17. கு²த்³த³கவத்து²விப⁴ங்கோ³

1. ஏககமாதிகா

832. (1)ஜாதிமதோ³ (2)கோ³த்தமதோ³ (3)ஆரோக்³யமதோ³ (4)யோப்³ப³னமதோ³ (5)ஜீவிதமதோ³ (6)லாப⁴மதோ³ (7)ஸக்காரமதோ³ (8) க³ருகாரமதோ³ (9) புரேக்கா²ரமதோ³ (10) பரிவாரமதோ³ (11) போ⁴க³மதோ³ (12) வண்ணமதோ³ (13) ஸுதமதோ³ (14) படிபா⁴னமதோ³ (15) ரத்தஞ்ஞுமதோ³ (16) பிண்ட³பாதிகமதோ³ (17) அனவஞ்ஞாதமதோ³ (18) இரியாபத²மதோ³ (19) இத்³தி⁴மதோ³ (20) யஸமதோ³ (21) ஸீலமதோ³ (22) ஜா²னமதோ³ (23) ஸிப்பமதோ³ (24) ஆரோஹமதோ³ (25) பரிணாஹமதோ³ (26) ஸண்டா²னமதோ³ (27) பாரிபூரிமதோ³ (28)மதோ³ (29) பமாதோ³ (30) த²ம்போ⁴ (31) ஸாரம்போ⁴ (32) அத்ரிச்ச²தா (33)மஹிச்ச²தா (34) பாபிச்ச²தா (35) ஸிங்க³ம் (36) திந்திணம் (37) சாபல்யம் (38)அஸபா⁴க³வுத்தி (39) அரதி (40) தந்தீ³ (41) விஜம்பி⁴தா (42) ப⁴த்தஸம்மதோ³ (43) சேதஸோ ச லீனத்தம் [சேதஸோ லீனத்தம் (ஸ்யா.)] (44) குஹனா (45) லபனா (46) நேமித்திகதா (47)நிப்பேஸிகதா (48) லாபே⁴ன லாப⁴ம் நிஜிகீ³ஸனதா [நிஜிகி³ம்ஸனதா (ஸீ.), ஜிகி³ம்ஸனதா (ஸ்யா.)] (49) ஸேய்யோஹமஸ்மீதி மானோ (50) ஸதி³ஸோஹமஸ்மீதி மானோ (51) ஹீனோ ஹமஸ்மீதி மானோ (52) ஸேய்யஸ்ஸ ஸேய்யோஹமஸ்மீதி மானோ (53) ஸேய்யஸ்ஸ ஸதி³ஸோஹமஸ்மீதி மானோ (54) ஸேய்யஸ்ஸ ஹீனோஹமஸ்மீதி மானோ (55) ஸதி³ஸஸ்ஸ ஸேய்யோஹமஸ்மீதி மானோ (56) ஸதி³ஸஸ்ஸ ஸதி³ஸோஹமஸ்மீதி மானோ (57) ஸதி³ஸஸ்ஸ ஹீனோஹமஸ்மீதி மானோ (58) ஹீனஸ்ஸ ஸேய்யோஹமஸ்மீதி மானோ (59) ஹீனஸ்ஸ ஸதி³ஸோஹமஸ்மீதி மானோ (60) ஹீனஸ்ஸ ஹீனோஹமஸ்மீதி மானோ (61) மானோ (62) அதிமானோ (63) மானாதிமானோ (64) ஓமானோ (65)அதி⁴மானோ (66) அஸ்மிமானோ (67) மிச்சா²மானோ (68) ஞாதிவிதக்கோ (69)ஜனபத³விதக்கோ (70) அமரவிதக்கோ (71) பரானுத்³த³யதாபடிஸம்யுத்தோ விதக்கோ (72) லாப⁴ஸக்காரஸிலோகபடிஸம்யுத்தோ விதக்கோ (73) அனவஞ்ஞத்திபடிஸம்யுத்தோ விதக்கோ

ஏககம்.

2. து³கமாதிகா

833. (1) கோதோ⁴ ச உபனாஹோ ச (2) மக்கோ² ச பளாஸோ [பலாஸோ (ஸீ. ஸ்யா.)] ச (3) இஸ்ஸா ச மச்ச²ரியஞ்ச (4) மாயா ச ஸாடே²ய்யஞ்ச (5) அவிஜ்ஜா ச ப⁴வதண்ஹா ச (6) ப⁴வதி³ட்டி² ச விப⁴வதி³ட்டி² ச (7) ஸஸ்ஸததி³ட்டி² ச உச்சே²த³தி³ட்டி² ச (8) அந்தவாதி³ட்டி² ச அனந்தவாதி³ட்டி² ச (9) புப்³ப³ந்தானுதி³ட்டி² ச அபரந்தானுதி³ட்டி² ச (10) அஹிரிகஞ்ச அனோத்தப்பஞ்ச (11) தோ³வசஸ்ஸதா ச பாபமித்ததா ச (12) அனஜ்ஜவோ ச அமத்³த³வோ ச (13) அக்க²ந்தி ச அஸோரச்சஞ்ச (14) அஸாக²ல்யஞ்ச அப்படிஸந்தா²ரோ ச (15)இந்த்³ரியேஸு அகு³த்தத்³வாரதா ச போ⁴ஜனே அமத்தஞ்ஞுதா ச (16) முட்ட²ஸ்ஸச்சஞ்ச அஸம்பஜஞ்ஞஞ்ச (17) ஸீலவிபத்தி ச தி³ட்டி²விபத்தி ச (18) அஜ்ஜ²த்தஸம்யோஜனஞ்ச ப³ஹித்³தா⁴ஸம்யோஜனஞ்ச

து³கம்.

