு⁴ஞ்ஜமானோபி ஏகப⁴த்திகோவ ஹோதி. தம் ஸந்தா⁴ய வுத்தம் ‘‘ஏகப⁴த்திகோ’’தி. ரத்தியா போ⁴ஜனம் ரத்தி, ததோ உபரதோதி ரத்தூபரதோ. அதிக்கந்தே மஜ்ஜ²ன்ஹிகே யாவ ஸூரியத்த²ங்க³மனா போ⁴ஜனம் விகாலபோ⁴ஜனம் நாம, ததோ விரதத்தா விரதோ விகாலபோ⁴ஜனா.

ஜாதரூபந்தி ஸுவண்ணம். ரஜதந்தி கஹாபணோ லோஹமாஸகோ ஜதுமாஸகோ தா³ருமாஸகோதி யே வோஹாரம் க³ச்ச²ந்தி. தஸ்ஸ உப⁴யஸ்ஸாபி படிக்³க³ஹணா படிவிரதோ, நேவ தம் உக்³க³ண்ஹாதி, ந உக்³க³ண்ஹாபேதி, ந உபனிக்கி²த்தம் ஸாதி³யதீதி அத்தோ².

ஆமகத⁴ஞ்ஞபடிக்³க³ஹணாதி ஸாலிவீஹியவகோ³தூ⁴மகங்கு³வரககுத்³ரூஸகஸங்கா²தஸ்ஸ ஸத்தவித⁴ஸ்ஸபி ஆமகத⁴ஞ்ஞஸ்ஸ படிக்³க³ஹணா. ந கேவலஞ்ச ஏதேஸம் படிக்³க³ஹணமேவ, ஆமஸனம்பி பி⁴க்கூ²னம் ந வட்டதியேவ. ஆமகமம்ஸபடிக்³க³ஹணாதி ஏத்த² அஞ்ஞத்ர ஓதி³ஸ்ஸ அனுஞ்ஞாதா ஆமகமம்ஸமச்சா²னம் படிக்³க³ஹணமேவ பி⁴க்கூ²னம் ந வட்டதி, நோ ஆமஸனந்தி.

இத்தி²குமாரிகபடிக்³க³ஹணாதி ஏத்த² இத்தீ²தி புரிஸந்தரக³தா, இதரா குமாரிகா நாம, தாஸம் படிக்³க³ஹணம்பி ஆமஸனம்பி அகப்பியமேவ. தா³ஸிதா³ஸபடிக்³க³ஹணாதி ஏத்த² தா³ஸிதா³ஸவஸேனேவ தேஸம் படிக்³க³ஹணம் ந வட்டதி, ‘‘கப்பியகாரகம் த³ம்மி, ஆராமிகம் த³ம்மீ’’தி ஏவம் வுத்தே பன வட்டதி. அஜேளகாதீ³ஸுபி கே²த்தவத்து²பரியோஸானேஸு கப்பியாகப்பியனயோ வினயவஸேன உபபரிக்கி²தப்³போ³. தத்த² கே²த்தம் நாம யஸ்மிம் புப்³ப³ண்ணம் ருஹதி. வத்து² நாம யஸ்மிம் அபரண்ணம் ருஹதி. யத்த² வா உப⁴யம்பி ருஹதி, தம் கே²த்தம். தத³த்தா²ய அகதபூ⁴மிபா⁴கோ³ வத்து². கே²த்தவத்து²ஸீஸேன சேத்த² வாபி-தளாகாதீ³னிபி ஸங்க³ஹிதானேவ.

தூ³தேய்யம் வுச்சதி தூ³தகம்மம் கி³ஹீனம் பண்ணம் வா ஸாஸனம் வா க³ஹேத்வா தத்த² தத்த² க³மனம். பஹிணக³மனம் வுச்சதி க⁴ரா க⁴ரம் பேஸிதஸ்ஸ கு²த்³த³கக³மனம். அனுயோகோ³ நாம தது³ப⁴யகரணம். தஸ்மா து³தேய்யபஹிணக³மனானம் அனுயோகோ³தி ஏவமேத்த² அத்தோ² வேதி³தப்³போ³. கயவிக்கயாதி கயா ச விக்கயா ச. துலாகூடாதீ³ஸு கூடந்தி வஞ்சனம். தத்த² துலாகூடம் தாவ ரூபகூடம், அங்க³கூடம், க³ஹணகூடம், படிச்ச²ன்னகூடந்தி சதுப்³பி³த⁴ம் ஹோதி. தத்த² ரூபகூடம் நாம த்³வே துலா ஸமரூபா கத்வா க³ண்ஹந்தோ மஹதியா க³ண்ஹாதி, த³த³ந்தோ கு²த்³தி³காய தே³தி. அங்க³கூடம் நாம க³ண்ஹந்தோ பச்சா²பா⁴கே³ ஹத்தே²ன துலம் அக்கமதி, த³த³ந்தோ புப்³ப³பா⁴கே³. க³ஹணகூடம் நாம க³ண்ஹந்தோ மூலே ரஜ்ஜும் க³ண்ஹாதி, த³த³ந்தோ அக்³கே³. படிச்ச²ன்னகூடம் நாம துலம் ஸுஸிரம் கத்வா அந்தோ அயசுண்ணம் பக்கி²பித்வா க³ண்ஹந்தோ தம் பச்சா²பா⁴கே³ கரோதி, த³த³ந்தோ அக்³க³பா⁴கே³.

கம்ஸோ வுச்சதி ஸுவண்ணபாதி, தாய வஞ்சனம் கம்ஸகூடம். கத²ம்? ஏகம் ஸுவண்ணபாதிம் கத்வா அஞ்ஞா த்³வே திஸ்ஸோ லோஹபாதியோ ஸுவண்ணவண்ணா கரோதி. ததோ ஜனபத³ம் க³ந்த்வா கிஞ்சிதே³வ அட்³ட⁴குலம் பவிஸித்வா ‘‘ஸுவண்ணபா⁴ஜனானி கிணதா²’’தி வத்வா அக்³கே⁴ புச்சி²தே ஸமக்³க⁴தரம் தா³துகாமா ஹோந்தி. ததோ தேஹி ‘‘கத²ம் இமேஸம் ஸுவண்ணபா⁴வோ ஜானிதப்³போ³’’தி வுத்தே ‘‘வீமம்ஸித்வா க³ண்ஹதா²’’தி ஸுவண்ணபாதிம் பாஸாணே க⁴ம்ஸித்வா ஸப்³ப³பாதியோ த³த்வா க³ச்ச²தி.

