1. த்³வேத்³வே

அவயவஸம்ப³ந்தே⁴தி ஸ்யாத்³யவயவீஸமுதா³யேன த்³வேத்³வேதி வுத்தானமவயவானம் ஸம்ப³ந்தே⁴, அதேத்த² வுத்யனுகூலாய பஞ்சிகாய வா ப⁴விதப்³ப³ம், பஞ்சிகானு கூலாய வுத்தியா வா, ந சேத்த² த்³வின்னமஞ்ஞோஞ்ஞானுகூலதா தி³ஸ்ஸதி, ததா²ஹி வுத்தியம்-‘ஏகானேகத்தே²ஸு வத்தமானதோ நாமஸ்மா’தி ஏத்தகமேவ பகதிவிஸேஸனவஸேன வுத்தம், பஞ்சிகாயந்து தப்³பி³ஸேஸன வஸேன ச பச்சயத்த²விஸேஸனவஸேன ச அத்தோ² த³ஸ்ஸிதோ, ததே³வ முபி⁴ன்னன்னாஞ்ஞமஞ்ஞானுகூலதா தி³ஸ்ஸதி, ததோ ஏத்த² யதா² த்³வின்னமஞ்ஞோஞ்ஞானுகூலதா ஸம்பஜ்ஜதி, ததா² ப்³யாசிக்கி²ஸ்ஸாம ‘‘யதி³ பனேத்த² வுத்யானுகூலா பஞ்சிகா ப⁴வேய்ய பச்சயத்த²பக்கோ² ஜஹிதப்³போ³ ஸியாதி ‘தே…பே… ஏகானேகத்தே²ஸு’தி ச, தேன…பே… யோஜனிய’ந்தி ச ஏதேஸம் ஜஹிதப்³ப³தாய ப³ஹுபாட²விலோபோ ஆபஜ்ஜதி, யதி³ பன பஞ்சிகானுகூலா வுத்தி ப⁴வேய்ய வுத்தியம் கிஞ்சிமத்தம் பக்கி²பிதப்³ப³ மத்தமேவ ஸியாதி ப³ஹுவிலோபாபத்தி (ந) ஹோதீதி ஏதேஸம் த்³வேத்³வே ஹோந்தி ஏகானே கத்தே²ஸு வத்தமானதோ நாமஸ்மா’தி வுத்தியா ப⁴விதப்³ப³’’ந்தி, ஏவஞ்ஹி ஸதி ஸத்த²ந்தரேனாபி ஸஹ க⁴டதே, ஸுத்தே ‘த்³வேத்³வேகானேகேஸு நாமஸ்மா’தி வுத்தத்தா ‘ஏகானேகேஸூ’தி இத³ம் பச்சயவிஸேஸனம் வா யுஜ்ஜதி