3. திகமாதிகா

834. (1) தீணி அகுஸலமூலானி (2) தயோ அகுஸலவிதக்கா (3) திஸ்ஸோ அகுஸலஸஞ்ஞா (4) திஸ்ஸோ அகுஸலதா⁴துயோ (5) தீணி து³ச்சரிதானி (6) தயோ ஆஸவா (7) தீணி ஸம்யோஜனானி (8) திஸ்ஸோ தண்ஹா (9) அபராபி திஸ்ஸோ தண்ஹா (10) அபராபி திஸ்ஸோ தண்ஹா (11) திஸ்ஸோ ஏஸனா (12) திஸ்ஸோ விதா⁴ (13) தீணி ப⁴யானி (14)தீணி தமானி (15) தீணி தித்தா²யதனானி (16) தயோ கிஞ்சனா (17) தீணி அங்க³ணானி (18) தீணி மலானி (19) தீணி விஸமானி (20) அபரானிபி தீணி விஸமானி (21) தயோ அக்³கீ³ (22) தயோ கஸாவா (23) அபரேபி தயோ கஸாவா (24)அஸ்ஸாத³தி³ட்டி², அத்தானுதி³ட்டி², மிச்சா²தி³ட்டி² (25) அரதி, விஹேஸா, அத⁴ம்மசரியா (26)தோ³வசஸ்ஸதா, பாபமித்ததா, நானத்தஸஞ்ஞா (27) உத்³த⁴ச்சம், கோஸஜ்ஜம், பமாதோ³ (28) அஸந்துட்டி²தா, அஸம்பஜஞ்ஞதா, மஹிச்ச²தா (29) அஹிரிகம், அனோத்தப்பம், பமாதோ³ (30)அனாத³ரியம், தோ³வசஸ்ஸதா, பாபமித்ததா (31) அஸ்ஸத்³தி⁴யம், அவத³ஞ்ஞுதா, கோஸஜ்ஜம் (32) உத்³த⁴ச்சம், அஸம்வரோ, து³ஸ்ஸீல்யம் (33) அரியானம் அத³ஸ்ஸனகம்யதா, ஸத்³த⁴ம்மம் அஸோதுகம்யதா, உபாரம்ப⁴சித்ததா (34) முட்ட²ஸ்ஸச்சம், அஸம்பஜஞ்ஞம், சேதஸோ விக்கே²போ (35)அயோனிஸோ மனஸிகாரோ, கும்மக்³க³ஸேவனா, சேதஸோ ச லீனத்தம்

திகம்.

4. சதுக்கமாதிகா

835. (1) சத்தாரோ ஆஸவா (2) சத்தாரோ க³ந்தா² (3) சத்தாரோ ஓகா⁴ (4) சத்தாரோ யோகா³ (5) சத்தாரி உபாதா³னானி (6) சத்தாரோ தண்ஹுப்பாதா³ (7) சத்தாரி அக³திக³மனானி (8) சத்தாரோ விபரியாஸா [விபரியேஸா (ஸீ. ஸ்யா. க.)] (9) சத்தாரோ அனரியவோஹாரா (10) அபரேபி சத்தாரோ அனரியவோஹாரா (11) சத்தாரி து³ச்சரிதானி (12) அபரானிபி சத்தாரி து³ச்சரிதானி (13)சத்தாரி ப⁴யானி (14) அபரானிபி சத்தாரி ப⁴யானி (15) சதஸ்ஸோ தி³ட்டி²யோ

சதுக்கம்.

5. பஞ்சகமாதிகா

836. (1) பஞ்சோரம்பா⁴கி³யானி ஸம்யோஜனானி (2) பஞ்சுத்³த⁴ம்பா⁴கி³யானி ஸம்யோஜனானி (3) பஞ்ச மச்ச²ரியானி (4) பஞ்ச ஸங்கா³ (5) பஞ்ச ஸல்லா (6) பஞ்ச சேதோகி²லா (7)பஞ்ச சேதஸோவினிப³ந்தா⁴ [சேதஸோவினிப³த்³தா⁴ (க.)] (8) பஞ்ச நீவரணானி (9) பஞ்ச கம்மானி ஆனந்தரிகானி (10) பஞ்ச தி³ட்டி²யோ (11) பஞ்ச வேரா (12) பஞ்ச ப்³யஸனா (13) பஞ்ச அக்க²ந்தியா ஆதீ³னவா (14) பஞ்ச ப⁴யானி (15) பஞ்ச தி³ட்ட²த⁴ம்மனிப்³பா³னவாதா³

பஞ்சகம்.

6. ச²க்கமாதிகா

837. (1) ச² விவாத³மூலானி (2) ச² ச²ந்த³ராகா³ (3) ச² விரோத⁴வத்தூ²னி (4) ச² தண்ஹாகாயா (5) ச² அகா³ரவா (6) ச² பரிஹானியா த⁴ம்மா (7) அபரேபி ச² பரிஹானியா த⁴ம்மா (8) ச² ஸோமனஸ்ஸுபவிசாரா (9) ச² தோ³மனஸ்ஸுபவிசாரா (10) ச² உபேக்கு²பவிசாரா (11) ச² கே³ஹஸிதானி ஸோமனஸ்ஸானி (12) ச² கே³ஹஸிதானி தோ³மனஸ்ஸானி (13) ச² கே³ஹஸிதா உபேக்கா² (14) ச² தி³ட்டி²யோ

ச²க்கம்.

7. ஸத்தகமாதிகா

838. (1) ஸத்த அனுஸயா (2) ஸத்த ஸம்யோஜனானி (3) ஸத்த பரியுட்டா²னானி (4)ஸத்த அஸத்³த⁴ம்மா (5) ஸத்த து³ச்சரிதானி (6) ஸத்த மானா (7) ஸத்த தி³ட்டி²யோ

ஸத்தகம்.

8. அட்ட²கமாதிகா

839. (1) அட்ட² கிலேஸவத்தூ²னி (2) அட்ட² குஸீதவத்தூ²னி (3) அட்ட²ஸு லோகத⁴ம்மேஸு சித்தஸ்ஸ படிகா⁴தோ (4) அட்ட² அனரியவோஹாரா (5) அட்ட² மிச்ச²த்தா (6) அட்ட² புரிஸதோ³ஸா (7) அட்ட² அஸஞ்ஞிவாதா³ (8) அட்ட² நேவஸஞ்ஞினாஸஞ்ஞிவாதா³

அட்ட²கம்.

