5. பஞ்சமபண்ணாஸகம்

(21) 1. ஸப்புரிஸவக்³கோ³

1-6. ஸிக்கா²பத³ஸுத்தவண்ணனா

201. பஞ்சமஸ்ஸ பட²மே அஸப்புரிஸந்தி லாமகபுரிஸம் துச்ச²புரிஸம் மூள்ஹபுரிஸம் அவிஜ்ஜாய அந்தீ⁴கதம் பா³லம். அஸப்புரிஸதரந்தி அதிரேகேன அஸப்புரிஸம். இதரே த்³வே வுத்தபடிபக்க²வஸேன வேதி³தப்³பா³. ஸேஸமேத்த² உத்தானத்த²மேவ. யதா² சேத்த², ஏவம் இதோ பரேஸு பஞ்சஸு. ஏதேஸு ஹி பட²மம் பஞ்சவேரவஸேன தே³ஸிதம், து³தியம் அஸ்ஸத்³த⁴ம்மவஸேன, ததியம் காயவசீத்³வாரவஸேன, சதுத்த²ம் மனோத்³வாரவஸேன, பஞ்சமம் அட்ட²மிச்ச²த்தவஸேன, ச²ட்ட²ம் த³ஸமிச்ச²த்தவஸேன.

7-10. பாபத⁴ம்மஸுத்தசதுக்கவண்ணனா

207-210. ஸத்தமே பாபந்தி லாமகம் ஸம்கிலிட்ட²புக்³க³லம். கல்யாணந்தி ப⁴த்³த³கம் அனவஜ்ஜபுக்³க³லம். ஸேஸமேத்த² உத்தானத்த²மேவ. அட்ட²மேபி ஏஸேவ நயோ. நவமே பாபத⁴ம்மந்தி லாமகத⁴ம்மம். கல்யாணத⁴ம்மந்தி அனவஜ்ஜத⁴ம்மம். ஸேஸமேத்த² உத்தானத்த²மேவ. த³ஸமேபி ஏஸேவ நயோ. இமஸ்மிம் வக்³கே³ த³ஸஸுபி ஸுத்தேஸு அகா³ரியப்படிபதா³ கதி²தா. ஸசேபி ஸோதாபன்னஸகதா³கா³மினோ ஹோந்தி, வட்டதியேவாதி.

ஸப்புரிஸவக்³கோ³ பட²மோ.

(22) 2. பரிஸாவக்³கோ³

1. பரிஸாஸுத்தவண்ணனா

211. து³தியஸ்ஸ பட²மே பரிஸம் தூ³ஸேந்தீதி பரிஸதூ³ஸனா. பரிஸம் ஸோபே⁴ந்தீதி பரிஸஸோப⁴னா.

2. தி³ட்டி²ஸுத்தவண்ணனா

212. து³தியே மனோது³ச்சரிதே பரியாபன்னாபி மிச்சா²தி³ட்டி² மஹாஸாவஜ்ஜதாய விஸும் வுத்தா, தஸ்ஸா ச படிபக்க²வஸேன ஸம்மாதி³ட்டி².

3. அகதஞ்ஞுதாஸுத்தவண்ணனா

213. ததியே அகதஞ்ஞுதா அகதவேதி³தாதி அகதஞ்ஞுதாய அகதவேதி³தாய. உப⁴யம்பேதம் அத்த²தோ ஏகமேவ. ஸுக்கபக்கே²பி ஏஸேவ நயோ.

4-7. பாணாதிபாதீஸுத்தாதி³வண்ணனா

214-217. சதுத்த²ம் சதுன்னம் கம்மகிலேஸானம் தப்படிபக்க²ஸ்ஸ ச வஸேன வுத்தம், பஞ்சமம் ஸுக்கபக்கா²னம் ஆதி³தோ சதுன்னம் மிச்ச²த்தானம் வஸேன, ச²ட்ட²ம் அவஸேஸானம் சதுன்னம், ஸத்தமம் அனரியவோஹாரஅரியவோஹாரானம். ததா² அட்ட²மனவமத³ஸமானி ஸப்படிபக்கா²னம் அஸ்ஸத்³த⁴ம்மானம் வஸேன வுத்தானி. ஸப்³ப³ஸுத்தேஸு பன ஸுக்கபக்க²த⁴ம்மா லோகியலோகுத்தரமிஸ்ஸகாவ கதி²தா. நவஸு ஸுத்தேஸு கிஞ்சாபி ‘‘ஸக்³கே³’’தி வுத்தம், தயோ பன மக்³கா³ தீணி ச ப²லானி லப்³ப⁴ந்தியேவாதி.

