5. வஜிரூபமஸுத்தவண்ணனா

25. பஞ்சமே அருகூபமசித்தோதி புராணவணஸதி³ஸசித்தோ. விஜ்ஜூபமசித்தோதி இத்தரகாலோபா⁴ஸனேன விஜ்ஜுஸதி³ஸசித்தோ. வஜிரூபமசித்தோதி கிலேஸானம் மூலகா⁴தகரணஸமத்த²தாய வஜிரேன ஸதி³ஸசித்தோ. அபி⁴ஸஜ்ஜதீதி லக்³க³தி. குப்பதீதி கோபவஸேன குப்பதி. ப்³யாபஜ்ஜதீதி பகதிபா⁴வம் பஜஹதி, பூதிகோ ஹோதி. பதித்தீ²யதீதி தி²னபா⁴வம் த²த்³த⁴பா⁴வம் ஆபஜ்ஜதி. கோபந்தி து³ப்³ப³லகோத⁴ம். தோ³ஸந்தி து³ஸ்ஸனவஸேன ததோ ப³லவதரம். அப்பச்சயந்தி அதுட்டா²காரம் தோ³மனஸ்ஸம். து³ட்டா²ருகோதி புராணவணோ. கட்டே²னாதி த³ண்ட³ககோடியா. கட²லேனாதி கபாலேன. ஆஸவம் தே³தீதி அபராபரம் ஸவதி. புராணவணோ ஹி அத்தனோ த⁴ம்மதாயேவ புப்³ப³ம் லோஹிதம் யூஸந்தி இமானி தீணி ஸவதி, க⁴ட்டிதோ பன தானி அதி⁴கதரம் ஸவதி.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – து³ட்டா²ருகோ விய ஹி கோத⁴னபுக்³க³லோ, தஸ்ஸ அத்தனோ த⁴ம்மதாய ஸவனம் விய கோத⁴னஸ்ஸபி அத்தனோ த⁴ம்மதாய உத்³து⁴மாதஸ்ஸ விய சண்டி³கதஸ்ஸ சரணம், கட்டே²ன வா கட²லாய வா க⁴ட்டனம் விய அப்பமத்தம் வசனம், பி⁴ய்யோஸோமத்தாய ஸவனம் விய ‘‘மாதி³ஸம் நாம ஏஸ ஏவம் வத³தீ’’தி பி⁴ய்யோஸோமத்தாய உத்³து⁴மாயனபா⁴வோ த³ட்ட²ப்³போ³.

ரத்தந்த⁴காரதிமிஸாயந்தி ரத்திம் சக்கு²விஞ்ஞாணுப்பத்தினிவாரணேன அந்த⁴பா⁴வகரணே ப³ஹலதமே. விஜ்ஜந்தரிகாயாதி விஜ்ஜுப்பத்திக்க²ணே. இதா⁴பி இத³ம் ஓபம்மஸம்ஸந்த³னம் – சக்கு²மா புரிஸோ விய ஹி யோகா³வசரோ த³ட்ட²ப்³போ³, அந்த⁴காரம் விய ஸோதாபத்திமக்³க³வஜ்ஜா² கிலேஸா, விஜ்ஜுஸஞ்சரணம் விய ஸோதாபத்திமக்³க³ஞாணஸ்ஸ உப்பத்திகாலோ, விஜ்ஜந்தரிகாய சக்கு²மதோ புரிஸஸ்ஸ ஸமந்தா ரூபத³ஸ்ஸனம் விய ஸோதாபத்திமக்³க³க்க²ணே நிப்³பா³னத³ஸ்ஸனம், புன அந்த⁴காராவத்த²ரணம் விய ஸகதா³கா³மிமக்³க³வஜ்ஜா² கிலேஸா, புன விஜ்ஜுஸஞ்சரணம் விய ஸகதா³கா³மிமக்³க³ஞாணஸ்ஸ உப்பாதோ³, விஜ்ஜந்தரிகாய சக்கு²மதோ புரிஸஸ்ஸ ஸமந்தா ரூபத³ஸ்ஸனம் விய ஸகதா³கா³மிமக்³க³க்க²ணே நிப்³பா³னத³ஸ்ஸனம், புன அந்த⁴காராவத்த²ரணம் விய அனாகா³மிமக்³க³வஜ்ஜா² கிலேஸா, புன விஜ்ஜுஸஞ்சரணம் விய அனாகா³மிமக்³க³ஞாணஸ்ஸ உப்பாதோ³, விஜ்ஜந்தரிகாய சக்கு²மதோ புரிஸஸ்ஸ ஸமந்தா ரூபத³ஸ்ஸனம் விய அனாகா³மிமக்³க³க்க²ணே நிப்³பா³னத³ஸ்ஸனம் வேதி³தப்³ப³ம்.

வஜிரூபமசித்ததாயபி இத³ம் ஓபம்மஸம்ஸந்த³னம் – வஜிரம் விய ஹி அரஹத்தமக்³க³ஞாணம் த³ட்ட²ப்³ப³ம், மணிக³ண்டி²பாஸாணக³ண்டி² விய அரஹத்தமக்³க³வஜ்ஜா² கிலேஸா, வஜிரஸ்ஸ மணிக³ண்டி²ம்பி வா பாஸாணக³ண்டி²ம்பி வா வினிவிஜ்ஜி²த்வா அக³மனபா⁴வஸ்ஸ நத்தி²தா விய அரஹத்தமக்³க³ஞாணேன அச்சே²ஜ்ஜானம் கிலேஸானம் நத்தி²பா⁴வோ, வஜிரேன நிப்³பி³த்³த⁴வேத⁴ஸ்ஸ புன அபதிபூரணம் விய அரஹத்தமக்³கே³ன சி²ன்னானம் கிலேஸானம் புன அனுப்பாதோ³ த³ட்ட²ப்³போ³தி.