(26) 6. அபி⁴ஞ்ஞாவக்³கோ³

1-3. அபி⁴ஞ்ஞாஸுத்தாதி³வண்ணனா

254-256. ச²ட்ட²ஸ்ஸ பட²மே அபி⁴ஞ்ஞாயாதி ஜானித்வா. ஸமதோ² ச விபஸ்ஸனா சாதி சித்தேகக்³க³தா ச ஸங்கா²ரபரிக்³க³ஹவிபஸ்ஸனாஞாணஞ்ச. விஜ்ஜா ச விமுத்தி சாதி மக்³க³ஞாணவிஜ்ஜா ச ஸேஸா ஸம்பயுத்தகத⁴ம்மா ச. து³தியே அனரியபரியேஸனாதி அனரியானம் ஏஸனா க³வேஸனா. ஜராத⁴ம்மந்தி ஜராஸபா⁴வம். ஸேஸேஸுபி ஏஸேவ நயோ. ததியம் உத்தானமேவ.

4. மாலுக்யபுத்தஸுத்தவண்ணனா

257. சதுத்தே² மாலுக்யபுத்தோதி மாலுக்யப்³ராஹ்மணியா புத்தோ. ஏத்தா²தி ஏதஸ்மிம் தவ ஓவாத³யாசனே. இமினா தே²ரம் அபஸாதே³திபி உஸ்ஸாதே³திபி. கத²ம்? அயம் கிர த³ஹரகாலே பச்சயேஸு லக்³கோ³ ஹுத்வா பச்சா² மஹல்லககாலே அரஞ்ஞவாஸம் பத்தே²ந்தோ கம்மட்டா²னம் யாசதி. அத² ப⁴க³வா ‘‘ஏத்த² த³ஹரே கிம் வக்கா²ம, மாலுக்யபுத்தோ விய தும்ஹேபி தருணகாலே பச்சயேஸு லக்³கி³த்வா மஹல்லககாலே அரஞ்ஞம் பவிஸித்வா ஸமணத⁴ம்மம் கரேய்யாதா²’’தி இமினா அதி⁴ப்பாயேன ப⁴ணந்தோ தே²ரம் அபஸாதே³தி நாம. யஸ்மா பன தே²ரோ மஹல்லககாலேவ அரஞ்ஞம் பவிஸித்வா ஸமணத⁴ம்மம் காதுகாமோ, தஸ்மா ப⁴க³வா ‘‘ஏத்த² த³ஹரே கிம் வக்கா²ம, அயம் அம்ஹாகம் மாலுக்யபுத்தோ மஹல்லககாலேபி அரஞ்ஞம் பவிஸித்வா ஸமணத⁴ம்மம் காதுகாமோ கம்மட்டா²னம் யாசதி. தும்ஹே தாவ தருணகாலேபி வீரியம் ந கரோதா²’’தி இமினா அதி⁴ப்பாயேன ப⁴ணந்தோ தே²ரம் உஸ்ஸாதே³தி நாமாதி யோஜனா.

5-10. குலஸுத்தாதி³வண்ணனா

258-263. பஞ்சமே ஆதி⁴பச்சே ட²பேந்தீதி ப⁴ண்டா³கா³ரிகட்டா²னே ட²பேந்தி. ச²ட்டே² வண்ணஸம்பன்னோதி ஸரீரவண்ணேன ஸமன்னாக³தோ. ப³லஸம்பன்னோதி காயப³லேன ஸமன்னாக³தோ. பி⁴க்கு²வாரே வண்ணஸம்பன்னோதி கு³ணவண்ணேன ஸமன்னாக³தோ. ப³லஸம்பன்னோதி வீரியப³லேன ஸமன்னாக³தோ. ஜவஸம்பன்னோதி ஞாணஜவேன ஸமன்னாக³தோ. ஸத்தமேபி ஏஸேவ நயோ. ஸேஸமேத்த² உத்தானமேவாதி.

அபி⁴ஞ்ஞாவக்³கோ³ ச²ட்டோ².