பரிஸாவக்³கோ³ து³தியோ.

(23) 3. து³ச்சரிதவக்³க³வண்ணனா

221-231. ததியஸ்ஸ பட²மாதீ³னி உத்தானத்தா²னேவ. த³ஸமே யோ சிந்தேத்வா கப்³யம் கரோதி, அயம் சிந்தாகவி நாம. யோ ஸுத்வா கரோதி, அயம் ஸுதகவி நாம. யோ ஏகம் அத்த²ம் நிஸ்ஸாய கரோதி, அயம் அத்த²கவி நாம. யோ தங்க²ணஞ்ஞேவ வங்கீ³ஸத்தே²ரோ விய அத்தனோ படிபா⁴னேன கரோதி, அயம் படிபா⁴னகவி நாமாதி.

து³ச்சரிதவக்³கோ³ ததியோ.

(24) 4. கம்மவக்³கோ³

1. ஸம்கி²த்தஸுத்தவண்ணனா

232. சதுத்த²ஸ்ஸ பட²மே கண்ஹந்தி காளகம் த³ஸஅகுஸலகம்மபத²கம்மம். கண்ஹவிபாகந்தி அபாயே நிப்³ப³த்தனதோ காளகவிபாகம். ஸுக்கந்தி பண்ட³ரகம் குஸலகம்மபத²கம்மம். ஸுக்கவிபாகந்தி ஸக்³கே³ நிப்³ப³த்தனதோ பண்ட³ரகவிபாகம். கண்ஹஸுக்கந்தி மிஸ்ஸககம்மம். கண்ஹஸுக்கவிபாகந்தி ஸுக²து³க்க²விபாகம். மிஸ்ஸககம்மஞ்ஹி கத்வா அகுஸலேன திரச்சா²னயோனியம் மங்க³லஹத்தி²ட்டா²னாதீ³ஸு உப்பன்னோ குஸலேன பவத்தே ஸுக²ம் வேதி³யதி. குஸலேன ராஜகுலேபி நிப்³ப³த்தோ அகுஸலேன பவத்தே து³க்க²ம் வேதி³யதி. அகண்ஹம் அஸுக்கந்தி கம்மக்க²யகரம் சதுமக்³க³ஞாணம் அதி⁴ப்பேதம். தஞ்ஹி யதி³ கண்ஹம் ப⁴வேய்ய, கண்ஹவிபாகம் த³தே³ய்ய. யதி³ ஸுக்கம் ப⁴வேய்ய, ஸுக்கவிபாகம் த³தே³ய்ய. உப⁴யவிபாகஸ்ஸ பன அப்பதா³னதோ அகண்ஹம் அஸுக்கந்தி அயமேத்த² அத்தோ².

