5. பஞ்சமபண்ணாஸகம்

(21) 1. கிமிலவக்³கோ³

1. கிமிலஸுத்தம்

201. ஏகம் ஸமயம் ப⁴க³வா கிமிலாயம் [கிம்பி³லாயம் (ஸீ. பீ.) அ. நி. 6.40; 7.59] விஹரதி வேளுவனே. அத² கோ² ஆயஸ்மா கிமிலோ [கிம்பி³லோ (ஸீ. ஸ்யா. கம். பீ.)] யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா கிமிலோ ப⁴க³வந்தம் ஏதத³வோச – ‘‘கோ நு கோ², ப⁴ந்தே, ஹேது கோ பச்சயோ, யேன ததா²க³தே பரினிப்³பு³தே ஸத்³த⁴ம்மோ ந சிரட்டி²திகோ ஹோதீ’’தி? ‘‘இத⁴, கிமில, ததா²க³தே பரினிப்³பு³தே பி⁴க்கூ² பி⁴க்கு²னியோ உபாஸகா உபாஸிகாயோ ஸத்த²ரி அகா³ரவா விஹரந்தி அப்பதிஸ்ஸா, த⁴ம்மே அகா³ரவா விஹரந்தி அப்பதிஸ்ஸா, ஸங்கே⁴ அகா³ரவா விஹரந்தி அப்பதிஸ்ஸா, ஸிக்கா²ய அகா³ரவா விஹரந்தி அப்பதிஸ்ஸா, அஞ்ஞமஞ்ஞம் அகா³ரவா விஹரந்தி அப்பதிஸ்ஸா. அயம் கோ², கிமில, ஹேது அயம் பச்சயோ, யேன ததா²க³தே பரினிப்³பு³தே ஸத்³த⁴ம்மோ ந சிரட்டி²திகோ ஹோதீ’’தி.

‘‘கோ பன, ப⁴ந்தே, ஹேது கோ பச்சயோ, யேன ததா²க³தே பரினிப்³பு³தே ஸத்³த⁴ம்மோ சிரட்டி²திகோ ஹோதீ’’தி? ‘‘இத⁴, கிமில, ததா²க³தே பரினிப்³பு³தே பி⁴க்கூ² பி⁴க்கு²னியோ உபாஸகா உபாஸிகாயோ ஸத்த²ரி ஸகா³ரவா விஹரந்தி ஸப்பதிஸ்ஸா, த⁴ம்மே ஸகா³ரவா விஹரந்தி ஸப்பதிஸ்ஸா, ஸங்கே⁴ ஸகா³ரவா விஹரந்தி ஸப்பதிஸ்ஸா, ஸிக்கா²ய ஸகா³ரவா விஹரந்தி ஸப்பதிஸ்ஸா, அஞ்ஞமஞ்ஞம் ஸகா³ரவா விஹரந்தி ஸப்பதிஸ்ஸா. அயம் கோ², கிமில, ஹேது அயம் பச்சயோ, யேன ததா²க³தே பரினிப்³பு³தே ஸத்³த⁴ம்மோ சிரட்டி²திகோ ஹோதீ’’தி. பட²மம்.

2. த⁴ம்மஸ்ஸவனஸுத்தம்

202. ‘‘பஞ்சிமே, பி⁴க்க²வே, ஆனிஸம்ஸா த⁴ம்மஸ்ஸவனே. கதமே பஞ்ச? அஸ்ஸுதம் ஸுணாதி, ஸுதம் பரியோதா³பேதி, கங்க²ம் விதரதி [விஹனதி (ஸ்யா. கம். பீ. க.)], தி³ட்டி²ம் உஜும் கரோதி, சித்தமஸ்ஸ பஸீத³தி. இமே கோ², பி⁴க்க²வே, பஞ்ச ஆனிஸம்ஸா த⁴ம்மஸ்ஸவனே’’தி. து³தியம்.

3. அஸ்ஸாஜானீயஸுத்தம்

203. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ரஞ்ஞோ ப⁴த்³ரோ [ப⁴த்³தோ³ (பீ.)] அஸ்ஸாஜானீயோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்த்வேவ ஸங்க²ம் க³ச்ச²தி.

‘‘கதமேஹி பஞ்சஹி? அஜ்ஜவேன, ஜவேன, மத்³த³வேன, க²ந்தியா, ஸோரச்சேன – இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ ரஞ்ஞோ ப⁴த்³ரோ அஸ்ஸாஜானீயோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்த்வேவ ஸங்க²ம் க³ச்ச²தி. ‘‘ஏவமேவம் கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ.

‘‘கதமேஹி பஞ்சஹி? அஜ்ஜவேன, ஜவேன, மத்³த³வேன, க²ந்தியா, ஸோரச்சேன – இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’’தி. ததியம்.

4. ப³லஸுத்தம்

204. ‘‘பஞ்சிமானி, பி⁴க்க²வே, ப³லானி. கதமானி பஞ்ச? ஸத்³தா⁴ப³லம், ஹிரிப³லம், ஓத்தப்பப³லம், வீரியப³லம், பஞ்ஞாப³லம் – இமானி கோ², பி⁴க்க²வே, பஞ்ச ப³லானீ’’தி. சதுத்த²ம்.

5. சேதோகி²லஸுத்தம்

205. [அ. நி. 9.71; ம. நி. 1.185; தீ³. நி. 3.319] ‘‘பஞ்சிமே, பி⁴க்க²வே, சேதோகி²லா. கதமே பஞ்ச? இத⁴, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பட²மோ சேதோகி²லோ.

‘‘புன சபரம், பி⁴க்க²வே, பி⁴க்கு² த⁴ம்மே கங்க²தி…பே… ஸங்கே⁴ கங்க²தி…பே… ஸிக்கா²ய கங்க²தி…பே… ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ. யோ ஸோ, பி⁴க்க²வே, பி⁴க்கு² ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பஞ்சமோ சேதோகி²லோ. இமே கோ², பி⁴க்க²வே, பஞ்ச சேதோகி²லா’’தி. பஞ்சமம்.

6. வினிப³ந்த⁴ஸுத்தம்

206. [அ. நி. 9.72; தீ³. நி. 3.320] ‘‘பஞ்சிமே, பி⁴க்க²வே, சேதஸோவினிப³ந்தா⁴ [சேதோவினிப³த்³தா⁴ (ஸாரத்த²தீ³பனீடீகாயம்)]. கதமே பஞ்ச? இத⁴, பி⁴க்க²வே, பி⁴க்கு² காமேஸு அவீதராகோ³ [அவிக³தராகோ³ (க.)] ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ. யோ ஸோ, பி⁴க்க²வே, பி⁴க்கு² காமேஸு அவீதராகோ³ ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பட²மோ சேதஸோவினிப³ந்தோ⁴.

