4. ஸமணஸுகு²மாலஸுத்தம்

104. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஸமணேஸு ஸமணஸுகு²மாலோ ஹோதி.

‘‘கதமேஹி பஞ்சஹி? இத⁴, பி⁴க்க²வே, பி⁴க்கு² யாசிதோவ ப³ஹுலம் சீவரம் பரிபு⁴ஞ்ஜதி, அப்பம் அயாசிதோ; யாசிதோவ ப³ஹுலம் பிண்ட³பாதம் பரிபு⁴ஞ்ஜதி, அப்பம் அயாசிதோ; யாசிதோவ ப³ஹுலம் ஸேனாஸனம் பரிபு⁴ஞ்ஜதி, அப்பம் அயாசிதோ; யாசிதோவ ப³ஹுலம் கி³லானப்பச்சயபே⁴ஸஜ்ஜபரிக்கா²ரம் பரிபு⁴ஞ்ஜதி, அப்பம் அயாசிதோ. யேஹி கோ² பன ஸப்³ரஹ்மசாரீஹி ஸத்³தி⁴ம் விஹரதி, த்யஸ்ஸ [த்யாஸ்ஸ (க.) அ. நி. 4.87] மனாபேனேவ ப³ஹுலம் காயகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் வசீகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் மனோகம்மேன ஸமுதா³சரந்தி, அப்பம் அமனாபேன; மனாபம்யேவ உபஹாரம் உபஹரந்தி, அப்பம் அமனாபம். யானி கோ² பன தானி வேத³யிதானி பித்தஸமுட்டா²னானி வா ஸேம்ஹஸமுட்டா²னானி வா வாதஸமுட்டா²னானி வா ஸன்னிபாதிகானி வா உதுபரிணாமஜானி வா விஸமபரிஹாரஜானி வா ஓபக்கமிகானி வா கம்மவிபாகஜானி வா, தானிஸ்ஸ ந ப³ஹுதே³வ உப்பஜ்ஜந்தி. அப்பாபா³தோ⁴ ஹோதி, சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஸமணேஸு ஸமணஸுகு²மாலோ ஹோதி.

‘‘யஞ்ஹி தம், பி⁴க்க²வே, ஸம்மா வத³மானோ வதே³ய்ய – ‘ஸமணேஸு ஸமணஸுகு²மாலோ’தி, மமேவ தம், பி⁴க்க²வே, ஸம்மா [மமேவ தம் ஸம்மா (?)] வத³மானோ வதே³ய்ய – ‘ஸமணேஸு ஸமணஸுகு²மாலோ’தி. அஹஞ்ஹி, பி⁴க்க²வே, யாசிதோவ ப³ஹுலம் சீவரம் பரிபு⁴ஞ்ஜாமி, அப்பம் அயாசிதோ; யாசிதோவ ப³ஹுலம் பிண்ட³பாதம் பரிபு⁴ஞ்ஜாமி, அப்பம் அயாசிதோ; யாசிதோவ ப³ஹுலம் ஸேனாஸனம் பரிபு⁴ஞ்ஜாமி, அப்பம் அயாசிதோ; யாசிதோவ ப³ஹுலம் கி³லானப்பச்சயபே⁴ஸஜ்ஜபரிக்கா²ரம் பரிபு⁴ஞ்ஜாமி, அப்பம் அயாசிதோ. யேஹி கோ² பன பி⁴க்கூ²ஹி ஸத்³தி⁴ம் விஹராமி, தே மம் மனாபேனேவ ப³ஹுலம் காயகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் வசீகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் மனோகம்மேன ஸமுதா³சரந்தி, அப்பம் அமனாபேன; மனாபம்யேவ உபஹாரம் உபஹரந்தி, அப்பம் அமனாபம். யானி கோ² பன தானி வேத³யிதானி – பித்தஸமுட்டா²னானி வா ஸேம்ஹஸமுட்டா²னானி வா வாதஸமுட்டா²னானி வா ஸன்னிபாதிகானி வா உதுபரிணாமஜானி வா விஸமபரிஹாரஜானி வா ஓபக்கமிகானி வா கம்மவிபாகஜானி வா – தானி மே ந ப³ஹுதே³வ உப்பஜ்ஜந்தி. அப்பாபா³தோ⁴ஹமஸ்மி, சதுன்னம் கோ² பனஸ்மி [சதுன்னம் கோ² பன (ஸீ.), சதுன்னம் (ஸ்யா. பீ.)] ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ [நிகாமலாபீ⁴ ஹோமி (ஸீ. க.)] அகிச்ச²லாபீ⁴ அகஸிரலாபீ⁴, ஆஸவானம் க²யா…பே… ஸச்சி²கத்வா உபஸம்பஜ்ஜ விஹராமி.

‘‘யஞ்ஹி தம், பி⁴க்க²வே, ஸம்மா வத³மானோ வதே³ய்ய – ‘ஸமணேஸு ஸமணஸுகு²மாலோ’தி, மமேவ தம், பி⁴க்க²வே, ஸம்மா வத³மானோ வதே³ய்ய – ‘ஸமணேஸு ஸமணஸுகு²மாலோ’’’தி. சதுத்த²ம்.