9. நவகமாதிகா

840. (1) நவ ஆகா⁴தவத்தூ²னி (2) நவ புரிஸமலானி (3) நவவிதா⁴ மானா (4)நவ தண்ஹாமூலகா த⁴ம்மா (5) நவ இஞ்ஜிதானி (6) நவ மஞ்ஞிதானி (7) நவ ப²ந்தி³தானி (8) நவ பபஞ்சிதானி (9) நவ ஸங்க²தானி

நவகம்.

10. த³ஸகமாதிகா

841. (1) த³ஸ கிலேஸவத்தூ²னி (2) த³ஸ ஆகா⁴தவத்தூ²னி (3) த³ஸ அகுஸலகம்மபதா² (4) த³ஸ ஸம்யோஜனானி (5) த³ஸ மிச்ச²த்தா (6) த³ஸவத்து²கா மிச்சா²தி³ட்டி² (7) த³ஸவத்து²கா அந்தக்³கா³ஹிகா தி³ட்டி²

த³ஸகம்.

842. அட்டா²ரஸ தண்ஹாவிசரிதானி அஜ்ஜ²த்திகஸ்ஸ உபாதா³ய, அட்டா²ரஸ தண்ஹாவிசரிதானி பா³ஹிரஸ்ஸ உபாதா³ய, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா ச²த்திம்ஸ தண்ஹாவிசரிதானி ஹோந்தி. இதி அதீதானி ச²த்திம்ஸ தண்ஹாவிசரிதானி, அனாக³தானி ச²த்திம்ஸ தண்ஹாவிசரிதானி, பச்சுப்பன்னானி ச²த்திம்ஸ தண்ஹாவிசரிதானி, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா அட்ட² தண்ஹாவிசரிதஸதம் ஹோதி. யானி ச த்³வாஸட்டி² தி³ட்டி²க³தானி ப்³ரஹ்மஜாலே வேய்யாகரணே வுத்தானி ப⁴க³வதா.

மாதிகா.

1. ஏககனித்³தே³ஸோ

(1) ஜாதிமதோ³

843. தத்த² கதமோ ஜாதிமதோ³? ஜாதிம் படிச்ச மதோ³ மஜ்ஜனா மஜ்ஜிதத்தம் மானோ மஞ்ஞனா மஞ்ஞிதத்தம் உன்னதி உன்னாமோ [உண்ணதி உண்ணாமோ (ஸ்யா. க.) த⁴. ஸ. 1121] த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஜாதிமதோ³’’.

(2-27) கோ³த்தமதா³தீ³

844. தத்த² கதமோ கோ³த்தமதோ³? கோ³த்தம் படிச்ச…பே… ஆரோக்³யம் படிச்ச…பே… யோப்³ப³னம் படிச்ச…பே… ஜீவிதம் படிச்ச…பே… லாப⁴ம் படிச்ச…பே… ஸக்காரம் படிச்ச…பே… க³ருகாரம் படிச்ச…பே… புரேக்கா²ரம் படிச்ச…பே… பரிவாரம் படிச்ச…பே… போ⁴க³ம் படிச்ச…பே… வண்ணம் படிச்ச…பே… ஸுதம் படிச்ச…பே… படிபா⁴னம் படிச்ச…பே… ரத்தஞ்ஞுதம் படிச்ச…பே… பிண்ட³பாதிகத்தம் படிச்ச…பே… அனவஞ்ஞாதம் படிச்ச…பே… இரியாபத²ம் படிச்ச…பே… இத்³தி⁴ம் படிச்ச…பே… யஸம் படிச்ச…பே… ஸீலம் படிச்ச…பே… ஜா²னம் படிச்ச…பே… ஸிப்பம் படிச்ச…பே… ஆரோஹம் படிச்ச…பே… பரிணாஹம் படிச்ச…பே… ஸண்டா²னம் படிச்ச…பே… பாரிபூரிம் படிச்ச மதோ³ மஜ்ஜனா மஜ்ஜிதத்தம் மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘பாரிபூரிமதோ³’’.

(28) மதோ³

845. தத்த² கதமோ மதோ³? யோ மதோ³ மஜ்ஜனா மஜ்ஜிதத்தம் மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘மதோ³’’.

(29) பமாதோ³

846. தத்த² கதமோ பமாதோ³? காயது³ச்சரிதே வா வசீது³ச்சரிதே வா மனோது³ச்சரிதே வா பஞ்சஸு வா காமகு³ணேஸு சித்தஸ்ஸ வோஸ்ஸக்³கோ³ வோஸ்ஸக்³கா³னுப்பதா³னம் குஸலானம் வா த⁴ம்மானம் பா⁴வனாய அஸக்கச்சகிரியதா அஸாதச்சகிரியதா அனட்டி²தகிரியதா ஓலீனவுத்திதா நிக்கி²த்தச²ந்த³தா நிக்கி²த்தது⁴ரதா அனாஸேவனா அபா⁴வனா அப³ஹுலீகம்மம் அனதி⁴ட்டா²னம் அனனுயோகோ³ பமாதோ³, யோ ஏவரூபோ பமாதோ³ பமஜ்ஜனா பமஜ்ஜிதத்தம் – அயம் வுச்சதி ‘‘பமாதோ³’’.

(30) த²ம்போ⁴

847. தத்த² கதமோ த²ம்போ⁴? யோ த²ம்போ⁴ த²ம்ப⁴னா த²ம்பி⁴தத்தம் கக்க²ளியம் பா²ருஸியம் உஜுசித்ததா அமுது³தா – அயம் வுச்சதி ‘‘த²ம்போ⁴’’.

(31) ஸாரம்போ⁴

848. தத்த² கதமோ ஸாரம்போ⁴? யோ ஸாரம்போ⁴ படிஸாரம்போ⁴ ஸாரம்ப⁴னா படிஸாரம்ப⁴னா படிஸாரம்பி⁴தத்தம் – அயம் வுச்சதி ‘‘ஸாரம்போ⁴’’.

(32) அத்ரிச்ச²தா

849. தத்த² கதமா அத்ரிச்ச²தா? இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி பஞ்சஹி வா காமகு³ணேஹி அஸந்துட்ட²ஸ்ஸ பி⁴ய்யோகம்யதா, யா ஏவரூபா இச்சா² இச்சா²க³தா அத்ரிச்ச²தா ராகோ³ ஸாராகோ³ சித்தஸ்ஸ ஸாராகோ³ – அயம் வுச்சதி ‘‘அத்ரிச்ச²தா’’.

