110. தா⁴ஸம்

ஸங்க்²யாவாசினோ ஸத்³தா³ ஸங்க்²யாஸத்³தே³ன க³ஹிதாதி ஆஹ- ‘அத்தே²’ச்சாதி³. பகாரோ த³ப்³ப³கு³ணதி⁴ஸயோபி அத்தி², தத்த² யதி³ ஸோபி க³ய்ஹேய்ய த³ப்³ப³ கு³ணானம் லிங்க³ஸங்க்²யாஹி யோகா³ தா⁴ப்பச்சயந்த(ம்பி தப்³பி³ஸயோயேவேதி) [சேத்த² (போத்த²கே] (பகாரவாசகலிங்க³ஸங்க்²யாஹி யோகா³) அலிங்க³மஸங்க்²யஞ்ச [தா⁴ப்பச்சயந்தமலிங்க³மஸங்க்²யஞ்ச-இதி காஸிகாவுத்திபஞ்ஜகாயம்] ந ஸியா, ஏவஞ்ச ஸத்யப்³யயத்தமபி⁴மதந்தஸ்ஸ ந ஸியா, தஞ்சிட்ட²ம், கிரியாவிஸயே து தஸ்மிம் க³ய்ஹமானே ஏகதா⁴பு⁴ஞ்ஜதி த்³விதா⁴பு⁴ஞ்ஜதி த்³விதா⁴க³ச்ச²திச்சாதோ³ போ⁴ஜன க³மனாதி³கிரியாய ஸப்³ப³தா² லிங்க³ஸங்க்²யாஹி யோகா³பா⁴வா யதா²வுத்த தோ³ஸோ ந ஸியாதி பாணினீயவுத்திகாரேன ஜயாதி³ச்சேன கிரியா விஸயோயேவேத்த² பகாரோ க³ஹிதோ. தம்பதி ஆஹ- ‘த³ப்³பே³’ச்சாதி³. கஸ்மா பனேவமாஹாதி ஆஹ- ‘நவதா⁴த³ப்³ப³’மிச்சாதி³. ‘‘நவதா⁴ த³ப்³ப³ம், ப³ஹுதா⁴ கு³ணோ’’தி வேஸேஸிகானம் ஸங்கேதோ.

தத்த² புத²ப்³யாபோதேஜோவாய்வாகாஸகாலதி³ஸாத்தமனானீதி நவ த³ப்³பா³னி. ரூப ரஸ க³ந்த⁴ ப²ஸ்ஸ ஸங்க்²யாபரிமாண புது²த்தஸம்யோக³விபா⁴க³ பரத்தாபரத்தபு³த்³தி⁴ஸுக²து³க்கே²ச்சா²தோ³ஸபயதனா ச கு³ணா, சஸத்³தே³ன கு³ருத்த த³வத்தஸினேஹஸங்கா²ரத⁴ம்மாத⁴ம்மஸத்³தா³ சேதி சதுப்³பீ³ஸதி ப³ஹுதா⁴ கு³ணோ. அத்ராபி யதா²வுத்தகாஸிகாவுத்தியா பஞ்சிகாகாரேன ஜினிந்த³பு³த்³தி⁴னா நவதா⁴ த³ப்³ப³ம் ப³ஹுதா⁴ கு³ணோத்யத்ராபி ‘‘கிரியாஜ்ஜா²ஹரிதப்³பா³ நவதா⁴ த³ப்³ப³ம் ப³ஹுதா⁴ கு³ணோ உபதி³ஸீயதி விஞ்ஞாயதி ப்³யாக்²யாயதே விஜ்ஜதேவா’’தி கிரியாவிஸயோயேவ பகாரோ படிபாதி³தோ, பயோக³த³ஸ்ஸனதோ ப்³யவச்சே²ஜ்ஜபா⁴வா ஸப்³ப³த்த² கிரியேவேதி விஸேஸனோபாதா³னமயுத்தந்தி ஸம்ப³ந்தோ⁴.

நவதா⁴ த³ப்³ப³ம் ப³ஹுதா⁴ கு³ணோதி பயோக³த³ஸ்ஸனதோ த³ப்³ப³கு³ணவிஸயானம்பகாரானம் க³ய்ஹுபக³த்தா ப்³யவச்சே²த³யிதப்³பா³னம் த³ப்³ப³கு³ணவிஸயானம்பகாரானம் பா⁴வா ஸப்³ப³ஸ்மிம் த³ப்³ப³கு³ணவிஸயே ஜினிந்த³பு³த்³தி⁴னா வுத்தனயேன கிரியா அத்தே²வாதி கிரியாவிஸயோவ பகாரோ க³ய்ஹதீதி வுத்திகார பஞ்ஜிகாகாரானம் விஸேஸனோபாதா³னமயுத்தந்தி அத்தோ².

ததோயேவாதி யதோ விஸேஸனோபாதா³னமயுத்தம் ததோயேவ த்³வீஹிச்சாதி³கமாஹேதி அத்தோ². அயமேத்தா²தி⁴ப்பாயோ ‘‘த்³விதா⁴ கரோதீதி கிரியாபயோகே³பி பகாரோ த³ப்³ப³கு³ணவிஸயோ… த³ப்³ப³விஸயஸ்ஸ கு³ணவிஸயஸ்ஸ வா த்³விதா⁴பா⁴வஸ்ஸ கரீயமானத்தா, நது கிரியாவிஸயோ… த்³விதா⁴பா⁴வஸ்ஸ கரணகிரியாவிஸயஸ்ஸேத்த² வத்துமனிச்சி²தத்தா. ததோயேவ கிரியாபகாரோபாதா³னே [பகாரோதிஸயனே (போத்த²கே)] அத்ர தா⁴ப்பச்சயந்தப்பயோகோ³ ந ஸியாதி விஞ்ஞாபேதும் ‘த்³வீஹி’ச்சாதி³கமாஹே’’தி தேனாஹ‘அத்ரே’ச்சாதி³.

த³ப்³ப³கு³ணவிஸயே பகாரே க³ய்ஹமானே யோயம் தோ³ஸோ ஸம்பா⁴விதோ பரேஹி, தம் தா³னி நிராகத்துமாஹ ‘ஸதிபிசே’ச்சாதி³. ஸபா⁴வதோ அலிங்க³மஸங்க்²யஞ்சாதி ஸம்ப³ந்தோ⁴, ஸங்க்²யந்தராபாத³னே க³ம்யமானே தா⁴ப்பச்சயோ விஹிதோ பாணினியேஹி, ததா³ஹ- ‘த³ப்³ப³ஸ்ஸே’ச்சாதி³ ஸங்க்²யாந்தராபாத³னேபீதி புப்³ப³ம் யா வவத்தி²தா ஸங்க்²யா, ததோ- ஞ்ஞம் ஸங்க்²யாந்தரம் தஸ்ஸாபாத³னம் கரணம் ஸங்க்²யந்தராபாத³னம், தஸ்மிம்பீதி அத்தோ².