3. ச²ளபி⁴ஜாதிஸுத்தம்

57. ஏகம் ஸமயம் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘பூரணேன, ப⁴ந்தே, கஸ்ஸபேன ச²ளபி⁴ஜாதியோ பஞ்ஞத்தா – கண்ஹாபி⁴ஜாதி பஞ்ஞத்தா, நீலாபி⁴ஜாதி பஞ்ஞத்தா, லோஹிதாபி⁴ஜாதி பஞ்ஞத்தா, ஹலித்³தா³பி⁴ஜாதி பஞ்ஞத்தா, ஸுக்காபி⁴ஜாதி பஞ்ஞத்தா, பரமஸுக்காபி⁴ஜாதி பஞ்ஞத்தா.

‘‘தத்ரித³ம், ப⁴ந்தே, பூரணேன கஸ்ஸபேன கண்ஹாபி⁴ஜாதி பஞ்ஞத்தா, ஓரப்³பி⁴கா ஸூகரிகா ஸாகுணிகா மாக³விகா லுத்³தா³ மச்ச²கா⁴தகா சோரா சோரகா⁴தகா ப³ந்த⁴னாகா³ரிகா யே வா பனஞ்ஞேபி கேசி குரூரகம்மந்தா.

‘‘தத்ரித³ம், ப⁴ந்தே, பூரணேன கஸ்ஸபேன நீலாபி⁴ஜாதி பஞ்ஞத்தா, பி⁴க்கூ² கண்டகவுத்திகா யே வா பனஞ்ஞேபி கேசி கம்மவாதா³ க்ரியவாதா³.

‘‘தத்ரித³ம், ப⁴ந்தே, பூரணேன கஸ்ஸபேன லோஹிதாபி⁴ஜாதி பஞ்ஞத்தா, நிக³ண்டா² ஏகஸாடகா.

‘‘தத்ரித³ம், ப⁴ந்தே, பூரணேன கஸ்ஸபேன ஹலித்³தா³பி⁴ஜாதி பஞ்ஞத்தா, கி³ஹீ ஓதா³தவஸனா அசேலகஸாவகா.

‘‘தத்ரித³ம், ப⁴ந்தே, பூரணேன கஸ்ஸபேன ஸுக்காபி⁴ஜாதி பஞ்ஞத்தா, ஆஜீவகா ஆஜீவகினியோ.

‘‘தத்ரித³ம், ப⁴ந்தே, பூரணேன கஸ்ஸபேன பரமஸுக்காபி⁴ஜாதி பஞ்ஞத்தா, நந்தோ³ வச்சோ² கிஸோ ஸம்கிச்சோ மக்க²லி கோ³ஸாலோ. பூரணேன, ப⁴ந்தே, கஸ்ஸபேன இமா ச²ளபி⁴ஜாதியோ பஞ்ஞத்தா’’தி.

‘‘கிம் பனானந்த³, பூரணஸ்ஸ கஸ்ஸபஸ்ஸ ஸப்³போ³ லோகோ ஏதத³ப்³ப⁴னுஜானாதி இமா ச²ளபி⁴ஜாதியோ பஞ்ஞாபேது’’ந்தி? ‘‘நோ ஹேதம், ப⁴ந்தே’’. ‘‘ஸேய்யதா²பி, ஆனந்த³, புரிஸோ த³லித்³தோ³ அஸ்ஸகோ அனாள்ஹிகோ, தஸ்ஸ அகாமகஸ்ஸ பி³லம் ஓலக்³கே³ய்யும் – ‘இத³ம் தே, அம்போ⁴ புரிஸ, மம்ஸஞ்ச கா²தி³தப்³ப³ம், மூலஞ்ச அனுப்பதா³தப்³ப³’ந்தி. ஏவமேவம் கோ², ஆனந்த³, பூரணேன கஸ்ஸபேன அப்படிஞ்ஞாய ஏதேஸம் ஸமணப்³ராஹ்மணானம் இமா ச²ளபி⁴ஜாதியோ பஞ்ஞத்தா, யதா² தம் பா³லேன அப்³யத்தேன அகே²த்தஞ்ஞுனா அகுஸலேன.

