10. ஸோதஸுத்தம்

140. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ரஞ்ஞோ நாகோ³ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ம்த்வேவ ஸங்க²ம் க³ச்ச²தி. கதமேஹி பஞ்சஹி? இத⁴, பி⁴க்க²வே, ரஞ்ஞோ நாகோ³ ஸோதா ச ஹோதி, ஹந்தா ச, ரக்கி²தா ச, க²ந்தா ச, க³ந்தா ச.

‘‘கத²ஞ்ச, பி⁴க்க²வே, ரஞ்ஞோ நாகோ³ ஸோதா ஹோதி? இத⁴, பி⁴க்க²வே, ரஞ்ஞோ நாகோ³ யமேனம் ஹத்தி²த³ம்மஸாரதி² [ஹத்தி²த³ம்மஸாரதீ² (ஸீ.)] காரணம் காரேதி – யதி³ வா கதபுப்³ப³ம் யதி³ வா அகதபுப்³ப³ம் – தம் அட்டி²ம் கத்வா [அட்டி²கத்வா (ஸீ. ஸ்யா. கம். பீ.) அ. நி. 4.114] மனஸி கத்வா ஸப்³ப³ம் சேதஸா [ஸப்³ப³சேதஸா (?)] ஸமன்னாஹரித்வா ஓஹிதஸோதோ ஸுணாதி. ஏவம் கோ², பி⁴க்க²வே, ரஞ்ஞோ நாகோ³ ஸோதா ஹோதி.

‘‘கத²ஞ்ச, பி⁴க்க²வே, ரஞ்ஞோ நாகோ³ ஹந்தா ஹோதி? இத⁴, பி⁴க்க²வே, ரஞ்ஞோ நாகோ³ ஸங்கா³மக³தோ ஹத்தி²ம்பி ஹனதி [ஹந்தி (ஸீ. பீ.)], ஹத்தா²ருஹம்பி ஹனதி, அஸ்ஸம்பி ஹனதி, அஸ்ஸாருஹம்பி ஹனதி, ரத²ம்பி ஹனதி, ரதி²கம்பி [ரதா²ருஹம்பி (பீ.)] ஹனதி, பத்திகம்பி ஹனதி. ஏவம் கோ², பி⁴க்க²வே, ரஞ்ஞோ நாகோ³ ஹந்தா ஹோதி.

‘‘கத²ஞ்ச, பி⁴க்க²வே, ரஞ்ஞோ நாகோ³ ரக்கி²தா ஹோதி? இத⁴, பி⁴க்க²வே, ரஞ்ஞோ நாகோ³ ஸங்கா³மக³தோ ரக்க²தி புரிமம் காயம், ரக்க²தி பச்சி²மம் காயம், ரக்க²தி புரிமே பாதே³, ரக்க²தி பச்சி²மே பாதே³, ரக்க²தி ஸீஸம், ரக்க²தி கண்ணே, ரக்க²தி த³ந்தே, ரக்க²தி ஸோண்ட³ம், ரக்க²தி வாலதி⁴ம், ரக்க²தி ஹத்தா²ருஹம். ஏவம் கோ², பி⁴க்க²வே, ரஞ்ஞோ நாகோ³ ரக்கி²தா ஹோதி.

‘‘கத²ஞ்ச, பி⁴க்க²வே, ரஞ்ஞோ நாகோ³ க²ந்தா ஹோதி? இத⁴, பி⁴க்க²வே, ரஞ்ஞோ நாகோ³ ஸங்கா³மக³தோ க²மோ ஹோதி ஸத்திப்பஹாரானம் அஸிப்பஹாரானம் உஸுப்பஹாரானம் ப²ரஸுப்பஹாரானம் பே⁴ரிபணவஸங்க²திணவனின்னாத³ஸத்³தா³னம். ஏவம் கோ², பி⁴க்க²வே, ரஞ்ஞோ நாகோ³ க²ந்தா ஹோதி.

