10. பூ⁴மிசாலஸுத்தம்

70. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய வேஸாலிம் பிண்டா³ய பாவிஸி. வேஸாலியம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ ஆயஸ்மந்தம் ஆனந்த³ம் ஆமந்தேஸி – ‘‘க³ண்ஹாஹி, ஆனந்த³, நிஸீத³னம். யேன சாபாலம் சேதியம் [பாவாலசேதியம் (ஸ்யா.), சாபாலசேதியம் (பீ. க.)] தேனுபஸங்கமிஸ்ஸாம தி³வாவிஹாராயா’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ படிஸ்ஸுத்வா நிஸீத³னம் ஆதா³ய ப⁴க³வந்தம் பிட்டி²தோ பிட்டி²தோ அனுப³ந்தி⁴.

அத² கோ² ப⁴க³வா யேன சாபாலம் சேதியம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘ரமணீயா, ஆனந்த³, வேஸாலீ, ரமணீயம் உதே³னம் சேதியம், ரமணீயம் கோ³தமகம் சேதியம், ரமணீயம் ஸத்தம்ப³ம் சேதியம், ரமணீயம் ப³ஹுபுத்தகம் சேதியம்; ரமணீயம் ஸாரந்த³த³ம் சேதியம், ரமணீயம் சாபாலம் சேதியம். யஸ்ஸ கஸ்ஸசி, ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஆகங்க²மானோ ஸோ, ஆனந்த³, கப்பம் வா திட்டே²ய்ய கப்பாவஸேஸம் வா. ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴. ஆகங்க²மானோ, ஆனந்த³, ததா²க³தோ கப்பம் வா திட்டே²ய்ய கப்பாவஸேஸம் வா’’தி. ஏவம்பி கோ² ஆயஸ்மா ஆனந்தோ³ ப⁴க³வதா ஓளாரிகே நிமித்தே கயிரமானே ஓளாரிகே ஓபா⁴ஸே கயிரமானே நாஸக்கி² படிவிஜ்ஜி²தும்; ந ப⁴க³வந்தம் யாசி – ‘‘திட்ட²து, ப⁴ந்தே, ப⁴க³வா கப்பம், திட்ட²து ஸுக³தோ கப்பம் ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’’ந்தி, யதா² தம் மாரேன பரியுட்டி²தசித்தோ.

து³தியம்பி கோ² ப⁴க³வா…பே… ததியம்பி கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘ரமணீயா, ஆனந்த³, வேஸாலீ, ரமணீயம் உதே³னம் சேதியம், ரமணீயம் கோ³தமகம் சேதியம், ரமணீயம் ஸத்தம்ப³ம் சேதியம், ரமணீயம் ப³ஹுபுத்தகம் சேதியம், ரமணீயம் ஸாரந்த³த³ம் சேதியம், ரமணீயம் சாபாலம் சேதியம். யஸ்ஸ கஸ்ஸசி, ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஆகங்க²மானோ ஸோ, ஆனந்த³, கப்பம் வா திட்டே²ய்ய கப்பாவஸேஸம் வா. ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா…பே… ஆகங்க²மானோ, ஆனந்த³, ததா²க³தோ கப்பம் வா திட்டே²ய்ய கப்பாவஸேஸம் வா’’தி. ஏவம்பி கோ² ஆயஸ்மா ஆனந்தோ³ ப⁴க³வதா ஓளாரிகே நிமித்தே கயிரமானே ஓளாரிகே ஓபா⁴ஸே கயிரமானே நாஸக்கி² படிவிஜ்ஜி²தும்; ந ப⁴க³வந்தம் யாசி – ‘‘திட்ட²து, ப⁴ந்தே, ப⁴க³வா கப்பம், திட்ட²து ஸுக³தோ கப்பம் ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’’ந்தி, யதா² தம் மாரேன பரியுட்டி²தசித்தோ.

அத² கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘க³ச்ச² த்வம் [க³ச்ச² கோ² த்வம் (ஸம். நி. 5.822) உதா³. 51 பஸ்ஸிதப்³ப³ம்], ஆனந்த³, யஸ்ஸ தா³னி காலம் மஞ்ஞஸீ’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ படிஸ்ஸுத்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா ப⁴க³வதோ அவிதூ³ரே அஞ்ஞதரஸ்மிம் ருக்க²மூலே நிஸீதி³. அத² கோ² மாரோ பாபிமா அசிரபக்கந்தே ஆயஸ்மந்தே ஆனந்தே³ ப⁴க³வந்தம் ஏதத³வோச –

‘‘பரினிப்³பா³து தா³னி, ப⁴ந்தே, ப⁴க³வா, பரினிப்³பா³து ஸுக³தோ. பரினிப்³பா³னகாலோ தா³னி, ப⁴ந்தே, ப⁴க³வதோ. பா⁴ஸிதா கோ² பனேஸா, ப⁴ந்தே, ப⁴க³வதா வாசா – ‘ந தாவாஹம், பாபிம, பரினிப்³பா³யிஸ்ஸாமி யாவ மே பி⁴க்கூ² ந ஸாவகா ப⁴விஸ்ஸந்தி வியத்தா வினீதா விஸாரதா³ பத்தயோக³க்கே²மா [இத³ம் பத³ம் தீ³. நி. 2.168 ச ஸம். நி. 5.822 ச ந தி³ஸ்ஸதி] ப³ஹுஸ்ஸுதா த⁴ம்மத⁴ரா த⁴ம்மானுத⁴ம்மப்படிபன்னா ஸாமீசிப்படிபன்னா அனுத⁴ம்மசாரினோ, ஸகம் ஆசரியகம் உக்³க³ஹேத்வா ஆசிக்கி²ஸ்ஸந்தி தே³ஸேஸ்ஸந்தி பஞ்ஞபேஸ்ஸந்தி பட்ட²பேஸ்ஸந்தி விவரிஸ்ஸந்தி விப⁴ஜிஸ்ஸந்தி உத்தானீகரிஸ்ஸந்தி உப்பன்னம் பரப்பவாத³ம் ஸஹத⁴ம்மேன ஸுனிக்³க³ஹிதம் நிக்³க³ஹேத்வா ஸப்பாடிஹாரியம் த⁴ம்மம் தே³ஸேஸ்ஸந்தீ’தி. ஏதரஹி, ப⁴ந்தே, பி⁴க்கூ² ப⁴க³வதோ ஸாவகா வியத்தா வினீதா விஸாரதா³ பத்தயோக³க்கே²மா ப³ஹுஸ்ஸுதா த⁴ம்மத⁴ரா த⁴ம்மானுத⁴ம்மப்படிபன்னா ஸாமீசிப்படிபன்னா அனுத⁴ம்மசாரினோ, ஸகம் ஆசரியகம் உக்³க³ஹேத்வா ஆசிக்க²ந்தி தே³ஸேந்தி பஞ்ஞபேந்தி பட்ட²பேந்தி விவரந்தி விப⁴ஜந்தி உத்தானீகரோந்தி உப்பன்னம் பரப்பவாத³ம் ஸஹத⁴ம்மேன ஸுனிக்³க³ஹிதம் நிக்³க³ஹேத்வா ஸப்பாடிஹாரியம் த⁴ம்மம் தே³ஸேந்தி.

‘‘பரினிப்³பா³து தா³னி, ப⁴ந்தே, ப⁴க³வா, பரினிப்³பா³து ஸுக³தோ. பரினிப்³பா³னகாலோ தா³னி, ப⁴ந்தே, ப⁴க³வதோ. பா⁴ஸிதா கோ² பனேஸா, ப⁴ந்தே, ப⁴க³வதா வாசா – ‘ந தாவாஹம், பாபிம, பரினிப்³பா³யிஸ்ஸாமி யாவ மே பி⁴க்கு²னியோ ந ஸாவிகா ப⁴விஸ்ஸந்தி…பே… யாவ மே உபாஸகா ந ஸாவகா ப⁴விஸ்ஸந்தி…பே… யாவ மே உபாஸிகா ந ஸாவிகா ப⁴விஸ்ஸந்தி வியத்தா வினீதா விஸாரதா³ பத்தயோக³க்கே²மா ப³ஹுஸ்ஸுதா த⁴ம்மத⁴ரா த⁴ம்மானுத⁴ம்மப்படிபன்னா ஸாமீசிப்படிபன்னா அனுத⁴ம்மசாரினியோ, ஸகம் ஆசரியகம் உக்³க³ஹேத்வா ஆசிக்கி²ஸ்ஸந்தி தே³ஸேஸ்ஸந்தி பஞ்ஞபேஸ்ஸந்தி பட்ட²பேஸ்ஸந்தி விவரிஸ்ஸந்தி விப⁴ஜிஸ்ஸந்தி உத்தானீகரிஸ்ஸந்தி, உப்பன்னம் பரப்பவாத³ம் ஸஹத⁴ம்மேன ஸுனிக்³க³ஹிதம் நிக்³க³ஹேத்வா ஸப்பாடிஹாரியம் த⁴ம்மம் தே³ஸேஸ்ஸந்தீ’தி. ஏதரஹி, ப⁴ந்தே, உபாஸிகா ப⁴க³வதோ ஸாவிகா வியத்தா வினீதா விஸாரதா³ பத்தயோக³க்கே²மா ப³ஹுஸ்ஸுதா த⁴ம்மத⁴ரா த⁴ம்மானுத⁴ம்மப்படிபன்னா ஸாமீசிப்படிபன்னா அனுத⁴ம்மசாரினியோ, ஸகம் ஆசரியகம் உக்³க³ஹேத்வா ஆசிக்க²ந்தி தே³ஸேந்தி பஞ்ஞபேந்தி பட்ட²பேந்தி விவரந்தி விப⁴ஜந்தி உத்தானீகரோந்தி, உப்பன்னம் பரப்பவாத³ம் ஸஹத⁴ம்மேன ஸுனிக்³க³ஹிதம் நிக்³க³ஹேத்வா ஸப்பாடிஹாரியம் த⁴ம்மம் தே³ஸேந்தி.

