9. இயு

சத்த²ஸமாஸோதி இதரீதரயோக³த்³வந்த³ஸமாஸோ. அத்தேதி முனி ஸத்³தா³தி³வசனீயே அத்தே², நமதீதீமஸ்ஸேதம் கம்மம்,

யம் ஸப்³ப³வசனம் ஸப்³ப³, லிங்க³ம் ஸப்³ப³விப⁴த்திகம்;

தம் ஸப்³ப³த்தே² நமனதோ, விது³ம் நாமந்தி தப்³பி³தூ³.

இத⁴ நாமஸஞ்ஞாயாபா⁴வேபி அன்வத்த²ப³லாயேவ நாமஸஞ்ஞா ஸித்³தா⁴தி (ஆஹ) ‘அன்வத்த²ப்³யபதே³ஸேனா’தி, ஸ்யாத்³யந்தபகதிரூபந்தி பச்சயா பட²மம் கரீயதீதி பகதி, ஸா ஏவ ரூபந்தி பகதிரூபம், ஸ்யாத்³யந்தஸ்ஸ பகதி ரூபம் முனிஸத்³தா³தி³ ஸ்யாத்³யந்தபகதிரூபம், அத்த²வந்தமதா⁴துகமப்பச்சயம்பாடிபதி³கம், பத³ம் பத³ம் பதி படிபதே³, படிபத³ம் நியுத்தம் பாடிபதி³கம். விஸேஸனேனாதி ஸுத்தே ‘நமஸ்ஸந்தே’தி வுத்தேன இவண்ணுவண்ணானம் விஸேஸனேன. ஆக்²யாதஸ்ஸாதி பசதிஆதி³னோ. ஆதி³மஜ்ஜ²வத்தினோதி இந்த³ உத³கஸத்³தா³தீ³னம் ஆதோ³, பகு²மாதீ³னம் மஜ்ஜே²ச வத்தினோ. பதே³ஸேஸூதி ‘‘ஜ²லா ஸஸ்ஸ நோ’’தி (2-83) ஆதி³கேஸு ஸுத்தப்பதே³ஸேஸு, அனிட்ட²பஸங்க³ (ஸங்கம்) நிவத்தேதீதி ஸம்ப³ந்தோ⁴, அனிட்ட²ப்பஸங்கோ³னாம [நாமாதி (போத்த²கே)] பசதி-இந்த³ (உத³க பகு²ம) ஸத்³தா³தீ³ன மந்த ஆதி³மஜ்ஜ²பூ⁴தஇவண்ணாதீ³னம் ஜ²லஸஞ்ஞா விதா⁴ய ததோ பராஸம் ஸாதி³ விப⁴த்தீனம் ‘‘ஜ²லா ஸஸ்ஸ நோ’’தி (2-81) ஆதீ³ஹி ‘நோ’ ஆதே³ஸாதி³ம்ஹி கதே ‘பசதினோ, இந்த³னோ, உத³கனோ, பகு²மனோ’திஆதி³ ரூபப்பஸங்கோ³, நனுசாதி³ஆதி³ சோத³னா. வத்தப்³ப³ந்தி ஸுத்தே வத்தப்³ப³ம். ப்³யாஸனித்³தே³ஸேனாதி அஸமாஸனித்³தே³ஸேன. தத³யுத்தந்திஆதி³ பரிஹாரோ, தந்தி தம் சோத்³யம், ஸதிஹீதிஆதி³னா அயுத்தத்தம் ஸமத்தே²தி, த்³வீஸுத்தரேஸு யோகே³ஸூதி உபரிமேஸு ‘‘பித்தி²யம்’’ ‘‘கா⁴’’தி த்³வீஸு ஸுத்தேஸு. இத்தி²யந்தி இத³ந்தி ‘‘பித்தி²ய’’ந்தி ஸுத்தே இத்தி²யந்தி இத³ம் பத³ம். வண்ணவிஸேஸனம் ஸியாதி ‘‘பித்தி²ய’’ந்தி ஸுத்தே ‘இயுவண்ணா’தி அனுவத்தனதோ ‘இத்தி²யம் இவண்ணுவண்ணா’தி ஏவம் இவண்ணு வண்ணா ‘‘கோ⁴’’தி ஸுத்தே ‘இத்தி²யம் ஆ’திஏவம் அவண்ணஸ்ஸ ச விஸேஸனம் ப⁴வேய்ய. வண்ணவிஸேஸனே விரோத⁴மாஹ ‘ஏவஞ்சே’ச்சாதி³, நாமஸ்ஸந்தேதி அஸமாஸனித்³தே³ஸே த்வவிரோத⁴மாஹ- ‘ப்³யாஸே’ச்சாதி³. ஸக்கானாமவிஸேஸனம் காதுந்தி த்³வீஸு ஸுத்தேஸு இத்தி²யந்திஆதி³னா வக்க²மானக்கமேன. நாமஸ்ஸ அந்தோ நாமந்தோதி ஸமாஸஸ்ஸ உத்தரபத³த்த²ப்பதா⁴னத்தா ஸமாஸே கு³ணீபூ⁴தஸ்ஸ நாமஸ்ஸ இத்தி²யந்தி இத³ம் விஸேஸனம் காதும் ந ஸக்காதி அதி⁴ப்பாயோ, வசனமந்தரேனாதி பாணினியானமிவ ‘‘யதா²ஸங்க்²யமனுதே³ஸோ ஸமானம்’’தி (1-3-10) ஸுத்தம் வினா, ஸமாஸங்க்²ய ஏதேஸந்தி ஸமஸங்க்²யகா, இதிஸத்³தோ³ ஆத்³யத்தோ², தேன–

‘‘ஆலாபஹாஸலீலாஹி, முனிந்த³ விஜயா தவ;

கோகிலா குமுதா³னீ வோ, பஸேவந்தே வனம் ஜலம்’’ (260).

இச்சாதி³ம் ஸங்க³ண்ஹாதி.