.நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ.

அங்கு³த்தரனிகாயே

சதுக்கனிபாத-அட்ட²கதா²

1. பட²மபண்ணாஸகம்

1. ப⁴ண்ட³கா³மவக்³கோ³

1. அனுபு³த்³த⁴ஸுத்தவண்ணனா

1. சதுக்கனிபாதஸ்ஸ பட²மே அனனுபோ³தா⁴தி அபு³ஜ்ஜ²னேன அஜானனேன. அப்படிவேதா⁴தி அப்படிவிஜ்ஜ²னேன அபச்சக்க²கிரியாய. தீ³க⁴மத்³தா⁴னந்தி சிரகாலம். ஸந்தா⁴விதந்தி ப⁴வதோ ப⁴வம் க³மனவஸேன ஸந்தா⁴விதம். ஸம்ஸரிதந்தி புனப்புனம் க³மனாக³மனவஸேன ஸம்ஸரிதம். மமஞ்சேவ தும்ஹாகஞ்சாதி மயா ச தும்ஹேஹி ச. அத² வா ஸந்தா⁴விதம் ஸம்ஸரிதந்தி ஸந்தா⁴வனம் ஸம்ஸரணம் மமஞ்சேவ தும்ஹாகஞ்ச அஹோஸீதி ஏவமேத்த² அத்தோ² வேதி³தப்³போ³. அரியஸ்ஸாதி நித்³தோ³ஸஸ்ஸ. ஸீலம் ஸமாதி⁴ பஞ்ஞாதி இமே பன தயோ த⁴ம்மா மக்³க³ப²லஸம்பயுத்தாவ வேதி³தப்³பா³, விமுத்தினாமேன ப²லமேவ நித்³தி³ட்ட²ம். ப⁴வதண்ஹாதி ப⁴வேஸு தண்ஹா. ப⁴வனேத்தீதி ப⁴வரஜ்ஜு. தண்ஹாய ஏவ ஏதம் நாமம். தாய ஹி ஸத்தா கோ³ணா விய கீ³வாய ப³ந்தி⁴த்வா தம் தம் ப⁴வம் நீயந்தி, தஸ்மா ப⁴வனேத்தீதி வுச்சதி.

அனுத்தராதி லோகுத்தரா. து³க்க²ஸ்ஸந்தகரோதி வட்டது³க்க²ஸ்ஸ அந்தகரோ. சக்கு²மாதி பஞ்சஹி சக்கூ²ஹி சக்கு²மா. பரினிப்³பு³தோதி கிலேஸபரினிப்³பா³னேன பரினிப்³பு³தோ. இத³மஸ்ஸ போ³தி⁴மண்டே³ பட²மபரினிப்³பா³னம், பச்சா² பன யமகஸாலானமந்தரே அனுபாதி³ஸேஸாய நிப்³பா³னதா⁴துயா பரினிப்³பு³தோதி யதா²னுஸந்தி⁴னா தே³ஸனம் நிட்டா²பேஸி.

2. பபதிதஸுத்தவண்ணனா

2. து³தியே பபதிதோதி பதிதோ சுதோ. அப்பபதிதோதி அபதிதோ பதிட்டி²தோ. தத்த² லோகியமஹாஜனோ பதிதோயேவ நாம, ஸோதாபன்னாத³யோ கிலேஸுப்பத்திக்க²ணே பதிதா நாம, கீ²ணாஸவோ ஏகந்தபதிட்டி²தோ நாம.

சுதா பதந்தீதி யே சுதா, தே பதந்தி நாம. பதிதாதி யே பதிதா, தே சுதா நாம. சுதத்தா பதிதா, பதிதத்தா சுதாதி அத்தோ². கி³த்³தா⁴தி ராக³ரத்தா. புனராக³தாதி புன ஜாதிம் புன ஜரம் புன ப்³யாதி⁴ம் புன மரணம் ஆக³தா நாம ஹோந்தி. கதம் கிச்சந்தி சதூஹி மக்³கே³ஹி கத்தப்³ப³கிச்சம் கதம். ரதம் ரம்மந்தி ரமிதப்³ப³யுத்தகே கு³ணஜாதே ரமிதம். ஸுகே²னான்வாக³தம் ஸுக²ந்தி ஸுகே²ன ஸுக²ம் அனுஆக³தம் ஸம்பத்தம். மானுஸகஸுகே²ன தி³ப்³ப³ஸுக²ம், ஜா²னஸுகே²ன விபஸ்ஸனாஸுக²ம், விபஸ்ஸனாஸுகே²ன மக்³க³ஸுக²ம், மக்³க³ஸுகே²ன ப²லஸுக²ம், ப²லஸுகே²ன நிப்³பா³னஸுக²ம் ஸம்பத்தம் அதி⁴க³தந்தி அத்தோ².

3. பட²மக²தஸுத்தவண்ணனா

3. ததியம் து³கனிபாதவண்ணனாயம் வுத்தமேவ. கா³தா²ஸு பன நிந்தி³யந்தி நிந்தி³தப்³ப³யுத்தகம். நிந்த³தீதி க³ரஹதி. பஸம்ஸியோதி பஸம்ஸிதப்³ப³யுத்தோ. விசினாதி முகே²ன ஸோ கலிந்தி யோ ஏவம் பவத்தோ, தேன முகே²ன கலிம் விசினாதி நாம. கலினா தேன ஸுக²ம் ந விந்த³தீதி தேன ச கலினா ஸுக²ம் ந படிலப⁴தி. ஸப்³ப³ஸ்ஸாபி ஸஹாபி அத்தனாதி ஸப்³பே³னபி ஸகேன த⁴னேன சேவ அத்தனா ச ஸத்³தி⁴ம் யோ பராஜயோ, ஸோ அப்பமத்தகோவ கலீதி அத்தோ². யோ ஸுக³தேஸூதி யோ பன ஸம்மக்³க³தேஸு புக்³க³லேஸு சித்தம் பது³ஸ்ஸேய்ய, அயம் சித்தபதோ³ஸோவ ததோ கலிதோ மஹந்ததரோ கலி. இதா³னி தஸ்ஸ மஹந்ததரபா⁴வம் த³ஸ்ஸேந்தோ ஸதம் ஸஹஸ்ஸானந்திஆதி³மாஹ. தத்த² ஸதம் ஸஹஸ்ஸானந்தி நிரப்³பு³த³க³ணனாய ஸதஸஹஸ்ஸம். ச²த்திம்ஸதீதி அபரானி ச ச²த்திம்ஸதி நிரப்³பு³தா³னி. பஞ்ச சாதி அப்³பு³த³க³ணனாய ச பஞ்ச அப்³பு³தா³னி. யமரியக³ரஹீதி யம் அரியே க³ரஹந்தோ நிரயம் உபபஜ்ஜதி, தத்த² ஏத்தகம் ஆயுப்பமாணந்தி.

4. து³தியக²தஸுத்தவண்ணனா

4. சதுத்தே² மாதரி பிதரி சாதிஆதீ³ஸு மித்தவிந்த³கோ மாதரி மிச்சா²படிபன்னோ நாம, அஜாதஸத்து பிதரி மிச்சா²படிபன்னோ நாம, தே³வத³த்தோ ததா²க³தே மிச்சா²படிபன்னோ நாம, கோகாலிகோ ததா²க³தஸாவகே மிச்சா²படிபன்னோ நாம. ப³ஹுஞ்சாதி ப³ஹுகமேவ. பஸவதீதி படிலப⁴தி. தாயாதி தாய மிச்சா²படிபத்திஸங்கா²தாய அத⁴ம்மசரியாய. பேச்சாதி இதோ க³ந்த்வா. அபாயம் க³ச்ச²தீதி நிரயாதீ³ஸு அஞ்ஞதரஸ்மிம் நிப்³ப³த்ததி. ஸுக்கபக்கே²பி ஏஸேவ நயோ.

5. அனுஸோதஸுத்தவண்ணனா

5. பஞ்சமே அனுஸோதம் க³ச்ச²தீதி அனுஸோதகா³மீ. கிலேஸஸோதஸ்ஸ பச்சனீகபடிபத்தியா படிஸோதம் க³ச்ச²தீதி படிஸோதகா³மீ. டி²தத்தோதி டி²தஸபா⁴வோ. திண்ணோதி ஓக⁴ம் தரித்வா டி²தோ. பாரங்க³தோதி பரதீரம் க³தோ. த²லே திட்ட²தீதி நிப்³பா³னத²லே திட்ட²தி. ப்³ராஹ்மணோதி ஸேட்டோ² நித்³தோ³ஸோ. இதா⁴தி இமஸ்மிம் லோகே. காமே ச படிஸேவதீதி கிலேஸகாமேஹி வத்து²காமே படிஸேவதி. பாபஞ்ச கம்மம் கரோதீதி பாபஞ்ச பாணாதிபாதாதி³கம்மம் கரோதி. பாபஞ்ச கம்மம் ந கரோதீதி பஞ்சவேரகம்மம் ந கரோதி. அயம் வுச்சதி, பி⁴க்க²வே, டி²தத்தோதி அயம் அனாகா³மீ புக்³க³லோ தஸ்மா லோகா புன படிஸந்தி⁴வஸேன அனாக³மனதோ டி²தத்தோ நாம.

தண்ஹாதி⁴பன்னாதி தண்ஹாய அதி⁴பன்னா அஜ்ஜோ²த்த²டா, தண்ஹம் வா அதி⁴பன்னா அஜ்ஜோ²கா³ள்ஹா. பரிபுண்ணஸேகோ²தி ஸிக்கா²பாரிபூரியா டி²தோ. அபரிஹானத⁴ம்மோதி அபரிஹீனஸபா⁴வோ. சேதோவஸிப்பத்தோதி சித்தவஸீபா⁴வம் பத்தோ. ஏவரூபோ கீ²ணாஸவோ ஹோதி, இத⁴ பன அனாகா³மீ கதி²தோ. ஸமாஹிதிந்த்³ரியோதி ஸமாஹிதச²ளிந்த்³ரியோ. பரோபராதி பரோவரா உத்தமலாமகா, குஸலாகுஸலாதி அத்தோ². ஸமேச்சாதி ஞாணேன ஸமாக³ந்த்வா. விதூ⁴பிதாதி வித்³த⁴ம்ஸிதா ஜா²பிதா வா. வுஸிதப்³ரஹ்மசரியோதி மக்³க³ப்³ரஹ்மசரியம் வஸித்வா டி²தோ. லோகந்தகூ³தி திவித⁴ஸ்ஸாபி லோகஸ்ஸ அந்தம் க³தோ. பாரக³தோதி ச²ஹாகாரேஹி பாரக³தோ. இத⁴ கீ²ணாஸவோவ கதி²தோ. இதி ஸுத்தேபி கா³தா²ஸுபி வட்டவிவட்டமேவ கதி²தம்.

6. அப்பஸ்ஸுதஸுத்தவண்ணனா

6. ச²ட்டே² அனுபபன்னோதி அனுபாக³தோ. ஸுத்தந்திஆதீ³ஸு உப⁴தோவிப⁴ங்க³னித்³தே³ஸக²ந்த⁴கபரிவாரஸுத்தனிபாதமங்க³லஸுத்தரதனஸுத்த- நாளகஸுத்ததுவடகஸுத்தானி, அஞ்ஞம்பி ச ஸுத்தனாமகம் ததா²க³தவசனம் ஸுத்தந்தி வேதி³தப்³ப³ம். ஸப்³ப³ம்பி ஸகா³த²கம் ஸுத்தம் கே³ய்யந்தி வேதி³தப்³ப³ம், விஸேஸேன ஸம்யுத்தகே ஸகலோபி ஸகா³தா²வக்³கோ³. ஸகலம்பி அபி⁴த⁴ம்மபிடகம், நிக்³கா³த²கஸுத்தம், யஞ்ச அஞ்ஞம்பி அட்ட²ஹி அங்கே³ஹி அஸங்க³ஹிதம் பு³த்³த⁴வசனம், தம் வேய்யாகரணந்தி வேதி³தப்³ப³ம். த⁴ம்மபத³-தே²ரகா³தா²-தே²ரிகா³தா² ஸுத்தனிபாதே நோஸுத்தனாமிகா ஸுத்³தி⁴ககா³தா² ச கா³தா²தி வேதி³தப்³பா³. ஸோமனஸ்ஸஞாணமயிககா³தா²படிஸம்யுத்தா த்³வேஅஸீதி ஸுத்தந்தா உதா³னந்தி வேதி³தப்³பா³. ‘‘வுத்தஞ்ஹேதம் ப⁴க³வதா’’திஆதி³னயப்பவத்தா த³ஸுத்தரஸதஸுத்தந்தா இதிவுத்தகந்தி வேதி³தப்³பா³. அபண்ணகஜாதகாதீ³னி பஞ்ஞாஸாதி⁴கானி பஞ்ச ஜாதகஸதானி ஜாதகந்தி வேதி³தப்³பா³னி. ‘‘சத்தாரோமே, பி⁴க்க²வே, அச்ச²ரியா அப்³பு⁴தா த⁴ம்மா ஆனந்தே³’’திஆதி³னயப்பவத்தா ஸப்³பே³பி அச்ச²ரியஅப்³பு⁴தத⁴ம்மபடிஸம்யுத்தா ஸுத்தந்தா அப்³பு⁴தத⁴ம்மந்தி வேதி³தப்³பா³. சூளவேத³ல்லமஹாவேத³ல்லஸம்மாதி³ட்டி²ஸக்கபஞ்ஹஸங்கா²ரபா⁴ஜனியமஹாபுண்ணமஸுத்தாத³யோ ஸப்³பே³பி வேத³ஞ்ச துட்டி²ஞ்ச லத்³தா⁴ லத்³தா⁴ புச்சி²தா ஸுத்தந்தா வேத³ல்லந்தி வேதி³தப்³பா³. ந அத்த²மஞ்ஞாய ந த⁴ம்மமஞ்ஞாயாதி அட்ட²கத²ஞ்ச பாளிஞ்ச அஜானித்வா. த⁴ம்மானுத⁴ம்மப்படிபன்னோதி நவலோகுத்தரத⁴ம்மஸ்ஸ அனுரூபத⁴ம்மம் ஸஹஸீலம் புப்³ப³பா⁴க³படிபத³ம் ந படிபன்னோ ஹோதி. இமினா உபாயேன ஸப்³ப³வாரேஸு அத்தோ² வேதி³தப்³போ³. பட²மவாரே பனேத்த² அப்பஸ்ஸுதது³ஸ்ஸீலோ கதி²தோ, து³தியே அப்பஸ்ஸுதகீ²ணாஸவோ, ததியே ப³ஹுஸ்ஸுதது³ஸ்ஸீலோ, சதுத்தே² ப³ஹுஸ்ஸுதகீ²ணாஸவோ.

ஸீலேஸு அஸமாஹிதோதி ஸீலேஸு அபரிபூரகாரீ. ஸீலதோ ச ஸுதேன சாதி ஸீலபா⁴கே³ன ச ஸுதபா⁴கே³ன ச ‘‘அயம் து³ஸ்ஸீலோ அப்பஸ்ஸுதோ’’தி ஏவம் தம் க³ரஹந்தீதி அத்தோ². தஸ்ஸ ஸம்பஜ்ஜதே ஸுதந்தி தஸ்ஸ புக்³க³லஸ்ஸ யஸ்மா தேன ஸுதேன ஸுதகிச்சம் கதம், தஸ்மா தஸ்ஸ ஸுதம் ஸம்பஜ்ஜதி நாம. நாஸ்ஸ ஸம்பஜ்ஜதேதி ஸுதகிச்சஸ்ஸ அகதத்தா ந ஸம்பஜ்ஜதி. த⁴ம்மத⁴ரந்தி ஸுதத⁴ம்மானம் ஆதா⁴ரபூ⁴தம். ஸப்பஞ்ஞந்தி ஸுபஞ்ஞம். நேக்க²ம் ஜம்போ³னத³ஸ்ஸேவாதி ஜம்பு³னத³ம் வுச்சதி ஜாதிஸுவண்ணம், தஸ்ஸ ஜம்பு³னத³ஸ்ஸ நேக்க²ம் விய, பஞ்சஸுவண்ணபரிமாணம் ஸுவண்ணக⁴டிகம் வியாதி அத்தோ².

7. ஸோப⁴னஸுத்தவண்ணனா

7. ஸத்தமே வியத்தாதி பஞ்ஞாவேய்யத்தியேன ஸமன்னாக³தா. வினீதாதி வினயம் உபேதா ஸுவினீதா. விஸாரதா³தி வேஸாரஜ்ஜேன ஸோமனஸ்ஸஸஹக³தேன ஞாணேன ஸமன்னாக³தா. த⁴ம்மத⁴ராதி ஸுதத⁴ம்மானம் ஆதா⁴ரபூ⁴தா. பி⁴க்கு² ச ஸீலஸம்பன்னோதி கா³தா²ய கிஞ்சாபி ஏகேகஸ்ஸேவ ஏகேகோ கு³ணோ கதி²தோ, ஸப்³பே³ஸம் பன ஸப்³பே³பி வட்டந்தீதி.

8. வேஸாரஜ்ஜஸுத்தவண்ணனா

8. அட்ட²மே வேஸாரஜ்ஜானீதி ஏத்த² ஸாரஜ்ஜபடிபக்கோ² வேஸாரஜ்ஜம், சதூஸு டா²னேஸு ஸாரஜ்ஜாபா⁴வம் பச்சவேக்க²ந்தஸ்ஸ உப்பன்னஸோமனஸ்ஸமயஞாணஸ்ஸேதம் நாமம். ஆஸப⁴ம் டா²னந்தி ஸேட்ட²ட்டா²னம் உத்தமட்டா²னம். ஆஸபா⁴ வா புப்³ப³பு³த்³தா⁴, தேஸம் டா²னந்தி அத்தோ². அபிச க³வஸதஜேட்ட²கோ உஸபோ⁴, க³வஸஹஸ்ஸஜேட்ட²கோ வஸபோ⁴. வஜஸதஜேட்ட²கோ வா உஸபோ⁴, வஜஸஹஸ்ஸஜேட்ட²கோ வஸபோ⁴, ஸப்³ப³க³வஸேட்டோ² ஸப்³ப³பரிஸ்ஸயஸஹோ ஸேதோ பாஸாதி³கோ மஹாபா⁴ரவஹோ அஸனிஸதஸத்³தே³ஹிபி அஸம்பகம்பியோ நிஸபோ⁴, ஸோ இத⁴ உஸபோ⁴தி அதி⁴ப்பேதோ. இத³ம்பி ஹி தஸ்ஸ பரியாயவசனம். உஸப⁴ஸ்ஸ இத³ந்தி ஆஸப⁴ம். டா²னந்தி சதூஹி பாதே³ஹி பத²விம் உப்பீளேத்வா வவத்தா²னம். இத³ம் பன ஆஸப⁴ம் வியாதி ஆஸப⁴ம். யதே²வ ஹி நிஸப⁴ஸங்கா²தோ உஸபோ⁴ சதூஹி பாதே³ஹி பத²விம் உப்பீளேத்வா அசலட்டா²னேன திட்ட²தி, ஏவம் ததா²க³தோபி சதூஹி வேஸாரஜ்ஜபாதே³ஹி அட்ட²பரிஸபத²விம் உப்பீளேத்வா ஸதே³வகே லோகே கேனசி பச்சத்தி²கேன பச்சாமித்தேன அகம்பியோ அசலட்டா²னேன திட்ட²தி. ஏவம் திட்ட²மானோவ தம் ஆஸப⁴ம் டா²னம் படிஜானாதி உபக³ச்ச²தி ந பச்சக்கா²தி, அத்தனி ஆரோபேதி. தேன வுத்தம் ‘‘ஆஸப⁴ம் டா²னம் படிஜானாதீ’’தி.

