3. புக்³க³லவக்³கோ³

1. ஸமித்³த⁴ஸுத்தவண்ணனா

21. ததியஸ்ஸ பட²மே ஜா²னப²ஸ்ஸம் பட²மம் பு²ஸதி, பச்சா² நிரோத⁴ம் நிப்³பா³னம் ஸச்சி²கரோதீதி காயஸக்கி². தி³ட்ட²ந்தம் பத்தோதி தி³ட்டி²ப்பத்தோ. ஸத்³த³ஹந்தோ விமுத்தோதி ஸத்³தா⁴விமுத்தோ. க²மதீதி ருச்சதி. அபி⁴க்கந்ததரோதி அதிஸுந்த³ரதரோ. பணீததரோதி அதிபணீததரோ. ஸத்³தி⁴ந்த்³ரியம் அதி⁴மத்தம் ஹோதீதி ஸமித்³த⁴த்தே²ரஸ்ஸ கிர அரஹத்தமக்³க³க்க²ணே ஸத்³தி⁴ந்த்³ரியம் து⁴ரம் அஹோஸி, ஸேஸானி சத்தாரி ஸஹஜாதிந்த்³ரியானி தஸ்ஸேவ பரிவாரானி அஹேஸும். இதி தே²ரோ அத்தனா படிவித்³த⁴மக்³க³ம் கதே²ந்தோ ஏவமாஹ. மஹாகோட்டி²கத்தே²ரஸ்ஸ பன அரஹத்தமக்³க³க்க²ணே ஸமாதி⁴ந்த்³ரியம் து⁴ரம் அஹோஸி, ஸேஸானி சத்தாரி இந்த்³ரியானி தஸ்ஸேவ பரிவாரானி அஹேஸும். தஸ்மா ஸோபி ஸமாதி⁴ந்த்³ரியம் அதி⁴மத்தந்தி கதே²ந்தோ அத்தனா படிவித்³த⁴மக்³க³மேவ கதே²ஸி. ஸாரிபுத்தத்தே²ரஸ்ஸ பன அரஹத்தமக்³க³க்க²ணே பஞ்ஞிந்த்³ரியம் து⁴ரம் அஹோஸி. ஸேஸானி சத்தாரி இந்த்³ரியானி தஸ்ஸேவ பரிவாரானி அஹேஸும். தஸ்மா ஸோபி பஞ்ஞிந்த்³ரியம் அதி⁴மத்தந்தி கதே²ந்தோ அத்தனா படிவித்³த⁴மக்³க³மேவ கதே²ஸி.

ந க்²வேத்தா²தி ந கோ² ஏத்த². ஏகம்ஸேன ப்³யாகாதுந்தி ஏகந்தேன ப்³யாகரிதும். அரஹத்தாய படிபன்னோதி அரஹத்தமக்³க³ஸமங்கி³ம் த³ஸ்ஸேதி. ஏவமேதஸ்மிம் ஸுத்தே தீஹிபி தே²ரேஹி அத்தனா படிவித்³த⁴மக்³கோ³வ கதி²தோ, ஸம்மாஸம்பு³த்³தோ⁴ பன பு⁴ம்மந்தரேனேவ கதே²ஸி.

2. கி³லானஸுத்தவண்ணனா

22. து³தியே ஸப்பாயானீதி ஹிதானி வுத்³தி⁴கரானி. பதிரூபந்தி அனுச்ச²விகம். நேவ வுட்டா²தி தம்ஹா ஆபா³தா⁴தி இமினா அதேகிச்சே²ன வாதாபமாராதி³னா ரோகே³ன ஸமன்னாக³தோ நிட்டா²பத்தகி³லானோ கதி²தோ. வுட்டா²தி தம்ஹா ஆபா³தா⁴தி இமினா கி²பிதககச்சு²திணபுப்ப²கஜராதி³பே⁴தோ³ அப்பமத்தஆபா³தோ⁴ கதி²தோ. லப⁴ந்தோ ஸப்பாயானி போ⁴ஜனானி நோ அலப⁴ந்தோதி இமினா பன யேஸம் படிஜக்³க³னேன பா²ஸுகம் ஹோதி, ஸப்³பே³பி தே ஆபா³தா⁴ கதி²தா. ஏத்த² ச பதிரூபோ உபட்டா²கோ நாம கி³லானுபட்டா²கஅங்கே³ஹி ஸமன்னாக³தோ பண்டி³தோ த³க்கோ² அனலஸோ வேதி³தப்³போ³. கி³லானுபட்டா²கோ அனுஞ்ஞாதோதி பி⁴க்கு²ஸங்கே⁴ன தா³தப்³போ³தி அனுஞ்ஞாதோ. தஸ்மிஞ்ஹி கி³லானே அத்தனோ த⁴ம்மதாய யாபேதும் அஸக்கோந்தே பி⁴க்கு²ஸங்கே⁴ன தஸ்ஸ பி⁴க்கு²னோ ஏகோ பி⁴க்கு² ச ஸாமணேரோ ச ‘‘இமம் படிஜக்³க³தா²’’தி அபலோகேத்வா தா³தப்³பா³. யாவ பன தே தம் படிஜக்³க³ந்தி, தாவ கி³லானஸ்ஸ ச தேஸஞ்ச த்³வின்னம் யேனத்தோ², ஸப்³ப³ம் பி⁴க்கு²ஸங்க⁴ஸ்ஸேவ பா⁴ரோ.