2. வித்தா²ரஸுத்தவண்ணனா

233. து³தியே ஸப்³யாப³ஜ்ஜ²ந்தி ஸதோ³ஸம். காயஸங்கா²ரந்தி காயத்³வாரசேதனம். அபி⁴ஸங்க²ரோதீதி ஆயூஹதி ஸம்பிண்டே³தி. ஸேஸத்³வயேபி ஏஸேவ நயோ. ஸப்³யாப³ஜ்ஜ²ம் லோகந்தி ஸது³க்க²ம் லோகம். ஸப்³யாப³ஜ்ஜா² ப²ஸ்ஸாதி ஸது³க்கா² விபாகப²ஸ்ஸா. ஸப்³யாப³ஜ்ஜ²ம் வேத³னம் வேதி³யதீதி ஸாபா³த⁴ம் விபாகவேத³னம் வேதி³யதி. ஏகந்தது³க்க²ந்தி ஏகந்தேனேவ து³க்க²ம், ந ஸுக²ஸம்மிஸ்ஸம். ஸேய்யதா²பி ஸத்தா நேரயிகாதி ஏத்த² ஸேய்யதா²பீதி நித³ஸ்ஸனத்தே² நிபாதோ. தேன கேவலம் நேரயிகஸத்தே த³ஸ்ஸேதி, அஞ்ஞே பன தம்ஸரிக்க²கா நாம நத்தி². இமினா உபாயேன ஸப்³ப³த்த² அத்தோ² வேதி³தப்³போ³. ஸேய்யதா²பி மனுஸ்ஸாதிஆதீ³ஸு பன மனுஸ்ஸானம் தாவ காலேன ஸுகா² வேத³னா உப்பஜ்ஜதி, காலேன து³க்கா² வேத³னா. ஏகச்சே ச தே³வாதி ஏத்த² பன காமாவசரதே³வா த³ட்ட²ப்³பா³. தேஸஞ்ஹி மஹேஸக்க²தரா தே³வதா தி³ஸ்வா நிஸின்னாஸனதோ வுட்டா²னம், பாருதஉத்தராஸங்க³ஸ்ஸ ஓதாரணம், அஞ்ஜலிபக்³க³ண்ஹனந்திஆதீ³னம் வஸேன காலேன து³க்க²ம் உப்பஜ்ஜதி, தி³ப்³ப³ஸம்பத்திம் அனுப⁴வந்தானம் காலேன ஸுக²ம். ஏகச்சே ச வினிபாதிகாதி ஏத்த² வேமானிகபேதா த³ட்ட²ப்³பா³. தே நிரந்தரமேவ ஏகஸ்மிம் காலே ஸுக²ம், ஏகஸ்மிம் காலே து³க்க²ம் வேதி³யந்தி. நாக³ஸுபண்ணஹத்தி²அஸ்ஸாத³யோ பன மனுஸ்ஸா விய வோகிண்ணஸுக²து³க்கா²வ ஹோந்தி. பஹானாய யா சேதனாதி ஏத்த² விவட்டகா³மினீ மக்³க³சேதனா வேதி³தப்³பா³. ஸா ஹி கம்மக்க²யாய ஸம்வத்ததீதி.

3. ஸோணகாயனஸுத்தவண்ணனா

234. ததியே ஸிகா²மோக்³க³ல்லானோதி ஸீஸமஜ்ஜே² டி²தாய மஹதியா ஸிகா²ய ஸமன்னாக³தோ மோக்³க³ல்லானகோ³த்தோ ப்³ராஹ்மணோ. புரிமானீதி அதீதானந்தரதி³வஸதோ பட்டா²ய புரிமானி, து³தியாதி³தோ பட்டா²ய புரிமதரானி வேதி³தப்³பா³னி. ஸோணகாயனோதி தஸ்ஸேவ அந்தேவாஸிகோ. கம்மஸச்சாயம் போ⁴ லோகோதி போ⁴ அயம் லோகோ கம்மஸபா⁴வோ. கம்மஸமாரம்ப⁴ட்டா²யீதி கம்மஸமாரம்பே⁴ன திட்ட²தி. கம்மம் ஆயூஹந்தோவ திட்ட²தி, அனாயூஹந்தோ உச்சி²ஜ்ஜதீதி தீ³பேதி. ஸேஸம் ஹேட்டா² வுத்தனயமேவ.

4-9. ஸிக்கா²பத³ஸுத்தாதி³வண்ணனா

235. சதுத்தா²தீ³னிபி உத்தானத்தா²னேவ. மக்³க³ங்கே³ஸு பன யஸ்மா ஸதியா உபட்ட²பேத்வா பஞ்ஞாய பரிச்சி²ந்த³தி, தஸ்மா உப⁴யமேவ கம்மம். ஸேஸா அங்கா³னேவ ஹோந்தி, நோ கம்மந்தி வுத்தம். போ³ஜ்ஜ²ங்கே³ஸுபி ஏஸேவ நயோ. அபி⁴த⁴ம்மே பன ஸப்³ப³ம்பேதம் அவிஸேஸேன சேதனாஸம்பயுத்தகம்மந்தேவ வண்ணிதம்.

