(24) 4. ஆவாஸிகவக்³கோ³

1. ஆவாஸிகஸுத்தம்

231. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² அபா⁴வனீயோ ஹோதி. கதமேஹி பஞ்சஹி? ந ஆகப்பஸம்பன்னோ ஹோதி ந வத்தஸம்பன்னோ; ந ப³ஹுஸ்ஸுதோ ஹோதி ந ஸுதத⁴ரோ; ந படிஸல்லேகி²தா [ஸல்லேகி²தா (க. ஸீ.)] ஹோதி ந படிஸல்லானாராமோ; ந கல்யாணவாசோ ஹோதி ந கல்யாணவாக்கரணோ; து³ப்பஞ்ஞோ ஹோதி ஜளோ ஏளமூகோ³. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² அபா⁴வனீயோ ஹோதி.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² பா⁴வனீயோ ஹோதி. கதமேஹி பஞ்சஹி? ஆகப்பஸம்பன்னோ ஹோதி வத்தஸம்பன்னோ; ப³ஹுஸ்ஸுதோ ஹோதி ஸுதத⁴ரோ; படிஸல்லேகி²தா ஹோதி படிஸல்லானாராமோ; கல்யாணவாசோ ஹோதி கல்யாணவாக்கரணோ; பஞ்ஞவா ஹோதி அஜளோ அனேளமூகோ³. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² பா⁴வனீயோ ஹோதீ’’தி. பட²மம்.

2. பியஸுத்தம்

232. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² ஸப்³ரஹ்மசாரீனம் பியோ ச ஹோதி மனாபோ ச க³ரு ச பா⁴வனீயோ ச.

‘‘கதமேஹி பஞ்சஹி? ஸீலவா ஹோதி, பாதிமோக்க²ஸம்வரஸம்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹோந்தி தா⁴தா வசஸா பரிசிதா மனஸானுபேக்கி²தா தி³ட்டி²யா ஸுப்படிவித்³தா⁴; கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா; சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² ஸப்³ரஹ்மசாரீனம் பியோ ச ஹோதி மனாபோ ச க³ரு ச பா⁴வனீயோ சா’’தி. து³தியம்.

3. ஸோப⁴னஸுத்தம்

233. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸம் ஸோபே⁴தி. கதமேஹி பஞ்சஹி? ஸீலவா ஹோதி…பே… ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி…பே… தி³ட்டி²யா ஸுப்படிவித்³தா⁴; கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா; படிப³லோ ஹோதி உபஸங்கமந்தே த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேதும்; சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸம் ஸோபே⁴தீ’’தி. ததியம்.

4. ப³ஹூபகாரஸுத்தம்

234. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸஸ்ஸ ப³ஹூபகாரோ ஹோதி. கதமேஹி பஞ்சஹி? ஸீலவா ஹோதி…பே… ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி…பே… தி³ட்டி²யா ஸுப்படிவித்³தா⁴; க²ண்ட³பு²ல்லம் படிஸங்க²ரோதி; மஹா கோ² பன பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ² கி³ஹீனம் உபஸங்கமித்வா ஆரோசேதி – ‘மஹா கோ², ஆவுஸோ, பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ², கரோத² புஞ்ஞானி, ஸமயோ புஞ்ஞானி காது’ந்தி; சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² ஆவாஸஸ்ஸ ப³ஹூபகாரோ ஹோதீ’’தி. சதுத்த²ம்.

