(26) 6. உபஸம்பதா³வக்³கோ³

1. உபஸம்பாதே³தப்³ப³ஸுத்தம்

251. [மஹாவ. 84] ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தேன பி⁴க்கு²னா உபஸம்பாதே³தப்³ப³ம். கதமேஹி பஞ்சஹி? இத⁴, பி⁴க்க²வே, பி⁴க்கு² அஸேகே²ன ஸீலக்க²ந்தே⁴ன ஸமன்னாக³தோ ஹோதி; அஸேகே²ன ஸமாதி⁴க்க²ந்தே⁴ன ஸமன்னாக³தோ ஹோதி; அஸேகே²ன பஞ்ஞாக்க²ந்தே⁴ன ஸமன்னாக³தோ ஹோதி; அஸேகே²ன விமுத்திக்க²ந்தே⁴ன ஸமன்னாக³தோ ஹோதி; அஸேகே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தேன பி⁴க்கு²னா உபஸம்பாதே³தப்³ப³’’ந்தி. பட²மம்.

2. நிஸ்ஸயஸுத்தம்

252. [மஹாவ. 84] ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தேன பி⁴க்கு²னா நிஸ்ஸயோ தா³தப்³போ³. கதமேஹி பஞ்சஹி? இத⁴, பி⁴க்க²வே, பி⁴க்கு² அஸேகே²ன ஸீலக்க²ந்தே⁴ன ஸமன்னாக³தோ ஹோதி…பே… அஸேகே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி. இமேஹி…பே… நிஸ்ஸயோ தா³தப்³போ³’’தி. து³தியம்.

3. ஸாமணேரஸுத்தம்

253. [மஹாவ. 84] ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தேன பி⁴க்கு²னா ஸாமணேரோ உபட்டா²பேதப்³போ³. கதமேஹி பஞ்சஹி? இத⁴, பி⁴க்க²வே, பி⁴க்கு² அஸேகே²ன ஸீலக்க²ந்தே⁴ன ஸமன்னாக³தோ ஹோதி; அஸேகே²ன ஸமாதி⁴க்க²ந்தே⁴ன… அஸேகே²ன பஞ்ஞாக்க²ந்தே⁴ன… அஸேகே²ன விமுத்திக்க²ந்தே⁴ன… அஸேகே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தேன பி⁴க்கு²னா ஸாமணேரோ உபட்டா²பேதப்³போ³’’தி. ததியம்.

4. பஞ்சமச்ச²ரியஸுத்தம்

254. ‘‘பஞ்சிமானி, பி⁴க்க²வே, மச்ச²ரியானி. கதமானி பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம் – இமானி கோ², பி⁴க்க²வே, பஞ்ச மச்ச²ரியானி. இமேஸம் கோ², பி⁴க்க²வே, பஞ்சன்னம் மச்ச²ரியானம் ஏதம் படிகுட்ட²ம் [பதிகிட்ட²ம் (ஸீ. பீ.), படிக்கிட்ட²ம் (ஸ்யா. கம்.), படிகிட்ட²ம் (க.)], யதி³த³ம் த⁴ம்மமச்ச²ரிய’’ந்தி. சதுத்த²ம்.

5. மச்ச²ரியப்பஹானஸுத்தம்

255. ‘‘பஞ்சன்னம், பி⁴க்க²வே, மச்ச²ரியானம் பஹானாய ஸமுச்சே²தா³ய ப்³ரஹ்மசரியம் வுஸ்ஸதி. கதமேஸம் பஞ்சன்னம்? ஆவாஸமச்ச²ரியஸ்ஸ பஹானாய ஸமுச்சே²தா³ய ப்³ரஹ்மசரியம் வுஸ்ஸதி; குலமச்ச²ரியஸ்ஸ…பே… லாப⁴மச்ச²ரியஸ்ஸ… வண்ணமச்ச²ரியஸ்ஸ… த⁴ம்மமச்ச²ரியஸ்ஸ பஹானாய ஸமுச்சே²தா³ய ப்³ரஹ்மசரியம் வுஸ்ஸதி. இமேஸம் கோ², பி⁴க்க²வே, பஞ்சன்னம் மச்ச²ரியானம் பஹானாய ஸமுச்சே²தா³ய ப்³ரஹ்மசரியம் வுஸ்ஸதீ’’தி. பஞ்சமம்.

6. பட²மஜா²னஸுத்தம்

256. ‘‘பஞ்சிமே, பி⁴க்க²வே, த⁴ம்மே அப்பஹாய அப⁴ப்³போ³ பட²மம் ஜா²னம் உபஸம்பஜ்ஜ விஹரிதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம் – இமே கோ², பி⁴க்க²வே, பஞ்ச த⁴ம்மே அப்பஹாய அப⁴ப்³போ³ பட²மம் ஜா²னம் உபஸம்பஜ்ஜ விஹரிதும்.