10. ஸமணஸுத்தவண்ணனா

241. த³ஸமே இதே⁴வாதி இமஸ்மிம்யேவ ஸாஸனே. அயம் பன நியமோ ஸேஸபதே³ஸுபி வேதி³தப்³போ³. து³தியாத³யோபி ஹி ஸமணா இதே⁴வ, ந அஞ்ஞத்த². ஸுஞ்ஞாதி ரித்தா துச்சா². பரப்பவாதா³தி சத்தாரோ ஸஸ்ஸதவாதா³, சத்தாரோ ஏகச்சஸஸ்ஸதிகா, சத்தாரோ அந்தானந்திகா, சத்தாரோ அமராவிக்கே²பிகா, த்³வே அதி⁴ச்சஸமுப்பன்னிகா, ஸோளஸ ஸஞ்ஞிவாதா³, அட்ட² அஸஞ்ஞிவாதா³, அட்ட² நேவஸஞ்ஞினாஸஞ்ஞிவாதா³, ஸத்த உச்சே²த³வாதா³, பஞ்ச தி³ட்ட²த⁴ம்மனிப்³பா³னவாதா³தி இமே ஸப்³பே³பி ப்³ரஹ்மஜாலே ஆக³தத்³வாஸட்டி²தி³ட்டி²யோ இதோ பா³ஹிரானம் பரேஸம் பவாதா³ பரப்பவாதா³ நாம. தே ஸப்³பே³பி இமேஹி சதூஹி ப²லட்ட²கஸமணேஹி ஸுஞ்ஞா. ந ஹி தே ஏத்த² ஸந்தி. ந கேவலஞ்ச ஏதேஹேவ ஸுஞ்ஞா, சதூஹி பன மக்³க³ட்ட²கஸமணேஹிபி, சதுன்னம் மக்³கா³னம் அத்தா²ய ஆரத்³த⁴விபஸ்ஸகேஹிபீதி த்³வாத³ஸஹிபி ஸமணேஹி ஸுஞ்ஞா ஏவ. இத³மேவ அத்த²ம் ஸந்தா⁴ய ப⁴க³வதா மஹாபரினிப்³பா³னே (தீ³. நி. 2.214) வுத்தம் –

‘‘ஏகூனதிம்ஸோ வயஸா ஸுப⁴த்³த³,

யம் பப்³ப³ஜிம் கிம்குஸலானுஏஸீ;

வஸ்ஸானி பஞ்ஞாஸ ஸமாதி⁴கானி,

யதோ அஹம் பப்³ப³ஜிதோ ஸுப⁴த்³த³;

ஞாயஸ்ஸ த⁴ம்மஸ்ஸ பதே³ஸவத்தீ,

இதோ ப³ஹித்³தா⁴ ஸமணோபி நத்தி²’’.

‘‘து³தியோபி ஸமணோ நத்தி², ததியோபி ஸமணோ நத்தி², சதுத்தோ²பி ஸமணோ நத்தி², ஸுஞ்ஞா பரப்பவாதா³ ஸமணேஹி அஞ்ஞேஹீ’’தி. ஏத்த² ஹி பதே³ஸவத்தீதி ஆரத்³த⁴விபஸ்ஸகோ அதி⁴ப்பேதோ. தஸ்மா ஸோதாபத்திமக்³க³ஸ்ஸ ஆரத்³த⁴விபஸ்ஸகம் மக்³க³ட்ட²ம் ப²லட்ட²ந்தி தயோபி ஏகதோ கத்வா ‘‘ஸமணோபி நத்தீ²’’தி ஆஹ, ஸகதா³கா³மிமக்³க³ஸ்ஸ ஆரத்³த⁴விபஸ்ஸகம் மக்³க³ட்ட²ம் ப²லட்ட²ந்தி தயோபி ஏகதோ கத்வா ‘‘து³தியோபி ஸமணோ நத்தீ²’’தி ஆஹ. இதரேஸுபி த்³வீஸு ஏஸேவ நயோ. ஏகாத³ஸமம் உத்தானத்த²மேவாதி.