மானகூடம் நாம ஹத³யபே⁴த³-ஸிகா²பே⁴த³-ரஜ்ஜுபே⁴த³வஸேன திவித⁴ம் ஹோதி. தத்த² ஹத³யபே⁴தோ³ ஸப்பிதேலாதி³மினனகாலே லப்³ப⁴தி. தானி ஹி க³ண்ஹந்தோ ஹேட்டா²சி²த்³தே³ன மானேன ‘‘ஸணிகம் ஆஸிஞ்சா’’தி வத்வா அத்தனோ பா⁴ஜனே ப³ஹும் பக்³க⁴ராபேத்வா க³ண்ஹாதி, த³த³ந்தோ சி²த்³த³ம் பிதா⁴ய ஸீக⁴ம் பூரேத்வா தே³தி. ஸிகா²பே⁴தோ³ திலதண்டு³லாதி³மினனகாலே லப்³ப⁴தி. தானி ஹி க³ண்ஹந்தோ ஸணிகம் ஸிக²ம் உஸ்ஸாபேத்வா க³ண்ஹாதி, த³த³ந்தோ வேகே³ன பூரேத்வா ஸிக²ம் சி²ந்த³ந்தோ தே³தி. ரஜ்ஜுபே⁴தோ³ கே²த்தவத்து²மினனகாலே லப்³ப⁴தி. லஞ்ஜம் அலப⁴ந்தா ஹி கே²த்தம் அமஹந்தம்பி மஹந்தம் கத்வா மினந்தி.

உக்கோடனாதீ³ஸு உக்கோடனந்தி ஸாமிகே அஸ்ஸாமிகே காதும் லஞ்ஜக்³க³ஹணம். வஞ்சனந்தி தேஹி தேஹி உபாயேஹி பரேஸம் வஞ்சனம். தத்ரித³மேகம் வத்து² – ஏகோ கிர லுத்³த³கோ மிக³ஞ்ச மிக³போதகஞ்ச க³ஹேத்வா ஆக³ச்ச²தி. தமேகோ து⁴த்தோ ‘‘கிம் போ⁴ மிகோ³ அக்³க⁴தி, கிம் மிக³போதகோ’’தி ஆஹ. ‘‘மிகோ³ த்³வே கஹாபணே, மிக³போதகோ ஏக’’ந்தி ச வுத்தே ஏகம் கஹாபணம் த³த்வா மிக³போதகம் க³ஹேத்வா தோ²கம் க³ந்த்வா நிவத்தோ ‘‘ந மே போ⁴ மிக³போதகேனத்தோ², மிக³ம் மே தே³ஹீ’’தி ஆஹ. தேன ஹி த்³வே கஹாபணே தே³ஹீதி. ஸோ ஆஹ – ‘‘நனு தே போ⁴ மயா பட²மம் ஏகோ கஹாபணோ தி³ன்னோ’’தி? ஆம தி³ன்னோதி. இமம்பி மிக³போதகம் க³ண்ஹ, ஏவம் ஸோ ச கஹாபணோ அயஞ்ச கஹாபணக்³க⁴னகோ மிக³போதகோ’’தி த்³வே கஹாபணா ப⁴விஸ்ஸந்தீதி. ஸோ ‘‘காரணம் வத³தீ’’தி ஸல்லக்கே²த்வா மிக³போதகம் க³ஹேத்வா மிக³ம் அதா³ஸீதி. நிகதீதி யோக³வஸேன வா மாயாவஸேன வா அபாமங்க³ம் பாமங்க³ந்தி, அமணிம் மணிந்தி, அஸுவண்ணம் ஸுவண்ணந்தி கத்வா பதிரூபகேன வஞ்சனம். ஸாசியோகோ³தி குடிலயோகோ³. ஏதேஸம்யேவ உக்கோடனாதீ³னமேதம் நாமம். தஸ்மா உக்கோடனஸாசியோகோ³ வஞ்சனஸாசியோகோ³ நிகதிஸாசியோகோ³தி ஏவமேத்த² அத்தோ² த³ட்ட²ப்³போ³. கேசி அஞ்ஞம் த³ஸ்ஸேத்வா அஞ்ஞஸ்ஸ பரிவத்தனம் ஸாசியோகோ³தி வத³ந்தி, தம் பன வஞ்சனேனேவ ஸங்க³ஹிதம்.

சே²த³னாதீ³ஸு சே²த³னந்தி ஹத்த²ச்சே²த³னாதி³. வதோ⁴தி மாரணம். ப³ந்தோ⁴தி ரஜ்ஜுப³ந்த⁴னாதீ³ஹி ப³ந்த⁴னம். விபராமோஸோதி ஹிமவிபராமோஸோ, கு³ம்ப³விபராமோஸோதி து³விதோ⁴. யம் ஹிமபாதஸமயே ஹிமேன படிச்ச²ன்னா ஹுத்வா மக்³க³ப்படிபன்னம் ஜனம் முஸந்தி, அயம் ஹிமவிபராமோஸோ. யம் கு³ம்பா³தீ³ஹி படிச்ச²ன்னா முஸந்தி, அயம் கு³ம்ப³விபராமோஸோ. ஆலோபோ வுச்சதி கா³மனிக³மாதீ³னம் விலோபகரணம். ஸஹஸாகாரோதி ஸாஹஸிககிரியா, கே³ஹம் பவிஸித்வா மனுஸ்ஸானம் உரே ஸத்த²ம் ட²பேத்வா இச்சி²தப⁴ண்ட³க்³க³ஹணம். ஏவமேதஸ்மா சே²த³ன…பே… ஸஹஸாகாரா படிவிரதோ ஹோதி.

ஸோ ஸந்துட்டோ² ஹோதீதி ஸ்வாயம் பி⁴க்கு² ஹேட்டா² வுத்தேன சதூஸு பச்சயேஸு த்³வாத³ஸவிதே⁴ன இதரீதரபச்சயஸந்தோஸேன ஸமன்னாக³தோ ஹோதி. இமினா பன த்³வாத³ஸவிதே⁴ன இதரீதரபச்சயஸந்தோஸேன ஸமன்னாக³தஸ்ஸ பி⁴க்கு²னோ அட்ட² பரிக்கா²ரா வட்டந்தி – தீணி சீவரானி, பத்தோ, த³ந்தகட்ட²ச்சே²த³னவாஸி, ஏகா ஸூசி, காயப³ந்த⁴னம் பரிஸ்ஸாவனந்தி. வுத்தம்பி சேதம் –

‘‘திசீவரஞ்ச பத்தோ ச, வாஸி ஸூசி ச ப³ந்த⁴னம்;

பரிஸ்ஸாவனேன அட்டே²தே, யுத்தயோக³ஸ்ஸ பி⁴க்கு²னோ’’தி.

