7. ஸுவிதூ³ரஸுத்தவண்ணனா

47. ஸத்தமே ஸுவிதூ³ரவிதூ³ரானீதி கேனசி பரியாயேன அனாஸன்னானி ஹுத்வா ஸுவிதூ³ரானேவ விதூ³ரானி. நப⁴ஞ்ச, பி⁴க்க²வே, பத²வீ சாதி ஆகாஸஞ்ச மஹாபத²வீ ச. தத்த² கிஞ்சாபி பத²விதோ ஆகாஸம் நாம ந தூ³ரே, த்³வங்கு³லமத்தேபி ஹோதி. அஞ்ஞமஞ்ஞம் அலக்³க³னட்டே²ன பன ‘‘ஸுவிதூ³ரவிதூ³ரே’’தி வுத்தம். வேரோசனோதி ஸூரியோ. ஸதஞ்ச, பி⁴க்க²வே, த⁴ம்மோதி சதுஸதிபட்டா²னாதி³பே⁴தோ³ ஸத்ததிம்ஸபோ³தி⁴பக்கி²யத⁴ம்மோ. அஸதஞ்ச த⁴ம்மோதி த்³வாஸட்டி²தி³ட்டி²க³தபே⁴தோ³ அஸ்ஸத்³த⁴ம்மோ.

பப⁴ங்கரோதி ஆலோககரோ. அப்³யாயிகோ ஹோதீதி அவிக³ச்ச²னஸபா⁴வோ ஹோதி. ஸதம் ஸமாக³மோதி பண்டி³தானம் மித்தஸந்த²வவஸேன ஸமாக³மோ. யாவாபி திட்டே²ய்யாதி யத்தகம் அத்³தா⁴னம் திட்டே²ய்ய. ததே²வ ஹோதீதி தாதி³ஸோவ ஹோதி, பகதிம் ந ஜஹதி. கி²ப்பம் ஹி வேதீதி ஸீக⁴ம் விக³ச்ச²தி.