கம்மவக்³கோ³ சதுத்தோ².

(25) 5. ஆபத்திப⁴யவக்³கோ³

1. ஸங்க⁴பே⁴த³கஸுத்தவண்ணனா

243. பஞ்சமஸ்ஸ பட²மே அபி நு தம், ஆனந்த³, அதி⁴கரணந்தி விவாதா³தி⁴கரணாதீ³ஸு அஞ்ஞதரம் அதி⁴கரணம் பி⁴க்கு²ஸங்க⁴ஸ்ஸ உப்பஜ்ஜி, ஸத்தா² தஸ்ஸ வூபஸந்தபா⁴வம் புச்ச²ந்தோ ஏவமாஹ. குதோ தம், ப⁴ந்தேதி, ப⁴ந்தே, குதோ கிந்தி கேன காரணேன தம் அதி⁴கரணம் வூபஸமிஸ்ஸதீதி வத³தி. கேவலகப்பந்தி ஸகலம் ஸமந்ததோ. ஸங்க⁴பே⁴தா³ய டி²தோதி ஸங்கே⁴ன ஸத்³தி⁴ம் வாத³த்தா²ய கதி²தம் படிகதே²ந்தோவ டி²தோ. தத்ராயஸ்மாதி தஸ்மிம் ஏவம் டி²தே ஆயஸ்மா அனுருத்³தோ⁴. ந ஏகவாசிகம்பி ப⁴ணிதப்³ப³ம் மஞ்ஞதீதி ‘‘மா, ஆவுஸோ, ஸங்கே⁴ன ஸத்³தி⁴ம் ஏவம் அவசா’’தி ஏகவசனம்பி வத்தப்³ப³ம் ந மஞ்ஞதி. வோயுஞ்ஜதீதி அனுயுஞ்ஜதி அனுயோக³ம் ஆபஜ்ஜதி. அத்த²வஸேதி காரணவஸே. நாஸேஸ்ஸந்தீதி உபோஸத²ப்பவாரணம் உபக³ந்தும் அத³த்வா நிக்கட்³டி⁴ஸ்ஸந்தி. ஸேஸம் பாளிவஸேனேவ வேதி³தப்³ப³ம்.

2. ஆபத்திப⁴யஸுத்தவண்ணனா

244. து³தியே கு²ரமுண்ட³ம் கரித்வாதி பஞ்ச ஸிக²ண்ட³கே ட²பேத்வா கு²ரேன முண்ட³ம் கரித்வா. க²ரஸ்ஸரேனாதி கக்க²ளஸத்³தே³ன. பணவேனாதி வஜ்ஜ²பே⁴ரியா. த²லட்ட²ஸ்ஸாதி ஏகமந்தே டி²தஸ்ஸ. ஸீஸச்சே²ஜ்ஜந்தி ஸீஸச்சே²தா³ரஹம். யத்ர ஹி நாமாதி யம் நாம. ஸோ வதஸ்ஸாஹந்தி ஸோ வத அஹம் அஸ்ஸம், யம் ஏவரூபம் பாபம் ந கரேய்யந்தி அத்தோ². யதா²த⁴ம்மம் படிகரிஸ்ஸதீதி த⁴ம்மானுரூபம் படிகரிஸ்ஸதி, ஸாமணேரபூ⁴மியம் ட²ஸ்ஸதீதி அத்தோ². காளவத்த²ம் பரிதா⁴யாதி காளபிலோதிகம் நிவாஸேத்வா. மோஸல்லந்தி முஸலாபி⁴பாதாரஹம். யதா²த⁴ம்மந்தி இத⁴ ஆபத்திதோ வுட்டா²ய ஸுத்³த⁴ந்தே பதிட்ட²ஹந்தோ யதா²த⁴ம்மம் கரோதி நாம. ப⁴ஸ்மபுடந்தி சா²ரிகாப⁴ண்டி³கம். கா³ரய்ஹம் ப⁴ஸ்மபுடந்தி க³ரஹிதப்³ப³சா²ரிகாபுடேன மத்த²கே அபி⁴கா⁴தாரஹம். யதா²த⁴ம்மந்தி இத⁴ ஆபத்திம் தே³ஸேந்தோ யதா²த⁴ம்மம் படிகரோதி நாம. உபவஜ்ஜந்தி உபவாதா³ரஹம். பாடிதே³ஸனீயேஸூதி படிதே³ஸேதப்³பே³ஸு. இமினா ஸப்³பா³பி ஸேஸாபத்தியோ ஸங்க³ஹிதா. இமானி கோ², பி⁴க்க²வே, சத்தாரி ஆபத்திப⁴யானீதி, பி⁴க்க²வே, இமானி சத்தாரி ஆபத்திம் நிஸ்ஸாய உப்பஜ்ஜனகப⁴யானி நாமாதி.

