(9) 4. மசலவக்³கோ³

1-5. பாணாதிபாதாதி³ஸுத்தபஞ்சகவண்ணனா

81-85. சதுத்த²ஸ்ஸ பட²மாதீ³னி உத்தானத்தா²னேவ. பஞ்சமே ‘‘நீசே குலே பச்சாஜாதோ’’திஆதி³கேன தமேன யுத்தோதி தமோ. காயது³ச்சரிதாதீ³ஹி புன நிரயதமூபக³மனதோ தமபராயணோ. இதி உப⁴யேனபி க²ந்த⁴தமோவ கதி²தோ ஹோதி. ‘‘அட்³டே⁴ குலே பச்சாஜாதோ’’திஆதி³கேன ஜோதினா யுத்ததோ ஜோதி, ஆலோகபூ⁴தோதி வுத்தம் ஹோதி. காயஸுசரிதாதீ³ஹி புன ஸக்³கு³ப்பத்திஜோதிபா⁴வூபக³மனதோ ஜோதிபராயணோ. இமினா நயேன இதரேபி த்³வே வேதி³தப்³பா³.

வேனகுலேதி விலீவகாரகுலே. நேஸாத³குலேதி மிக³லுத்³த³காதீ³னம் குலே. ரத²காரகுலேதி சம்மகாரகுலே. புக்குஸகுலேதி புப்ப²ச²ட்³ட³ககுலே. கஸிரவுத்திகேதி து³க்க²வுத்திகே. து³ப்³ப³ண்ணோதி பம்ஸுபிஸாசகோ விய ஜா²மகா²ணுவண்ணோ. து³த்³த³ஸிகோதி விஜாதமாதுயாபி அமனாபத³ஸ்ஸனோ. ஓகோடிமகோதி லகுண்ட³கோ. காணோதி ஏகச்சி²காணோ வா உப⁴யச்சி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ. பதீ³பேய்யஸ்ஸாதி தேலகபல்லாதி³னோ தீ³பஉபகரணஸ்ஸ. ஏவம் கோ², பி⁴க்க²வேதி ஏத்த² ஏகோ புக்³க³லோ ப³ஹித்³தா⁴ ஆலோகம் அதி³ஸ்வா மாது குச்சி²ம்ஹியேவ காலம் கத்வா அபாயேஸு நிப்³ப³த்தந்தோ ஸகலம்பி கப்பம் ஸம்ஸரதி. ஸோபி தமோதமபராயணோவ. ஸோ பன குஹகபுக்³க³லோ ப⁴வேய்ய. குஹகஸ்ஸ ஹி ஏவரூபா நிப்ப²த்தி ஹோதீதி வுத்தம்.

ஏத்த² ச ‘‘நீசே குலே’’திஆதீ³ஹி ஆக³மனவிபத்தி சேவ பச்சுப்பன்னபச்சயவிபத்தி ச த³ஸ்ஸிதா. ‘‘த³லித்³தே³’’திஆதீ³ஹி பவத்தபச்சயவிபத்தி, ‘‘கஸிரவுத்திகே’’திஆதீ³ஹி ஆஜீவுபாயவிபத்தி, ‘‘து³ப்³ப³ண்ணோ’’திஆதீ³ஹி அத்தபா⁴வவிபத்தி, ‘‘ப³ஹ்வாபா³தோ⁴’’திஆதீ³ஹி து³க்க²காரணஸமாயோகோ³, ‘‘ந லாபீ⁴’’திஆதீ³ஹி ஸுக²காரணவிபத்தி சேவ உபபோ⁴க³விபத்தி ச, ‘‘காயேன து³ச்சரித’’ந்திஆதீ³ஹி தமபராயணபா⁴வஸ்ஸ காரணஸமாயோகோ³, ‘‘காயஸ்ஸ பே⁴தா³’’திஆதீ³ஹி ஸம்பராயிகதமூபக³மோ. ஸுக்கபக்கோ² வுத்தபடிபக்க²னயேன வேதி³தப்³போ³.

6. ஓணதோணதஸுத்தவண்ணனா

86. ச²ட்டே² ஓணதோணதோதி இதா³னி நீசகோ ஆயதிம்பி நீசகோ ப⁴விஸ்ஸதி. ஓணதுண்ணதோதி இதா³னி நீசோ ஆயதிம் உச்சோ ப⁴விஸ்ஸதி. உண்ணதோணதோதி இதா³னி உச்சோ ஆயதிம் நீசோ ப⁴விஸ்ஸதி. உண்ணதுண்ணதோதி இதா³னி உச்சோ ஆயதிம்பி உச்சோ ப⁴விஸ்ஸதி. வித்தா²ரோ பன நேஸம் புரிமஸுத்தனயேனேவ வேதி³தப்³போ³.

