4. ஸங்க³ணிகாராமஸுத்தம்

68. ‘‘‘ஸோ வத, பி⁴க்க²வே, பி⁴க்கு² ஸங்க³ணிகாராமோ ஸங்க³ணிகரதோ ஸங்க³ணிகாராமதம் அனுயுத்தோ, க³ணாராமோ க³ணரதோ க³ணாராமதம் அனுயுத்தோ, ஏகோ பவிவேகே அபி⁴ரமிஸ்ஸதீ’தி நேதம் டா²னம் விஜ்ஜதி. ‘ஏகோ பவிவேகே அனபி⁴ரமந்தோ சித்தஸ்ஸ நிமித்தம் க³ஹேஸ்ஸதீ’தி நேதம் டா²னம் விஜ்ஜதி. ‘சித்தஸ்ஸ நிமித்தம் அக³ண்ஹந்தோ ஸம்மாதி³ட்டி²ம் பரிபூரேஸ்ஸதீ’தி நேதம் டா²னம் விஜ்ஜதி. ‘ஸம்மாதி³ட்டி²ம் அபரிபூரேத்வா ஸம்மாஸமாதி⁴ம் பரிபூரேஸ்ஸதீ’தி நேதம் டா²னம் விஜ்ஜதி. ‘ஸம்மாஸமாதி⁴ம் அபரிபூரேத்வா ஸம்யோஜனானி பஜஹிஸ்ஸதீ’தி நேதம் டா²னம் விஜ்ஜதி. ‘ஸம்யோஜனானி அப்பஹாய நிப்³பா³னம் ஸச்சி²கரிஸ்ஸதீ’தி நேதம் டா²னம் விஜ்ஜதி.

‘‘‘ஸோ வத, பி⁴க்க²வே, பி⁴க்கு² ந ஸங்க³ணிகாராமோ ந ஸங்க³ணிகரதோ ந ஸங்க³ணிகாராமதம் அனுயுத்தோ, ந க³ணாராமோ ந க³ணரதோ ந க³ணாராமதம் அனுயுத்தோ, ஏகோ பவிவேகே அபி⁴ரமிஸ்ஸதீ’தி டா²னமேதம் விஜ்ஜதி. ‘ஏகோ பவிவேகே அபி⁴ரமந்தோ சித்தஸ்ஸ நிமித்தம் க³ஹேஸ்ஸதீ’தி டா²னமேதம் விஜ்ஜதி. ‘சித்தஸ்ஸ நிமித்தம் க³ண்ஹந்தோ ஸம்மாதி³ட்டி²ம் பரிபூரேஸ்ஸதீ’தி டா²னமேதம் விஜ்ஜதி. ‘ஸம்மாதி³ட்டி²ம் பரிபூரேத்வா ஸம்மாஸமாதி⁴ம் பரிபூரேஸ்ஸதீ’தி டா²னமேதம் விஜ்ஜதி. ‘ஸம்மாஸமாதி⁴ம் பரிபூரேத்வா ஸம்யோஜனானி பஜஹிஸ்ஸதீ’தி டா²னமேதம் விஜ்ஜதி. ‘ஸம்யோஜனானி பஹாய நிப்³பா³னம் ஸச்சி²கரிஸ்ஸதீ’தி டா²னமேதம் விஜ்ஜதீ’’தி. சதுத்த²ம்.