தே ஸப்³பே³ காயபரிஹாரிகாபி ஹோந்தி, குச்சி²பரிஹாரிகாபி. கத²ம்? திசீவரம் தாவ நிவாஸேத்வா பாருபித்வா ச விசரணகாலே காயம் பரிஹரதி போஸேதீதி காயபரிஹாரிகம் ஹோதி. சீவரகண்ணேன உத³கம் பரிஸ்ஸாவேத்வா பிவனகாலே, கா²தி³தப்³ப³ப²லாப²லம் க³ஹணகாலே ச குச்சி²ம் பரிஹரதி போஸேதீதி குச்சி²பரிஹாரிகம் ஹோதி. பத்தோபி தேன உத³கம் உத்³த⁴ரித்வா ந்ஹானகாலே குடிபரிப⁴ண்ட³கரணகாலே ச காயபரிஹாரிகோ ஹோதி, ஆஹாரம் க³ஹேத்வா பு⁴ஞ்ஜனகாலே குச்சி²பரிஹாரிகோ. வாஸிபி தாய த³ந்தகட்ட²ச்சே²த³னகாலே மஞ்சபீடா²னம் அங்க³பாத³சீவரகுடித³ண்ட³கஸஜ்ஜனகாலே ச காயபரிஹாரிகா ஹோதி, உச்சு²ச்சே²த³னனாளிகேராதி³தச்ச²னகாலே குச்சி²பரிஹாரிகா. ஸூசிபி சீவரஸிப்³ப³னகாலே காயபரிஹாரிகா ஹோதி, பூவம் வா ப²லம் வா விஜ்ஜி²த்வா கா²த³னகாலே குச்சி²பரிஹாரிகா. காயப³ந்த⁴னம் ப³ந்தி⁴த்வா விசரணகாலே காயபரிஹாரிகம், உச்சு²ஆதீ³னி ப³ந்தி⁴த்வா க³ஹணகாலே குச்சி²பரிஹாரிகம். பரிஸ்ஸாவனம் தேன உத³கம் பரிஸ்ஸாவேத்வா ந்ஹானகாலே ஸேனாஸனபரிப⁴ண்ட³கரணகாலே ச காயபரிஹாரிகம், பானீயபானகபரிஸ்ஸாவனகாலே தேனேவ திலதண்டு³லபுது²காதீ³னி க³ஹேத்வா கா²த³னகாலே ச குச்சி²பரிஹாரிகம். அயம் தாவ அட்ட²பரிக்கா²ரிகஸ்ஸ பரிக்கா²ரமத்தா.

நவபரிக்கா²ரிகஸ்ஸ பன ஸேய்யம் பவிஸந்தஸ்ஸ தத்ரட்ட²கபச்சத்த²ரணம் வா குஞ்சிகா வா வட்டதி. த³ஸபரிக்கா²ரிகஸ்ஸ நிஸீத³னம் வா சம்மக²ண்ட³ம் வா வட்டதி. ஏகாத³ஸபரிக்கா²ரிகஸ்ஸ கத்தரயட்டி² வா தேலனாளிகா வா வட்டதி. த்³வாத³ஸபரிக்கா²ரிகஸ்ஸ ச²த்தம் வா உபாஹனம் வா வட்டதி. ஏதேஸு ச அட்ட²பரிக்கா²ரிகோவ ஸந்துட்டோ², இதரே அஸந்துட்டா² மஹிச்சா² மஹாபா⁴ராதி ந வத்தப்³பா³. ஏதேபி அப்பிச்சா²வ ஸந்துட்டா²வ ஸுப⁴ராவ ஸல்லஹுகவுத்தினோவ. ப⁴க³வா பன ந இமம் ஸுத்தம் தேஸம் வஸேன கதே²ஸி, அட்ட²பரிக்கா²ரிகஸ்ஸ வஸேன கதே²ஸி. ஸோ ஹி கு²த்³த³கவாஸிஞ்ச ஸூசிஞ்ச பரிஸ்ஸாவனே பக்கி²பித்வா பத்தஸ்ஸ அந்தோ ட²பேத்வா பத்தம் அம்ஸகூடே லக்³கே³த்வா திசீவரம் காயப்படிப³த்³த⁴ம் கத்வா யேனிச்ச²கம் ஸுக²ம் பக்கமதி, படினிவத்தித்வா க³ஹேதப்³ப³ம் நாமஸ்ஸ ந ஹோதி. இதி இமஸ்ஸ பி⁴க்கு²னோ ஸல்லஹுகவுத்திதம் த³ஸ்ஸேந்தோ ப⁴க³வா ஸந்துட்டோ² ஹோதி காயபரிஹாரிகேன சீவரேனாதிஆதி³மாஹ.

தத்த² காயபரிஹாரிகேனாதி காயபரிஹரணமத்தகேன. குச்சி²பரிஹாரிகேனாதி குச்சி²பரிஹரணமத்தகேன. ஸமாதா³யேவ பக்கமதீதி தம் அட்ட²பரிக்கா²ரமத்தகம் ஸப்³ப³ம் க³ஹேத்வாவ காயப்படிப³த்³த⁴ம் கத்வாவ க³ச்ச²தி, ‘‘மம விஹாரோ பரிவேணம் உபட்டா²கோ’’திஸ்ஸ ஸங்கோ³ வா ப³ந்தோ⁴ வா ந ஹோதி. ஸோ ஜியா முத்தோ ஸரோ விய, யூதா² அபக்கந்தோ மத்தஹத்தீ² விய இச்சி²திச்சி²தம் ஸேனாஸனம், வனஸண்ட³ம், ருக்க²மூலம், நவம் பப்³பா⁴ரம் பரிபு⁴ஞ்ஜந்தோ ஏகோ திட்ட²தி, ஏகோ நிஸீத³தி, ஸப்³பி³ரியாபதே²ஸு ஏகோ அது³தியோ.

‘‘சாதுத்³தி³ஸோ அப்படிகோ⁴ ச ஹோதி,

ஸந்துஸ்ஸமானோ இதரீதரேன;

பரிஸ்ஸயானம் ஸஹிதா அச²ம்பீ⁴,

ஏகோ சரே க²க்³க³விஸாணகப்போ’’தி. (ஸு. நி. 42; சூளனி. க²க்³க³விஸாணஸுத்தனித்³தே³ஸோ 128) –

ஏவம் வண்ணிதம் க²க்³க³விஸாணகப்பதம் ஆபஜ்ஜதி.