அஞ்ஞேபி கி³லானா உபட்டா²தப்³பா³தி இதரேபி த்³வே கி³லானா உபட்டா²பேதப்³பா³. கிம் காரணா? யோபி ஹி நிட்ட²பத்தகி³லானோ, ஸோ அனுபட்டி²யமானோ ‘‘ஸசே மம் படிஜக்³கே³ய்யும், பா²ஸுகம் மே ப⁴வேய்ய. ந கோ² பன மம் படிஜக்³க³ந்தீ’’தி மனோபதோ³ஸம் கத்வா அபாயே நிப்³ப³த்தேய்ய. படிஜக்³கி³யமானஸ்ஸ பனஸ்ஸ ஏவம் ஹோதி ‘‘பி⁴க்கு²ஸங்கே⁴ன யம் காதப்³ப³ம், தம் கதம். மய்ஹம் பன கம்மவிபாகோ ஈதி³ஸோ’’தி. ஸோ பி⁴க்கு²ஸங்கே⁴ மேத்தம் பச்சுபட்டா²பேத்வா ஸக்³கே³ நிப்³ப³த்திஸ்ஸதி. யோ பன அப்பமத்தகேன ப்³யாதி⁴னா ஸமன்னாக³தோ லப⁴ந்தோபி அலப⁴ந்தோபி வுட்டா²தியேவ, தஸ்ஸ வினாபி பே⁴ஸஜ்ஜேன வூபஸமனப்³யாதி⁴ பே⁴ஸஜ்ஜே கதே கி²ப்பதரம் வூபஸம்மதி. ஸோ ததோ பு³த்³த⁴வசனம் வா உக்³க³ண்ஹிதும் ஸக்கி²ஸ்ஸதி, ஸமணத⁴ம்மம் வா காதும் ஸக்கி²ஸ்ஸதி. இமினா காரணேன ‘‘அஞ்ஞேபி கி³லானா உபட்டா²தப்³பா³’’தி வுத்தம்.

நேவ ஓக்கமதீதி நேவ பவிஸதி. நியாமம் குஸலேஸு த⁴ம்மேஸு ஸம்மத்தந்தி குஸலேஸு த⁴ம்மேஸு மக்³க³னியாமஸங்கா²தம் ஸம்மத்தம். இமினா பத³பரமோ புக்³க³லோ கதி²தோ. து³தியவாரேன உக்³க⁴டிதஞ்ஞூ க³ஹிதோ ஸாஸனே நாலகத்தே²ரஸதி³ஸோ பு³த்³த⁴ந்தரே ஏகவாரம் பச்சேகபு³த்³தா⁴னம் ஸந்திகே ஓவாத³ம் லபி⁴த்வா படிவித்³த⁴பச்சேகபோ³தி⁴ஞாணோ ச. ததியவாரேன விபஞ்சிதஞ்ஞூ புக்³க³லோ கதி²தோ, நேய்யோ பன தன்னிஸ்ஸிதோவ ஹோதி.

த⁴ம்மதே³ஸனா அனுஞ்ஞாதாதி மாஸஸ்ஸ அட்ட² வாரே த⁴ம்மகதா² அனுஞ்ஞாதா. அஞ்ஞேஸம்பி த⁴ம்மோ தே³ஸேதப்³போ³தி இதரேஸம்பி த⁴ம்மோ கதே²தப்³போ³. கிம் காரணா? பத³பரமஸ்ஸ ஹி இமஸ்மிம் அத்தபா⁴வே த⁴ம்மம் படிவிஜ்ஜி²தும் அஸக்கோந்தஸ்ஸாபி அனாக³தே பச்சயோ ப⁴விஸ்ஸதி. யோ பன ததா²க³தஸ்ஸ ரூபத³ஸ்ஸனம் லப⁴ந்தோபி அலப⁴ந்தோபி த⁴ம்மவினயஞ்ச ஸவனாய லப⁴ந்தோபி அலப⁴ந்தோபி த⁴ம்மம் அபி⁴ஸமேதி, ஸோ அலப⁴ந்தோ தாவ அபி⁴ஸமேதி. லப⁴ந்தோ பன கி²ப்பமேவ அபி⁴ஸமேஸ்ஸதீதி இமினா காரணேன தேஸம் த⁴ம்மோ தே³ஸேதப்³போ³. ததியஸ்ஸ பன புனப்புனம் தே³ஸேதப்³போ³வ.

3. ஸங்கா²ரஸுத்தவண்ணனா

23. ததியே ஸப்³யாப³ஜ்ஜ²ந்தி ஸது³க்க²ம். காயஸங்கா²ரந்தி காயத்³வாரே சேதனாராஸிம். அபி⁴ஸங்க²ரோதீதி ஆயூஹதி ராஸிம் கரோதி பிண்ட³ம் கரோதி. வசீமனோத்³வாரேஸுபி ஏஸேவ நயோ. ஸப்³யாப³ஜ்ஜ²ம் லோகந்தி ஸது³க்க²ம் லோகம். ஸப்³யாப³ஜ்ஜா² ப²ஸ்ஸா பு²ஸந்தீதி ஸது³க்கா² விபாகப²ஸ்ஸா பு²ஸந்தி. ஸப்³யாப³ஜ்ஜ²ம் வேத³னம் வேதி³யதீதி ஸது³க்க²ம் விபாகவேத³னம் வேதி³யதி, ஸாபா³த⁴ம் நிரஸ்ஸாத³ந்தி அத்தோ². ஸேய்யதா²பி ஸத்தா நேரயிகாதி யதா² நிரயே நிப்³ப³த்தஸத்தா ஏகந்தது³க்க²ம் வேத³னம் வேதி³யந்தி, ஏவம் வேதி³யதீதி அத்தோ². கிம் பன தத்த² உபேக்கா²வேத³னா நத்தீ²தி? அத்தி², து³க்க²வேத³னாய பன ப³லவபா⁴வேன ஸா அப்³போ³ஹாரிகட்டா²னே டி²தா. இதி நிரயோவ நிரயஸ்ஸ உபமம் கத்வா ஆஹடோ. தத்ர படிபா⁴க³உபமா நாம கிர ஏஸா.

ஸேய்யதா²பி தே³வா ஸுப⁴கிண்ஹாதி இதா⁴பி தே³வலோகோவ தே³வலோகஸ்ஸ உபமம் கத்வா ஆஹடோ. யஸ்மா பன ஹேட்டி²மேஸு ப்³ரஹ்மலோகேஸு ஸப்பீதிகஜ்ஜா²னவிபாகோ வத்ததி, ஸுப⁴கிண்ஹேஸு நிப்பீதிகோ ஏகந்தஸுகோ²வ, தஸ்மா தே அக்³க³ஹேத்வா ஸுப⁴கிண்ஹாவ கதி²தா. இதி அயம்பி தத்ர படிபா⁴க³உபமா நாமாதி வேதி³தப்³பா³.