‘‘புன சபரம், பி⁴க்க²வே, பி⁴க்கு² காயே அவீதராகோ³ ஹோதி…பே… ரூபே அவீதராகோ³ ஹோதி…பே… யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி…பே… அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி. யோ ஸோ, பி⁴க்க²வே, பி⁴க்கு² அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பஞ்சமோ சேதஸோவினிப³ந்தோ⁴. இமே கோ², பி⁴க்க²வே, பஞ்ச சேதஸோவினிப³ந்தா⁴’’தி. ச²ட்ட²ம்.

7. யாகு³ஸுத்தம்

207. ‘‘பஞ்சிமே, பி⁴க்க²வே, ஆனிஸம்ஸா யாகு³யா. கதமே பஞ்ச? கு²த்³த³ம் [கு²த³ம் (ஸீ. பீ.) கு²தா⁴தி ஸக்கதானுலோமம். மஹாவ. 282] படிஹனதி, பிபாஸம் படிவினேதி, வாதம் அனுலோமேதி, வத்தி²ம் ஸோதே⁴தி, ஆமாவஸேஸம் பாசேதி. இமே கோ², பி⁴க்க²வே, பஞ்ச ஆனிஸம்ஸா யாகு³யா’’தி. ஸத்தமம்.

8. த³ந்தகட்ட²ஸுத்தம்

208. ‘‘பஞ்சிமே, பி⁴க்க²வே, ஆதீ³னவா த³ந்தகட்ட²ஸ்ஸ அகா²த³னே. கதமே பஞ்ச? அசக்கு²ஸ்ஸம், முக²ம் து³க்³க³ந்த⁴ம் ஹோதி, ரஸஹரணியோ ந விஸுஜ்ஜ²ந்தி, பித்தம் ஸேம்ஹம் ப⁴த்தம் பரியோனந்த⁴தி [பரியோனத்³த⁴ந்தி (ஸீ. பீ.), பரியோனத்³த⁴தி (ஸ்யா. கம். க.) சூளவ. 282 பஸ்ஸிதப்³ப³ம்], ப⁴த்தமஸ்ஸ நச்சா²தே³தி. இமே கோ², பி⁴க்க²வே, பஞ்ச ஆதீ³னவா த³ந்தகட்ட²ஸ்ஸ அகா²த³னே.

‘‘பஞ்சிமே, பி⁴க்க²வே, ஆனிஸம்ஸா த³ந்தகட்ட²ஸ்ஸ கா²த³னே. கதமே பஞ்ச? சக்கு²ஸ்ஸம், முக²ம் ந து³க்³க³ந்த⁴ம் ஹோதி, ரஸஹரணியோ விஸுஜ்ஜ²ந்தி, பித்தம் ஸேம்ஹம் ப⁴த்தம் ந பரியோனந்த⁴தி, ப⁴த்தமஸ்ஸ சா²தே³தி. இமே கோ², பி⁴க்க²வே, பஞ்ச ஆனிஸம்ஸா த³ந்தகட்ட²ஸ்ஸ கா²த³னே’’தி. அட்ட²மம்.

9. கீ³தஸ்ஸரஸுத்தம்

209. [சூளவ. 249] ‘‘பஞ்சிமே, பி⁴க்க²வே, ஆதீ³னவா ஆயதகேன கீ³தஸ்ஸரேன த⁴ம்மம் ப⁴ணந்தஸ்ஸ. கதமே பஞ்ச? அத்தனாபி தஸ்மிம் ஸரே ஸாரஜ்ஜதி, பரேபி தஸ்மிம் ஸரே ஸாரஜ்ஜந்தி, க³ஹபதிகாபி உஜ்ஜா²யந்தி – ‘யதே²வ மயம் கா³யாம, ஏவமேவம் கோ² ஸமணா ஸக்யபுத்தியா கா³யந்தீ’தி, ஸரகுத்திம்பி நிகாமயமானஸ்ஸ ஸமாதி⁴ஸ்ஸ ப⁴ங்கோ³ ஹோதி, பச்சி²மா ஜனதா தி³ட்டா²னுக³திம் ஆபஜ்ஜதி. இமே கோ², பி⁴க்க²வே, பஞ்ச ஆதீ³னவா ஆயதகேன கீ³தஸ்ஸரேன த⁴ம்மம் ப⁴ணந்தஸ்ஸா’’தி. நவமம்.

10. முட்ட²ஸ்ஸதிஸுத்தம்

210. [மஹாவ. 353] ‘‘பஞ்சிமே, பி⁴க்க²வே, ஆதீ³னவா முட்ட²ஸ்ஸதிஸ்ஸ அஸம்பஜானஸ்ஸ நித்³த³ம் ஓக்கமயதோ. கதமே பஞ்ச? து³க்க²ம் ஸுபதி, து³க்க²ம் படிபு³ஜ்ஜ²தி, பாபகம் ஸுபினம் பஸ்ஸதி, தே³வதா ந ரக்க²ந்தி, அஸுசி முச்சதி. இமே கோ², பி⁴க்க²வே, பஞ்ச ஆதீ³னவா முட்ட²ஸ்ஸதிஸ்ஸ அஸம்பஜானஸ்ஸ நித்³த³ம் ஓக்கமயதோ.

‘‘பஞ்சிமே, பி⁴க்க²வே, ஆனிஸம்ஸா உபட்டி²தஸ்ஸதிஸ்ஸ ஸம்பஜானஸ்ஸ நித்³த³ம் ஓக்கமயதோ. கதமே பஞ்ச? ஸுக²ம் ஸுபதி, ஸுக²ம் படிபு³ஜ்ஜ²தி, ந பாபகம் ஸுபினம் பஸ்ஸதி, தே³வதா ரக்க²ந்தி, அஸுசி ந முச்சதி. இமே கோ², பி⁴க்க²வே, பஞ்ச ஆனிஸம்ஸா உபட்டி²தஸ்ஸதிஸ்ஸ ஸம்பஜானஸ்ஸ நித்³த³ம் ஓக்கமயதோ’’தி. த³ஸமம்.

கிமிலவக்³கோ³ பட²மோ.

தஸ்ஸுத்³தா³னம் –

கிமிலோ த⁴ம்மஸ்ஸவனம், ஆஜானீயோ ப³லம் கி²லம்;

வினிப³ந்த⁴ம் யாகு³ கட்ட²ம், கீ³தம் முட்ட²ஸ்ஸதினா சாதி.