இதா³னி தமத்த²ம் உபமாய ஸாதே⁴ந்தோ ஸேய்யதா²பீதிஆதி³மாஹ. தத்த² பக்கீ² ஸகுணோதி பக்க²யுத்தோ ஸகுணோ. டே³தீதி உப்பததி. அயம் பனேத்த² ஸங்கே²பத்தோ² – ஸகுணா நாம ‘‘அஸுகஸ்மிம் பதே³ஸே ருக்கோ² பரிபக்கப²லோ’’தி ஞத்வா நானாதி³ஸாஹி ஆக³ந்த்வா நக²பக்க²துண்டா³தீ³ஹி தஸ்ஸ ப²லானி விஜ்ஜ²ந்தா விது⁴னந்தா கா²த³ந்தி, ‘‘இத³ம் அஜ்ஜதனாய, இத³ம் ஸ்வாதனாய ப⁴விஸ்ஸதீ’’தி நேஸம் ந ஹோதி. ப²லே பன கீ²ணே நேவ ருக்க²ஸ்ஸ ஆரக்க²ம் ட²பேந்தி, ந தத்த² பக்க²ம் வா பத்தம் வா நக²ம் வா துண்ட³ம் வா ட²பேந்தி, அத² கோ² தஸ்மிம் ருக்கே² அனபேக்கா² ஹுத்வா யோ யம் தி³ஸாபா⁴க³ம் இச்ச²தி, ஸோ தேன ஸபத்தபா⁴ரோவ உப்பதித்வா க³ச்ச²தி. ஏவமேவ அயம் பி⁴க்கு² நிஸ்ஸங்கோ³ நிரபேக்கோ²யேவ பக்கமதி, ஸமாதா³யேவ பக்கமதி. அரியேனாதி நித்³தோ³ஸேன. அஜ்ஜ²த்தந்தி ஸகே அத்தபா⁴வே. அனவஜ்ஜஸுக²ந்தி நித்³தோ³ஸஸுக²ம்.

ஸோ சக்கு²னா ரூபம் தி³ஸ்வாதி ஸோ இமினா அரியேன ஸீலக்க²ந்தே⁴ன ஸமன்னாக³தோ பி⁴க்கு² சக்கு²விஞ்ஞாணேன ரூபம் பஸ்ஸித்வாதி அத்தோ². ஸேஸபதே³ஸுபி யம் வத்தப்³ப³ம் ஸியா, தம் ஸப்³ப³ம் விஸுத்³தி⁴மக்³கே³ (விஸுத்³தி⁴. 1.15) வுத்தம். அப்³யாஸேகஸுக²ந்தி கிலேஸேஹி அனாஸித்தஸுக²ம், அவிகிண்ணஸுக²ந்திபி வுத்தம். இந்த்³ரியஸம்வரஸுக²ம் ஹி தி³ட்டா²தீ³ஸு தி³ட்ட²மத்தாதி³வஸேன பவத்ததாய அவிகிண்ணம் ஹோதி.

ஸோ அபி⁴க்கந்தே படிக்கந்தேதி ஸோ மனச்ச²ட்டா²னம் இந்த்³ரியானம் ஸம்வரேன ஸமன்னாக³தோ பி⁴க்கு² இமேஸு அபி⁴க்கந்தபடிக்கந்தாதீ³ஸு ஸத்தஸு டா²னேஸு ஸதிஸம்பஜஞ்ஞவஸேன ஸம்பஜானகாரீ ஹோதி. தத்த² அபி⁴க்கந்தந்தி புரதோ க³மனம். படிக்கந்தந்தி பச்சா²க³மனம்.

ஸம்பஜானகாரீ ஹோதீதி ஸாத்த²கஸம்பஜஞ்ஞம், ஸப்பாயஸம்பஜஞ்ஞம், கோ³சரஸம்பஜஞ்ஞம், அஸம்மோஹஸம்பஜஞ்ஞந்தி இமேஸம் சதுன்னம் ஸதிஸம்பயுத்தானம் ஸம்பஜஞ்ஞானம் வஸேன ஸதிம் உபட்ட²பேத்வா ஞாணேன பரிச்சி²ந்தி³த்வாயேவ தானி அபி⁴க்கந்தபடிக்கந்தானி கரோதி. ஸேஸபதே³ஸுபி ஏஸேவ நயோ. அயமேத்த² ஸங்கே²போ, வித்தா²ரோ பன இச்ச²ந்தேன தீ³க⁴னிகாயே ஸாமஞ்ஞப²லவண்ணனாதோ வா மஜ்ஜி²மனிகாயே ஸதிபட்டா²னவண்ணனாதோ வா க³ஹேதப்³போ³.

ஸோ இமினா சாதிஆதி³னா கிம் த³ஸ்ஸேதி? அரஞ்ஞவாஸஸ்ஸ பச்சயஸம்பத்திம் த³ஸ்ஸேதி. யஸ்ஸ ஹி இமே சத்தாரோ பச்சயா நத்தி², தஸ்ஸ அரஞ்ஞவாஸோ ந இஜ்ஜ²தி, திரச்சா²னக³தேஹி வா வனசரகேஹி வா ஸத்³தி⁴ம் வத்த²ப்³ப³தம் ஆபஜ்ஜதி. அரஞ்ஞே அதி⁴வத்தா² தே³வதா ‘‘கிம் ஏவரூபஸ்ஸ பாபபி⁴க்கு²னோ அரஞ்ஞவாஸேனா’’தி பே⁴ரவஸத்³த³ம் ஸாவேந்தி, ஹத்தே²ஹி ஸீஸம் பஹரித்வா பலாயனாகாரம் கரோந்தி. ‘‘அஸுகோ பி⁴க்கு² அரஞ்ஞம் பவிஸித்வா இத³ஞ்சித³ஞ்ச பாபகம்மமகாஸீ’’தி அயஸோ பத்த²ரதி. யஸ்ஸ பனேதே சத்தாரோ பச்சயா அத்தி², தஸ்ஸ அரஞ்ஞவாஸோ இஜ்ஜ²தி. ஸோ ஹி அத்தனோ ஸீலம் பச்சவேக்க²ந்தோ கிஞ்சி காளகம் வா திலகம் வா அபஸ்ஸந்தோ பீதிம் உப்பாதே³த்வா தம் க²யதோ வயதோ ஸம்மஸந்தோ அரியபூ⁴மிம் ஓக்கமதி. அரஞ்ஞே அதி⁴வத்தா² தே³வதா அத்தமனா வண்ணம் பா⁴ஸந்தி. இதிஸ்ஸ உத³கே பக்கி²த்ததேலபி³ந்து³ விய யஸோ வித்தா²ரிகோ ஹோதி.