வோகிண்ணஸுக²து³க்க²ந்தி வோமிஸ்ஸகஸுக²து³க்க²ம். ஸேய்யதா²பி மனுஸ்ஸாதி மனுஸ்ஸானம் ஹி காலேன ஸுக²ம் ஹோதி, காலேன து³க்க²ம். ஏகச்சே ச தே³வாதி காமாவசரதே³வா. தேஸம்பி காலேன ஸுக²ம் ஹோதி, காலேன து³க்க²ம். தேஸம் ஹி ஹீனதரானம் மஹேஸக்க²தரா தே³வதா தி³ஸ்வா ஆஸனா வுட்டா²தப்³ப³ம் ஹோதி, மக்³கா³ உக்கமிதப்³ப³ம், பாருதவத்த²ம் அபனேதப்³ப³ம், அஞ்ஜலிகம்மம் காதப்³ப³ந்தி தம் ஸப்³ப³ம்பி து³க்க²ம் நாம ஹோதி. ஏகச்சே ச வினிபாதிகாதி வேமானிகபேதா. தே ஹி காலேன ஸம்பத்திம் அனுப⁴வந்தி காலேன கம்மந்தி வோகிண்ணஸுக²து³க்கா²வ ஹோந்தி. இதி இமஸ்மிம் ஸுத்தே தீணி ஸுசரிதானி லோகியலோகுத்தரமிஸ்ஸகானி கதி²தானீதி வேதி³தப்³பா³னி.

4. ப³ஹுகாரஸுத்தவண்ணனா

24. சதுத்தே² தயோமே, பி⁴க்க²வே, புக்³க³லாதி தயோ ஆசரியபுக்³க³லா. புக்³க³லஸ்ஸ ப³ஹுகாராதி அந்தேவாஸிகபுக்³க³லஸ்ஸ ப³ஹூபகாரா. பு³த்³த⁴ந்தி ஸப்³ப³ஞ்ஞுபு³த்³த⁴ம். ஸரணம் க³தோ ஹோதீதி அவஸ்ஸயம் க³தோ ஹோதி. த⁴ம்மந்தி ஸதந்திகம் நவலோகுத்தரத⁴ம்மம். ஸங்க⁴ந்தி அட்ட²அரியபுக்³க³லஸமூஹம். இத³ஞ்ச பன ஸரணக³மனம் அக்³க³ஹிதஸரணபுப்³ப³ஸ்ஸ அகதாபி⁴னிவேஸஸ்ஸ வஸேன வுத்தம். இதி இமஸ்மிம் ஸுத்தே ஸரணதா³யகோ ஸோதாபத்திமக்³க³ஸம்பாபகோ அரஹத்தமக்³க³ஸம்பாபகோதி தயோ ஆசரியா ப³ஹுகாராதி ஆக³தா, பப்³ப³ஜ்ஜாதா³யகோ பு³த்³த⁴வசனதா³யகோ கம்மவாசாசரியோ ஸகதா³கா³மிமக்³க³ஸம்பாபகோ அனாகா³மிமக்³க³ஸம்பாபகோதி இமே ஆசரியா ந ஆக³தா, கிம் ஏதே ந ப³ஹுகாராதி? நோ, ந ப³ஹுகாரா. அயம் பன தே³ஸனா து³விதே⁴ன பரிச்சி²ன்னா. தஸ்மா ஸப்³பே³பேதே ப³ஹுகாரா. தேஸு ஸரணக³மனஸ்மிம்யேவ அகதாபி⁴னிவேஸோ வட்டதி, சதுபாரிஸுத்³தி⁴ஸீலகஸிணபரிகம்மவிபஸ்ஸனாஞாணானி பன பட²மமக்³க³ஸன்னிஸ்ஸிதானி ஹோந்தி, உபரி த்³வே மக்³கா³ ச ப²லானி ச அரஹத்தமக்³க³ஸன்னிஸ்ஸிதானீதி வேதி³தப்³பா³னி.

இமினா புக்³க³லேனாதி இமினா அந்தேவாஸிகபுக்³க³லேன. ந ஸுப்பதிகாரம் வதா³மீதி பதிகாரம் காதும் ந ஸுகரந்தி வதா³மி. அபி⁴வாத³னாதீ³ஸு அனேகஸதவாரம் அனேகஸஹஸ்ஸவாரம்பி ஹி பஞ்சபதிட்டி²தேன நிபதித்வா வந்த³ந்தோ ஆஸனா வுட்டா²ய பச்சுக்³க³ச்ச²ந்தோ தி³ட்ட²தி³ட்ட²க்க²ணே அஞ்ஜலிம் பக்³க³ண்ஹந்தோ அனுச்ச²விகம் ஸாமீசிகம்மம் கரோந்தோ தி³வஸே தி³வஸே சீவரஸதம் சீவரஸஹஸ்ஸம் பிண்ட³பாதஸதம் பிண்ட³பாதஸஹஸ்ஸம் த³த³மானோ சக்கவாளபரியந்தேன ஸப்³ப³ரதனமயம் ஆவாஸம் கரோந்தோ ஸப்பினவனீதாதி³னானப்பகாரம் பே⁴ஸஜ்ஜம் அனுப்பத³ஜ்ஜமானோ நேவ ஸக்கோதி ஆசரியேன கதஸ்ஸ பதிகாரம் நாம காதுந்தி ஏவமத்தோ² வேதி³தப்³போ³.

