22. விப்படி

பரோதி வத்ததே, ஸோ சாஞ்ஞாதி⁴க்யஇட்டா²த்³யனேகத்தோ²பி இத⁴ இட்ட² வாசீ த³ட்ட²ப்³போ³, கம்மப்³யதிஹாரேக⁴ணிதி கம்மப்³யதிஹாரோ கிரியாபரிவத்தனம் பா⁴வவிஸேஸோ தஸ்மிம் ‘பா⁴வகாரகேஸ்வக⁴ண்க⁴கா’’தி (5-44) ஸாமஞ்ஞேன விஹிதத்தா விப்படிஸேத⁴னந்தி அத்தே² க⁴ணி விப்படீ ஸேதோ⁴, தேனாஹ-‘ஸாமஞ்ஞே’ச்சாதி³, விப்படிஸேத⁴ஸத்³த³ஸ்ஸ அத்த²மாஹ-‘அஞ்ஞமஞ்ஞபடிஸேதோ⁴’தி, ஸம்ஸித்³தி⁴யம் வத்தமானோபி ஸிதி⁴ உபஸக்³க³ஸம்ப³ந்தே⁴ நாத்த²ந்தரேபி ஹோதீதி அஞ்ஞமஞ்ஞவிரோதோ⁴த்யத்தோ², விப்படிஸேத⁴ஸத்³த³ஸ்ஸ லோகே விரோத⁴வாசித்தேன பஸித்³த⁴த்தமாஹ ‘ததா² ஹி’ச்சாதி³னா, கத²ம்பன பமாணபூ⁴தஸ்ஸாசரியஸ்ஸ வசனேஸு அஞ்ஞமஞ்ஞவிரோதோ⁴ ஸம்ப⁴வதீச்சாஸங்கிய உபி⁴ன்னம் ஸாவகாஸத்தே ஸதி ஸம்ப⁴வதி நாஞ்ஞதா²தி ‘த்³வின்ன’மிச்சாதி³ வுத்திக³ந்தோ² பவத்தோதி வத்தும் ‘ஸோசா’திஆதி³மாஹ அஞ்ஞமஞ்ஞானஜ்ஜா²ஸிதேதி அஞ்ஞமஞ்ஞேனானக்கந்தே அபரிக்³க³ஹிதேதி வுத்தம் ஹோதி, அனுப⁴யதாகி³னீதி யோ விஸயேகதே³ஸோ உப⁴யன்ன ப⁴ஜதே தஸ்மிம் அனுப⁴யபா⁴கி³னி விஸயேகதே³ஸே, ஸாமஞ்ஞவிஸயோ த்³வின்னம் விதீ⁴னம் ஸாதா⁴ரணோ விஸயோ, தத்த² பவத்திப்பஸங்கே³ ஸதி ஸோச விப்படிஸேதோ⁴ ஜாயதீதி ஸம்ப³ந்தோ⁴, இமினா விப்படிஸேத⁴ஸ்ஸ விஸயோ பவத்திப்பஸங்கோ³ விஸயவிஸயீனமபே⁴தே³ன ஸுத்தே ‘விப்படிஸேதோ⁴’திவுத்தோதி ‘த்³வின்ன’மிச்சாதி³னா வுத்திக³ந்தோ² ரசிதோதி தீ³பேதி, பரோ ஹோதீ திவிதி⁴த³ஸ்ஸிதோதி இமினா யதி³ நியமோ-ப்³பூ⁴பக³தோ ஸியா, ததா³ ‘பரோவஹோதீ’தி வதே³ய்யாதி த³ஸ்ஸேதி, பாணினியா ஹி ஜாதியம் பத³த்தே² ஸகிமேவ லக்க²ணம் பவத்ததீதி