தத்த² விவித்தந்தி ஸுஞ்ஞம், அப்பஸத்³த³ம், அப்பனிக்³கோ⁴ஸந்தி அத்தோ². ஏததே³வ ஹி ஸந்தா⁴ய விப⁴ங்கே³ ‘‘விவித்தந்தி ஸந்திகே சேபி ஸேனாஸனம் ஹோதி, தஞ்ச அனாகிண்ணம் க³ஹட்டே²ஹி பப்³ப³ஜிதேஹி, தேன தம் விவித்த’’ந்தி (விப⁴. 526) வுத்தம். ஸேதி சேவ ஆஸதி ச ஏத்தா²தி ஸேனாஸனம். மஞ்சபீடா²னமேதம் அதி⁴வசனம். தேனாஹ – ‘‘ஸேனாஸனந்தி மஞ்சோபி ஸேனாஸனம், பீட²ம்பி, பி⁴ஸிபி, பி³ம்போ³ஹனம்பி, விஹாரோபி, அட்³ட⁴யோகோ³பி, பாஸாதோ³பி, ஹம்மியம்பி, கு³ஹாபி, அட்டோபி, மாளோபி, லேணம்பி, வேளுகு³ம்போ³பி, ருக்க²மூலம்பி, மண்ட³போபி ஸேனாஸனம், யத்த² வா பன பி⁴க்கூ² படிக்கமந்தி, ஸப்³ப³மேதம் ஸேனாஸன’’ந்தி (விப⁴. 527). அபிச விஹாரோ, அட்³ட⁴யோகோ³, பாஸாதோ³, ஹம்மியம், கு³ஹாதி இத³ம் விஹாரஸேனாஸனம் நாம. மஞ்சோ, பீட²ம், பி⁴ஸி, பி³ம்போ³ஹனந்தி இத³ம் மஞ்சபீட²ஸேனாஸனம் நாம. சிமிலிகா, சம்மக²ண்டோ³, திணஸந்தா²ரோ, பண்ணஸந்தா²ரோதி இத³ம் ஸந்த²தஸேனாஸனம் நாம. யத்த² வா பன பி⁴க்கூ² படிக்கமந்தீதி ஏதம் ஓகாஸஸேனாஸனம் நாமாதி ஏவம் சதுப்³பி³த⁴ம் ஸேனாஸனம் ஹோதி. தம் ஸப்³ப³ம்பி ஸேனாஸனக்³க³ஹணேன க³ஹிதமேவ.

இமஸ்ஸ பன ஸகுணஸதி³ஸஸ்ஸ சாதுத்³தி³ஸஸ்ஸ பி⁴க்கு²னோ அனுச்ச²விகம் த³ஸ்ஸேந்தோ அரஞ்ஞம் ருக்க²மூலந்திஆதி³மாஹ. தத்த² அரஞ்ஞந்தி ‘‘நிக்க²மித்வா ப³ஹி இந்த³கீ²லா ஸப்³ப³மேதம் அரஞ்ஞ’’ந்தி (விப⁴. 529) ‘‘இத³ம் பி⁴க்கு²னீனம் வஸேன ஆக³தம் அரஞ்ஞம். ‘‘ஆரஞ்ஞகம் நாம ஸேனாஸனம் பஞ்சத⁴னுஸதிகம் பச்சி²ம’’ந்தி (பாரா. 654) இத³ம் பன இமஸ்ஸ பி⁴க்கு²னோ அனுரூபம். தஸ்ஸ லக்க²ணம் விஸுத்³தி⁴மக்³கே³ து⁴தங்க³னித்³தே³ஸே வுத்தம். ருக்க²மூலந்தி யம்கிஞ்சி ஸீதச்சா²யம் விவித்தம் ருக்க²மூலம். பப்³ப³தந்தி ஸேலம். தத்த² ஹி உத³கஸோண்டீ³ஸு உத³ககிச்சம் கத்வா ஸீதாய ருக்க²ச்சா²யாய நிஸின்னஸ்ஸ நானாதி³ஸாஸு கா²யமானாஸு ஸீதேன வாதேன பீ³ஜியமானஸ்ஸ சித்தம் ஏகக்³க³ம் ஹோதி. கந்த³ரந்தி கம் வுச்சதி உத³கம், தேன தா³ரிதம் உத³கபி⁴ன்னம் பப்³ப³தபதே³ஸம், யம் நிதம்ப³ந்திபி நதீ³னிகுஞ்ஜந்திபி வத³ந்தி. தத்த² ஹி ரஜதபட்டஸதி³ஸா வாலிகா ஹோதி, மத்த²கே மணிவிதானம் விய வனக³ஹனம், மணிக்க²ந்த⁴ஸதி³ஸம் உத³கம் ஸந்த³தி. ஏவரூபம் கந்த³ரம் ஓருய்ஹ பானீயம் பிவித்வா க³த்தானி ஸீதானி கத்வா வாலிகம் உஸ்ஸாபேத்வா பம்ஸுகூலசீவரம் பஞ்ஞாபேத்வா நிஸின்னஸ்ஸ ஸமணத⁴ம்மம் கரோதோ சித்தம் ஏகக்³க³ம் ஹோதி. கி³ரிகு³ஹந்தி த்³வின்னம் பப்³ப³தானம் அந்தரம், ஏகஸ்மிம்யேவ வா உமங்க³ஸதி³ஸம் மஹாவிவரம். ஸுஸானலக்க²ணம் விஸுத்³தி⁴மக்³கே³ (விஸுத்³தி⁴. 1.34) வுத்தம். வனபத்த²ந்தி கா³மந்தம் அதிக்கமித்வா மனுஸ்ஸானம் அனுபசாரட்டா²னம், யத்த² ந கஸந்தி ந வபந்தி. தேனேவாஹ – ‘‘வனபத்த²ந்தி தூ³ரானமேதம் ஸேனாஸனானம் அதி⁴வசன’’ந்திஆதி³. அப்³போ⁴காஸந்தி அச்ச²ன்னம். ஆகங்க²மானோ பனேத்த² சீவரகுடிம் கத்வா வஸதி. பலாலபுஞ்ஜந்தி பலாலராஸிம். மஹாபலாலபுஞ்ஜதோ ஹி பலாலம் நிக்கட்³டி⁴த்வா பப்³பா⁴ரலேணஸதி³ஸே ஆலயே கரோந்தி, க³ச்ச²கு³ம்பா³தீ³னம்பி உபரி பலாலம் பக்கி²பித்வா ஹேட்டா² நிஸின்னா ஸமணத⁴ம்மம் கரோந்தி. தம் ஸந்தா⁴யேதம் வுத்தம்.

