2. அலம்ஸுத்தம்

62. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் அத்தனோ அலம் பரேஸம். கதமேஹி ச²ஹி? இத⁴, பி⁴க்க²வே, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ [தா⁴ரகஜாதிகோ (ஸீ. ஸ்யா. பீ.) அ. நி. 8.78] ஹோதி; தா⁴தானஞ்ச [த⁴தானஞ்ச (ஸீ. ஸ்யா. பீ.)] த⁴ம்மானம் அத்தூ²பபரிக்கி²தா [அத்தூ²பவரிக்கீ² (ஸீ. ஸ்யா. பீ.)] ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; கல்யாணவாசோ ச ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி ஸமாத³பகோ [ஸமாதா³பகோ (?)] ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² அலம் அத்தனோ அலம் பரேஸம்.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் அத்தனோ அலம் பரேஸம். கதமேஹி பஞ்சஹி? இத⁴, பி⁴க்க²வே, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; கல்யாணவாசோ ச ஹோதி…பே… அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² அலம் அத்தனோ அலம் பரேஸம்.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் அத்தனோ நாலம் பரேஸம். கதமேஹி சதூஹி? இத⁴, பி⁴க்க²வே, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; நோ ச கல்யாணவாசோ ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா; நோ ச ஸந்த³ஸ்ஸகோ ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² அலம் அத்தனோ நாலம் பரேஸம்.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் பரேஸம் நாலம் அத்தனோ. கதமேஹி சதூஹி? இத⁴, பி⁴க்க²வே, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; நோ ச தா⁴தானம் த⁴ம்மானம் அத்தூ²பபரிக்கி²தா ஹோதி; ந ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி கல்யாணவாக்கரணோ…பே… அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி…பே… ஸப்³ரஹ்மசாரீனம். இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் அத்தனோ நாலம் பரேஸம். கதமேஹி தீஹி? இத⁴, பி⁴க்க²வே, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; நோ ச கல்யாணவாசோ ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா; நோ ச ஸந்த³ஸ்ஸகோ ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம்.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ. கதமேஹி தீஹி? இத⁴, பி⁴க்க²வே, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; நோ ச தா⁴தானம் த⁴ம்மானம் அத்தூ²பபரிக்கி²தா ஹோதி; நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி…பே… அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ.

‘‘த்³வீஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம். கதமேஹி த்³வீஹி? இத⁴, பி⁴க்க²வே, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; நோ ச ஸுதானம் த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; நோ ச கல்யாணவாசோ ஹோதி…பே… அத்த²ஸ்ஸ விஞ்ஞாபனியா; நோ ச ஸந்த³ஸ்ஸகோ ஹோதி…பே… ஸப்³ரஹ்மசாரீனம். இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம்.

‘‘த்³வீஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ. கதமேஹி த்³வீஹி? இத⁴, பி⁴க்க²வே, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; நோ ச ஸுதானம் த⁴ம்மானம் தா⁴ரணஜாதிகோ ஹோதி; நோ ச தா⁴தானம் த⁴ம்மானம் அத்தூ²பபரிக்கி²தா ஹோதி; நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ’’தி. து³தியம்.