பரிஸாஸூதி அட்ட²ஸு பரிஸாஸு. ஸீஹனாத³ம் நத³தீதி ஸேட்ட²னாத³ம் அபீ⁴தனாத³ம் நத³தி, ஸீஹனாத³ஸதி³ஸம் வா நாத³ம் நத³தி. அயமத்தோ² ஸீஹனாத³ஸுத்தேன த³ஸ்ஸேதப்³போ³. யதா² வா ஸீஹோ ஸஹனதோ ச ஹனனதோ ச ஸீஹோதி வுச்சதி, ஏவம் ததா²க³தோ லோகத⁴ம்மானம் ஸஹனதோ பரப்பவாதா³னஞ்ச ஹனனதோ ஸீஹோதி வுச்சதி. ஏவம் வுத்தஸ்ஸ ஸீஹஸ்ஸ நாத³ம் ஸீஹனாத³ம். தத்த² யதா² ஸீஹோ ஸீஹப³லேன ஸமன்னாக³தோ ஸப்³ப³த்த² விஸாரதோ³ விக³தலோமஹம்ஸோ ஸீஹனாத³ம் நத³தி, ஏவம் ததா²க³தஸீஹோபி ததா²க³தப³லேஹி ஸமன்னாக³தோ அட்ட²ஸு பரிஸாஸு விஸாரதோ³ விக³தலோமஹம்ஸோ ‘‘இதி ரூப’’ந்திஆதி³னா நயேன நானாவித⁴தே³ஸனாவிலாஸஸம்பன்னம் ஸீஹனாத³ம் நத³தி. தேன வுத்தம் ‘‘பரிஸாஸு ஸீஹனாத³ம் நத³தீ’’தி.

ப்³ரஹ்மசக்கம் பவத்தேதீதி ஏத்த² ப்³ரஹ்மந்தி ஸேட்ட²ம் உத்தமம் விஸுத்³த⁴ம். சக்கஸத்³தோ³ பனாயம் –

‘‘ஸம்பத்தியம் லக்க²ணே ச, ரத²ங்கே³ இரியாபதே²;

தா³னே ரதனத⁴ம்மூர-சக்காதீ³ஸு ச தி³ஸ்ஸதி;

த⁴ம்மசக்கே இத⁴ மதோ, தஞ்ச த்³வேதா⁴ விபா⁴வயே’’.

‘‘சத்தாரிமானி, பி⁴க்க²வே, சக்கானி, யேஹி ஸமன்னாக³தானம் தே³வமனுஸ்ஸான’’ந்திஆதீ³ஸு (அ. நி. 4.31) ஹி அயம் ஸம்பத்தியம் தி³ஸ்ஸதி. ‘‘பாத³தலேஸு சக்கானி ஜாதானீ’’தி (தீ³. நி. 2.35) ஏத்த² லக்க²ணே. ‘‘சக்கம்வ வஹதோ பத³’’ந்தி (த⁴. ப. 1) ஏத்த² ரத²ங்கே³. ‘‘சதுசக்கம் நவத்³வார’’ந்தி (ஸம். நி. 1.29) ஏத்த² இரியாபதே². ‘‘த³த³ம் பு⁴ஞ்ஜ மா ச பமாதோ³, சக்கம் வத்தய ஸப்³ப³பாணின’’ந்தி (ஜா. 1.7.149) ஏத்த² தா³னே. ‘‘தி³ப்³ப³ம் சக்கரதனம் பாதுரஹோஸீ’’தி (தீ³. நி. 2.243; ம. நி. 3.256) ஏத்த² ரதனசக்கே. ‘‘மயா பவத்திதம் சக்க’’ந்தி (ஸு. நி. 562) ஏத்த² த⁴ம்மசக்கே. ‘‘இச்சா²ஹதஸ்ஸ போஸஸ்ஸ, சக்கம் ப⁴மதி மத்த²கே’’தி (ஜா. 1.1.104; 1.5.103) ஏத்த² உரசக்கே. ‘‘கு²ரபரியந்தேன சேபி சக்கேனா’’தி (தீ³. நி. 1.166) ஏத்த² பஹரணசக்கே. ‘‘அஸனிவிசக்க’’ந்தி (தீ³. நி. 3.61; ஸம். நி. 2.162) ஏத்த² அஸனிமண்ட³லே. இத⁴ பனாயம் த⁴ம்மசக்கே மதோ.

தம் பனேதம் த⁴ம்மசக்கம் து³வித⁴ம் ஹோதி படிவேத⁴ஞாணஞ்ச தே³ஸனாஞாணஞ்ச. தத்த² பஞ்ஞாபபா⁴விதம் அத்தனோ அரியப²லாவஹம் படிவேத⁴ஞாணம், கருணாபபா⁴விதம் ஸாவகானம் அரியப²லாவஹம் தே³ஸனாஞாணம். தத்த² படிவேத⁴ஞாணம் உப்பஜ்ஜமானம் உப்பன்னந்தி து³வித⁴ம். தஞ்ஹி அபி⁴னிக்க²மனதோ யாவ அரஹத்தமக்³கா³ உப்பஜ்ஜமானம், ப²லக்க²ணே உப்பன்னம் நாம. துஸிதப⁴வனதோ வா யாவ மஹாபோ³தி⁴பல்லங்கே அரஹத்தமக்³கா³ உப்பஜ்ஜமானம், ப²லக்க²ணே உப்பன்னம் நாம. தீ³பங்கரதோ பட்டா²ய வா யாவ போ³தி⁴பல்லங்கே அரஹத்தமக்³கா³ உப்பஜ்ஜமானம், ப²லக்க²ணே உப்பன்னம் நாம. தே³ஸனாஞாணம்பி பவத்தமானம் பவத்தந்தி து³வித⁴ம். தஞ்ஹி யாவ அஞ்ஞாஸிகோண்ட³ஞ்ஞஸ்ஸ ஸோதாபத்திமக்³கா³ பவத்தமானம், ப²லக்க²ணே பவத்தம் நாம. தேஸு படிவேத⁴ஞாணம் லோகுத்தரம், தே³ஸனாஞாணம் லோகியம். உப⁴யம்பி பனேதம் அஞ்ஞேஹி அஸாதா⁴ரணம், பு³த்³தா⁴னம்யேவ ஓரஸஞாணம்.

ஸம்மாஸம்பு³த்³த⁴ஸ்ஸ தே படிஜானதோதி ‘‘அஹம் ஸம்மாஸம்பு³த்³தோ⁴, ஸப்³பே³ த⁴ம்மா மயா அபி⁴ஸம்பு³த்³தா⁴’’தி ஏவம் படிஜானதோ தவ. அனபி⁴ஸம்பு³த்³தா⁴தி இமே நாம த⁴ம்மா தயா அனபி⁴ஸம்பு³த்³தா⁴. தத்ர வதாதி தேஸு ‘‘அனபி⁴ஸம்பு³த்³தா⁴’’தி ஏவம் த³ஸ்ஸிதத⁴ம்மேஸு. ஸஹத⁴ம்மேனாதி ஸஹேதுனா ஸகாரணேன வசனேன. நிமித்தமேதந்தி ஏத்த² புக்³க³லோபி த⁴ம்மோபி நிமித்தந்தி அதி⁴ப்பேதோ. தம் புக்³க³லம் ந பஸ்ஸாமி, யோ மம் படிசோதே³ஸ்ஸதி. தம் த⁴ம்மம் ந பஸ்ஸாமி, யம் த³ஸ்ஸேத்வா ‘‘அயம் நாம த⁴ம்மோ தயா அனபி⁴ஸம்பு³த்³தோ⁴’’தி மம் படிசோதே³ஸ்ஸதீதி அயமேத்த² அத்தோ². கே²மப்பத்தோதி கே²மம் பத்தோ. ஸேஸபத³த்³வயம் இமஸ்ஸேவ வேவசனம். ஸப்³ப³ம்பேதம் வேஸாரஜ்ஜஞாணமேவ ஸந்தா⁴ய வுத்தம். த³ஸப³லஸ்ஸ ஹி ‘‘அயம் நாம த⁴ம்மோ தயா அனபி⁴ஸம்பு³த்³தோ⁴’’தி சோத³கம் புக்³க³லம் வா சோத³னாகாரணம் அனபி⁴ஸம்பு³த்³த⁴த⁴ம்மம் வா அபஸ்ஸதோ ‘‘ஸபா⁴வபு³த்³தோ⁴யேவ வத ஸமானோ அஹம் பு³த்³தோ⁴ஸ்மீதி வதா³மீ’’தி பச்சவேக்க²ந்தஸ்ஸ ப³லவதரம் ஸோமனஸ்ஸம் உப்பஜ்ஜதி, தேன ஸம்பயுத்தம் ஞாணம் வேஸாரஜ்ஜம் நாம. தம் ஸந்தா⁴ய ‘‘கே²மப்பத்தோ’’திஆதி³மாஹ. ஏவம் ஸப்³ப³த்த² அத்தோ² வேதி³தப்³போ³.

அந்தராயிகா த⁴ம்மாதி ஏத்த² பன அந்தராயம் கரோந்தீதி அந்தராயிகா. தே அத்த²தோ ஸஞ்சிச்ச வீதிக்கந்தா ஸத்த ஆபத்திக்க²ந்தா⁴. ஸஞ்சிச்ச வீதிக்கந்தம் ஹி அந்தமஸோ து³க்கடது³ப்³பா⁴ஸிதம்பி மக்³க³ப²லானம் அந்தராயம் கரோதி. இத⁴ பன மேது²னத⁴ம்மோ அதி⁴ப்பேதோ. மேது²னம் ஸேவதோ ஹி யஸ்ஸ கஸ்ஸசி நிஸ்ஸம்ஸயமேவ மக்³க³ப²லானம் அந்தராயோ ஹோதி.

யஸ்ஸ கோ² பன தே அத்தா²யாதி ராக³க்க²யாதீ³ஸு யஸ்ஸ அத்தா²ய. த⁴ம்மோ தே³ஸிதோதி அஸுப⁴பா⁴வனாதி³த⁴ம்மோ கதி²தோ. தத்ர வத மந்தி தஸ்மிம் அனிய்யானிகத⁴ம்மே மம். ஸேஸம் வுத்தனயேனேவ வேதி³தப்³ப³ம்.

வாத³பதா²தி வாதா³யேவ. புதூ²தி ப³ஹூ. ஸிதாதி உபனிப³த்³தா⁴ அபி⁴ஸங்க²தா. அத² வா புது²ஸ்ஸிதாதி புது²பா⁴வம் ஸிதா உபக³தா, புதூ²ஹி வா ஸிதாதிபி புது²ஸ்ஸிதா. யம் நிஸ்ஸிதாதி ஏதரஹிபி யம் வாத³பத²ம் நிஸ்ஸிதா. ந தே ப⁴வந்தீதி தே வாத³பதா² ந ப⁴வந்தி பி⁴ஜ்ஜந்தி வினஸ்ஸந்தி. த⁴ம்மசக்கந்தி தே³ஸனாஞாணஸ்ஸபி படிவேத⁴ஞாணஸ்ஸபி ஏதம் நாமம். தேஸு தே³ஸனாஞாணம் லோகியம், படிவேத⁴ஞாணம் லோகுத்தரம். கேவலீதி ஸகலகு³ணஸமன்னாக³தோ. தாதி³ஸந்தி ததா²வித⁴ம்.

9. தண்ஹுப்பாத³ஸுத்தவண்ணனா

9. நவமே உப்பஜ்ஜதி ஏதேஸூதி உப்பாதா³. கா உப்பஜ்ஜதி? தண்ஹா. தண்ஹாய உப்பாதா³ தண்ஹுப்பாதா³, தண்ஹாவத்தூ²னி தண்ஹாகாரணானீதி அத்தோ². சீவரஹேதூதி ‘‘கத்த² மனாபம் சீவரம் லபி⁴ஸ்ஸாமீ’’தி சீவரகாரணா உப்பஜ்ஜதி. இதிப⁴வாப⁴வஹேதூதி ஏத்த² இதீதி நித³ஸ்ஸனத்தே² நிபாதோ. யதா² சீவராதி³ஹேது, ஏவம் ப⁴வாப⁴வஹேதுபீதி அத்தோ². ப⁴வாப⁴வோதி சேத்த² பணீததரானி ஸப்பினவனீதாதீ³னி அதி⁴ப்பேதானி. ஸம்பத்திப⁴வேஸு பணீததரபணீததமப⁴வோதிபி வத³ந்தியேவ.

தண்ஹாது³தியோதி அயஞ்ஹி ஸத்தோ அனமதக்³கே³ ஸம்ஸாரவட்டே ஸம்ஸரந்தோ ந ஏககோவ ஸம்ஸரதி, தண்ஹம் பன து³தியிகம் லப⁴ந்தோவ ஸம்ஸரதி. தேன வுத்தம் ‘‘தண்ஹாது³தியோ’’தி. இத்த²பா⁴வஞ்ஞதா²பா⁴வந்தி ஏத்த² இத்த²பா⁴வோ நாம அயம் அத்தபா⁴வோ, அஞ்ஞதா²பா⁴வோ நாம அனாக³தத்தபா⁴வோ. ஏவரூபோ வா அஞ்ஞோபி அத்தபா⁴வோ இத்த²பா⁴வோ நாம, ந ஏவரூபோ அஞ்ஞதா²பா⁴வோ நாம. தம் இத்த²பா⁴வஞ்ஞதா²பா⁴வம். ஸம்ஸாரந்தி க²ந்த⁴தா⁴துஆயதனானம் படிபாடிம். நாதிவத்ததீதி நாதிக்கமதி. ஏவமாதீ³னவம் ஞத்வாதி ஏவம் அதீதானாக³தபச்சுப்பன்னேஸு க²ந்தே⁴ஸு ஆதீ³னவம் ஜானித்வா. தண்ஹம் து³க்க²ஸ்ஸ ஸம்ப⁴வந்தி தண்ஹம் ச ‘‘அயம் வட்டது³க்க²ஸம்பூ⁴தோ ஸபா⁴வோ காரண’’ந்தி ஏவம் ஜானித்வா. ஏத்தாவதா இமஸ்ஸ பி⁴க்கு²னோ விபஸ்ஸனம் வட்³டே⁴த்வா அரஹத்தம் பத்தபா⁴வோ த³ஸ்ஸிதோ. இதா³னி தம் கீ²ணாஸவம் தோ²மேந்தோ வீததண்ஹோதிஆதி³மாஹ. தத்த² அனாதா³னோதி நிக்³க³ஹணோ. ஸதோ பி⁴க்கு² பரிப்³ப³ஜேதி ஸதிஸம்பஜஞ்ஞே வேபுல்லப்பத்தோ கீ²ணாஸவோ பி⁴க்கு² ஸதோ ஸம்பஜானோ சரேய்ய விஹரேய்யாதி அத்தோ². இதி ஸுத்தந்தே வட்டம் கதே²த்வா கா³தா²ஸு வட்டவிவட்டம் கதி²தந்தி.

10. யோக³ஸுத்தவண்ணனா

10. த³ஸமே வட்டஸ்மிம் யோஜேந்தீதி யோகா³. காமயோகோ³திஆதீ³ஸு பஞ்சகாமகு³ணிகோ ராகோ³ காமயோகோ³. ரூபாரூபப⁴வேஸு ச²ந்த³ராகோ³ ப⁴வயோகோ³, ததா² ஜா²னனிகந்தி. ஸஸ்ஸததி³ட்டி²ஸஹக³தோ ச ராகோ³ த்³வாஸட்டி² தி³ட்டி²யோ ச தி³ட்டி²யோகோ³. சதூஸு ஸச்சேஸு அஞ்ஞாணம் அவிஜ்ஜாயோகோ³. காமேஸு வா யோஜேதீதி காமயோகோ³. ப⁴வேஸு யோஜேதீதி ப⁴வயோகோ³. தி³ட்டீ²ஸு யோஜேதீதி தி³ட்டி²யோகோ³. அவிஜ்ஜாய யோஜேதீதி அவிஜ்ஜாயோகோ³தி ஹேட்டா² வுத்தத⁴ம்மானம்யேவேதம் அதி⁴வசனம்.

இதா³னி தே வித்தா²ரேத்வா த³ஸ்ஸேந்தோ கதமோ ச, பி⁴க்க²வேதிஆதி³மாஹ. தத்த² ஸமுத³யந்தி உப்பத்திம். அத்த²ங்க³மந்தி பே⁴த³ம். அஸ்ஸாத³ந்தி மது⁴ரபா⁴வம். ஆதீ³னவந்தி அமது⁴ரபா⁴வம் தோ³ஸம். நிஸ்ஸரணந்தி நிஸ்ஸடபா⁴வம். காமேஸூதி வத்து²காமேஸு. காமராகோ³தி காமே ஆரப்³ப⁴ உப்பன்னராகோ³. ஸேஸபதே³ஸுபி ஏஸேவ நயோ. அனுஸேதீதி நிப்³ப³த்ததி. அயம் வுச்சதி, பி⁴க்க²வே, காமயோகோ³தி, பி⁴க்க²வே, இத³ம் காமேஸு யோஜனகாரணம் ப³ந்த⁴னகாரணம் வுச்சதீதி ஏவம் ஸப்³ப³த்த² அத்தோ² வேதி³தப்³போ³.