(33) மஹிச்ச²தா

850. தத்த² கதமா மஹிச்ச²தா? இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி பஞ்சஹி வா காமகு³ணேஹி அஸந்துட்ட²ஸ்ஸ பி⁴ய்யோகம்யதா, யா ஏவரூபா இச்சா² இச்சா²க³தா மஹிச்ச²தா ராகோ³ ஸாராகோ³ சித்தஸ்ஸ ஸாராகோ³ – அயம் வுச்சதி ‘‘மஹிச்ச²தா’’.

(34) பாபிச்ச²தா

851. தத்த² கதமா பாபிச்ச²தா? இதே⁴கச்சோ அஸ்ஸத்³தோ⁴ ஸமானோ ‘‘ஸத்³தோ⁴தி மம் ஜனோ ஜானாதூ’’தி இச்ச²தி, து³ஸ்ஸீலோ ஸமானோ ‘‘ஸீலவாதி மம் ஜனோ ஜானாதூ’’தி இச்ச²தி, அப்பஸ்ஸுதோ ஸமானோ ‘‘ப³ஹுஸ்ஸுதோதி மம் ஜனோ ஜானாதூ’’தி இச்ச²தி, ஸங்க³ணிகாராமோ ஸமானோ ‘‘பவிவித்தோதி மம் ஜனோ ஜானாதூ’’தி இச்ச²தி, குஸீதோ ஸமானோ ‘‘ஆரத்³த⁴வீரியோதி மம் ஜனோ ஜானாதூ’’தி இச்ச²தி, முட்ட²ஸ்ஸதீ ஸமானோ ‘‘உபட்டி²தஸ்ஸதீதி மம் ஜனோ ஜானாதூ’’தி இச்ச²தி, அஸமாஹிதோ ஸமானோ ‘‘ஸமாஹிதோதி மம் ஜனோ ஜானாதூ’’தி இச்ச²தி, து³ப்பஞ்ஞோ ஸமானோ ‘‘பஞ்ஞவாதி மம் ஜனோ ஜானாதூ’’தி இச்ச²தி, அகீ²ணாஸவோ ஸமானோ ‘‘கீ²ணாஸவோதி மம் ஜனோ ஜானாதூ’’தி இச்ச²தி – யா ஏவரூபா இச்சா² இச்சா²க³தா பாபிச்ச²தா ராகோ³ ஸாராகோ³ சித்தஸ்ஸ ஸாராகோ³ – அயம் வுச்சதி ‘‘பாபிச்ச²தா’’.

(35) ஸிங்க³ம்

852. தத்த² கதமம் ஸிங்க³ம்? யம் ஸிங்க³ம் ஸிங்கா³ரதா சாதுரதா சாதுரியம் பரிக்க²த்ததா பாரிக்க²த்தியம் – இத³ம் வுச்சதி ‘‘ஸிங்க³ம்’’.

(36) திந்திணம்

853. தத்த² கதமம் திந்திணம்? யம் திந்திணம் திந்திணாயனா திந்திணாயிதத்தம் லோலுப்பம் லோலுப்பாயனா லோலுப்பாயிதத்தம் புச்ச²ஞ்ஜிகதா ஸாது⁴கம்யதா – இத³ம் வுச்சதி ‘‘திந்திணம்’’.

(37) சாபல்யம்

854. தத்த² கதமம் சாபல்யம்? சீவரமண்ட³னா பத்தமண்ட³னா ஸேனாஸனமண்ட³னா இமஸ்ஸ வா பூதிகாயஸ்ஸ பா³ஹிரானம் வா பரிக்கா²ரானம் மண்ட³னா விபூ⁴ஸனா கேளனா பரிகேளனா கி³த்³தி⁴கதா கி³த்³தி⁴கத்தம் சபலதா சாபல்யம் – இத³ம் வுச்சதி ‘‘சாபல்யம்’’.

(38) அஸபா⁴க³வுத்தி

855. தத்த² கதமம் அஸபா⁴க³வுத்தி? மாதரி வா பிதரி வா ஜேட்டே² வா பா⁴தரி வா ஆசரியேஸு வா உபஜ்ஜா²யே வா பு³த்³தே⁴ வா ஸாவகேஸு வா அஞ்ஞதரஞ்ஞதரேஸு க³ருட்டா²னியேஸு விப்படிகூலக்³கா³ஹிதா விபச்சனீகஸாததா அனாத³ரியம் அனாத³ரியதா அகா³ரவதா அப்பதிஸ்ஸவதா – அயம் வுச்சதி ‘‘அஸபா⁴க³வுத்தி’’.

(39) அரதி

856. தத்த² கதமா அரதி? பந்தேஸு வா ஸேனாஸனேஸு அஞ்ஞதரஞ்ஞதரேஸு வா அதி⁴குஸலேஸு த⁴ம்மேஸு அரதி அரதிதா அனபி⁴ரதி அனபி⁴ரமணா உக்கண்டி²தா பரிதஸ்ஸிதா – அயம் வுச்சதி ‘‘அரதி’’.

(40) தந்தீ³

857. தத்த² கதமா தந்தீ³? யா தந்தீ³ தந்தி³யனா தந்தி³மனகதா ஆலஸ்யம் ஆலஸ்யாயனா ஆலஸ்யாயிதத்தம் – அயம் வுச்சதி ‘‘தந்தீ³’’.

(41) விஜம்பி⁴தா

858. தத்த² கதமா விஜம்பி⁴தா? யா காயஸ்ஸ ஜம்ப⁴னா விஜம்ப⁴னா ஆனமனா வினமனா ஸன்னமனா பணமனா ப்³யாதி⁴யகம் – அயம் வுச்சதி ‘‘விஜம்பி⁴தா’’.