(22) 2. அக்கோஸகவக்³கோ³

1. அக்கோஸகஸுத்தம்

211. ‘‘யோ ஸோ, பி⁴க்க²வே, பி⁴க்கு² அக்கோஸகபரிபா⁴ஸகோ அரியூபவாதீ³ ஸப்³ரஹ்மசாரீனம், தஸ்ஸ பஞ்ச ஆதீ³னவா பாடிகங்கா². கதமே பஞ்ச? பாராஜிகோ வா ஹோதி சி²ன்னபரிபந்தோ² [சி²ன்னபரிப³ந்தோ⁴ (க.)], அஞ்ஞதரம் வா ஸம்கிலிட்ட²ம் ஆபத்திம் ஆபஜ்ஜதி, பா³ள்ஹம் வா ரோகா³தங்கம் பு²ஸதி, ஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. யோ ஸோ, பி⁴க்க²வே, பி⁴க்கு² அக்கோஸகபரிபா⁴ஸகோ அரியூபவாதீ³ ஸப்³ரஹ்மசாரீனம், தஸ்ஸ இமே பஞ்ச ஆதீ³னவா பாடிகங்கா²’’தி. பட²மம்.

2. ப⁴ண்ட³னகாரகஸுத்தம்

212. ‘‘யோ ஸோ, பி⁴க்க²வே, பி⁴க்கு² ப⁴ண்ட³னகாரகோ கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ, தஸ்ஸ பஞ்ச ஆதீ³னவா பாடிகங்கா². கதமே பஞ்ச? அனதி⁴க³தம் நாதி⁴க³ச்ச²தி, அதி⁴க³தா [அதி⁴க³தம் (ஸப்³ப³த்த²)] பரிஹாயதி, பாபகோ கித்திஸத்³தோ³ அப்³பு⁴க்³க³ச்ச²தி, ஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. யோ ஸோ, பி⁴க்க²வே, பி⁴க்கு² ப⁴ண்ட³னகாரகோ கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ, தஸ்ஸ இமே பஞ்ச ஆதீ³னவா பாடிகங்கா²’’தி. து³தியம்.

3. ஸீலஸுத்தம்

213. [மஹாவ. 209; தீ³. நி. 3.316] ‘‘பஞ்சிமே, பி⁴க்க²வே, ஆதீ³னவா து³ஸ்ஸீலஸ்ஸ ஸீலவிபத்தியா. கதமே பஞ்ச? இத⁴, பி⁴க்க²வே, து³ஸ்ஸீலோ ஸீலவிபன்னோ பமாதா³தி⁴கரணம் மஹதிம் போ⁴க³ஜானிம் நிக³ச்ச²தி. அயம், பி⁴க்க²வே, பட²மோ ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலஸ்ஸ ஸீலவிபன்னஸ்ஸ பாபகோ கித்திஸத்³தோ³ அப்³பு⁴க்³க³ச்ச²தி. அயம், பி⁴க்க²வே, து³தியோ ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலோ ஸீலவிபன்னோ யஞ்ஞதே³வ பரிஸம் உபஸங்கமதி – யதி³ க²த்தியபரிஸம், யதி³ ப்³ராஹ்மணபரிஸம், யதி³ க³ஹபதிபரிஸம், யதி³ ஸமணபரிஸம் – அவிஸாரதோ³ உபஸங்கமதி மங்குபூ⁴தோ. அயம், பி⁴க்க²வே, ததியோ ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலோ ஸீலவிபன்னோ ஸம்மூள்ஹோ காலம் கரோதி. அயம், பி⁴க்க²வே, சதுத்தோ² ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலோ ஸீலவிபன்னோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. அயம், பி⁴க்க²வே, பஞ்சமோ ஆதீ³னவோ து³ஸ்ஸீலஸ்ஸ ஸீலவிபத்தியா. இமே கோ², பி⁴க்க²வே, பஞ்ச ஆதீ³னவா து³ஸ்ஸீலஸ்ஸ ஸீலவிபத்தியா.

‘‘பஞ்சிமே, பி⁴க்க²வே, ஆனிஸம்ஸா ஸீலவதோ ஸீலஸம்பதா³ய. கதமே பஞ்ச? இத⁴, பி⁴க்க²வே, ஸீலவா ஸீலஸம்பன்னோ அப்பமாதா³தி⁴கரணம் மஹந்தம் போ⁴க³க்க²ந்த⁴ம் அதி⁴க³ச்ச²தி. அயம், பி⁴க்க²வே, பட²மோ ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவதோ ஸீலஸம்பன்னஸ்ஸ கல்யாணோ கித்திஸத்³தோ³ அப்³பு⁴க்³க³ச்ச²தி. அயம், பி⁴க்க²வே, து³தியோ ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவா ஸீலஸம்பன்னோ யஞ்ஞதே³வ பரிஸம் உபஸங்கமதி – யதி³ க²த்தியபரிஸம், யதி³ ப்³ராஹ்மணபரிஸம், யதி³ க³ஹபதிபரிஸம், யதி³ ஸமணபரிஸம் – விஸாரதோ³ உபஸங்கமதி அமங்குபூ⁴தோ. அயம் பி⁴க்க²வே, ததியோ ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவா ஸீலஸம்பன்னோ அஸம்மூள்ஹோ காலம் கரோதி. அயம், பி⁴க்க²வே, சதுத்தோ² ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவா ஸீலஸம்பன்னோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. அயம், பி⁴க்க²வே, பஞ்சமோ ஆனிஸம்ஸோ ஸீலவதோ ஸீலஸம்பதா³ய. இமே கோ², பி⁴க்க²வே, பஞ்ச ஆனிஸம்ஸா ஸீலவதோ ஸீலஸம்பதா³யா’’தி. ததியம்.

4. ப³ஹுபா⁴ணிஸுத்தம்

214. ‘‘பஞ்சிமே, பி⁴க்க²வே, ஆதீ³னவா ப³ஹுபா⁴ணிஸ்மிம் புக்³க³லே. கதமே பஞ்ச? முஸா ப⁴ணதி, பிஸுணம் ப⁴ணதி, ப²ருஸம் ப⁴ணதி, ஸம்ப²ப்பலாபம் ப⁴ணதி, காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. இமே கோ², பி⁴க்க²வே, பஞ்ச ஆதீ³னவா ப³ஹுபா⁴ணிஸ்மிம் புக்³க³லே.

‘‘பஞ்சிமே, பி⁴க்க²வே, ஆனிஸம்ஸா மந்தபா⁴ணிஸ்மிம் புக்³க³லே. கதமே பஞ்ச? ந முஸா ப⁴ணதி, ந பிஸுணம் ப⁴ணதி, ந ப²ருஸம் ப⁴ணதி, ந ஸம்ப²ப்பலாபம் ப⁴ணதி, காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா மந்தபா⁴ணிஸ்மிம் புக்³க³லே’’தி. சதுத்த²ம்.