பச்சா²ப⁴த்தந்தி ப⁴த்தஸ்ஸ பச்ச²தோ. பிண்ட³பாதபடிக்கந்தோதி பிண்ட³பாதபரியேஸனதோ படிக்கந்தோ. பல்லங்கந்தி ஸமந்ததோ ஊருப³த்³தா⁴ஸனம். ஆபு⁴ஜித்வாதி ப³ந்தி⁴த்வா. உஜும் காயம் பணிதா⁴யாதி உபரிமஸரீரம் உஜுகம் ட²பேத்வா அட்டா²ரஸ பிட்டி²கண்டகே கோடியா கோடிம் படிபாதே³த்வா. ஏவஞ்ஹி நிஸின்னஸ்ஸ சம்மமம்ஸன்ஹாரூனி ந பணமந்தி. அத²ஸ்ஸ யா தேஸம் பணமனபச்சயா க²ணே க²ணே வேத³னா உப்பஜ்ஜேய்யும், தா ந உப்பஜ்ஜந்தி. தாஸு ந உப்பஜ்ஜமானாஸு சித்தம் ஏகக்³க³ம் ஹோதி, கம்மட்டா²னம் ந பரிபததி, வுத்³தி⁴ம் பா²திம் உபக³ச்ச²தி. பரிமுக²ம் ஸதிம் உபட்ட²பேத்வாதி கம்மட்டா²னாபி⁴முக²ம் ஸதிம் ட²பயித்வா, முக²ஸமீபே வா கத்வாதி அத்தோ². தேனேவ விப⁴ங்கே³ வுத்தம் – ‘‘அயம் ஸதி உபட்டி²தா ஹோதி ஸூபட்டி²தா நாஸிகக்³கே³ வா முக²னிமித்தே வா. தேன வுச்சதி பரிமுக²ம் ஸதிம் உபட்ட²பேத்வா’’தி (விப⁴. 537). அத² வா ‘‘பரீதி பரிக்³க³ஹட்டோ². முக²ந்தி நிய்யானட்டோ². ஸதீதி உபட்டா²னட்டோ². தேன வுச்சதி – ‘பரிமுக²ம் ஸதி’’’ந்தி ஏவம் படிஸம்பி⁴தா³யம் (படி. ம. 1.164) வுத்தனயேன பனேத்த² அத்தோ² த³ட்ட²ப்³போ³. தத்ராயம் ஸங்கே²போ ‘‘பரிக்³க³ஹிதனிய்யானம் ஸதிம் கத்வா’’தி.

அபி⁴ஜ்ஜ²ம் லோகேதி ஏத்த² லுஜ்ஜன-பலுஜ்ஜனட்டே²ன பஞ்சுபாதா³னக்க²ந்தா⁴ லோகோ. தஸ்மா பஞ்சஸு உபாதா³னக்க²ந்தே⁴ஸு ராக³ம் பஹாய காமச்ச²ந்த³ம் விக்க²ம்பே⁴த்வாதி அயமேத்த² அத்தோ². விக³தாபி⁴ஜ்ஜே²னாதி விக்க²ம்ப⁴னவஸேன பஹீனத்தா விக³தாபி⁴ஜ்ஜே²ன, ந சக்கு²விஞ்ஞாணஸதி³ஸேனாதி அத்தோ². அபி⁴ஜ்ஜா²ய சித்தம் பரிஸோதே⁴தீதி அபி⁴ஜ்ஜா²தோ சித்தம் பரிமோசேதி, யதா² நம் ஸா முஞ்சதி சேவ முஞ்சித்வா ச ந புன க³ண்ஹாதி, ஏவம் கரோதீதி அத்தோ². ப்³யாபாத³பதோ³ஸம் பஹாயாதிஆதீ³ஸுபி ஏஸேவ நயோ. ப்³யாபஜ்ஜதி இமினா சித்தம் பூதிகும்மாஸாத³யோ விய புரிமபகதிம் பஜஹதீதி ப்³யாபாதோ³. விகாரப்பத்தியா பது³ஸ்ஸதி, பரம் வா பதூ³ஸேதி வினாஸேதீதி பதோ³ஸோ. உப⁴யம்பேதம் கோத⁴ஸ்ஸேவ அதி⁴வசனம். தி²னம் சித்தகே³லஞ்ஞம், மித்³த⁴ம் சேதஸிககே³லஞ்ஞம். தி²னஞ்ச மித்³த⁴ஞ்ச தி²னமித்³த⁴ம். ஆலோகஸஞ்ஞீதி ரத்திம்பி தி³வாபி தி³ட்ட²ஆலோகஸஞ்ஜானனஸமத்தா²ய விக³தனீவரணாய பரிஸுத்³தா⁴ய ஸஞ்ஞாய ஸமன்னாக³தோ. ஸதோ ஸம்பஜானோதி ஸதியா ச ஞாணேன ச ஸமன்னாக³தோ. இத³ம் உப⁴யம் ஆலோகஸஞ்ஞாய உபகாரகத்தா வுத்தம். உத்³த⁴ச்சஞ்ச குக்குச்சஞ்ச உத்³த⁴ச்சகுக்குச்சம். திண்ணவிசிகிச்சோ²தி விசிகிச்ச²ம் தரித்வா அதிக்கமித்வா டி²தோ. ‘‘கத²மித³ம் கத²மித³’’ந்தி ஏவம் நப்பவத்ததீதி அகத²ம்கதீ². குஸலேஸு த⁴ம்மேஸூதி அனவஜ்ஜேஸு த⁴ம்மேஸு. ‘‘இமே நு கோ² குஸலா, கத²மிமே குஸலா’’தி ஏவம் ந விசிகிச்ச²தி ந கங்க²தீதி அத்தோ². அயமேத்த² ஸங்கே²போ. இமேஸு பன நீவரணேஸு வசனத்த²லக்க²ணாதி³பே⁴த³தோ யம் வத்தப்³ப³ம் ஸியா, தம் விஸுத்³தி⁴மக்³கே³ (விஸுத்³தி⁴. 1.71-72) வுத்தம். பஞ்ஞாய து³ப்³ப³லீகரணேதி யஸ்மா இமே பஞ்ச நீவரணா உப்பஜ்ஜமானா அனுப்பன்னாய லோகியலோகுத்தராய பஞ்ஞாய உப்பஜ்ஜிதும் ந தே³ந்தி, உப்பன்னாபி அட்ட² ஸமாபத்தியோ பஞ்ச வா அபி⁴ஞ்ஞா உச்சி²ந்தி³த்வா பாதேந்தி. தஸ்மா பஞ்ஞாய து³ப்³ப³லீகரணாதி வுச்சந்தி. விவிச்சேவ காமேஹீதிஆதீ³னி விஸுத்³தி⁴மக்³கே³ வித்தா²ரிதானி.

இமே ஆஸவாதிஆதி³ அபரேனாபி பரியாயேன சதுஸச்சப்பகாஸனத்த²ம் வுத்தம். நாபரம் இத்த²த்தாயாதி பஜானாதீதி ஏத்தாவதா ஹேட்டா² தீஹி அங்கே³ஹி பா³ஹிரஸமயஸ்ஸ நிப்ப²லபா⁴வம் த³ஸ்ஸேத்வா சதுத்தே²ன அங்கே³ன அத்தனோ ஸாஸனஸ்ஸ க³ம்பீ⁴ரபா⁴வம் பகாஸேத்வா தே³ஸனாய அரஹத்தேன கூடம் க³ண்ஹி. இதா³னி தே³ஸனம் அப்பேந்தோ ஏவம் கோ², பி⁴க்க²வேதிஆதி³மாஹ.