(42) ப⁴த்தஸம்மதோ³

859. தத்த² கதமோ ப⁴த்தஸம்மதோ³? யா பு⁴த்தாவிஸ்ஸ ப⁴த்தமுச்சா² ப⁴த்தகிலமதோ² ப⁴த்தபரிளாஹோ காயது³ட்டு²ல்லம் – அயம் வுச்சதி ‘‘ப⁴த்தஸம்மதோ³’’.

(43) சேதஸோ ச லீனத்தம்

860. தத்த² கதமம் சேதஸோ ச லீனத்தம்? யா சித்தஸ்ஸ அகல்யதா அகம்மஞ்ஞதா ஓலீயனா ஸல்லீயனா லீனம் லீயனா லீயிதத்தம் தி²னம் தீ²யனா தீ²யிதத்தம் சித்தஸ்ஸ – இத³ம் வுச்சதி ‘‘சேதஸோ ச லீனத்தம்’’.

(44) குஹனா

861. தத்த² கதமா குஹனா? லாப⁴ஸக்காரஸிலோகஸன்னிஸ்ஸிதஸ்ஸ பாபிச்ச²ஸ்ஸ இச்சா²பகதஸ்ஸ பச்சயபடிஸேவனஸங்கா²தேன [பச்சயபடிஸேத⁴னஸங்கா²தேன (ஸீ.)] வா ஸாமந்தஜப்பிதேன வா இரியாபத²ஸ்ஸ வா அட²பனா [ஆட²பனா (க.)] ட²பனா ஸண்ட²பனா பா⁴குடிதா பா⁴குடியம் குஹனா குஹாயனா குஹிதத்தம் – அயம் வுச்சதி ‘‘குஹனா’’.

(45) லபனா

862. தத்த² கதமா லபனா? லாப⁴ஸக்காரஸிலோகஸன்னிஸ்ஸிதஸ்ஸ பாபிச்ச²ஸ்ஸ இச்சா²பகதஸ்ஸ யா பரேஸம் ஆலபனா லபனா ஸல்லபனா உல்லபனா ஸமுல்லபனா உன்னஹனா ஸமுன்னஹனா உக்காசனா ஸமுக்காசனா அனுப்பியபா⁴ணிதா சாடுகம்யதா முக்³க³ஸூப்யதா பாரிப⁴டயதா – அயம் வுச்சதி ‘‘லபனா’’.

(46) நேமித்திகதா

863. தத்த² கதமா நேமித்திகதா? லாப⁴ஸக்காரஸிலோகஸன்னிஸ்ஸிதஸ்ஸ பாபிச்ச²ஸ்ஸ இச்சா²பகதஸ்ஸ யம் பரேஸம் நிமித்தம் நிமித்தகம்மம் ஓபா⁴ஸோ ஓபா⁴ஸகம்மம் ஸாமந்தஜப்பா பரிகதா² – அயம் வுச்சதி ‘‘நேமித்திகதா’’.

(47) நிப்பேஸிகதா

864. தத்த² கதமா நிப்பேஸிகதா? லாப⁴ஸக்காரஸிலோகஸன்னிஸ்ஸிதஸ்ஸ பாபிச்ச²ஸ்ஸ இச்சா²பகதஸ்ஸ யா பரேஸம் அக்கோஸனா வம்ப⁴னா க³ரஹணா உக்கே²பனா ஸமுக்கே²பனா கி²பனா ஸங்கி²பனா பாபனா ஸம்பாபனா அவண்ணஹாரிகா பரபிட்டி²மம்ஸிகதா – அயம் வுச்சதி ‘‘நிப்பேஸிகதா’’.

(48) லாபே⁴ன லாப⁴ம் நிஜிகீ³ஸனதா

865. தத்த² கதமா லாபே⁴ன லாப⁴ம் நிஜிகீ³ஸனதா? லாப⁴ஸக்காரஸிலோகஸன்னிஸ்ஸிதோ பாபிச்சோ² இச்சா²பகதோ இதோ லத்³த⁴ம் ஆமிஸம் அமுத்ர ஹரதி அமுத்ர வா லத்³த⁴ம் ஆமிஸம் இத⁴ ஆஹரதி, யா ஏவரூபா ஆமிஸஸ்ஸ ஏட்டி² க³வேட்டி² பரியேட்டி² ஏஸனா க³வேஸனா பரியேஸனா – அயம் வுச்சதி ‘‘லாபே⁴ன லாப⁴ம் நிஜிகீ³ஸனதா’’.

(49) ஸேய்யோஹமஸ்மீதி மானோ

866. தத்த² கதமோ ஸேய்யோஹமஸ்மீதி மானோ? இதே⁴கச்சோ ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன [விஜ்ஜட்டா²னேன (ஸ்யா.)] வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா மானம் ஜப்பேதி, யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஸேய்யோஹமஸ்மீதி மானோ’’.

(50) ஸதி³ஸோஹமஸ்மீதி மானோ

867. தத்த² கதமோ ஸதி³ஸோஹமஸ்மீதி மானோ? இதே⁴கச்சோ ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா மானம் ஜப்பேதி, யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஸதி³ஸோஹமஸ்மீதி மானோ’’.

(51) ஹீனோஹமஸ்மீதி மானோ

868. தத்த² கதமோ ஹீனோஹமஸ்மீதி மானோ? இதே⁴கச்சோ ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா ஓமானம் ஜப்பேதி, யோ ஏவரூபோ ஓமானோ ஓமஞ்ஞனா ஓமஞ்ஞிதத்தம் ஹீளனா ஓஹீளனா ஓஹீளிதத்தம் அத்துஞ்ஞா அத்தவஞ்ஞா அத்தபரிப⁴வோ – அயம் வுச்சதி ‘‘ஹீனோஹமஸ்மீதி மானோ’’.

(52) ஸேய்யஸ்ஸ ஸேய்யோஹமஸ்மீதி மானோ

869. தத்த² கதமோ ஸேய்யஸ்ஸ ஸேய்யோஹமஸ்மீதி மானோ? இதே⁴கச்சோ ஸேய்யோ ஹோதி ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா பரேஹி ஸேய்யம் அத்தானம் த³ஹதி; ஸோ தம் நிஸ்ஸாய மானம் ஜப்பேதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஸேய்யஸ்ஸ ஸேய்யோஹமஸ்மீதி மானோ’’.

