1. காமதா⁴து

999. பஞ்சன்னம் க²ந்தா⁴னம் கதி காமதா⁴துபரியாபன்னா, கதி ந காமதா⁴துபரியாபன்னா…பே… ஸத்தன்னம் சித்தானம் கதி காமதா⁴துபரியாபன்னா, கதி ந காமதா⁴துபரியாபன்னா?

1000. ரூபக்க²ந்தோ⁴ காமதா⁴துபரியாபன்னோ; சத்தாரோ க²ந்தா⁴ ஸியா காமதா⁴துபரியாபன்னா, ஸியா ந காமதா⁴துபரியாபன்னா.

த³ஸாயதனா காமதா⁴துபரியாபன்னா; த்³வே ஆயதனா ஸியா காமதா⁴துபரியாபன்னா, ஸியா ந காமதா⁴துபரியாபன்னா.

ஸோளஸ தா⁴துயோ காமதா⁴துபரியாபன்னா; த்³வே தா⁴துயோ ஸியா காமதா⁴துபரியாபன்னா, ஸியா ந காமதா⁴துபரியாபன்னா.

ஸமுத³யஸச்சம் காமதா⁴துபரியாபன்னம்; த்³வே ஸச்சா ந காமதா⁴துபரியாபன்னா; து³க்க²ஸச்சம் ஸியா காமதா⁴துபரியாபன்னம், ஸியா ந காமதா⁴துபரியாபன்னம்.

த³ஸிந்த்³ரியா காமதா⁴துபரியாபன்னா; தீணிந்த்³ரியா ந காமதா⁴துபரியாபன்னா; நவிந்த்³ரியா ஸியா காமதா⁴துபரியாபன்னா, ஸியா ந காமதா⁴துபரியாபன்னா.

தயோ அகுஸலஹேதூ காமதா⁴துபரியாபன்னா; ச² ஹேதூ ஸியா காமதா⁴துபரியாபன்னா, ஸியா ந காமதா⁴துபரியாபன்னா.

கப³ளீகாரோ ஆஹாரோ காமதா⁴துபரியாபன்னோ; தயோ ஆஹாரா ஸியா காமதா⁴துபரியாபன்னா, ஸியா ந காமதா⁴துபரியாபன்னா.

ச² ப²ஸ்ஸா காமதா⁴துபரியாபன்னா; மனோவிஞ்ஞாணதா⁴துஸம்ப²ஸ்ஸோ ஸியா காமதா⁴து பரியாபன்னோ, ஸியா ந காமதா⁴துபரியாபன்னோ.

ச² வேத³னா…பே… ச² ஸஞ்ஞா… ச² சேதனா… ச² சித்தா காமதா⁴துபரியாபன்னா; மனோவிஞ்ஞாணதா⁴து ஸியா காமதா⁴துபரியாபன்னா, ஸியா ந காமதா⁴துபரியாபன்னா.