9. தண்ஹாஸுத்தவண்ணனா

199. நவமே ஜாலினிந்தி ஜாலஸதி³ஸம். யதா² ஹி ஜாலம் ஸமந்ததோ ஸம்ஸிப்³பி³தம் ஆகுலப்³யாகுலம், ஏவம் தண்ஹாபீதி ஜாலஸதி³ஸத்தா ஜாலினீதி வுத்தா. தயோ வா ப⁴வே அஜ்ஜோ²த்த²ரித்வா டி²தாய ஏதிஸ்ஸா தத்த² தத்த² அத்தனோ கோட்டா²ஸபூ⁴தம் ஜாலம் அத்தீ²திபி ஜாலினீ. ஸரிதந்தி தத்த² தத்த² ஸரித்வா ஸம்ஸரித்வா டி²தம். விஸடந்தி பத்த²டம் விக்கி²த்தம். விஸத்திகந்தி தத்த² தத்த² விஸத்தம் லக்³க³ம் லகி³தம். அபிச ‘‘விஸமூலாதி விஸத்திகா. விஸப²லாதி விஸத்திகா’’திஆதி³னாபி (மஹானி. 3; சூளனி. மேத்தகூ³மாணவபுச்சா²னித்³தே³ஸோ 22) நயேனேத்த² அத்தோ² த³ட்ட²ப்³போ³. உத்³த⁴ஸ்தோதி உபரி த⁴ம்ஸிதோ. பரியோனத்³தோ⁴தி ஸமந்தா வேடி²தோ. தந்தாகுலகஜாதோதி தந்தம் விய ஆகுலஜாதோ. யதா² நாம து³ன்னிக்கி²த்தம் மூஸிகச்சி²ன்னம் பேஸகாரானம் தந்தம் தஹிம் தஹிம் ஆகுலம் ஹோதி, ‘‘இத³ம் அக்³க³ம் இத³ம் மூல’’ந்தி அக்³கே³ன வா அக்³க³ம், மூலேன வா மூலம் ஸமானேதும் து³க்கரம் ஹோதி, ஏவம் ஸத்தா இமாய தண்ஹாய பரியோனத்³தா⁴ ஆகுலப்³யாகுலா ந ஸக்கோந்தி அத்தனோ நிஸ்ஸரணமக்³க³ம் உஜும் காதும். கு³லாகு³ண்டி²கஜாதோதி கு³லாகு³ண்டி²கம் வுச்சதி பேஸகாரகஞ்ஜியஸுத்தம். கு³லா நாம ஸகுணிகா, தஸ்ஸா குலாவகோதிபி ஏகே. யதா² தது³ப⁴யம்பி ஆகுலம் அக்³கே³ன வா அக்³க³ம், மூலேன வா மூலம் ஸமானேதும் து³க்கரந்தி புரிமனயேனேவ யோஜேதப்³ப³ம். முஞ்ஜபப்³ப³ஜபூ⁴தோதி முஞ்ஜதிணம் விய பப்³ப³ஜதிணம் விய ச பூ⁴தோ, தாதி³ஸோ ஜாதோ. யதா² தானி திணானி கோட்டேத்வா கதரஜ்ஜும் ஜிண்ணகாலே கத்த²சி பதிதம் க³ஹேத்வா தேஸம் திணானம் ‘‘இத³ம் அக்³க³ம் இத³ம் மூல’’ந்தி அக்³கே³ன வா அக்³க³ம், மூலேன வா மூலம் ஸமானேதும் து³க்கரம். தம்பி ச பச்சத்தபுரிஸகாரே ட²த்வா ஸக்கா ப⁴வேய்ய உஜும் காதும், ட²பேத்வா பன போ³தி⁴ஸத்தே அஞ்ஞோ ஸத்தோ அத்தனோ த⁴ம்மதாய தண்ஹாஜாலம் பதா³லேத்வா அத்தனோ நிஸ்ஸரணமக்³க³ம் உஜும் காதும் ஸமத்தோ² நாம நத்தி². ஏவமயம் லோகோ தண்ஹாஜாலேன பரியோனத்³தோ⁴ அபாயம் து³க்³க³திம் வினிபாதம் ஸம்ஸாரம் நாதிவத்ததி. தத்த² அபாயோதி நிரய-திரச்சா²னயோனி-பேத்திவிஸய-அஸுரகாயா. ஸப்³பே³பி ஹி தே வட்³டி⁴ஸங்கா²தஸ்ஸ ஆயஸ்ஸ அபா⁴வதோ அபாயாதி வுச்சந்தி. ததா² து³க்க²ஸ்ஸ க³திபா⁴வதோ து³க்³க³தி. ஸுக²ஸமுஸ்ஸயதோ வினிபதிதத்தா வினிபாதோ. இதரோ பன –

‘‘க²ந்தா⁴னஞ்ச படிபாடி, தா⁴துஆயதனான ச;

அப்³போ³ச்சி²ன்னம் வத்தமானா, ஸம்ஸாரோதி பவுச்சதி.

தம் ஸப்³ப³ம் நாதிவத்ததி நாதிக்கமதி, அத² கோ² சுதிதோ படிஸந்தி⁴ம் படிஸந்தி⁴தோ சுதிந்தி ஏவம் புனப்புனம் சுதிபடிஸந்தி⁴யோ க³ண்ஹமானோ தீஸு ப⁴வேஸு சதூஸு யோனீஸு பஞ்சஸு க³தீஸு ஸத்தஸு விஞ்ஞாணட்டி²தீஸு நவஸு ஸத்தாவாஸேஸு மஹாஸமுத்³தே³ வாதக்கி²த்தனாவா விய யந்தே யுத்தகோ³ணோ விய ச பரிப்³ப⁴மதியேவ.

அஜ்ஜ²த்திகஸ்ஸ உபாதா³யாதி அஜ்ஜ²த்திகம் க²ந்த⁴பஞ்சகம் உபாதா³ய. இத³ஞ்ஹி உபயோக³த்தே² ஸாமிவசனம். பா³ஹிரஸ்ஸ உபாதா³யாதி பா³ஹிரம் க²ந்த⁴பஞ்சகம் உபாதா³ய, இத³ம்பி உபயோக³த்தே² ஸாமிவசனம். அஸ்மீதி, பி⁴க்க²வே, ஸதீதி, பி⁴க்க²வே, யதே³தம் அஜ்ஜ²த்தம் க²ந்த⁴பஞ்சகம் உபாதா³ய தண்ஹாமானதி³ட்டி²வஸேன ஸமூஹக்³கா³ஹதோ அஸ்மீதி ஹோதி, தஸ்மிம் ஸதீதி அத்தோ². இத்த²ஸ்மீதி ஹோதீதிஆதீ³ஸு பன ஏவம் ஸமூஹதோ அஹந்தி க³ஹணே ஸதி ததோ அனுபனிதா⁴ய ச உபனிதா⁴ய சாதி த்³விதா⁴ க³ஹணம் ஹோதி. தத்த² அனுபனிதா⁴யாதி அஞ்ஞம் ஆகாரம் அனுபக³ம்ம ஸகபா⁴வமேவ ஆரம்மணம் கத்வா இத்த²ஸ்மீதி ஹோதி, க²த்தியாதீ³ஸு இத³ம்பகாரோ அஹந்தி ஏவம் தண்ஹாமானதி³ட்டி²வஸேன ஹோதீதி அத்தோ². இத³ம் தாவ அனுபனிதா⁴ய க³ஹணம். உபனிதா⁴ய க³ஹணம் பன து³வித⁴ம் ஹோதி ஸமதோ ச அஸமதோ ச. தம் த³ஸ்ஸேதும் ஏவம்ஸ்மீதி அஞ்ஞதா²ஸ்மீதி ச வுத்தம். தத்த² ஏவம்ஸ்மீதி இத³ம் ஸமதோ உபனிதா⁴ய க³ஹணம், யதா²யம் க²த்தியோ யதா²யம் ப்³ராஹ்மணோ, ஏவமஹம்பீதி அத்தோ². அஞ்ஞதா²ஸ்மீதி இத³ம் பன அஸமதோ க³ஹணம், யதா²யம் க²த்தியோ யதா²யம் ப்³ராஹ்மணோ, ததோ அஞ்ஞதா² அஹம், ஹீனோ வா அதி⁴கோ வாதி அத்தோ². இமானி தாவ பச்சுப்பன்னவஸேன சத்தாரி தண்ஹாவிசரிதானி.

