4. ப³ஹுகாரஸுத்தவண்ணனா

24. சதுத்தே² தயோமே, பி⁴க்க²வே, புக்³க³லாதி தயோ ஆசரியபுக்³க³லா. புக்³க³லஸ்ஸ ப³ஹுகாராதி அந்தேவாஸிகபுக்³க³லஸ்ஸ ப³ஹூபகாரா. பு³த்³த⁴ந்தி ஸப்³ப³ஞ்ஞுபு³த்³த⁴ம். ஸரணம் க³தோ ஹோதீதி அவஸ்ஸயம் க³தோ ஹோதி. த⁴ம்மந்தி ஸதந்திகம் நவலோகுத்தரத⁴ம்மம். ஸங்க⁴ந்தி அட்ட²அரியபுக்³க³லஸமூஹம். இத³ஞ்ச பன ஸரணக³மனம் அக்³க³ஹிதஸரணபுப்³ப³ஸ்ஸ அகதாபி⁴னிவேஸஸ்ஸ வஸேன வுத்தம். இதி இமஸ்மிம் ஸுத்தே ஸரணதா³யகோ ஸோதாபத்திமக்³க³ஸம்பாபகோ அரஹத்தமக்³க³ஸம்பாபகோதி தயோ ஆசரியா ப³ஹுகாராதி ஆக³தா, பப்³ப³ஜ்ஜாதா³யகோ பு³த்³த⁴வசனதா³யகோ கம்மவாசாசரியோ ஸகதா³கா³மிமக்³க³ஸம்பாபகோ அனாகா³மிமக்³க³ஸம்பாபகோதி இமே ஆசரியா ந ஆக³தா, கிம் ஏதே ந ப³ஹுகாராதி? நோ, ந ப³ஹுகாரா. அயம் பன தே³ஸனா து³விதே⁴ன பரிச்சி²ன்னா. தஸ்மா ஸப்³பே³பேதே ப³ஹுகாரா. தேஸு ஸரணக³மனஸ்மிம்யேவ அகதாபி⁴னிவேஸோ வட்டதி, சதுபாரிஸுத்³தி⁴ஸீலகஸிணபரிகம்மவிபஸ்ஸனாஞாணானி பன பட²மமக்³க³ஸன்னிஸ்ஸிதானி ஹோந்தி, உபரி த்³வே மக்³கா³ ச ப²லானி ச அரஹத்தமக்³க³ஸன்னிஸ்ஸிதானீதி வேதி³தப்³பா³னி.

இமினா புக்³க³லேனாதி இமினா அந்தேவாஸிகபுக்³க³லேன. ந ஸுப்பதிகாரம் வதா³மீதி பதிகாரம் காதும் ந ஸுகரந்தி வதா³மி. அபி⁴வாத³னாதீ³ஸு அனேகஸதவாரம் அனேகஸஹஸ்ஸவாரம்பி ஹி பஞ்சபதிட்டி²தேன நிபதித்வா வந்த³ந்தோ ஆஸனா வுட்டா²ய பச்சுக்³க³ச்ச²ந்தோ தி³ட்ட²தி³ட்ட²க்க²ணே அஞ்ஜலிம் பக்³க³ண்ஹந்தோ அனுச்ச²விகம் ஸாமீசிகம்மம் கரோந்தோ தி³வஸே தி³வஸே சீவரஸதம் சீவரஸஹஸ்ஸம் பிண்ட³பாதஸதம் பிண்ட³பாதஸஹஸ்ஸம் த³த³மானோ சக்கவாளபரியந்தேன ஸப்³ப³ரதனமயம் ஆவாஸம் கரோந்தோ ஸப்பினவனீதாதி³னானப்பகாரம் பே⁴ஸஜ்ஜம் அனுப்பத³ஜ்ஜமானோ நேவ ஸக்கோதி ஆசரியேன கதஸ்ஸ பதிகாரம் நாம காதுந்தி ஏவமத்தோ² வேதி³தப்³போ³.