பகதிவிஸேஸனவஸேன வா யதே³தம் பச்சயவிஸேஸனம், ததா³ ஸாமத்தி²யா ஏகானேகேஸூதி பகதிவிஸேஸனம்பி லப்³ப⁴தி, தத்த² ஸாமத்தி²யமத்த² ப³லம், ததா²ஹ்யேகாதீ³ஸு ப⁴வந்தா பகதிவாச்சானமேவேகத்தாதி³அப்³யதி ரித்தஅத்த²மத்தாதீ³ரூபானம் ஜோதகா ஸ்யாத³யோ கத²மேகத்தாதீ³ஸு வத்தமானதோ நாமஸ்மா அஞ்ஞதோ ஸியுந்தி யதா²வுத்தனாமவிஸேஸாக்கே²போ, ததா² இத்தி²ணாதி³ப்பச்சயாதீ³னம்பி பன பகதிவிஸேஸானுபாதா³னேபி யதோ தா⁴த்வாதி³ வாச்சோத்தோ² நத்தி², ஸாமத்தி²யா ததோ, தா⁴துத்யாத்³யந்தேஹி [த்யாத்³யந்த வாச்சேஹி (போத்த²கே)] ந ஹோந்தே வித்திபச்சயா, ததா² ணாதி³பச்சயாபி… விப⁴த்யந்தா விதா⁴னதோ, யதே³தம்பகதிவிஸேஸனம் ததா³பி ஸாமத்தி²யேனேவ ஏகத்தாதீ³ஸு வத்தமானதோ நாமஸ்மா தஜ்ஜோதனாய ப⁴வந்தா ஸ்யாத³யோ கத²மஞ்ஞத்த² ஹோந்தி அஸம்ப⁴வாதி ஏகானேகேஸு த்³வேத்³வேதி லப்³ப⁴தி, அத²வா ஸரூபேன அவுத்தம்பி ஸாமத்தி²யேனேகானேகத்தே²ஸூதி க³ம்மமானம் வுத்தமேவ ஹோதீதி கத்வா‘தேசா’திஆதி³கம் வுத்தந்தி க³ஹேதப்³ப³ம், ஏகானேகேஸு வத்தமானதோ நாமஸ்மாதி கிமத்த²ம் அஸத்வபூ⁴தாய கிரியாயேகத்தாதி³ஸம்ப³ந்தா⁴பா⁴வா க்ரியத்தா²ச த்யாதீ³ஹி யேவேகத்தாதீ³னம் வுத்தத்தா த்யாத்³யந்தேஹி ச ந ப⁴வேய்யுந்தி பயோஜனந்தரமாஹ-‘யம்பனா’திஆதி³, பஞ்சகனாமத்த²ஸ்ஸாதி⁴ப்பேதபா⁴வோ சேத்த² பக்க²ஸ்ஸேதஸ்ஸேவ யுத்தத்தா. ததா²ஹி ஸங்க்²யாகம்மாத³யோ நாம வாச்சஸ்ஸ த³ப்³ப³ஸ்ஸ த⁴ம்மோ ஸகத்தோ²-பஸஜ்ஜனோ ச ஸத்³தோ³ த³ப்³பே³யேவ வத்ததே… த³ப்³பே³யேவான்யனயாதி³வோஹாரா, தத்த² த³ப்³ப³வாசினா ஸத்³தே³ன த³ப்³ப³த⁴ம்மானமப்³ப⁴ந்தரீகரணந்தி நாயுத்தமேதம் நாமேன பஞ்சன்னமபி⁴தா⁴னம், விப⁴த்தியோ பன ஜோதிகா, இத்தி²பச்சயா ச இத்தி²லிங்க³ஸ்ஸ, ததா² சாம்ஹேஹி வுத்தம் ஸம்ப³ந்த⁴சிந்தாயம்–

ஸத்³தோ³ ஸகத்த²ம் வத்வான, பத³த்த²ம் த³ப்³ப³ஸஞ்ஞிதம்;

ஸமவேதம் வதே³ லிங்க³ம், ஸங்க்²யம் கம்மாதி³கம்மி சேதி.

ஏகானேகேஸு ஸ்யாதீ³னம் யதா²க்கமம் த³ஸ்ஸேதும் ‘தேனா’திஆதி³ வுத்தம், தேனாதி யேன பஞ்சகோ நாமத்தோ² அதி⁴ப்பேதோ ஏகாதீ³ஸு ச அத்தே²ஸு ஜோ-தனீயேஸு ஸ்யாத³யோ விதி⁴யிஸ்ஸந்தி தேன, ஸப்³ப³த்தா²தி ‘அம்யோ’ஆதீ³ஸு ஸப்³ப³த்த², ஸபா⁴வதோத்யாதி³கஸ்ஸாயமதி⁴ப்பாயோ ‘‘யத்³யபி ஸ்யாத³யோ ஏகானேகேஸு ஹோந்தி ததா²பி ஏகாத³யோ ஸங்க்²யாய பரிச்சி²ன்னே அத்தே² வத்தந்தி ந ஸங்க்²யாமத்தே, ஸங்க்²யாய ஸம்ப⁴வாபா⁴வா ஸங்க்²யேயே ப⁴வதீதி ந ஸங்க்²யாபி ஸ்யாதீ³னமத்தோ²’’தி (ந) கேவலம் ஸகத்த² த³ப்³பா³தி³யேவ ஸ்யாதீ³னமத்தோ² ந ப⁴வதி, அபி து ஸங்க்²யாபீத்யபிஸத்³த³த்தோ², அனேன ஸங்க்²யா விப⁴த்யத்தோ² சதுக்கோ நாமத்தோ²த்யயம்பக்கோ² நிராகதோ பஞ்சகோ நாமத்தோ²தி த³ஸ்ஸனே ஸங்க்²யாகம்மாதீ³னம் விப⁴த்தியோ ஜோதிகா ஹோந்தி, திகோ நாமத்தோ²தி த³ஸ்ஸனே து ஸங்க்²யாகம்மாத³யோ விப⁴த்திவாச்சா ஹோந்தி, இதா³னி அதி⁴ப்பேதபஞ்சகனாமத்தே² ஸகத்தா²தி³கம் ஸரூபதோ த³ஸ்ஸேதும் ‘தத்தா²’திஆதி³மாஹ, தத்த² ஸகத்தோ² விஸேஸனந்தி ஸரூபாதி³ யம் கிஞ்சி விஸேஸனத்தேன வத்துமிச்சி²தம் தம் ஸகத்தோ² நாமதி அத்தோ², தம் த³ஸ்ஸேதி ‘ஸரூபஜாதிகு³ணத³ப்³பா³னி’தி.