ப²ஸ்ஸாயதனானந்தி சக்கா²தீ³னம் சக்கு²ஸம்ப²ஸ்ஸாதி³காரணானம். அவிஜ்ஜா அஞ்ஞாணந்தி ஞாணபடிபக்க²பா⁴வேன அஞ்ஞாணஸங்கா²தா அவிஜ்ஜா. இதி காமயோகோ³தி ஏத்த² இதி ஸத்³தோ³ சதூஹிபி யோகே³ஹி ஸத்³தி⁴ம் யோஜேதப்³போ³ ‘‘ஏவம் காமயோகோ³, ஏவம் ப⁴வயோகோ³’’தி. ஸம்யுத்தோதி பரிவாரிதோ. பாபகேஹீதி லாமகேஹி. அகுஸலேஹீதி அகோஸல்லஸம்பூ⁴தேஹி. ஸம்கிலேஸிகேஹீதி ஸம்கிலேஸனகேஹி, பஸன்னஸ்ஸ சித்தஸ்ஸ பஸன்னபா⁴வதூ³ஸகேஹீதி அத்தோ². போனோப்³ப⁴விகேஹீதி புனப்³ப⁴வனிப்³ப³த்தகேஹி. ஸத³ரேஹீதி ஸத³ரதே²ஹி. து³க்க²விபாகேஹீதி விபாககாலே து³க்கு²ப்பாத³கேஹி. ஆயதிம் ஜாதிஜராமரணிகேஹீதி அனாக³தே புனப்புனம் ஜாதிஜராமரணனிப்³ப³த்தகேஹி. தஸ்மா அயோக³க்கே²மீதி வுச்சதீதி யஸ்மா அப்பஹீனயோகோ³ புக்³க³லோ ஏதேஹி த⁴ம்மேஹி ஸம்பயுத்தோ ஹோதி, தஸ்மா சதூஹி யோகே³ஹி கே²மம் நிப்³பா³னம் அனதி⁴க³தத்தா ந யோக³க்கே²மீதி வுச்சதி.

விஸம்யோகோ³தி விஸம்யோஜனகாரணானி. காமயோக³விஸம்யோகோ³தி காமயோக³தோ விஸம்யோஜனகாரணம். ஸேஸபதே³ஸுபி ஏஸேவ நயோ. தத்த² அஸுப⁴ஜ்ஜா²னம் காமயோக³விஸம்யோகோ³, தம் பாத³கம் கத்வா அதி⁴க³தோ அனாகா³மிமக்³கோ³ ஏகந்தேனேவ காமயோக³விஸம்யோகோ³ நாம. அரஹத்தமக்³கோ³ ப⁴வயோக³விஸம்யோகோ³ நாம, ஸோதாபத்திமக்³கோ³ தி³ட்டி²யோக³விஸம்யோகோ³ நாம, அரஹத்தமக்³கோ³ அவிஜ்ஜாயோக³விஸம்யோகோ³ நாம. இதா³னி தே வித்தா²ரவஸேன த³ஸ்ஸேந்தோ கதமோ ச, பி⁴க்க²வேதிஆதி³மாஹ. தஸ்ஸத்தோ² வுத்தனயேனேவ வேதி³தப்³போ³.

ப⁴வயோகே³ன சூப⁴யந்தி ப⁴வயோகே³ன ச ஸம்யுத்தா, கிஞ்சி பி⁴ய்யோ உப⁴யேனாபி ஸம்பயுத்தா, யேன கேனசி யோகே³ன ஸமன்னாக³தாதி அத்தோ². புரக்க²தாதி புரதோ கதா, பரிவாரிதா வா. காமே பரிஞ்ஞாயாதி து³விதே⁴பி காமே பரிஜானித்வா. ப⁴வயோக³ஞ்ச ஸப்³ப³ஸோதி ப⁴வயோக³ஞ்ச ஸப்³ப³மேவ பரிஜானித்வா. ஸமூஹச்சாதி ஸமூஹனித்வா. விராஜயந்தி விராஜேந்தோ, விராஜேத்வா வா. ‘‘விராஜேந்தோ’’தி ஹி வுத்தே மக்³கோ³ கதி²தோ ஹோதி, ‘‘விராஜேத்வா’’தி வுத்தே ப²லம். முனீதி கீ²ணாஸவமுனி. இதி இமஸ்மிம் ஸுத்தேபி கா³தா²ஸுபி வட்டவிவட்டமேவ கதி²தந்தி.

ப⁴ண்ட³கா³மவக்³கோ³ பட²மோ.

2. சரவக்³கோ³

1. சரஸுத்தவண்ணனா

11. து³தியஸ்ஸ பட²மே அதி⁴வாஸேதீதி சித்தம் அதி⁴ரோபேத்வா வாஸேதி. நப்பஜஹதீதி ந பரிச்சஜதி. ந வினோதே³தீதி ந நீஹரதி. ந ப்³யந்தீகரோதீதி ந விக³தந்தம் பரிச்சி²ன்னபரிவடுமம் கரோதி. ந அனபா⁴வம் க³மேதீதி ந அனுஅபா⁴வம் அவட்³டி⁴ம் வினாஸம் க³மேதி. சரம்பீதி சரந்தோபி. அனாதாபீதி நிப்³பீ³ரியோ. அனோத்தாபீதி உபவாத³ப⁴யரஹிதோ. ஸததந்தி நிச்சம். ஸமிதந்தி நிரந்தரம். ஏவம் ஸப்³ப³த்த² அத்த²ம் ஞத்வா ஸுக்கபக்கே² வுத்தவிபரியாயேன அத்தோ² வேதி³தப்³போ³.

கா³தா²ஸு கே³ஹனிஸ்ஸிதந்தி கிலேஸனிஸ்ஸிதம். மோஹனேய்யேஸூதி மோஹஜனகேஸு ஆரம்மணேஸு. அப⁴ப்³போ³தி அபா⁴ஜனபூ⁴தோ. பு²ட்டு²ம் ஸம்போ³தி⁴முத்தமந்தி அரஹத்தமக்³க³ஸங்கா²தம் உத்தமஞாணம் பு²ஸிதும்.

2. ஸீலஸுத்தவண்ணனா

12. து³தியே ஸம்பன்னஸீலாதி பரிபுண்ணஸீலா. ஸம்பன்னபாதிமோக்கா²தி பரிபுண்ணபாதிமோக்கா². பாதிமோக்க²ஸம்வரஸம்வுதாதி பாதிமோக்க²ஸம்வரஸீலேன ஸம்வுதா பிஹிதா உபேதா ஹுத்வா விஹரத². ஆசாரகோ³சரஸம்பன்னாதி ஆசாரேன ச கோ³சரேன ச ஸம்பன்னா ஸமுபாக³தா ப⁴வத². அணுமத்தேஸு வஜ்ஜேஸூதி அணுப்பமாணேஸு தோ³ஸேஸு. ப⁴யத³ஸ்ஸாவினோதி தானி அணுமத்தானி வஜ்ஜானி ப⁴யதோ த³ஸ்ஸனஸீலா. ஸமாதா³ய ஸிக்க²த² ஸிக்கா²பதே³ஸூதி ஸப்³ப³ஸிக்கா²கோட்டா²ஸேஸு ஸமாதா³தப்³ப³ம் ஸமாதா³ய க³ஹேத்வா ஸிக்க²த². ‘‘ஸம்பன்னஸீலானம்…பே… ஸிக்கா²பதே³ஸூ’’தி ஏத்தகேன த⁴ம்மக்கா²னேன ஸிக்க²த்தயே ஸமாதா³பேத்வா சேவ படிலத்³த⁴கு³ணேஸு ச வண்ணம் கதே²த்வா இதா³னி உத்தரி காதப்³ப³ம் த³ஸ்ஸேந்தோ கிமஸ்ஸாதிஆதி³மாஹ. தத்த² கிமஸ்ஸாதி கிம் ப⁴வேய்ய.

யதம் சரேதி யதா² சரந்தோ யதோ ஹோதி ஸம்யதோ, ஏவம் சரேய்ய. ஏஸ நயோ ஸப்³ப³த்த². அச்சே²தி நிஸீதே³ய்ய. யதமேனம் பஸாரயேதி யம் அங்க³பச்சங்க³ம் பஸாரேய்ய, தம் யதம் ஸம்யதமேவ கத்வா பஸாரேய்ய. உத்³த⁴ந்தி உபரி. திரியந்தி மஜ்ஜ²ம். அபாசீனந்தி அதோ⁴. ஏத்தாவதா அதீதா பச்சுப்பன்னா அனாக³தா ச பஞ்சக்க²ந்தா⁴ கதி²தா. யாவதாதி பரிச்சே²த³வசனம். ஜக³தோ க³தீதி லோகஸ்ஸ நிப்ப²த்தி. ஸமவேக்கி²தா ச த⁴ம்மானம், க²ந்தா⁴னம் உத³யப்³ப³யந்தி ஏதேஸம் ஸப்³ப³லோகே அதீதாதி³பே⁴தா³னம் பஞ்சக்க²ந்த⁴த⁴ம்மானம் உத³யஞ்ச வயஞ்ச ஸமவேக்கி²தா. ‘‘பஞ்சக்க²ந்தா⁴னம் உத³யம் பஸ்ஸந்தோ பஞ்சவீஸதி லக்க²ணானி பஸ்ஸதி, வயம் பஸ்ஸந்தோ பஞ்சவீஸதி லக்க²ணானி பஸ்ஸதீ’’தி வுத்தேஹி ஸமபஞ்ஞாஸாய லக்க²ணேஹி ஸம்மா அவேக்கி²தா ஹோதி. சேதோஸமத²ஸாமீசிந்தி சித்தஸமத²ஸ்ஸ அனுச்ச²விகம் படிபத³ம். ஸிக்க²மானந்தி படிபஜ்ஜமானம், பூரயமானந்தி அத்தோ². பஹிதத்தோதி பேஸிதத்தோ. ஆஹூதி கத²யந்தி. ஸேஸமேத்த² உத்தானமேவ. இமஸ்மிம் பன ஸுத்தே ஸீலம் மிஸ்ஸகம் கதே²த்வா கா³தா²ஸு கீ²ணாஸவோ கதி²தோ.

3. பதா⁴னஸுத்தவண்ணனா

13. ததியே ஸம்மப்பதா⁴னானீதி ஸுந்த³ரபதா⁴னானி உத்தமவீரியானி. ஸம்மப்பதா⁴னாதி பரிபுண்ணவீரியா. மாரதே⁴ய்யாபி⁴பூ⁴தாதி தேபூ⁴மகவட்டஸங்கா²தம் மாரதே⁴ய்யம் அபி⁴ப⁴வித்வா ஸமதிக்கமித்வா டி²தா. தே அஸிதாதி தே கீ²ணாஸவா அனிஸ்ஸிதா நாம. ஜாதிமரணப⁴யஸ்ஸாதி ஜாதிஞ்ச மரணஞ்ச படிச்ச உப்பஜ்ஜனகப⁴யஸ்ஸ, ஜாதிமரணஸங்கா²தஸ்ஸேவ வா ப⁴யஸ்ஸ. பாரகூ³தி பாரங்க³தா. தே துஸிதாதி தே கீ²ணாஸவா துட்டா² நாம. ஜேத்வா மாரம் ஸவாஹினிந்தி ஸஸேனகம் மாரம் ஜினித்வா டி²தா. தே அனேஜாதி தே கீ²ணாஸவா தண்ஹாஸங்கா²தாய ஏஜாய அனேஜா நிச்சலா நாம. நமுசிப³லந்தி மாரப³லம். உபாதிவத்தாதி அதிக்கந்தா. தே ஸுகி²தாதி தே கீ²ணாஸவா லோகுத்தரஸுகே²ன ஸுகி²தா நாம. தேனேவாஹ –

‘‘ஸுகி²தா வத அரஹந்தோ, தண்ஹா நேஸம் ந விஜ்ஜதி;

அஸ்மிமானோ ஸமுச்சி²ன்னோ, மோஹஜாலம் பதா³லித’’ந்தி. (ஸம். நி. 3.76);

4. ஸம்வரஸுத்தவண்ணனா

14. சதுத்தே² பதா⁴னானீதி வீரியானி. ஸம்வரப்பதா⁴னந்தி சக்கா²தீ³னி ஸம்வரந்தஸ்ஸ உப்பன்னவீரியம். பஹானப்பதா⁴னந்தி காமவிதக்காத³யோ பஜஹந்தஸ்ஸ உப்பன்னவீரியம். பா⁴வனாப்பதா⁴னந்தி ஸம்போ³ஜ்ஜ²ங்கே³ பா⁴வேந்தஸ்ஸ உப்பன்னவீரியம். அனுரக்க²ணாப்பதா⁴னந்தி ஸமாதி⁴னிமித்தம் அனுரக்க²ந்தஸ்ஸ உப்பன்னவீரியம்.

விவேகனிஸ்ஸிதந்திஆதீ³ஸு விவேகோ, விராகோ³, நிரோதோ⁴தி தீணிபி நிப்³பா³னஸ்ஸ நாமானி. நிப்³பா³னம் ஹி உபதி⁴விவேகத்தா விவேகோ, தம் ஆக³ம்ம ராகா³த³யோ விரஜ்ஜந்தீதி விராகோ³, நிருஜ்ஜ²ந்தீதி நிரோதோ⁴. தஸ்மா விவேகனிஸ்ஸிதந்திஆதீ³ஸு ஆரம்மணவஸேன வா அதி⁴க³ந்தப்³ப³வஸேன வா நிப்³பா³னனிஸ்ஸிதந்தி அத்தோ².

வோஸ்ஸக்³க³பரிணாமிந்தி ஏத்த² த்³வே வோஸ்ஸக்³கா³ – பரிச்சாக³வோஸ்ஸக்³கோ³ ச பக்க²ந்த³னவோஸ்ஸக்³கோ³ ச. தத்த² விபஸ்ஸனா தத³ங்க³வஸேன கிலேஸே ச க²ந்தே⁴ ச ராக³ம் பரிச்சஜதீதி பரிச்சாக³வோஸ்ஸக்³கோ³. மக்³கோ³ ஆரம்மணவஸேன நிப்³பா³னம் பக்க²ந்த³தீதி பக்க²ந்த³னவோஸ்ஸக்³கோ³. தஸ்மா வோஸ்ஸக்³க³பரிணாமிந்தி யதா² பா⁴வியமானோ ஸதிஸம்போ³ஜ்ஜ²ங்கோ³ வோஸ்ஸக்³க³த்தா²ய பரிணமதி, விபஸ்ஸனாபா⁴வஞ்ச மக்³க³பா⁴வஞ்ச பாபுணாதி, ஏவம் தம் பா⁴வேதீதி அயமேத்த² அத்தோ². ஸேஸபதே³ஸுபி ஏஸேவ நயோ. ப⁴த்³த³கந்தி லத்³த⁴கம். ஸமாதி⁴னிமித்தம் வுச்சதி அட்டி²கஸஞ்ஞாதி³வஸேன அதி⁴க³தோ ஸமாதி⁴யேவ. அனுரக்க²தீதி ஸமாதி⁴பாரிபந்தி²கத⁴ம்மே ராக³தோ³ஸமோஹே ஸோதே⁴ந்தோ ரக்க²தி. ஏத்த² ச அட்டி²கஸஞ்ஞாதி³கா பஞ்சேவ ஸஞ்ஞா வுத்தா, இமஸ்மிம் பன டா²னே த³ஸபி அஸுபா⁴னி வித்தா²ரேத்வா கதே²தப்³பா³னி. தேஸம் வித்தா²ரோ விஸுத்³தி⁴மக்³கே³ (விஸுத்³தி⁴. 1.102 ஆத³யோ) வுத்தோயேவ. கா³தா²ய ஸம்வராதி³னிப்பா²த³கம் வீரியமேவ வுத்தம். க²யம் து³க்க²ஸ்ஸ பாபுணேதி து³க்க²க்க²யஸங்கா²தம் அரஹத்தம் பாபுணேய்யாதி.

5. பஞ்ஞத்திஸுத்தவண்ணனா

15. பஞ்சமே அக்³க³பஞ்ஞத்தியோதி உத்தமபஞ்ஞத்தியோ. அத்தபா⁴வீனந்தி அத்தபா⁴வவந்தானம். யதி³த³ம் ராஹு அஸுரிந்தோ³தி யோ ஏஸ ராஹு அஸுரிந்தோ³ அயம் அக்³கோ³தி. ஏத்த² ராஹு கிர அஸுரிந்தோ³ சத்தாரி யோஜனஸஹஸ்ஸானி அட்ட² ச யோஜனஸதானி உச்சோ, பா³ஹந்தரமஸ்ஸ த்³வாத³ஸயோஜனஸதானி, ஹத்த²தலபாத³தலானம் புது²லதா தீணி யோஜனஸதானி. அங்கு³லிபப்³பா³னி பண்ணாஸ யோஜனானி, ப⁴முகந்தரம் பண்ணாஸயோஜனம், நலாடம் தியோஜனஸதம், ஸீஸம் நவயோஜனஸதம். காமபோ⁴கீ³னம் யதி³த³ம் ராஜா மந்தா⁴தாதி யோ ஏஸ ராஜா மந்தா⁴தா நாம, அயம் தி³ப்³பே³பி மானுஸகேபி காமே பரிபு⁴ஞ்ஜனகானம் ஸத்தானம் அக்³கோ³ நாம. ஏஸ ஹி அஸங்கே²ய்யாயுகேஸு மனுஸ்ஸேஸு நிப்³ப³த்தித்வா இச்சி²திச்சி²தக்க²ணே ஹிரஞ்ஞவஸ்ஸம் வஸ்ஸாபேந்தோ மானுஸகே காமே தீ³க⁴ரத்தம் பரிபு⁴ஞ்ஜி. தே³வலோகே பன யாவ ச²த்திம்ஸாய இந்தா³னம் ஆயுப்பமாணம், தாவ பணீதே காமே பரிபு⁴ஞ்ஜீதி காமபோ⁴கீ³னம் அக்³கோ³ நாம ஜாதோ. ஆதி⁴பதேய்யானந்தி அதி⁴பதிட்டா²னம் ஜேட்ட²கட்டா²னம் கரோந்தானம். ததா²க³தோ அக்³க³மக்கா²யதீதி லோகியலோகுத்தரேஹி கு³ணேஹி ததா²க³தோ அக்³கோ³ ஸேட்டோ² உத்தமோ அக்கா²யதி.

இத்³தி⁴யா யஸஸா ஜலந்தி தி³ப்³ப³ஸம்பத்திஸமித்³தி⁴யா ச பரிவாரஸங்கா²தேன யஸஸா ச ஜலந்தானம். உத்³த⁴ம் திரியம் அபாசீனந்தி உபரி ச மஜ்ஜே² ச ஹேட்டா² ச. யாவதா ஜக³தோ க³தீதி யத்தகா லோகனிப்ப²த்தி.

6. ஸோகு²ம்மஸுத்தவண்ணனா

16. ச²ட்டே² ஸோகு²ம்மானீதி ஸுகு²மலக்க²ணபடிவிஜ்ஜ²னகானி ஞாணானி. ரூபஸோகு²ம்மேன ஸமன்னாக³தோ ஹோதீதி ரூபே ஸண்ஹஸுகு²மலக்க²ணபரிக்³கா³ஹகேன ஞாணேன ஸமன்னாக³தோ ஹோதி. பரமேனாதி உத்தமேன. தேன ச ரூபஸோகு²ம்மேனாதி தேன யாவ அனுலோமபா⁴வம் பத்தேன ஸுகு²மலக்க²ணபரிக்³கா³ஹகஞாணேன. ந ஸமனுபஸ்ஸதீதி நத்தி²பா⁴வேனேவ ந பஸ்ஸதி. ந பத்தே²தீதி நத்தி²பா⁴வேனேவ ந பத்தே²தி. வேத³னாஸோகு²ம்மாதீ³ஸுபி ஏஸேவ நயோ.