5. அனுகம்பஸுத்தம்

235. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² கி³ஹீனம் [கி³ஹிம் (ஸ்யா.), கி³ஹீ (கத்த²சி)] அனுகம்பதி. கதமேஹி பஞ்சஹி? அதி⁴ஸீலே [அதி⁴ஸீலேஸு (ஸ்யா.)] ஸமாத³பேதி; த⁴ம்மத³ஸ்ஸனே நிவேஸேதி; கி³லானகே உபஸங்கமித்வா ஸதிம் உப்பாதே³தி – ‘அரஹக்³க³தம் ஆயஸ்மந்தோ ஸதிம் உபட்டா²பேதா²’தி; மஹா கோ² பன பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ² கி³ஹீனம் உபஸங்கமித்வா ஆரோசேதி – ‘மஹா கோ², ஆவுஸோ, பி⁴க்கு²ஸங்கோ⁴ அபி⁴க்கந்தோ நானாவேரஜ்ஜகா பி⁴க்கூ², கரோத² புஞ்ஞானி, ஸமயோ புஞ்ஞானி காது’ந்தி; யம் கோ² பனஸ்ஸ போ⁴ஜனம் தே³ந்தி லூக²ம் வா பணீதம் வா தம் அத்தனா பரிபு⁴ஞ்ஜதி, ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² கி³ஹீனம் அனுகம்பதீ’’தி. பஞ்சமம்.

6. பட²மஅவண்ணாரஹஸுத்தம்

236. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி; அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி; அனனுவிச்ச அபரியோகா³ஹேத்வா அப்பஸாத³னீயே டா²னே பஸாத³ம் உபத³ம்ஸேதி; அனனுவிச்ச அபரியோகா³ஹேத்வா பஸாத³னீயே டா²னே அப்பஸாத³ம் உபத³ம்ஸேதி; ஸத்³தா⁴தே³ய்யம் வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி; அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி; அனுவிச்ச பரியோகா³ஹேத்வா அப்பஸாத³னீயே டா²னே அப்பஸாத³ம் உபத³ம்ஸேதி; அனுவிச்ச பரியோகா³ஹேத்வா பஸாத³னீயே டா²னே பஸாத³ம் உபத³ம்ஸேதி; ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. ச²ட்ட²ம்.

7. து³தியஅவண்ணாரஹஸுத்தம்

237. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி; அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி; ஆவாஸமச்ச²ரீ ஹோதி ஆவாஸபலிகே³தீ⁴; குலமச்ச²ரீ ஹோதி குலபலிகே³தீ⁴; ஸத்³தா⁴தே³ய்யம் வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி; அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி; ந ஆவாஸமச்ச²ரீ ஹோதி ந ஆவாஸபலிகே³தீ⁴; ந குலமச்ச²ரீ ஹோதி ந குலபலிகே³தீ⁴; ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. ஸத்தமம்.

8. ததியஅவண்ணாரஹஸுத்தம்

238. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி; அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி; ஆவாஸமச்ச²ரீ ஹோதி; குலமச்ச²ரீ ஹோதி; லாப⁴மச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி; அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி; ந ஆவாஸமச்ச²ரீ ஹோதி; ந குலமச்ச²ரீ ஹோதி; ந லாப⁴மச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. அட்ட²மம்.

9. பட²மமச்ச²ரியஸுத்தம்

239. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ஆவாஸமச்ச²ரீ ஹோதி; குலமச்ச²ரீ ஹோதி; லாப⁴மச்ச²ரீ ஹோதி; வண்ணமச்ச²ரீ [த⁴ம்மமச்ச²ரீ (க.)] ஹோதி; ஸத்³தா⁴தே³ய்யம் வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ஆவாஸமச்ச²ரீ ஹோதி; ந குலமச்ச²ரீ ஹோதி; ந லாப⁴மச்ச²ரீ ஹோதி; ந வண்ணமச்ச²ரீ ஹோதி; ஸத்³தா⁴தே³ய்யம் ந வினிபாதேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. நவமம்.

10. து³தியமச்ச²ரியஸுத்தம்

240. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ஆவாஸமச்ச²ரீ ஹோதி; குலமச்ச²ரீ ஹோதி; லாப⁴மச்ச²ரீ ஹோதி; வண்ணமச்ச²ரீ ஹோதி; த⁴ம்மமச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ஆவாஸமச்ச²ரீ ஹோதி; ந குலமச்ச²ரீ ஹோதி; ந லாப⁴மச்ச²ரீ ஹோதி; ந வண்ணமச்ச²ரீ ஹோதி; ந த⁴ம்மமச்ச²ரீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. த³ஸமம்.

ஆவாஸிகவக்³கோ³ சதுத்தோ².