4. சதுக்கனித்³தே³ஸோ

(1) சத்தாரோ ஆஸவா

937. தத்த² கதமே சத்தாரோ ஆஸவா? காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோ.

(க) காமாஸவோ

தத்த² கதமோ காமாஸவோ? யோ காமேஸு காமச்ச²ந்தோ³ காமராகோ³ காமனந்தீ³ காமதண்ஹா காமஸினேஹோ காமபரிளாஹோ காமமுச்சா² காமஜ்ஜோ²ஸானம் – அயம் வுச்சதி ‘‘காமாஸவோ’’.

(க²) ப⁴வாஸவோ

தத்த² கதமோ ப⁴வாஸவோ? யோ ப⁴வேஸு ப⁴வச்ச²ந்தோ³…பே… ப⁴வஜ்ஜோ²ஸானம் – அயம் வுச்சதி ‘‘ப⁴வாஸவோ’’.

(க³) தி³ட்டா²ஸவோ

தத்த² கதமோ தி³ட்டா²ஸவோ? ‘‘ஸஸ்ஸதோ லோகோ’’தி வா, ‘‘அஸஸ்ஸதோ லோகோ’’தி வா, ‘‘அந்தவா லோகோ’’தி வா, ‘‘அனந்தவா லோகோ’’தி வா, ‘‘தம் ஜீவம் தம் ஸரீர’’ந்தி வா, ‘‘அஞ்ஞம் ஜீவம் அஞ்ஞம் ஸரீர’’ந்தி வா, ‘‘ஹோதி ததா²க³தோ பரம் மரணா’’தி வா, ‘‘ந ஹோதி ததா²க³தோ பரம் மரணா’’தி வா, ‘‘ஹோதி ச ந ச ஹோதி ததா²க³தோ பரம் மரணா’’தி வா, ‘‘நேவ ஹோதி ந ந ஹோதி ததா²க³தோ பரம் மரணா’’தி வா. யா ஏவரூபா தி³ட்டி² தி³ட்டி²க³தம்…பே… விபரியாஸக்³கா³ஹோ – அயம் வுச்சதி ‘‘தி³ட்டா²ஸவோ’’. ஸப்³பா³பி மிச்சா²தி³ட்டி² தி³ட்டா²ஸவோ.

(க⁴) அவிஜ்ஜாஸவோ

தத்த² கதமோ அவிஜ்ஜாஸவோ? து³க்கே² அஞ்ஞாணம், து³க்க²ஸமுத³யே அஞ்ஞாணம், து³க்க²னிரோதே⁴ அஞ்ஞாணம், து³க்க²னிரோத⁴கா³மினியா படிபதா³ய அஞ்ஞாணம், புப்³ப³ந்தே அஞ்ஞாணம், அபரந்தே அஞ்ஞாணம், புப்³ப³ந்தாபரந்தே அஞ்ஞாணம், இத³ப்பச்சயதா படிச்சஸமுப்பன்னேஸு த⁴ம்மேஸு அஞ்ஞாணம். யம் ஏவரூபம் அஞ்ஞாணம் அத³ஸ்ஸனம்…பே… அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜாஸவோ’’. இமே சத்தாரோ ஆஸவா.

(2-5) சத்தாரோ க³ந்தா²தீ³

938. தத்த² கதமே சத்தாரோ க³ந்தா² …பே… சத்தாரோ ஓகா⁴…பே… சத்தாரோ யோகா³…பே… சத்தாரி உபாதா³னானி? காமுபாதா³னம், தி³ட்டு²பாதா³னம், ஸீலப்³ப³துபாதா³னம், அத்தவாது³பாதா³னம்.

(க) காமுபாதா³னம்

தத்த² கதமம் காமுபாதா³னம்? யோ காமேஸு காமச்ச²ந்தோ³…பே… காமஜ்ஜோ²ஸானம் – இத³ம் வுச்சதி ‘‘காமுபாதா³னம்’’.