5. வஜிரூபமஸுத்தவண்ணனா

25. பஞ்சமே அருகூபமசித்தோதி புராணவணஸதி³ஸசித்தோ. விஜ்ஜூபமசித்தோதி இத்தரகாலோபா⁴ஸனேன விஜ்ஜுஸதி³ஸசித்தோ. வஜிரூபமசித்தோதி கிலேஸானம் மூலகா⁴தகரணஸமத்த²தாய வஜிரேன ஸதி³ஸசித்தோ. அபி⁴ஸஜ்ஜதீதி லக்³க³தி. குப்பதீதி கோபவஸேன குப்பதி. ப்³யாபஜ்ஜதீதி பகதிபா⁴வம் பஜஹதி, பூதிகோ ஹோதி. பதித்தீ²யதீதி தி²னபா⁴வம் த²த்³த⁴பா⁴வம் ஆபஜ்ஜதி. கோபந்தி து³ப்³ப³லகோத⁴ம். தோ³ஸந்தி து³ஸ்ஸனவஸேன ததோ ப³லவதரம். அப்பச்சயந்தி அதுட்டா²காரம் தோ³மனஸ்ஸம். து³ட்டா²ருகோதி புராணவணோ. கட்டே²னாதி த³ண்ட³ககோடியா. கட²லேனாதி கபாலேன. ஆஸவம் தே³தீதி அபராபரம் ஸவதி. புராணவணோ ஹி அத்தனோ த⁴ம்மதாயேவ புப்³ப³ம் லோஹிதம் யூஸந்தி இமானி தீணி ஸவதி, க⁴ட்டிதோ பன தானி அதி⁴கதரம் ஸவதி.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – து³ட்டா²ருகோ விய ஹி கோத⁴னபுக்³க³லோ, தஸ்ஸ அத்தனோ த⁴ம்மதாய ஸவனம் விய கோத⁴னஸ்ஸபி அத்தனோ த⁴ம்மதாய உத்³து⁴மாதஸ்ஸ விய சண்டி³கதஸ்ஸ சரணம், கட்டே²ன வா கட²லாய வா க⁴ட்டனம் விய அப்பமத்தம் வசனம், பி⁴ய்யோஸோமத்தாய ஸவனம் விய ‘‘மாதி³ஸம் நாம ஏஸ ஏவம் வத³தீ’’தி பி⁴ய்யோஸோமத்தாய உத்³து⁴மாயனபா⁴வோ த³ட்ட²ப்³போ³.

ரத்தந்த⁴காரதிமிஸாயந்தி ரத்திம் சக்கு²விஞ்ஞாணுப்பத்தினிவாரணேன அந்த⁴பா⁴வகரணே ப³ஹலதமே. விஜ்ஜந்தரிகாயாதி விஜ்ஜுப்பத்திக்க²ணே. இதா⁴பி இத³ம் ஓபம்மஸம்ஸந்த³னம் – சக்கு²மா புரிஸோ விய ஹி யோகா³வசரோ த³ட்ட²ப்³போ³, அந்த⁴காரம் விய ஸோதாபத்திமக்³க³வஜ்ஜா² கிலேஸா, விஜ்ஜுஸஞ்சரணம் விய ஸோதாபத்திமக்³க³ஞாணஸ்ஸ உப்பத்திகாலோ, விஜ்ஜந்தரிகாய சக்கு²மதோ புரிஸஸ்ஸ ஸமந்தா ரூபத³ஸ்ஸனம் விய ஸோதாபத்திமக்³க³க்க²ணே நிப்³பா³னத³ஸ்ஸனம், புன அந்த⁴காராவத்த²ரணம் விய ஸகதா³கா³மிமக்³க³வஜ்ஜா² கிலேஸா, புன விஜ்ஜுஸஞ்சரணம் விய ஸகதா³கா³மிமக்³க³ஞாணஸ்ஸ உப்பாதோ³, விஜ்ஜந்தரிகாய சக்கு²மதோ புரிஸஸ்ஸ ஸமந்தா ரூபத³ஸ்ஸனம் விய ஸகதா³கா³மிமக்³க³க்க²ணே நிப்³பா³னத³ஸ்ஸனம், புன அந்த⁴காராவத்த²ரணம் விய அனாகா³மிமக்³க³வஜ்ஜா² கிலேஸா, புன விஜ்ஜுஸஞ்சரணம் விய அனாகா³மிமக்³க³ஞாணஸ்ஸ உப்பாதோ³, விஜ்ஜந்தரிகாய சக்கு²மதோ புரிஸஸ்ஸ ஸமந்தா ரூபத³ஸ்ஸனம் விய அனாகா³மிமக்³க³க்க²ணே நிப்³பா³னத³ஸ்ஸனம் வேதி³தப்³ப³ம்.

வஜிரூபமசித்ததாயபி இத³ம் ஓபம்மஸம்ஸந்த³னம் – வஜிரம் விய ஹி அரஹத்தமக்³க³ஞாணம் த³ட்ட²ப்³ப³ம், மணிக³ண்டி²பாஸாணக³ண்டி² விய அரஹத்தமக்³க³வஜ்ஜா² கிலேஸா, வஜிரஸ்ஸ மணிக³ண்டி²ம்பி வா பாஸாணக³ண்டி²ம்பி வா வினிவிஜ்ஜி²த்வா அக³மனபா⁴வஸ்ஸ நத்தி²தா விய அரஹத்தமக்³க³ஞாணேன அச்சே²ஜ்ஜானம் கிலேஸானம் நத்தி²பா⁴வோ, வஜிரேன நிப்³பி³த்³த⁴வேத⁴ஸ்ஸ புன அபதிபூரணம் விய அரஹத்தமக்³கே³ன சி²ன்னானம் கிலேஸானம் புன அனுப்பாதோ³ த³ட்ட²ப்³போ³தி.

