57. கத்த

நனுசாரம்பே⁴தி வுத்தம்- ‘கிரியாரம்பே⁴’தி கத²ந்தி ஆஹ- ‘ஸோசே’ச்சாதி³. ஸோ ச ஆரம்போ⁴. கிரியாயேவ ஆரம்போ⁴கிரியாரம்போ⁴ தஸ்மிம். கிரியாரம்பே⁴தி ஸாமஞ்ஞேன வுத்தத்தா கிரியத்த²விஸேஸனம் வா ஏதம்ஸியா பச்சயத்த²விஸேஸனம் வா உப⁴யதா²பி ந தோ³ஸோதி த³ஸ்ஸேதுமாஹ- ‘கிரியத்த²விஸேஸனம் சேத’ந்திஆதி³. பச்சயத்த²விஸேஸனபக்கே²பி ஸாமத்தி²யா ஆரம்பே⁴ கிரியத்த²ஸ்ஸாபி பவத்தீ ஹோதீதி த³ஸ்ஸேதுமாஹ- ‘கிரியத்த²ஸ்ஸாபி’ச்சாதி³. ஸாமத்தி²யம் த³ஸ்ஸேதி ‘ஸாமத்தி²யம்பனா’திஆதி³னா. அனந்தரஸுத்தேன யோ விஹிதோ க்தோ, ஸோபி ஸாமஞ்ஞேன வசனதோ பா⁴வகம்மேஸு ஆரம்பே⁴பி ஹோதீதி யோஜனா. ஸாமஞ்ஞேன வசனதோதி ‘‘க்தோ பா⁴வகம்மேஸூ’’தி (5-56) ஸாமஞ்ஞேன வசனதோ. பா⁴வகம்மேஸுசேதி ஏவம் ந வுத்தந்தி ‘யதா²பத்தஞ்சே’தி வத³தா வுத்திகாரேனேவம் ந வுத்தந்தி அத்தோ².

கஸ்மா ஏவம் ந வுத்தந்தி ஆஹ- ‘புப்³ப³ஸ்மிம் வியா’தி ஆதி³. அனியமுப்பத்தி ஸஞ்ஞாய ஸதி ஞாபனந்தி தன்னிஸேதே⁴துமாஹ- ‘புனப்³ப³சனதோ’திஆதி³. மாஸங்கீதி கம்மனி, தேனேவுப்பத்தீதி பட²மா. ஏவம் மஞ்ஞதே ‘‘பா⁴வகம்ம க³ஹணம் சாகாரேனானுகட்³டி⁴ய ‘பா⁴வகம்மேஸு சா’த்யனேன க்தேவிதீ⁴ய மானே இத³மாஸங்கீயதே ‘புப்³பே³னேவ ஸாமஞ்ஞேன ஸித்³தே⁴ புனப்³ப³சனா [புனப்³ப³சனம்] கிரியத்தா²னியமேன த்தஸ்ஸுப்பத்தீ’தி, யதா²பத்தஞ்சேதி ஹ்யுச்சமானே சகாரேன யதா²பத்தம்பி காரியமனுஞ்ஞாயதேதி புப்³பே³னேவ வசனேன பா⁴வகம்மேஸ்வாரம்பே⁴பி யதா²பத்தோ க்தோ ப⁴வதீதி விஞ்ஞாயதே’’தி. ஏவஞ்சரஹி பா⁴வகம்மேஸ்வாரம்பே⁴பி புப்³பே³னேவ ஸித்³த⁴த்தா ‘‘கத்தரிஆரம்பே⁴’’இச்சேவ வுச்சேய்ய கிம் சகாரேனே ச்சாஸங்கியாஹ- ‘பதா³னமவதா⁴ரண ப²லத்தா’ச்சாதி³.

நனுசாதி³பூ⁴தோ கிரியாக்க²ணோ ஆரம்போ⁴ நாம, ப³ஹூஹி கிரியாக்க²ணேஹி கடே பரிஸமத்தேயேவ பூ⁴தோ காலோ ச ப⁴வதீதி கிரியாப²லஸ்ஸாபரினிப்ப²ன்னத்தா வத்தமானோவ காலோதி தத்ரக்தோ ந பப்போதிச்சாஸங்கியாஹ- ‘கிரியாப²லஸ்ஸி’ச்சாதி³. கடேகதே³ஸஸ்ஸாபி கடத்தா தஸ்ஸ ச நிப்³ப³த்தத்தா பூ⁴தவசனிச்சா²தி பா⁴வோ. நனுசாதி³ஸூதே கிரியாக்க²ணகாலே கடோ நாபி⁴னிப்³ப³த்தோ, கடகாரணபூ⁴தா பீ³ரணாவ ஹி ததா³ ஸந்தி, ந ச தத³வத்தா² தே ஏவ கடோதி கத²ம் ‘பகதோ கடோ’தி பூ⁴தகாலேன பகதஸத்³தே³ன கடஸத்³த³ஸமானாதி⁴கரணத்தமிச்சாஹ- ‘ஆதி³பூ⁴தேனே’ச்சாதி³. தத்த² தஸ்மிம் விஸேஸே. பகத்தும் ஆரபி⁴, பகத்தும் ஆரபீ⁴யித்த², பஸோத்தும் ஆரபி⁴, பஸோத்தும் ஆரப⁴னந்தி அத்தே² த்தோ.