சரிதத்த²த்தா விஸயந்தரே த்³வின்னம்பி லக்க²ணானமப்பவத்தியம் பரம் பச்சி²மம் காரியந்தி வித்⁴யத்த²மித³ம் வசனம், ப்³யத்தியந்து பத³த்தே² லத்வாதீ³னமிவ பரியாயப்பஸங்கே³ நியமத்த²ந்தி படிபன்னா, இத⁴ பன ஜாதியம் ப்³யத்தியஞ்ச த்³வின்னம்பி ஸுத்தானமப்பவத்தியமேவ வித்⁴யத்த²மேவித³ம் வசனம், ந நியமத்த²ம்பீதி படிபாதே³துமாஹ-‘ததா²ஹி’ச்சாதி³, காமசாரதோ பரிஸமாபீயதேதி ஸம்ப³ந்தோ⁴, காமதோ பரிஸமாபனஞ்சேதிஸ்ஸா ஸப்³ப³ஸ்மிம் அத்தனோ கோ³சரே அவிச்சே²த³ப்³யாபனேன பவத்திஸப்³பா⁴வதோ. கத²ம்பனேகஸ்ஸாபி பவத்தி ந ப⁴வேய்யாத்யாஸங்கிய காரணமாஹ‘உப⁴யம்பி’ச்சாதி³, ஹிஸத்³தோ³ யஸ்மாத்தே², யஸ்மா உப⁴யம்பித³மாசரியவசனம், ததோயேவ பமாணம், அபி⁴மதகாரியவிதா⁴னே லிங்க³பா⁴வேன ஸத்³தி³கானுமதத்தா(தேஸம்) விதீ⁴னம் விதா⁴யகஞ்ச தஸ்மாதி அத்தோ². பமாணத்தா த்³வின்னம்பி அப்பத்தியம் காரணமாஹ-‘அனுப⁴யபா⁴கி³ம்ஹி’ச்சாதி³, யதோ லத்³தா⁴வகாஸா ததோ ஸமானப³லாதி, இதிஸத்³தோ³ ஹேதும்ஹி, விருத்³தா⁴சாதி ஏத்த² இதிஸத்³த³ம் த³த்வா ‘அனுப⁴யபா⁴கி³ம்ஹி…பே… விருத்³தா⁴சாதி த்³வின்னம் வசனானம் பமாணத்தா உபி⁴ன்னம்பி அப்பவத்தீதி ஸம்ப³ந்தோ⁴ வேதி³தப்³போ³. ஸமானப³லானம் த்³வின்னம் லோகேபி விரோதி⁴த்தம் ஏகக்க²ணேயேவ உபி⁴ன்னம்பி காரியே அப்பவத்தி ச தி³ஸ்ஸதீதி தி³ட்ட²ந்தமாஹ ‘லோகேசே’த்யாதி³, ஏத்த² ச பேஸ்ஸஸ்ஸ (அ)விரோத⁴த்தி²னோ காரியே அப்பவத்திரிவ [அப்பவத்தியேவ (போத்த²கே)] ஸமானப³லான முபி⁴ன்னம் வசனானம் காரியே அப்பவத்தீதி ஸுகே²னோ பமாஸம்ஸந்த³னம் விஞ்ஞாதப்³ப³ம்.

