4. ஆஸவஸுத்தம்

58. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ.

கதமேஹி ச²ஹி? இத⁴, பி⁴க்க²வே, பி⁴க்கு²னோ யே ஆஸவா ஸம்வரா பஹாதப்³பா³ தே ஸம்வரேன பஹீனா ஹோந்தி, யே ஆஸவா படிஸேவனா பஹாதப்³பா³ தே படிஸேவனாய பஹீனா ஹோந்தி, யே ஆஸவா அதி⁴வாஸனா பஹாதப்³பா³ தே அதி⁴வாஸனாய பஹீனா ஹோந்தி, யே ஆஸவா பரிவஜ்ஜனா பஹாதப்³பா³ தே பரிவஜ்ஜனாய பஹீனா ஹோந்தி, யே ஆஸவா வினோத³னா பஹாதப்³பா³ தே வினோத³னாய பஹீனா ஹோந்தி, யே ஆஸவா பா⁴வனா பஹாதப்³பா³ தே பா⁴வனாய பஹீனா ஹோந்தி.

‘‘கதமே ச, பி⁴க்க²வே, ஆஸவா ஸம்வரா பஹாதப்³பா³ யே ஸம்வரேன பஹீனா ஹோந்தி? இத⁴, பி⁴க்க²வே, பி⁴க்கு² படிஸங்கா² யோனிஸோ சக்கு²ந்த்³ரியஸம்வரஸம்வுதோ விஹரதி. யம் ஹிஸ்ஸ, பி⁴க்க²வே, சக்கு²ந்த்³ரியஸம்வரம் அஸம்வுதஸ்ஸ விஹரதோ உப்பஜ்ஜேய்யும் ஆஸவா விகா⁴தபரிளாஹா, சக்கு²ந்த்³ரியஸம்வரம் ஸம்வுதஸ்ஸ விஹரதோ ஏவம்ஸ தே ஆஸவா விகா⁴தபரிளாஹா ந ஹோந்தி. படிஸங்கா² யோனிஸோ ஸோதிந்த்³ரிய…பே… கா⁴னிந்த்³ரிய… ஜிவ்ஹிந்த்³ரிய… காயிந்த்³ரிய… மனிந்த்³ரியஸம்வரஸம்வுதோ விஹரதி. யம் ஹிஸ்ஸ, பி⁴க்க²வே, மனிந்த்³ரியஸம்வரம் அஸம்வுதஸ்ஸ விஹரதோ உப்பஜ்ஜேய்யும் ஆஸவா விகா⁴தபரிளாஹா, மனிந்த்³ரியஸம்வரம் ஸம்வுதஸ்ஸ விஹரதோ ஏவம்ஸ தே ஆஸவா விகா⁴தபரிளாஹா ந ஹோந்தி. இமே வுச்சந்தி, பி⁴க்க²வே, ஆஸவா ஸம்வரா பஹாதப்³பா³ யே ஸம்வரேன பஹீனா ஹோந்தி.