3. ஸிக்கா²னிஸம்ஸஸுத்தவண்ணனா

245. ததியே ஸிக்கா² ஆனிஸம்ஸா ஏத்தா²தி ஸிக்கா²னிஸம்ஸம். பஞ்ஞா உத்தரா ஏத்தா²தி பஞ்ஞுத்தரம். விமுத்தி ஸாரோ ஏத்தா²தி விமுத்திஸாரம். ஸதி ஆதி⁴பதேய்யா ஏத்தா²தி ஸதாதி⁴பதேய்யம். ஏதேஸம் ஹி ஸிக்கா²தி³ஸங்கா²தானம் ஆனிஸம்ஸாதீ³னம் அத்தா²ய வுஸ்ஸதீதி வுத்தம் ஹோதி. ஆபி⁴ஸமாசாரிகாதி உத்தமஸமாசாரிகா. வத்தவஸேன பஞ்ஞத்தஸீலஸ்ஸேதம் அதி⁴வசனம். ததா² ததா² ஸோ தஸ்ஸா ஸிக்கா²யாதி ததா² ததா² ஸோ ஸிக்கா²காமோ பி⁴க்கு² தஸ்மிம் ஸிக்கா²பதே³.

ஆதி³ப்³ரஹ்மசரியிகாதி மக்³க³ப்³ரஹ்மசரியஸ்ஸ ஆதி³பூ⁴தானம் சதுன்னம் மஹாஸீலானமேதம் அதி⁴வசனம். ஸப்³ப³ஸோதி ஸப்³பா³காரேன. த⁴ம்மாதி சதுஸச்சத⁴ம்மா. பஞ்ஞாய ஸமவேக்கி²தா ஹோந்தீதி ஸஹவிபஸ்ஸனாய மக்³க³பஞ்ஞாய ஸுதி³ட்டா² ஹோந்தி. விமுத்தியா பு²ஸிதா ஹோந்தீதி அரஹத்தப²லவிமுத்தியா ஞாணப²ஸ்ஸேன பு²ட்டா² ஹோந்தி. அஜ்ஜ²த்தம்யேவ ஸதி ஸூபட்டி²தா ஹோதீதி நியகஜ்ஜ²த்தேயேவ ஸதி ஸுட்டு² உபட்டி²தா ஹோதி. பஞ்ஞாய அனுக்³க³ஹேஸ்ஸாமீதி விபஸ்ஸனாபஞ்ஞாய அனுக்³க³ஹேஸ்ஸாமி. பஞ்ஞாய ஸமவேக்கி²ஸ்ஸாமீதி இதா⁴பி விபஸ்ஸனாபஞ்ஞா அதி⁴ப்பேதா. பு²ஸிதம் வா த⁴ம்மம் தத்த² தத்த² பஞ்ஞாய அனுக்³க³ஹேஸ்ஸாமீதி ஏத்த² பன மக்³க³பஞ்ஞாவ அதி⁴ப்பேதா.