ஜாதிபக்கே²யேவ ப⁴ஸ்ஸகாரேன த்³வின்னம் யுக³பதி³ப்பத்தியம் ‘லத்வாதீ³னமிவ’ பரியாயப்பஸங்கோ³ வண்ணிதோ, தஸ்ஸாயுத்தத்தமுபத³ஸ்ஸேந்தோ ஆஹ ‘நசாபி’ச்சாதி³, பி⁴ன்னவிஸயத்தாதி த்³வின்னம் விதீ⁴னம் பி⁴ன்னவிஸயத்தா. அபி⁴ன்னவிஸயத்தே ஹி பரியாயகப்பனா யுத்திமதீ, அதோச லத்வாதீ³னமபி⁴ன்னவிஸயத்தம்படிபாத³யிதுமாஹ- ‘லத்வாத³யோ ஹி’ச்சாதி³, அனவயவேனேதி தா⁴து மத்ததோ விதா⁴னேனாவயவப்³யதிரேகஸப்³பா⁴வதோ ஸப்³ப³தா⁴துபரிக்³க³ஹேன, யத்த² யஸ்மிம் தா⁴த்வத்தே²கதே³ஸே பவத்தா ஸமானா பவத்தா ஸந்தோ லத்³தா⁴வகாஸா ஸியும் தஸ்ஸேகதே³ஸஸ்ஸ பரிஹாரேனாபி பரிச்சாகே³னாபி ந விதீ⁴யந்தேதி ஸம்ப³ந்தோ⁴, லத்வாதீ³ன மேகக்க²ணே அஸம்ப⁴வா ஏகஸ்மிம் கதே ஸதீதரவசனான மானத்த²க்யப்பஸங்கா³ச பரியாயேன ப⁴வந்தீதி யந்தம் யுத்தந்தி ஸம்ப³ந்தோ⁴. இஹாதி இமஸ்மிம் யுக³பதி³ப்பத்தியம், இஹ ததா²பா⁴வஸ்ஸ காரணமாஹ-‘ஸாவகா…பே… வசன’ந்தி, தத்தா²தி யுக³பதி³ப்பத்தியம். ஜாதியம்பத³த்தே² ‘‘புனப்பஸங்க³விஜானனா ஸித்³த⁴ம், விப்படிஸேதே⁴ யம் பா³தி⁴தம் தம்பா³தி⁴தமேவா’’தீமாஸமுபி⁴ன்னம் பரிபா⁴ஸனம்பவத்திம் படிபாதே³ந்தோ ஆஹ- ‘பரஸ்மிம் சே’த்யாதி³, பரஸ்மிந்தி இட்டே², பரிபா⁴ஸனம்பன அயமத்தோ² ‘புனப்பஸங்க³விஜானனாதி த்³வின்னம் ஸுத்தானமேகத்த²ப்ப ஸங்க³ஸங்கா²தே விப்படிஸேதே⁴ ஸதிபரமிட்ட²ம் பட²மம் ஹோதி, ஹோந்தேன தேன யதீ³தரஸ்ஸ நிமித்தோபகா⁴தோ ந கதோ ததா³ தஸ்ஸாபி புனப்பஸங்கோ³ தஸ்ஸ விஜானனா ஸித்³த⁴ந்தி, விப்படிஸேதே⁴ யதா²வுத்தே ஸதி பட²மம் ஹோந்தேன யம் ஸுத்தம் பா³தி⁴தம் தஸ்ஸ புனப்பவத்தியா யதி³ நிமித்தம் நத்தி² தம் பா³தி⁴தமேவே’தி. ப்³யத்தியம்பி வித்⁴யத்த²மேவித³ம் வசனம், ந நியமத்த²ந்தி த³ஸ்ஸேதுமாஹ-‘ப்³யத்திய’மிச்சாதி³, ஏவம் மஞ்ஞதே ‘ப்³யத்தியம் படிலக்கி²யம்லக்க²ணப்பவத்தியம் த்³வின்னம் ஸாதா⁴ரணம் டா²னம்பதி யானி வசனானி பி⁴ன்னானி தேஸம்பி நிரவகாஸத்தேன துல்யப³லத்தா த்³வின்னம்படிபத்தியேவஸியா, நது பரியாயப்பஸங்கோ³’தி. ப்³யத்தியம்பி யதா²வுத்தானம் பரிபா⁴ஸானம் பவத்தி வுத்தவிதி⁴னேவாதி த³ஸ்ஸேந்தோ ‘பரிபா⁴ஸானம்பி’ச்சாதி³மாஹ.

