1. அவஜானாதிஸுத்தம்

141. ‘‘பஞ்சிமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே பஞ்ச? த³த்வா அவஜானாதி, ஸம்வாஸேன அவஜானாதி, ஆதே⁴ய்யமுகோ² [ஆதி³ய்யமுகோ² (ஸீ.), ஆதே³ய்யமுகோ² (ஸ்யா. கம்.), ஆதி³யமுகோ² (பீ.) அட்ட²கதா²ய பட²மஸம்வண்ணனானுரூபம். பு. ப. 193 பஸ்ஸிதப்³ப³ம்] ஹோதி, லோலோ ஹோதி, மந்தோ³ மோமூஹோ ஹோதி [மந்தோ³ ஹோதி மோமூஹோ (ஸீ.)].

‘‘கத²ஞ்ச, பி⁴க்க²வே, புக்³க³லோ த³த்வா அவஜானாதி? இத⁴, பி⁴க்க²வே, புக்³க³லோ புக்³க³லஸ்ஸ தே³தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரம். தஸ்ஸ ஏவம் ஹோதி – ‘அஹம் தே³மி; அயம் படிக்³க³ண்ஹாதீ’தி. தமேனம் த³த்வா அவஜானாதி. ஏவம் கோ², பி⁴க்க²வே, புக்³க³லோ த³த்வா அவஜானாதி.

‘‘கத²ஞ்ச, பி⁴க்க²வே, புக்³க³லோ ஸம்வாஸேன அவஜானாதி? இத⁴, பி⁴க்க²வே, புக்³க³லோ புக்³க³லேன ஸத்³தி⁴ம் ஸம்வஸதி த்³வே வா தீணி வா வஸ்ஸானி. தமேனம் ஸம்வாஸேன அவஜானாதி. ஏவம் கோ², பி⁴க்க²வே, புக்³க³லோ ஸம்வாஸேன அவஜானாதி.

‘‘கத²ஞ்ச, பி⁴க்க²வே, புக்³க³லோ ஆதே⁴ய்யமுகோ² ஹோதி? இத⁴, பி⁴க்க²வே, ஏகச்சோ புக்³க³லோ பரஸ்ஸ வண்ணே வா அவண்ணே வா பா⁴ஸியமானே தம் கி²ப்பஞ்ஞேவ அதி⁴முச்சிதா [அதி⁴முச்சிதோ (ஸ்யா.)] ஹோதி. ஏவம் கோ², பி⁴க்க²வே, புக்³க³லோ ஆதே⁴ய்யமுகோ² ஹோதி.

‘‘கத²ஞ்ச, பி⁴க்க²வே, புக்³க³லோ லோலோ ஹோதி? இத⁴, பி⁴க்க²வே, ஏகச்சோ புக்³க³லோ இத்தரஸத்³தோ⁴ ஹோதி இத்தரப⁴த்தீ இத்தரபேமோ இத்தரப்பஸாதோ³. ஏவம் கோ², பி⁴க்க²வே, புக்³க³லோ லோலோ ஹோதி.

‘‘கத²ஞ்ச, பி⁴க்க²வே, புக்³க³லோ மந்தோ³ மோமூஹோ ஹோதி? இத⁴, பி⁴க்க²வே, ஏகச்சோ புக்³க³லோ குஸலாகுஸலே த⁴ம்மே ந ஜானாதி, ஸாவஜ்ஜானவஜ்ஜே த⁴ம்மே ந ஜானாதி, ஹீனப்பணீதே த⁴ம்மே ந ஜானாதி, கண்ஹஸுக்கஸப்படிபா⁴கே³ த⁴ம்மே ந ஜானாதி. ஏவம் கோ², பி⁴க்க²வே, புக்³க³லோ மந்தோ³ மோமூஹோ ஹோதி. இமே கோ², பி⁴க்க²வே, பஞ்ச புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பட²மம்.