அஸஸ்மீதி ஸதஸ்மீதி இமானி பன த்³வே யஸ்மா அத்தீ²தி அஸம், நிச்சஸ்ஸேதம் அதி⁴வசனம். ஸீத³தீதி ஸதம், அனிச்சஸ்ஸேதம் அதி⁴வசனம். தஸ்மா ஸஸ்ஸதுச்சே²த³வஸேன வுத்தானீதி வேதி³தப்³பா³னி. இதோ பரானி ஸந்தி ஏவமாதீ³னி சத்தாரி ஸம்ஸயபரிவிதக்கவஸேன வுத்தானி. ஸந்தி ஹோதீதி ஏவமாதீ³ஸு அஹம் ஸியந்தி ஹோதீதி ஏவமத்தோ² வேதி³தப்³போ³. அதி⁴ப்பாயோ பனேத்த² புரிமசதுக்கே வுத்தனயேனேவ க³ஹேதப்³போ³. அபிஹம் ஸந்திஆதீ³னி பன சத்தாரி அபி நாம அஹம் ப⁴வேய்யந்தி ஏவம் பத்த²னாகப்பனவஸேன வுத்தானி. தானிபி புரிமசதுக்கே வுத்தனயேனேவ வேதி³தப்³பா³னி. ப⁴விஸ்ஸந்திஆதீ³னி பன சத்தாரி அனாக³தவஸேன வுத்தானி. தேஸம்பி புரிமசதுக்கே வுத்தனயேனேவ அத்தோ² வேதி³தப்³போ³. ஏவமேதே –

‘‘த்³வே தி³ட்டி²ஸீஸா ஸீஸஞ்ஞே, சத்தாரோ ஸீஸமூலகா;

தயோ தயோதி ஏதானி, அட்டா²ரஸ விபா⁴வயே.

ஏதேஸு ஹி அஸஸ்மி, ஸதஸ்மீதி ஏதே த்³வே தி³ட்டி²ஸீஸா நாம. அஸ்மி, ஸந்தி, அபிஹம் ஸந்தி, ப⁴விஸ்ஸந்தி ஏதே சத்தாரோ ஸுத்³த⁴ஸீஸா ஏவ. இத்த²ஸ்மீதிஆத³யோ தயோ தயோதி த்³வாத³ஸ ஸீஸமூலகா நாமாதி ஏவமேதே த்³வே தி³ட்டி²ஸீஸா சத்தாரோ ஸுத்³த⁴ஸீஸா த்³வாத³ஸ ஸீஸமூலகாதி அட்டா²ரஸ தண்ஹாவிசரிதத⁴ம்மா வேதி³தப்³பா³. இமானி தாவ அஜ்ஜ²த்திகஸ்ஸ உபாதா³ய அட்டா²ரஸ தண்ஹாவிசரிதானி. பா³ஹிரஸ்ஸ உபாதா³ய தண்ஹாவிசரிதேஸுபி ஏஸேவ நயோ. இமினாதி இமினா ரூபேன வா…பே… விஞ்ஞாணேன வாதி ஏஸ விஸேஸோ வேதி³தப்³போ³. ஸேஸம் தாதி³ஸமேவ.

இதி ஏவரூபானி அதீதானி ச²த்திம்ஸாதி ஏகமேகஸ்ஸ புக்³க³லஸ்ஸ அதீதே அத்³த⁴னி ச²த்திம்ஸ. அனாக³தானி ச²த்திம்ஸாதி ஏகமேகஸ்ஸேவ புக்³க³லஸ்ஸ ச அனாக³தே அத்³த⁴னி ச²த்திம்ஸ. பச்சுப்பன்னானி ச²த்திம்ஸாதி ஏகஸ்ஸ வா புக்³க³லஸ்ஸ யதா²ஸம்ப⁴வதோ ப³ஹூனம் வா பச்சுப்பன்னே அத்³த⁴னி ச²த்திம்ஸாவ. ஸப்³ப³ஸத்தானம் பன நியமேனேவ அதீதே அத்³த⁴னி ச²த்திம்ஸ, அனாக³தே ச²த்திம்ஸ, பச்சுப்பன்னே ச²த்திம்ஸ. அனந்தா ஹி அஸதி³ஸதண்ஹாமானதி³ட்டி²பே⁴தா³ ஸத்தா. அட்ட²ஸதம் தண்ஹாவிசரிதம் ஹோந்தீதி ஏத்த² பன அட்ட²ஸதஸங்கா²தம் தண்ஹாவிசரிதம் ஹோதீதி ஏவமத்தோ² த³ட்ட²ப்³போ³.

10. பேமஸுத்தவண்ணனா

200. த³ஸமே ந உஸ்ஸேனேதீதி தி³ட்டி²வஸேன ந உக்கி²பதி. ந படிஸேனேதீதி படிவிருத்³தோ⁴ ஹுத்வா கலஹப⁴ண்ட³னவஸேன ந உக்கி²பதி. ந தூ⁴பாயதீதி அஜ்ஜ²த்திகஸ்ஸ உபாதா³ய தண்ஹாவிசரிதவஸேன ந தூ⁴பாயதி. ந பஜ்ஜலதீதி பா³ஹிரஸ்ஸ உபாதா³ய தண்ஹாவிசரிதவஸேன ந பஜ்ஜலதி. ந ஸம்பஜ்ஜா²யதீதி அஸ்மிமானவஸேன ந ஸம்பஜ்ஜா²யதி. ஸேஸம் பாளினயேனேவ வேதி³தப்³ப³ம். இமஸ்மிம் ஸுத்தே வட்டவிவட்டம் கதி²தந்தி.

மஹாவக்³கோ³ பஞ்சமோ.