1. இச்சா²ஸுத்தம்

61. [அ. நி. 8.77] ‘‘அட்டி²மே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே அட்ட²? இத⁴, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ உட்ட²ஹதி க⁴டதி வாயமதி லாபா⁴ய. தஸ்ஸ உட்ட²ஹதோ க⁴டதோ வாயமதோ லாபா⁴ய லாபோ⁴ நுப்பஜ்ஜதி. ஸோ தேன அலாபே⁴ன ஸோசதி கிலமதி பரிதே³வதி, உரத்தாளிம் கந்த³தி, ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, உட்ட²ஹதி க⁴டதி வாயமதி லாபா⁴ய, ந ச லாபீ⁴, ஸோசீ ச பரிதே³வீ ச, சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ உட்ட²ஹதி க⁴டதி வாயமதி லாபா⁴ய. தஸ்ஸ உட்ட²ஹதோ க⁴டதோ வாயமதோ லாபா⁴ய லாபோ⁴ உப்பஜ்ஜதி. ஸோ தேன லாபே⁴ன மஜ்ஜதி பமஜ்ஜதி பமாத³மாபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, உட்ட²ஹதி க⁴டதி வாயமதி லாபா⁴ய, லாபீ⁴ ச மதீ³ ச பமாதீ³ ச, சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ ந உட்ட²ஹதி ந க⁴டதி ந வாயமதி லாபா⁴ய. தஸ்ஸ அனுட்ட²ஹதோ அக⁴டதோ அவாயமதோ லாபா⁴ய லாபோ⁴ நுப்பஜ்ஜதி. ஸோ தேன அலாபே⁴ன ஸோசதி, கிலமதி, பரிதே³வதி, உரத்தாளிம் கந்த³தி, ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, ந உட்ட²ஹதி ந க⁴டதி ந வாயமதி லாபா⁴ய, ந ச லாபீ⁴, ஸோசீ ச பரிதே³வீ ச, சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ ந உட்ட²ஹதி, ந க⁴டதி, ந வாயமதி லாபா⁴ய. தஸ்ஸ அனுட்ட²ஹதோ, அக⁴டதோ, அவாயமதோ லாபா⁴ய லாபோ⁴ உப்பஜ்ஜதி. ஸோ தேன லாபே⁴ன மஜ்ஜதி, பமஜ்ஜதி, பமாத³மாபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, ந உட்ட²ஹதி ந க⁴டதி ந வாயமதி லாபா⁴ய, லாபீ⁴ ச மதீ³ ச, பமாதீ³ ச, சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ உட்ட²ஹதி க⁴டதி வாயமதி லாபா⁴ய. தஸ்ஸ உட்ட²ஹதோ க⁴டதோ வாயமதோ லாபா⁴ய லாபோ⁴ நுப்பஜ்ஜதி. ஸோ தேன அலாபே⁴ன ந ஸோசதி ந கிலமதி ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, உட்ட²ஹதி க⁴டதி வாயமதி லாபா⁴ய, ந ச லாபீ⁴, ந ச ஸோசீ ந ச பரிதே³வீ, அச்சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ உட்ட²ஹதி க⁴டதி வாயமதி லாபா⁴ய. தஸ்ஸ உட்ட²ஹதோ க⁴டதோ வாயமதோ லாபா⁴ய லாபோ⁴ உப்பஜ்ஜதி. ஸோ தேன லாபே⁴ன ந மஜ்ஜதி, ந பமஜ்ஜதி, ந பமாத³மாபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, உட்ட²ஹதி க⁴டதி வாயமதி லாபா⁴ய, லாபீ⁴ ச, ந ச மதீ³ ந ச பமாதீ³, அச்சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ ந உட்ட²ஹதி, ந க⁴டதி, ந வாயமதி லாபா⁴ய. தஸ்ஸ அனுட்ட²ஹதோ, அக⁴டதோ, அவாயமதோ லாபா⁴ய லாபோ⁴ நுப்பஜ்ஜதி. ஸோ தேன அலாபே⁴ன ந ஸோசதி, ந கிலமதி, ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, ந உட்ட²ஹதி, ந க⁴டதி, ந வாயமதி லாபா⁴ய, ந ச லாபீ⁴, ந ச ஸோசீ ந ச பரிதே³வீ, அச்சுதோ ச ஸத்³த⁴ம்மா’’’.

‘‘இத⁴ பன, பி⁴க்க²வே, பி⁴க்கு²னோ பவிவித்தஸ்ஸ விஹரதோ நிராயத்தவுத்தினோ இச்சா² உப்பஜ்ஜதி லாபா⁴ய. ஸோ ந உட்ட²ஹதி, ந க⁴டதி, ந வாயமதி லாபா⁴ய. தஸ்ஸ அனுட்ட²ஹதோ அக⁴டதோ அவாயமதோ லாபா⁴ய லாபோ⁴ உப்பஜ்ஜதி. ஸோ தேன லாபே⁴ன ந மஜ்ஜதி, ந பமஜ்ஜதி, ந பமாத³மாபஜ்ஜதி. அயம் வுச்சதி, பி⁴க்க²வே – ‘பி⁴க்கு² இச்சோ² விஹரதி லாபா⁴ய, ந உட்ட²ஹதி, ந க⁴டதி, ந வாயமதி லாபா⁴ய, லாபீ⁴ ச, ந ச மதீ³ ந ச பமாதீ³, அச்சுதோ ச ஸத்³த⁴ம்மா ’. இமே கோ², பி⁴க்க²வே, அட்ட² புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பட²மம்.