(2) அட்ட² குஸீதவத்தூ²னி

953. தத்த² கதமானி அட்ட² குஸீதவத்தூ²னி?

(க) இத⁴ பி⁴க்கு²னா கம்மம் காதப்³ப³ம் ஹோதி. தஸ்ஸ ஏவம் ஹோதி – ‘‘கம்மம் கோ² மே காதப்³ப³ம் ப⁴விஸ்ஸதி. கம்மம் கோ² பன மே கரோந்தஸ்ஸ காயோ கிலமிஸ்ஸதி. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் பட²மம் குஸீதவத்து².

(க²) புன சபரம் பி⁴க்கு²னா கம்மம் கதம் ஹோதி. தஸ்ஸ ஏவம் ஹோதி – ‘‘அஹம் கோ² கம்மம் அகாஸிம். கம்மம் கோ² பன மே கரோந்தஸ்ஸ காயோ கிலந்தோ. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் து³தியம் குஸீதவத்து².

(க³) புன சபரம் பி⁴க்கு²னா மக்³கோ³ க³ந்தப்³போ³ ஹோதி. தஸ்ஸ ஏவம் ஹோதி – ‘‘மக்³கோ³ கோ² மே க³ந்தப்³போ³ ப⁴விஸ்ஸதி. மக்³க³ம் கோ² பன மே க³ச்ச²ந்தஸ்ஸ காயோ கிலமிஸ்ஸதி. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் ததியம் குஸீதவத்து².

(க⁴) புன சபரம் பி⁴க்கு²னா மக்³கோ³ க³தோ ஹோதி. தஸ்ஸ ஏவம் ஹோதி – ‘‘அஹம் கோ² மக்³க³ம் அக³மாஸிம். மக்³க³ம் கோ² பன மே க³ச்ச²ந்தஸ்ஸ காயோ கிலந்தோ. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் சதுத்த²ம் குஸீதவத்து².

(ங) புன சபரம் பி⁴க்கு² கா³மம் வா நிக³மம் வா பிண்டா³ய சரந்தோ ந லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ ஏவம் ஹோதி – ‘‘அஹம் கோ² கா³மம் வா நிக³மம் வா பிண்டா³ய சரந்தோ நாலத்த²ம் லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ மே காயோ கிலந்தோ அகம்மஞ்ஞோ. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் பஞ்சமம் குஸீதவத்து².

(ச) புன சபரம் பி⁴க்கு² கா³மம் வா நிக³மம் வா பிண்டா³ய சரந்தோ லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ ஏவம் ஹோதி – ‘‘அஹம் கோ² கா³மம் வா நிக³மம் வா பிண்டா³ய சரந்தோ அலத்த²ம் லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ மே காயோ கிலந்தோ அகம்மஞ்ஞோ மாஸாசிதம் மஞ்ஞே. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் ச²ட்ட²ம் குஸீதவத்து².

(ச²) புன சபரம் பி⁴க்கு²னோ உப்பன்னோ ஹோதி அப்பமத்தகோ ஆபா³தோ⁴. தஸ்ஸ ஏவம் ஹோதி – ‘‘உப்பன்னோ கோ² மே அயம் அப்பமத்தகோ ஆபா³தோ⁴. அத்தி² கப்போ நிபஜ்ஜிதும். ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் ஸத்தமம் குஸீதவத்து².

(ஜ) புன சபரம் பி⁴க்கு² கி³லானா வுட்டி²தோ [கி³லானவுட்டி²தோ (ஸத்³த³னீபி⁴) அ. நி. 6.16 பாளியா டீகா பஸ்ஸிதப்³பா³] ஹோதி அசிரவுட்டி²தோ கே³லஞ்ஞா. தஸ்ஸ ஏவம் ஹோதி – ‘‘அஹம் கோ² கி³லானா வுட்டி²தோ அசிரவுட்டி²தோ கே³லஞ்ஞா. தஸ்ஸ மே காயோ து³ப்³ப³லோ அகம்மஞ்ஞோ. ஹந்தா³ஹம் நிபஜ்ஜாமீ’’தி. ஸோ நிபஜ்ஜதி; ந வீரியம் ஆரப⁴தி அப்பத்தஸ்ஸ பத்தியா, அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாய. இத³ம் அட்ட²மம் குஸீதவத்து². இமானி அட்ட² குஸீதவத்தூ²னி.