(53) ஸேய்யஸ்ஸ ஸதி³ஸோஹமஸ்மீதி மானோ

870. தத்த² கதமோ ஸேய்யஸ்ஸ ஸதி³ஸோஹமஸ்மீதி மானோ? இதே⁴கச்சோ ஸேய்யோ ஹோதி ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா பரேஹி ஸதி³ஸம் அத்தானம் த³ஹதி; ஸோ தம் நிஸ்ஸாய மானம் ஜப்பேதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஸேய்யஸ்ஸ ஸதி³ஸோஹமஸ்மீதி மானோ’’.

(54) ஸேய்யஸ்ஸ ஹீனோஹமஸ்மீதி மானோ

871. தத்த² கதமோ ஸேய்யஸ்ஸ ஹீனோஹமஸ்மீதி மானோ? இதே⁴கச்சோ ஸேய்யோ ஹோதி ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா பரேஹி ஹீனம் அத்தானம் த³ஹதி; ஸோ தம் நிஸ்ஸாய ஓமானம் ஜப்பேதி. யோ ஏவரூபோ ஓமானோ ஓமஞ்ஞனா ஓமஞ்ஞிதத்தம் ஹீளனா ஓஹீளனா ஓஹீளிதத்தம் அத்துஞ்ஞா அத்தவஞ்ஞா அத்தபரிப⁴வோ – அயம் வுச்சதி ‘‘ஸேய்யஸ்ஸ ஹீனோஹமஸ்மீதி மானோ’’.

(55) ஸதி³ஸஸ்ஸ ஸேய்யோஹமஸ்மீதி மானோ

872. தத்த² கதமோ ஸதி³ஸஸ்ஸ ஸேய்யோஹமஸ்மீதி மானோ? இதே⁴கச்சோ ஸதி³ஸோ ஹோதி ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி ஸேய்யம் அத்தானம் த³ஹதி; ஸோ தம் நிஸ்ஸாய மானம் ஜப்பேதி. யோ ஏவரூபோ மானோ மஞ்ஞனா மஞ்ஞிதத்தம்…பே… கேதுகம்யதா சித்தஸ்ஸ – அயம் வுச்சதி ‘‘ஸதி³ஸஸ்ஸ ஸேய்யோஹமஸ்மீதி மானோ’’.

(56) ஸதி³ஸஸ்ஸ ஸதி³ஸோஹமஸ்மீதி மானோ

873. தத்த² கதமோ ஸதி³ஸஸ்ஸ ஸதி³ஸோஹமஸ்மீதி மானோ? இதே⁴கச்சோ ஸதி³ஸோ ஹோதி ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி ஸதி³ஸம் அத்தானம் த³ஹதி; ஸோ தம் நிஸ்ஸாய மானம் ஜப்பேதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஸதி³ஸஸ்ஸ ஸதி³ஸோஹமஸ்மீதி மானோ’’.

(57) ஸதி³ஸஸ்ஸ ஹீனோஹமஸ்மீதி மானோ

874. தத்த² கதமோ ஸதி³ஸஸ்ஸ ஹீனோஹமஸ்மீதி மானோ? இதே⁴கச்சோ ஸதி³ஸோ ஹோதி ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி ஹீனம் அத்தானம் த³ஹதி; ஸோ தம் நிஸ்ஸாய ஓமானம் ஜப்பேதி. யோ ஏவரூபோ ஓமானோ ஓமஞ்ஞனா ஓமஞ்ஞிதத்தம் ஹீளனா ஓஹீளனா ஓஹீளிதத்தம் அத்துஞ்ஞா அத்தவஞ்ஞா அத்தபரிப⁴வோ – அயம் வுச்சதி ‘‘ஸதி³ஸஸ்ஸ ஹீனோஹமஸ்மீதி மானோ’’.

(58) ஹீனஸ்ஸ ஸேய்யோஹமஸ்மீதி மானோ

875. தத்த² கதமோ ஹீனஸ்ஸ ஸேய்யோஹமஸ்மீதி மானோ? இதே⁴கச்சோ ஹீனோ ஹோதி ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி ஸேய்யம் அத்தானம் த³ஹதி; ஸோ தம் நிஸ்ஸாய மானம் ஜப்பேதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஹீனஸ்ஸ ஸேய்யோஹமஸ்மீதி மானோ’’.

(59) ஹீனஸ்ஸ ஸதி³ஸோஹமஸ்மீதி மானோ

876. தத்த² கதமோ ஹீனஸ்ஸ ஸதி³ஸோஹமஸ்மீதி மானோ? இதே⁴கச்சோ ஹீனோ ஹோதி ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி ஸதி³ஸம் அத்தானம் த³ஹதி; ஸோ தம் நிஸ்ஸாய மானம் ஜப்பேதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘ஹீனஸ்ஸ ஸதி³ஸோஹமஸ்மீதி மானோ’’.

(60) ஹீனஸ்ஸ ஹீனோஹமஸ்மீதி மானோ

877. தத்த² கதமோ ஹீனஸ்ஸ ஹீனோஹமஸ்மீதி மானோ? இதே⁴கச்சோ ஹீனோ ஹோதி ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி ஸதி³ஸம் அத்தானம் த³ஹதி; ஸோ தம் நிஸ்ஸாய ஓமானம் ஜப்பேதி. யோ ஏவரூபோ ஓமானோ ஓமஞ்ஞனா ஓமஞ்ஞிதத்தம் ஹீளனா ஓஹீளனா ஓஹீளிதத்தம் அத்துஞ்ஞா அத்தவஞ்ஞா அத்தபரிப⁴வோ – அயம் வுச்சதி ‘‘ஹீனஸ்ஸ ஹீனோஹமஸ்மீதி மானோ’’.

(61) மானோ

878. தத்த² கதமோ மானோ? யோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘மானோ’’.

(62) அதிமானோ

879. தத்த² கதமோ அதிமானோ? இதே⁴கச்சோ ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா பரேஹி அத்தானம் அதிமஞ்ஞதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘அதிமானோ’’.

(63) மானாதிமானோ

880. தத்த² கதமோ மானாதிமானோ? இதே⁴கச்சோ ஜாதியா வா கோ³த்தேன வா கோலபுத்தியேன வா…பே… அஞ்ஞதரஞ்ஞதரேன வத்து²னா புப்³ப³காலம் பரேஹி ஸதி³ஸம் அத்தானம் த³ஹதி, அபரகாலம் அத்தானம் ஸேய்யம் த³ஹதி. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘மானாதிமானோ’’.

(64) ஓமானோ

881. தத்த² கதமோ ஓமானோ? இதே⁴கச்சோ ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா ஓமானம் ஜப்பேதி. யோ ஏவரூபோ ஓமானோ ஓமஞ்ஞனா ஓமஞ்ஞிதத்தம் ஹீளனா ஓஹீளனா ஓஹீளிதத்தம் அத்துஞ்ஞா அத்தவஞ்ஞா அத்தபரிப⁴வோ – அயம் வுச்சதி ‘‘ஓமானோ’’.

(65) அதி⁴மானோ

882. தத்த² கதமோ அதி⁴மானோ? அப்பத்தே பத்தஸஞ்ஞிதா, அகதே கதஸஞ்ஞிதா, அனதி⁴க³தே அதி⁴க³தஸஞ்ஞிதா, அஸச்சி²கதே ஸச்சி²கதஸஞ்ஞிதா, யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘அதி⁴மானோ’’.

(66) அஸ்மிமானோ

883. தத்த² கதமோ அஸ்மிமானோ? ரூபம் அஸ்மீதி மானோ, அஸ்மீதி ச²ந்தோ³, அஸ்மீதி அனுஸயோ, வேத³னா…பே… ஸஞ்ஞா…பே… ஸங்கா²ரா…பே… விஞ்ஞாணம் அஸ்மீதி மானோ, அஸ்மீதி ச²ந்தோ³, அஸ்மீதி அனுஸயோ, யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘அஸ்மிமானோ’’.

(67) மிச்சா²மானோ

884. தத்த² கதமோ மிச்சா²மானோ? இதே⁴கச்சோ பாபகேன வா கம்மாயதனேன பாபகேன வா ஸிப்பாயதனேன பாபகேன வா விஜ்ஜாட்டா²னேன பாபகேன வா ஸுதேன பாபகேன வா படிபா⁴னேன பாபகேன வா ஸீலேன பாபகேன வா வதேன பாபகேன வா ஸீலப்³ப³தேன பாபிகாய வா தி³ட்டி²யா அஞ்ஞதரஞ்ஞதரேன வத்து²னா மானம் ஜப்பேதி, யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி ‘‘மிச்சா²மானோ’’.

(68) ஞாதிவிதக்கோ

885. தத்த² கதமோ ஞாதிவிதக்கோ? ஞாதகே ஆரப்³ப⁴ கே³ஹஸிதோ தக்கோ விதக்கோ மிச்சா²ஸங்கப்போ – அயம் வுச்சதி ‘‘ஞாதிவிதக்கோ’’.

(69) ஜனபத³விதக்கோ

886. தத்த² கதமோ ஜனபத³விதக்கோ? ஜனபத³ம் ஆரப்³ப⁴ கே³ஹஸிதோ தக்கோ விதக்கோ மிச்சா²ஸங்கப்போ – அயம் வுச்சதி ‘‘ஜனபத³விதக்கோ’’.

(70) அமரவிதக்கோ

887. தத்த² கதமோ அமரவிதக்கோ? து³க்கரகாரிதாபடிஸம்யுத்தோ வா தி³ட்டி²க³தபடிஸம்யுத்தோ வா கே³ஹஸிதோ தக்கோ விதக்கோ மிச்சா²ஸங்கப்போ – அயம் வுச்சதி ‘‘அமரவிதக்கோ’’.

(71) பரானுத்³த³யதாபடிஸம்யுத்தோ விதக்கோ

888. தத்த² கதமோ பரானுத்³த³யதாபடிஸம்யுத்தோ விதக்கோ? இதே⁴கச்சோ கி³ஹீஹி ஸம்ஸட்டோ² விஹரதி ஸஹனந்தீ³ ஸஹஸோகீ, ஸுகி²தேஸு ஸுகி²தோ, து³க்கி²தேஸு து³க்கி²தோ, உப்பன்னேஸு கிச்சகரணீயேஸு அத்தனா வா யோக³ம் ஆபஜ்ஜதி. யோ தத்த² கே³ஹஸிதோ தக்கோ விதக்கோ மிச்சா²ஸங்கப்போ – அயம் வுச்சதி ‘‘பரானுத்³த³யதாபடிஸம்யுத்தோ விதக்கோ’’.

(72) லாபா⁴தி³படிஸம்யுத்தோ விதக்கோ

889. தத்த² கதமோ லாப⁴ஸக்காரஸிலோகபடிஸம்யுத்தோ விதக்கோ? லாப⁴ஸக்காரஸிலோகம் ஆரப்³ப⁴ கே³ஹஸிதோ தக்கோ விதக்கோ மிச்சா²ஸங்கப்போ – அயம் வுச்சதி ‘‘லாப⁴ஸக்காரஸிலோகபடிஸம்யுத்தோ விதக்கோ’’.

(73) அனவஞ்ஞத்திபடிஸம்யுத்தோ விதக்கோ

890. தத்த² கதமோ அனவஞ்ஞத்திபடிஸம்யுத்தோ விதக்கோ? இதே⁴கச்சோ ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வத்து²னா மா மம் பரே அவஜானிம்ஸூதி. யோ தத்த² கே³ஹஸிதோ தக்கோ விதக்கோ மிச்சா²ஸங்கப்போ – அயம் வுச்சதி ‘‘அனவஞ்ஞத்திபடிஸம்யுத்தோ விதக்கோ’’.

ஏககம்.