ரூபஸோகு²ம்மதம் ஞத்வாதி ரூபக்க²ந்த⁴ஸ்ஸ ஸண்ஹஸுகு²மலக்க²ணபரிக்³கா³ஹகேன ஞாணேன ஸுகு²மதம் ஜானித்வா. வேத³னானஞ்ச ஸம்ப⁴வந்தி வேத³னாக்க²ந்த⁴ஸ்ஸ ச பப⁴வம் ஜானித்வா. ஸஞ்ஞா யதோ ஸமுதே³தீதி யஸ்மா காரணா ஸஞ்ஞாக்க²ந்தோ⁴ ஸமுதே³தி நிப்³ப³த்ததி, தஞ்ச ஜானித்வா. அத்த²ம் க³ச்ச²தி யத்த² சாதி யஸ்மிம் டா²னே நிருஜ்ஜ²தி, தஞ்ச ஜானித்வா. ஸங்கா²ரே பரதோ ஞத்வாதி ஸங்கா²ரக்க²ந்த⁴ம் அனிச்சதாய லுஜ்ஜனபா⁴வேன பரதோ ஜானித்வா. இமினா ஹி பதே³ன அனிச்சானுபஸ்ஸனா கதி²தா. து³க்க²தோ நோ ச அத்ததோதி இமினா து³க்கா²னத்தானுபஸ்ஸனா. ஸந்தோதி கிலேஸஸந்ததாய ஸந்தோ. ஸந்திபதே³ ரதோதி நிப்³பா³னே ரதோ. இதி ஸுத்தந்தே சதூஸு டா²னேஸு விபஸ்ஸனாவ கதி²தா, கா³தா²ஸு லோகுத்தரத⁴ம்மோபீதி.

7. பட²மஅக³திஸுத்தவண்ணனா

17-19. ஸத்தமே அக³திக³மனானீதி நக³திக³மனானி. ச²ந்தா³க³திம் க³ச்ச²தீதி ச²ந்தே³ன அக³திம் க³ச்ச²தி, அகத்தப்³ப³ம் கரோதி. ஸேஸேஸுபி ஏஸேவ நயோ. ச²ந்தா³ தோ³ஸா ப⁴யா மோஹாதி ச²ந்தே³ன, தோ³ஸேன, ப⁴யேன, மோஹேன. அதிவத்ததீதி அதிக்கமதி. அட்ட²மம் உத்தானமேவ. நவமே ததா²பு³ஜ்ஜ²னகானம் வஸேன த்³வீஹிபி நயேஹி கதி²தம்.

10. ப⁴த்துத்³தே³ஸகஸுத்தவண்ணனா

20. த³ஸமே ப⁴த்துத்³தே³ஸகோதி ஸலாகப⁴த்தாதீ³னம் உத்³தே³ஸகோ. காமேஸு அஸம்யதாதி வத்து²காமேஸு கிலேஸகாமேஹி அஸம்யதா. பரிஸாகஸடோ ச பனேஸ வுச்சதீதி அயஞ்ச பன ஸோ ஏவரூபா பரிஸாகசவரோ நாம வுச்சதீதி அத்தோ². ஸமணேனாதி பு³த்³த⁴ஸமணேன. பரிஸாய மண்டோ³ ச பனேஸ வுச்சதீதி அயம் ஏவரூபா பரிஸா விப்பஸன்னேன பரிஸாமண்டோ³தி வுச்சதீதி.

சரவக்³கோ³ து³தியோ.

3. உருவேலவக்³கோ³

1. பட²மஉருவேலஸுத்தவண்ணனா

21. ததியஸ்ஸ பட²மே உருவேலாயந்தி ஏத்த² உருவேலாதி மஹாவேலா, மஹாவாலிகராஸீதி அத்தோ². அத² வா உரூதி வாலுகா வுச்சதி, வேலாதி மரியாதா³. வேலாதிக்கமனஹேது ஆஹடா உரு உருவேலாதி ஏவமேத்த² அத்தோ² த³ட்ட²ப்³போ³. அதீதே கிர அனுப்பன்னே பு³த்³தே⁴ த³ஸஸஹஸ்ஸா குலபுத்தா தாபஸபப்³ப³ஜ்ஜம் பப்³ப³ஜித்வா தஸ்மிம் பதே³ஸே விஹரந்தா ஏகதி³வஸம் ஸன்னிபதித்வா கதிகவத்தம் அகம்ஸு – ‘‘காயகம்மவசீகம்மானி நாம பரேஸம்பி பாகடானி ஹோந்தி, மனோகம்மம் பன அபாகடம். தஸ்மா யோ காமவிதக்கம் வா ப்³யாபாத³விதக்கம் வா விஹிம்ஸாவிதக்கம் வா விதக்கேதி, தஸ்ஸ அஞ்ஞோ சோத³கோ நாம நத்தி². ஸோ அத்தனாவ அத்தானம் சோதே³த்வா பத்தபுடேன வாலுகம் ஆஹரித்வா இமஸ்மிம் டா²னே ஆகிரது, இத³மஸ்ஸ த³ண்ட³கம்ம’’ந்தி. ததோ பட்டா²ய யோ தாதி³ஸம் விதக்கம் விதக்கேதி, ஸோ தத்த² பத்தபுடேன வாலுகம் ஆகிரதி, ஏவம் தத்த² அனுக்கமேன மஹாவாலுகராஸி ஜாதோ. ததோ நம் பச்சி²மா ஜனதா பரிக்கி²பித்வா சேதியட்டா²னமகாஸி, தம் ஸந்தா⁴ய வுத்தம் – ‘‘உருவேலாதி மஹாவேலா, மஹாவாலிகராஸீதி அத்தோ²’’தி. தமேவ ஸந்தா⁴ய வுத்தம் – ‘‘அத² வா உரூதி வாலுகா வுச்சதி, வேலாதி மரியாதா³, வேலாதிக்கமனஹேது ஆஹடா உரு உருவேலாதி ஏவமேத்த² அத்தோ² த³ட்ட²ப்³போ³’’தி.

நஜ்ஜா நேரஞ்ஜராய தீரேதி உருவேலகா³மம் நிஸ்ஸாய நேரஞ்ஜரானதீ³தீரே விஹராமீதி த³ஸ்ஸேதி. அஜபாலனிக்³ரோதே⁴தி அஜபாலகா தஸ்ஸ நிக்³ரோத⁴ஸ்ஸ சா²யாய நிஸீத³ந்திபி திட்ட²ந்திபி, தஸ்மா ஸோ அஜபாலனிக்³ரோதோ⁴த்வேவ ஸங்க²ம் க³தோ, தஸ்ஸ ஹேட்டா²தி அத்தோ². பட²மாபி⁴ஸம்பு³த்³தோ⁴தி ஸம்பு³த்³தோ⁴ ஹுத்வா பட²மமேவ. உத³பாதீ³தி அயம் விதக்கோ பஞ்சமே ஸத்தாஹே உத³பாதி³. கஸ்மா உத³பாதீ³தி? ஸப்³ப³பு³த்³தா⁴னம் ஆசிண்ணத்தா சேவ புப்³பா³ஸேவனதாய ச. தத்த² புப்³பா³ஸேவனாய பகாஸனத்த²ம் தித்திரஜாதகம் ஆஹரிதப்³ப³ம். ஹத்தி²வானரதித்திரா கிர ஏகஸ்மிம் பதே³ஸே விஹரந்தா ‘‘யோ அம்ஹாகம் மஹல்லகோ, தஸ்மிம் ஸகா³ரவா விஹரிஸ்ஸாமா’’தி நிக்³ரோத⁴ம் த³ஸ்ஸேத்வா ‘‘கோ நு கோ² அம்ஹாகம் மஹல்லகோ’’தி வீமம்ஸந்தா தித்திரஸ்ஸ மஹல்லகபா⁴வம் ஞத்வா தஸ்ஸ ஜேட்டா²பசாயனகம்மம் கத்வா அஞ்ஞமஞ்ஞம் ஸமக்³கா³ ஸம்மோத³மானா விஹரித்வா ஸக்³க³பராயணா அஹேஸும். தம் காரணம் ஞத்வா ருக்கே² அதி⁴வத்தா² தே³வதா இமம் கா³த²மாஹ –

‘‘யே வுட்³ட⁴மபசாயந்தி, நரா த⁴ம்மஸ்ஸ கோவிதா³;

தி³ட்டே²வ த⁴ம்மே பாஸம்ஸா, ஸம்பராயே ச ஸுக்³க³தீ’’தி. (ஜா. 1.1.37);

ஏவம் அஹேதுகதிரச்சா²னயோனியம் நிப்³ப³த்தோபி ததா²க³தோ ஸகா³ரவவாஸம் ரோசேஸி, இதா³னி கஸ்மா ந ரோசேஸ்ஸதீதி. அகா³ரவோதி அஞ்ஞஸ்மிம் கா³ரவரஹிதோ, கஞ்சி க³ருட்டா²னே அட்ட²பேத்வாதி அத்தோ². அப்பதிஸ்ஸோதி பதிஸ்ஸயரஹிதோ, கஞ்சி ஜேட்ட²கட்டா²னே அட்ட²பேத்வாதி அத்தோ². ஸமணம் வா ப்³ராஹ்மணம் வாதி ஏத்த² ஸமிதபாபபா³ஹிதபாபாயேவ ஸமணப்³ராஹ்மணா அதி⁴ப்பேதா. ஸக்கத்வா க³ரும் கத்வாதி ஸக்காரஞ்சேவ கத்வா க³ருகாரஞ்ச உபட்ட²பேத்வா.

ஸதே³வகே லோகேதிஆதீ³ஸு ஸத்³தி⁴ம் தே³வேஹி ஸதே³வகே. தே³வக்³க³ஹணேன சேத்த² மாரப்³ரஹ்மேஸு க³ஹிதேஸுபி மாரோ நாம வஸவத்தீ ஸப்³பே³ஸம் உபரி வஸம் வத்தேதி, ப்³ரஹ்மா நாம மஹானுபா⁴வோ, ஏகங்கு³லியா ஏகஸ்மிம் சக்கவாளஸஹஸ்ஸே ஆலோகம் ப²ரதி, த்³வீஹி த்³வீஸு, த³ஸஹி அங்கு³லீஹி த³ஸஸு சக்கவாளஸஹஸ்ஸேஸு ஆலோகம் ப²ரதி. ஸோ இமினா ஸீலஸம்பன்னதரோதி வத்தும் மா லப⁴ந்தூதி ஸமாரகே ஸப்³ரஹ்மகேதி விஸும் வுத்தம். ததா² ஸமணா நாம ஏகனிகாயாதி³வஸேன ப³ஹுஸ்ஸுதா ஸீலவந்தோ பண்டி³தா, ப்³ராஹ்மணாபி வத்து²விஜ்ஜாதி³வஸேன ப³ஹுஸ்ஸுதா பண்டி³தா. தே இமினா ஸம்பன்னதராதி வத்தும் மா லப⁴ந்தூதி ஸஸ்ஸமணப்³ராஹ்மணியா பஜாயாதி வுத்தம். ஸதே³வமனுஸ்ஸாயாதி இத³ம் பன நிப்பதே³ஸதோ த³ஸ்ஸனத்த²ம் க³ஹிதமேவ க³ஹேத்வா வுத்தம். அபிசேத்த² புரிமானி தீணி பதா³னி லோகவஸேன வுத்தானி, பச்சி²மானி த்³வே பஜாவஸேன. ஸீலஸம்பன்னதரந்தி ஸீலேன ஸம்பன்னதரம், அதி⁴கதரந்தி அத்தோ². ஏத்த² ச ஸீலாத³யோ சத்தாரோ த⁴ம்மா லோகியலோகுத்தரா கதி²தா, விமுத்திஞாணத³ஸ்ஸனம் லோகியமேவ. பச்சவேக்க²ணஞாணமேவ ஹேதம். பாதுரஹோஸீதி ‘‘அயம் ஸத்தா² அவீசிதோ யாவ ப⁴வக்³கா³ ஸீலாதீ³ஹி அத்தனா அதி⁴கதரம் அபஸ்ஸந்தோ ‘மயா படிவித்³த⁴னவலோகுத்தரத⁴ம்மமேவ ஸக்கத்வா உபனிஸ்ஸாய விஹரிஸ்ஸாமீ’தி சிந்தேதி, காரணம் ப⁴க³வா சிந்தேதி, அத்த²ம் வுட்³டி⁴ம் விஸேஸம் சிந்தேதி, க³ச்சா²மிஸ்ஸ உஸ்ஸாஹம் ஜனேஸ்ஸாமீ’’தி சிந்தேத்வா புரதோ பாகடோ அஹோஸி, அபி⁴முகே² அட்டா²ஸீதி அத்தோ².

விஹம்ஸு விஹரந்தி சாதி ஏத்த² யோ வதே³ய்ய – ‘‘விஹரந்தீதி வசனதோ பச்சுப்பன்னேபி ப³ஹூ பு³த்³தா⁴’’தி, ஸோ ‘‘ப⁴க³வாபி ப⁴ந்தே ஏதரஹி அரஹம் ஸம்மாஸம்பு³த்³தோ⁴’’தி இமினா வசனேன படிபா³ஹிதப்³போ³.

‘‘ந மே ஆசரியோ அத்தி², ஸதி³ஸோ மே ந விஜ்ஜதி;

ஸதே³வகஸ்மிம் லோகஸ்மிம், நத்தி² மே படிபுக்³க³லோ’’தி. (மஹாவ. 11; ம. நி. 2.341) –

ஆதீ³ஹி சஸ்ஸ ஸுத்தேஹி அஞ்ஞேஸம் பு³த்³தா⁴னம் அபா⁴வோ தீ³பேதப்³போ³. தஸ்மாதி யஸ்மா ஸப்³பே³பி பு³த்³தா⁴ ஸத்³த⁴ம்மக³ருனோ, தஸ்மா. மஹத்தமபி⁴கங்க²தாதி மஹந்தபா⁴வம் பத்த²யமானேன. ஸரம் பு³த்³தா⁴ன ஸாஸனந்தி பு³த்³தா⁴னம் ஸாஸனம் ஸரந்தேன.

யதோதி யஸ்மிம் காலே. மஹத்தேன ஸமன்னாக³தோதி ரத்தஞ்ஞுமஹத்தம் வேபுல்லமஹத்தம் ப்³ரஹ்மசரியமஹத்தம் லாப⁴க்³க³மஹத்தந்தி இமினா சதுப்³பி³தே⁴ன மஹத்தேன ஸமன்னாக³தோ. அத² மே ஸங்கே⁴பி கா³ரவோதி அத² மய்ஹம் ஸங்கே⁴பி கா³ரவோ ஜாதோ. கிஸ்மிம் பன காலே ப⁴க³வதா ஸங்கே⁴ கா³ரவோ கதோதி? மஹாபஜாபதியா து³ஸ்ஸயுக³தா³னகாலே. ததா³ ஹி ப⁴க³வா அத்தனோ உபனீதம் து³ஸ்ஸயுக³ம் ‘‘ஸங்கே⁴, கோ³தமி, தே³ஹி, ஸங்கே⁴ தே தி³ன்னே அஹஞ்சேவ பூஜிதோ ப⁴விஸ்ஸாமி ஸங்கோ⁴ சா’’தி வத³ந்தோ ஸங்கே⁴ கா³ரவம் அகாஸி நாம.

2. து³தியஉருவேலஸுத்தவண்ணனா

22. து³தியே ஸம்ப³ஹுலாதி ப³ஹுகா. ப்³ராஹ்மணாதி ஹுஹுக்கஜாதிகேன ப்³ராஹ்மணேன ஸத்³தி⁴ம் ஆக³தா ப்³ராஹ்மணா. ஜிண்ணாதி ஜராஜிண்ணா. வுட்³டா⁴தி வயோவுத்³தா⁴. மஹல்லகாதி ஜாதிமஹல்லகா. அத்³த⁴க³தாதி தயோ வயே அத்³தே⁴ அதிக்கந்தா. ஸுதமேதந்தி அம்ஹேஹி ஸுதம் ஏதம். தயித³ம் போ⁴, கோ³தம, ததே²வாதி போ⁴, கோ³தம, ஏதம் அம்ஹேஹி ஸுதகாரணம் ததா² ஏவ. தயித³ம் போ⁴, கோ³தம, ந ஸம்பன்னமேவாதி தம் ஏதம் அபி⁴வாத³னாதி³அகரணம் அனனுச்ச²விகமேவ.

அகாலவாதீ³திஆதீ³ஸு அகாலே வத³தீதி அகாலவாதீ³. அஸபா⁴வம் வத³தீதி அபூ⁴தவாதீ³. அனத்த²ம் வத³தி, நோ அத்த²ந்தி அனத்த²வாதீ³. அத⁴ம்மம் வத³தி, நோ த⁴ம்மந்தி அத⁴ம்மவாதீ³. அவினயம் வத³தி, நோ வினயந்தி அவினயவாதீ³. அனிதா⁴னவதிம் வாசம் பா⁴ஸிதாதி ந ஹத³யே நிதே⁴தப்³ப³யுத்தகம் வாசம் பா⁴ஸிதா. அகாலேனாதி கதே²தும் அயுத்தகாலேன. அனபதே³ஸந்தி அபதே³ஸரஹிதம், ஸாபதே³ஸம் ஸகாரணம் கத்வா ந கதே²தி. அபரியந்தவதிந்தி பரியந்தரஹிதம், ந பரிச்சே²த³ம் த³ஸ்ஸேத்வா கதே²தி. அனத்த²ஸம்ஹிதந்தி ந லோகியலோகுத்தரஅத்த²னிஸ்ஸிதம் கத்வா கதே²தி. பா³லோ தே²ரோத்வேவ ஸங்க²ம் க³ச்ச²தீதி அந்த⁴பா³லோ தே²ரோதி ஸங்க²ம் க³ச்ச²தி.

காலவாதீ³திஆதீ³னி வுத்தபடிபக்க²வஸேன வேதி³தப்³பா³னி. பண்டி³தோ தே²ரோத்வேவ ஸங்க²ம் க³ச்ச²தீதி பண்டி³ச்சேன ஸமன்னாக³தத்தா பண்டி³தோ, தி²ரபா⁴வப்பத்தியா தே²ரோதி ஸங்க²ம் க³ச்ச²தி.

