3. நாமே

படிஜானிஸ்ஸந்தீதி வத்தமானே அனாக³தவசனம், படிஜானந்தீதி அத்தோ². இதரம்பன பூ⁴தே ப⁴விஸ்ஸதீதி ஆஸி, கரிஸ்ஸதீதி அகரி, சேதே ஸ்ஸஸீதி சேதிதா அஸி, பு⁴ஞ்ஜிஸ்ஸஸீதி பு⁴ஞ்ஜிதா அஸி. அனோகப்பனா அஸ்ஸத்³தா⁴. அமரிஸனம் அக்க²மா. இமினாவாதி அத்தி²வசனே உபபதே³ கோதா⁴ ஸத்³தா⁴ஸு க³ம்மமானேஸ்வ-ஸதீபி வசனந்தரே இமினாவ ஸாமஞ்ஞவசனேன ஸித்³த⁴ந்தி அத்தோ². க³ரஹாவமாதி தஸ்ஸ ஹேதுவசனம். ததா²ஹிச்சாதி³னா க³ரஹாவக³மமேவ ஸமத்தே²தி. அத்தி²னாம ஈதி³ஸந்தி [அத்தி²னாமாதி (போத்த²கே)] ஆபி⁴தோ³ஸிகஸ்ஸ கும்மாஸஸ்ஸ பரிபு⁴ஞ்ஜனம் விஜ்ஜதே நாமாதி அத்தோ². விஜ்ஜமானம்பி தம் அஸத்³த³ஹந்தோ அமரிஸந்தோ ஏவம் வத³தி. நத்தீ²தி மஞ்ஞேதி அதி⁴ப்பாயோ, தேனாஹ- ‘பச்சக்க²மபீ’தி [ஈதி³ஸம்பீதி] ஆதி³. யோபீதி ஸத்³த³ஸ்ஸ ஸோபீதி தஸத்³தே³ன ஸம்ப³ந்தோ⁴ வேதி³தப்³போ³. அத்தீ²தி விஜ்ஜமானத்தே²தி வுத்தவிஜ்ஜமானத்தோ² வக்க²மானபக்க²த்தயேபி த³ட்ட²ப்³போ³.

நனு அத்தி²னாம தாதாதி ஏத்தகே வுத்தே பட²மோ அத்தி²னுகோ²ச்சாதி³கோ நிஸீதி³த்வாதி ஸத்³த³பரியந்தோ ச, து³தியோ அத்தி²னுகோ²ச்சாதி³கோ நிஸீதி³த்வாதி ஸத்³த³பரியந்தோ ச ததியோ அத்தி²மஞ்ஞேச்சாதி³கோ ஜிகு³ச்ச²னேய்யந்தி ஸத்³த³பரியந்தோ ச வசனப்பப³ந்தோ⁴ கத²ம் லப்³ப⁴தீதி மனஸி நிதா⁴யாஹ- ‘ஸோபனா’திஆதி³. இமினாதி ‘அத்தி²யேவிஹாபி நிந்தா³வக³மோ’தி வசனேன. டா²னபோ⁴ஜனே க³ரஹதீதி ஸம்ப³ந்தோ⁴. வுத்தம் ஸக்கதானுஸாரேன. நிஸ்ஸாயனிஸ்ஸாயாதி யத்த² ப⁴க³வா நிஸின்னோ தம் டா²னம் நிஸ்ஸாய நிஸ்ஸாய.