6. ஸேவிதப்³ப³ஸுத்தவண்ணனா

26. ச²ட்டே² ஸேவிதப்³போ³தி உபஸங்கமிதப்³போ³. ப⁴ஜிதப்³போ³தி அல்லீயிதப்³போ³. பயிருபாஸிதப்³போ³தி ஸந்திகே நிஸீத³னவஸேன புனப்புனம் உபாஸிதப்³போ³. ஸக்கத்வா க³ரும் கத்வாதி ஸக்காரஞ்சேவ க³ருகாரஞ்ச கத்வா. ஹீனோ ஹோதி ஸீலேனாதிஆதீ³ஸு உபாதா³யுபாதா³ய ஹீனதா வேதி³தப்³பா³. தத்த² யோ ஹி பஞ்ச ஸீலானி ரக்க²தி, ஸோ த³ஸ ஸீலானி ரக்க²ந்தேன ந ஸேவிதப்³போ³. யோ த³ஸ ஸீலானி ரக்க²தி, ஸோ சதுபாரிஸுத்³தி⁴ஸீலம் ரக்க²ந்தேன ந ஸேவிதப்³போ³. அஞ்ஞத்ர அனுத்³த³யா அஞ்ஞத்ர அனுகம்பாதி ட²பேத்வா அனுத்³த³யஞ்ச அனுகம்பஞ்ச. அத்தனோ அத்தா²யேவ ஹி ஏவரூபோ புக்³க³லோ ந ஸேவிதப்³போ³, அனுத்³த³யானுகம்பாவஸேன பன தம் உபஸங்கமிதும் வட்டதி.

ஸீலஸாமஞ்ஞக³தானம் ஸதந்தி ஸீலேன ஸமானபா⁴வம் க³தானம் ஸந்தானம். ஸீலகதா² ச நோ ப⁴விஸ்ஸதீதி ஏவம் ஸமானஸீலானம் அம்ஹாகம் ஸீலமேவ ஆரப்³ப⁴ கதா² ப⁴விஸ்ஸதி. ஸா ச நோ பவத்தினீ ப⁴விஸ்ஸதீதி ஸா ச அம்ஹாகம் கதா² தி³வஸம்பி கதே²ந்தானம் பவத்திஸ்ஸதி ந படிஹஞ்ஞிஸ்ஸதி. ஸா ச நோ பா²ஸு ப⁴விஸ்ஸதீதி ஸா ச தி³வஸம்பி பவத்தமானா ஸீலகதா² அம்ஹாகம் பா²ஸுவிஹாரோ ஸுக²விஹாரோ ப⁴விஸ்ஸதி. ஸமாதி⁴பஞ்ஞாகதா²ஸுபி ஏஸேவ நயோ.

ஸீலக்க²ந்த⁴ந்தி ஸீலராஸிம். தத்த² தத்த² பஞ்ஞாய அனுக்³க³ஹேஸ்ஸாமீதி ஏத்த² ஸீலஸ்ஸ அஸப்பாயே அனுபகாரத⁴ம்மே வஜ்ஜேத்வா ஸப்பாயே உபகாரத⁴ம்மே ஸேவந்தோ தஸ்மிம் தஸ்மிம் டா²னே ஸீலக்க²ந்த⁴ம் பஞ்ஞாய அனுக்³க³ண்ஹாதி நாம. ஸமாதி⁴பஞ்ஞாக்க²ந்தே⁴ஸுபி ஏஸேவ நயோ. நிஹீயதீதி அத்தனோ ஹீனதரம் புக்³க³லம் ஸேவந்தோ கா²ரபரிஸ்ஸாவனே ஆஸித்தஉத³கம் விய ஸததம் ஸமிதம் ஹாயதி பரிஹாயதி. துல்யஸேவீதி அத்தனா ஸமானஸேவீ. ஸேட்ட²முபனமந்தி ஸேட்ட²ம் புக்³க³லம் ஓணமந்தோ. உதே³தி கி²ப்பந்தி கி²ப்பமேவ வட்³ட⁴தி. தஸ்மா அத்தனோ உத்தரிம் ப⁴ஜேதா²தி யஸ்மா ஸேட்ட²ம் புக்³க³லம் உபனமந்தோ உதே³தி கி²ப்பம், தஸ்மா அத்தனோ உத்தரிதரம் விஸிட்ட²தரம் ப⁴ஜேத².

7. ஜிகு³ச்சி²தப்³ப³ஸுத்தவண்ணனா

27. ஸத்தமே ஜிகு³ச்சி²தப்³போ³தி கூ³த²ம் விய ஜிகு³ச்சி²தப்³போ³. அத² கோ² நந்தி அத² கோ² அஸ்ஸ. கித்திஸத்³தோ³தி கதா²ஸத்³தோ³. ஏவமேவ கோ²தி ஏத்த² கூ³த²கூபோ விய து³ஸ்ஸீல்யம் த³ட்ட²ப்³ப³ம். கூ³த²கூபே பதித்வா டி²தோ த⁴ம்மனிஅஹி விய து³ஸ்ஸீலபுக்³க³லோ. கூ³த²கூபதோ உத்³த⁴ரியமானேன தேன அஹினா புரிஸஸ்ஸ ஸரீரம் ஆருள்ஹேனாபி அத³ட்ட²பா⁴வோ விய து³ஸ்ஸீலம் ஸேவமானஸ்ஸாபி தஸ்ஸ கிரியாய அகரணபா⁴வோ. ஸரீரம் கூ³தே²ன மக்கே²த்வா அஹினா க³தகாலோ விய து³ஸ்ஸீலம் ஸேவமானஸ்ஸ பாபகித்திஸத்³த³அப்³பு⁴க்³க³மனகாலோ வேதி³தப்³போ³.

