1. ணோ வாபச்சே

நனு ச ‘ணோ வாபச்சே’தி வசனதோ கத²ம் பகதிவிஸயாவக³மோ ஸியா. யதா²கத²ஞ்சி பகதிவிஸயாவக³மேபி ஸாமஞ்ஞவசனதோ பன த⁴ம்மேனாபச்சந்த்யாதோ³ யதோ குதோசி த⁴ம்மேனிச்சாதி³தோபி ஸியா ணா தி³பச்சயோத்யாஸங்கியாஹ ‘அபச்சவதா’ச்சாதி³. அபச்சஸ்ஸாதி அபச்சத்த²ஸ்ஸ, அபச்சவதாதி ‘‘ணோ வாபச்சே’’தி வஸிட்டா²த்³யத்த²ஸ்ஸேவ பரிக்³க³ஹணாய ஸாமஞ்ஞவசனதோ யோ அபச்சவா ததோ, அத்த²தோ பன அஸம்ப⁴வா த³ப்³பா³சகஸத்³தா³வ ஸாமத்தி²யேன ச²ட்டி²யந்தா ஸப்³ப³லிங்க³வசனா ஜாயதேதி விஞ்ஞாதப்³ப³ம். த⁴ம்மஸ்மாபச்சம்த்யாதீ³ஸு ணாதி³ப்பச்சயோ (ந ஜாயதே) தி ஸம்ப³ந்தோ⁴.

த⁴ம்மேனாதி த⁴ம்மேன கரணபூ⁴தேன. த⁴ம்மாயாதி த⁴ம்மத்த²ம், த⁴ம்மஸ்மாதி த⁴ம்மஹேதுனா, ததோ அஸம்ப⁴வே காரணமாஹ ‘ஸாபேக்க²த்தா’தி. ஸாபேக்க²த்தமேவ ஸமத்தே²தி ‘அபச்சவாஹி’ச்சாதி³னா, த⁴ம்மேனாபச்சம் கஸ்ஸாதி புச்சி²த்வா தே³வத³த்தஸ்ஸாதி அபேக்கி²யமானம் வத³தி. தே³வத³த்தஸ்ஸாதி அபச்சவா தே³வத³த்தாதி³ அபேக்கீ²யதேதி ஸம்ப³ந்தோ⁴, ஹிஸத்³தோ³ ஹேதும்ஹி. ந ஹேத்த² ணாதி³வுத்தி அஞ்ஞத்த² [நஹேதகாமந்தத்த² (போத்த²கே)] ஸாபேக்க²த்தா கம்ப³லோ வஸிட்ட²ஸ்ஸாபச்சம் தே³வத³த்தஸ்ஸாதி ஏத்த² பன வஸிட்டோ²-பச்சவாதி ததோ ச²ட்டி²யந்தா ஹோதிச்சாஸங்கியாஹ- ‘ந சே’ச்சாதி³. ந ச ஹோதீதி ஸம்ப³ந்தோ⁴.

காரணமாஹ- ‘அஸம்ப³ந்தா⁴’தி. ந ஹேத்த² ஸம்ப³ந்தோ⁴ வஸிட்ட²ஸ்ஸ கம்ப³லாபேக்க²த்தேன அபச்சஸ்ஸ ச தே³வத³த்தாபேக்க²த்தேனாத்த²ந்தராபேக்கா²ய வஸிட்ட²ஸ்ஸாபச்சேன ஸம்ப³ந்தா⁴பா⁴வாயேவ வஸிட்ட²ஸ்ஸ அபச்சம் வாஸிட்டோ²தி ணாதி³வுத்தியா பா⁴வே ஸாமத்தி²யம் நத்தி², ஸமத்த²ஞ்ஹி வஸிட்ட²ம் ராஜபுரிஸாதி³ ஸமாஸவுத்தியமேகத்த²த்தமிவ வாஸிட்டா²தி³ணாதி³வுத்தியம் ணாதி³ப்பச்சயமுபஜனயதி, நாஸமத்த²ம், ததோ ஸப்³ப³மேவேதம்மனஸி நிதா⁴ய வுத்தம்- ‘அஸம்ப³ந்தா⁴’தி.

யதி³ பனேத்த² ணாதி³ப்பச்சயோ ஸப்³ப³தா² ஸம்ப³ந்த⁴மபேக்க²தே, ததா³ விஸேஸதோ யஸ்ஸாபச்சேன ஸம்ப³ந்தோ⁴ ததோவ ஜனகதோ ஸோ ஸியாதி த³ஸ்ஸேதுமாஹ- ‘யஜ்ஜேவ’மிச்சாதி³.

