(10) 5. அஸுரவக்³கோ³

1. அஸுரஸுத்தவண்ணனா

91. பஞ்சமஸ்ஸ பட²மே அஸுரோதி அஸுரஸதி³ஸோ பீ³ப⁴ச்சோ². தே³வோதி தே³வஸதி³ஸோ கு³ணவஸேன அபி⁴ரூபோ பாஸாதி³கோ.

2. பட²மஸமாதி⁴ஸுத்தவண்ணனா

92. து³தியே அஜ்ஜ²த்தம் சேதோஸமத²ஸ்ஸாதி நியகஜ்ஜ²த்தே அப்பனாசித்தஸமாதி⁴ஸ்ஸ. அதி⁴பஞ்ஞாத⁴ம்மவிபஸ்ஸனாயாதி ஸங்கா²ரபரிக்³கா³ஹகவிபஸ்ஸனாஞாணஸ்ஸ. தஞ்ஹி அதி⁴பஞ்ஞாஸங்கா²தஞ்ச, பஞ்சக்க²ந்த⁴ஸங்கா²தேஸு ச த⁴ம்மேஸு விபஸ்ஸனாபூ⁴தம், தஸ்மா ‘‘அதி⁴பஞ்ஞாத⁴ம்மவிபஸ்ஸனா’’தி வுச்சதீதி.

3. து³தியஸமாதி⁴ஸுத்தவண்ணனா

93. ததியே யோகோ³ கரணீயோதி யுத்தப்பயுத்ததா கத்தப்³பா³. ச²ந்தோ³தி கத்துகம்யதாச²ந்தோ³. வாயாமோதி பயோகோ³. உஸ்ஸாஹோதி ததோ அதி⁴மத்ததரம் வீரியம். உஸ்ஸோள்ஹீதி பங்கலக்³க³ஸகடஉத்³த⁴ரணஸதி³ஸம் மஹாவீரியம். அப்படிவானீதி அனிவத்தனதா.

4. ததியஸமாதி⁴ஸுத்தவண்ணனா

94. சதுத்தே² ஏவம் கோ², ஆவுஸோ, ஸங்கா²ரா த³ட்ட²ப்³பா³திஆதீ³ஸு, ஆவுஸோ, ஸங்கா²ரா நாம அனிச்சதோ த³ட்ட²ப்³பா³, அனிச்சதோ ஸம்மஸிதப்³பா³, அனிச்சதோ பஸ்ஸிதப்³பா³. ததா² து³க்க²தோ, அனத்ததோதி ஏவம் அத்தோ² த³ட்ட²ப்³போ³. ஏவம் கோ², ஆவுஸோ, சித்தம் ஸண்ட²பேதப்³ப³ந்திஆதீ³ஸுபி பட²மஜ்ஜா²னவஸேன, ஆவுஸோ, சித்தம் ஸண்ட²பேதப்³ப³ம் பட²மஜ்ஜா²னவஸேன ஸன்னிஸாதே³தப்³ப³ம், பட²மஜ்ஜா²னவஸேன ஏகோதி³ காதப்³ப³ம், பட²மஜ்ஜா²னவஸேன ஸமாத³ஹிதப்³ப³ம். ததா² து³தியஜ்ஜா²னாதி³வஸேனாதி ஏவம் அத்தோ² த³ட்ட²ப்³போ³. இமேஸு தீஸுபி ஸுத்தேஸு ஸமத²விபஸ்ஸனா லோகியலோகுத்தராவ கதி²தா.