ப³ஹுஸ்ஸுதோ ஹோதீதி ப³ஹும் அஸ்ஸ ஸுதம் ஹோதி, நவங்க³ம் ஸத்து²ஸாஸனம் பாளிஅனுஸந்தி⁴புப்³பா³பரவஸேன உக்³க³ஹிதம் ஹோதீதி அத்தோ². ஸுதத⁴ரோதி ஸுதஸ்ஸ ஆதா⁴ரபூ⁴தோ. யஸ்ஸ ஹி இதோ க³ஹிதம் இதோ பலாயதி, சி²த்³த³க⁴டே உத³கம் விய ந திட்ட²தி, பரிஸமஜ்ஜே² ஏகஸுத்தம் வா ஜாதகம் வா கதே²தும் வா வாசேதும் வா ந ஸக்கோதி, அயம் ந ஸுதத⁴ரோ நாம. யஸ்ஸ பன உக்³க³ஹிதம் பு³த்³த⁴வசனம் உக்³க³ஹிதகாலஸதி³ஸமேவ ஹோதி, த³ஸபி வீஸதிபி வஸ்ஸானி ஸஜ்ஜா²யம் அகரோந்தஸ்ஸ நேவ நஸ்ஸதி, அயம் ஸுதத⁴ரோ நாம. ஸுதஸன்னிசயோதி ஸுதஸ்ஸ ஸன்னிசயபூ⁴தோ. யஸ்ஸ ஹி ஸுதம் ஹத³யமஞ்ஜூஸாய ஸன்னிசிதம் ஸிலாய லேகா² விய ஸுவண்ணபத்தே பக்கி²த்தஸீஹவஸா விய ச திட்ட²தி, அயம் ஸுதஸன்னிசயோ நாம. தா⁴தாதி தா⁴தா பகு³ணா. ஏகச்சஸ்ஸ ஹி உக்³க³ஹிதபு³த்³த⁴வசனம் தா⁴தம் பகு³ணம் நிச்சலிகம் ந ஹோதி, ‘‘அஸுகம் ஸுத்தம் வா ஜாதகம் வா கதே²ஹீ’’தி வுத்தே ‘‘ஸஜ்ஜா²யித்வா ஸம்ஸந்தி³த்வா ஸமனுக்³கா³ஹித்வா ஜானிஸ்ஸாமீ’’தி வத³தி. ஏகச்சஸ்ஸ தா⁴தம் பகு³ணம் ப⁴வங்க³ஸோதஸதி³ஸம் ஹோதி, ‘‘அஸுகம் ஸுத்தம் வா ஜாதகம் வா கதே²ஹீ’’தி வுத்தே உத்³த⁴ரித்வா தமேவ கதே²தி. தம் ஸந்தா⁴ய வுத்தம் ‘‘தா⁴தா’’தி. வசஸா பரிசிதாதி ஸுத்தத³ஸக-வக்³க³த³ஸகபண்ணாஸத³ஸகவஸேன வாசாய ஸஜ்ஜா²யிதா. மனஸானுபேக்கி²தாதி சித்தேன அனுபேக்கி²தா. யஸ்ஸ வாசாய ஸஜ்ஜா²யிதம் பு³த்³த⁴வசனம் மனஸா சிந்தேந்தஸ்ஸ தத்த² தத்த² பாகடம் ஹோதி, மஹாதீ³பம் ஜாலேத்வா டி²தஸ்ஸ ரூபக³தம் விய பஞ்ஞாயதி, தம் ஸந்தா⁴யேதம் வுத்தம். தி³ட்டி²யா ஸுப்படிவித்³தா⁴தி அத்த²தோ ச காரணதோ ச பஞ்ஞாய ஸுப்படிவித்³தா⁴.

ஆபி⁴சேதஸிகானந்தி அபி⁴சேதோதி அபி⁴க்கந்தம் விஸுத்³த⁴ம் சித்தம் வுச்சதி, அதி⁴சித்தம் வா, அபி⁴சேதஸி ஜாதானி ஆபி⁴சேதஸிகானி, அபி⁴சேதோஸன்னிஸ்ஸிதானீதி வா ஆபி⁴சேதஸிகானி. தி³ட்ட²த⁴ம்மஸுக²விஹாரானந்தி தி³ட்ட²த⁴ம்மே ஸுக²விஹாரானம். தி³ட்ட²த⁴ம்மோதி பச்சக்கோ² அத்தபா⁴வோ வுச்சதி, தத்த² ஸுக²விஹாரபூ⁴தானந்தி அத்தோ². ரூபாவசரஜ்ஜா²னானமேதம் அதி⁴வசனம். தானி ஹி அப்பேத்வா நிஸின்னா ஜா²யினோ இமஸ்மிம்யேவ அத்தபா⁴வே அஸம்கிலிட்ட²னேக்க²ம்மஸுக²ம் விந்த³ந்தி, தஸ்மா ‘‘தி³ட்ட²த⁴ம்மஸுக²விஹாரானீ’’தி வுச்சதி. நிகாமலாபீ⁴தி நிகாமேன லாபீ⁴, அத்தனோ இச்சா²வஸேன லாபீ⁴, இச்சி²திச்சி²தக்க²ணே ஸமாபஜ்ஜிதும் ஸமத்தோ²தி வுத்தம் ஹோதி. அகிச்ச²லாபீ⁴தி ஸுகே²னேவ பச்சனீகத⁴ம்மே விக்க²ம்பே⁴த்வா ஸமாபஜ்ஜிதும் ஸமத்தோ²தி வுத்தம் ஹோதி. அகஸிரலாபீ⁴தி அகஸிரானம் லாபீ⁴ விபுலானம், யதா²பரிச்சே²தே³ன வுட்டா²தும் ஸமத்தோ²தி வுத்தம் ஹோதி. ஏகச்சோ ஹி லாபீ⁴யேவ ஹோதி, ந பன இச்சி²திச்சி²தக்க²ணே ஸக்கோதி ஸமாபஜ்ஜிதும். ஏகச்சோ ஸக்கோதி ததா²ஸமாபஜ்ஜிதும், பாரிபந்தி²கே ச பன கிச்சே²ன விக்க²ம்பே⁴தி. ஏகச்சோ ததா² ச ஸமாபஜ்ஜதி, பாரிபந்தி²கே ச அகிச்சே²னேவ விக்க²ம்பே⁴தி, ந ஸக்கோதி நாளிகயந்தம் விய யதா²பரிச்சே²தே³யேவ வுட்டா²தும். யஸ்ஸ பன அயம் திவிதா⁴பி ஸம்பதா³ அத்தி², ஸோ ‘‘அகிச்ச²லாபீ⁴ அகஸிரலாபீ⁴’’தி வுச்சதி. ஆஸவானம் க²யாதிஆதீ³னி வுத்தத்தா²னேவ. ஏவமித⁴ ஸீலம்பி பா³ஹுஸச்சம்பி கீ²ணாஸவஸ்ஸேவ ஸீலம் பா³ஹுஸச்சஞ்ச, ஜா²னானிபி கீ²ணாஸவஸ்ஸேவ வளஞ்ஜனகஜ்ஜா²னானி கதி²தானி. ‘‘ஆஸவானம் க²யா’’திஆதீ³ஹி பன அரஹத்தம் கதி²தம். ப²லேன சேத்த² மக்³க³கிச்சம் பகாஸிதந்தி வேதி³தப்³ப³ம்.

உத்³த⁴தேனாதி உத்³த⁴ச்சஸஹக³தேன. ஸம்ப²ந்தி பலாபகத²ம். அஸமாஹிதஸங்கப்போதி அட்ட²பிதஸங்கப்போ. மகோ³தி மக³ஸதி³ஸோ. ஆராதி தூ³ரே. தா²வரேய்யம்ஹாதி தா²வரபா⁴வதோ. பாபதி³ட்டீ²தி லாமகதி³ட்டி². அனாத³ரோதி ஆத³ரரஹிதோ. ஸுதவாதி ஸுதேன உபக³தோ. படிபா⁴னவாதி து³விதே⁴ன படிபா⁴னேன ஸமன்னாக³தோ. பஞ்ஞாயத்த²ம் விபஸ்ஸதீதி ஸஹவிபஸ்ஸனாய மக்³க³பஞ்ஞாய சதுன்னம் ஸச்சானம் அத்த²ம் வினிவிஜ்ஜி²த்வா பஸ்ஸதி. பாரகூ³ ஸப்³ப³த⁴ம்மானந்தி ஸப்³பே³ஸம் க²ந்தா⁴தி³த⁴ம்மானம் பாரம் க³தோ, அபி⁴ஞ்ஞாபாரகூ³, பரிஞ்ஞாபாரகூ³, பஹானபாரகூ³, பா⁴வனாபாரகூ³, ஸச்சி²கிரியாபாரகூ³, ஸமாபத்திபாரகூ³தி ஏவம் ச²ப்³பி³தே⁴ன பாரக³மனேன ஸப்³ப³த⁴ம்மானம் பாரம் பரியோஸானம் க³தோ. அகி²லோதி ராக³கி²லாதி³விரஹிதோ. படிபா⁴னவாதி து³விதே⁴னேவ படிபா⁴னேன ஸமன்னாக³தோ. ப்³ரஹ்மசரியஸ்ஸ கேவலீதி ஸகலப்³ரஹ்மசரியோ. ஸேஸமேத்த² உத்தானமேவாதி.

3. லோகஸுத்தவண்ணனா

23. ததியே லோகோதி து³க்க²ஸச்சம். அபி⁴ஸம்பு³த்³தோ⁴தி ஞாதோ பச்சக்கோ² கதோ. லோகஸ்மாதி து³க்க²ஸச்சதோ. பஹீனோதி மஹாபோ³தி⁴மண்டே³ அரஹத்தமக்³க³ஞாணேன பஹீனோ. ததா²க³தஸ்ஸ பா⁴விதாதி ததா²க³தேன பா⁴விதா.

ஏவம் ஏத்தகேன டா²னேன சதூஹி ஸச்சேஹி அத்தனோ பு³த்³த⁴பா⁴வம் கதே²த்வா இதா³னி ததா²க³தபா⁴வம் கதே²தும் யம், பி⁴க்க²வேதிஆதி³மாஹ. தத்த² தி³ட்ட²ந்தி ரூபாயதனம். ஸுதந்தி ஸத்³தா³யதனம். முதந்தி பத்வா க³ஹேதப்³ப³தோ க³ந்தா⁴யதனம் ரஸாயதனம் போ²ட்ட²ப்³பா³யதனம். விஞ்ஞாதந்தி ஸுக²து³க்கா²தி³ த⁴ம்மாரம்மணம். பத்தந்தி பரியேஸித்வா வா அபரியேஸித்வா வா பத்தம். பரியேஸிதந்தி பத்தம் வா அப்பத்தம் வா பரியேஸிதம். அனுவிசரிதம் மனஸாதி சித்தேன அனுஸஞ்சரிதம்.

ததா²க³தேன அபி⁴ஸம்பு³த்³த⁴ந்தி இமினா ஏதம் த³ஸ்ஸேதி – யம் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ நீலம் பீதகந்திஆதி³ ரூபாரம்மணம் சக்கு²த்³வாரே ஆபாத²ம் ஆக³ச்ச²தி, ‘‘அயம் ஸத்தோ இமஸ்மிம் க²ணே இமம் நாம ரூபாரம்மணம் தி³ஸ்வா ஸுமனோ வா து³ம்மனோ வா மஜ்ஜ²த்தோ வா ஜாதோ’’தி ஸப்³ப³ம் ததா²க³தஸ்ஸ ஏவம் அபி⁴ஸம்பு³த்³த⁴ம். ததா² யம் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ பே⁴ரிஸத்³தோ³ முதி³ங்க³ஸத்³தோ³திஆதி³ ஸத்³தா³ரம்மணம் ஸோதத்³வாரே ஆபாத²ம் ஆக³ச்ச²தி, மூலக³ந்தோ⁴ தசக³ந்தோ⁴திஆதி³ க³ந்தா⁴ரம்மணம் கா⁴னத்³வாரே ஆபாத²ம் ஆக³ச்ச²தி, மூலரஸோ க²ந்த⁴ரஸோதிஆதி³ ரஸாரம்மணம் ஜிவ்ஹாத்³வாரே ஆபாத²ம் ஆக³ச்ச²தி, கக்க²ளம் முது³கந்திஆதி³ பத²வீதா⁴துதேஜோதா⁴துவாயோதா⁴துபே⁴த³ம் போ²ட்ட²ப்³பா³ரம்மணம் காயத்³வாரே ஆபாத²ம் ஆக³ச்ச²தி, ‘‘அயம் ஸத்தோ இமஸ்மிம் க²ணே இமம் நாம போ²ட்ட²ப்³பா³ரம்மணம் பு²ஸித்வா ஸுமனோ வா து³ம்மனோ வா மஜ்ஜ²த்தோ வா ஜாதோ’’தி ஸப்³ப³ம் ததா²க³தஸ்ஸ ஏவம் அபி⁴ஸம்பு³த்³த⁴ம். ததா² யம் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ ஸுக²து³க்கா²தி³பே⁴த³ம் த⁴ம்மாரம்மணம் மனோத்³வாரஸ்ஸ ஆபாத²ம் ஆக³ச்ச²தி, ‘‘அயம் ஸத்தோ இமஸ்மிம் க²ணே இமம் நாம த⁴ம்மாரம்மணம் விஜானித்வா ஸுமனோ வா து³ம்மனோ வா மஜ்ஜ²த்தோ வா ஜாதோ’’தி ஸப்³ப³ம் ததா²க³தஸ்ஸ ஏவம் அபி⁴ஸம்பு³த்³த⁴ம். யஞ்ஹி, பி⁴க்க²வே, இமேஸம் ஸப்³ப³ஸத்தானம் தி³ட்ட²ம் ஸுதம் முதம் விஞ்ஞாதம், தத்த² ததா²க³தேன அதி³ட்ட²ம் வா அஸுதம் வா அமுதம் வா அவிஞ்ஞாதம் வா நத்தி², இமஸ்ஸ பன மஹாஜனஸ்ஸ பரியேஸித்வா அப்பத்தம்பி அத்தி², அபரியேஸித்வா அப்பத்தம்பி அத்தி², பரியேஸித்வா பத்தம்பி அத்தி², அபரியேஸித்வா பத்தம்பி அத்தி², ஸப்³ப³ம்பி ததா²க³தஸ்ஸ அப்பத்தம் நாம நத்தி² ஞாணேன அஸச்சி²கதம்.

தஸ்மா ததா²க³தோதி வுச்சதீதி யம் யதா² லோகேன க³தம், தஸ்ஸ ததே²வ க³தத்தா ததா²க³தோதி வுச்சதி. பாளியம் பன ‘‘அபி⁴ஸம்பு³த்³த⁴’’ந்தி வுத்தம், தம் க³தஸத்³தே³ன ஏகத்த²ம். இமினா நயேன ஸப்³ப³வாரேஸு ததா²க³தோதி நிக³மஸ்ஸ அத்தோ² வேதி³தப்³போ³. தஸ்ஸ யுத்தி ஏகபுக்³க³லவண்ணனாயம் ததா²க³தஸத்³த³வித்தா²ரே வுத்தாயேவ. அபிசேத்த² அஞ்ஞத³த்தூ²தி ஏகம்ஸத்தே² நிபாதோ. த³க்க²தீதி த³ஸோ. வஸம் வத்தேதீதி வஸவத்தீ.

ஸப்³ப³ம் லோகம் அபி⁴ஞ்ஞாதி தேதா⁴துகம் லோகஸன்னிவாஸம் ஜானித்வா. ஸப்³ப³ம் லோகே யதா²தத²ந்தி தஸ்மிம் தேதா⁴துகலோகஸன்னிவாஸே யம்கிஞ்சி நேய்யம், ஸப்³ப³ம் தம் யதா²தத²ம் அவிபரீதம் ஜானித்வா. விஸம்யுத்தோதி சதுன்னம் யோகா³னம் பஹானேன விஸம்யுத்தோ. அனூபயோதி தண்ஹாதி³ட்டி²உபயேஹி விரஹிதோ. ஸப்³பா³பி⁴பூ⁴தி ரூபாதீ³னி ஸப்³பா³ரம்மணானி அபி⁴ப⁴வித்வா டி²தோ. தீ⁴ரோதி தி⁴திஸம்பன்னோ. ஸப்³ப³க³ந்த²ப்பமோசனோதி ஸப்³பே³ சத்தாரோபி க³ந்தே² மோசேத்வா டி²தோ. பு²ட்ட²ஸ்ஸாதி பு²ட்டா² அஸ்ஸ. இத³ஞ்ச கரணத்தே² ஸாமிவசனம். பரமா ஸந்தீதி நிப்³பா³னம். தஞ்ஹி தேன ஞாணபு²ஸனேன பு²ட்ட²ம். தேனேவாஹ – நிப்³பா³னம் அகுதோப⁴யந்தி. அத² வா பரமாஸந்தீதி உத்தமா ஸந்தி. கதரா ஸாதி? நிப்³பா³னம். யஸ்மா பன நிப்³பா³னே குதோசி ப⁴யம் நத்தி², தஸ்மா தம் அகுதோப⁴யந்தி வுச்சதி. விமுத்தோ உபதி⁴ஸங்க²யேதி உபதி⁴ஸங்க²யஸங்கா²தே நிப்³பா³னே ததா³ரம்மணாய ப²லவிமுத்தியா விமுத்தோ. ஸீஹோ அனுத்தரோதி பரிஸ்ஸயானம் ஸஹனட்டே²ன கிலேஸானஞ்ச ஹிம்ஸனட்டே²ன ததா²க³தோ அனுத்தரோ ஸீஹோ நாம. ப்³ரஹ்மந்தி ஸேட்ட²ம். இதீதி ஏவம் ததா²க³தஸ்ஸ கு³ணே ஜானித்வா. ஸங்க³ம்மாதி ஸமாக³ந்த்வா. தம் நமஸ்ஸந்தீதி தம் ததா²க³தம் தே ஸரணம் க³தா நமஸ்ஸந்தி. இதா³னி யம் வத³ந்தா தே நமஸ்ஸந்தி, தம் த³ஸ்ஸேதும் த³ந்தோதிஆதி³ வுத்தம். தம் உத்தானத்த²மேவாதி.