ஜாதியம்பத³த்தே² ‘‘வத்தமானேதி அந்தி, ஸி த², மி ம, தே அந்தே, ஸே வ்ஹே, ஏ ம்ஹே’’ச்சாதீ³னம் லக்க²ணானமேகமேகத்தே²பி வத்தமானேதி அந்தி, வத்தமானே ஸி த² இச்சாதீ³னம் வாக்யேகதே³ஸானம் க³ச்ச²திச்சாதோ³ க³ச்ச² ஸிச்சாதோ³ ச லக்கி²யே ஸகிம்பவத்தியா ஸப்³ப³ஸ்மிம் ஸகே விஸயே பட²ம மஜ்ஜி²மபுரிஸேகவசனஜாதி பரிஸமத்தாதி சரிதத்த²த்தா தும்ஹே க³ச்ச²தா²தி ஏத்த² த்³வீஹி த்³வின்னம் புரிஸான மேகக்க²ணே பவத்தியம் ந கஸ்ஸசி, ப்³யத்தியம்பி படிலக்கி²யம் லக்க²ணானி பி⁴ஜ்ஜந்தீதி ஸாதா⁴ரணம் டா²னம் பதிபி⁴ன்னேஹி லக்க²ணேஹி த்³வின்னம்பேகத்தே²-கக்க²ணே பவத்தியம் ந கஸ்ஸசி, ததா² வுத்தனயேனேவ திண்ணம் புரிஸானமேகக்க²ணே பவத்தியந்தி ஸப்³ப³தா² அப்பவத்தியம் ஸம்பத்தாயம் வசனமித³ம், பரோ ஹோதீதி மஜ்ஜி²முத்தமம் ப⁴வதீதி அதி⁴ப்பாயேன ‘யதே²’ச்சாதி³னா வுத்தம் வுத்திக³ந்த²ம்பஞ்ஹமுகே²னா ஹரித்வா த³ஸ்ஸேதும் ‘க்வபனா’திஆதி³மாஹ, நேத³முதா³ஹரணமம்ஹம் மனம் போ⁴ஸேதி-யதோ விப்படிஸேத⁴விஸயமேவேத³ம் ந ஹோதி, குதோ யதோ ‘‘வத்தமானேதி அந்தி’’ச்சாதி³ப்பபு⁴தீனம் வத்தமானேதி அந்திச்சாதீ³ஹி வாக்யேகதே³ஸேஹி நித்³தி³ட்டா²னமேவ புப்³ப³பரச்ச²க்கானம் புரிஸவசனவிஸேஸவிதா⁴யகேன ‘‘புப்³ப³பரச்ச²க்கான மேகானேகேஸு தும்ஹாம்ஹ ஸேஸேஸு த்³வேத்³வே மஜ்ஜி²முத்தமபட²மா’’ (6-14) தீமினா வாக்யாவயவேன தும்ஹாம்ஹஸேஸேஸு பயுஜ்ஜமானேஸு அப்பயுஜ்ஜமானேஸு வா யதா²க்கமம் புப்³ப³ச்ச²க்கானம் பரச்ச²க்கானஞ்ச மஜ்ஜி²முத்தமபட²மானம் பச்சேகம் த்³வேத்³வே வசனானி யதா²க்கமம் ப⁴வந்தீதி ‘க³ச்ச²த² க³ச்சா²மா’தி ஏத்த² ஏகக்க²ணே பவத்தியேவ நத்தி², த்³வின்னம்பன ஸாவகாஸான மேகக்க²ணே பவத்தியேவ ஹி விப்படிஸேதோ⁴தி, ததா²பி வுத்தனயேன விப்படிஸேத⁴ப்பகப்பனாபி ஸக்கா காதுந்தீத³முதா³ஹடம் ஸியாதி த³ட்ட²ப்³ப³ம், இமிஸ்ஸா பன பரிபா⁴ஸாய நிராகுலப்பவத்தி ‘‘ஆதி³ஸ்ஸா’’ தீமிஸ்ஸா வுத்தனயேன வேதி³தப்³பா³, கதாகதப்பஸங்கீ³ யோ விதி⁴, ஸோ நிச்சோ, யோத்வகதேயேவாயமனிச்சோதி வுத்தனிச்சானிச்சேஸு அந்தரங்க³ப³ஹிரங்கே³ஸு சாதுல்யப³லத்தா நாஸ்ஸ யோக³ஸ்ஸ ப்³யாபாரோ, ததா²ஹி நிச்சானிச்சேஸு நிச்சமேவ ப³லவந்தி நிச்சானிச்சானமதுல்யப³லதா, அந்தரங்க³ப³ஹிரங்க³ப்பகார(ம்பன) உபரி ‘‘லோபோ’’தி (1-39) ஸுத்தே பகாஸிஸ்ஸாம.