5. பட²மஅக்க²ந்திஸுத்தம்

215. ‘‘பஞ்சிமே, பி⁴க்க²வே, ஆதீ³னவா அக்க²ந்தியா. கதமே பஞ்ச? ப³ஹுனோ ஜனஸ்ஸ அப்பியோ ஹோதி அமனாபோ, வேரப³ஹுலோ ச ஹோதி, வஜ்ஜப³ஹுலோ ச, ஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. இமே கோ², பி⁴க்க²வே, பஞ்ச ஆதீ³னவா அக்க²ந்தியா.

‘‘பஞ்சிமே, பி⁴க்க²வே, ஆனிஸம்ஸா க²ந்தியா. கதமே பஞ்ச? ப³ஹுனோ ஜனஸ்ஸ பியோ ஹோதி மனாபோ, ந வேரப³ஹுலோ ஹோதி, ந வஜ்ஜப³ஹுலோ, அஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா க²ந்தியா’’தி. பஞ்சமம்.

6. து³தியஅக்க²ந்திஸுத்தம்

216. ‘‘பஞ்சிமே, பி⁴க்க²வே, ஆதீ³னவா அக்க²ந்தியா. கதமே பஞ்ச? ப³ஹுனோ ஜனஸ்ஸ அப்பியோ ஹோதி அமனாபோ, லுத்³தோ³ ச ஹோதி, விப்படிஸாரீ ச, ஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. இமே கோ², பி⁴க்க²வே, பஞ்ச ஆதீ³னவா அக்க²ந்தியா.

‘‘பஞ்சிமே, பி⁴க்க²வே, ஆனிஸம்ஸா க²ந்தியா. கதமே பஞ்ச? ப³ஹுனோ ஜனஸ்ஸ பியோ ஹோதி மனாபோ, அலுத்³தோ³ ச ஹோதி, அவிப்படிஸாரீ ச, அஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா க²ந்தியா’’தி. ச²ட்ட²ம்.

7. பட²மஅபாஸாதி³கஸுத்தம்

217. ‘‘பஞ்சிமே, பி⁴க்க²வே, ஆதீ³னவா அபாஸாதி³கே. கதமே பஞ்ச? அத்தாபி அத்தானம் உபவத³தி, அனுவிச்ச விஞ்ஞூ க³ரஹந்தி, பாபகோ கித்திஸத்³தோ³ அப்³பு⁴க்³க³ச்ச²தி, ஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. இமே கோ², பி⁴க்க²வே, பஞ்ச ஆதீ³னவா அபாஸாதி³கே.

‘‘பஞ்சிமே, பி⁴க்க²வே, ஆனிஸம்ஸா பாஸாதி³கே. கதமே பஞ்ச? அத்தாபி அத்தானம் ந உபவத³தி, அனுவிச்ச விஞ்ஞூ பஸம்ஸந்தி, கல்யாணோ கித்திஸத்³தோ³ அப்³பு⁴க்³க³ச்ச²தி, அஸம்மூள்ஹோ காலம் கரோதி, காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா பாஸாதி³கே’’தி. ஸத்தமம்.

8. து³தியஅபாஸாதி³கஸுத்தம்

218. ‘‘பஞ்சிமே, பி⁴க்க²வே, ஆதீ³னவா அபாஸாதி³கே. கதமே பஞ்ச? அப்பஸன்னா நப்பஸீத³ந்தி, பஸன்னானஞ்ச ஏகச்சானம் அஞ்ஞத²த்தம் ஹோதி, ஸத்து²ஸாஸனம் அகதம் [ந கதம் (ஸ்யா. கம். க.)] ஹோதி, பச்சி²மா ஜனதா தி³ட்டா²னுக³திம் ஆபஜ்ஜதி, சித்தமஸ்ஸ நப்பஸீத³தி. இமே கோ², பி⁴க்க²வே, பஞ்ச ஆதீ³னவா அபாஸாதி³கே.

‘‘பஞ்சிமே, பி⁴க்க²வே, ஆனிஸம்ஸா பாஸாதி³கே. கதமே பஞ்ச? அப்பஸன்னா பஸீத³ந்தி, பஸன்னானஞ்ச பி⁴ய்யோபா⁴வோ ஹோதி, ஸத்து²ஸாஸனம் கதம் ஹோதி, பச்சி²மா ஜனதா தி³ட்டா²னுக³திம் ஆபஜ்ஜதி, சித்தமஸ்ஸ பஸீத³தி. இமே கோ², பி⁴க்க²வே, பஞ்ச ஆனிஸம்ஸா பாஸாதி³கே’’தி. அட்ட²மம்.

9. அக்³கி³ஸுத்தம்

219. ‘‘பஞ்சிமே, பி⁴க்க²வே, ஆதீ³னவா அக்³கி³ஸ்மிம். கதமே பஞ்ச? அசக்கு²ஸ்ஸோ, து³ப்³ப³ண்ணகரணோ, து³ப்³ப³லகரணோ, ஸங்க³ணிகாபவட்³ட⁴னோ [ஸங்க³ணிகாபவத்³த⁴னோ (ஸீ.), ஸங்க³ணிகாராமப³த்³த⁴னோ (க.)], திரச்சா²னகதா²பவத்தனிகோ ஹோதி. இமே கோ², பி⁴க்க²வே, பஞ்ச ஆதீ³னவா அக்³கி³ஸ்மி’’ந்தி. நவமம்.

10. மது⁴ராஸுத்தம்

220. ‘‘பஞ்சிமே, பி⁴க்க²வே, ஆதீ³னவா மது⁴ராயம். கதமே பஞ்ச? விஸமா, ப³ஹுரஜா, சண்ட³ஸுனகா², வாளயக்கா², து³ல்லப⁴பிண்டா³ – இமே கோ², பி⁴க்க²வே, பஞ்ச ஆதீ³னவா மது⁴ராய’’ந்தி. த³ஸமம்.

அக்கோஸகவக்³கோ³ து³தியோ.

தஸ்ஸுத்³தா³னம் –

அக்கோஸப⁴ண்ட³னஸீலம், ப³ஹுபா⁴ணீ த்³வே அக²ந்தியோ;

அபாஸாதி³கா த்³வே வுத்தா, அக்³கி³ஸ்மிம் மது⁴ரேன சாதி.

(23) 3. தீ³க⁴சாரிகவக்³கோ³

1. பட²மதீ³க⁴சாரிகஸுத்தம்

221. ‘‘பஞ்சிமே, பி⁴க்க²வே, ஆதீ³னவா தீ³க⁴சாரிகம் அனவத்த²சாரிகம் அனுயுத்தஸ்ஸ விஹரதோ. கதமே பஞ்ச? அஸ்ஸுதம் ந ஸுணாதி, ஸுதம் ந பரியோதா³பேதி, ஸுதேனேகச்சேன அவிஸாரதோ³ ஹோதி, கா³ள்ஹம் [பா³ள்ஹம் (ஸ்யா.)] ரோகா³தங்கம் பு²ஸதி, ந ச மித்தவா ஹோதி. இமே கோ², பி⁴க்க²வே, பஞ்ச ஆதீ³னவா தீ³க⁴சாரிகம் அனவத்த²சாரிகம் அனுயுத்தஸ்ஸ விஹரதோ.

