(25) 5. து³ச்சரிதவக்³கோ³

1. பட²மது³ச்சரிதஸுத்தம்

241. ‘‘பஞ்சிமே, பி⁴க்க²வே, ஆதீ³னவா து³ச்சரிதே. கதமே பஞ்ச? அத்தாபி அத்தானம் உபவத³தி; அனுவிச்ச விஞ்ஞூ க³ரஹந்தி; பாபகோ கித்திஸத்³தோ³ அப்³பு⁴க்³க³ச்ச²தி; ஸம்மூள்ஹோ காலம் கரோதி; காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. இமே கோ², பி⁴க்க²வே, பஞ்ச ஆதீ³னவா து³ச்சரிதே.

‘‘பஞ்சிமே, பி⁴க்க²வே, ஆனிஸம்ஸா ஸுசரிதே. கதமே பஞ்ச? அத்தாபி அத்தானம் ந உபவத³தி; அனுவிச்ச விஞ்ஞூ பஸம்ஸந்தி; கல்யாணோ கித்திஸத்³தோ³ அப்³பு⁴க்³க³ச்ச²தி; அஸம்மூள்ஹோ காலம் கரோதி; காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா ஸுசரிதே’’தி. பட²மம்.

2. பட²மகாயது³ச்சரிதஸுத்தம்

242. ‘‘பஞ்சிமே, பி⁴க்க²வே, ஆதீ³னவா காயது³ச்சரிதே…பே… ஆனிஸம்ஸா காயஸுசரிதே…பே…. து³தியம்.

3. பட²மவசீது³ச்சரிதஸுத்தம்

243. ‘‘பஞ்சிமே, பி⁴க்க²வே, ஆதீ³னவா வசீது³ச்சரிதே…பே… ஆனிஸம்ஸா வசீஸுசரிதே…பே…. ததியம்.

4. பட²மமனோது³ச்சரிதஸுத்தம்

244. ‘‘பஞ்சிமே, பி⁴க்க²வே, ஆதீ³னவா மனோது³ச்சரிதே…பே… ஆனிஸம்ஸா மனோஸுசரிதே. கதமே பஞ்ச? அத்தாபி அத்தானம் ந உபவத³தி; அனுவிச்ச விஞ்ஞூ பஸம்ஸந்தி; கல்யாணோ கித்திஸத்³தோ³ அப்³பு⁴க்³க³ச்ச²தி; அஸம்மூள்ஹோ காலம் கரோதி; காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா மனோஸுசரிதே’’தி. சதுத்த²ம்.

5. து³தியது³ச்சரிதஸுத்தம்

245. ‘‘பஞ்சிமே, பி⁴க்க²வே, ஆதீ³னவா து³ச்சரிதே. கதமே பஞ்ச? அத்தாபி அத்தானம் உபவத³தி; அனுவிச்ச விஞ்ஞூ க³ரஹந்தி; பாபகோ கித்திஸத்³தோ³ அப்³பு⁴க்³க³ச்ச²தி; ஸத்³த⁴ம்மா வுட்டா²தி; அஸத்³த⁴ம்மே பதிட்டா²தி. இமே கோ², பி⁴க்க²வே, பஞ்ச ஆதீ³னவா து³ச்சரிதே.

‘‘பஞ்சிமே, பி⁴க்க²வே, ஆனிஸம்ஸா ஸுசரிதே. கதமே பஞ்ச? அத்தாபி அத்தானம் ந உபவத³தி; அனுவிச்ச விஞ்ஞூ பஸம்ஸந்தி; கல்யாணோ கித்திஸத்³தோ³ அப்³பு⁴க்³க³ச்ச²தி; அஸத்³த⁴ம்மா வுட்டா²தி; ஸத்³த⁴ம்மே பதிட்டா²தி. இமே கோ², பி⁴க்க²வே, பஞ்ச ஆனிஸம்ஸா ஸுசரிதே’’தி. பஞ்சமம்.

6. து³தியகாயது³ச்சரிதஸுத்தம்

246. ‘‘பஞ்சிமே, பி⁴க்க²வே, ஆதீ³னவா காயது³ச்சரிதே…பே… ஆனிஸம்ஸா காயஸுசரிதே…பே…. ச²ட்ட²ம்.

7. து³தியவசீது³ச்சரிதஸுத்தம்

247. ‘‘பஞ்சிமே, பி⁴க்க²வே, ஆதீ³னவா வசீது³ச்சரிதே…பே… ஆனிஸம்ஸா வசீஸுசரிதே…பே…. ஸத்தமம்.