ப³லேன யஸ்ஸா பி⁴ன்னேஸு, பவத்தந்தே க³கா³தீ³ஸு;

ஸா ஜாத்யபி⁴ன்னதீ⁴ஸத்³தா³, ஸுத்தம் புப்பே²ஸ்விவான்வீதம்.

த³ப்³பா³தா⁴ரோ ததோ பி⁴ன்னோ, நிமித்தம் தப்பதீதியா;

பா⁴வாபா⁴வஸபா⁴வோ யோ, ஸோ கு³ணோ நிக்³கு³ணோ மதோ.

ஸரூபம் ஸத்³த³ரூபம்வ, ஜாதியா யம் விஸேஸனம்;

விஸேஸீயதி யம்கிஞ்சி, த³ப்³ப³ம் தம் ஸமுதீ³ரிதம்.

இதா³னி ஸரூபாதி³னோ விஸேஸனஸ்ஸ ஸகத்த²பா⁴வம் ஜாத்யாதி³விஸேஸஸ்ஸ த³ப்³ப³பா⁴வஞ்ச த³ஸ்ஸேதும் ‘தத்தா²’திஆதி³மாஹ, ஸரூபே வத்ததே ஸத்³தோ³தி வியபே⁴தோ³பசாரேனாஹ-‘ஸத்³த³ஸ்ஸ ஸரூபேனா’தி, ஏத்த² பன கோ³தி ஜாதிமத்தவாசினி கோ³ஸத்³தே³ பயுத்தே கோ³ஸத்³தோ³ ஜாதிமத்தமாஹேதி ஸோ ஜாதிம் விஸேஸேதி நாம. யட்டி²ஆதி³ஸத்³தே³ஹி யட்டி²ஆதி³ஸஹசரிதா உபசாரதோ க³ஹிதாதி யட்டி²ஆதி³த³ப்³பே³ஹி யட்டி²ஆதி³ஸஹசரிதா புரிஸா விஸேஸீயந்தீதி ஆஹ-‘த³ப்³ப³ம்பி த³ப்³ப³ந்தரஸ்ஸ விஸேஸனபூ⁴தம்ப⁴வதீ’தி, யட்டி²யோபவேஸயாதி யட்டி²ஸத்³த³வசனீய யட்டி²த³ப்³ப³விஸிட்டே² புரிஸே பவேஸயாதி அத்தோ², குந்தேபவேஸயாதி ஏத்தா²பி ஏஸேவனயோ, யதா²வுத்தசதுப்³பி³த⁴ஸகத்த²தோ பரோபி அத்தி² ஸகத்தோ²தி ஆஹ-‘கத்த²சீ’திஆதி³, ஸம்ப³ந்த⁴னிமித்தோதி ஸம்ப³ந்தோ⁴ நிமித்தம் காரணம் பச்சயப்பவத்தியா அஸ்ஸ பச்சயஸ்ஸ ஸோதி ஸமாஸோ, ஏத்த² ஹி த³ண்டோ³ அஸ்ஸ அத்தீ²தி அஸ்ஸாதி ஸாமினோ புரிஸஸ்ஸ ஸம்ஸங்கா²தத³ண்டா³தி³த³ப்³பே³ன ஸஹயோ ஸஸ்ஸாமிஸம்ப³ந்தோ⁴, ஸோபி பச்சயஸ்ஸ நிமித்தம், ததா² ச வக்க²தி-‘த³ண்ட³புரிஸஸம்ப³ந்தா⁴ த³ண்டீ³தி பச்சயோ’தி, (கிரி)யா பத³த்த²ஸ்ஸாபி விஸேஸனத்தேன ஸகத்த²பா⁴வோ ஜாதிபத³த்தா²தீ³னம் வுத்த டா²னேயேவ வத்தப்³போ³தி பாசகோதி ஏத்த² கிரியாகாரகஸம்ப³ந்த⁴ஸங்கா²தம் பராபி⁴மதம் ஸகத்த²ம்பி பரோபதே³ஸேனோபதி³ஸிதுகாமோ இத⁴ ஸம்ப³ந்த⁴ஸகத்த²ஸ்ஸ வுத்தட்டா²னேயேவ கிரியாஸகத்த²ம் த³ஸ்ஸேதும் ‘கத்த²சி கிரியாபீ’திஆதி³மாஹ. நாமஸபா⁴வேன விஞ்ஞாயமானம் பஞ்சமம் நாமஸங்கா²தமத்த²ம் த³ப்³ப³பத³த்தே²ன ஸங்க³ஹேத்வா ஜாதிகு³ணகிரியாத³ப்³பா³னீதி ஹி சதுப்³பி³தோ⁴ நாமத்தோ², நாமம்பி அன்வத்த²ருள்ஹிவஸேன து³வித⁴ம் புமித்தி²னபும்ஸக லிங்க³வஸேன திவித⁴ம்பி சதுப்³பி³த⁴ம் ஹோதி… யதா²வுத்தே சதுப்³பி³தே⁴ அத்தே² நமதி, தே வா அத்தனி நாமேதீதி இமினா காரணேன. ஸாமஞ்ஞகு³ண கிரியாயதி³ச்சா²வஸேனாஞ்ஞதா²பி சதுப்³பி³த⁴த்தம் நாமஸ்ஸ வத³ந்தி, தத்தா²பி யதி³ச்சா²னாமஸ்ஸ த³ப்³ப³னாமேனேவ ஸங்க³ஹோ வேதி³தப்³போ³, இத்த²த்தம் ஏஸாதி பஸித்³தி⁴மா அத்தோ², யம்பனாதிஆதி³னா வுத்தமேவத்த²ம் ஸாதே⁴தி ‘தத்தே²’ச்சாதி³னா, அபி⁴தா⁴யகத்தேன ஜோதகத்தேன, இகாரந்ததோதி முனிஸத்³த³தோ, அஞ்ஞதா²தி இகாரந்ததோ ந ப⁴வதி சே, அதோதி ஆதே³ஸ ப⁴வனதோ ப²லம் த³ஸ்ஸிதம் ந ஸியாதி ஸம்ப³ந்தோ⁴, வுத்தியம் ‘ஏவம் குமாரீ குமாரியோ’திஆதீ³ஸு ஏவந்தி யதா² புல்லிங்கே³ இகாரந்ததோ ஸ்யாதீ³னமுதா³ஹரணமனாதே³ஸத்த²ம் வுத்தம் ஏவமித்தி²யம்பி அனாகாரந்ததோதி த³ஸ்ஸேதி, உபலக்க²ணம் சேதமினீ-நீ-ஊ-தி-பச்சயந்தாதீ³னம், அஸதி…பே… வசனேதி இமினா பாணினியானம் விப⁴த்திஸஞ்ஞாவிதா⁴யகஸ்ஸ ஸுத்தந்தரஸ்ஸ அத்தி²பா⁴வம் த³ஸ்ஸேதி, ‘‘விப⁴த்திச’’ (1-4-104) இதி ஹி தேஸம் ஸுத்தம், தஸ்ஸத்தோ² ‘ஸ்யாதீ³னம் த்யாதீ³னஞ்ச விப⁴த்திஸஞ்ஞா ஹோதீ’தி, ப⁴வந்தீதி அன்வத்த²வஸேன விப⁴த்திஸத்³த³வசனீயானி ப⁴வந்தி, ஸோ (யேவத்தோ²) விப⁴த்திச்சனேன விப⁴ஜீயதீதி விப⁴த்தி, கம்மே க்திப்பச்சயந்தோயம் விப⁴த்தி ஸத்³தோ³தி த³ஸ்ஸேதி, கத²ம்பனேதேஸு ஸ்யாதீ³ஸு விப⁴ஜீயதிச்சஸ்ஸ வாக்யத்தா²ஸ்ஸானுக³மோ யேனேவம் வுச்சதிச்சாஸங்கிய யேன யதா² ச விப⁴ஜீயதி தமுபத³ஸ்ஸேந்தோ ஆஹ-‘ததா² ஹி’ச்சாதி³.