‘‘பஞ்சிமே, பி⁴க்க²வே, ஆனிஸம்ஸா ஸமவத்த²சாரே. கதமே பஞ்ச? அஸ்ஸுதம் ஸுணாதி, ஸுதம் பரியோதா³பேதி, ஸுதேனேகச்சேன விஸாரதோ³ ஹோதி, ந கா³ள்ஹம் ரோகா³தங்கம் பு²ஸதி, மித்தவா ச ஹோதி. இமே கோ², பி⁴க்க²வே, பஞ்ச ஆனிஸம்ஸா ஸமவத்த²சாரே’’தி. பட²மம்.

2. து³தியதீ³க⁴சாரிகஸுத்தம்

222. ‘‘பஞ்சிமே, பி⁴க்க²வே, ஆதீ³னவா தீ³க⁴சாரிகம் அனவத்த²சாரிகம் அனுயுத்தஸ்ஸ விஹரதோ. கதமே பஞ்ச? அனதி⁴க³தம் நாதி⁴க³ச்ச²தி, அதி⁴க³தா பரிஹாயதி, அதி⁴க³தேனேகச்சேன அவிஸாரதோ³ ஹோதி, கா³ள்ஹம் ரோகா³தங்கம் பு²ஸதி, ந ச மித்தவா ஹோதி. இமே கோ², பி⁴க்க²வே, பஞ்ச ஆதீ³னவா தீ³க⁴சாரிகம் அனவத்த²சாரிகம் அனுயுத்தஸ்ஸ விஹரதோ.

‘‘பஞ்சிமே, பி⁴க்க²வே, ஆனிஸம்ஸா ஸமவத்த²சாரே. கதமே பஞ்ச? அனதி⁴க³தம் அதி⁴க³ச்ச²தி, அதி⁴க³தா ந பரிஹாயதி, அதி⁴க³தேனேகச்சேன விஸாரதோ³ ஹோதி, ந கா³ள்ஹம் ரோகா³தங்கம் பு²ஸதி, மித்தவா ச ஹோதி. இமே கோ², பி⁴க்க²வே, பஞ்ச ஆனிஸம்ஸா ஸமவத்த²சாரே’’தி. து³தியம்.

3. அதினிவாஸஸுத்தம்

223. ‘‘பஞ்சிமே, பி⁴க்க²வே, ஆதீ³னவா அதினிவாஸே. கதமே பஞ்ச? ப³ஹுப⁴ண்டோ³ ஹோதி ப³ஹுப⁴ண்ட³ஸன்னிசயோ, ப³ஹுபே⁴ஸஜ்ஜோ ஹோதி ப³ஹுபே⁴ஸஜ்ஜஸன்னிசயோ, ப³ஹுகிச்சோ ஹோதி ப³ஹுகரணீயோ ப்³யத்தோ கிம்கரணீயேஸு, ஸம்ஸட்டோ² விஹரதி க³ஹட்ட²பப்³ப³ஜிதேஹி அனனுலோமிகேன கி³ஹிஸம்ஸக்³கே³ன, தம்ஹா ச ஆவாஸா பக்கமந்தோ ஸாபேக்கோ² பக்கமதி. இமே கோ², பி⁴க்க²வே, பஞ்ச ஆதீ³னவா அதினிவாஸே.

‘‘பஞ்சிமே, பி⁴க்க²வே, ஆனிஸம்ஸா ஸமவத்த²வாஸே. கதமே பஞ்ச? ந ப³ஹுப⁴ண்டோ³ ஹோதி ந ப³ஹுப⁴ண்ட³ஸன்னிசயோ, ந ப³ஹுபே⁴ஸஜ்ஜோ ஹோதி ந ப³ஹுபே⁴ஸஜ்ஜஸன்னிசயோ, ந ப³ஹுகிச்சோ ஹோதி ந ப³ஹுகரணீயோ ந ப்³யத்தோ கிம்கரணீயேஸு, அஸம்ஸட்டோ² விஹரதி க³ஹட்ட²பப்³ப³ஜிதேஹி அனனுலோமிகேன கி³ஹிஸம்ஸக்³கே³ன, தம்ஹா ச ஆவாஸா பக்கமந்தோ அனபேக்கோ² பக்கமதி. இமே கோ², பி⁴க்க²வே, பஞ்ச ஆனிஸம்ஸா ஸமவத்த²வாஸே’’தி. ததியம்.

4. மச்ச²ரீஸுத்தம்

224. ‘‘பஞ்சிமே, பி⁴க்க²வே, ஆதீ³னவா அதினிவாஸே. கதமே பஞ்ச? ஆவாஸமச்ச²ரீ ஹோதி, குலமச்ச²ரீ ஹோதி, லாப⁴மச்ச²ரீ ஹோதி, வண்ணமச்ச²ரீ ஹோதி, த⁴ம்மமச்ச²ரீ ஹோதி. இமே கோ², பி⁴க்க²வே, பஞ்ச ஆதீ³னவா அதினிவாஸே.

‘‘பஞ்சிமே, பி⁴க்க²வே, ஆனிஸம்ஸா ஸமவத்த²வாஸே. கதமே பஞ்ச? ந ஆவாஸமச்ச²ரீ ஹோதி, ந குலமச்ச²ரீ ஹோதி, ந லாப⁴மச்ச²ரீ ஹோதி, ந வண்ணமச்ச²ரீ ஹோதி, ந த⁴ம்மமச்ச²ரீ ஹோதி. இமே கோ², பி⁴க்க²வே, பஞ்ச ஆனிஸம்ஸா ஸமவத்த²வாஸே’’தி. சதுத்த²ம்.

5. பட²மகுலூபகஸுத்தம்

225. ‘‘பஞ்சிமே, பி⁴க்க²வே, ஆதீ³னவா குலூபகே [குலுபகே (ஸ்யா. பீ.), குலூபகே³ (ஸீ.)]. கதமே பஞ்ச? அனாமந்தசாரே ஆபஜ்ஜதி, ரஹோ நிஸஜ்ஜாய ஆபஜ்ஜதி, படிச்ச²ன்னே ஆஸனே ஆபஜ்ஜதி, மாதுகா³மஸ்ஸ உத்தரி ச²ப்பஞ்சவாசாஹி த⁴ம்மம் தே³ஸேந்தோ ஆபஜ்ஜதி, காமஸங்கப்பப³ஹுலோ விஹரதி. இமே கோ², பி⁴க்க²வே, பஞ்ச ஆதீ³னவா குலூபகே’’தி. பஞ்சமம்.

