9. பரிஸாஸுத்தம்

69. ‘‘அட்டி²மா, பி⁴க்க²வே, பரிஸா. கதமா அட்ட²? க²த்தியபரிஸா, ப்³ராஹ்மணபரிஸா, க³ஹபதிபரிஸா, ஸமணபரிஸா, சாதுமஹாராஜிகபரிஸா, தாவதிம்ஸபரிஸா, மாரபரிஸா, ப்³ரஹ்மபரிஸா. அபி⁴ஜானாமி கோ² பனாஹம், பி⁴க்க²வே, அனேகஸதம் க²த்தியபரிஸம் உபஸங்கமிதா. தத்ரபி மயா ஸன்னிஸின்னபுப்³ப³ஞ்சேவ ஸல்லபிதபுப்³ப³ஞ்ச ஸாகச்சா² ச ஸமாபன்னபுப்³பா³. தத்த² யாதி³ஸகோ தேஸம் வண்ணோ ஹோதி தாதி³ஸகோ மய்ஹம் வண்ணோ ஹோதி, யாதி³ஸகோ தேஸம் ஸரோ ஹோதி தாதி³ஸகோ மய்ஹம் ஸரோ ஹோதி. த⁴ம்மியா ச கதா²ய ஸந்த³ஸ்ஸேமி ஸமாத³பேமி ஸமுத்தேஜேமி ஸம்பஹம்ஸேமி. பா⁴ஸமானஞ்ச மம் ந ஜானந்தி – ‘கோ நு கோ² அயம் பா⁴ஸதி தே³வோ வா மனுஸ்ஸோ வா’தி. த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா அந்தரதா⁴யாமி. அந்தரஹிதஞ்ச மம் ந ஜானந்தி – ‘கோ நு கோ² அயம் அந்தரஹிதோ தே³வோ வா மனுஸ்ஸோ வா’’’தி.

‘‘அபி⁴ஜானாமி கோ² பனாஹம், பி⁴க்க²வே, அனேகஸதம் ப்³ராஹ்மணபரிஸம்…பே… க³ஹபதிபரிஸம்… ஸமணபரிஸம்… சாதுமஹாராஜிகபரிஸம்… தாவதிம்ஸபரிஸம்… மாரபரிஸம்… ப்³ரஹ்மபரிஸம் உபஸங்கமிதா. தத்ரபி மயா ஸன்னிஸின்னபுப்³ப³ஞ்சேவ ஸல்லபிதபுப்³ப³ஞ்ச ஸாகச்சா² ச ஸமாபன்னபுப்³பா³. தத்த² யாதி³ஸகோ தேஸம் வண்ணோ ஹோதி தாதி³ஸகோ மய்ஹம் வண்ணோ ஹோதி, யாதி³ஸகோ தேஸம் ஸரோ ஹோதி தாதி³ஸகோ மய்ஹம் ஸரோ ஹோதி. த⁴ம்மியா ச கதா²ய ஸந்த³ஸ்ஸேமி ஸமாத³பேமி ஸமுத்தேஜேமி ஸம்பஹம்ஸேமி. பா⁴ஸமானஞ்ச மம் ந ஜானந்தி – ‘கோ நு கோ² அயம் பா⁴ஸதி தே³வோ வா மனுஸ்ஸோ வா’தி. த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா அந்தரதா⁴யாமி. அந்தரஹிதஞ்ச மம் ந ஜானந்தி – ‘கோ நு கோ² அயம் அந்தரஹிதோ தே³வோ வா மனுஸ்ஸோ வா’தி. இமா கோ², பி⁴க்க²வே, அட்ட² பரிஸா’’தி. நவமம்.