4. காளகாராமஸுத்தவண்ணனா

24. சதுத்த²ம் அத்து²ப்பத்தியம் நிக்கி²த்தம். கதராய அத்து²ப்பத்தியந்தி? த³ஸப³லகு³ணகதா²ய. அனாத²பிண்டி³கஸ்ஸ கிர தீ⁴தா சூளஸுப⁴த்³தா³ ‘‘ஸாகேதனக³ரே காளகஸேட்டி²புத்தஸ்ஸ கே³ஹம் க³ச்சி²ஸ்ஸாமீ’’தி ஸத்தா²ரம் உபஸங்கமித்வா, ‘‘ப⁴ந்தே, அஹம் மிச்சா²தி³ட்டி²ககுலம் க³ச்சா²மி. ஸசே தத்த² ஸக்காரம் லபி⁴ஸ்ஸாமி, ஏகஸ்மிம் புரிஸே பேஸியமானே பபஞ்சோ ப⁴விஸ்ஸதி, மம் ஆவஜ்ஜேய்யாத² ப⁴க³வா’’தி படிஞ்ஞம் க³ஹேத்வா அக³மாஸி. ஸேட்டி² ‘‘ஸுணிஸா மே ஆக³தா’’தி மங்க³லம் கரோந்தோவ ப³ஹும் கா²த³னீயபோ⁴ஜனீயம் படியாதே³த்வா பஞ்ச அசேலகஸதானி நிமந்தேஸி. ஸோ தேஸு நிஸின்னேஸு ‘‘தீ⁴தா மே ஆக³ந்த்வா அரஹந்தே வந்த³தூ’’தி சூளஸுப⁴த்³தா³ய பேஸேஸி. ஆக³தப²லா அரியஸாவிகா அரஹந்தேதி வுத்தமத்தேயேவ ‘‘லாபா⁴ வத மே’’தி உட்ட²ஹித்வா க³தா தே நிஸ்ஸிரிகத³ஸ்ஸனே அசேலகே தி³ஸ்வாவ ‘‘ஸமணா நாம ந ஏவரூபா ஹோந்தி, தாத, யேஸம் நேவ அஜ்ஜ²த்தம் ஹிரீ, ந ப³ஹித்³தா⁴ ஓத்தப்பம் அத்தீ²’’தி வத்வா ‘‘ந இமே ஸமணா, தீ⁴தீ⁴’’தி கே²ளம் பாதேத்வா நிவத்தித்வா அத்தனோ வஸனட்டா²னமேவ க³தா.

ததோ அசேலகா ‘‘மஹாஸேட்டி² குதோ தே ஏவரூபா காலகண்ணீ லத்³தா⁴, கிம் ஸகலஜம்பு³தீ³பே அஞ்ஞா தா³ரிகா நத்தீ²’’தி ஸேட்டி²ம் பரிபா⁴ஸிம்ஸு. ஸோ ‘‘ஆசரியா ஜானித்வா வா கதம் ஹோது அஜானித்வா வா, அஹமேத்த² ஜானிஸ்ஸாமீ’’தி அசேலகே உய்யோஜேத்வா ஸுப⁴த்³தா³ய ஸந்திகம் க³ந்த்வா ‘‘அம்ம, கஸ்மா ஏவரூபம் அகாஸி, கஸ்மா அரஹந்தே லஜ்ஜாபேஸீ’’தி ஆஹ. தாத, அரஹந்தா நாம ஏவரூபா ந ஹோந்தீதி. அத² நம் ஸோ ஆஹ –

‘‘கீதி³ஸா ஸமணா துய்ஹம், பா³ள்ஹம் கோ² நே பஸம்ஸஸி;

கிம்ஸீலா கிம்ஸமாசாரா, தம் மே அக்கா²ஹி புச்சி²தா’’தி.

ஸா ஆஹ –

‘‘ஸந்திந்த்³ரியா ஸந்தமனா, ஸந்ததேஜா கு³ணமக்³க³ஸண்டி²தா;

ஓக்கி²த்தசக்கூ² மிதபா⁴ணீ, தாதி³ஸா ஸமணா மம.

‘‘வஸந்தி வனமோக³ய்ஹ, நாகோ³ சே²த்வாவ ப³ந்த⁴னம்;

ஏககியா அது³தியா, தாதி³ஸா ஸமணா மமா’’தி.

ஏவஞ்ச பன வத்வா ஸேட்டி²ஸ்ஸ புரே ட²த்வா திண்ணம் ரதனானம் கு³ணம் கதே²ஸி. ஸேட்டி² தஸ்ஸா வசனம் ஸுத்வா ‘‘யதி³ ஏவம், தவ ஸமணே ஆனேத்வா மங்க³லம் கரோமா’’தி. ஸா புச்சி² ‘‘கதா³ கரிஸ்ஸத², தாதா’’தி. ஸேட்டி² சிந்தேஸி – ‘‘கதிபாஹச்சயேனாதி வுத்தே பேஸேத்வா பக்கோஸாபேய்யா’’தி. அத² நம் ‘‘ஸ்வே அம்மா’’தி ஆஹ. ஸா ஸாயன்ஹஸமயே உபரிபாஸாத³ம் ஆருய்ஹ மஹந்தம் புப்ப²ஸமுக்³க³ம் க³ஹேத்வா ஸத்து² கு³ணே அனுஸ்ஸரித்வா அட்ட² புப்ப²முட்டி²யோ த³ஸப³லஸ்ஸ விஸ்ஸஜ்ஜேத்வா அஞ்ஜலிம் பக்³க³ய்ஹ நமஸ்ஸமானா அட்டா²ஸி. ஏவஞ்ச அவச – ‘‘ப⁴க³வா ஸ்வே பஞ்சஹி பி⁴க்கு²ஸதேஹி ஸத்³தி⁴ம் மய்ஹம் பி⁴க்க²ம் க³ண்ஹதா²’’தி. தானி புப்பா²னி க³ந்த்வா த³ஸப³லஸ்ஸ மத்த²கே விதானம் ஹுத்வா அட்ட²ம்ஸு. ஸத்தா² ஆவஜ்ஜேந்தோ தம் காரணம் அத்³த³ஸ. த⁴ம்மதே³ஸனாபரியோஸானே அனாத²பிண்டி³கமஹாஸேட்டி² த³ஸப³லம் வந்தி³த்வா ‘‘ஸ்வே, ப⁴ந்தே, பஞ்சஹி பி⁴க்கு²ஸதேஹி ஸத்³தி⁴ம் மம கே³ஹே பி⁴க்க²ம் க³ண்ஹதா²’’தி ஆஹ. சூளஸுப⁴த்³தா³ய நிமந்திதம்ஹ ஸேட்டீ²தி. ந, ப⁴ந்தே, கஞ்சி ஆக³தம் பஸ்ஸாமாதி. ஆம, ஸேட்டி², ஸத்³தா⁴ பன உபாஸிகா தூ³ரே யோஜனஸதமத்த²கேபி யோஜனஸஹஸ்ஸமத்த²கேபி டி²தா ஹிமவந்தோ விய பஞ்ஞாயதீதி வத்வா –

‘‘தூ³ரே ஸந்தோ பகாஸேந்தி, ஹிமவந்தோவ பப்³ப³தோ;

அஸந்தேத்த² ந தி³ஸ்ஸந்தி, ரத்திம் கி²த்தா யதா² ஸரா’’தி. (த⁴. ப. 304) –

இமம் கா³த²மாஹ. அனாத²பிண்டி³கோ ‘‘ப⁴ந்தே, மம, தீ⁴து ஸங்க³ஹம் கரோதா²’’தி வந்தி³த்வா பக்காமி.

ஸத்தா² ஆனந்த³த்தே²ரம் ஆமந்தேஸி – ‘‘அஹம், ஆனந்த³, ஸாகேதம் க³மிஸ்ஸாமி, பஞ்சன்னம் பி⁴க்கு²ஸதானம் ஸலாகம் தே³ஹி. த³த³ந்தோ ச ச²ளபி⁴ஞ்ஞானம்யேவ த³தே³ய்யாஸீ’’தி. தே²ரோ ததா² அகாஸி. சூளஸுப⁴த்³தா³ ரத்திபா⁴க³ஸமனந்தரே சிந்தேஸி – ‘‘பு³த்³தா⁴ நாம ப³ஹுகிச்சா ப³ஹுகரணீயா, மம் ஸல்லக்கே²ய்ய வா ந வா, கிம் நு கோ² கரிஸ்ஸாமீ’’தி. தஸ்மிம் க²ணே வேஸ்ஸவணோ மஹாராஜா சூளஸுப⁴த்³தா³ய கதே²ஸி – ‘‘ப⁴த்³தே³, மா கோ² த்வம் விமனா அஹோஸி, மா து³ம்மனா. அதி⁴வுத்த²ம் தே ப⁴க³வதா ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. ஸா துட்ட²பஹட்டா² தா³னமேவ ஸம்வித³ஹி. ஸக்கோபி கோ² தே³வராஜா விஸ்ஸகம்மம் ஆமந்தேஸி – ‘‘தாத, த³ஸப³லோ சூளஸுப⁴த்³தா³ய ஸந்திகம் ஸாகேதனக³ரம் க³ச்சி²ஸ்ஸதி, பஞ்ச கூடாகா³ரஸதானி மாபேஹீ’’தி. ஸோ ததா² அகாஸி. ஸத்தா² பஞ்சஹி ச²ளபி⁴ஞ்ஞஸதேஹி பரிவுதோ கூடாகா³ரயானேன மணிவண்ணம் ஆகாஸம் விலிக²ந்தோ விய ஸாகேதனக³ரம் அக³மாஸி.

ஸுப⁴த்³தா³ பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ தா³னம் த³த்வா ஸத்தா²ரம் வந்தி³த்வா ஆஹ – ‘‘ப⁴ந்தே, மய்ஹம் ஸஸுரபக்கோ² மிச்சா²தி³ட்டி²கோ, ஸாது⁴ தேஸம் அனுச்ச²விகத⁴ம்மம் கதே²தா²’’தி. ஸத்தா² த⁴ம்மம் தே³ஸேஸி. காளகஸேட்டி² ஸோதாபன்னோ ஹுத்வா அத்தனோ உய்யானம் த³ஸப³லஸ்ஸ அதா³ஸி. அசேலகா ‘‘அம்ஹாகம் பட²மம் தி³ன்ன’’ந்தி நிக்க²மிதும் ந இச்ச²ந்தி. ‘‘க³ச்ச²த² நீஹரிதப்³ப³னியாமேன தே நீஹரதா²’’தி ஸப்³பே³ நீஹராபேத்வா தத்தே²வ ஸத்து² விஹாரம் காரேத்வா ப்³ரஹ்மதே³ய்யம் கத்வா உத³கம் பாதேஸி. ஸோ காளகேன காரிததாய காளகாராமோ நாம ஜாதோ. ப⁴க³வா தஸ்மிம் ஸமயே தத்த² விஹரதி. தேன வுத்தம் – ‘‘ஸாகேதே விஹரதி காளகாராமே’’தி.

பி⁴க்கூ² ஆமந்தேஸீதி பஞ்சஸதே பி⁴க்கூ² ஆமந்தேஸி. தே கிர ஸாகேதனக³ரவாஸினோ குலபுத்தா ஸத்து² த⁴ம்மதே³ஸனம் ஸுத்வா ஸத்து² ஸந்திகே பப்³ப³ஜித்வா உபட்டா²னஸாலாய நிஸின்னா ‘‘அஹோ பு³த்³த⁴கு³ணா நாம மஹந்தா, ஏவரூபம் நாம மிச்சா²தி³ட்டி²கம் காளகஸேட்டி²ம் தி³ட்டி²தோ மோசேத்வா ஸோதாபத்திப²லம் பாபேத்வா ஸகலனக³ரம் ஸத்தா²ரா தே³வலோகஸதி³ஸம் கத’’ந்தி த³ஸப³லஸ்ஸ கு³ணம் கதே²ந்தி. ஸத்தா² தேஸம் கு³ணம் கதே²ந்தானம் சித்தம் உபபரிக்கி²த்வா – ‘‘மயி க³தே மஹதீ தே³ஸனா ஸமுட்டி²ஸ்ஸதி, தே³ஸனாபரியோஸானே ச இமே பஞ்சஸதா பி⁴க்கூ² அரஹத்தே பதிட்ட²ஹிஸ்ஸந்தி, மஹாபத²வீ உத³கபரியந்தம் கத்வா கம்பிஸ்ஸதீ’’தி த⁴ம்மஸப⁴ம் க³ந்த்வா பஞ்ஞத்தவரபு³த்³தா⁴ஸனே நிஸின்னோ தே பி⁴க்கூ² ஆதி³ம் கத்வா யம், பி⁴க்க²வே, ஸதே³வகஸ்ஸ லோகஸ்ஸாதி இமம் தே³ஸனம் ஆரபி⁴. ஏவமித³ம் ஸுத்தம் கு³ணகதா²ய நிக்கி²த்தந்தி வேதி³தப்³ப³ம்.

தத்த² ‘‘தமஹம் ஜானாமீ’’தி பத³பரியோஸானே மஹாபத²வீ உத³கபரியந்தம் கத்வா அகம்பித்த². அப்³ப⁴ஞ்ஞாஸிந்தி அபி⁴அஞ்ஞாஸிம், ஜானிந்தி அத்தோ². விதி³தந்தி பாகடம் கத்வா ஞாதம். இமினா ஏதம் த³ஸ்ஸேதி – அஞ்ஞே ஜானந்தியேவ, மயா பன பாகடம் கத்வா விதி³தந்தி. இமேஹி தீஹி பதே³ஹி ஸப்³ப³ஞ்ஞுதபூ⁴மி நாம கதி²தா. தம் ததா²க³தோ ந உபட்டா²ஸீதி தம் ச²த்³வாரிகம் ஆரம்மணம் ததா²க³தோ தண்ஹாய வா தி³ட்டி²யா வா ந உபட்டா²ஸி ந உபக³ஞ்சி². அயஞ்ஹி பஸ்ஸதி ப⁴க³வா சக்கு²னா ரூபம், ச²ந்த³ராகோ³ ப⁴க³வதோ நத்தி², ஸுவிமுத்தசித்தோ ஸோ ப⁴க³வா. ஸுணாதி ப⁴க³வா ஸோதேன ஸத்³த³ம். கா⁴யதி ப⁴க³வா கா⁴னேன க³ந்த⁴ம். ஸாயதி ப⁴க³வா ஜிவ்ஹாய ரஸம். பு²ஸதி ப⁴க³வா காயேன போ²ட்ட²ப்³ப³ம். விஜானாதி ப⁴க³வா மனஸா த⁴ம்மம், ச²ந்த³ராகோ³ ப⁴க³வதோ நத்தி², ஸுவிமுத்தசித்தோ ஸோ ப⁴க³வா. தேன வுத்தம் – ‘‘தம் ததா²க³தோ ந உபட்டா²ஸீ’’தி. இமினா பதே³ன கீ²ணாஸவபூ⁴மி கதி²தாதி வேதி³தப்³பா³.

தம் மமஸ்ஸ முஸாதி தம் மே வசனம் முஸாவாதோ³ நாம ப⁴வேய்ய. தம் பஸ்ஸ தாதி³ஸமேவாதி தம்பி முஸாவாதோ³ ப⁴வேய்ய. தம் மமஸ்ஸ கலீதி தம் வசனம் மய்ஹம் தோ³ஸோ ப⁴வேய்யாதி அத்தோ². ஏத்தாவதா ஸச்சபூ⁴மி நாம கதி²தாதி வேதி³தப்³பா³.

த³ட்டா² த³ட்ட²ப்³ப³ந்தி தி³ஸ்வா த³ட்ட²ப்³ப³ம். தி³ட்ட²ம் ந மஞ்ஞதீதி தம் தி³ட்ட²ம் ரூபாயதனம் ‘‘அஹம் மஹாஜனேன தி³ட்ட²மேவ பஸ்ஸாமீ’’தி தண்ஹாமானதி³ட்டீ²ஹி ந மஞ்ஞதி. அதி³ட்ட²ம் ந மஞ்ஞதீதி ‘‘அஹம் மஹாஜனேன அதி³ட்ட²மேவ ஏதம் பஸ்ஸாமீ’’தி ஏவம்பி தண்ஹாதீ³ஹி மஞ்ஞனாஹி ந மஞ்ஞதி. த³ட்ட²ப்³ப³ம் ந மஞ்ஞதீதி ‘‘மஹாஜனேன தி³ட்ட²ம் பஸ்ஸாமீ’’தி ஏவம்பி தாஹி மஞ்ஞனாஹி ந மஞ்ஞதி. த³ட்ட²ப்³ப³ஞ்ஹி அதி³ட்ட²ம்பி ஹோதியேவ. ஏவரூபானி ஹி வசனானி தீஸுபி காலேஸு லப்³ப⁴ந்தி, தேனஸ்ஸ அத்தோ² வுத்தோ. த³ட்டா²ரம் ந மஞ்ஞதீதி பஸ்ஸிதாரம் ஏகஸத்தம் நாம தாஹி மஞ்ஞனாஹி ந மஞ்ஞதீதி அத்தோ². ஸேஸட்டா²னேஸுபி இமினாவ நயேன அத்தோ² வேதி³தப்³போ³. இமினா ஏத்தகேன டா²னேன ஸுஞ்ஞதாபூ⁴மி நாம கதி²தா.

இதி கோ², பி⁴க்க²வேதி ஏவம் கோ², பி⁴க்க²வே. தாதீ³யேவ தாதீ³தி தாதி³தா நாம ஏகஸதி³ஸதா. ததா²க³தோ ச யாதி³ஸோ லாபா⁴தீ³ஸு, தாதி³ஸோவ அலாபா⁴தீ³ஸு. தேன வுத்தம் – ‘‘லாபே⁴பி தாதீ³, அலாபே⁴பி தாதீ³. யஸேபி தாதீ³, அயஸேபி தாதீ³. நிந்தா³யபி தாதீ³, பஸம்ஸாயபி தாதீ³. ஸுகே²பி தாதீ³, து³க்கே²பி தாதீ³’’தி (மஹானி. 38, 192). இமாய தாதி³தாய தாதீ³. தம்ஹா ச பன தாதி³ம்ஹாதி ததோ ததா²க³ததாதி³தோ அஞ்ஞோ உத்தரிதரோ வா பணீததரோ வா தாதீ³ நத்தீ²தி ஏத்தாவதா தாதி³பூ⁴மி நாம கதி²தா. இமாஹி பஞ்சபூ⁴மீஹி தே³ஸனம் நிட்டா²பேந்தஸ்ஸ பஞ்சஸுபி டா²னேஸு மஹாபத²வீ ஸக்கி²பா⁴வேன அகம்பித்த². தே³ஸனாபரியோஸானே தே பஞ்சஸதே அது⁴னாபப்³ப³ஜிதே குலபுத்தே ஆதி³ம் கத்வா தம் டா²னம் பத்தானம் தே³வமனுஸ்ஸானம் சதுராஸீதி பாணஸஹஸ்ஸானி அமதபானம் பிவிம்ஸு.