‘‘அஹம் கோ² பனானந்த³, ச²ளபி⁴ஜாதியோ பஞ்ஞாபேமி. தம் ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி. ப⁴க³வா ஏதத³வோச – ‘‘கதமா சானந்த³, ச²ளபி⁴ஜாதியோ? இதா⁴னந்த³, ஏகச்சோ கண்ஹாபி⁴ஜாதியோ ஸமானோ கண்ஹம் த⁴ம்மம் அபி⁴ஜாயதி. இத⁴ பனானந்த³, ஏகச்சோ கண்ஹாபி⁴ஜாதியோ ஸமானோ ஸுக்கம் த⁴ம்மம் அபி⁴ஜாயதி. இத⁴ பனானந்த³, ஏகச்சோ கண்ஹாபி⁴ஜாதியோ ஸமானோ அகண்ஹம் அஸுக்கம் நிப்³பா³னம் அபி⁴ஜாயதி. இத⁴ பனானந்த³, ஏகச்சோ ஸுக்காபி⁴ஜாதியோ ஸமானோ கண்ஹம் த⁴ம்மம் அபி⁴ஜாயதி. இத⁴ பனானந்த³, ஏகச்சோ ஸுக்காபி⁴ஜாதியோ ஸமானோ ஸுக்கம் த⁴ம்மம் அபி⁴ஜாயதி. இத⁴ பனானந்த³, ஏகச்சோ ஸுக்காபி⁴ஜாதியோ ஸமானோ அகண்ஹம் அஸுக்கம் நிப்³பா³னம் அபி⁴ஜாயதி.

‘‘கத²ஞ்சானந்த³, கண்ஹாபி⁴ஜாதியோ ஸமானோ கண்ஹம் த⁴ம்மம் அபி⁴ஜாயதி? இதா⁴னந்த³, ஏகச்சோ நீசே குலே பச்சாஜாதோ ஹோதி – சண்டா³லகுலே வா நேஸாத³குலே வா வேனகுலே [வேணகுலே (ஸப்³ப³த்த²)] வா ரத²காரகுலே வா புக்குஸகுலே வா, த³லித்³தே³ அப்பன்னபானபோ⁴ஜனே கஸிரவுத்திகே, யத்த² கஸிரேன கா⁴ஸச்சா²தோ³ லப்³ப⁴தி. ஸோ ச ஹோதி து³ப்³ப³ண்ணோ து³த்³த³ஸிகோ ஓகோடிமகோ ப³வ்ஹாபா³தோ⁴ காணோ வா குணீ வா க²ஞ்ஜோ வா பக்க²ஹதோ வா, ந லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. ஏவம் கோ², ஆனந்த³, கண்ஹாபி⁴ஜாதியோ ஸமானோ கண்ஹம் த⁴ம்மம் அபி⁴ஜாயதி.

‘‘கத²ஞ்சானந்த³, கண்ஹாபி⁴ஜாதியோ ஸமானோ ஸுக்கம் த⁴ம்மம் அபி⁴ஜாயதி? இதா⁴னந்த³, ஏகச்சோ நீசே குலே பச்சாஜாதோ ஹோதி – சண்டா³லகுலே வா…பே… ஸேய்யாவஸத²பதீ³பேய்யஸ்ஸ. ஸோ காயேன ஸுசரிதம் சரதி, வாசாய ஸுசரிதம் சரதி, மனஸா ஸுசரிதம் சரதி. ஸோ காயேன ஸுசரிதம் சரித்வா, வாசாய ஸுசரிதம் சரித்வா, மனஸா ஸுசரிதம் சரித்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. ஏவம் கோ², ஆனந்த³, கண்ஹாபி⁴ஜாதியோ ஸமானோ ஸுக்கம் த⁴ம்மம் அபி⁴ஜாயதி.

‘‘கத²ஞ்சானந்த³, கண்ஹாபி⁴ஜாதியோ ஸமானோ அகண்ஹம் அஸுக்கம் நிப்³பா³னம் அபி⁴ஜாயதி? இதா⁴னந்த³, ஏகச்சோ நீசே குலே பச்சாஜாதோ ஹோதி – சண்டா³லகுலே வா…பே… ஸோ ச ஹோதி து³ப்³ப³ண்ணோ து³த்³த³ஸிகோ ஓகோடிமகோ. ஸோ கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜதி. ஸோ ஏவம் பப்³ப³ஜிதோ ஸமானோ பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே, சதூஸு ஸதிபட்டா²னேஸு ஸுப்பதிட்டி²தசித்தோ, ஸத்த போ³ஜ்ஜ²ங்கே³ யதா²பூ⁴தம் பா⁴வேத்வா அகண்ஹம் அஸுக்கம் நிப்³பா³னம் அபி⁴ஜாயதி. ஏவம் கோ², ஆனந்த³, கண்ஹாபி⁴ஜாதியோ ஸமானோ அகண்ஹம் அஸுக்கம் நிப்³பா³னம் அபி⁴ஜாயதி.