திந்து³காலாதந்தி திந்து³கருக்க²அலாதம். பி⁴ய்யோஸோமத்தாய சிச்சிடாயதீதி தம் ஹி ஜா²யமானம் பகதியாபி பபடிகாயோ முஞ்சந்தம் சிச்சிடாதி ‘‘சிடிசிடா’’தி ஸத்³த³ம் கரோதி, க⁴ட்டிதம் பன அதி⁴மத்தம் கரோதீதி அத்தோ². ஏவமேவ கோ²தி ஏவமேவம் கோத⁴னோ அத்தனோ த⁴ம்மதாயபி உத்³த⁴தோ சண்டி³கதோ ஹுத்வா சரதி, அப்பமத்தகம் பன வசனம் ஸுதகாலே ‘‘மாதி³ஸம் நாம ஏவம் வத³தி ஏவம் வத³தீ’’தி அதிரேகதரம் உத்³த⁴தோ சண்டி³கதோ ஹுத்வா சரதி. கூ³த²கூபோதி கூ³த²புண்ணகூபோ, கூ³த²ராஸியேவ வா. ஓபம்மஸம்ஸந்த³னம் பனேத்த² புரிமனயேனேவ வேதி³தப்³ப³ம். தஸ்மா ஏவரூபோ புக்³க³லோ அஜ்ஜு²பேக்கி²தப்³போ³ ந ஸேவிதப்³போ³தி யஸ்மா கோத⁴னோ அதிஸேவியமானோ அதிஉபஸங்கமியமானோபி குஜ்ஜ²தியேவ, ‘‘கிம் இமினா’’தி படிக்கமந்தேபி குஜ்ஜ²தியேவ. தஸ்மா பலாலக்³கி³ விய அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³. கிம் வுத்தம் ஹோதி? யோ ஹி பலாலக்³கி³ம் அதிஉபஸங்கமித்வா தப்பதி, தஸ்ஸ ஸரீரம் ஜா²யதி. யோ அதிபடிக்கமித்வா தப்பதி, தஸ்ஸ ஸீதம் ந வூபஸம்மதி. அனுபஸங்கமித்வா அபடிக்கமித்வா பன மஜ்ஜ²த்தபா⁴வேன தப்பந்தஸ்ஸ ஸீதம் வூபஸம்மதி, தஸ்மா பலாலக்³கி³ விய கோத⁴னோ புக்³க³லோ மஜ்ஜ²த்தபா⁴வேன அஜ்ஜு²பேக்கி²தப்³போ³, ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.

கல்யாணமித்தோதி ஸுசிமித்தோ. கல்யாணஸஹாயோதி ஸுசிஸஹாயோ. ஸஹாயா நாம ஸஹகா³மினோ ஸத்³தி⁴ம்சரா. கல்யாணஸம்பவங்கோதி கல்யாணேஸு ஸுசிபுக்³க³லேஸு ஸம்பவங்கோ, தன்னின்னதப்போணதப்பப்³பா⁴ரமானஸோதி அத்தோ².

8. கூ³த²பா⁴ணீஸுத்தவண்ணனா

28. அட்ட²மே கூ³த²பா⁴ணீதி யோ கூ³த²ம் விய து³க்³க³ந்த⁴கத²ம் கதே²தி. புப்ப²பா⁴ணீதி யோ புப்பா²னி விய ஸுக³ந்த⁴கத²ம் கதே²தி. மது⁴பா⁴ணீதி யோ மது⁴ விய மது⁴ரகத²ம் கதே²தி. ஸப⁴க்³க³தோதி ஸபா⁴ய டி²தோ. பரிஸக்³க³தோதி கா³மபரிஸாய டி²தோ. ஞாதிமஜ்ஜ²க³தோதி ஞாதீனம் மஜ்ஜே² டி²தோ. பூக³மஜ்ஜ²க³தோதி ஸேணீனம் மஜ்ஜே² டி²தோ. ராஜகுலமஜ்ஜ²க³தோதி ராஜகுலஸ்ஸ மஜ்ஜே² மஹாவினிச்ச²யே டி²தோ. அபி⁴னீதோதி புச்ச²னத்தா²யானீதோ. ஸக்கி²புட்டோ²தி ஸக்கி²ம் கத்வா புச்சி²தோ. ஏஹம்போ⁴ புரிஸாதி ஆலபனமேதம். அத்தஹேது வா பரஹேது வாதி அத்தனோ வா பரஸ்ஸ வா ஹத்த²பாதா³தி³ஹேது வா த⁴னஹேது வா. ஆமிஸகிஞ்சிக்க²ஹேது வாதி ஏத்த² ஆமிஸந்தி லஞ்ஜோ அதி⁴ப்பேதோ. கிஞ்சிக்க²ந்தி யம் வா தம் வா அப்பமத்தகம் அந்தமஸோ தித்திரியவட்டகஸப்பிபிண்ட³னவனீதபிண்டா³தி³மத்தகஸ்ஸ லஞ்ஜஸ்ஸ ஹேதூதி அத்தோ². ஸம்பஜானமுஸா பா⁴ஸிதா ஹோதீதி ஜானந்தோயேவ முஸாவாத³ம் கத்தா ஹோதி.

நேலாதி ஏலம் வுச்சதி தோ³ஸோ, நாஸ்ஸ ஏலந்தி நேலா, நித்³தோ³ஸாதி அத்தோ². ‘‘நேலங்கோ³ ஸேதபச்சா²தோ³’’தி (உதா³. 65) ஏத்த² வுத்தஸீலம் விய. கண்ணஸுகா²தி ப்³யஞ்ஜனமது⁴ரதாய கண்ணானம் ஸுகா², ஸூசிவிஜ்ஜ²னம் விய கண்ணஸூலம் ந ஜனேதி. அத்த²மது⁴ரதாய ஸகலஸரீரே கோபம் அஜனேத்வா பேமம் ஜனேதீதி பேமனீயா. ஹத³யம் க³ச்ச²தி அப்படிஹஞ்ஞமானா ஸுகே²ன சித்தம் பவிஸதீதி ஹத³யங்க³மா. கு³ணபரிபுண்ணதாய புரே ப⁴வாதி போரீ. புரே ஸம்வட்³ட⁴னாரீ விய ஸுகுமாராதிபி போரீ. புரஸ்ஸ ஏஸாதிபி போரீ. புரஸ்ஸ ஏஸாதி நக³ரவாஸீனம் கதா²தி அத்தோ². நக³ரவாஸினோ ஹி யுத்தகதா² ஹோந்தி, பிதிமத்தம் பிதாதி, மாதிமத்தம் மாதாதி, பா⁴திமத்தம் பா⁴தாதி வத³ந்தி. ஏவரூபீ கதா² ப³ஹுனோ ஜனஸ்ஸ கந்தா ஹோதீதி ப³ஹுஜனகந்தா. கந்தபா⁴வேனேவ ப³ஹுனோ ஜனஸ்ஸ மனாபா சித்தவுத்³தி⁴கராதி ப³ஹுஜனமனாபா.