6. து³தியகுலூபகஸுத்தம்

226. ‘‘பஞ்சிமே, பி⁴க்க²வே, ஆதீ³னவா குலூபகஸ்ஸ பி⁴க்கு²னோ அதிவேலம் குலேஸு ஸம்ஸட்ட²ஸ்ஸ விஹரதோ. கதமே பஞ்ச? மாதுகா³மஸ்ஸ அபி⁴ண்ஹத³ஸ்ஸனம், த³ஸ்ஸனே ஸதி ஸம்ஸக்³கோ³, ஸம்ஸக்³கே³ ஸதி விஸ்ஸாஸோ, விஸ்ஸாஸே ஸதி ஓதாரோ, ஓதிண்ணசித்தஸ்ஸேதம் பாடிகங்க²ம் – ‘அனபி⁴ரதோ வா ப்³ரஹ்மசரியம் சரிஸ்ஸதி அஞ்ஞதரம் வா ஸம்கிலிட்ட²ம் ஆபத்திம் ஆபஜ்ஜிஸ்ஸதி ஸிக்க²ம் வா பச்சக்கா²ய ஹீனாயாவத்திஸ்ஸதி’. இமே கோ², பி⁴க்க²வே, பஞ்ச ஆதீ³னவா குலூபகஸ்ஸ பி⁴க்கு²னோ அதிவேலம் குலேஸு ஸம்ஸட்ட²ஸ்ஸ விஹரதோ’’தி. ச²ட்ட²ம்.

7. போ⁴க³ஸுத்தம்

227. ‘‘பஞ்சிமே, பி⁴க்க²வே, ஆதீ³னவா போ⁴கே³ஸு. கதமே பஞ்ச? அக்³கி³ஸாதா⁴ரணா போ⁴கா³, உத³கஸாதா⁴ரணா போ⁴கா³, ராஜஸாதா⁴ரணா போ⁴கா³, சோரஸாதா⁴ரணா போ⁴கா³, அப்பியேஹி தா³யாதே³ஹி ஸாதா⁴ரணா போ⁴கா³. இமே கோ², பி⁴க்க²வே, பஞ்ச ஆதீ³னவா போ⁴கே³ஸு.

‘‘பஞ்சிமே, பி⁴க்க²வே, ஆனிஸம்ஸா போ⁴கே³ஸு. கதமே பஞ்ச? போ⁴கே³ நிஸ்ஸாய அத்தானம் ஸுகே²தி பீணேதி ஸம்மா ஸுக²ம் பரிஹரதி, மாதாபிதரோ ஸுகே²தி பீணேதி ஸம்மா ஸுக²ம் பரிஹரதி, புத்ததா³ரதா³ஸகம்மகரபோரிஸே ஸுகே²தி பீணேதி ஸம்மா ஸுக²ம் பரிஹரதி, மித்தாமச்சே ஸுகே²தி பீணேதி ஸம்மா ஸுக²ம் பரிஹரதி, ஸமணப்³ராஹ்மணேஸு உத்³த⁴க்³கி³கம் த³க்கி²ணம் பதிட்டா²பேதி ஸோவக்³கி³கம் ஸுக²விபாகம் ஸக்³க³ஸம்வத்தனிகம். இமே கோ², பி⁴க்க²வே, பஞ்ச ஆனிஸம்ஸா போ⁴கே³ஸூ’’தி. ஸத்தமம்.

8. உஸ்ஸூரப⁴த்தஸுத்தம்

228. ‘‘பஞ்சிமே, பி⁴க்க²வே, ஆதீ³னவா உஸ்ஸூரப⁴த்தே குலே. கதமே பஞ்ச? யே தே அதிதீ² பாஹுனா, தே ந காலேன படிபூஜேந்தி; யா தா ப³லிபடிக்³கா³ஹிகா தே³வதா, தா ந காலேன படிபூஜேந்தி; யே தே ஸமணப்³ராஹ்மணா ஏகப⁴த்திகா ரத்தூபரதா விரதா விகாலபோ⁴ஜனா, தே ந காலேன படிபூஜேந்தி; தா³ஸகம்மகரபோரிஸா விமுகா² கம்மம் கரோந்தி; தாவதகம்யேவ அஸமயேன பு⁴த்தம் அனோஜவந்தம் ஹோதி. இமே கோ², பி⁴க்க²வே, பஞ்ச ஆதீ³னவா உஸ்ஸூரப⁴த்தே குலே.

‘‘பஞ்சிமே, பி⁴க்க²வே, ஆனிஸம்ஸா ஸமயப⁴த்தே குலே. கதமே பஞ்ச? யே தே அதிதீ² பாஹுனா, தே காலேன படிபூஜேந்தி; யா தா ப³லிபடிக்³கா³ஹிகா தே³வதா, தா காலேன படிபூஜேந்தி; யே தே ஸமணப்³ராஹ்மணா ஏகப⁴த்திகா ரத்தூபரதா விரதா விகாலபோ⁴ஜனா, தே காலேன படிபூஜேந்தி; தா³ஸகம்மகரபோரிஸா அவிமுகா² கம்மம் கரோந்தி; தாவதகம்யேவ ஸமயேன பு⁴த்தம் ஓஜவந்தம் ஹோதி. இமே கோ², பி⁴க்க²வே, பஞ்ச ஆனிஸம்ஸா ஸமயப⁴த்தே குலே’’தி. அட்ட²மம்.

9. பட²மகண்ஹஸப்பஸுத்தம்

229. ‘‘பஞ்சிமே, பி⁴க்க²வே, ஆதீ³னவா கண்ஹஸப்பே. கதமே பஞ்ச? அஸுசி, து³க்³க³ந்தோ⁴, ஸபீ⁴ரு, ஸப்படிப⁴யோ, மித்தது³ப்³பீ⁴ – இமே கோ², பி⁴க்க²வே, பஞ்ச ஆதீ³னவா கண்ஹஸப்பே. ஏவமேவம் கோ², பி⁴க்க²வே, பஞ்சிமே ஆதீ³னவா மாதுகா³மே. கதமே பஞ்ச? அஸுசி, து³க்³க³ந்தோ⁴, ஸபீ⁴ரு, ஸப்படிப⁴யோ, மித்தது³ப்³பீ⁴ – இமே கோ², பி⁴க்க²வே, பஞ்ச ஆதீ³னவா மாதுகா³மே’’தி. நவமம்.

10. து³தியகண்ஹஸப்பஸுத்தம்

230. ‘‘பஞ்சிமே, பி⁴க்க²வே, ஆதீ³னவா கண்ஹஸப்பே. கதமே பஞ்ச? கோத⁴னோ, உபனாஹீ, கோ⁴ரவிஸோ, து³ஜ்ஜிவ்ஹோ, மித்தது³ப்³பீ⁴ – இமே கோ², பி⁴க்க²வே, பஞ்ச ஆதீ³னவா கண்ஹஸப்பே.