4. ஸேய்யாஸுத்தவண்ணனா

246. சதுத்தே² பேதாதி காலகதா வுச்சந்தி. உத்தானா ஸேந்தீதி தே யேபு⁴ய்யேன உத்தானகாவ ஸயந்தி. அத² வா பேத்திவிஸயே நிப்³ப³த்தா பேதா நாம, தே அப்பமம்ஸலோஹிதத்தா அட்டி²ஸங்கா⁴தஜடிதா ஏகேன பஸ்ஸேன ஸயிதும் ந ஸக்கோந்தி, உத்தானாவ ஸேந்தி. அனத்தமனோ ஹோதீதி தேஜுஸ்ஸத³த்தா ஸீஹோ மிக³ராஜா த்³வே புரிமபாதே³ ஏகஸ்மிம், பச்சி²மபாதே³ ஏகஸ்மிம் டா²னே ட²பேத்வா நங்கு³ட்ட²ம் அந்தரஸத்தி²ம்ஹி பக்கி²பித்வா புரிமபாத³பச்சி²மபாத³னங்கு³ட்டா²னம் டி²தோகாஸம் ஸல்லக்கே²த்வா த்³வின்னம் புரிமபாதா³னம் மத்த²கே ஸீஸம் ட²பேத்வா ஸயதி. தி³வஸம்பி ஸயித்வா பபு³ஜ்ஜ²மானோ ந உத்தஸந்தோ பபு³ஜ்ஜ²தி, ஸீஸம் பன உக்கி²பித்வா புரிமபாதா³தீ³னம் டி²தோகாஸம் ஸல்லக்கே²த்வா ஸசே கிஞ்சி டா²னம் விஜஹித்வா டி²தம் ஹோதி, ‘‘நயித³ம் துய்ஹம் ஜாதியா, ந ஸூரபா⁴வஸ்ஸ அனுரூப’’ந்தி அனத்தமனோ ஹுத்வா தத்தே²வ ஸயதி, ந கோ³சராய பக்கமதி. இத³ம் ஸந்தா⁴ய வுத்தம் – ‘‘அனத்தமனோ ஹோதீ’’தி. அவிஜஹித்வா டி²தே பன ‘‘துய்ஹம் ஜாதியா ச ஸூரபா⁴வஸ்ஸ ச அனுரூபமித³’’ந்தி ஹட்ட²துட்டோ² உட்டா²ய ஸீஹவிஜம்ப⁴னம் விஜம்பி⁴த்வா கேஸரபா⁴ரம் விது⁴னித்வா திக்க²த்தும் ஸீஹனாத³ம் நதி³த்வா கோ³சராய பக்கமதி. தேன வுத்தம் – ‘‘அத்தமனோ ஹோதீ’’தி.

5. தூ²பாரஹஸுத்தவண்ணனா

247. பஞ்சமே ராஜா சக்கவத்தீதி ஏத்த² கஸ்மா ப⁴க³வா அகா³ரமஜ்ஜே² வஸித்வா காலகதஸ்ஸ ரஞ்ஞோ தூ²பகரணம் அனுஜானாதி, ந ஸீலவதோ புது²ஜ்ஜனபி⁴க்கு²ஸ்ஸாதி? அனச்ச²ரியத்தா. புது²ஜ்ஜனபி⁴க்கூ²னஞ்ஹி தூ²பே அனுஞ்ஞாயமானே தம்ப³பண்ணிதீ³பே தாவ தூ²பானம் ஓகாஸோ ந ப⁴வேய்ய, ததா² அஞ்ஞேஸு டா²னேஸு. தஸ்மா ‘‘அனச்ச²ரியா தே ப⁴விஸ்ஸந்தீ’’தி நானுஜானாதி. சக்கவத்தீ ராஜா ஏகோவ நிப்³ப³த்ததி, தேனஸ்ஸ தூ²போ அச்ச²ரியோ ஹோதி. புது²ஜ்ஜனஸீலவதோ பன பரினிப்³பு³தபி⁴க்கு²னோ விய மஹந்தம்பி ஸக்காரம் காதும் வட்டதியேவ. ச²ட்ட²ஸத்தமானி உத்தானத்தா²னேவ.

8. பட²மவோஹாரஸுத்தவண்ணனா

250. அட்ட²மே அனரியவோஹாராதி அனரியானம் கதா². ஸேஸேஸுபி ஏஸேவ நயோ.

ஆபத்திப⁴யவக்³கோ³ பஞ்சமோ.

பஞ்சமபண்ணாஸகம் நிட்டி²தம்.