‘‘பஞ்சிமே, பி⁴க்க²வே, த⁴ம்மே பஹாய ப⁴ப்³போ³ பட²மம் ஜா²னம் உபஸம்பஜ்ஜ விஹரிதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம் – இமே கோ², பி⁴க்க²வே, பஞ்ச த⁴ம்மே பஹாய ப⁴ப்³போ³ பட²மம் ஜா²னம் உபஸம்பஜ்ஜ விஹரிது’’ந்தி. ச²ட்ட²ம்.

7-13. து³தியஜா²னஸுத்தாதி³ஸத்தகம்

257-263. ‘‘பஞ்சிமே, பி⁴க்க²வே, த⁴ம்மே அப்பஹாய அப⁴ப்³போ³ து³தியம் ஜா²னம்…பே… அப⁴ப்³போ³ ததியம் ஜா²னம்… அப⁴ப்³போ³ சதுத்த²ம் ஜா²னம்… அப⁴ப்³போ³ ஸோதாபத்திப²லம்… அப⁴ப்³போ³ ஸகதா³கா³மிப²லம்… அப⁴ப்³போ³ அனாகா³மிப²லம்… அப⁴ப்³போ³ அரஹத்தம் [அரஹத்தப²லம் (ஸீ.)] ஸச்சி²காதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம் – இமே கோ², பி⁴க்க²வே, பஞ்ச த⁴ம்மே அப்பஹாய அப⁴ப்³போ³ அரஹத்தம் ஸச்சி²காதும்.

‘‘பஞ்சிமே, பி⁴க்க²வே, த⁴ம்மே பஹாய ப⁴ப்³போ³ து³தியம் ஜா²னம்…பே… ப⁴ப்³போ³ ததியம் ஜா²னம்… ப⁴ப்³போ³ சதுத்த²ம் ஜா²னம்… ப⁴ப்³போ³ ஸோதாபத்திப²லம்… ப⁴ப்³போ³ ஸகதா³கா³மிப²லம்… ப⁴ப்³போ³ அனாகா³மிப²லம்… ப⁴ப்³போ³ அரஹத்தம் ஸச்சி²காதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம் – இமே கோ², பி⁴க்க²வே, பஞ்ச த⁴ம்மே பஹாய ப⁴ப்³போ³ அரஹத்தம் ஸச்சி²காது’’ந்தி. தேரஸமம்.

14. அபரபட²மஜா²னஸுத்தம்

264. ‘‘பஞ்சிமே, பி⁴க்க²வே, த⁴ம்மே அப்பஹாய அப⁴ப்³போ³ பட²மம் ஜா²னம் உபஸம்பஜ்ஜ விஹரிதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், அகதஞ்ஞுதம் அகதவேதி³தம் – இமே கோ², பி⁴க்க²வே, பஞ்ச த⁴ம்மே அப்பஹாய அப⁴ப்³போ³ பட²மம் ஜா²னம் உபஸம்பஜ்ஜ விஹரிதும்.

‘‘பஞ்சிமே, பி⁴க்க²வே, த⁴ம்மே பஹாய ப⁴ப்³போ³ பட²மம் ஜா²னம் உபஸம்பஜ்ஜ விஹரிதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், அகதஞ்ஞுதம் அகதவேதி³தம் – இமே கோ², பி⁴க்க²வே, பஞ்ச த⁴ம்மே பஹாய ப⁴ப்³போ³ பட²மம் ஜா²னம் உபஸம்பஜ்ஜ விஹரிது’’ந்தி. சுத்³த³ஸமம்.

15-21. அபரது³தியஜா²னஸுத்தாதி³ஸத்தகம்

265-271. ‘‘பஞ்சிமே, பி⁴க்க²வே, த⁴ம்மே அப்பஹாய அப⁴ப்³போ³ து³தியம் ஜா²னம்…பே… ததியம் ஜா²னம்… சதுத்த²ம் ஜா²னம்… ஸோதாபத்திப²லம்… ஸகதா³கா³மிப²லம்… அனாகா³மிப²லம்… அரஹத்தம் ஸச்சி²காதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், அகதஞ்ஞுதம் அகதவேதி³தம் – இமே கோ², பி⁴க்க²வே, பஞ்ச த⁴ம்மே அப்பஹாய அப⁴ப்³போ³ அரஹத்தம் ஸச்சி²காதும்.

‘‘பஞ்சிமே, பி⁴க்க²வே, த⁴ம்மே பஹாய ப⁴ப்³போ³ து³தியம் ஜா²னம்…பே… ததியம் ஜா²னம்… சதுத்த²ம் ஜா²னம்… ஸோதாபத்திப²லம்… ஸகதா³கா³மிப²லம்… அனாகா³மிப²லம்… அரஹத்தம் ஸச்சி²காதும். கதமே பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், அகதஞ்ஞுதம் அகதவேதி³தம் – இமே கோ², பி⁴க்க²வே, பஞ்ச த⁴ம்மே பஹாய ப⁴ப்³போ³ அரஹத்தம் ஸச்சி²காது’’ந்தி. ஏகவீஸதிமம்.

உபஸம்பதா³வக்³கோ³ ச²ட்டோ².