‘‘ஏவமேவம் கோ², பி⁴க்க²வே, பஞ்சிமே ஆதீ³னவா மாதுகா³மே. கதமே பஞ்ச? கோத⁴னோ, உபனாஹீ, கோ⁴ரவிஸோ, து³ஜ்ஜிவ்ஹோ, மித்தது³ப்³பீ⁴. தத்ரித³ம், பி⁴க்க²வே, மாதுகா³மஸ்ஸ கோ⁴ரவிஸதா – யேபு⁴ய்யேன, பி⁴க்க²வே, மாதுகா³மோ திப்³ப³ராகோ³. தத்ரித³ம், பி⁴க்க²வே, மாதுகா³மஸ்ஸ து³ஜ்ஜிவ்ஹதா – யேபு⁴ய்யேன, பி⁴க்க²வே, மாதுகா³மோ பிஸுணவாசோ. தத்ரித³ம், பி⁴க்க²வே, மாதுகா³மஸ்ஸ மித்தது³ப்³பி⁴தா – யேபு⁴ய்யேன, பி⁴க்க²வே, மாதுகா³மோ அதிசாரினீ. இமே கோ², பி⁴க்க²வே, பஞ்ச ஆதீ³னவா மாதுகா³மே’’தி. த³ஸமம்.

தீ³க⁴சாரிகவக்³கோ³ ததியோ.

தஸ்ஸுத்³தா³னம் –

த்³வே தீ³க⁴சாரிகா வுத்தா, அதினிவாஸமச்ச²ரீ;

த்³வே ச குலூபகா போ⁴கா³, ப⁴த்தம் ஸப்பாபரே து³வேதி.

(24) 4. ஆவாஸிகவக்³கோ³

1. ஆவாஸிகஸுத்தம்

231. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² அபா⁴வனீயோ ஹோதி. கதமேஹி பஞ்சஹி? ந ஆகப்பஸம்பன்னோ ஹோதி ந வத்தஸம்பன்னோ; ந ப³ஹுஸ்ஸுதோ ஹோதி ந ஸுதத⁴ரோ; ந படிஸல்லேகி²தா [ஸல்லேகி²தா (க. ஸீ.)] ஹோதி ந படிஸல்லானாராமோ; ந கல்யாணவாசோ ஹோதி ந கல்யாணவாக்கரணோ; து³ப்பஞ்ஞோ ஹோதி ஜளோ ஏளமூகோ³. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² அபா⁴வனீயோ ஹோதி.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² பா⁴வனீயோ ஹோதி. கதமேஹி பஞ்சஹி? ஆகப்பஸம்பன்னோ ஹோதி வத்தஸம்பன்னோ; ப³ஹுஸ்ஸுதோ ஹோதி ஸுதத⁴ரோ; படிஸல்லேகி²தா ஹோதி படிஸல்லானாராமோ; கல்யாணவாசோ ஹோதி கல்யாணவாக்கரணோ; பஞ்ஞவா ஹோதி அஜளோ அனேளமூகோ³. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² பா⁴வனீயோ ஹோதீ’’தி. பட²மம்.

2. பியஸுத்தம்

232. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² ஸப்³ரஹ்மசாரீனம் பியோ ச ஹோதி மனாபோ ச க³ரு ச பா⁴வனீயோ ச.

‘‘கதமேஹி பஞ்சஹி? ஸீலவா ஹோதி, பாதிமோக்க²ஸம்வரஸம்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹோந்தி தா⁴தா வசஸா பரிசிதா மனஸானுபேக்கி²தா தி³ட்டி²யா ஸுப்படிவித்³தா⁴; கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா; சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² ஸப்³ரஹ்மசாரீனம் பியோ ச ஹோதி மனாபோ ச க³ரு ச பா⁴வனீயோ சா’’தி. து³தியம்.

3. ஸோப⁴னஸுத்தம்

233. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸம் ஸோபே⁴தி. கதமேஹி பஞ்சஹி? ஸீலவா ஹோதி…பே… ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி…பே… தி³ட்டி²யா ஸுப்படிவித்³தா⁴; கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா; படிப³லோ ஹோதி உபஸங்கமந்தே த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேதும்; சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸம் ஸோபே⁴தீ’’தி. ததியம்.

4. ப³ஹூபகாரஸுத்தம்

234. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸஸ்ஸ ப³ஹூபகாரோ ஹோதி. கதமேஹி பஞ்சஹி? ஸீலவா ஹோதி…பே… ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி…பே… தி³ட்டி²யா ஸுப்படிவித்³தா⁴; க²ண்ட³பு²ல்லம் படிஸங்க²ரோதி; மஹா கோ² பன பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ² கி³ஹீனம் உபஸங்கமித்வா ஆரோசேதி – ‘மஹா கோ², ஆவுஸோ, பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ², கரோத² புஞ்ஞானி, ஸமயோ புஞ்ஞானி காது’ந்தி; சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸஸ்ஸ ப³ஹூபகாரோ ஹோதீ’’தி. சதுத்த²ம்.

5. அனுகம்பஸுத்தம்

235. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² கி³ஹீனம் [கி³ஹிம் (ஸ்யா.), கி³ஹீ (கத்த²சி)] அனுகம்பதி. கதமேஹி பஞ்சஹி? அதி⁴ஸீலே [அதி⁴ஸீலேஸு (ஸ்யா.)] ஸமாத³பேதி; த⁴ம்மத³ஸ்ஸனே நிவேஸேதி; கி³லானகே உபஸங்கமித்வா ஸதிம் உப்பாதே³தி – ‘அரஹக்³க³தம் ஆயஸ்மந்தோ ஸதிம் உபட்டா²பேதா²’தி; மஹா கோ² பன பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ² கி³ஹீனம் உபஸங்கமித்வா ஆரோசேதி – ‘மஹா கோ², ஆவுஸோ, பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ², கரோத² புஞ்ஞானி, ஸமயோ புஞ்ஞானி காது’ந்தி; யம் கோ² பனஸ்ஸ போ⁴ஜனம் தே³ந்தி லூக²ம் வா பணீதம் வா தம் அத்தனா பரிபு⁴ஞ்ஜதி, ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² கி³ஹீனம் அனுகம்பதீ’’தி. பஞ்சமம்.