ப⁴க³வாபி ஸுத்தம் நிட்டா²பேத்வா கா³தா²ஹி கூடம் க³ண்ஹந்தோ யம்கிஞ்சீதிஆதி³மாஹ. தத்த² அஜ்ஜோ²ஸிதம் ஸச்சமுதம் பரேஸந்தி பரேஸம் ஸத்³தா⁴ய பரபத்தியாயனாய ஸச்சமுதந்தி மஞ்ஞித்வா அஜ்ஜோ²ஸிதம் கி³லித்வா பரினிட்டா²பேத்வா க³ஹிதம். ஸயஸம்வுதேஸூதி ஸயமேவ ஸம்வரித்வா பியாயித்வா க³ஹிதக³ஹணேஸு, தி³ட்டி²க³திகேஸூதி அத்தோ². தி³ட்டி²க³திகா ஹி ஸயம் ஸம்வுதாதி வுச்சந்தி. ஸச்சம் முஸா வாபி பரம் த³ஹேய்யாதி தேஸு ஸயம் ஸம்வுதஸங்கா²தேஸு தி³ட்டி²க³திகேஸு ததா²க³தோ தாதீ³ தேஸம் ஏகம்பி வசனம் ‘‘இத³மேவ ஸச்சம் மோக⁴மஞ்ஞ’’ந்தி ஏவம் ஸச்சம் முஸா வாபி பரம் உத்தமம் கத்வா ந ஓத³ஹேய்ய, ந ஸத்³த³ஹேய்ய, ந பத்தியாயேய்ய. ஏதஞ்ச ஸல்லந்தி ஏதம் தி³ட்டி²ஸல்லம். படிகச்ச தி³ஸ்வாதி புரேதரம் போ³தி⁴மூலேயேவ தி³ஸ்வா. விஸத்தாதி லக்³கா³ லகி³தா பலிபு³த்³தா⁴. ஜானாமி பஸ்ஸாமி ததே²வ ஏதந்தி யதா²யம் பஜா அஜ்ஜோ²ஸிதா கி³லித்வா பரினிட்டா²பேத்வா விஸத்தா லக்³கா³ லகி³தா, ஏவம் அஹம்பி ஜானாமி பஸ்ஸாமி. ததா² ஏவம் யதா² ஏதாய பஜாய க³ஹிதந்தி ஏவம் அஜ்ஜோ²ஸிதம் நத்தி² ததா²க³தானந்தி அத்தோ².

5. ப்³ரஹ்மசரியஸுத்தவண்ணனா

25. பஞ்சமே ஜனகுஹனத்த²ந்தி தீஹி குஹனவத்தூ²ஹி ஜனஸ்ஸ குஹனத்தா²ய. ந ஜனலபனத்த²ந்தி ந ஜனஸ்ஸ உபலாபனத்த²ம். ந லாப⁴ஸக்காரஸிலோகானிஸம்ஸத்த²ந்தி ந சீவராதி³து²திவசனத்த²ம். ந இதிவாத³ப்பமோக்கா²னிஸம்ஸத்த²ந்தி ந தேன தேன காரணேன கதவாதா³னிஸம்ஸத்த²ம், ந வாத³ஸ்ஸ பமோக்கா²னிஸம்ஸத்த²ம். ந இதி மம் ஜனோ ஜானாதூதி ந ‘‘ஏவம் கிர ஏஸ பி⁴க்கு², ஏவம் கிர ஏஸ பி⁴க்கூ²’’தி ஜனஸ்ஸ ஜானனத்தா²ய. ஸம்வரத்த²ந்தி பஞ்சஹி ஸம்வரேஹி ஸம்வரணத்தா²ய. பஹானத்த²ந்தி தீஹி பஹானேஹி பஜஹனத்தா²ய. விராக³த்த²ந்தி ராகா³தீ³னம் விரஜ்ஜனத்தா²ய. நிரோத⁴த்த²ந்தி தேஸம்யேவ நிருஜ்ஜ²னத்தா²ய. அனீதிஹந்தி இதிஹபரிவஜ்ஜிதம், அபரபத்தியந்தி அத்தோ². நிப்³பா³னோக³த⁴கா³மினந்தி நிப்³பா³னஸ்ஸ அந்தோகா³மினம். மக்³க³ப்³ரஹ்மசரியஞ்ஹி நிப்³பா³னம் ஆரம்மணம் கரித்வா நிப்³பா³னஸ்ஸ அந்தோயேவ வத்ததி பவத்ததி. படிபஜ்ஜந்தீதி து³வித⁴ம்பி படிபஜ்ஜந்தி. இமஸ்மிம் ஸுத்தே வட்டவிவட்டம் கதே²த்வா கா³தா²ஸு விவட்டமேவ கதி²தம்.

6. குஹஸுத்தவண்ணனா

26. ச²ட்டே² குஹாதி குஹகா. த²த்³தா⁴தி கோதே⁴ன ச மானேன ச த²த்³தா⁴. லபாதி உபலாபகா. ஸிங்கீ³தி ‘‘தத்த² கதமம் ஸிங்க³ம், யம் ஸிங்க³ம் ஸிங்கா³ரதா சாதுரதா சாதுரியம் பரிக்க²த்ததா பாரிக்க²த்திய’’ந்தி (விப⁴. 852) ஏவம் வுத்தேஹி ஸிங்க³ஸதி³ஸேஹி பாகடகிலேஸேஹி ஸமன்னாக³தா. உன்னளாதி உக்³க³தனளா துச்ச²மானம் உக்கி²பித்வா டி²தா. அஸமாஹிதாதி சித்தேகக்³க³மத்தஸ்ஸாபி அலாபி⁴னோ. ந மே தே, பி⁴க்க²வே, பி⁴க்கூ² மாமகாதி தே மய்ஹம் பி⁴க்கூ² மம ஸந்தகா ந ஹோந்தி. ‘‘தே மய்ஹ’’ந்தி இத³ம் பன ஸத்தா²ரம் உத்³தி³ஸ்ஸ பப்³ப³ஜிதத்தா வுத்தம். தே கோ² மே, பி⁴க்க²வே, பி⁴க்கூ² மாமகாதி இதா⁴பி மேதி அத்தானம் உத்³தி³ஸ்ஸ பப்³ப³ஜிதத்தா வத³தி, ஸம்மாபடிபன்னத்தா பன ‘‘மாமகா’’தி ஆஹ. வுத்³தி⁴ம் விரூள்ஹிம் வேபுல்லம் ஆபஜ்ஜந்தீதி ஸீலாதீ³ஹி கு³ணேஹி வட்³ட⁴னதோ வுத்³தி⁴ம், நிச்சலபா⁴வேன விரூள்ஹிம், ஸப்³ப³த்த² பத்த²டதாய வேபுல்லம் பாபுணந்தி. தே பனேதே யாவ அரஹத்தமக்³கா³ விருஹந்தி, அரஹத்தப²லம் பத்தே விரூள்ஹா நாம ஹோந்தி. இதி இமஸ்மிம் ஸுத்தேபி கா³தா²ஸுபி வட்டவிவட்டமேவ கதி²தம்.

7. ஸந்துட்டி²ஸுத்தவண்ணனா

27. ஸத்தமே அப்பானீதி பரித்தானி. ஸுலபா⁴னீதி ஸுகே²ன லத்³த⁴ப்³பா³னி, யத்த² கத்த²சி ஸக்கா ஹோந்தி லபி⁴தும். அனவஜ்ஜானீதி நித்³தோ³ஸானி. பிண்டி³யாலோபபோ⁴ஜனந்தி ஜங்கா⁴பிண்டி³யப³லேன சரித்வா ஆலோபமத்தம் லத்³த⁴ம் போ⁴ஜனம். பூதிமுத்தந்தி யம்கிஞ்சி முத்தம். யதா² ஹி ஸுவண்ணவண்ணோபி காயோ பூதிகாயோதி வுச்சதி, ஏவம் அபி⁴னவம்பி முத்தம் பூதிமுத்தமேவ.

விகா⁴தோதி விக³தகா⁴தோ, சித்தஸ்ஸ து³க்க²ம் ந ஹோதீதி அத்தோ². தி³ஸா நப்படிஹஞ்ஞதீதி யஸ்ஸ ஹி ‘‘அஸுகட்டா²னம் நாம க³தோ சீவராதீ³னி லபி⁴ஸ்ஸாமீ’’தி சித்தம் உப்பஜ்ஜதி, தஸ்ஸ தி³ஸா படிஹஞ்ஞதி நாம. யஸ்ஸ ஏவம் ந உப்பஜ்ஜதி, தஸ்ஸ நப்படிஹஞ்ஞதி நாம. த⁴ம்மாதி படிபத்தித⁴ம்மா. ஸாமஞ்ஞஸ்ஸானுலோமிகாதி ஸமணத⁴ம்மஸ்ஸ அனுலோமா. அதி⁴க்³க³ஹிதாதி ஸப்³பே³தே துட்ட²சித்தஸ்ஸ பி⁴க்கு²னோ அதி⁴க்³க³ஹிதா ஹோந்தி அந்தோக³தா ந பரிபா³ஹிராதி.

8. அரியவம்ஸஸுத்தவண்ணனா

28. அட்ட²மஸ்ஸ அஜ்ஜா²ஸயிகோ நிக்கே²போ. இமம் கிர மஹாஅரியவம்ஸஸுத்தந்தம் ப⁴க³வா ஜேதவனமஹாவிஹாரே த⁴ம்மஸபா⁴யம் பஞ்ஞத்தவரபு³த்³தா⁴ஸனே நிஸின்னோ அத்தனோபி பரபுக்³க³லானம்பி அஜ்ஜா²ஸயவஸேன பரிவாரேத்வா நிஸின்னானி சத்தாலீஸ பி⁴க்கு²ஸஹஸ்ஸானி, ‘‘பி⁴க்க²வே’’தி ஆமந்தேத்வா சத்தாரோமே, பி⁴க்க²வே, அரியவம்ஸாதி ஆரபி⁴. தத்த² அரியவம்ஸாதி அரியானம் வம்ஸா. யதா² ஹி க²த்தியவம்ஸோ ப்³ராஹ்மணவம்ஸோ வேஸ்ஸவம்ஸோ ஸுத்³த³வம்ஸோ ஸமணவம்ஸோ குலவம்ஸோ ராஜவம்ஸோ, ஏவம் அயம்பி அட்ட²மோ அரியவம்ஸோ அரியதந்தி அரியபவேணீ நாம ஹோதி. ஸோ கோ² பனாயம் அரியவம்ஸோ இமேஸம் வம்ஸானம் மூலக³ந்தா⁴தீ³னம் காளானுஸாரிக³ந்தா⁴த³யோ விய அக்³க³மக்கா²யதி.

கே பன தே அரியா, யேஸம் ஏதே வம்ஸாதி? அரியா வுச்சந்தி பு³த்³தா⁴ ச பச்சேகபு³த்³தா⁴ ச ததா²க³தஸாவகா ச, ஏதேஸம் அரியானம் வம்ஸாதி அரியவம்ஸா. இதோ புப்³பே³ ஹி ஸதஸஹஸ்ஸகப்பாதி⁴கானம் சதுன்னம் அஸங்க்²யேய்யானம் மத்த²கே தண்ஹங்கரோ, மேத⁴ங்கரோ, ஸரணங்கரோ, தீ³பங்கரோதி சத்தாரோ பு³த்³தா⁴ உப்பன்னா, தே அரியா, தேஸம் அரியானம் வம்ஸாதி அரியவம்ஸா. தேஸம் பு³த்³தா⁴னம் பரினிப்³பா³னதோ அபரபா⁴கே³ அஸங்க்²யேய்யம் அதிக்கமித்வா கோண்ட³ஞ்ஞோ நாம பு³த்³தோ⁴ உப்பன்னோ…பே… இமஸ்மிம் கப்பே ககுஸந்தோ⁴, கோணாக³மனோ, கஸ்ஸபோ, அம்ஹாகம் ப⁴க³வா கோ³தமோதி சத்தாரோ பு³த்³தா⁴ உப்பன்னா, தேஸம் அரியானம் வம்ஸாதி அரியவம்ஸா. அபிச அதீதானாக³தபச்சுப்பன்னானம் ஸப்³ப³பு³த்³த⁴-பச்சேகபு³த்³த⁴-பு³த்³த⁴ஸாவகானம் அரியானம் வம்ஸாதி அரியவம்ஸா.

தே கோ² பனேதே அக்³க³ஞ்ஞா அக்³கா³தி ஜானிதப்³பா³, ரத்தஞ்ஞா தீ³க⁴ரத்தம் பவத்தாதி ஜானிதப்³பா³, வம்ஸஞ்ஞா வம்ஸாதி ஜானிதப்³பா³. போராணா ந அது⁴னுப்பத்திகா. அஸம்கிண்ணா அவிகிண்ணா அனபனீதா. அஸம்கிண்ணபுப்³பா³ அதீதபு³த்³தே⁴ஹிபி ந ஸம்கிண்ணபுப்³பா³, ‘‘கி இமேஹீ’’தி ந அபனீதபுப்³பா³. ந ஸம்கீயந்தீதி இதா³னிபி ந அபனீயந்தி. ந ஸம்கீயிஸ்ஸந்தீதி அனாக³தபு³த்³தே⁴ஹிபி ந அபனீயிஸ்ஸந்தி. யே லோகே விஞ்ஞூ ஸமணப்³ராஹ்மணா, தேஹி அப்படிகுட்டா², ஸமணேஹி ப்³ராஹ்மணேஹி விஞ்ஞூஹி அனிந்தி³தா அக³ரஹிதா.

ஸந்துட்டோ² ஹோதீதி பச்சயஸந்தோஸவஸேன ஸந்துட்டோ² ஹோதி. இதரீதரேனாதி ந தூ²லஸுகு²மலூக²பணீததி²ரஜிண்ணானம் யேன கேனசி, அத² கோ² யதா²லத்³தா⁴தீ³னம் இதரீதரேன யேன கேனசி ஸந்துட்டோ² ஹோதீதி அத்தோ². சீவரஸ்மிஞ்ஹி தயோ ஸந்தோஸா யதா²லாப⁴ஸந்தோஸோ யதா²ப³லஸந்தோஸோ யதா²ஸாருப்பஸந்தோஸோதி. பிண்ட³பாதாதீ³ஸுபி ஏஸேவ நயோ. தேஸம் வித்தா²ரகதா² ‘‘ஸந்துட்ட²ஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தீ’’தி இமஸ்மிம் ஸுத்தே வுத்தனயேனேவ வேதி³தப்³பா³. இதி இமே தயோ ஸந்தோஸே ஸந்தா⁴ய ‘‘ஸந்துட்டோ² ஹோதி இதரீதரேன சீவரேன, யதா²லத்³தா⁴தீ³ஸு யேன கேனசி சீவரேன ஸந்துட்டோ² ஹோதீ’’தி வுத்தம்.

ஏத்த² ச சீவரம் ஜானிதப்³ப³ம், சீவரக்கே²த்தம் ஜானிதப்³ப³ம், பம்ஸுகூலம் ஜானிதப்³ப³ம், சீவரஸந்தோஸோ ஜானிதப்³போ³, சீவரப்படிஸம்யுத்தானி து⁴தங்கா³னி ஜானிதப்³பா³னி. தத்த² சீவரம் ஜானிதப்³ப³ந்தி கோ²மாதீ³னி ச² சீவரானி து³கூலாதீ³னி ச² அனுலோமசீவரானி ஜானிதப்³பா³னி. இமானி த்³வாத³ஸ கப்பியசீவரானி. குஸசீரம், வாகசீரம், ப²லகசீரம், கேஸகம்ப³லம், வாளகம்ப³லம், போத்த²கோ, சம்மம், உலூகபக்க²ம், ருக்க²து³ஸ்ஸம், லதாது³ஸ்ஸம், ஏரகது³ஸ்ஸம், கத³லிது³ஸ்ஸம், வேளுது³ஸ்ஸந்தி ஏவமாதீ³னி பன அகப்பியசீவரானி.

சீவரக்கே²த்தந்தி ‘‘ஸங்க⁴தோ வா க³ணதோ வா ஞாதிதோ வா மித்ததோ வா அத்தனோ வா த⁴னேன, பம்ஸுகூலம் வா’’தி ஏவம் உப்பஜ்ஜனதோ ச² கே²த்தானி, அட்ட²ன்னஞ்ச மாதிகானம் வஸேன அட்ட² கே²த்தானி ஜானிதப்³பா³னி.

பம்ஸுகூலந்தி ஸோஸானிகம், பாபணிகம், ரதி²யம், ஸங்காரகூடகம், ஸோத்தி²யம், ஸினானம், தித்த²ம், க³தபச்சாக³தம், அக்³கி³த³ட்³ட⁴ம், கோ³கா²யிதம், உபசிககா²யிதம், உந்தூ³ரகா²யிதம், அந்தச்சி²ன்னம், த³ஸச்சி²ன்னம், த⁴ஜாஹடம், தூ²பம், ஸமணசீவரம், ஸாமுத்³தி³யம், ஆபி⁴ஸேகியம், பந்தி²கம், வாதாஹடம், இத்³தி⁴மயம், தே³வத³த்தியந்தி தேவீஸதி பம்ஸுகூலானி வேதி³தப்³பா³னி. ஏத்த² ச ஸோத்தி²யந்தி க³ப்³ப⁴மலஹரணம். க³தபச்சாக³தந்தி மதகஸரீரம் பாருபித்வா ஸுஸானம் நேத்வா ஆனீதசீவரம். த⁴ஜாஹடந்தி த⁴ஜம் உஸ்ஸாபேத்வா ததோ ஆனீதம். தூ²பந்தி வம்மிகே பூஜிதசீவரம். ஸாமுத்³தி³யந்தி ஸமுத்³த³வீசீஹி த²லம் பாபிதம். பந்தி²கந்தி பந்த²ம் க³ச்ச²ந்தேஹி சோரப⁴யேன பாஸாணேஹி கோட்டேத்வா பாருதசீவரம். இத்³தி⁴மயந்தி ஏஹிபி⁴க்கு²சீவரம். ஸேஸம் பாகடமேவாதி.

சீவரஸந்தோஸோதி வீஸதி சீவரஸந்தோஸா – சீவரே விதக்கஸந்தோஸோ, க³மனஸந்தோஸோ, பரியேஸனஸந்தோஸோ, படிலாப⁴ஸந்தோஸோ, மத்தபடிக்³க³ஹணஸந்தோஸோ, லோலுப்பவிவஜ்ஜனஸந்தோஸோ, யதா²லாப⁴ஸந்தோஸோ, யதா²ப³லஸந்தோஸோ, யதா²ஸாருப்பஸந்தோஸோ, உத³கஸந்தோஸோ, தோ⁴வனஸந்தோஸோ, கரணஸந்தோஸோ, பரிமாணஸந்தோஸோ, ஸுத்தஸந்தோஸோ, ஸிப்³ப³னஸந்தோஸோ, ரஜனஸந்தோஸோ, கப்பஸந்தோஸோ, பரிபோ⁴க³ஸந்தோஸோ, ஸன்னிதி⁴பரிவஜ்ஜனஸந்தோஸோ, விஸ்ஸஜ்ஜனஸந்தோஸோதி.

தத்த² ஸாத³கபி⁴க்கு²னா தேமாஸம் நிப³த்³த⁴வாஸம் வஸித்வா ஏகமாஸமத்தம் விதக்கேதும் வட்டதி. ஸோ ஹி பவாரேத்வா சீவரமாஸே சீவரம் கரோதி, பம்ஸுகூலிகோ அட்³ட⁴மாஸேனேவ கரோதி. இத³ம் மாஸட்³ட⁴மாஸமத்தம் விதக்கனம் விதக்கஸந்தோஸோ நாம. விதக்கஸந்தோஸேன பன ஸந்துட்டே²ன பி⁴க்கு²னா பாசீனக²ண்ட³ராஜிவாஸிகபம்ஸுகூலிகத்தே²ரஸதி³ஸேன ப⁴விதப்³ப³ம்.