‘‘கதமே ச, பி⁴க்க²வே, ஆஸவா படிஸேவனா பஹாதப்³பா³ யே படிஸேவனாய பஹீனா ஹோந்தி? இத⁴, பி⁴க்க²வே, பி⁴க்கு² படிஸங்கா² யோனிஸோ சீவரம் படிஸேவதி – ‘யாவதே³வ ஸீதஸ்ஸ படிகா⁴தாய, உண்ஹஸ்ஸ படிகா⁴தாய, ட³ம்ஸமகஸவாதாதபஸரீஸபஸம்ப²ஸ்ஸானம் [ட³ம்ஸ… ஸிரிம்ஸபஸம்ப²ஸ்ஸானம் (ஸீ. ஸ்யா. கம். பீ) ம. நி. 1.23] படிகா⁴தாய, யாவதே³வ ஹிரிகோபீனபடிச்சா²த³னத்த²ம்’. படிஸங்கா² யோனிஸோ பிண்ட³பாதம் படிஸேவதி – ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய, விஹிம்ஸூபரதியா ப்³ரஹ்மசரியானுக்³க³ஹாய, இதி புராணஞ்ச வேத³னம் படிஹங்கா²மி, நவஞ்ச வேத³னம் ந உப்பாதே³ஸ்ஸாமி, யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ ச’ [பா²ஸுவிஹாரோ சாதி (ஸீ. ஸ்யா. கம். பீ.)]. படிஸங்கா² யோனிஸோ ஸேனாஸனம் படிஸேவதி – ‘யாவதே³வ ஸீதஸ்ஸ படிகா⁴தாய, உண்ஹஸ்ஸ படிகா⁴தாய, ட³ம்ஸமகஸவாதாதபஸரீஸபஸம்ப²ஸ்ஸானம் படிகா⁴தாய, யாவதே³வ உதுபரிஸ்ஸயவினோத³னபடிஸல்லானாராமத்த²ம்’. படிஸங்கா² யோனிஸோ கி³லானப்பச்சயபே⁴ஸஜ்ஜபரிக்கா²ரம் படிஸேவதி – ‘யாவதே³வ உப்பன்னானம் வேய்யாபா³தி⁴கானம் வேத³னானம் படிகா⁴தாய, அப்³யாப³ஜ்ஜ²பரமதாயா’தி. யம் ஹிஸ்ஸ, பி⁴க்க²வே, அப்படிஸேவதோ உப்பஜ்ஜேய்யும் ஆஸவா விகா⁴தபரிளாஹா, படிஸேவதோ ஏவம்ஸ தே ஆஸவா விகா⁴தபரிளாஹா ந ஹோந்தி. இமே வுச்சந்தி, பி⁴க்க²வே, ஆஸவா படிஸேவனா பஹாதப்³பா³ யே படிஸேவனாய பஹீனா ஹோந்தி.

‘‘கதமே ச, பி⁴க்க²வே, ஆஸவா அதி⁴வாஸனா பஹாதப்³பா³ யே அதி⁴வாஸனாய பஹீனா ஹோந்தி? இத⁴, பி⁴க்க²வே, பி⁴க்கு² படிஸங்கா² யோனிஸோ க²மோ ஹோதி ஸீதஸ்ஸ உண்ஹஸ்ஸ, ஜிக⁴ச்சா²ய, பிபாஸாய, ட³ம்ஸமகஸவாதாதபஸரீஸபஸம்ப²ஸ்ஸானம், து³ருத்தானம் து³ராக³தானம் வசனபதா²னம், உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ ஹோதி. யம் ஹிஸ்ஸ, பி⁴க்க²வே, அனதி⁴வாஸதோ உப்பஜ்ஜேய்யும் ஆஸவா விகா⁴தபரிளாஹா, அதி⁴வாஸதோ ஏவம்ஸ தே ஆஸவா விகா⁴தபரிளாஹா ந ஹோந்தி. இமே வுச்சந்தி, பி⁴க்க²வே, ஆஸவா அதி⁴வாஸனா பஹாதப்³பா³ யே அதி⁴வாஸனாய பஹீனா ஹோந்தி.