7. புத்தஸுத்தவண்ணனா

87. ஸத்தமே ஸமணமசலோதி ஸமணஅசலோ, மகாரோ பத³ஸந்தி⁴கரோ, நிச்சலஸமணோதி அத்தோ². இமினா ஸத்தவித⁴ம்பி ஸேக²ம் த³ஸ்ஸேதி. ஸோ ஹி ஸாஸனே மூலஜாதாய ஸத்³தா⁴ய பதிட்டி²தத்தா அசலோ நாம. ஸமணபுண்ட³ரீகோதி புண்ட³ரீகஸதி³ஸோ ஸமணோ. புண்ட³ரீகம் நாம ஊனஸதபத்தம் ஸரோருஹம். இமினா ஸுக்க²விபஸ்ஸககீ²ணாஸவம் த³ஸ்ஸேதி. ஸோ ஹி ஜா²னாபி⁴ஞ்ஞானம் அபா⁴வேன அபரிபுண்ணகு³ணத்தா ஸமணபுண்ட³ரீகோ நாம ஹோதி. ஸமணபது³மோதி பது³மஸதி³ஸோ ஸமணோ. பது³மம் நாம பரிபுண்ணஸதபத்தம் ஸரோருஹம். இமினா உப⁴தோபா⁴க³விமுத்தம் கீ²ணாஸவம் த³ஸ்ஸேதி. ஸோ ஹி ஜா²னாபி⁴ஞ்ஞானம் பா⁴வேன பரிபுண்ணகு³ணத்தா ஸமணபது³மோ நாம ஹோதி. ஸமணேஸு ஸமணஸுகு²மாலோதி ஸப்³பே³ஸுபி ஏதேஸு ஸமணேஸு ஸுகு²மாலஸமணோ முது³சித்தஸரீரோ காயிகசேதஸிகது³க்க²ரஹிதோ ஏகந்தஸுகீ². ஏதேன அத்தானஞ்சேவ அத்தஸதி³ஸே ச த³ஸ்ஸேதி.

ஏவம் மாதிகம் நிக்கி²பித்வா இதா³னி படிபாடியா விப⁴ஜந்தோ கத²ஞ்ச, பி⁴க்க²வேதிஆதி³மாஹ. தத்த² ஸேகோ²தி ஸத்தவிதோ⁴பி ஸேகோ². பாடிபதோ³தி படிபன்னகோ. அனுத்தரம் யோக³க்கே²மம் பத்த²யமானோ விஹரதீதி அரஹத்தம் பத்த²யந்தோ விஹரதி. முத்³தா⁴வஸித்தஸ்ஸாதி முத்³த⁴னி அவஸித்தஸ்ஸ, கதாபி⁴ஸேகஸ்ஸாதி அத்தோ². ஆபி⁴ஸேகோதி அபி⁴ஸேகம் காதும் யுத்தோ. அனபி⁴ஸித்தோதி ந தாவ அபி⁴ஸித்தோ. மசலப்பத்தோதி ரஞ்ஞோ க²த்தியஸ்ஸ முத்³தா⁴வஸித்தஸ்ஸ புத்தபா⁴வேன சேவ புத்தேஸு ஜேட்ட²கபா⁴வேன ச ந தாவ அபி⁴ஸித்தபா⁴வேன ச அபி⁴ஸேகப்பத்திஅத்தா²ய அசலப்பத்தோ நிச்சலபத்தோ. மகாரோ நிபாதமத்தம். காயேன பு²ஸித்வாதி நாமகாயேன பு²ஸித்வா.

