5. ரோஹிதஸ்ஸஸுத்தவண்ணனா

45. பஞ்சமே யத்தா²தி சக்கவாளலோகஸ்ஸ ஏகோகாஸே பு⁴ம்மம். ந சவதி ந உபபஜ்ஜதீதி இத³ம் அபராபரம் சுதிபடிஸந்தி⁴வஸேன க³ஹிதம். க³மனேனாதி பத³க³மனேன. லோகஸ்ஸ அந்தந்தி ஸத்தா² ஸங்கா²ரலோகஸ்ஸ அந்தம் ஸந்தா⁴ய வத³தி. ஞாதேய்யந்திஆதீ³ஸு ஞாதப்³ப³ம் த³ட்ட²ப்³ப³ம் பத்தப்³ப³ந்தி அத்தோ². இதி தே³வபுத்தேன சக்கவாளலோகஸ்ஸ அந்தோ புச்சி²தோ, ஸத்தா²ரா ஸங்கா²ரலோகஸ்ஸ கதி²தோ. ஸோ பன ‘‘அத்தனோ பஞ்ஹேன ஸத்³தி⁴ம் ஸத்து² ப்³யாகரணம் ஸமேதீ’’தி ஸஞ்ஞாய ஸம்பஹம்ஸந்தோ அச்ச²ரியந்திஆதி³மாஹ.

த³ள்ஹத⁴ம்மாதி த³ள்ஹத⁴னு உத்தமப்பமாணேன த⁴னுனா ஸமன்னாக³தோ. த⁴னுக்³க³ஹோதி த⁴னுஆசரியோ. ஸிக்கி²தோதி த்³வாத³ஸ வஸ்ஸானி த⁴னுஸிப்பம் ஸிக்கி²தோ. கதஹத்தோ²தி உஸப⁴ப்பமாணேபி வாலக்³க³ம் விஜ்ஜி²தும் ஸமத்த²பா⁴வேன கதஹத்தோ². கதூபாஸனோதி கதஸரக்கே²போ த³ஸ்ஸிதஸிப்போ. அஸனேனாதி கண்டே³ன. அதிபாதேய்யாதி அதிக்கமேய்ய. யாவதா ஸோ தாலச்சா²தி³ம் அதிக்கமேய்ய, தாவதா காலேன ஏகம் சக்கவாளம் அதிக்கமாமீதி அத்தனோ ஜவஸம்பத்திம் த³ஸ்ஸேதி.

புரத்தி²மா ஸமுத்³தா³ பச்சி²மோதி யதா² புரத்தி²மா ஸமுத்³தா³ பச்சி²மஸமுத்³தோ³ தூ³ரே, ஏவம் மே தூ³ரே பத³வீதிஹாரோ அஹோஸீதி வத³தி. ஸோ கிர பாசீனசக்கவாளமுக²வட்டியம் டி²தோ பாத³ம் பஸாரேத்வா பச்சி²மசக்கவாளமுக²வட்டிம் அதிக்கமதி, புன து³தியபாத³ம் பஸாரேத்வா பரசக்கவாளமுக²வட்டிம் அதிக்கமதி. இச்சா²க³தந்தி இச்சா² ஏவ. அஞ்ஞத்ரேவாதி நிப்பபஞ்சதம் த³ஸ்ஸேதி. பி⁴க்கா²சாரகாலே கிரேஸ நாக³லதாத³ந்தகட்ட²ம் கா²தி³த்வா அனோதத்தே முக²ம் தோ⁴வித்வா காலே ஸம்பத்தே உத்தரகுரும்ஹி பிண்டா³ய சரித்வா சக்கவாளமுக²வட்டியம் நிஸின்னோ ப⁴த்தகிச்சம் கரோதி, தத்த² முஹுத்தம் விஸ்ஸமித்வா புன ஜவதி. வஸ்ஸஸதாயுகோதி ததா³ தீ³கா⁴யுககாலோ ஹோதி, அயம் பன வஸ்ஸஸதாவஸிட்டே² ஆயும்ஹி க³மனம் ஆரபி⁴. வஸ்ஸஸதஜீவீதி தம் வஸ்ஸஸதம் அனந்தராயேன ஜீவந்தோ. அந்தராயேவ காலங்கதோதி சக்கவாளலோகஸ்ஸ அந்தம் அப்பத்வா அந்தராவ மதோ. ஸோ பன தத்த² காலம் கத்வாபி ஆக³ந்த்வா இமஸ்மிம்யேவ சக்கவாளே நிப்³ப³த்தி.

அப்பத்வாதி ஸங்கா²ரலோகஸ்ஸ அந்தம் அப்பத்வா. து³க்க²ஸ்ஸாதி வட்டது³க்க²ஸ்ஸ. அந்தகிரியந்தி பரியந்தகரணம். களேவரேதி அத்தபா⁴வே. ஸஸஞ்ஞிம்ஹி ஸமனகேதி ஸஸஞ்ஞே ஸசித்தகே. லோகந்தி து³க்க²ஸச்சம். லோகஸமுத³யந்தி ஸமுத³யஸச்சம். லோகனிரோத⁴ந்தி நிரோத⁴ஸச்சம். படிபத³ந்தி மக்³க³ஸச்சம். இதி ‘‘நாஹம், ஆவுஸோ, இமானி சத்தாரி ஸச்சானி திணகட்டா²தீ³ஸு பஞ்ஞபேமி, இமஸ்மிம் பன சதுமஹாபூ⁴திகே காயஸ்மிம்யேவ பஞ்ஞபேமீ’’தி த³ஸ்ஸேதி. ஸமிதாவீதி ஸமிதபாபோ. நாஸீஸதீதி ந பத்தே²தி. ச²ட்ட²ம் உத்தானத்த²மேவாதி.