3. மித்தஸுத்தம்

67. ‘‘‘ஸோ வத, பி⁴க்க²வே, பி⁴க்கு² பாபமித்தோ பாபஸஹாயோ பாபஸம்பவங்கோ, பாபமித்தே [பாபகே மித்தே (க.)] ஸேவமானோ ப⁴ஜமானோ பயிருபாஸமானோ, தேஸஞ்ச தி³ட்டா²னுக³திம் ஆபஜ்ஜமானோ ஆபி⁴ஸமாசாரிகம் த⁴ம்மம் பரிபூரேஸ்ஸதீ’தி நேதம் டா²னம் விஜ்ஜதி. ‘ஆபி⁴ஸமாசாரிகம் த⁴ம்மம் அபரிபூரேத்வா ஸேக²ம் த⁴ம்மம் பரிபூரேஸ்ஸதீ’தி நேதம் டா²னம் விஜ்ஜதி. ‘ஸேக²ம் த⁴ம்மம் அபரிபூரேத்வா ஸீலானி பரிபூரேஸ்ஸதீ’தி நேதம் டா²னம் விஜ்ஜதி. ‘ஸீலானி அபரிபூரேத்வா காமராக³ம் வா ரூபராக³ம் வா அரூபராக³ம் வா பஜஹிஸ்ஸதீ’தி நேதம் டா²னம் விஜ்ஜதி.

‘‘‘ஸோ வத, பி⁴க்க²வே, பி⁴க்கு² கல்யாணமித்தோ கல்யாணஸஹாயோ கல்யாணஸம்பவங்கோ, கல்யாணமித்தே ஸேவமானோ ப⁴ஜமானோ பயிருபாஸமானோ, தேஸஞ்ச தி³ட்டா²னுக³திம் ஆபஜ்ஜமானோ ஆபி⁴ஸமாசாரிகம் த⁴ம்மம் பரிபூரேஸ்ஸதீ’தி டா²னமேதம் விஜ்ஜதி. ‘ஆபி⁴ஸமாசாரிகம் த⁴ம்மம் பரிபூரேத்வா ஸேக²ம் த⁴ம்மம் பரிபூரேஸ்ஸதீ’தி டா²னமேதம் விஜ்ஜதி. ‘ஸேக²ம் த⁴ம்மம் பரிபூரேத்வா ஸீலானி பரிபூரேஸ்ஸதீ’தி டா²னமேதம் விஜ்ஜதி. ‘ஸீலானி பரிபூரேத்வா காமராக³ம் வா ரூபராக³ம் வா அரூபராக³ம் வா பஜஹிஸ்ஸதீ’தி டா²னமேதம் விஜ்ஜதீ’’தி. ததியம்.