9. அந்த⁴ஸுத்தவண்ணனா

29. நவமே சக்கு² ந ஹோதீதி பஞ்ஞாசக்கு² ந ஹோதி. பா²திம் கரேய்யாதி பீ²தம் வட்³டி⁴தம் கரேய்ய. ஸாவஜ்ஜானவஜ்ஜேதி ஸதோ³ஸனித்³தோ³ஸே. ஹீனப்பணீதேதி அத⁴முத்தமே. கண்ஹஸுக்கஸப்படிபா⁴கே³தி கண்ஹஸுக்காயேவ அஞ்ஞமஞ்ஞம் படிபா³ஹனதோ படிபக்க²வஸேன ஸப்படிபா⁴கா³தி வுச்சந்தி. அயம் பனேத்த² ஸங்கே²போ – குஸலே த⁴ம்மே ‘‘குஸலா த⁴ம்மா’’தி ஜானேய்ய, அகுஸலே த⁴ம்மே ‘‘அகுஸலா த⁴ம்மா’’தி ஜானேய்ய. ஸாவஜ்ஜாதீ³ஸுபி ஏஸேவ நயோ. கண்ஹஸுக்கஸப்படிபா⁴கே³ஸு பன கண்ஹத⁴ம்மே ‘‘ஸுக்கஸப்படிபா⁴கா³’’தி ஜானேய்ய, ஸுக்கத⁴ம்மே ‘‘கண்ஹஸப்படிபா⁴கா³’’தி யேன பஞ்ஞாசக்கு²னா ஜானேய்ய, ததா²ரூபம்பிஸ்ஸ சக்கு² ந ஹோதீதி. இமினா நயேன ஸேஸவாரேஸுபி அத்தோ² வேதி³தப்³போ³.

ந சேவ போ⁴கா³ ததா²ரூபாதி ததா²ஜாதிகா போ⁴கா³பிஸ்ஸ ந ஹோந்தி. ந ச புஞ்ஞானி குப்³ப³தீதி புஞ்ஞானி ச ந கரோதி. ஏத்தாவதா போ⁴கு³ப்பாத³னசக்கு²னோ ச புஞ்ஞகரணசக்கு²னோ ச அபா⁴வோ வுத்தோ. உப⁴யத்த² கலிக்³கா³ஹோதி இத⁴லோகே ச பரலோகே சாதி உப⁴யஸ்மிம்பி அபரத்³த⁴க்³கா³ஹோ, பராஜயக்³கா³ஹோ ஹோதீதி அத்தோ². அத² வா உப⁴யத்த² கலிக்³கா³ஹோதி உப⁴யேஸம்பி தி³ட்ட²த⁴ம்மிகஸம்பராயிகானம் அத்தா²னம் கலிக்³கா³ஹோ, பராஜயக்³கா³ஹோதி அத்தோ². த⁴ம்மாத⁴ம்மேனாதி த³ஸகுஸலகம்மபத²த⁴ம்மேனபி த³ஸஅகுஸலகம்மபத²அத⁴ம்மேனபி. ஸடோ²தி கேராடிகோ. போ⁴கா³னி பரியேஸதீதி போ⁴கே³ க³வேஸதி. தே²ய்யேன கூடகம்மேன, முஸாவாதே³ன சூப⁴யந்தி தே²ய்யாதீ³ஸு உப⁴யேன பரியேஸதீதி அத்தோ². கத²ம்? தே²ய்யேன கூடகம்மேன ச பரியேஸதி, தே²ய்யேன முஸாவாதே³ன ச பரியேஸதி, கூடகம்மேன முஸாவாதே³ன ச பரியேஸதி. ஸங்கா⁴துந்தி ஸங்க⁴ரிதும். த⁴ம்மலத்³தே⁴ஹீதி த³ஸகுஸலகம்மபத²த⁴ம்மம் அகோபேத்வா லத்³தே⁴ஹி. உட்டா²னாதி⁴க³தந்தி வீரியேன அதி⁴க³தம். அப்³யக்³க⁴மானஸோதி நிப்³பி³சிகிச்ச²சித்தோ. ப⁴த்³த³கம் டா²னந்தி ஸேட்ட²ம் தே³வட்டா²னம். ந ஸோசதீதி யஸ்மிம் டா²னே அந்தோஸோகேன ந ஸோசதி.

10. அவகுஜ்ஜஸுத்தவண்ணனா

30. த³ஸமே அவகுஜ்ஜபஞ்ஞோதி அதோ⁴முக²பஞ்ஞோ. உச்ச²ங்க³பஞ்ஞோதி உச்ச²ங்க³ஸதி³ஸபஞ்ஞோ. புது²பஞ்ஞோதி வித்தா²ரிகபஞ்ஞோ. ஆதி³கல்யாணந்திஆதீ³ஸு ஆதீ³தி புப்³ப³பட்ட²பனா. மஜ்ஜ²ந்தி கதா²வேமஜ்ஜ²ம். பரியோஸானந்தி ஸன்னிட்டா²னம். இதிஸ்ஸ தே த⁴ம்மம் கதே²ந்தா புப்³ப³பட்ட²பனேபி கல்யாணம் ப⁴த்³த³கம் அனவஜ்ஜமேவ கத்வா கதே²ந்தி, வேமஜ்ஜே²பி பரியோஸானேபி. ஏத்த² ச அத்தி² தே³ஸனாய ஆதி³மஜ்ஜ²பரியோஸானானி, அத்தி² ஸாஸனஸ்ஸ. தத்த² தே³ஸனாய தாவ சதுப்பதி³ககா³தா²ய பட²மபத³ம் ஆதி³, த்³வே பதா³னி மஜ்ஜ²ம், அவஸானபத³ம் பரியோஸானம். ஏகானுஸந்தி⁴கஸ்ஸ ஸுத்தஸ்ஸ நிதா³னம் ஆதி³, அனுஸந்தி⁴ மஜ்ஜ²ம், இத³மவோசாதி அப்பனா பரியோஸானம். அனேகானுஸந்தி⁴கஸ்ஸ பட²மோ அனுஸந்தி⁴ ஆதி³, ததோ பரம் ஏகோ வா அனேகே வா மஜ்ஜ²ம், பச்சி²மோ பரியோஸானம். அயம் தாவ தே³ஸனாய நயோ. ஸாஸனஸ்ஸ பன ஸீலம் ஆதி³, ஸமாதி⁴ மஜ்ஜ²ம், விபஸ்ஸனா பரியோஸானம். ஸமாதி⁴ வா ஆதி³, விபஸ்ஸனா மஜ்ஜ²ம், மக்³கோ³ பரியோஸானம். விபஸ்ஸனா வா ஆதி³, மக்³கோ³ மஜ்ஜ²ம், ப²லம் பரியோஸானம். மக்³கோ³ வா ஆதி³, ப²லம் மஜ்ஜ²ம், நிப்³பா³னம் பரியோஸானம். த்³வே த்³வே வா கயிரமானே ஸீலஸமாத⁴யோ ஆதி³, விபஸ்ஸனாமக்³கா³ மஜ்ஜ²ம், ப²லனிப்³பா³னானி பரியோஸானம்.