8. து³தியமனோது³ச்சரிதஸுத்தம்

248. ‘‘பஞ்சிமே, பி⁴க்க²வே, ஆதீ³னவா மனோது³ச்சரிதே…பே… ஆனிஸம்ஸா மனோஸுசரிதே. கதமே பஞ்ச? அத்தாபி அத்தானம் ந உபவத³தி; அனுவிச்ச விஞ்ஞூ பஸம்ஸந்தி; கல்யாணோ கித்திஸத்³தோ³ அப்³பு⁴க்³க³ச்ச²தி; அஸத்³த⁴ம்மா வுட்டா²தி; ஸத்³த⁴ம்மே பதிட்டா²தி. இமே கோ², பி⁴க்க²வே, பஞ்ச ஆனிஸம்ஸா மனோஸுசரிதே’’தி. அட்ட²மம்.

9. ஸிவதி²கஸுத்தம்

249. ‘‘பஞ்சிமே, பி⁴க்க²வே, ஆதீ³னவா ஸிவதி²காய [ஸீவதி²காய (ஸீ. ஸ்யா. கம். பீ.)]. கதமே பஞ்ச? அஸுசி, து³க்³க³ந்தா⁴, ஸப்படிப⁴யா, வாளானம் அமனுஸ்ஸானம் ஆவாஸோ, ப³ஹுனோ ஜனஸ்ஸ ஆரோத³னா – இமே கோ², பி⁴க்க²வே, பஞ்ச ஆதீ³னவா ஸிவதி²காய.

‘‘ஏவமேவம் கோ², பி⁴க்க²வே, பஞ்சிமே ஆதீ³னவா ஸிவதி²கூபமே புக்³க³லே. கதமே பஞ்ச? இத⁴, பி⁴க்க²வே, ஏகச்சோ புக்³க³லோ அஸுசினா காயகம்மேன ஸமன்னாக³தோ ஹோதி; அஸுசினா வசீகம்மேன ஸமன்னாக³தோ ஹோதி; அஸுசினா மனோகம்மேன ஸமன்னாக³தோ ஹோதி. இத³மஸ்ஸ அஸுசிதாய வதா³மி. ஸேய்யதா²பி ஸா, பி⁴க்க²வே, ஸிவதி²கா அஸுசி; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘தஸ்ஸ அஸுசினா காயகம்மேன ஸமன்னாக³தஸ்ஸ, அஸுசினா வசீகம்மேன ஸமன்னாக³தஸ்ஸ, அஸுசினா மனோகம்மேன ஸமன்னாக³தஸ்ஸ பாபகோ கித்திஸத்³தோ³ அப்³பு⁴க்³க³ச்ச²தி. இத³மஸ்ஸ து³க்³க³ந்த⁴தாய வதா³மி. ஸேய்யதா²பி ஸா, பி⁴க்க²வே, ஸிவதி²கா து³க்³க³ந்தா⁴; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘தமேனம் அஸுசினா காயகம்மேன ஸமன்னாக³தம், அஸுசினா வசீகம்மேன ஸமன்னாக³தம், அஸுசினா மனோகம்மேன ஸமன்னாக³தம் பேஸலா ஸப்³ரஹ்மசாரீ ஆரகா பரிவஜ்ஜந்தி. இத³மஸ்ஸ ஸப்படிப⁴யஸ்மிம் வதா³மி. ஸேய்யதா²பி ஸா, பி⁴க்க²வே, ஸிவதி²கா ஸப்படிப⁴யா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘ஸோ அஸுசினா காயகம்மேன ஸமன்னாக³தோ, அஸுசினா வசீகம்மேன ஸமன்னாக³தோ, அஸுசினா மனோகம்மேன ஸமன்னாக³தோ ஸபா⁴கே³ஹி புக்³க³லேஹி ஸத்³தி⁴ம் ஸம்வஸதி. இத³மஸ்ஸ வாளாவாஸஸ்மிம் வதா³மி. ஸேய்யதா²பி ஸா, பி⁴க்க²வே, ஸிவதி²கா வாளானம் அமனுஸ்ஸானம் ஆவாஸோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘தமேனம் அஸுசினா காயகம்மேன ஸமன்னாக³தம், அஸுசினா வசீகம்மேன ஸமன்னாக³தம், அஸுசினா மனோகம்மேன ஸமன்னாக³தம் பேஸலா ஸப்³ரஹ்மசாரீ தி³ஸ்வா கீ²யத⁴ம்மம் [கீ²யனத⁴ம்மம் (ஸீ.)] ஆபஜ்ஜந்தி – ‘அஹோ வத நோ து³க்க²ம் யே மயம் ஏவரூபேஹி புக்³க³லேஹி ஸத்³தி⁴ம் ஸம்வஸாமா’தி! இத³மஸ்ஸ ஆரோத³னாய வதா³மி. ஸேய்யதா²பி ஸா, பி⁴க்க²வே, ஸிவதி²கா ப³ஹுனோ ஜனஸ்ஸ ஆரோத³னா; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, பஞ்ச ஆதீ³னவா ஸிவதி²கூபமே புக்³க³லே’’தி. நவமம்.