(க²) தி³ட்டு²பாதா³னம்

தத்த² கதமம் தி³ட்டு²பாதா³னம்? ‘‘நத்தி² தி³ன்னம், நத்தி² யிட்ட²ம்…பே… யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’’தி. யா ஏவரூபா தி³ட்டி² தி³ட்டி²க³தம்…பே… விபரியாஸக்³கா³ஹோ – இத³ம் வுச்சதி ‘‘தி³ட்டு²பாதா³னம்’’. ட²பேத்வா ஸீலப்³ப³துபாதா³னஞ்ச அத்தவாது³பாதா³னஞ்ச ஸப்³பா³பி மிச்சா²தி³ட்டி² தி³ட்டு²பாதா³னம்.

(க³) ஸீலப்³ப³துபாதா³னம்

தத்த² கதமம் ஸீலப்³ப³துபாதா³னம்? இதோ ப³ஹித்³தா⁴ ஸமணப்³ராஹ்மணானம் ஸீலேன ஸுத்³தி⁴ வதேன ஸுத்³தி⁴ ஸீலப்³ப³தேன ஸுத்³தீ⁴தி. யா ஏவரூபா தி³ட்டி² தி³ட்டி²க³தம்…பே… விபரியாஸக்³கா³ஹோ – இத³ம் வுச்சதி ‘‘ஸீலப்³ப³துபாதா³னம்’’.

(க⁴) அத்தவாது³பாதா³னம்

தத்த² கதமம் அத்தவாது³பாதா³னம்? இத⁴ அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ – ரூபம் அத்ததோ ஸமனுபஸ்ஸதி ரூபவந்தம் வா அத்தானம் அத்தனி வா ரூபம் ரூபஸ்மிம் வா அத்தானம். வேத³னம்…பே… ஸஞ்ஞம்…பே… ஸங்கா²ரே…பே… விஞ்ஞாணம் அத்ததோ ஸமனுபஸ்ஸதி விஞ்ஞாணவந்தம் வா அத்தானம் அத்தனி வா விஞ்ஞாணம் விஞ்ஞாணஸ்மிம் வா அத்தானம். யா ஏவரூபா தி³ட்டி² தி³ட்டி²க³தம்…பே… விபரியாஸக்³கா³ஹோ – இத³ம் வுச்சதி ‘‘அத்தவாது³பாதா³னம்’’. இமானி சத்தாரி உபாதா³னானி.

(6) சத்தாரோ தண்ஹுப்பாதா³

939. தத்த² கதமே சத்தாரோ தண்ஹுப்பாதா³? சீவரஹேது வா பி⁴க்கு²னோ தண்ஹா உப்பஜ்ஜமானா உப்பஜ்ஜதி, பிண்ட³பாதஹேது வா பி⁴க்கு²னோ தண்ஹா உப்பஜ்ஜமானா உப்பஜ்ஜதி, ஸேனாஸனஹேது வா பி⁴க்கு²னோ தண்ஹா உப்பஜ்ஜமானா உப்பஜ்ஜதி, இதிப⁴வாப⁴வஹேது வா பி⁴க்கு²னோ தண்ஹா உப்பஜ்ஜமானா உப்பஜ்ஜதி – இமே சத்தாரோ தண்ஹுப்பாதா³.

(7) சத்தாரி அக³திக³மனானி

தத்த² கதமானி சத்தாரி அக³திக³மனானி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி. யா ஏவரூபா அக³தி அக³திக³மனம் ச²ந்த³க³மனம் வக்³க³க³மனம் வாரிக³மனம் – இமானி சத்தாரி அக³திக³மனானி.

(8) சத்தாரோ விபரியாஸா

தத்த² கதமே சத்தாரோ விபரியாஸா? அனிச்சே ‘‘நிச்ச’’ந்தி ஸஞ்ஞாவிபரியாஸோ சித்தவிபரியாஸோ தி³ட்டி²விபரியாஸோ, து³க்கே² ‘‘ஸுக²’’ந்தி ஸஞ்ஞாவிபரியாஸோ சித்தவிபரியாஸோ தி³ட்டி²விபரியாஸோ, அனத்தனி ‘‘அத்தா’’தி ஸஞ்ஞாவிபரியாஸோ சித்தவிபரியாஸோ தி³ட்டி²விபரியாஸோ, அஸுபே⁴ ‘‘ஸுப⁴’’ந்தி ஸஞ்ஞாவிபரியாஸோ சித்தவிபரியாஸோ தி³ட்டி²விபரியாஸோ – இமே சத்தாரோ விபரியாஸா.