‘‘கதமே ச, பி⁴க்க²வே, ஆஸவா பரிவஜ்ஜனா பஹாதப்³பா³ யே பரிவஜ்ஜனாய பஹீனா ஹோந்தி? இத⁴, பி⁴க்க²வே, பி⁴க்கு² படிஸங்கா² யோனிஸோ சண்ட³ம் ஹத்தி²ம் பரிவஜ்ஜேதி, சண்ட³ம் அஸ்ஸம் பரிவஜ்ஜேதி, சண்ட³ம் கோ³ணம் பரிவஜ்ஜேதி, சண்ட³ம் குக்குரம் பரிவஜ்ஜேதி, அஹிம் கா²ணும் கண்டகட்டா²னம் ஸோப்³ப⁴ம் பபாதம் சந்த³னிகம் ஓளிக³ல்லம், யதா²ரூபே அனாஸனே நிஸின்னம், யதா²ரூபே அகோ³சரே சரந்தம், யதா²ரூபே பாபகே மித்தே ப⁴ஜந்தம் விஞ்ஞூ ஸப்³ரஹ்மசாரீ பாபகேஸு டா²னேஸு ஓகப்பேய்யும், ஸோ தஞ்ச அனாஸனம் தஞ்ச அகோ³சரம் தே ச பாபகே மித்தே படிஸங்கா² யோனிஸோ பரிவஜ்ஜேதி. யம் ஹிஸ்ஸ, பி⁴க்க²வே, அபரிவஜ்ஜயதோ உப்பஜ்ஜேய்யும் ஆஸவா விகா⁴தபரிளாஹா, பரிவஜ்ஜயதோ ஏவம்ஸ தே ஆஸவா விகா⁴தபரிளாஹா ந ஹோந்தி. இமே வுச்சந்தி, பி⁴க்க²வே, ஆஸவா பரிவஜ்ஜனா பஹாதப்³பா³ யே பரிவஜ்ஜனாய பஹீனா ஹோந்தி.

‘‘கதமே ச, பி⁴க்க²வே, ஆஸவா வினோத³னா பஹாதப்³பா³ யே வினோத³னாய பஹீனா ஹோந்தி? இத⁴, பி⁴க்க²வே, பி⁴க்கு² படிஸங்கா² யோனிஸோ உப்பன்னம் காமவிதக்கம் நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி, படிஸங்கா² யோனிஸோ உப்பன்னம் ப்³யாபாத³விதக்கம்…பே… உப்பன்னம் விஹிம்ஸாவிதக்கம்… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி. யம் ஹிஸ்ஸ, பி⁴க்க²வே, அவினோத³யதோ உப்பஜ்ஜேய்யும் ஆஸவா விகா⁴தபரிளாஹா, வினோத³யதோ ஏவம்ஸ தே ஆஸவா விகா⁴தபரிளாஹா ந ஹோந்தி. இமே வுச்சந்தி, பி⁴க்க²வே, ஆஸவா வினோத³னா பஹாதப்³பா³ யே வினோத³னாய பஹீனா ஹோந்தி.

‘‘கதமே ச, பி⁴க்க²வே, ஆஸவா பா⁴வனா பஹாதப்³பா³ யே பா⁴வனாய பஹீனா ஹோந்தி? இத⁴, பி⁴க்க²வே, பி⁴க்கு² படிஸங்கா² யோனிஸோ ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம், படிஸங்கா² யோனிஸோ த⁴ம்மவிசயஸம்போ³ஜ்ஜ²ங்க³ம் பா⁴வேதி…பே… வீரியஸம்போ³ஜ்ஜ²ங்க³ம் பா⁴வேதி… பீதிஸம்போ³ஜ்ஜ²ங்க³ம் பா⁴வேதி… பஸ்ஸத்³தி⁴ஸம்போ³ஜ்ஜ²ங்க³ம் பா⁴வேதி… ஸமாதி⁴ஸம்போ³ஜ்ஜ²ங்க³ம் பா⁴வேதி… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். யம் ஹிஸ்ஸ, பி⁴க்க²வே, அபா⁴வயதோ உப்பஜ்ஜேய்யும் ஆஸவா விகா⁴தபரிளாஹா, பா⁴வயதோ ஏவம்ஸ தே ஆஸவா விகா⁴தபரிளாஹா ந ஹோந்தி. இமே வுச்சந்தி, பி⁴க்க²வே, ஆஸவா பா⁴வனா பஹாதப்³பா³ யே பா⁴வனாய பஹீனா ஹோந்தி.

‘‘இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’’தி. சதுத்த²ம்.