6. ஆனந்த³ஸுத்தம்

106. ஏகம் ஸமயம் ப⁴க³வா கோஸம்பி³யம் விஹரதி கோ⁴ஸிதாராமே. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச –

‘‘கித்தாவதா நு கோ², ப⁴ந்தே, பி⁴க்கு² ஸங்கே⁴ [பி⁴க்கு²ம்ஸம்கோ⁴ (ஸ்யா. பீ.)] விஹரந்தோ பா²ஸும் விஹரேய்யா’’தி? ‘‘யதோ கோ², ஆனந்த³, பி⁴க்கு² அத்தனா [அத்தனா ச (பீ. க.)] ஸீலஸம்பன்னோ ஹோதி, நோ [நோ ச (க.)] பரம் அதி⁴ஸீலே ஸம்பவத்தா [ஸம்பவத்தா ஹோதி (க.)]; ஏத்தாவதாபி கோ², ஆனந்த³, பி⁴க்கு² ஸங்கே⁴ விஹரந்தோ பா²ஸும் விஹரேய்யா’’தி.

‘‘ஸியா பன, ப⁴ந்தே, அஞ்ஞோபி பரியாயோ யதா² பி⁴க்கு² ஸங்கே⁴ விஹரந்தோ பா²ஸும் விஹரேய்யா’’தி? ‘‘ஸியா, ஆனந்த³ [ஆனந்தா³தி ப⁴க³வா ஆவோச (ஸ்யா. பீ.)]! யதோ கோ², ஆனந்த³, பி⁴க்கு² அத்தனா ஸீலஸம்பன்னோ ஹோதி, நோ பரம் அதி⁴ஸீலே ஸம்பவத்தா; அத்தானுபேக்கீ² ச ஹோதி, நோ பரானுபேக்கீ²; ஏத்தாவதாபி கோ², ஆனந்த³, பி⁴க்கு² ஸங்கே⁴ விஹரந்தோ பா²ஸும் விஹரேய்யா’’தி.

‘‘ஸியா பன, ப⁴ந்தே, அஞ்ஞோபி பரியாயோ யதா² பி⁴க்கு² ஸங்கே⁴ விஹரந்தோ பா²ஸும் விஹரேய்யா’’தி? ‘‘ஸியா, ஆனந்த³! யதோ கோ², ஆனந்த³, பி⁴க்கு² அத்தனா ஸீலஸம்பன்னோ ஹோதி, நோ பரம் அதி⁴ஸீலே ஸம்பவத்தா; அத்தானுபேக்கீ² ச ஹோதி, நோ பரானுபேக்கீ²; அபஞ்ஞாதோ ச ஹோதி, தேன ச அபஞ்ஞாதகேன நோ பரிதஸ்ஸதி; சதுன்னஞ்ச [சதுன்னம் (பீ. க.)] ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; ஏத்தாவதாபி கோ², ஆனந்த³, பி⁴க்கு² ஸங்கே⁴ விஹரந்தோ பா²ஸும் விஹரேய்யா’’தி.

‘‘ஸியா பன, ப⁴ந்தே, அஞ்ஞோபி பரியாயோ யதா² பி⁴க்கு² ஸங்கே⁴ விஹரந்தோ பா²ஸும் விஹரேய்யா’’தி? ‘‘ஸியா, ஆனந்த³! யதோ கோ², ஆனந்த³, பி⁴க்கு² அத்தனா ஸீலஸம்பன்னோ ஹோதி, நோ பரம் அதி⁴ஸீலே ஸம்பவத்தா; அத்தானுபேக்கீ² ச ஹோதி, நோ பரானுபேக்கீ²; அபஞ்ஞாதோ ச ஹோதி, தேன ச அபஞ்ஞாதகேன நோ பரிதஸ்ஸதி; சதுன்னஞ்ச ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; ஆஸவானஞ்ச [ஆஸவானம் (ஸீ. பீ. க.)] க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி; ஏத்தாவதாபி கோ², ஆனந்த³, பி⁴க்கு² ஸங்கே⁴ விஹரந்தோ பா²ஸும் விஹரேய்ய.

‘‘இமம்ஹா சாஹம், ஆனந்த³, பா²ஸுவிஹாரா அஞ்ஞோ பா²ஸுவிஹாரோ உத்தரிதரோ வா பணீததரோ வா நத்தீ²தி வதா³மீ’’தி. ச²ட்ட²ம்.