6. பட²மஅவண்ணாரஹஸுத்தம்

236. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி; அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி; அனனுவிச்ச அபரியோகா³ஹேத்வா அப்பஸாத³னீயே டா²னே பஸாத³ம் உபத³ம்ஸேதி; அனனுவிச்ச அபரியோகா³ஹேத்வா பஸாத³னீயே டா²னே அப்பஸாத³ம் உபத³ம்ஸேதி; ஸத்³தா⁴தே³ய்யம் வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி; அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி; அனுவிச்ச பரியோகா³ஹேத்வா அப்பஸாத³னீயே டா²னே அப்பஸாத³ம் உபத³ம்ஸேதி; அனுவிச்ச பரியோகா³ஹேத்வா பஸாத³னீயே டா²னே பஸாத³ம் உபத³ம்ஸேதி; ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. ச²ட்ட²ம்.

7. து³தியஅவண்ணாரஹஸுத்தம்

237. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி; அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி; ஆவாஸமச்ச²ரீ ஹோதி ஆவாஸபலிகே³தீ⁴; குலமச்ச²ரீ ஹோதி குலபலிகே³தீ⁴; ஸத்³தா⁴தே³ய்யம் வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி; அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி; ந ஆவாஸமச்ச²ரீ ஹோதி ந ஆவாஸபலிகே³தீ⁴; ந குலமச்ச²ரீ ஹோதி ந குலபலிகே³தீ⁴; ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. ஸத்தமம்.

8. ததியஅவண்ணாரஹஸுத்தம்

238. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி; அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி; ஆவாஸமச்ச²ரீ ஹோதி; குலமச்ச²ரீ ஹோதி; லாப⁴மச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி; அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி; ந ஆவாஸமச்ச²ரீ ஹோதி; ந குலமச்ச²ரீ ஹோதி; ந லாப⁴மச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. அட்ட²மம்.

9. பட²மமச்ச²ரியஸுத்தம்

239. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ஆவாஸமச்ச²ரீ ஹோதி; குலமச்ச²ரீ ஹோதி; லாப⁴மச்ச²ரீ ஹோதி; வண்ணமச்ச²ரீ [த⁴ம்மமச்ச²ரீ (க.)] ஹோதி; ஸத்³தா⁴தே³ய்யம் வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ஆவாஸமச்ச²ரீ ஹோதி; ந குலமச்ச²ரீ ஹோதி; ந லாப⁴மச்ச²ரீ ஹோதி; ந வண்ணமச்ச²ரீ ஹோதி; ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. நவமம்.

10. து³தியமச்ச²ரியஸுத்தம்

240. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ஆவாஸமச்ச²ரீ ஹோதி; குலமச்ச²ரீ ஹோதி; லாப⁴மச்ச²ரீ ஹோதி; வண்ணமச்ச²ரீ ஹோதி; த⁴ம்மமச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ஆவாஸமச்ச²ரீ ஹோதி; ந குலமச்ச²ரீ ஹோதி; ந லாப⁴மச்ச²ரீ ஹோதி; ந வண்ணமச்ச²ரீ ஹோதி; ந த⁴ம்மமச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. த³ஸமம்.

ஆவாஸிகவக்³கோ³ சதுத்தோ².

தஸ்ஸுத்³தா³னம் –

ஆவாஸிகோ பியோ ச ஸோப⁴னோ,

ப³ஹூபகாரோ அனுகம்பகோ ச;

தயோ அவண்ணாரஹா சேவ,

மச்ச²ரியா து³வேபி சாதி [யதா²ப⁴தம் சாபி அவண்ணகே³தா⁴, சதுக்கமச்சே²ர பஞ்சமேன சாதி (ஸீ. ஸ்யா.) யதா²ப⁴தம் அவண்ணஞ்ச, சதுகோ மச்ச²ரியேன சாதி (க.)].

(25) 5. து³ச்சரிதவக்³கோ³

1. பட²மது³ச்சரிதஸுத்தம்

241. ‘‘பஞ்சிமே, பி⁴க்க²வே, ஆதீ³னவா து³ச்சரிதே. கதமே பஞ்ச? அத்தாபி அத்தானம் உபவத³தி; அனுவிச்ச விஞ்ஞூ க³ரஹந்தி; பாபகோ கித்திஸத்³தோ³ அப்³பு⁴க்³க³ச்ச²தி; ஸம்மூள்ஹோ காலம் கரோதி; காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. இமே கோ², பி⁴க்க²வே, பஞ்ச ஆதீ³னவா து³ச்சரிதே.

‘‘பஞ்சிமே, பி⁴க்க²வே, ஆனிஸம்ஸா ஸுசரிதே. கதமே பஞ்ச? அத்தாபி அத்தானம் ந உபவத³தி; அனுவிச்ச விஞ்ஞூ பஸம்ஸந்தி; கல்யாணோ கித்திஸத்³தோ³ அப்³பு⁴க்³க³ச்ச²தி; அஸம்மூள்ஹோ காலம் கரோதி; காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா ஸுசரிதே’’தி. பட²மம்.

2. பட²மகாயது³ச்சரிதஸுத்தம்

242. ‘‘பஞ்சிமே, பி⁴க்க²வே, ஆதீ³னவா காயது³ச்சரிதே…பே… ஆனிஸம்ஸா காயஸுசரிதே…பே…. து³தியம்.

3. பட²மவசீது³ச்சரிதஸுத்தம்

243. ‘‘பஞ்சிமே, பி⁴க்க²வே, ஆதீ³னவா வசீது³ச்சரிதே…பே… ஆனிஸம்ஸா வசீஸுசரிதே…பே…. ததியம்.

4. பட²மமனோது³ச்சரிதஸுத்தம்

244. ‘‘பஞ்சிமே, பி⁴க்க²வே, ஆதீ³னவா மனோது³ச்சரிதே…பே… ஆனிஸம்ஸா மனோஸுசரிதே. கதமே பஞ்ச? அத்தாபி அத்தானம் ந உபவத³தி; அனுவிச்ச விஞ்ஞூ பஸம்ஸந்தி; கல்யாணோ கித்திஸத்³தோ³ அப்³பு⁴க்³க³ச்ச²தி; அஸம்மூள்ஹோ காலம் கரோதி; காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமே கோ², பி⁴க்க²வே, பஞ்ச ஆனிஸம்ஸா மனோஸுசரிதே’’தி. சதுத்த²ம்.

5. து³தியது³ச்சரிதஸுத்தம்

245. ‘‘பஞ்சிமே, பி⁴க்க²வே, ஆதீ³னவா து³ச்சரிதே. கதமே பஞ்ச? அத்தாபி அத்தானம் உபவத³தி; அனுவிச்ச விஞ்ஞூ க³ரஹந்தி; பாபகோ கித்திஸத்³தோ³ அப்³பு⁴க்³க³ச்ச²தி; ஸத்³த⁴ம்மா வுட்டா²தி; அஸத்³த⁴ம்மே பதிட்டா²தி. இமே கோ², பி⁴க்க²வே, பஞ்ச ஆதீ³னவா து³ச்சரிதே.