5. ச²வாலாதஸுத்தவண்ணனா

95. பஞ்சமே ச²வாலாதந்தி ஸுஸானே அலாதம். மஜ்ஜே² கூ³த²க³தந்தி மஜ்ஜ²ட்டா²னே கூ³த²மக்கி²தம். நேவ கா³மே கட்ட²த்த²ம் ப²ரதீதி கூடகோ³பானஸித²ம்ப⁴ஸோபானாதீ³னம் அத்தா²ய அனுபனேய்யதாய கா³மே ந கட்ட²த்த²ம் ஸாதே⁴தி, கே²த்தகுடிபாத³ம் வா மஞ்சபாத³ம் வா காதும் அனுபனேய்யதாய ந அரஞ்ஞே கட்ட²த்த²ம் ஸாதே⁴தி. த்³வீஸு கோடீஸு க³ய்ஹமானம் ஹத்த²ம் ட³ஹதி, மஜ்ஜே² க³ய்ஹமானம் கூ³தே²ன மக்கே²தி. ததூ²பமந்தி தம்ஸரிக்க²கம். அபி⁴க்கந்ததரோதி ஸுந்த³ரதரோ. பணீததரோதி உத்தமதரோ. க³வா கீ²ரந்தி கா³விதோ கீ²ரம். கீ²ரம்ஹா த³தீ⁴திஆதீ³ஸு பரம் பரம் புரிமதோ புரிமதோ அக்³க³ம், ஸப்பிமண்டோ³ பன தேஸு ஸப்³பே³ஸுபி அக்³க³மேவ. அக்³கோ³திஆதீ³ஸு கு³ணேஹி அக்³கோ³ சேவ ஸேட்டோ² ச பமுகோ² ச உத்தமோ ச பவரோ சாதி வேதி³தப்³போ³. ச²வாலாதூபமாய ந து³ஸ்ஸீலோ புக்³க³லோ கதி²தோ, அப்பஸ்ஸுதோ பன விஸ்ஸட்ட²கம்மந்தோ கோ³ணஸதி³ஸோ புக்³க³லோ கதி²தோதி வேதி³தப்³போ³. ச²ட்டே² ஸப்³ப³ம் உத்தானத்த²மேவ.

7. கி²ப்பனிஸந்திஸுத்தவண்ணனா

97. ஸத்தமே கி²ப்பனிஸந்தீதி கி²ப்பனிஸாமனோ ஸீக⁴ம் ஜானிதும் ஸமத்தோ². ஸுதானஞ்ச த⁴ம்மானந்தி ஸுதப்பகு³ணானம் தந்தித⁴ம்மானம். அத்தூ²பபரிக்கீ²தி அத்த²ம் உபபரிக்க²கோ. அத்த²மஞ்ஞாய த⁴ம்மமஞ்ஞாயாதி அட்ட²கத²ஞ்ச பாளிஞ்ச ஜானித்வா. த⁴ம்மானுத⁴ம்மப்படிபன்னோ ஹோதீதி நவலோகுத்தரத⁴ம்மானம் அனுரூபத⁴ம்மபூ⁴தம் ஸஸீலகம் புப்³ப³பா⁴க³ப்படிபத³ம் படிபன்னோ ஹோதி. நோ ச கல்யாணவாசோதி ந ஸுந்த³ரவசனோ. ந கல்யாணவாக்கரணோதி ந ஸுந்த³ரவசனகோ⁴ஸோ ஹோதி. போரியாதிஆதீ³ஹி ஸத்³தி⁴ம் நோ-காரோ யோஜேதப்³போ³யேவ. கு³ணபரிபுண்ணாய அபலிபு³த்³தா⁴ய அதோ³ஸாய அக³ளிதபத³ப்³யஞ்ஜனாய அத்த²ம் விஞ்ஞாபேதும் ஸமத்தா²ய வாசாய ஸமன்னாக³தோ ந ஹோதீதி அத்தோ². இமினா உபாயேன ஸப்³ப³த்த² அத்தோ² வேதி³தப்³போ³.

8. அத்தஹிதஸுத்தவண்ணனா

98-99. அட்ட²மம் புக்³க³லஜ்ஜா²ஸயவஸேனாபி த³ஸப³லஸ்ஸ தே³ஸனாஞாணவிலாஸேனாபி கதி²தம், நவமம் பஞ்சவேரவஸேன.

10. போதலியஸுத்தவண்ணனா

100. த³ஸமே காலேனாதி யுத்தப்பத்தகாலேன. க²மதீதி ருச்சதி. யதி³த³ம் தத்த² தத்த² காலஞ்ஞுதாதி யா ஏஸா தத்த² தத்த² காலம் ஜானனா. தம் தம் காலம் ஞத்வா ஹி அவண்ணாரஹஸ்ஸ அவண்ணகத²னம் வண்ணாரஹஸ்ஸ ச வண்ணகத²னம் பண்டி³தானம் பகதீதி த³ஸ்ஸேதி.

அஸுரவக்³கோ³ பஞ்சமோ.