தே²ரோ கிர ‘‘சேதியபப்³ப³தவிஹாரே சேதியம் வந்தி³ஸ்ஸாமீ’’தி ஆக³தோ சேதியம் வந்தி³த்வா சிந்தேஸி – ‘‘மய்ஹம் சீவரம் ஜிண்ணம், ப³ஹூனம் வஸனட்டா²னே லபி⁴ஸ்ஸாமீ’’தி. ஸோ மஹாவிஹாரம் க³ந்த்வா ஸங்க⁴த்தே²ரம் தி³ஸ்வா வஸனட்டா²னம் புச்சி²த்வா தத்த² வுத்தோ² புனதி³வஸே சீவரம் ஆதா³ய ஆக³ந்த்வா தே²ரம் வந்தி³. தே²ரோ ‘‘கிம், ஆவுஸோ’’தி ஆஹ. கா³மத்³வாரம், ப⁴ந்தே, க³மிஸ்ஸாமீதி. அஹம்பாவுஸோ, க³மிஸ்ஸாமீதி. ஸாது⁴, ப⁴ந்தேதி க³ச்ச²ந்தோ மஹாபோ³தி⁴த்³வாரகோட்ட²கே ட²த்வா ‘‘புஞ்ஞவந்தானம் வஸனட்டா²னே மனாபம் லபி⁴ஸ்ஸாமீ’’தி சிந்தேத்வா ‘‘அபரிஸுத்³தோ⁴ மே விதக்கோ’’தி ததோவ படினிவத்தி. புனதி³வஸே அம்ப³ங்க³ணஸமீபதோ, புனதி³வஸே மஹாசேதியஸ்ஸ உத்தரத்³வாரதோ தத்தே²வ படினிவத்தித்வா சதுத்த²தி³வஸே தே²ரஸ்ஸ ஸந்திகம் அக³மாஸி. தே²ரோ ‘‘இமஸ்ஸ பி⁴க்கு²னோ விதக்கோ ந பரிஸுத்³தோ⁴ ப⁴விஸ்ஸதீ’’தி சீவரம் க³ஹேத்வா தேன ஸத்³தி⁴ம்யேவ பஞ்ஹம் புச்ச²மானோ கா³மம் பாவிஸி. தஞ்ச ரத்திம் ஏகோ மனுஸ்ஸோ உச்சாரபலிபு³த்³தோ⁴ ஸாடகேயேவ வச்சம் கத்வா தம் ஸங்காரட்டா²னே ச²ட்³டே³ஸி. பம்ஸுகூலிகத்தே²ரோ தம் நீலமக்கி²காஹி ஸம்பரிகிண்ணம் தி³ஸ்வா அஞ்ஜலிம் பக்³க³ஹேஸி. மஹாதே²ரோ ‘‘கிம், ஆவுஸோ, ஸங்காரட்டா²னஸ்ஸ அஞ்ஜலிம் பக்³க³ண்ஹாஸீ’’தி. நாஹம், ப⁴ந்தே, ஸங்காரட்டா²னஸ்ஸ அஞ்ஜலிம் பக்³க³ண்ஹாமி, மய்ஹம் பிது த³ஸப³லஸ்ஸ பக்³க³ண்ஹாமி, புண்ணதா³ஸியா ஸரீரம் பாருபித்வா ச²ட்³டி³தம் பம்ஸுகூலம் தும்ப³மத்தே பாணகே விது⁴னித்வா ஸுஸானதோ க³ண்ஹந்தேன து³க்கரதரம் கதம், ப⁴ந்தேதி. மஹாதே²ரோ ‘‘பரிஸுத்³தோ⁴ விதக்கோ பம்ஸுகூலிகஸ்ஸா’’தி சிந்தேஸி. பம்ஸுகூலிகத்தே²ரோபி தஸ்மிம்யேவ டா²னே டி²தோ விபஸ்ஸனம் வட்³டே⁴த்வா தீணி ப²லானி பத்தோ தம் ஸாடகம் க³ஹேத்வா சீவரம் கத்வா பாருபித்வா பாசீனக²ண்ட³ராஜிம் க³ந்த்வா அக்³க³ப²லம் அரஹத்தம் பாபுணி.

சீவரத்தா²ய க³ச்ச²ந்தஸ்ஸ பன ‘‘கத்த² லபி⁴ஸ்ஸாமீ’’தி அசிந்தேத்வா கம்மட்டா²னஸீஸேனேவ க³மனம் க³மனஸந்தோஸோ நாம. பரியேஸந்தஸ்ஸ பன யேன வா தேன வா ஸத்³தி⁴ம் அபரியேஸித்வா லஜ்ஜிம் பேஸலம் பி⁴க்கு²ம் க³ஹேத்வா பரியேஸனம் பரியேஸனஸந்தோஸோ நாம. ஏவம் பரியேஸந்தஸ்ஸ ஆஹரியமானம் சீவரம் தூ³ரதோ தி³ஸ்வா ‘‘ஏதம் மனாபம் ப⁴விஸ்ஸதி, ஏதம் அமனாப’’ந்தி ஏவம் அவிதக்கேத்வா தூ²லஸுகு²மாதீ³ஸு யதா²லத்³தே⁴னேவ ஸந்துஸ்ஸனம் படிலாப⁴ஸந்தோஸோ நாம. ஏவம் லத்³த⁴ம் க³ண்ஹந்தஸ்ஸாபி ‘‘ஏத்தகம் து³பட்டஸ்ஸ ப⁴விஸ்ஸதி, ஏத்தகம் ஏகபட்டஸ்ஸா’’தி அத்தனோ பஹோனகமத்தேனேவ ஸந்துஸ்ஸனம் மத்தபடிக்³க³ஹணஸந்தோஸோ நாம. சீவரம் பரியேஸந்தஸ்ஸ பன ‘‘அஸுகஸ்ஸ க⁴ரத்³வாரே மனாபம் லபி⁴ஸ்ஸாமீ’’தி அசிந்தேத்வா த்³வாரபடிபாடியா சரணம் லோலுப்பவிவஜ்ஜனஸந்தோஸோ நாம.

லூக²பணீதேஸு யேன கேனசி யாபேதும் ஸக்கோந்தஸ்ஸ யதா²லத்³தே⁴னேவ யாபனம் யதா²லாப⁴ஸந்தோஸோ நாம. அத்தனோ தா²மம் ஜானித்வா யேன யாபேதும் ஸக்கோதி, தேன யாபனம் யதா²ப³லஸந்தோஸோ நாம. மனாபம் அஞ்ஞஸ்ஸ த³த்வா அத்தனா யேன கேனசி யாபனம் யதா²ஸாருப்பஸந்தோஸோ நாம.

‘‘கத்த² உத³கம் மனாபம், கத்த² அமனாப’’ந்தி அவிசாரேத்வா யேன கேனசி தோ⁴வனூபகே³ன உத³கேன தோ⁴வனம் உத³கஸந்தோஸோ நாம. பண்டு³மத்திககே³ருகபூதிபண்ணரஸகிலிட்டா²னி பன உத³கானி வஜ்ஜேதும் வட்டதி. தோ⁴வந்தஸ்ஸ பன முக்³க³ராதீ³ஹி அபஹரித்வா ஹத்தே²ஹி மத்³தி³த்வா தோ⁴வனம் தோ⁴வனஸந்தோஸோ நாம. ததா² அஸுஜ்ஜ²ந்தம் பண்ணானி பக்கி²பித்வா தாபிதஉத³கேனாபி தோ⁴விதும் வட்டதி. ஏவம் தோ⁴வித்வா கரோந்தஸ்ஸ ‘‘இத³ம் தூ²லம், இத³ம் ஸுகு²ம’’ந்தி அகோபேத்வா பஹோனகனீஹாரேனேவ கரணம் கரணஸந்தோஸோ நாம. திமண்ட³லபதிச்சா²த³னமத்தஸ்ஸேவ கரணம் பரிமாணஸந்தோஸோ நாம. சீவரகரணத்தா²ய பன மனாபம் ஸுத்தம் பரியேஸிஸ்ஸாமீதி அவிசாரேத்வா ரதி²காதீ³ஸு வா தே³வட்டா²னே வா ஆஹரித்வா பாத³மூலே வா ட²பிதம் யம்கிஞ்சிதே³வ ஸுத்தம் க³ஹேத்வா கரணம் ஸுத்தஸந்தோஸோ நாம.

குஸிப³ந்த⁴னகாலே பன அங்கு³லமத்தே ஸத்த வாரே ந விஜ்ஜி²தப்³ப³ம். ஏவம் கரோந்தஸ்ஸ ஹி யோ பி⁴க்கு² ஸஹாயோ ந ஹோதி, தஸ்ஸ வத்தபே⁴தோ³பி நத்தி². திவங்கு³லமத்தே பன ஸத்த வாரே விஜ்ஜி²தப்³ப³ம். ஏவம் கரோந்தஸ்ஸ மக்³க³ப்படிபன்னேனாபி ஸஹாயேன ப⁴விதப்³ப³ம். யோ ந ஹோதி, தஸ்ஸ வத்தபே⁴தோ³. அயம் ஸிப்³ப³னஸந்தோஸோ நாம. ரஜந்தேன பன காளகச்ச²காதீ³னி பரியேஸந்தேன ந சரிதப்³ப³ம், ஸோமவக்கலாதீ³ஸு யம் லப⁴தி, தேன ரஜிதப்³ப³ம். அலப⁴ந்தேன பன மனுஸ்ஸேஹி அரஞ்ஞே வாகம் க³ஹேத்வா ச²ட்³டி³தரஜனம் வா பி⁴க்கூ²ஹி பசித்வா ச²ட்³டி³தகஸடம் வா க³ஹேத்வா ரஜிதப்³ப³ம். அயம் ரஜனஸந்தோஸோ நாம. நீலகத்³த³மகாளஸாமேஸு யம்கிஞ்சி க³ஹேத்வா ஹத்தி²பிட்டே² நிஸின்னஸ்ஸ பஞ்ஞாயமானகப்பகரணம் கப்பஸந்தோஸோ நாம.

ஹிரிகோபீனப்படிச்சா²த³னமத்தவஸேன பரிபு⁴ஞ்ஜனம் பரிபோ⁴க³ஸந்தோஸோ நாம. து³ஸ்ஸம் பன லபி⁴த்வா ஸுத்தம் வா ஸூசிம் வா காரகம் வா அலப⁴ந்தேன ட²பேதும் வட்டதி, லப⁴ந்தேன ந வட்டதி. கதம்பி ஸசே அந்தேவாஸிகாதீ³னம் தா³துகாமோ ஹோதி, தே ச அஸன்னிஹிதா, யாவ ஆக³மனா ட²பேதும் வட்டதி. ஆக³தமத்தேஸு தா³தப்³ப³ம். தா³தும் அஸக்கோந்தேன அதி⁴ட்டா²தப்³ப³ம். அஞ்ஞஸ்மிம் சீவரே ஸதி பச்சத்த²ரணம்பி அதி⁴ட்டா²தும் வட்டதி. அனதி⁴ட்டி²தமேவ ஹி ஸன்னிதி⁴ ஹோதி, அதி⁴ட்டி²தம் ந ஹோதீதி மஹாஸீவத்தே²ரோ ஆஹ. அயம் ஸன்னிதி⁴பரிவஜ்ஜனஸந்தோஸோ நாம. விஸ்ஸஜ்ஜேந்தேன பன ந முக²ம் ஓலோகேத்வா தா³தப்³ப³ம், ஸாரணீயத⁴ம்மே ட²த்வா விஸ்ஸஜ்ஜேதப்³ப³ந்தி அயம் விஸ்ஸஜ்ஜனஸந்தோஸோ நாம.

சீவரப்படிஸம்யுத்தானி து⁴தங்கா³னி நாம பம்ஸுகூலிகங்க³ஞ்சேவ தேசீவரிகங்க³ஞ்ச. தேஸம் வித்தா²ரகதா² விஸுத்³தி⁴மக்³கே³ (விஸுத்³தி⁴. 1.24-25) வேதி³தப்³பா³. இதி சீவரஸந்தோஸமஹாஅரியவம்ஸம் பூரயமானோ பி⁴க்கு² இமானி த்³வே து⁴தங்கா³னி கோ³பேதி. இமானி கோ³பேந்தோ சீவரஸந்தோஸமஹாஅரியவம்ஸவஸேன ஸந்துட்டோ² ஹோதீதி.

வண்ணவாதீ³தி ஏகோ ஸந்துட்டோ² ஹோதி, ஸந்தோஸஸ்ஸ வண்ணம் ந கதே²தி. ஏகோ ந ஸந்துட்டோ² ஹோதி, ஸந்தோஸஸ்ஸ வண்ணம் கதே²தி. ஏகோ நேவ ஸந்துட்டோ² ஹோதி, ந ஸந்தோஸஸ்ஸ வண்ணம் கதே²தி. ஏகோ ஸந்துட்டோ² சேவ ஹோதி, ஸந்தோஸஸ்ஸ ச வண்ணம் கதே²தி. தம் த³ஸ்ஸேதும் ‘‘இதரீதரசீவரஸந்துட்டி²யா ச வண்ணவாதீ³’’தி வுத்தம்.

அனேஸனந்தி தூ³தேய்யபஹினக³மனானுயோக³பபே⁴த³ம் நானப்பகாரம் அனேஸனம். அப்பதிரூபந்தி அயுத்தம். அலத்³தா⁴ சாதி அலபி⁴த்வா. யதா² ஏகச்சோ ‘‘கத²ம் நு கோ² சீவரம் லபி⁴ஸ்ஸாமீ’’தி புஞ்ஞவந்தேஹி பி⁴க்கூ²ஹி ஸத்³தி⁴ம் ஏகதோ ஹுத்வா கோஹஞ்ஞம் கரோந்தோ உத்தஸதி பரிதஸ்ஸதி, ஸந்துட்டோ² பி⁴க்கு² ஏவம் அலத்³தா⁴ சீவரம் ந பரிதஸ்ஸதி. லத்³தா⁴ சாதி த⁴ம்மேன ஸமேன லபி⁴த்வா. அக³தி⁴தோதி விக³தலோப⁴கி³த்³தோ⁴. அமுச்சி²தோதி அதி⁴மத்ததண்ஹாய முச்ச²ம் அனாபன்னோ. அனஜ்ஜோ²பன்னோதி தண்ஹாய அனோத்த²தோ அபரியோனத்³தோ⁴. ஆதீ³னவத³ஸ்ஸாவீதி அனேஸனாபத்தியஞ்ச கே³தி⁴தபரிபோ⁴கே³ ச ஆதீ³னவம் பஸ்ஸமானோ. நிஸ்ஸரணபஞ்ஞோதி ‘‘யாவதே³வ ஸீதஸ்ஸ படிகா⁴தாயா’’தி வுத்தம் நிஸ்ஸரணமேவ பஜானந்தோ.

இதரீதரசீவரஸந்துட்டி²யாதி யேன கேனசி சீவரேன ஸந்துட்டி²யா. நேவத்தானுக்கம்ஸேதீதி ‘‘அஹம் பம்ஸுகூலிகோ, மயா உபஸம்பத³மாளேயேவ பம்ஸுகூலிகங்க³ம் க³ஹிதம், கோ மயா ஸதி³ஸோ அத்தீ²’’தி அத்துக்கம்ஸனம் ந கரோதி. நோ பரம் வம்பே⁴தீதி ‘‘இமே பனஞ்ஞே பி⁴க்கூ² ந பம்ஸுகூலிகா’’தி வா, ‘‘பம்ஸுகூலிகங்க³மத்தம்பி ஏதேஸம் நத்தீ²’’தி வா ஏவம் பரம் ந வம்பே⁴தி. யோ ஹி தத்த² த³க்கோ²தி யோ தஸ்மிம் சீவரஸந்தோஸே வண்ணவாதா³தீ³ஸு வா த³க்கோ² சே²கோ ப்³யத்தோ. அனலஸோதி ஸாதச்சகிரியாய ஆலஸியவிரஹிதோ. ஸம்பஜானோ படிஸ்ஸதோதி ஸம்பஜானபஞ்ஞாய சேவ ஸதியா ச யுத்தோ. அரியவம்ஸே டி²தோதி அரியவம்ஸே பதிட்டி²தோ.

இதரீதரேன பிண்ட³பாதேனாதி யேன கேனசி பிண்ட³பாதேன. ஏத்தா²பி பிண்ட³பாதோ ஜானிதப்³போ³, பிண்ட³பாதக்கே²த்தம் ஜானிதப்³ப³ம், பிண்ட³பாதஸந்தோஸோ ஜானிதப்³போ³, பிண்ட³பாதப்படிஸம்யுத்தம் து⁴தங்க³ம் ஜானிதப்³ப³ம். தத்த² பிண்ட³பாதோதி ஓத³னோ கும்மாஸோ ஸத்து மச்சோ² மம்ஸம் கீ²ரம் த³தி⁴ ஸப்பி நவனீதம் தேலம் மது⁴ பா²ணிதம் யாகு³ கா²த³னீயம் ஸாயனீயம் லேஹனீயந்தி ஸோளஸ பிண்ட³பாதா.

பிண்ட³பாதக்கே²த்தந்தி ஸங்க⁴ப⁴த்தம் உத்³தே³ஸப⁴த்தம் நிமந்தனம் ஸலாகப⁴த்தம் பக்கி²கம் உபோஸதி²கம் பாடிபதி³கப⁴த்தம் ஆக³ந்துகப⁴த்தம் க³மிகப⁴த்தம் கி³லானப⁴த்தம் கி³லானுபட்டா²கப⁴த்தம் து⁴ரப⁴த்தம் குடிப⁴த்தம் வாரப⁴த்தம் விஹாரப⁴த்தந்தி பன்னரஸ பிண்ட³பாதக்கே²த்தானி.

பிண்ட³பாதஸந்தோஸோதி பிண்ட³பாதே விதக்கஸந்தோஸோ க³மனஸந்தோஸோ பரியேஸனஸந்தோஸோ படிலாப⁴ஸந்தோஸோ படிக்³க³ஹணஸந்தோஸோ மத்தபடிக்³க³ஹணஸந்தோஸோ லோலுப்பவிவஜ்ஜனஸந்தோஸோ யதா²லாப⁴ஸந்தோஸோ யதா²ப³லஸந்தோஸோ யதா²ஸாருப்பஸந்தோஸோ உபகாரஸந்தோஸோ பரிமாணஸந்தோஸோ பரிபோ⁴க³ஸந்தோஸோ ஸன்னிதி⁴பரிவஜ்ஜனஸந்தோஸோ விஸ்ஸஜ்ஜனஸந்தோஸோதி பன்னரஸ ஸந்தோஸா.