‘‘பரினிப்³பா³து தா³னி, ப⁴ந்தே, ப⁴க³வா, பரினிப்³பா³து ஸுக³தோ. பரினிப்³பா³னகாலோ தா³னி, ப⁴ந்தே, ப⁴க³வதோ. பா⁴ஸிதா கோ² பனேஸா, ப⁴ந்தே, ப⁴க³வதா வாசா – ‘ந தாவாஹம், பாபிம, பரினிப்³பா³யிஸ்ஸாமி யாவ மே இத³ம் ப்³ரஹ்மசரியம் ந இத்³த⁴ஞ்சேவ ப⁴விஸ்ஸதி பீ²தஞ்ச வித்தா²ரிகம் பா³ஹுஜஞ்ஞம் புது²பூ⁴தம், யாவ தே³வமனுஸ்ஸேஹி ஸுப்பகாஸித’ந்தி. ஏதரஹி, ப⁴ந்தே, ப⁴க³வதோ ப்³ரஹ்மசரியம் இத்³த⁴ஞ்சேவ பீ²தஞ்ச வித்தா²ரிகம் பா³ஹுஜஞ்ஞம் புது²பூ⁴தம், யாவ தே³வமனுஸ்ஸேஹி ஸுப்பகாஸிதம்.

‘‘பரினிப்³பா³து தா³னி, ப⁴ந்தே, ப⁴க³வா, பரினிப்³பா³து ஸுக³தோ. பரினிப்³பா³னகாலோ தா³னி, ப⁴ந்தே, ப⁴க³வதோ’’தி. ‘‘அப்போஸ்ஸுக்கோ த்வம், பாபிம, ஹோஹி. நசிரம் ததா²க³தஸ்ஸ பரினிப்³பா³னம் ப⁴விஸ்ஸதி. இதோ திண்ணம் மாஸானம் அச்சயேன ததா²க³தோ பரினிப்³பா³யிஸ்ஸதீ’’தி.

அத² கோ² ப⁴க³வா சாபாலே சேதியே ஸதோ ஸம்பஜானோ ஆயுஸங்கா²ரம் ஓஸ்ஸஜி. ஓஸ்ஸட்டே² ச ப⁴க³வதா ஆயுஸங்கா²ரே மஹாபூ⁴மிசாலோ அஹோஸி பி⁴ம்ஸனகோ ஸலோமஹம்ஸோ, தே³வது³ந்து³பி⁴யோ ச ப²லிம்ஸு. அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘துலமதுலஞ்ச ஸம்ப⁴வம், ப⁴வஸங்கா²ரமவஸ்ஸஜி முனி;

அஜ்ஜ²த்தரதோ ஸமாஹிதோ, அபி⁴ந்தி³ கவசமிவத்தஸம்ப⁴வ’’ந்தி.

அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘மஹா வதாயம் பூ⁴மிசாலோ; ஸுமஹா வதாயம் பூ⁴மிசாலோ பி⁴ம்ஸனகோ ஸலோமஹம்ஸோ, தே³வது³ந்து³பி⁴யோ ச ப²லிம்ஸு. கோ நு கோ² ஹேது, கோ பச்சயோ மஹதோ பூ⁴மிசாலஸ்ஸ பாதுபா⁴வாயா’’தி?

அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘மஹா வதாயம், ப⁴ந்தே, பூ⁴மிசாலோ; ஸுமஹா வதாயம், ப⁴ந்தே, பூ⁴மிசாலோ பி⁴ம்ஸனகோ ஸலோமஹம்ஸோ, தே³வது³ந்து³பி⁴யோ ச ப²லிம்ஸு. கோ நு கோ², ப⁴ந்தே, ஹேது, கோ பச்சயோ மஹதோ பூ⁴மிசாலஸ்ஸ பாதுபா⁴வாயா’’தி?