(9) சத்தாரோ அனரியவோஹாரா

தத்த² கதமே சத்தாரோ அனரியவோஹாரா? அதி³ட்டே² தி³ட்ட²வாதி³தா, அஸ்ஸுதே ஸுதவாதி³தா, அமுதே முதவாதி³தா, அவிஞ்ஞாதே விஞ்ஞாதவாதி³தா – இமே சத்தாரோ அனரியவோஹாரா.

(10) அபரேபி சத்தாரோ அனரியவோஹாரா

தத்த² கதமே அபரேபி சத்தாரோ அனரியவோஹாரா? தி³ட்டே² அதி³ட்ட²வாதி³தா, ஸுதே அஸ்ஸுதவாதி³தா, முதே அமுதவாதி³தா, விஞ்ஞாதே அவிஞ்ஞாதவாதி³தா – இமே சத்தாரோ அனரியவோஹாரா.

(11) சத்தாரி து³ச்சரிதானி

தத்த² கதமானி சத்தாரி து³ச்சரிதானி? பாணாதிபாதோ, அதி³ன்னாதா³னம், காமேஸுமிச்சா²சாரோ, முஸாவாதோ³ – இமானி சத்தாரி து³ச்சரிதானி.

(12) அபரானிபி சத்தாரி து³ச்சரிதானி

தத்த² கதமானி அபரானிபி சத்தாரி து³ச்சரிதானி? முஸாவாதோ³, பிஸுணா வாசா, ப²ருஸா வாசா, ஸம்ப²ப்பலாபோ – இமானி சத்தாரி து³ச்சரிதானி.

(13) சத்தாரி ப⁴யானி

தத்த² கதமானி சத்தாரி ப⁴யானி? ஜாதிப⁴யம், ஜராப⁴யம், ப்³யாதி⁴ப⁴யம், மரணப⁴யம் – இமானி சத்தாரி ப⁴யானி.

(14) அபரானிபி சத்தாரி ப⁴யானி

தத்த² கதமானி அபரானிபி சத்தாரி ப⁴யானி? ராஜப⁴யம், சோரப⁴யம், அக்³கி³ப⁴யம், உத³கப⁴யம் – இமானி சத்தாரி ப⁴யானி.

தத்த² கதமானி அபரானிபி சத்தாரி ப⁴யானி? ஊமிப⁴யம், கும்பீ⁴லப⁴யம் [கும்பீ⁴ரப⁴யம், கும்பீ⁴ளப⁴யம் (?) (கும்ப⁴ + ஈர + அ = ப⁴ய)], ஆவட்டப⁴யம், ஸுஸுகாப⁴யம் – இமானி சத்தாரி ப⁴யானி.

தத்த² கதமானி அபரானிபி சத்தாரி ப⁴யானி? அத்தானுவாத³ப⁴யம், பரானுவாத³ப⁴யம், த³ண்ட³ப⁴யம், து³க்³க³திப⁴யம் – இமானி சத்தாரி ப⁴யானி.

(15) சதஸ்ஸோ தி³ட்டி²யோ

தத்த² கதமா சதஸ்ஸோ தி³ட்டி²யோ? ‘‘ஸயங்கதம் ஸுக²து³க்க²’’ந்தி ஸச்சதோ தே²ததோ தி³ட்டி² உப்பஜ்ஜதி, ‘‘பரங்கதம் ஸுக²து³க்க²’’ந்தி ஸச்சதோ தே²ததோ தி³ட்டி² உப்பஜ்ஜதி, ‘‘ஸயங்கதஞ்ச பரங்கதஞ்ச ஸுக²து³க்க²’’ந்தி ஸச்சதோ தே²ததோ தி³ட்டி² உப்பஜ்ஜதி, ‘‘அஸயங்காரம் அபரங்காரம் அதி⁴ச்சஸமுப்பன்னம் ஸுக²து³க்க²’’ந்தி ஸச்சதோ தே²ததோ தி³ட்டி² உப்பஜ்ஜதி – இமா சதஸ்ஸோ தி³ட்டி²யோ.

சதுக்கம்.