யாசிதோவ ப³ஹுலம் சீவரம் பரிபு⁴ஞ்ஜதீதி ‘‘இத³ம், ப⁴ந்தே, பரிபு⁴ஞ்ஜதா²’’தி ஏவம் தா³யகேஹி யாசமானேஹேவ உபனீதம் சீவரம் ப³ஹும் பரிபு⁴ஞ்ஜதி, கிஞ்சிதே³வ அயாசிதம், பா³குலத்தே²ரோ விய. பிண்ட³பாதம் க²தி³ரவனமக்³கே³ ஸீவலித்தே²ரோ விய. ஸேனாஸனம் அட்ட²கனாக³ரஸுத்தே (ம. நி. 2.17 ஆத³யோ; அ. நி. 11.16 ஆத³யோ) ஆனந்த³த்தே²ரோ விய. கி³லானபச்சயம் பிலிந்த³வச்ச²தே²ரோ விய. த்யஸ்ஸாதி தே அஸ்ஸ. மனாபேனேவாதி மனம் அல்லீயனகேன. ஸமுதா³சரந்தீதி கத்தப்³ப³கிச்சானி கரோந்தி பவத்தந்தி வா. உபஹாரம் உபஹரந்தீதி காயிகசேதஸிகஉபஹாரம் உபஹரந்தி உபனீயந்தி. ஸன்னிபாதிகானீதி திண்ணம்பி ஸன்னிபாதேன நிப்³ப³த்தானி. உதுபரிணாமஜானீதி உதுபரிணாமதோ அதிஸீதஅதிஉண்ஹஉதுதோ ஜாதானி. விஸமபரிஹாரஜானீதி அச்சாஸனஅதிட்டா²னாதி³கா விஸமபரிஹாரதோ ஜாதானி. ஓபக்கமிகானீதி வத⁴ப³ந்த⁴னாதி³உபக்கமேன நிப்³ப³த்தானி. கம்மவிபாகஜானீதி வினாபி இமேஹி காரணேஹி கேவலம் புப்³பே³ கதகம்மவிபாகவஸேனேவ ஜாதானி. சதுன்னம் ஜா²னானந்தி ஏத்த² கீ²ணாஸவானம்பி பு³த்³தா⁴னம்பி கிரியஜ்ஜா²னானேவ அதி⁴ப்பேதானி. ஸேஸம் உத்தானத்த²மேவாதி.

8. ஸம்யோஜனஸுத்தவண்ணனா

88. அட்ட²மே ஸாஸனே லத்³த⁴ப்பதிட்ட²த்தா ஸோதாபன்னோவ ஸமணமசலோதி வுத்தோ, நாதிப³ஹுகு³ணத்தா ந ப³ஹுபத்தம் விய ஸரோருஹம் ஸகதா³கா³மீ ஸமணபுண்ட³ரீகோதி, ததோ ப³ஹுதரகு³ணத்தா ஸதபத்தம் விய ஸரோருஹம் அனாகா³மீ ஸமணபது³மோதி, த²த்³த⁴பா⁴வகரானம் கிலேஸானம் ஸப்³ப³ஸோ ஸமுச்சி²ன்னத்தா முது³பா⁴வப்பத்தோ கீ²ணாஸவோ ஸமணஸுகு²மாலோதி.

9. ஸம்மாதி³ட்டி²ஸுத்தவண்ணனா

89. நவமே ஸம்மாதி³ட்டி²கோதிஆதீ³ஹி அட்ட²ங்கி³கமக்³க³வஸேன பட²மஸுத்தே விய ஸத்த ஸேகா² க³ஹிதா. து³தியவாரே த³ஸங்கி³கமக்³க³வஸேன வா அரஹத்தப²லஞாணஅரஹத்தப²லவிமுத்தீஹி ஸத்³தி⁴ம், அட்ட²ங்கி³கமக்³க³வஸேன வா ஸுக்க²விபஸ்ஸககீ²ணாஸவோ கதி²தோ, ததியவாரே உப⁴தோபா⁴க³விமுத்தோ, சதுத்த²வாரே ததா²க³தோ ச ததா²க³தஸதி³ஸகீ²ணாஸவோ சாதி. இதி இத³ம் ஸுத்தம் பட²மஸுத்தே கதி²தபுக்³க³லானம் வஸேனேவ கதி²தம், தே³ஸனாமத்தமேவ பனேத்த² நானந்தி.

10. க²ந்த⁴ஸுத்தவண்ணனா

90. த³ஸமே பட²மவாரே அரஹத்தத்தா²ய பயோக³ம் அனாரபி⁴த்வா டி²தோ பமாத³விஹாரீ ஸேக²புக்³க³லோ கதி²தோ. து³தியவாரே அனுப்பாதி³தஜ்ஜா²னோ ஆரத்³த⁴விபஸ்ஸகோ அப்பமாத³விஹாரீ ஸேக²புக்³க³லோ கதி²தோ. ததியவாரே ஆரத்³த⁴விபஸ்ஸகோ அப்பமாத³விஹாரீ அட்ட²விமோக்க²லாபீ⁴ ஸேக²புக்³க³லோ கதி²தோ, சதுத்த²வாரே பரமஸுகு²மாலகீ²ணாஸவோதி.

மசலவக்³கோ³ சதுத்தோ².