யோ ஜனகோதி யோயோ யஸ்ஸ யஸ்ஸ அபச்சஸ்ஸ ஜனகோ. ததோயேவாதி தஸ்மாதஸ்மா ஜனகதோயேவ. ஸியாதி தஸ்மிம் தஸ்மிம் அபச்சத்தே² ணாதி³ப்பச்சயோ ஸியா. தத்த² ஹேதுமாஹ- ‘தஸ்ஸேவாபச்சேன யோகா³’தி. யோகா³தி அபச்சஸம்ப³ந்த⁴தோ, ந மூலப்பகதிதோதி பரமப்பகதிதோ ந ஹோதீதி வுத்தம் ஹோதி. ஹேதுமாஹ- ‘அயோகா³,தி, வசனாபா⁴வம்பேத்த² த³ஸ்ஸேதும் சே’த்யாதி³ வுத்தம்.

வசனந்தி ஸுத்தம், ஸம்ப³ந்தா⁴பா⁴வா (தாதி³ஸவசனாபா⁴வா) ச மூலப்பகதிதோ ணாதி³ப்பச்சயஸ்ஸாபா⁴வம் த³ஸ்ஸேத்வா இதா³னி மூலப்பகதிதோவாஸ்ஸாபி⁴மதபா⁴வம் த³ஸ்ஸேதும் ‘மூலப்பகதிதோ’ச்சாதி³ வுத்தம்.

கத²ம்பனித³ம் விஞ்ஞாயதிச்சாதி³னா ஜனகஸ்ஸேவாப்³யாஹிதஸ்ஸாபச்சேன முக்²ய ஸம்ப³ந்த⁴மானீய இத³மயுத்தந்த்யாதி³னா ப்³யவஹிதஜனிதஸ்ஸாப்யபச்சயஸ்ஸ பரமப்பகதியாபி⁴ஸம்ப³ந்த⁴ஸப்³பா⁴வம் வத்வா தம் ஸாத⁴யிதுமாரப⁴தே ‘கத²’மிச்சாதி³, ஏவம் ஹிச்சாதி³ கத²ம்பனித³மிச்சாதி³னா யதா²வுத்தஸ்ஸ ஸமத்த² நவாக்யம், ஹியஸ்மா தம் தி³ஸ்வா ததா² புச்சி²தோ தே³வத³த்தஸ்ஸவாதிஆதி³னா உப்பாதே³தாரமேவ நித்³தி³ஸதி, நாத்தானம் பிதாமஹோ, தஸ்மா உப்பாதே³தாயேவாபச்சேன ஸம்ப³ஜ்ஜ²தி ந பிதாமஹோதி யோஜேத்வா அதி⁴ப்பாயோ வேதி³தப்³போ³. இத³ம் யதா²வுத்தமுப்பாதே³துனித்³தி³ஸனம், தேன அபச்சேன ஸத்³தி⁴ம் உப்பாதே³துயேவ ஜனகஸ்ஸேவ யோகோ³ ஸம்ப³ந்தோ⁴ படிபாதே³தும் ந ஸக்காதி ஸம்ப³ந்தோ⁴.

தந்திதம் [தத்த²-இதி (பஞ்சிகாயம்)] புச்சா²னிமித்தம், தேனாதி அபச்சேன. அபதனந்தி நரகே அபதனம் ப⁴வதி, ஸோதி யோஸோ யஸ்ஸாத்யனியமனித்³தி³ட்டோ² ஸோ ஞாதும் ந இச்சி²தோதி ஸம்ப³ந்தோ⁴. இமினா இத³ம் தீ³பேதி- ‘‘நபதத்யனேன நரகேத்யபச்சந்தி வுச்சதி அபச்சேனானேன யஸ்ஸகஸ்ஸசி அவிஸேஸேனாபதனம்ப⁴வதி நரகே ஸோஸோ தாய புச்சா²ய ஞாதும் ந இச்சி²தோ’’தி. ஸோ வாதி கஸ்ஸாயம் புத்தோதி புச்சா²யானுரோத⁴னே ஸோ உப்பாதே³தாயேவ ஞாதுமிச்சி²தோதி ஸம்ப³ந்தோ⁴. துஸத்³தோ³ சேத்தா²பச்சேன நரகாபாதஸப்³ப³ ஜனஜானனிச்சா²விஸேஸஜோதகோ, யதி³ ஸியாதி ஸம்ப³ந்தோ⁴, அத்தானம்பி நித்³தி³ஸேய்ய ந கேவலமுப்பாதே³தாரம், அத்தி²ச்சாதி³ பிதாமஹஸ்ஸ அத்தனோபி நித்³தே³ஸே காரணவசனம், தம் அபச்சம் நிமித்தம் காரணம், யஸ்ஸ தம் தம்னிமித்தம் தஸ்மா [கத்வா (போத்த²கே)] ஏவம் தி³ட்டி²கோ ஹிச்சாதி³னா யதா²வுத்தம் ஸமத்தே²தி.