ஸாத்த²ந்தி ஸாத்த²கம் கத்வா தே³ஸேந்தி. ஸப்³யஞ்ஜனந்தி அக்க²ரபாரிபூரிம் கத்வா தே³ஸேந்தி. கேவலபரிபுண்ணந்தி ஸகலபரிபுண்ணம் அனூனம் கத்வா தே³ஸேந்தி. பரிஸுத்³த⁴ந்தி பரிஸுத்³த⁴ம் நிஜ்ஜடம் நிக்³க³ண்டி²ம் கத்வா தே³ஸேந்தி. ப்³ரஹ்மசரியம் பகாஸேந்தீதி ஏவம் தே³ஸேந்தா ச ஸேட்ட²சரியபூ⁴தம் ஸிக்க²த்தயஸங்க³ஹிதம் அரியம் அட்ட²ங்கி³கம் மக்³க³ம் பகாஸேந்தி. நேவ ஆதி³ம் மனஸி கரோதீதி நேவ புப்³ப³பட்ட²பனம் மனஸி கரோதி.

கும்போ⁴தி க⁴டோ. நிகுஜ்ஜோதி அதோ⁴முகோ² ட²பிதோ. ஏவமேவ கோ²தி ஏத்த² கும்போ⁴ நிகுஜ்ஜோ விய அவகுஜ்ஜபஞ்ஞோ புக்³க³லோ த³ட்ட²ப்³போ³, உத³காஸிஞ்சனகாலோ விய த⁴ம்மதே³ஸனாய லத்³த⁴காலோ, உத³கஸ்ஸ விவட்டனகாலோ விய தஸ்மிம் ஆஸனே நிஸின்னஸ்ஸ உக்³க³ஹேதும் அஸமத்த²காலோ, உத³கஸ்ஸ அஸண்டா²னகாலோ விய வுட்ட²ஹித்வா அஸல்லக்க²ணகாலோ வேதி³தப்³போ³.

ஆகிண்ணானீதி பக்கி²த்தானி. ஸதிஸம்மோஸாய பகிரேய்யாதி முட்ட²ஸ்ஸதிதாய விகிரேய்ய. ஏவமேவ கோ²தி ஏத்த² உச்ச²ங்கோ³ விய உச்ச²ங்க³பஞ்ஞோ புக்³க³லோ த³ட்ட²ப்³போ³, நானாக²ஜ்ஜகானி விய நானப்பகாரம் பு³த்³த⁴வசனம், உச்ச²ங்கே³ நானாக²ஜ்ஜகானி கா²த³ந்தஸ்ஸ நிஸின்னகாலோ விய தஸ்மிம் ஆஸனே நிஸின்னஸ்ஸ உக்³க³ண்ஹனகாலோ, வுட்ட²ஹந்தஸ்ஸ ஸதிஸம்மோஸா பகிரணகாலோ விய தஸ்மா ஆஸனா வுட்டா²ய க³ச்ச²ந்தஸ்ஸ அஸல்லக்க²ணகாலோ வேதி³தப்³போ³.

உக்குஜ்ஜோதி உபரிமுகோ² ட²பிதோ. ஸண்டா²தீதி பதிட்ட²ஹதி. ஏவமேவ கோ²தி ஏத்த² உபரிமுகோ² ட²பிதோ கும்போ⁴ விய புது²பஞ்ஞோ புக்³க³லோ த³ட்ட²ப்³போ³, உத³கஸ்ஸ ஆஸித்தகாலோ விய தே³ஸனாய லத்³த⁴காலோ, உத³கஸ்ஸ ஸண்டா²னகாலோ விய தத்த² நிஸின்னஸ்ஸ உக்³க³ண்ஹனகாலோ, நோ விவட்டனகாலோ விய வுட்டா²ய க³ச்ச²ந்தஸ்ஸ ஸல்லக்க²ணகாலோ வேதி³தப்³போ³.

து³ம்மேதோ⁴தி நிப்பஞ்ஞோ. அவிசக்க²ணோதி ஸம்வித³ஹனபஞ்ஞாய ரஹிதோ. க³ந்தாதி க³மனஸீலோ. ஸேய்யோ ஏதேன வுச்சதீதி ஏதஸ்மா புக்³க³லா உத்தரிதரோதி வுச்சதி. த⁴ம்மானுத⁴ம்மப்படிபன்னோதி நவலோகுத்தரத⁴ம்மஸ்ஸ அனுத⁴ம்மம் ஸஹ ஸீலேன புப்³ப³பா⁴க³படிபத³ம் படிபன்னோ. து³க்க²ஸ்ஸாதி வட்டது³க்க²ஸ்ஸ. அந்தகரோ ஸியாதி கோடிகரோ பரிச்சே²த³கரோ பரிவடுமகரோ ப⁴வேய்யாதி.

புக்³க³லவக்³கோ³ ததியோ.