‘‘கத²ஞ்ச, பி⁴க்க²வே, ரஞ்ஞோ நாகோ³ க³ந்தா ஹோதி? இத⁴, பி⁴க்க²வே, ரஞ்ஞோ நாகோ³ யமேனம் ஹத்தி²த³ம்மஸாரதி² தி³ஸம் பேஸேதி – யதி³ வா க³தபுப்³ப³ம் யதி³ வா அக³தபுப்³ப³ம் – தம் கி²ப்பமேவ க³ந்தா ஹோதி. ஏவம் கோ², பி⁴க்க²வே, ரஞ்ஞோ நாகோ³ க³ந்தா ஹோதி.

‘‘இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ ரஞ்ஞோ நாகோ³ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ம்த்வேவ ஸங்க²ம் க³ச்ச²தி.

‘‘ஏவமேவம் கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ. கதமேஹி பஞ்சஹி? இத⁴, பி⁴க்க²வே, பி⁴க்கு² ஸோதா ச ஹோதி, ஹந்தா ச, ரக்கி²தா ச, க²ந்தா ச, க³ந்தா ச.

‘‘கத²ஞ்ச, பி⁴க்க²வே, பி⁴க்கு² ஸோதா ஹோதி? இத⁴, பி⁴க்க²வே, பி⁴க்கு² ததா²க³தப்பவேதி³தே த⁴ம்மவினயே தே³ஸியமானே அட்டி²ம்கத்வா மனஸி கத்வா ஸப்³ப³ம் சேதஸா ஸமன்னாஹரித்வா ஓஹிதஸோதோ த⁴ம்மம் ஸுணாதி. ஏவம் கோ², பி⁴க்க²வே, பி⁴க்கு² ஸோதா ஹோதி.

‘‘கத²ஞ்ச, பி⁴க்க²வே, பி⁴க்கு² ஹந்தா ஹோதி? இத⁴, பி⁴க்க²வே, பி⁴க்கு² உப்பன்னம் காமவிதக்கம் நாதி⁴வாஸேதி, பஜஹதி வினோதே³தி (ஹனதி) [( ) நத்தி² ஸீ. பீ. போத்த²கேஸு அ. நி. 4.114] ப்³யந்தீகரோதி அனபா⁴வம் க³மேதி; உப்பன்னம் ப்³யாபாத³விதக்கம்…பே… உப்பன்னம் விஹிம்ஸாவிதக்கம்…பே… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி, பஜஹதி வினோதே³தி (ஹனதி) [( ) நத்தி² ஸீ. பீ. போத்த²கேஸு அ. நி. 4.114] ப்³யந்தீகரோதி அனபா⁴வம் க³மேதி. ஏவம் கோ², பி⁴க்க²வே, பி⁴க்கு² ஹந்தா ஹோதி.

‘‘கத²ஞ்ச, பி⁴க்க²வே, பி⁴க்கு² ரக்கி²தா ஹோதி? இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி சக்கு²ந்த்³ரியம்; சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம்; மனிந்த்³ரியே ஸம்வரம் ஆபஜ்ஜதி. ஏவம் கோ², பி⁴க்க²வே, பி⁴க்கு² ரக்கி²தா ஹோதி.

‘‘கத²ஞ்ச, பி⁴க்க²வே, பி⁴க்கு² க²ந்தா ஹோதி? இத⁴, பி⁴க்க²வே, பி⁴க்கு² க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸ [… ஸிரிம்ஸப (ஸீ. ஸ்யா. கம். பீ.)] பஸம்ப²ஸ்ஸானம்; து³ருத்தானம் து³ராக³தானம் வசனபதா²னம் உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ ஹோதி. ஏவம் கோ², பி⁴க்க²வே, பி⁴க்கு² க²ந்தா ஹோதி.

‘‘கத²ஞ்ச, பி⁴க்க²வே, பி⁴க்கு² க³ந்தா ஹோதி? இத⁴, பி⁴க்க²வே, பி⁴க்கு² யா ஸா தி³ஸா அக³தபுப்³பா³ இமினா தீ³கே⁴ன அத்³து⁴னா, யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³னம், தம் கி²ப்பஞ்ஞேவ க³ந்தா ஹோதி. ஏவம் கோ², பி⁴க்க²வே, பி⁴க்கு² க³ந்தா ஹோதி.

‘‘இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி…பே… அனுத்தரம் புஞ்ஞக்கே²த்தம் லோகஸ்ஸா’’தி. த³ஸமம்.

ராஜவக்³கோ³ சதுத்தோ².