‘‘அட்டி²மே, ஆனந்த³, ஹேதூ, அட்ட² பச்சயா மஹதோ பூ⁴மிசாலஸ்ஸ பாதுபா⁴வாய. கதமே அட்ட²? அயம், ஆனந்த³, மஹாபத²வீ உத³கே பதிட்டி²தா; உத³கம் வாதே பதிட்டி²தம்; வாதோ ஆகாஸட்டோ² ஹோதி. ஸோ, ஆனந்த³, ஸமயோ யம் மஹாவாதா வாயந்தி; மஹாவாதா வாயந்தா உத³கம் கம்பேந்தி; உத³கம் கம்பிதம் பத²விம் கம்பேதி. அயம், ஆனந்த³, பட²மோ ஹேது, பட²மோ பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, ஸமணோ வா ப்³ராஹ்மணோ வா இத்³தி⁴மா சேதோவஸிப்பத்தோ தே³வதா வா மஹித்³தி⁴கா மஹானுபா⁴வா. தஸ்ஸ பரித்தா பத²வீஸஞ்ஞா பா⁴விதா ஹோதி, அப்பமாணா ஆபோஸஞ்ஞா. ஸோ இமம் பத²விம் கம்பேதி ஸங்கம்பேதி ஸம்பகம்பேதி ஸம்பவேதே⁴தி. அயம், ஆனந்த³, து³தியோ ஹேது, து³தியோ பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, யதா³ போ³தி⁴ஸத்தோ துஸிதா காயா சவித்வா ஸதோ ஸம்பஜானோ மாதுகுச்சி²ம் ஓக்கமதி, ததா³யம் பத²வீ கம்பதி ஸங்கம்பதி ஸம்பகம்பதி ஸம்பவேத⁴தி. அயம், ஆனந்த³, ததியோ ஹேது; ததியோ பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, யதா³ போ³தி⁴ஸத்தோ ஸதோ ஸம்பஜானோ மாதுகுச்சி²ஸ்மா நிக்க²மதி, ததா³யம் பத²வீ கம்பதி ஸங்கம்பதி ஸம்பகம்பதி ஸம்பவேத⁴தி. அயம், ஆனந்த³, சதுத்தோ² ஹேது, சதுத்தோ² பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, யதா³ ததா²க³தோ அனுத்தரம் ஸம்மாஸம்போ³தி⁴ம் அபி⁴ஸம்பு³ஜ்ஜ²தி, ததா³யம் பத²வீ கம்பதி ஸங்கம்பதி ஸம்பகம்பதி ஸம்பவேத⁴தி. அயம், ஆனந்த³, பஞ்சமோ ஹேது, பஞ்சமோ பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, யதா³ ததா²க³தோ அனுத்தரம் த⁴ம்மசக்கம் பவத்தேதி, ததா³யம் பத²வீ கம்பதி ஸங்கம்பதி ஸம்பகம்பதி ஸம்பவேத⁴தி. அயம், ஆனந்த³, ச²ட்டோ² ஹேது, ச²ட்டோ² பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, யதா³ ததா²க³தோ ஸதோ ஸம்பஜானோ ஆயுஸங்கா²ரம் ஓஸ்ஸஜ்ஜதி, ததா³யம் பத²வீ கம்பதி ஸங்கம்பதி ஸம்பகம்பதி ஸம்பவேத⁴தி. அயம், ஆனந்த³, ஸத்தமோ ஹேது, ஸத்தமோ பச்சயோ மஹதோ பூ⁴மிசாலஸ்ஸ பாதுபா⁴வாய.

‘‘புன சபரம், ஆனந்த³, யதா³ ததா²க³தோ அனுபாதி³ஸேஸாய நிப்³பா³னதா⁴துயா பரினிப்³பா³யதி, ததா³யம் பத²வீ கம்பதி ஸங்கம்பதி ஸம்பகம்பதி ஸம்பவேத⁴தி. அயம், ஆனந்த³, அட்ட²மோ ஹேது, அட்ட²மோ பச்சயோ மஹதோ பூ⁴மிசாலஸ்ஸ பாதுபா⁴வாய. இமே கோ², ஆனந்த³, அட்ட² ஹேதூ, அட்ட² பச்சயா மஹதோ பூ⁴மிசாலஸ்ஸ பாதுபா⁴வாயா’’தி. த³ஸமம்.

பூ⁴மிசாலவக்³கோ³ து³தியோ.