ப்³யவஹிதஜனிதேனாபீதி ப்³யவஹிதேன கத்துனா ஜனிதேனாபி, கரணே சாயம் ததியா, ஹேதும்ஹி வா. கஸ்மா ஏவம் தி³ட்டி²கோதி ஆஹ ‘யம் நிமித்தம் ஹி’ச்சாதி³. ஹிஸத்³தோ³ யஸ்மாத³த்தே². யஸ்ஸாதி புப்³ப³ஜஸ்ஸ, தேன அபச்சேன அபதனம் தத³பதனம் ததோ, இத³ம் வுத்தம் ஹோதி ‘‘தேன ப்³யவஹிதஜனிதேனாபி புமுனா புப்³ப³ஜோபி நரகம் ந பததி ஸோ புப்³ப³ஜஸ்ஸாப்ய பச்சம் ப⁴வதி யதா²வுத்தேன நிப்³ப³சனேனா’’தி. தஸ்மாச்சஸ்ஸ புப்³பே³ வுத்தயஸ்மாத்யனேனாபி⁴ஸம்ப³ந்தோ⁴ வேதி³தப்³போ³. உபபத்யந்தரமாஹ-‘உபசாரதோவே’ச்சாதி³. புப்³ப³ புப்³ப³பா⁴வே ஸதீதி புப்³ப³ஸ்ஸ புப்³ப³ஸ்ஸ விஜ்ஜமானத்தே ஸதி. ப்³யவஹிதேன ஜனிதே அபச்சேபி நிமித்தம் அபாயாபதகாரணபா⁴வோ அத்தி²யே வாதி ஸம்ப³ந்தோ⁴. கேஸந்தி ஆஹ-‘புப்³பே³ஸந்தி புப்³ப³ஜானந்தி அத்தோ², கே நாதி ஆஹ- ‘பாரம்பரியேனா’தி. அபே⁴தோ³பசாரேனாதி புப்³ப³புப்³ப³பா⁴வே ஸதிச்சாதி³னா வுத்தனயேன ஜனகஸ்ஸ விய பாரம்பரியேனபுப்³பே³ஸம்பினிமித்ததா வதோ ஜனகஸதி³ஸத்தா ஜனகாவ நாம தே ஸியுந்தி ஏவமபே⁴தே³ன உபசரணதோ சிந்தனதோதி அத்தோ². உப⁴யதா²தி ஞாயேன உபசாரேனசாதி உப⁴யேன பகாரேன, ஏவமுப⁴யதா²பி மூலப்பகதியா பச்சேனாபி⁴ஸம்ப³ந்தா⁴ கத²மனந்தர [மனந்தராதி³ (போத்த²கே) (தத்த²) போத்த²கே] ஜனிதேனாபச்சேனாதி³புரிஸஸம்ப³ந்தோ⁴யேன ததோ ணாதி³ப்பச்சயோ ஸியாதி நாஸங்க்னீயம்.

ததோ சாதி மூலப்பகதிதோ ச, அபச்சஸாமஞ்ஞவசனிச்சா²யந்தி இத்தி² புன்னபும்ஸகத்தவிஸேஸோபக்³கா³ஹி அபச்சஸாமஞ்ஞஸ்ஸ வசனிச்சா²யம்.

ஏவம்மூலகதிதோ- பச்சஸாமஞ்ஞேன ணாதி³ப்பச்சயம் வவத்த²பேத்வா இதா³னி அபச்சாதி³தோபி ஹோதேவ ணாதி³ ஸாமஞ்ஞவிதா⁴னா. ஸோ ச ப³ஹுலாதி⁴காரதோ கு³ருஜனாயத்தத்தா தன்னியோகா³சரணேன பஸத்தே² யேவாபச்சே ப்³யவஹிதஜனிதேபி இத்தி²வஜ்ஜிதே ஸியாதி த³ஸ்ஸேதுமாஹ ‘நத்தாதீ³ஹி’ச்சாதி³. ஸதியேவ கு³ருஜனே ஸப்பதா⁴னபா⁴வேன குச்சி²தே-பச்சேது நத்தாதீ³வுத்தீஹி வஸிட்டா²தீ³ஹி ணாதி³ப்பச்சயோ ஹோதி வாஸிட்டோ²திஆதி³, இத்தி²யஞ்ச ந ஹோதி வாஸிட்டீ²திஆதி³.