10. புக்³க³லப்பஸாத³ஸுத்தம்

250. ‘‘பஞ்சிமே, பி⁴க்க²வே, ஆதீ³னவா புக்³க³லப்பஸாதே³. கதமே பஞ்ச? யஸ்மிம், பி⁴க்க²வே, புக்³க³லே புக்³க³லோ அபி⁴ப்பஸன்னோ ஹோதி, ஸோ ததா²ரூபம் ஆபத்திம் ஆபன்னோ ஹோதி யதா²ரூபாய ஆபத்தியா ஸங்கோ⁴ உக்கி²பதி. தஸ்ஸ ஏவம் ஹோதி – ‘யோ கோ² ம்யாயம் புக்³க³லோ பியோ மனாபோ ஸோ ஸங்கே⁴ன உக்கி²த்தோ’தி. பி⁴க்கூ²ஸு அப்பஸாத³ப³ஹுலோ ஹோதி. பி⁴க்கூ²ஸு அப்பஸாத³ப³ஹுலோ ஸமானோ அஞ்ஞே பி⁴க்கூ² ந ப⁴ஜதி. அஞ்ஞே பி⁴க்கூ² அப⁴ஜந்தோ ஸத்³த⁴ம்மம் ந ஸுணாதி. ஸத்³த⁴ம்மம் அஸுணந்தோ ஸத்³த⁴ம்மா பரிஹாயதி. அயம், பி⁴க்க²வே, பட²மோ ஆதீ³னவோ புக்³க³லப்பஸாதே³.

‘‘புன சபரம், பி⁴க்க²வே, யஸ்மிம் புக்³க³லே புக்³க³லோ அபி⁴ப்பஸன்னோ ஹோதி, ஸோ ததா²ரூபம் ஆபத்திம் ஆபன்னோ ஹோதி யதா²ரூபாய ஆபத்தியா ஸங்கோ⁴ அந்தே நிஸீதா³பேதி. தஸ்ஸ ஏவம் ஹோதி – ‘யோ கோ² ம்யாயம் புக்³க³லோ பியோ மனாபோ ஸோ ஸங்கே⁴ன அந்தே நிஸீதா³பிதோ’தி. பி⁴க்கூ²ஸு அப்பஸாத³ப³ஹுலோ ஹோதி. பி⁴க்கூ²ஸு அப்பஸாத³ப³ஹுலோ ஸமானோ அஞ்ஞே பி⁴க்கூ² ந ப⁴ஜதி. அஞ்ஞே பி⁴க்கூ² அப⁴ஜந்தோ ஸத்³த⁴ம்மம் ந ஸுணாதி. ஸத்³த⁴ம்மம் அஸுணந்தோ ஸத்³த⁴ம்மா பரிஹாயதி. அயம், பி⁴க்க²வே, து³தியோ ஆதீ³னவோ புக்³க³லப்பஸாதே³.

‘‘புன சபரம், பி⁴க்க²வே, யஸ்மிம் புக்³க³லே புக்³க³லோ அபி⁴ப்பஸன்னோ ஹோதி, ஸோ தி³ஸாபக்கந்தோ ஹோதி…பே… ஸோ விப்³ப⁴ந்தோ ஹோதி…பே… ஸோ காலங்கதோ ஹோதி. தஸ்ஸ ஏவம் ஹோதி – ‘யோ கோ² ம்யாயம் புக்³க³லோ பியோ மனாபோ ஸோ காலங்கதோ’தி. அஞ்ஞே பி⁴க்கூ² ந ப⁴ஜதி. அஞ்ஞே பி⁴க்கூ² அப⁴ஜந்தோ ஸத்³த⁴ம்மம் ந ஸுணாதி. ஸத்³த⁴ம்மம் அஸுணந்தோ ஸத்³த⁴ம்மா பரிஹாயதி. அயம், பி⁴க்க²வே, பஞ்சமோ ஆதீ³னவோ புக்³க³லப்பஸாதே³. இமே கோ², பி⁴க்க²வே, பஞ்ச ஆதீ³னவா புக்³க³லப்பஸாதே³’’தி. த³ஸமம்.

து³ச்சரிதவக்³கோ³ பஞ்சமோ.