2. து³கனித்³தே³ஸோ

(1) கோதோ⁴ ச உபனாஹோ ச

891. (க) தத்த² கதமோ கோதோ⁴? யோ கோதோ⁴ குஜ்ஜ²னா குஜ்ஜி²தத்தம் தோ³ஸோ து³ஸ்ஸனா து³ஸ்ஸிதத்தம் ப்³யாபத்தி ப்³யாபஜ்ஜனா ப்³யாபஜ்ஜிதத்தம் விரோதோ⁴ படிவிரோதோ⁴ சண்டி³க்கம் அஸுரோபோ அனத்தமனதா சித்தஸ்ஸ – அயம் வுச்சதி ‘‘கோதோ⁴’’.

(க²) தத்த² கதமோ உபனாஹோ? புப்³ப³காலம் கோதோ⁴, அபரகாலம் உபனாஹோ. யோ ஏவரூபோ உபனாஹோ உபனய்ஹனா உபனய்ஹிதத்தம் அட்ட²பனா ட²பனா ஸண்ட²பனா அனுஸம்ஸந்த³னா அனுப்பப³ந்த⁴னா த³ள்ஹீகம்மம் கோத⁴ஸ்ஸ – அயம் வுச்சதி ‘‘உபனாஹோ’’.

(2) மக்கோ² ச பளாஸோ ச

892. (க) தத்த² கதமோ மக்கோ²? யோ மக்கோ² மக்கா²யனா மக்கா²யிதத்தம் [மக்கி²யனா மக்கி²யிதத்தம் (ஸீ. க.)] நிட்டு²ரியம் நிட்டு²ரியகம்மம் – அயம் வுச்சதி ‘‘மக்கோ²’’.

(க²) தத்த² கதமோ பளாஸோ? யோ பளாஸோ பளாஸாயனா [பலாஸாயனா பலாஸாயிதத்தம் (ஸ்யா.)] பளாஸாஹாரோ விவாத³ட்டா²னம் யுக³க்³கா³ஹோ அப்படினிஸ்ஸக்³கோ³ – அயம் வுச்சதி ‘‘பளாஸோ’’.

(3) இஸ்ஸா ச மச்ச²ரியஞ்ச

893. (க) தத்த² கதமா இஸ்ஸா? யா பரலாப⁴ஸக்காரக³ருகாரமானனவந்த³னபூஜனாஸு இஸ்ஸா இஸ்ஸாயனா இஸ்ஸாயிதத்தம் உஸூயா உஸூயனா உஸூயிதத்தம் – அயம் வுச்சதி ‘‘இஸ்ஸா’’.

(க²) தத்த² கதமம் மச்ச²ரியம்? பஞ்ச மச்ச²ரியானி – ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம். யம் ஏவரூபம் மச்சே²ரம் மச்ச²ராயனா மச்ச²ராயிதத்தம் வேவிச்ச²ம் கத³ரியம் கடுகஞ்சுகதா அக்³க³ஹிதத்தம் [பக்³க³ஹிதத்தம் (ஸீ. க.) த⁴. ஸ. 1127] சித்தஸ்ஸ – இத³ம் வுச்சதி ‘‘மச்ச²ரியம்’’.

(4) மாயா ச ஸாடே²ய்யஞ்ச

894. (க) தத்த² கதமா மாயா? இதே⁴கச்சோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா தஸ்ஸ படிச்சா²த³னஹேதும் பாபிகம் இச்ச²ம் பணித³ஹதி. ‘‘மா மம் ஜஞ்ஞா’’தி இச்ச²தி. ‘‘மா மம் ஜஞ்ஞா’’தி ஸங்கப்பேதி. ‘‘மா மம் ஜஞ்ஞா’’தி வாசம் பா⁴ஸதி. ‘‘மா மம் ஜஞ்ஞா’’தி காயேன பரக்கமதி. யா ஏவரூபா மாயா மாயாவிதா அச்சாஸரா வஞ்சனா நிகதி விகிரணா பரிஹரணா கூ³ஹனா பரிகூ³ஹனா சா²த³னா படிச்சா²த³னா அனுத்தானீகம்மம் அனாவிகம்மம் வோச்சா²த³னா பாபகிரியா – அயம் வுச்சதி ‘‘மாயா’’.

(க²) தத்த² கதமம் ஸாடே²ய்யம்? இதே⁴கச்சோ ஸடோ² ஹோதி பரிஸடோ². யம் தத்த² ஸட²ம் ஸட²தா ஸாடே²ய்யம் கக்கரதா கக்கரியம் [கக்க²ளதா கக்க²ளியம் (ஸ்யா.)] பரிக்க²த்ததா பாரிக்க²த்தியம் – இத³ம் வுச்சதி ‘‘ஸாடே²ய்யம்’’.

(5) அவிஜ்ஜா ச ப⁴வதண்ஹா ச

895. (க) தத்த² கதமா அவிஜ்ஜா? யம் அஞ்ஞாணம் அத³ஸ்ஸனம்…பே… அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜா’’.

(க²) தத்த² கதமா ப⁴வதண்ஹா? யோ ப⁴வேஸு ப⁴வச்ச²ந்தோ³ ப⁴வராகோ³ ப⁴வனந்தீ³ ப⁴வதண்ஹா ப⁴வஸினேஹோ ப⁴வபரிளாஹோ ப⁴வமுச்சா² ப⁴வஜ்ஜோ²ஸானம் – அயம் வுச்சதி ‘‘ப⁴வதண்ஹா’’.

(6) ப⁴வதி³ட்டி² ச விப⁴வதி³ட்டி² ச

896. (க) தத்த² கதமா ப⁴வதி³ட்டி²? ‘‘ப⁴விஸ்ஸதி அத்தா ச லோகோ சா’’தி – யா ஏவரூபா தி³ட்டி² தி³ட்டி²க³தம்…பே… விபரியாஸக்³கா³ஹோ – அயம் வுச்சதி ‘‘ப⁴வதி³ட்டி²’’.

(க²) தத்த² கதமா விப⁴வதி³ட்டி²? ‘‘ந ப⁴விஸ்ஸதி அத்தா ச லோகோ சா’’தி – யா ஏவரூபா தி³ட்டி² தி³ட்டி²க³தம்…பே… விபரியாஸக்³கா³ஹோ – அயம் வுச்சதி விப⁴வதி³ட்டி².