அத்த²தோதி ஸாமத்தி²யதோ. அபச்சே விதீ⁴யமானோ பச்சயோ அபச்சவதா ஜாயமானோ தஸ்ஸாபச்சந்தி அத்தே² ஜாயதி. ஸோசாய மத்த²விஸேஸோ ச²(ட்டி²யந்த) தாபா⁴வே கத²ம் ஸியாதி இத³மேத்த² ஸாமத்தி²யம். அனந்தரே வாபச்சே புத்தே-பி⁴தே⁴ய்ய நத்தாதோ³ வாபச்சே-பி⁴தே⁴ய்யாதி ஸஸம்ப³ந்தோ⁴. குதோசி அபச்சவதா நத்தாதோ³ ஏவ. இத³ஞ்ச ஸப்³ப³ம்ப³ஹுலவசனேவ ஸம்பஜ்ஜதீதி ஆஹ- ‘ப³ஹுலாதி⁴காரா’தி. அபச்சேதி ஏகவசனேன நித்³தே³ஸே புமுனா நபும்ஸகேன கரியதி, தேனே கஸ்மிம் யேவாபச்சே ஸியா, ந ப³ஹூஸு வஸிட்ட²ஸ்ஸாபச்சானி வாஸிட்டா²னி, ந சித்தி² வாஸிட்டா²னி, ந சித்தி²யம் வாஸிட்டீ²த்யாஸங்கியாஹ-‘இத³ஞ்சே’ச்சாதி³. இத³ஞ்ச அபச்சவசனஞ்ச. இமினா சேத்த² ததா² நிஸ்ஸயகரணம் த³ஸ்ஸேதி. தஸ்ஸ வசனிச்சா²பா⁴வதோதி தஸ்ஸ லிங்க³வசனஸ்ஸ ஸுத்தே வத்துமிச்சா²யாபா⁴வதோதி அத்தோ².

கிம் பன காரணம் ஸுத்தே லிங்க³வசனாவசனிச்சா²யம் தஸ்ஸாப்பதா⁴னத்தா யேனகேனசி லிங்கா³தி³னா நித்³தே³ஸோ-வஸ்ஸம் கத்தப்³போ³தி நானந்தரியகத்தா தஸ்ஸேஹோபாதா³னம், யதா²த⁴ஞ்ஞத்தி²னோபலாலாதி³னோப்யப்பதா⁴னஸ்ஸோபாதா³னந்தி. ததோயேவாஹ-‘உபலக்கீ²யஸ்ஸேத்த² பதா⁴னத்தா’ச்சாதி³. இத்தி²புமத்தயுத்தஜஞ்ஞவிஸேஸோ உபலக்கீ²யோ, அபச்சேதீத³முபலக்க²ணம், ஸயந்தி யதா²வுத்தமுபலக்க²ணம் ஸயம். காரியப்படிபத்தியாதி புமே நபும்ஸகேபச்சே-பி⁴தே⁴ய்யே விதி⁴ ஹோதிச்சேவம் காரியப்படிபத்தியா வத்தும் ந இட்ட²ம்.

வசனந்தரேபி அஞ்ஞஸ்மிம் வசனே. ஆணீதி ணிப்பச்சயஸுத்தம் வத³தி. அகோ³த்தாதி³தோதி யோகோ³த்தஸ்ஸாதி³பூ⁴தோ ந ஹோதி, ததோ, தேனேவ ‘‘ஆணீ’’தி ஸுத்தே (4-5) வக்க²தி-‘அகாரந்தமத்ததோவாயம்ணின கோ³த்தாதி³பூ⁴ததோ’தி. வாக்யஸமாஸாபீதி யதா²ஸங்க்²யேனாஹ. தஸ்மிம் அத்தே²தி தஸ்மிம் வாக்யோபத³ஸ்ஸிதே அத்தே², தந்தி வாக்யம். ஸமாஸவுத்திஞ்ச நிவத்தேய்யுந்தி ஸம்ப³ந்தோ⁴.

ஸதிபனாதி வாகாரே ஸதி து அனிச்சத்தா ணப்பச்சயஸ்ஸ. ஸோபீதி ஸமாஸோபி, ஸமாஸோதிஆதி³னா பக்க²ந்தரமாஹ. தேன வாக்யஸிஜ்ஜ²னேன. பக்கே² வாக்யஸமாஸாபி ஸியுந்தி பக்கே² ஸமாஸவுத்தியா ஏவ பா³தி⁴தத்தா பக்க²ந்தரே ணாதி³வுத்தி ந பா³தீ⁴யதீதி வாக்யவுத்தியோபி ஸியுந்தி அத்தோ².