(6) அட்ட² புரிஸதோ³ஸா

957. தத்த² கதமே அட்ட² புரிஸதோ³ஸா? (க) இத⁴ பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ [சோதி³யமானோ (ஸீ. ஸ்யா.) அ. நி. 8.14] ‘‘ந ஸராமி ந ஸராமீ’’தி அஸ்ஸதியாவ நிப்³பே³டே²தி. அயம் பட²மோ புரிஸதோ³ஸோ.

(க²) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ சோத³கம்யேவ படிப்ப²ரதி – ‘‘கிம் நு கோ² துய்ஹம் பா³லஸ்ஸ அப்³யத்தஸ்ஸ ப⁴ணிதேன! த்வம்பி நாம மம் ப⁴ணிதப்³ப³ம் மஞ்ஞஸீ’’தி! அயம் து³தியோ புரிஸதோ³ஸோ.

(க³) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ சோத³கம்யேவ [சோத³கஸ்ஸேவ (ஸ்யா.) அ. நி. 8.14] பச்சாரோபேதி – ‘‘த்வம்பி கோ²ஸி இத்த²ன்னாமம் ஆபத்திம் ஆபன்னோ. த்வம் தாவ பட²மம் படிகரோஹீ’’தி. அயம் ததியோ புரிஸதோ³ஸோ.

(க⁴) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ அஞ்ஞேனாஞ்ஞம் படிசரதி, ப³ஹித்³தா⁴ கத²ம் அபனாமேதி, கோபஞ்ச தோ³ஸஞ்ச அப்பச்சயஞ்ச பாதுகரோதி. அயம் சதுத்தோ² புரிஸதோ³ஸோ.

(ங) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ ஸங்க⁴மஜ்ஜே² பா³ஹாவிக்கே²பகம் ப⁴ணதி. அயம் பஞ்சமோ புரிஸதோ³ஸோ.

(ச) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ அனாதி³யித்வா ஸங்க⁴ம், அனாதி³யித்வா சோத³கம், ஸாபத்திகோவ [ஆபத்திகோவ (க.) அ. நி. 8.14] யேனகாமம் பக்கமதி. அயம் ச²ட்டோ² புரிஸதோ³ஸோ.

(ச²) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ ‘‘நேவாஹம் ஆபன்னோம்ஹி, ந பனாஹம் அனாபன்னோம்ஹீ’’தி துண்ஹீபூ⁴தோ ஸங்க⁴ம் விஹேஸேதி. அயம் ஸத்தமோ புரிஸதோ³ஸோ.

(ஜ) புன சபரம் பி⁴க்கூ² பி⁴க்கு²ம் ஆபத்தியா சோதே³ந்தி. ஸோ பி⁴க்கு² பி⁴க்கூ²ஹி ஆபத்தியா சோதி³யமானோ ஏவமாஹ – ‘‘கிம் நு கோ² தும்ஹே ஆயஸ்மந்தோ அதிபா³ள்ஹம் மயி ப்³யாவடா. இதா³னாஹம் ஸிக்க²ம் பச்சக்கா²ய ஹீனாயாவத்திஸ்ஸாமீ’’தி. ஸோ ஸிக்க²ம் பச்சக்கா²ய ஹீனாயாவத்தித்வா ஏவமாஹ – ‘‘இதா³னி கோ² தும்ஹே ஆயஸ்மந்தோ அத்தமனா ஹோதா²’’தி. அயம் அட்ட²மோ புரிஸதோ³ஸோ. இமே அட்ட² புரிஸதோ³ஸா.