‘‘கத²ஞ்சானந்த³, ஸுக்காபி⁴ஜாதியோ ஸமானோ கண்ஹம் த⁴ம்மம் அபி⁴ஜாயதி? இதா⁴னந்த³, ஏகச்சோ உச்சே குலே பச்சாஜாதோ ஹோதி – க²த்தியமஹாஸாலகுலே வா ப்³ராஹ்மணமஹாஸாலகுலே வா க³ஹபதிமஹாஸாலகுலே வா, அட்³டே⁴ மஹத்³த⁴னே மஹாபோ⁴கே³ பஹூதஜாதரூபரஜதே பஹூதவித்தூபகரணே பஹூதத⁴னத⁴ஞ்ஞே. ஸோ ச ஹோதி அபி⁴ரூபோ த³ஸ்ஸனீயோ பாஸாதி³கோ பரமாய வண்ணபோக்க²ரதாய ஸமன்னாக³தோ, லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. ஏவம் கோ², ஆனந்த³, ஸுக்காபி⁴ஜாதியோ ஸமானோ கண்ஹம் த⁴ம்மம் அபி⁴ஜாயதி.

‘‘கத²ஞ்சானந்த³, ஸுக்காபி⁴ஜாதியோ ஸமானோ ஸுக்கம் த⁴ம்மம் அபி⁴ஜாயதி? இதா⁴னந்த³, ஏகச்சோ உச்சே குலே பச்சாஜாதோ ஹோதி – க²த்தியமஹாஸாலகுலே வா…பே… ஸேய்யாவஸத²பதீ³பேய்யஸ்ஸ. ஸோ காயேன ஸுசரிதம் சரதி, வாசாய ஸுசரிதம் சரதி, மனஸா ஸுசரிதம் சரதி. ஸோ காயேன ஸுசரிதம் சரித்வா, வாசாய ஸுசரிதம் சரித்வா, மனஸா ஸுசரிதம் சரித்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. ஏவம் கோ², ஆனந்த³, ஸுக்காபி⁴ஜாதியோ ஸமானோ ஸுக்கம் த⁴ம்மம் அபி⁴ஜாயதி.

‘‘கத²ஞ்சானந்த³, ஸுக்காபி⁴ஜாதியோ ஸமானோ அகண்ஹம் அஸுக்கம் நிப்³பா³னம் அபி⁴ஜாயதி? இதா⁴னந்த³, ஏகச்சோ உச்சே குலே பச்சாஜாதோ ஹோதி – க²த்தியமஹாஸாலகுலே வா ப்³ராஹ்மணமஹாஸாலகுலே வா க³ஹபதிமஹாஸாலகுலே வா, அட்³டே⁴ மஹத்³த⁴னே மஹாபோ⁴கே³ பஹூதஜாதரூபரஜதே பஹூதவித்தூபகரணே பஹூதத⁴னத⁴ஞ்ஞே. ஸோ ச ஹோதி அபி⁴ரூபோ த³ஸ்ஸனீயோ பாஸாதி³கோ பரமாய வண்ணபோக்க²ரதாய ஸமன்னாக³தோ, லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜதி. ஸோ ஏவம் பப்³ப³ஜிதோ ஸமானோ பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே, சதூஸு ஸதிபட்டா²னேஸு ஸுப்பதிட்டி²தசித்தோ, ஸத்த போ³ஜ்ஜ²ங்கே³ யதா²பூ⁴தம் பா⁴வேத்வா அகண்ஹம் அஸுக்கம் நிப்³பா³னம் அபி⁴ஜாயதி. ஏவம் கோ², ஆனந்த³, ஸுக்காபி⁴ஜாதியோ ஸமானோ அகண்ஹம் அஸுக்கம் நிப்³பா³னம் அபி⁴ஜாயதி. இமா கோ², ஆனந்த³, ச²ளபி⁴ஜாதியோ’’தி. ததியம்.